Sport
Mundialda 4-kun. Kyurasaoning tarixiy goli, Umar Artanga kompensatsiya va Angliyaning sarguzashtlari
Germaniya 7 ta, Shvetsiya 5 ta gol urdi; yaponlar so‘nggi daqiqalarda iroda ko‘rsatib, Niderlandiyadan ochko tortib oldi. Osiyo jamoalarining turnirdagi mag‘lubiyatsiz yurishi davom etmoqda.
Jahon chempionatida 15 iyunga o‘tar kechasi yana ikkita guruhda 4 ta uchrashuv bo‘lib o‘tdi. Germaniya kamtarona Kyurasaoni yirik hisobda tor-mor etdi, niderlandlar yaponlar bilan o‘yinda ochko yo‘qotdi, Kot-d’Ivuar turnirni Ekvadorga qarshi o‘yindagi minimal hisobdagi g‘alaba bilan boshladi, Tunis esa shvedlarga ortiqcha muammo tug‘dira olmadi. Maydon tashqarisida ham qiziqarli voqealar sodir bo‘ldi.
Germaniya – Kyurasao 7:1
Gollar: Nmecha, 6 (1:0). Komenensiya, 21 (1:1). Shlotterbek, 38 (2:1). Havers, 45+5 – penalti (3:1). Musiala, 47 (4:1). Braun, 68 (5:1). Deniz Undav, 78 (6:1). Havers, 88 (7:1)
Germaniya: Noyyer, Ta (Ryudiger, 73), Shlotterbek, Braun (Raum, 73), Kimmih (Anton, 83), Pavlovich, Nmecha (Goretska, 73), Musiala (Deniz Undav, 64), Virs, Sane, Havers
Kyurasao: Rom, Obispo, Bazur, Fonvill, Floranus, L. Bakuna, J. Bakuna, Komenensiya, Chong (Kastaner, 83), Lokadia (Margarita, 65), Hansen (Antonisse, 46)
Turnirga ilk marta tashrif buyurgan kyurasaoliklar kutilganidek tezkor gol o‘tkazib yuborishdi, ammo 21-daqiqada kutilmaganda hisob tenglashtirildi. 22 yoshli himoyachi Livano Komenensiyaga jamoaning mundialdagi ilk golini urish nasib etdi.
Lekin orolliklar jamoasi quvonchi uzoqqa cho‘zilmadi. O‘yinning qolgan 70 daqiqasida nemislar yana oltita gol urishdi va turnirning hozircha eng yirik natijasini qayd etishdi – 7:1.
«Biz Germaniyaga qarshi o‘yinda bunday holat bo‘lishi mumkinligini bilardik. Bundan qochib bo‘lmaydi. Jamoadagilarning barchasi uchun katta saboq bo‘ldi. Va biz bundan mutlaqo uyalmaymiz», – dedi o‘yindan keyin Kyurasao bosh murabbiyi Dik Advokat.
Ushbu niderlandiyalik JCh tarixidagi eng keksa yoshli (78) murabbiyga aylandi. Shu kuni raqib jamoasini maydonga boshlab kelgan 39 yoshli Yulian Nagelsmann esa Dik professional faoliyatini boshlaganida hali tug‘ilmagandi. Ushbu murabbiylar orasidagi yosh farqi ham turnir tarixidan rekord ko‘rsatkich sifatida o‘rin oldi – 39 yil-u 229 kun.
Niderlandiya – Yaponiya 2:2
Gollar: van Deyk, 51 (1:0). Nakamura, 57 (1:1). Sammervill, 64 (2:1). Kamada, 88 (2:2)
Niderlandiya: Verbryuggen, van Deyk, van Xekke, van de Ven, Dumfris, de Yong, Reynders (Kopmeyners, 70), Gravenberh (Ake, 81), Gakpo (Brobbi, 85), Sammervill (Timber, 70), Malen (Depay, 70)
Yaponiya: Sudzuki, Taniguti, X. Ito, Vatanabe (Sugavara, 75), Kamada, Sano, Nakamura, Doan (Tomiyasu, 75), Kubo (Ogava, 75), Maeda (D. Ito, 66), Ueda (Siogai, 84)
Ogohlantirishlar: Sammervill, 61. Depay, 83. van de Ven, 90
Niderlandlar va yaponlar Germaniya va Kyurasao kabi ochiq futbol namoyish etishmadi, ammo bu o‘yinda ham o‘ziga xos drama bor edi. Lekin birinchi bo‘lim ochiqchasiga zerikarli kechdi: bo‘limdagi eng qiziq kadr tribunada uxlayotgan chaqaloq kadri bo‘ldi.
