Siyosat
Rossiya, AQSh va Xitoy bilan muvozanat qanday ushlab turilibdi? (2-maqola)
Global geosiyosiy o‘yinlarning qoq markazida joylashgan Markaziy Osiyoning yuragi bo‘lgan O‘zbekiston – barcha mamlakatlar bilan do‘stona munosabatlar o‘rnatishga intilayotgan, jahon siyosiy sahnasida “nozik muvozanatni ushlab kelayotgan o‘yinchi” sifatida yaqqol namoyon bo‘lmoqda.
“Yopiq eshiklar ortidan – ochiq dunyo sari: O‘zbekiston tashqi siyosatidagi keskin burilish” sarlavhali birinchi maqolada bir paytlar yopiq, bir yo‘nalishli siyosat bilan cheklangan mamlakatimiz endi dunyo diplomatiyasining faol ishtirokchisiga aylangani haqida mulohaza yuritgan edik.
Ikkinchi maqolada yangi tashqi siyosatning ustuvor yo‘nalishi –iqtisodiy diplomatiya hamda global o‘yinchilar bilan olib borilayotgan muvozanatlashgan siyosat haqida so‘z yuritamiz.
Ikki davr, ikki xil manzara
Ilgari diplomatik tashriflar asosan shakliy maqsadlarga qaratilgan bo‘lardi. Agar Prezident biror mamlakatga borsa, unga asosan investitsiya vaziri va uch-to‘rtta davlat kompaniyalari vakillari hamrohlik qilardi. Erkin konvertatsiya yo‘qligi masalasi birinchi bo‘lib ko‘tarilar, bu borada hech kim aniq hech gap ayta olmas va xorijiy hamkorlarning ham hafsalasi pir bo‘lardi.
Oliy darajadagi tashriflar avvalida to‘rt-beshta gazeta-jurnallarda O‘zbekiston haqida maqolalar chop etilib, shunchaki imijni oqlashga harakat qilinardi.
Muzokaralar ko‘pincha bir tomonlama ko‘rinishda bo‘lar, unda yurtimizda birorta xususiy biznes ishtirok etmasdi. Investitsiya, eksport yoki import haqida chuqur gap ketmas, biznes-forumlar o‘tkazilmas, gapning po‘stkallasini aytganda, real investitsiyaviy natijalarga erishilmasdi.
Bugunchi? Hozir tashriflarga tizimli yondashilyapti. Juda katta guruhlar, ayniqsa xususiy kompaniyalar alohida jalb etilyapti. Yangi tashqi siyosatning eng muhim ustuvorligi – iqtisodiy diplomatiya bo‘lmoqda.
Rasmiy uchrashuvlarda katta xususiy biznes delegatsiyalari, yirik investorlar, mintaqaviy kompaniyalar faol ishtirok etyapti. Ilgari deyarli ko‘rinmagan xususiy sektor – tashqi siyosatning iqtisodiy kun tartibida muhim ustuniga aylandi.
Yangi ishtirokchilar
Hozir kamida 15-20 nafar yirik tadbirkorlardan iborat delegatsiyalar jahon bo‘ylab faol muloqot olib boryapti. Ular tashqi iqtisodiy aloqalarning no-formal elchilariga aylanmoqda.
Bu o‘ziga xos “ijtimoiy kapital”ning shakllanayotganini bildiradi. Bunda biznes diplomatiyasi, tadbirkorlik salohiyati va milliy brend bir nuqtada birlashmoqda.
Yangi siyosat natijasida har bir tashrif doirasida ikki tomonlama biznes-forum o‘tkazilyapti, mahalliy va xorijiy kompaniyalar o‘rtasida real shartnomalar imzolanmoqda, investitsiya loyihalari soni va sifati sezilarli oshdi, IT, “yashil energetika”, turizm, agrosanoat kabi sohalarda yangi imkoniyatlar ochilyapti.
