Jamiyat
u uch oyda ikki bor sudlandi
44 yoshli erkak Qarshi tumanidagi xonadonida eshak so‘yib, go‘shtini turli bozorlarda sotib kelgan. Uning xonadonidan 247 kg iste’molga yaroqsiz go‘sht va qariyb 100 ta eshak terisi topilgan. 2026 yil fevral oyida ham eshak go‘shti sabab sudlanib, ozodligi cheklangan erkakka sudya “marhamat ko‘rsatib” yana shu turdagi jazoni tayinladi.
Qashqadaryoda eshak so‘yib sotish bilan shug‘ullanib kelgan shaxs jinoiy jazoga tortildi. U 3 oyda ikkinchi bor shunday qilmishi uchun sudlandi. Sudning unga nisbatan tayinlagan jazosi esa biroz bahsli.
Xonadondagi kushxona
1982 yilda tug‘ilgan I.X. Qashqadaryo viloyatining turli hududlaridan eshaklarni sotib olib, ularni Qarshi tumanidagi xonadonida so‘ygan. Go‘shtini esa turli bozorlarda sotib kelgan.
Sud hujjatiga ko‘ra, I.X. umumiy hisobda 5 marta sudlangan. Shundan bittasi o‘g‘rilik, yana bittasi bosqinchilik bo‘lsa, uchtasi Jinoyat kodeksining 186-moddasi, ya’ni xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish jinoyatiga aloqador.
I.X. 2026 yilning o‘zida ikki marta eshak go‘shti sabab sudlangan.
1-holat
2025 yil 22 oktyabr kuni Qashqadaryo viloyati IIB va Qarshi tumani IIB xodimlari tomonidan tezkor tadbir o‘tkazilgan. Unda I.X.ning yashash xonadonidan iste’molga yaroqsiz bo‘lgan 61 kg go‘sht, 112 ta eshak terisi va 15 ta eshak qovurg‘alari topilgan.
Qo‘zg‘atilgan jinoyat ishi JIB Kasbi tuman sudida ko‘rib chiqilgan. Ushbu sudning 2026 yil 20 fevraldagi hukmi bilan I.X. Jinoyat kodeksining 186-moddasi 1-qismida nazarda tutilgan jinoyatni sodir etishda aybli deb topilgan. Unga 2 yil ozodlikni cheklash jazosi tayinlangan.
2-holat
2025 yil 28 dekabrda ichki ishlar xodimlari I.X.ning xonadonida yana tezkor-tadbir o‘tkazgan. Bu safar iste’molga yaroqsiz 247 kg go‘sht, eshak suyaklari va 99 ta teri topilgan.
Ayni shu kuni Qarshi tumanining Paxtazor mahallasidagi mol bozorida go‘sht sotish bilan shug‘ullanib kelgan fuqaro Yu.A.dan (ayol kishi) 127 kg eshak go‘shti rasmiylashtirib olingan. U ushbu go‘shtni I.X.dan kilosini 60 ming so‘mdan sotib olgan bo‘lgan.
Holat yuzasidan qo‘zg‘atilgan jinoyat ishi JIB Qarshi tuman sudida ko‘rib chiqilgan. Ushbu sudning 2026 yil 13 maydagi hukmi bilan I.X.ga Jinoyat kodeksining 186-moddasi 2-qismi “v” bandi bo‘yicha 3 yil ozodlikni cheklash jazosi tayinlangan. Fevral oyidagi sud hukmi bilan tayinlangan jazoning o‘talmay qolgan qismini qisman qo‘shish orqali jazo muddati 3 yil 25 kunga keltirilgan.
Mazkur jinoyat ishi bo‘yicha Yu.A. ham sudlangan bo‘lib, u Jinoyat kodeksining 186-moddasi 1-qismi bilan 1,5 yil muddatga ozodlikni cheklash jazosiga tortilgan.
“Xotinim kasal”
I.X. sudda aybiga qisman iqror bo‘lgan va xasta turmush o‘rtog‘ini davolatish uchun shu ishga qo‘l urganini aytgan.
“2025 yil avgust oyida hovlimning to‘ridan molxona qurdim. So‘ng Surxondaryoga borib, bir kishidan pulini bo‘lib to‘lash sharti bilan 75 mln so‘mga Ford mashinasini sotib oldim.