Jamoalar birinchi bo‘lim uchun kompensatsiya sifatida ikkinchi bo‘limni o‘ta hujumkor o‘tkazishdi. 51-daqiqada niderlandlar sardori Virjiyl van Deyk bosh bilan gol urib hisobni ochdi, 6 daqiqa o‘tib Keyto Nakamura muvozanatni tikladi. 67-daqiqada esa yevropaliklar Krisensio Sammervillning sa’y-harakatlari evaziga yana hisobda oldinga chiqib olishdi.
Shundan keyin o‘yinda biroz sokinlik kuzatildi va Ronald Kuman shogirdlari hisobni ushlab qolish uchun o‘ynay boshladi. Ammo Yaponiyada oxirgi shturm uchun kuch topildi: 89-daqiqada Daiti Kamada hisobni tenglashtiruvchi golni urdi – 2:2. Samuraylar mundiallarda yevropaliklarga yutqazmaslikni yana bir bor uddalashdi – bu seriya 2018 yildan buyon davom etib kelmoqda.
Kot-d’Ivuar – Ekvador 1:0
Gol: Diallo, 90 (1:0)
Kot-d’Ivuar: Ya. Fofana, Singo, Agbadu, Konan, Due (Kossunu, 89), S. Fofana (Oulai, 77), Kesse, Ture (Bonni, 56), Diomande, Vai (Diallo, 56), Pepe (Sangare, 77)
Ekvador: Galindes, Ordones, Pacho, Inkapiye, Franko (Presiado, 62), Vite, Kaysedo, Minda (Angulo, 56), Yyeboa (Poroso, 62), Valensiya (Rodriges, 77), Plata
Ogohlantirishlar: S. Fofana, 28. Kesse, 38. Due, 40 – Poroso, 73
Bu o‘yinda gollar shousi bo‘lmasligi oldindan ma’lum edi. Ikki jamoa ham jahon chempionatiga kuchli himoya chizig‘i bilan yetib kelgan, afrikaliklar saralash bosqichida birorta gol o‘tkazmagan (25:0), ekvadorliklar ham o‘z mintaqasida eng kam gol o‘tkazgan (5) jamoa bo‘lgandi. Ammo bu jamoalarning o‘yinini himoyaviy va zerikarli o‘tdi deb bo‘lmaydi.
Birinchi bo‘limda janubiy amerikaliklar tashabbusga egalik qilishdi – o‘yin debyutidayoq hisob ochilishi mumkin edi, ammo jamoa hujumchisi Enner Valensiyaning jarima maydoni markazidan yo‘llagan zarbasi to‘sin yuqorisidan o‘tib ketdi. Keyin esa ekvadorliklarning ikki zarbasidan keyin to‘p darvoza ustuniga va to‘singa bordi: avvaliga Jon Yyeboa o‘z imkoniyatidan foydalana olmadi, biroz o‘tib Alan Minda qulay pozitsiyada turib tepgan to‘p to‘sinni titratdi. Kot-d’Ivuar o‘z qarshi hujumlari bilan javob qaytardi, ammo bu hujumlar golli vaziyatlarga aylanmadi.
Tanaffusdan keyin esa tashabbus afrikaliklar qo‘liga o‘tdi. Va endi darvoza ustunini poylash navbati ularga keldi – ivuarliklar forvardi Ele Vaiga aniqlik yetishmadi. Kot-d’Ivuar bosimni kuchaytirishda davom etdi va ketma-ket hujumlar oxiri gol bilan yakunlandi – o‘yindagi yagona gol 90-daqiqada qanotdan amalga oshirilgan tezkor hujum orqali urildi: Vilfrid Singo to‘pni jarima maydoni yaqiniga yetkazib berdi, to‘pga yetib kelgan Amad Diallo burchak tomon aniq zarba yo‘lladi – 1:0.