Har bir tashrifdan keyin qator loyihalar boshlanmoqda. Bugungi kunda 100dan ortiq xorijiy davlatlar bilan ko‘p milliard dollarga teng bo‘lgan o‘n mingdan ortiq foydali loyihalar amalga oshirilmoqda.
Umuman olganda, yurtimizda ishlayotgan investorlarning faolligi oshib, so‘nggi ikki yilda chet el kapitali ishtirokidagi 5,5 mingta yangi korxona tashkil etildi. Ularning umumiy soni 16 mingtaga yetdi.
Xalqaro hamkorlarga hurmat
O‘zbekistonning tashqi siyosatidagi yana bir jihat – har bir tashrif, muzokara va uchrashuvlarda kichik detallargacha inobatga olinyapti.
Tashqi siyosatimizda tashriflarga, o‘zaro munosabatlarga, xalqaro tadbirlarga nihoyatda yuqori darajada tayyorgarlik ko‘rilyapti. Kichik masalaning o‘zi yo‘q. Avvallari bunga ko‘p e’tibor qilinmasdi.
Hozir Prezident Shavkat Mirziyoyev onlayn rejimida, juda mobil tarzda ishlayotganini butun xalqimiz ko‘rib va sezib turibdi. Davlat rahbarining nutqlarini qarasangiz ham, har bir xalqaro chiqishlarini kuzatsangiz ham bu holat yaqqol seziladi. Nihoyatda tezkorlik bilan ishlanyapti.
Bu ham Prezidentimizning o‘ta talabchanligi, ham xalqaro hamkorlarga nisbatan alohida e’tiborli, barcha davlatlar bilan o‘zaro hurmat ruhida yondashayotganining mahsulidir.
Muvozanatlashgan siyosat: Xitoy, Rossiya, AQSh bilan munosabatlar
Ilgari kuch markazlari, ayniqsa, katta davlatlar bilan munosabatlarda anchayin qiynalardik. Hammasi bilan masofa saqlagan holda, ba’zan manfaat keltirib tursa-da voz kechardik. Rossiyami, Xitoymi, AQShmi, boringki, Pokiston, Saudiya Arabistoni yoki Turkiyami – ularning barchasidan hadiksirab, o‘zimizdan uzoqroq ushlardik.
Tashqi dunyoga nisbatan yalpi ishonchsizlik oxir-oqibat O‘zbekistonga nisbatan umumiy ishonchsizlikni keltirib chiqardi.
Hozir bunday emas va Prezident Shavkat Mirziyoyev barcha hamkorlar bilan yaqin munosabatlarni yo‘lga qo‘ya oldi. Ishoning, bu global o‘yinchilar bilan muvozanatlashgan siyosat olib borish oson emas. Ularning qaysidir biri bilan “yomonlashish” qanday oqibatlarga olib kelishi mumkinligini bugun hamma ko‘rib turibdi.
“Markaziy Osiyoning markazida joylashgan O‘zbekiston xalqaro siyosiy bosimlar o‘rtasida yuribdi. Vashington, Pekin va Moskvada qabul qilinayotgan har bir qarorning aks-sadosi Toshkentda yangraydi”, dedi yaqinda CNN telekanalining taniqli muxbiri va xalqaro tahlilchi Richard Kvest.
Uning ta’kidlashicha, geosiyosiy o‘yinning qoq markazida joylashgan O‘zbekiston – barcha bilan do‘stona munosabat o‘rnatishga intilayotgan davlat sifatida dunyo siyosiy sahnasida muvozanatni ushlashga harakat qilmoqda.
O‘zbekiston rahbariyati bugungi kunda “hech kimga qarshi emas, barcha bilan do‘st” degan siyosat yuritmoqda.
Kvest o‘z reportajini tarixiy misol bilan yakunlaydi: Samarqanddagi Registon maydoni Ipak yo‘li davrida g‘oyalar va savdolar kesishgan markaz bo‘lgan. Bugun esa bu maydon O‘zbekiston tashqi siyosatining ramziga aylangan – boshqa davlatlar bilan do‘stlik va barcha manbalardan sarmoya qabul qilish siyosatining ifodasi.