Ushbu mashinada Koson va Qamashi tumanlaridagi mol bozorlariga borib, har safar 6-7 ta eshak olib keldim. Keyin ularni so‘yib, go‘shtini Toshkent shahriga qatnovchi haydovchilar bilan kelishgan holda Chorsu bozoriga olib borib, it boquvchi shaxslarga sotib keldim.
Ford mashinasini 2025 yil oxirida sotib yubordim. So‘yilgan eshaklarning teri va ichaklarini Toshkent yo‘lida joylashgan Qo‘ng‘irtog‘ atrofidagi chiqindixonaga olib borib tashladim.
Turmush o‘rtog‘im miya saratoni kasalligiga chalingan. Uni har oy davolatish uchun ko‘p pul kerak bo‘ldi. Shu sababli bu ishlarni qilganman”, degan I.X. ko‘rsatmasida.
U qilmishidan chin ko‘ngildan pushaymonligini aytib, suddan yengillik so‘ragan.
“Qozog‘istonniki dedi”
Yu.A. Qarshi tumanidagi molbozorda kalla-pocha va go‘sht sotib kelgan. U sudda tezkor tadbirda topilgan eshak go‘shtini I.X.dan sotib olganini bildirgan.
“O‘sha kuni mol bozoriga chiqqanimda oldindan tanish bo‘lmagan shaxs kelib, “bu go‘sht Qozog‘istonniki, halol go‘sht, 60 ming so‘mdan sotaman”, dedi. Undan avval ham 20-30 kg go‘sht sotib olganim sababli bu safar yangi yil oldi sotishni maqsad qilib, yig‘ib qo‘ygan pulimga kilosini 60 ming so‘mdan 100 kg go‘sht sotib oldim”, degan ayol o‘z ko‘rsatmasida.
U I.X. bilan oldindan jinoiy til biriktirmaganini aytgan.
“Haftada 2 marta Toshkentda sotib kelardi”
Sudda guvoh sifatida I.X.ning turmush o‘rtog‘i ham so‘ralgan. U o‘z ko‘rsatmasida shunday degan:
“2023 yilda miya saratoni kasalligiga chalinib qoldim. Bundan tashqari, Qarshi shahrida yashovchi qaynotamning ham yurak kasalligi bor. 2024 yil Qarshi tumani G‘ubdin mahallasiga ko‘chib keldik. Turmush o‘rtog‘im meni va qaynotamni davolatish uchun hovliga molxona qurdi. So‘ngra viloyatning turli tumanlaridan eshak olib kelib, shu molxonada so‘ygan holda go‘shtini haftada 2 marta Toshkent shahriga olib borib, sotib kela boshladi. Ularni kimlarga sotayotganini so‘ramaganman”.
Jazo bahsli
JIB Qarshi tuman sudining I.X.ga nisbatan tayinlagan jazosi biroz bahsli.
I.X.ning qilmishi takror sodir etilgani sababli Jinoyat kodeksining 186-moddasi 2-qismi “v” bandi bilan malakalangan. Sud unga ushbu modda bo‘yicha 3 yil ozodlikni cheklash jazosi qo‘llagan.
Jinoyat kodeksiga ko‘ra, ushbu modda uchun BHMning 200 baravaridan 400 baravarigacha miqdorda jarima yoki 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi berilishi nazarda tutilgan. Ammo fevral oyida ayni shunday qilmishi uchun jazoga tortilganiga qaramay, oradan 3 oy o‘tib yana jinoyatga qo‘l urgan sudlanuvchi bu safar ham ochiqda qoldirilgan.
Hukmda keltirilishicha, sud I.X.ga jazo turi va miqdorini belgilashda uning “aybiga iqror va qilmishidan chin ko‘ngildan pushaymonligini, turmush o‘rtog‘i og‘ir kasallikka chalingani, oilaviy ahvolini” jazoni yengillashtiruvchi holatlar deb topgan. Jazoni og‘irlashtiruvchi holatlar esa e’tirof etilmagan, ya’ni topilmagan.
