Sport
Modrich «Real»ni tark etadi
Kevin de Bryuyne, Tomas Myuller va Jyeymi Vardi kabi yulduzlar ortidan xorvatiyalik yarimhimoyachi ham qadrdon klubi bilan xayrlashdi.
Foto: Angel Martinez / Getty Images
Luka Modrich «Real»dan ketishini e’lon qildi. «Madrid» tarixidagi eng sovrindor futbolchi 13 mavsumdan keyin, 40 yosh arafasida klubni tark etadi.
Modrich ketishi haqida ta’sirli maktubida xabar qildi:
«Qadrli madridlik muxlislar,
Vaqt yetib keldi. Bu — men hech qachon bo‘lishini xohlamagan lahza, ammo futbol shunday. Hayotda ham har bir narsaning boshi va oxiri bo‘ladi. Shanba kuni men «Santyago Bernabeu»dagi so‘nggi o‘yinimni o‘tkazaman.
Men 2012 yilda dunyoning eng yaxshi jamoasi libosini kiyish orzusi va katta ishlar qilishga bo‘lgan ishtiyoq bilan bu yerga kelgan edim. Lekin keyin nimalar bo‘lishini tasavvur ham qila olmasdim.
«Real»da o‘ynash mening hayotimni futbolchi sifatida ham, inson sifatida ham o‘zgartirdi. Tarixdagi eng buyuk klubning eng muvaffaqiyatli davrlaridan biriga guvoh va ishtirokchi bo‘lganimdan faxrlanaman.
Yuragimdan, chin ko‘nglimdan klubga, ayniqsa prezident Florentino Peresga, jamoadoshlarimga, murabbiylarga va bu yillar davomida menga yordam bergan barchaga o‘z minnatdorligimni bildiraman.
Bu davr ichida men ajoyib lahzalarni boshdan kechirdim. Imkonsizdek tuyulgan kambeklar, finallar, bayramlar va «Bernabeu»dagi sehrli kechalar… Biz hamma narsani yutdik va men juda xursand bo‘ldim. Juda-juda xursand…
Biroq g‘alabalar va sovrinlardan ham muhimi — men yuragimda barcha «Real»chilarning muhabbatini olib ketyapman. Sizlar bilan mendagi alohida bog‘liqlikni qanday izohlashni ham bilmayman.
O‘zimni qo‘llab-quvvatlangan, hurmat qilingan va sevilgan his qildim va hali ham shunday his qilaman. Menga ko‘rsatgan har bir olqish va mehrni hech qachon unutmayman.
Men ketyapman, yuragim esa faxr, minnatdorlik va unutilmas xotiralar bilan to‘la. Klublar o‘rtasidagi jahon chempionatidan keyin maydonda bu libosni umuman kiya olmasam ham men doim «Madrid» muxlisi bo‘lib qolaman.
Hala Madrid Y Nada Mas!».
«Real» ham Modrich ketishini tasdiqladi: «„Real Madrid“ futbol klubi va sardorimiz Luka Modrich AQShda bo‘lib o‘tadigan Klublar o‘rtasidagi jahon chempionatidan keyin uning klubimiz futbolchisi sifatidagi unutilmas davrini yakunlashga kelishib oldi.
„Real Madrid“ klubimiz va jahon futbolining eng buyuk afsonalaridan biri bo‘lgan ushbu insonga o‘z minnatdorchiligini va chuqur mehrini izhor etadi».
Florentino Peresdan iqtibos: «Luka Modrich „Real Madrid“ning barcha muxlislari qalbida doimo klubimiz qadriyatlarini ifoda etgan noyob va namunali futbolchi sifatida abadiy qoladi. Uning futboli „Madrid“ning va butun dunyo bo‘ylab futbol muxlislarini o‘ziga rom etgan. Uning merosi abadiy yashaydi».
«Real» shanba kuni «Real Sosiyedad»ga qarshi o‘yinda Modrich bilan xayrlashuv marosimi o‘tkazilishini anons qilgan.
Modrichning «Real»dagi asosiy yutuqlari
● 28 titul — Chempionlar ligasidagi 6 g‘alaba, 6 bor klublar o‘rtasidagi jahon chempionatidagi g‘oliblik, 5 bor Yevropa Superkubogi, La Ligada 4 chempionlik, Ispaniya kubogidagi 2 titul va Ispaniya Superkubogidagi 5 g‘oliblik;
● 590 o‘yin va 43 gol. Ammo bu hali hammasi emas: oldinda «Sosedad»ga qarshi xayrlashuv uchrashuvi hamda klublar o‘rtasidagi jahon chempionati o‘yinlari bor;
● 2018 yilgi «Oltin to‘p»;
● 2028 yilda FIFA tomonidan The Best sovrini bilan taqdirlangan;
● 6 marta Chempionlar ligasi ramziy jamoasiga kirgan;
● 2 bor La Liganing eng yaxshi yarimhimoyachisi deb topilgan;
● 2017 yilda klublar o‘rtasidagi jahon chempionatining eng yaxshi futbolchisi bo‘lgan;
● Va son-sanoqsiz zargarona uzatmalar va uzoq masofalardan urilgan chiroyli gollar bilan 13 mavsum davomida muxlislarni xushnud qilgan.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