Samarqand – O‘zbekiston diplomatiyasining yuragiga aylanmoqda
Samarqand xalqaro tadbirlar o‘tkaziladigan nafaqat mintaqaviy, balki global platformaga aylandi. Bu yerda juda samarali muloqot maydoni yaratildi. O‘zbekistonning yirik tadbirlari, xalqaro tashkilotlarning muhim va e’tiborli anjumanlari ham shu yerda o‘tayapti.
Oxirgi yillarning o‘zida Samarqand bir nechta xalqaro – Shanxay hamkorlik tashkiloti sammiti, Xalqaro turizm tashkiloti Bosh assambleyasi, Parlamentlararo forumlar va boshqa tadbirlarga mezbonlik qildi. Shu kunlarda davlat boshqaruvi sohasidagi eng nufuzli anjuman – BMT Davlat xizmati forumi (UNPSF 2025) ham qadimiy shahrimizda o‘tkaziladi. Ilgari tasavvurga ham sig‘maydigan, manaman degan xalqaro tashkilotlarning yillik anjumanlari o‘tadigan muloqot maydoniga aylanyapti bu maskan.
Mutaxassislarga ko‘ra, Samarqandni ham xuddi Nyu-York, London, Parij, Dubay, Jeneva kabi jahon ahamiyatiga molik katta anjumanlarga mezbonlik qiladigan markazga aylantirish maqsad qilingan. Bu – O‘zbekistonning nufuzini dunyoga olib chiqishga qaratilgan juda katta ambitsiya. O‘tgan davrda zarur infratuzilma, kerakli shart va sharoitlar barchasi yaratildi.
Buyuk mutafakkir va ulamo Imom Buxoriy hazratlarining maqbarasi atrofidagi ulkan majmua ochilishini esa butun musulmon dunyosi katta intiqlik bilan kutmoqda va bu yo‘nalish bo‘yicha hali alohida maqolamizni e’lon qilamiz.
Barchaga ayonki, O‘zbekiston to‘g‘ridan-to‘g‘ri dengizga chiqa olmaydi. Lekin bugun mamlakat Buyuk Ipak yo‘lining yangilangan quruqlik xabiga aylanmoqchi. Qanday qilib?
Bunda raqamli iqtisodiyot, ta’lim va intellektual salohiyatga, mehnatkash va yuqori malakali inson kapitaliga tayanilayotir.
Strategik transport koridorlari – Xitoy-Qirg‘iziston-O‘zbekiston temir yo‘l qurilishiga start berilgan, Transafg‘on temir yo‘lini bunyod etish bo‘yicha yirik sarmoyadorlar bilan faol muzokaralar olib borilmoqda. Ya’ni, geografik cheklovni bilim va texnologik salohiyat, modernizatsiya orqali kompensatsiya qilishga harakat qilinmoqda. Bunda faol, pragmatik tashqi siyosat hamda iqtisodiy diplomatiyaning o‘rni katta bo‘lmoqda.