I.X. 3 oy avval ham eshak go‘shti sabab sudlanganida “aybiga iqror va qilmishidan chin ko‘ngildan pushaymon” bo‘lgan.
Shuningdek, I.X. turmush o‘rtog‘ini davolatish maqsadida pul zarurligi sabab shu ishga qo‘l urganini aytgan. Lekin uning suddagi ko‘rsatmasida “2025 yil 28 dekabr kuni soat 7:00 larda o‘ziga tegishli bo‘lgan Malibu mashinasida Qarshi tumanidagi mol bozoriga yangi yil bayramida so‘yib yeyish uchun qo‘zichoq olgani chiqqani” haqida gap bor. Bu I.X. ayolini davolatish uchun Malibu mashinasini sotib ishlatishdek iqtisodiy imkoniyatga ega bo‘lganini anglatadi.
Biroq u Malibu’sini emas, iste’molga yaroqsiz eshak go‘shtini aldab sotishni afzal bilgan hamda bu orqali odamlar sog‘lig‘i va hayotini xavf ostiga qo‘ygan.
Hukmning muhim nuqtasi yashirilgan
I.X.ga nisbatan chiqarilgan sud hukmi Oliy sudning interaktiv xizmatlari portalida e’lon qilingan. Ammo uning asosiy qismi negadir yashirib qo‘yilgan.
Eshak so‘yib sotish bilan bog‘liq jinoyat ishlari oldin ham bo‘lgan. Masalan, o‘tgan yili 47 yoshli erkak Toshkent viloyatining Piskent va O‘rta Chirchiq tumanlari hududida mahalliy aholidan 100-200 ming so‘mga eshak sotib olib, go‘shtini Parkentdagi somsapazning o‘g‘liga pullab kelgani uchun sudlangandi. U Jinoyat kodeksining 186-moddasi 2-qismi “b, v” bandlari bo‘yicha aybli deb topilgan. 3 nafar voyaga yetmagan farzandi bo‘lgan, muqaddam sudlanmagan erkakka Jinoyat kodeksining 57-moddasi qo‘llangan holatda 2 yil ozodlikdan mahrum qilish jazosi tayinlangandi.
Qoraqalpog‘iston Respublikasidagi Ekologiya va iqlim o‘zgarishi milliy qo‘mitasi huzuridagi «Sayg‘ochiy» kompleks landshaft buyurtma qo‘riqxonasida yovvoyi hayvonlarni suv bilan ta’minlash maqsadida beshta avtonom suv ichish tizimi o‘rnatildi.
Tashabbus Ekologiya qo‘mitasi tomonidan BMT Taraqqiyot dasturi (BMTTD) va Global ekologik jamg‘arma (GEF) bilan hamkorlikda «Aral Sea Wetlands» loyihasi doirasida amalga oshirildi.
Suv resurslari cheklangan Ustyurt cho‘li sharoitida qo‘shimcha suv manbalarining mavjudligi sayg‘oqlar va mahalliy faunaning boshqa vakillarini saqlab qolishda muhim ahamiyatga ega.
Avtonom tizimlar quyosh energiyasida ishlaydi va to‘liq avtomatlashtirilgan. Ularning har biri 3 kub metr sig‘imga ega suv havzalari, nasoslar, datchiklar va hisoblagichlar bilan jihozlangan. Bu markazlashgan elektr energiyasi va suv ta’minoti manbalariga doimiy ulanish zaruratisiz suvni barqaror yetkazib berish imkonini beradi.
Suv ichish tizimlari bilan bir qatorda hududga 10 ta kamera va 10 ta fototuzoq ham o‘rnatildi. Ular hayvonlarni sutka davomida kuzatish, harakatlanishi va suv ichish joylaridan foydalanishini qayd etish, shuningdek, populyasiyalar holatini keyingi monitoring qilish uchun ma’lumot to‘plash imkonini beradi.
Ustyurtning og‘ir tabiiy sharoitida yashaydigan sayg‘oqlar uchun qo‘shimcha suv manbalarining yaratilishi yovvoyi hayvonlar populyasiyalarini saqlash va tiklashda muhim ahamiyat kasb etadi.