Shvetsiya – Tunis 5:1
Gollar: Ayyari, 7 (1:0). Isak, 30 (2:0). Rekik, 43 (2:1). Yokeresh, 59 (3:1). Svanberg, 84 (4:1). Ayyari, 90+6 (5:1)
Shvetsiya: Nordfeldt, Hin, Lindelyof, Lagerbilke, Chelstrem (Svanberg, 84), Nyugren (Bergvall, 64), Ayyari, Gudmundsson (Stroud, 64), Bernhardsson (Svensson, 90), Isak (Elanga, 90), Yokeresh
Tunis: Shamah, Talbi, Rekik, Ben Amida, Abdi, Valeri (Mahmud, 72), Shiri (Ashuri, 72), Mejbri, Hedira (Garbi, 84), Saad (Tunekti, 72), Slimane (Shauat, 84)
Ogohlantirish: Xedira, 54
Shvedlar jahon chempionatiga saralash bosqichini o‘ta muvaffaqiyatsiz o‘tkazib, o‘z guruhida so‘nggi o‘rinda qolgandi va faqat qo‘shimcha imkoniyat orqali turnirga yo‘llanma olgandi. Jamoa Millatlar ligasidagi reytingi evaziga o‘tish bosqichida ishtirok etish imkoniyatini qo‘lga kiritib, pley-off yarimfinalida Ukrainani (3:1), finalda Polshani (3:2) mag‘lub etdi. Grem Potter shogirdlari buning uchun qattiq tanqidga uchragandi va shu tufayli turnir final bosqichini kuchli boshlash talab etilardi.
Va skandinavlarda barchasi o‘xshadi. O‘yinda hisob 7-daqiqadayoq ochildi – Yosin Ayyari qaytgan to‘pni darvoza to‘riga kiritib yubordi. U o‘z otasi tug‘ilgan mamlakat darvozasiga urgan golini nishonlamaslikni ma’qul ko‘rdi. 30-daqiqada esa shvedlar hisobdagi ustunlikni oshirishdi – «Arsenal» forvardi Viktor Yokeresh «Liverpul» forvardi Aleksandr Isakni golli uzatma bilan ta’minladi. Ammo bo‘lim oxirida Shimoliy Afrika vakillari Umar Rekikning goli evaziga hisobni qisqartirishdi. Ammo bu gol tunisliklar uchun o‘yinda yagona gol bo‘lib qoldi.
Tanaffusdan keyin ular yana uch gol o‘tkazib yuborishdi: avvaliga Isak qulay vaziyatda turgan sherigini to‘p bilan ta’minlab, Yokereshga qarzini qaytardi, keyinn yarimhimoyachi Mattias Svanberg hisobni yiriklashtirdi, Ayyari esa o‘yinga qo‘shib berilgan daqiqalarda dublni rasmiylashtirdi – 5:1. Bu g‘alaba skandinavlarni F guruhida birinchi o‘ringa olib chiqdi.
Umar Artanning ko‘nglini olishmoqda
Navbatdagi kun va Umar Artanga kompensatsiya haqida navbatdagi xabar. Afrikaning 2025 yildagi eng yaxshi referisi, FIFA tomonidan 2026 yilgi jahon chempionati uchun chaqirilgan ushbu somalilik hakam hech qanday izohsiz Qo‘shma Shtatlarga kiritilmagandi. Uning vizasi borligi va barcha hujjatlari joyida ekani ham naf bermagandi – keyinroq amerikalik rasmiylar uni terrorchilar bilan aloqalarda gumon qilishgani ma’lum bo‘ldi.
Shundan keyin Umarni vatanida qahramonlardek qarshilashdi: uni katta stadionga chaqirib olqishlashdi va qo‘llarida ko‘tarishdi. Keyinroq UYeFA somalilik hakam uchun istisno qilib, «PSJ» va «Aston Villa» o‘rtasida 12 avgust kuni o‘tkaziladigan Superkubok bahsini boshqarish uchun uni tayinlashdi.
Endi esa BBC Artanga JChdagi ishi uchun belgilangan ish haqi to‘liq to‘lab berilishini xabar qildi. Bu mablag‘ miqdori aniq emas, ammo hisob-kitoblarga ko‘ra, asosiy gonorar 100 ming dollargacha yetadi. Aftidan, Umar turnirni o‘tkazib yuborayotganidan unchalik qattiq xafa bo‘lmaydi.