Lutfullo Tursunov, jurnalist
Prezident Shavkat Mirziyoyevning davlat mustaqilligining 35 yilligi munosabati bilan so‘zlagan tabrigidan asosiy fikrlar:
Buyuk istiqlolimizning ildizlari uch ming yildan ziyod bo‘lgan davlatchilik an’analarimiz va qadimiy sivilizatsiyamiz tarixiga borib taqaladi;
Mustaqillik, eng avvalo, bizga shonu sharafimizni, muqaddas dinimizni, ona tilimizni, unutilayotgan milliy qadriyatlarimizni qaytarib berdi;
Bugungi erkin hayot uchun jonini fido qilgan ulug‘ ajdodlarimiz, jadidlar xotirasiga ta’zim bajo keltiramiz;
Birinchi Prezidentimiz, atoqli davlat va siyosat arbobi Islom Abdug‘aniyevich Karimovning yorqin xotirasini ehtirom bilan yod etamiz;
Islohotlarni boshlagan birinchi kunlardanoq xalqning qalbiga quloq soldik, aholining dardiga darmon bo‘lishni maqsad qildik;
«Paxta qulligi», «majburiy mehnat va bolalar mehnati», «konvertatsiya cheklovi», «propiska» kabi odamlarni yillar davomida qiynab kelgan muammolarga barham berdik;
Har bir inson erkin va farovon yashaydigan jamiyatni barpo etish uchun keyingi 10 yilda tinimsiz izlandik, qattiq mehnat qildik. O‘zbekistonni dunyoga keng ochdik;
2030 yilga borib yalpi ichki mahsulot hajmini 160 milliard dollarga yetkazishni reja qilgan edik. Bu vazifani shu yilning o‘zida ortig‘i bilan amalga oshiramiz va daromadi o‘rtachadan yuqori bo‘lgan davlatlar qatoriga kiramiz;
Bugungi kunda kambag‘allik darajasini 2017-yildagi 35 foizdan 4 foizga tushirishga erishdik. 10 million nafar insonning turmush sifati yaxshilandi;
Mamlakatimiz oliy ta’lim muassasalari talabalarining yarmidan ko‘pini qizlar va ayollar tashkil etadi. Bilimli qizlar — bilimli oila, bilimli avlod, ma’rifatli jamiyat deganidir;
Ta’lim bilan bir qatorda ilm-fan, zamonaviy texnologiya va innovatsiyalarni ham taraqqiyotimizning hal qiluvchi omili deb bilamiz;
Mening niyatim: O‘zbekiston texnologiya sohalarida jahonga ilg‘or tashabbuslarni taklif qiladigan markazga aylanishi zarur.
Aholining o‘rtacha umr ko‘rish davomiyligi 1991-yildagi 66,4 yoshdan 2025-yilda 75,4 yoshga yetgani, go‘daklar va onalar o‘limi ko‘rsatkichi 4 barobar kamaygani sohadagi islohotlarimizning eng muhim natijasidir;
Mamlakatimiz taraqqiyotning mutlaqo yangi davriga qadam qo‘ymoqda. Kelgusi o‘n yillik biz uchun milliy yuksalish davri bo‘ladi;
Kelgusi yillarda yurtimizda inson qadrini yanada yuksaltiradigan 7 ta milliy dasturni amalga oshiramiz;
Birinchi milliy dastur bilim va malakani kelgusi taraqqiyotimizning asosiy kapitaliga aylantirishdan iborat bo‘ladi;
Tibbiyotda profilaktikani kuchaytirish orqali salomatlikni asrash modeliga o‘tamiz. Davlat tibbiy sug‘urtasi mamlakatning barcha xonadonlariga kirib boradi;
2030-yilgacha yalpi ichki mahsulot hajmi 300 milliard dollarga yetkaziladi;
To‘rtinchi milliy dastur suv va tabiatga munosabatni tubdan o‘zgartirishga qaratiladi;
Fuqarolar va tadbirkorlarning qonuniy kafolatlarini kuchaytirish bo‘yicha islohotlarimizni qat’iy davom ettiramiz;
Mahalla jamiyat taraqqiyotining asosiy buyurtmachisiga aylantiriladi;
O‘zbekistonni xalqaro diplomatiyaning muhim markaziga aylantirish uchun ko‘p qirrali, vazmin va muvozanatli tashqi siyosatni davom ettiramiz;
Biz bugun kechagidan kuchlimiz. Nasib etsa, ertaga bundan ham kuchli bo‘lamiz;
Xalq va davlat yagona maqsad yo‘lida birlashib, astoydil harakat qilsa, zabt etib bo‘lmaydigan marraning o‘zi yo‘q. Bunday buyuk qudratga ega xalq va davlatni yenga oladigan kuchning o‘zi yo‘q;
Matonatli, mard va olijanob xalqimiz o‘z oldiga qo‘ygan ulug‘ maqsadlarga albatta yetadi.