Avtonom suv ichish tizimlarining o‘rnatilishi Ustyurtda bioxilma-xillikni asrash bo‘yicha amalga oshirilayotgan chora-tadbirlardan biri bo‘lib, zamonaviy kuzatuv vositalari orqali hayvonlar holatini monitoring qilish va zarur ma’lumotlarni to‘plash imkonini ham beradi.
Bir muddat oldin Raqobat qo‘mitasi SSV huzuridagi Xaridlar markazining boshlang‘ich narxi 14 mlrd so‘m bo‘lgan davlat xaridi «Raqobat to‘g‘risida»gi qonun talablariga nomuvofiq deb topilgani sababli bekor qilingani aytilgan edi.
Markaz ushbu holat yuzasidan bergan rasmiy tushuntirish berib, respublika tibbiyot muassasalari uchun 4 ta MSKT uskunasini xarid qilish bo‘yicha o‘tkazilgan tender natijalari bekor qilinganini tasdiqladi.
Markaz ma’lumotiga ko‘ra, maxsus axborot portalida 497870-sonli lot bo‘yicha o‘tkazilgan tender yakunlaridan so‘ng “SKYMED Technologies” MChJ tomonidan e’tiroz xati kelib tushgan.
Murojaat Xarid komissiyasi tomonidan o‘rganilganda, ishtirokchilarning texnik takliflarini baholash jarayonida tibbiyot muassasalari ekspert guruhi tomonidan ayrim texnik xatolarga yo‘l qo‘yilgani aniqlangan.
Xususan, servis xizmati ko‘rsatish bo‘yicha belgilangan mezon asosida g‘olib ishtirokchiga asossiz ravishda qo‘shimcha 1 ball berilgan.
Shundan so‘ng Xarid komissiyasining 2026-yil 18-sentyabrdagi qarori bilan mazkur lot bo‘yicha tender natijalari bekor qilingan.
Shuningdek, Raqobatni rivojlantirish va iste’molchilar huquqlarini himoya qilish qo‘mitasi 21-sentyabr kuni tender yuzasidan o‘rganish o‘tkazish maqsadida ishtirokchilar taqdim etgan hujjatlarni so‘ragan.
Xaridlar markazi 22-sentyabr kuni qo‘mitaga javob yo‘llab, tender natijalari bekor qilingani va bunga sabab bo‘lgan holatlar haqida ma’lumot bergan.
Markazning ta’kidlashicha, tender natijalarining bekor qilinishi texnik baholash jarayonida aniqlangan xatolar bilan bog‘liq bo‘lib, qaror Xarid komissiyasi tomonidan o‘rganish yakunlariga ko‘ra qabul qilingan.
O‘zbekistonda Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi yagona Ta’lim va ilm-fan vazirligi sifatida qayta tashkil etildi.
Bu Prezident farmonida belgilandi.
Yangi vazirlik maktabgacha ta’limdan boshlab oliy ta’lim va ilmiy faoliyatgacha bo‘lgan yo‘nalishlarni yagona boshqaruv tizimiga birlashtiradi.
Islohotdan asosiy maqsad mamlakatda ta’lim, tarbiya va ilm-fanning yaxlit tizimini zamon talablari asosida tashkil etish, ta’lim sifati va samaradorligini oshirish hamda inson kapitalini rivojlantirish bo‘yicha ishlarni yangi bosqichga olib chiqishdan iborat.
Shuningdek, ta’limning barcha bosqichlari o‘rtasida uzviylik va davomiylikni ta’minlash ko‘zda tutilgan. Ya’ni maktabgacha ta’lim, maktab ta’limi, oliy ta’lim va ilmiy faoliyat yagona tizim doirasida muvofiqlashtiriladi.
Farmonda sohada samarali boshqaruv tizimini joriy qilish, turli ta’lim bosqichlari o‘rtasidagi hamkorlikni kuchaytirish va vazirlikning jamoatchilik oldidagi hisobdorligini oshirish ham nazarda tutilgan.
Yangi tuzilma orqali ta’lim va ilm-fan sohasida davlat siyosatini yagona yondashuv asosida amalga oshirish maqsad qilingan.