Inglizlarni omadsizlik ta’qib etmoqda
Angliya milliy jamoasining okeanortidagi sarguzashtlari davom etmoqda. Turnir boshlanishidan oldin «Uch sherlar» jamoasining Kanzas-Sitidagi bazasi yaqinida otishma ro‘y berib, to‘qqiz kishi jabrlandi, shundan keyin Floridada futbolchilar 6,1 magnitudali zilzilani boshdan kechirishdi (bu hududda 150 yildan buyon bu qadar kuchli silkinish bo‘lmagandi), keyin esa Kosta-Rikaga qarshi o‘rtoqlik uchrashuvi noqulay ob-havo sharoiti tufayli keyinga qoldirildi. Keyin Tomas Tuxel jamoasi bazasiga o‘g‘ri tushib, mashg‘ulotlarda ishlatiladigan buyumlarni, bir necha futbolkani va boshqa suvenirlarni o‘g‘irlab ketishdi.
Endi esa navbatdagi balo: tabiiy ofat. The Athletic xabariga ko‘ra, 14 iyun kuni inglizlar jamoasi futbolchilariga tornado yaqinlashayotgani va oynasi yo‘q binoda qolish tavsiya etilishi haqida sms yuborilgan. Yakunda Kanzas-Sitida vayrongarchiliklar qayd etilgan, ammo jamoa yashayotgan baza shikastlanmagan.
Murabbiylar o‘yindagi pauzalarni tanqid qilmoqda
2026 yilgi jahon chempionatida kiritilgan yangiliklardan biri – o‘yin davomida futbolchilar suv ichib olishi uchun ikki marta tanaffus berilishi bilan bog‘liq. Amerikadagi sport turlarida azaldan mavjud bo‘lgan ushbu qoida yevropalik murabbiylarga ma’qul kelmayapti. Xususan, Shvetsiya ustozi Grem Potter bunday tanaffuslar o‘yinga xalal berishini qayd etdi.
«Hozirdan aytish mumkinki, ular dinamikani o‘zgartiradi, chunki ikki bo‘lim o‘rniga o‘yin choraklarga bo‘linadi. Agar jamoa ustunlikka ega bo‘lib turgan bo‘lsa, tanaffusdan keyin uni boy berishi mumkin. Men shikoyat qilmayman. Biz bunga moslashishimiz kerak», – degan Potter.
AQSh milliy jamoasi bosh murabbiyi Maurisio Pochettinoga ham bu yangilik yoqmagan. «Bu menga yoqmayapti. Men bunday tanaffuslarni faqat chinakamiga ekstremal sharoitlarda o‘ynalganida qo‘llab-quvvatlayman. Ammo ob-havo yaxshi bo‘lsa, ularga hojat yo‘q», – deb hisoblaydi «Tottenhem»ning sobiq ustozi.
Shu bilan birga, ayrim manbalarga ko‘ra, futbolchilar suv ichib olishi uchun qilinayotgan tanaffuslardan maqsad – reklama. Jurnalist Romen Molinaning yozishicha, Meksika va JAR o‘rtasidagi o‘yinda (2:0) arbitr TVdagi reklama tugamagunicha o‘yinni boshlamay turgan.
Portugallar Jotani xotirlaydi
Portugaliya milliy jamoasi ta’sirli aksiyaga tayyorgarlik ko‘rmoqda – futbolchilar butun turnir davomida o‘yinlarga jamoaning o‘tgan yil yozida vafot etgan hujumchisi Diogu Jotani eslatib turuvchi bilaguzuklar bilan chiqishadi. Bu haqda matbuot anjumanida Vitinya aytib berdi.
«Ularni bizga bosh vazir Luis Montenegro sovg‘a qildi. Ularda bizning ismlarimiz, shuningdek, Diogu ismi ham bor. Bosh vazir bizga bilaguzuk taqishga ruxsat berilgani, lekin buni qilish shart emasligini ta’kidladi. Biz sovg‘ani katta ishtiyoq bilan qabul qildik va butun turnir davomida ushbu bilaguzuklarda chiqish qilmoqchimiz», – degan Vitinya.