Prezident matbuot kotibi Sherzod Asadov Toshkentdagi Islom sivilizatsiyasi markazida o‘tkazilayotgan «Islom sivilizatsiyasi: yangi dunyo, yangi tashabbuslar» xalqaro media forumida nutq so‘zladi.
Forumda Sherzod Asadov zamonaviy jurnalistika oldida turgan tahdidlar, sun’iy intellekt, so‘z erkinligi, milliy media va jurnalistning jamiyatdagi o‘rni haqida fikr bildirdi.
«Bugun axborot chegara bilmaydi. Bir voqea haqidagi xabar sanoqli soniyalarda millionlab odamlarga yetib boradi. Biroq axborot bilan birga yolg‘on, manipulyasiya, feyk xabarlar va axborot xurujlari ham tez tarqalmoqda. Shuning uchun bugun jurnalistika oldidagi eng muhim vazifalardan biri — ishonchli axborotni ta’minlashdir», — dedi u.
Sherzod Asadov sun’iy intellektning jurnalistikaga jadal kirib kelayotganiga ham to‘xtaldi. Uning ta’kidlashicha, sun’iy intellekt jurnalistning o‘rnini bosmaydi, aksincha, uning imkoniyatlarini kengaytiradi.
«Texnologiyalar qanchalik rivojlanmasin, jurnalistikaning asosiy mezonlari — haqiqat, xolislik, vijdon va inson manfaatiga xizmat qilish tamoyillari o‘zgarmasligi kerak», — dedi Prezident matbuot kotibi.
U, shuningdek, zamonaviy jurnalistikaning bugungi global muammolardan biri sifatida haqiqiy so‘z erkinligi inqirozi masalasini ko‘tardi. Ayrim hollarda so‘z erkinligining siyosiy bosim vositasiga aylanishi jurnalistikaning xolisligi va ishonchliligiga putur yetkazayotganini qayd etdi.
Sh.Asadovga ko‘ra, milliy manfaatlarni himoya qilish dunyodan yopilish degani emas. Aksincha, bu — faktlarga tayanish, voqealarni xolis tahlil qilish va jamiyat bilan ochiq muloqot o‘rnatishdir.
Prezident matbuot kotibi jurnalistning vazifasi faqat axborot yetkazish bilan cheklanmasligini ham ta’kidladi. Jurnalist odamlarning dardu tashvishini eshitadi, muammolarini ko‘taradi va jamoatchilik ovozining davlat idoralariga yetib borishini ta’minlaydi.
Shu bilan birga, Sherzod Asadov forumning Islom sivilizatsiyasi markazida o‘tkazilayotgani o‘ziga xos ramziy ma’noga ega ekanini ta’kidladi. Prezident tashabbusi bilan barpo etilgan ushbu maskan xalqimizning ko‘p ming yillik ilmiy va ma’naviy merosini jahonga tanitishga xizmat qiladi.
Uning ta’kidlashicha, Xorazmiy, Beruniy, Ibn Sino, Imom Buxoriy, Imom Termiziy, Imom Moturidiy, Ulug‘bek va Alisher Navoiy kabi buyuk allomalar merosi butun bashariyatning bebaho boyligidir. Xorazmiy nomi bugun «algoritm» atamasida yashab kelayotgani ham ajdodlarimiz merosi zamonaviy ilm-fan va texnologiyalar bilan uzviy bog‘liqligini ko‘rsatadi.
Sh.Asadov milliy merosni faqat muzey va kitoblarda saqlash bilan cheklanmasdan, uni zamonaviy raqamli formatlarda, yosh avlodga tushunarli tilda va jahon jamoatchiligiga xolis yetkazish zarurligini ta’kidladi.