Jamiyat
Administratsiya huzurida maxsus ishchi guruh tuzildi va unga Zafar Hoshimov rahbar etib tayinlandi
Prezident matbuot xizmatining ma’lum qilishicha, davlat rahbari Ta’lim va ilm-fan vazirligini tashkil etish to‘g‘risidagi farmonni imzolar ekan, ta’lim sifatini oshirish va sohani yangi bosqichga olib chiqish uchun yangicha yondashuvlarni qo‘llash, bozor talablariga mos ta’limni, raqobatni hamda xususiy sektor ishtirokini rivojlantirish vazifasini qo‘ygan.
Shu maqsadda Prezident Administratsiyasi huzurida Inson kapitalini rivojlantirish va uzluksiz ta’lim strategiyasi bo‘yicha umummilliy konsepsiyani ishlab chiqadigan maxsus ishchi guruh tashkil etilmoqda. Unga jamoatchilik asosida tadbirkor Zafar Hoshimov rahbarlik qiladi.
Guruh tarkibiga ta’lim muassasalarini yo‘lga qo‘yish va samarali tizimlar yaratishda tajribaga ega tadbirkorlar, soha mutaxassislari, olimlar hamda xalqaro ekspertlar jalb qilinadi.
Prezident matbuot kotibi Sherzod Asadov ta’lim tizimidagi so‘nggi o‘zgarishlar yuzasidan izoh berdi.
Uning qayd etishicha, ikki vazirlikni birlashtirishdan asosiy maqsad — ta’limning barcha bosqichlarini yagona tizimda boshqarish va sifatni alohida nazorat qilishdan iborat.
Yangi Ta’lim va ilm-fan vazirligi bog‘cha, maktab, professional va oliy ta’lim muassasalari faoliyatini tashkil etish, ularning operatsion jarayonlari, ta’lim talablari, litsenziyalash va akkreditatsiya uchun mas’ul bo‘ladi.
Ta’lim sifatini ta’minlash milliy agentligi esa o‘quv dasturlari, qo‘llanmalar va metodik materiallarni ishlab chiqish, ularni amaliyotga joriy etish va natijalarini tahlil qilish bilan shug‘ullanadi. Bu jarayon «O‘zbek maktabi bitiruvchisining portreti» asosida yo‘lga qo‘yiladi. Prezidentning 28 sentyabrdagi taqdimotida ham yangi maktab bitiruvchisi modelida zamonaviy ko‘nikmalar, mustaqil fikrlash va qaror qabul qilish qobiliyatiga urg‘u berilgan edi.
Prezident Administratsiyasi va uning huzuridagi maxsus ishchi guruh yangi vazirlik tuzilmasi, ish jarayonlari hamda islohotning umumiy strategiyasini ishlab chiqadi.
Oliy ta’limda esa davlat aralashuvini kamaytirish, oliygohlar mustaqilligini kengaytirish, nodavlat sektor uchun imkoniyatlarni oshirish va sifatni raqobat hamda bozor talabi orqali shakllantirish ko‘zda tutilgan.
Dollar kursi tinimsiz ko‘tarilib boryapti
Ustyurtda sayg‘oqlar uchun beshta avtonom suv ichish tizimi o‘rnatildi
SSV 4 ta MSKT xaridi bo‘yicha bekor qilingan tender xususida tushuntirish berdi
-
Jamiyat2 days ago
O‘zbekistonda Ta’lim va ilm-fan vazirligi tashkil etildi
-
Jamiyat2 days ago
SSV 4 ta MSKT xaridi bo‘yicha bekor qilingan tender xususida tushuntirish berdi
-
Jamiyat1 day ago
Ustyurtda sayg‘oqlar uchun beshta avtonom suv ichish tizimi o‘rnatildi
-
Jamiyat3 days ago
Sherzod Asadov ta’lim sohasidagi yangilanishlarning asosiy mazmunini tushuntirdi
-
Iqtisodiyot2 days ago
Dollar, yevro va rublning yangi qiymatlari belgilandi
-
Jamiyat3 days ago
Administratsiya huzurida maxsus ishchi guruh tuzildi va unga Zafar Hoshimov rahbar etib tayinlandi
-
Iqtisodiyot6 hours ago
Dollar kursi tinimsiz ko‘tarilib boryapti