Eslatib o‘tamiz, Jota va uning ukasi Andre Teysheyra da Silva 2025 yil 3 iyulda Ispaniya shimoli-g‘arbida avtohalokat oqibatida halok bo‘lishgandi. U oldingi jahon chempionatida yakuniy tarkibga kira olmagandi.
15-16 iyun kungi o‘yinlar taqvimi
21:00. Ispaniya – Kabo-Verde
00:00. Belgiya – Misr
03:00. Saudiya Arabistoni – Urugvay
06:00. Eron – Yangi Zelandiya
Kelasi mundiallardan biri Fransiya va Germaniya o‘tishi mumkin.
«Le Parisien» nashrining xabar berishicha, Fransiya va Germaniya Jahon chempionatini birgalikda o‘tkazishni ko‘rib chiqmoqda.
Ikki mamlakat 2038 yoki 2042-yilgi Jahon chempionatini o‘tkazish uchun qo‘shma ariza topshirishi kutilyapti. 2030-yilgi Jahon chempionati Ispaniya, Portugaliya va Marokashda bo‘lib o‘tadi.
Ochilish o‘yinlari Urugvay, Argentina va Paragvayda bo‘lib o‘tadi. 2034-yilgi Jahon chempionati Saudiya Arabistonida bo‘lib o‘tadi.
Yaponiyada o‘tkaziladigan Aichi-Nagoya-2026 yozgi Osiyo o‘yinlarining jamoaviy sport turlariga qur’a tashlash marosimi bo‘lib o‘tmoqda.
Unga ko‘ra, futbol bo‘yicha O‘zbekiston U23 terma jamoasi S guruhida Vetnam, Filippin va Kuvayt bilan bahs olib boradigan bo‘ldi.
A guruhi: Yaponiya, Tailand, Qirg‘iz Respublikasi, Gongkong
B guruhi: Xitoy, BAA, Eron, KXDR
C guruhi: Vetnam, O‘zbekiston, Filippin, Kuveyt
D guruhi: Koreya Respublikasi, Saudiya Arabistoni, Qatar.
Bugun tunda Ispaniya va Argentina keyingi to‘rt yillikning eng kuchli jamoasini aniqlaydi.
JCh-2026 finali
Ispaniya – Argentina
20 iyulga o‘tar kechasi, 00.00. New York/New Jersey Stadium (Nyu York)
Shunchaki eng kuchlilar
Bunday afishadagi final jahon chempionatiga ideal darajada mos keladi, chunki bu sayyoraning eng yaxshi ikki jamoasi o‘rtasidagi murosasiz to‘qnashuvdir.
Ispaniya – Yevropaning amaldagi chempioni, Argentina – amaldagi jahon chempioni va Amerika kubogi sohibi. Bundan tashqari, aynan shu ikki jamoa hozirda FIFA reytingida eng yuqori ikki o‘rinni egallab turibdi: janubiy amerikaliklar birinchi, yevropaliklar ikkinchi o‘rinda. Bu reyting yuritilishi boshlangan 1992 yildan buyon jahon chempionati finalida uning ikki yetakchisi o‘zaro o‘ynamoqda. Qo‘shimcha intriga – bunga qadar biror marta turnir arafasida reytingda birinchi o‘rinda bo‘lgan jamoa yakunda chempionlikni qo‘lga kiritmagan, shunday ekan, bu oqshom Argentina statistikaga ham qarshi borishiga to‘g‘ri keladi.
Bundan tashqari, tarixda birinchi bor jahon birinchiligining hal qiluvchi o‘yinida ikki qit’a chempionlari to‘qnashadi. Shu yil martida Ispaniya va Argentina Qatarda bitta o‘yindan iborat turnir – Finalissimada o‘zaro kuch sinashishi rejalashtirilgandi. Ammo AQSh va Isroil Eronga qarshi urush boshlagach, bu o‘yin bekor qilingandi. Endi bu ikki jamoa baribir yanada muhimroq sovrin uchun kuch sinashadigan bo‘ldi.