Давлатимиз раҳбари Шавкат Мирзиёев ва Озарбайжон Президенти Илҳом Алиев рафиқалари ҳамроҳлигида Бухоронинг жаҳонга машҳур тарихий обидалари – Сомонийлар мақбараси, Арк қўрғони, Пойи Калон ва Лаби Ҳовуз мажмуалари, Кўкалдош мадрасасини зиёрат қилдилар.
Олий мартабали меҳмонларга ушбу ноёб обидаларнинг тарихи, меъморий хусусиятлари ҳамда Шарқда илм-фан, маданият ва шаҳарсозлик ривожидаги аҳамияти ҳақида батафсил маълумот берилди.
Ташриф Исмоил Сомоний томонидан барпо этилган Сомонийлар мақбарасидан бошланди. Ушбу обида 1993 йилда ЮНЕСКОнинг Умумжаҳон мероси рўйхатига киритилган.
Шундан сўнг етакчилар кўп асрлар давомида Бухоронинг сиёсий ва маъмурий маркази бўлиб келган қадимий Арк қалъасига ташриф буюрдилар. Археологик ва тарихий маълумотларга кўра, қалъа узоқ давр мобайнида шаклланиб келган ва яқин ўтмишдан бошлаб Бухоро ҳукмдорларининг қароргоҳи вазифасини бажарган. Бугунги кунда Арк шаҳарнинг энг машҳур обидаларидан бири ва Бухоро тарихий марказининг муҳим қисми ҳисобланади.
Пойи Калон мажмуаси – Марказий Осиёнинг энг салобатли меъморий мажмуаларидан бири. 1127 йилда бунёд этилган машҳур Калон минораси мажмуанинг энг эътиборли иншооти бўлиб, асрлар давомида нафақат Бухоро меъморчилиги намунаси, балки шаҳарнинг ҳақиқий “ташриф қоғози” бўлиб хизмат қилиб келмоқда.
Ансамбл таркибига XVI аср бошларига оид Калон масжиди ва Мир Араб мадрасаси ҳам киради. Ушбу мажмуа ҳақли равишда Шайбонийлар давридаги тарихий Бухоронинг дурдоналаридан бири ҳисобланади.
Олий мартабали меҳмонларда Лаби Ҳовуз мажмуаси ҳам катта таассурот қолдирди. У қадимий ҳовуз атрофида қурилган ва эски Бухородаги энг машҳур жамоат масканларидан бири ҳисобланади.
Бу ерда Кўкалдош мадрасаси, Нодир Девонбеги мадрасаси ва хонақоҳи жойлашган. Шаҳарнинг ушбу гўшаси асрлар давомида аҳоли, сайёҳлар ва илм аҳлини ўзига жалб қилувчи маскан бўлиб келган ҳамда ўрта асрлардаги Бухоронинг бетакрор муҳитини бугунги кунгача сақлаб қолган.
Ташриф давомида халқ ҳунармандчилиги намуналари ҳамда тарихий обидаларга туширилган бадиий безакларнинг хусусиятлари ҳам намойиш этилди.
Озарбайжонлик меҳмонларга Бухоронинг Буюк Ипак йўлидаги ислом цивилизациясининг энг йирик илм-фан, таълим ва савдо марказларидан бири сифатидаги кўп асрлик тарихи ҳақида сўзлаб берилди.
O‘zbekiston Respublikasi Prezidenti Shavkat Mirziyoyev Amerika Qo‘shma Shtatlari Kongressi Vakillar palatasining kongressmenlar Jeyson Smit, Greg Merfi, Ronni Jekson va Edvard Keysdan iborat delegatsiyasini qabul qildi.
Uchrashuv avvalida amerikalik qonun chiqaruvchilar O‘zbekiston Prezidenti va xalqini mamlakatimiz mustaqilligining 35 yilligi bilan samimiy qutladilar.
O‘zbekiston va AQSh o‘rtasidagi strategik sheriklik munosabatlarini yanada mustahkamlash hamda parlamentlararo hamkorlikni rivojlantirish masalalari ko‘rib chiqildi.
Ikki tomonlama munosabatlarda ijobiy sur’at kuzatilayotgani, siyosiy muloqot yuqori darajada ekani, aloqalar va o‘zaro tashriflar faollashgani mamnuniyat bilan qayd etildi. Ikki mamlakat yetakchilari yaqinda bo‘lib o‘tgan telefon orqali muloqot chog‘ida strategik sheriklikni yanada kengaytirishning ustuvor yo‘nalishlarini belgilab oldilar.
Savdo-iqtisodiy hamkorlikni rivojlantirishga alohida e’tibor qaratildi. Joriy yil boshidan o‘zaro savdo hajmi 20 foizga oshdi. Energetika, muhim minerallar, transport, qishloq xo‘jaligi, raqamli texnologiyalar va sanoat sohalarida yirik loyihalarni boshlash va amalga oshirishni nazarda tutuvchi uch yillik Iqtisodiy hamkorlik dasturi izchil amalga oshirilmoqda.
O‘zbekistonda amalga oshirilayotgan keng ko‘lamli islohotlarni qo‘llab-quvvatlashda, shuningdek, ikki mamlakat o‘rtasidagi konstruktiv va o‘zaro manfaatli muloqotni ilgari surishda AQSh Kongressining muhim o‘rni qayd etildi.
Hududlararo hamkorlikni kengaytirishga alohida e’tibor qaratildi. AQSh delegatsiyasi a’zolari vakillik qilayotgan Missuri, Shimoliy Karolina, Texas va Gavayi shtatlari bilan to‘g‘ridan-to‘g‘ri aloqalarni yanada rivojlantirish va qo‘shma loyihalarni amalga oshirishga tayyorlik bildirildi.
Mintaqaviy va xalqaro ahamiyatga molik dolzarb masalalar yuzasidan ham fikr almashildi.
Uchrashuv yakunida ishbilarmonlik missiyalarining o‘zaro tashriflarini tashkil etishga kelishib olindi.
Кўксарой қароргоҳида мамлакатимизга давлат ташрифи билан келган Озарбайжон Республикаси Президенти Илҳом Алиевни тантанали кутиб олиш маросими бўлди.
Икки давлат байроқлари билан безатилган майдонда Озарбайжон Президенти шарафига фахрий қоровул саф тортди.
Ўзбекистон Республикаси Президенти Шавкат Мирзиёев олий мартабали меҳмонни самимий кутиб олиб, шоҳсупага таклиф қилди. Ўзбекистон ва Озарбайжон давлат мадҳиялари янгради.
Етакчилар фахрий қоровул сафи олдидан ўтиб, расмий делегациялар аъзоларини қутладилар.
Биргаликда суратга тушилгандан сўнг олий даражадаги музокаралар бошланди.
Кўксарой қароргоҳида Ўзбекистон Республикаси Президенти Шавкат Мирзиёев ва Озарбайжон Республикаси Президенти Илҳом Алиев тор доирада учрашув ҳамда Олий давлатлараро кенгашнинг учинчи йиғилишини ўтказдилар.
Музокараларда Ўзбекистон – Озарбайжон стратегик шериклик ва иттифоқчилик муносабатларини янада ривожлантириш масалалари кўриб чиқилди.
Давлатимиз раҳбари Озарбайжон Республикаси Президентининг бу галги давлат ташрифи тарихий воқеа эканини алоҳида таъкидлади.
– Саммит якунида Абадий дўстлик тўғрисидаги шартноманинг имзоланиши бунинг тасдиғи бўлади. Энг муҳими, стратегик шериклик ва иттифоқчилигимизнинг ҳар бир банди аниқ натижалар ва амалий ҳаракатларда ўз ифодасини топади, – деди Шавкат Мирзиёев.
Етакчилар икки томонлама алоқалар жадал ривожланиб бораётганини қайд этдилар. Парламентлар, ҳукуматлар ва тармоқлар ўртасида мунтазам мулоқот йўлга қўйилган.
Ташрифга тайёргарлик доирасида Ҳукуматлараро комиссия, Ишбилармонлар кенгаши йиғилишлари ва Ҳудудлар форуми муваффақиятли ўтказилди.
Сўнгги беш йилда ўзаро товар айирбошлаш ҳажми 3 баробарга ортди. Энергетика, кимё, кончилик, тўқимачилик, қишлоқ хўжалиги, шаҳарсозлик ва бошқа йўналишларда кооперация лойиҳалари амалга оширилмоқда.
Товар айирбошлаш ҳажмини 1 миллиард долларга етказиш имкониятлари мавжудлиги қайд этилди. Аниқ чора-тадбирларни ўз ичига олган дастур қабул қилинаётгани мазкур муҳим маррага эришиш учун мустаҳкам замин яратади.
Йиғилиш доирасида янги кооперация лойиҳаларини бажаришга старт берилади. Бундай ташаббусларни қўллаб-қувватлаш мақсадида Қўшма инвестиция компанияси маблағларини фаол жалб этиш муҳимлиги таъкидланди.
Икки мамлакат ўртасидаги ўзаро боғлиқликни кучайтириш, Ўрта йўлакни биргаликда ривожлантириш зарурлиги кўрсатиб ўтилди.
Етакчилар маданият, таълим, ёшлар сиёсати ва спорт соҳаларидаги фаол алмашинувларни давом эттиришга келишиб олдилар.
Бугун Низомий Ганжавий номидаги Миллий педагогика университетининг янги биноси очилади ҳамда Янги Тошкентда “Озарбайжон” боғини барпо этиш ишлари бошланади.
Икки халқни янада яқинлаштириш мақсадида “Низомий Ганжавий ва Алишер Навоий ўртасидаги адабий кўприк” мавзусида қўшма кинофильм яратиш таклиф этилди.
Жорий йилнинг кузида Озарбайжонда етакчи олий таълим муассасалари ректорларининг иккинчи форуми бўлиб ўтади.
2027 йилда мамлакатларимизда муҳим спорт воқеаси – футбол бўйича ёшлар ўртасидаги жаҳон чемпионати бўлиб ўтади. Бу борада қўшма спорт, маданият ва ёшларга оид тадбирларни ўтказишни назарда тутувчи кенг кўламли “Икки мамлакат – бир чемпионат” дастури ишлаб чиқилади.
Давлат раҳбарлари халқаро ва минтақавий кун тартибидаги долзарб масалалар юзасидан ҳам фикр алмашдилар.
Йиғилишда Ҳукуматлараро комиссия ҳамраисларининг ахборотлари тингланди.
Эришилган келишувларни ўз вақтида ва сифатли амалга оширишга қаратилган “йўл харитаси”ни қабул қилишга қарор қилинди.
Якунда банк-молия, қурилиш материаллари, таълим, нефть-газ, туризм, уй-жой қурилиши, тоғ-кон саноати ва қишлоқ хўжалиги соҳаларидаги қўшма лойиҳаларни амалга оширишга старт берилди
EChL 2026/2027. Umumiy guruh bosqichi taqvimi e’lon qilindi
Prezidentning Mustaqillik bayrami tabrigidan o‘rin olgan asosiy fikrlari
Oziq-ovqat ishlab chiqarishda qaysi hududlar yetakchi?
-
Siyosat5 days ago
«Milliy manfaatlarni himoya qilish dunyodan yopilish degani emas» — Sherzod Asadov
-
Iqtisodiyot4 days ago
Oziq-ovqat ishlab chiqarishda qaysi hududlar yetakchi?
-
Iqtisodiyot4 days agoPrezident ishtirokida umumiy qiymati 50 trln so‘mlik loyihalar ishga tushirildi
-
Siyosat1 day ago
Prezidentning Mustaqillik bayrami tabrigidan o‘rin olgan asosiy fikrlari
-
Sport9 hours ago
EChL 2026/2027. Umumiy guruh bosqichi taqvimi e’lon qilindi