Leo va u cho‘miltirgan Lamin
Argentina finalga chiqishi bilan ijtimoiy tarmoqlarda 2007 yilgi fotosurat virusdek tarqaldi, unda 20 yoshli Lionel Messi tog‘orada Lamin Yamal ism-sharifli chaqaloqni cho‘miltirayotgani aks etgan – o‘shanda u hali yarim yosh ham emasdi. Bu 2008 yilgi xayriya taqvimi uchun olingan real kartinadir.
Tabiiyki, o‘shanda hech kim bu ikki shaxs 19 yil o‘tib jahon chempionati finalida bir-biriga qarshi o‘ynashini tasavvur qila olmasdi. Qolaversa, Yamal va Messi o‘ynayotgan jamoalarning yo‘li shu vaqtgacha kesishmagandi, shunday ekan, bu ularning ilk uchrashuvi bo‘ladi.
Bu dueldagi asosiy intriga fotosuratda ham emas. Leo uchun bu o‘yin katta ehtimol bilan, jahon chempionatlaridagi so‘nggi o‘yin bo‘lib qoladi. Argentinalik futbolchi – hozirgi asrning dastlabki choragida futbolning asosiy ramzlaridan biri. Lamin esa, aksincha, yangi davr yuzlaridan va «Barselona»da Messining vorisi. Pafosli qilib aytganda, buni ikki davr to‘qnashuvi deyish ham mumkin.
Yamalning yangi rekordi
13 iyul kuni Yamal 19 yoshga to‘ldi. U endi tarixdagi eng yosh jahon chempioni bo‘la olmaydi – bu titul 1958 yilgi mundialda 17 yoshda bo‘lgan Peleda qolmoqda. U jahon birinchiliklarida oltin medal qo‘lga kiritgan eng yosh yevropalik ham bo‘la olmaydi – italiyalik Juzeppe Bergomi 1982 yil 18 yoshida chempion bo‘lgandi.
Ammo Yamal yanada yuqoriroq darajadagi maqomga erishishi mumkin – jahon va Yevropa chempionatlarida g‘olib chiqqan eng yosh futbolchi. Ikki yil oldin ushbu vinger Ispaniya milliy jamoasi bilan 17 yoshga kirganini nishonlaganidan bir kun o‘tib qit’a chempionligini ham nishonlagandi, bugun tunda esa u yana bir katta sovrinni qo‘lga kiritishi mumkin. Bungacha hech kim 19 yoshida ham Yevropa va ham jahon chempionatlarida g‘olib bo‘la olmagan.
De la Fuente yoki Skaloni: ulardan biri tarixga kiradi
Ispaniya milliy jamoasi safida ikki yil oldin Yevro g‘olibi bo‘lgan 16 nafar futbolchi bor. Ammo asosiy intriga murabbiylar shtabida. Luis de la Fuente jamoani 2022 yilgi jahon chempionatidan keyin qabul qilib olib, avvaliga qit’a birinchiligida g‘olib bo‘ldi, endi navbat jahon birinchiligiga.
Agar jamoasi bu finalda ham g‘alaba qozonsa, unda de la Fuente Yevropa chempionati va jahon chempionatida g‘olib chiqqan uchinchi murabbiyga aylanadi. Bu borada birinchisi Helmut Shen bo‘lgandi, u bu natijaga GFR termasi bilan erishgan (Yevro-1972, JCh-1974), ikkinchisi esa – ispanlarning sobiq ustozi Visente del Boskedir (JCh-2010, Yevro-2012).
Argentina milliy jamoasi ustozi Lionel Skaloni ham tarixga kirish imkoniga ega. U allaqachon Amerika kubogida ikki bor g‘alaba qozondi, Finalissimada g‘olib chiqdi, eng asosiysi, jahon chempioni bo‘lishga ham ulgurgan. Hozircha o‘z jamoasi bilan ikki bor jahon chempioni bo‘lgan yagona murabbiy – 1934 va 1938 yillarda o‘z vatani jamoasini jahon chempioniga aylantirgan italiyalik Vittorio Potsso bo‘lib qolmoqda. Boshqa so‘z bilan aytganda, Skaloni qariyb bir asrdan buyon hech kim erisha olmayotgan natijaga erishishi mumkin.
17 nafar argentinalikda ikki karra jahon chempioni bo‘lish imkoni bor
Argentina milliy jamoasi tarkibi so‘nggi to‘rt yilda deyarli o‘zgarmadi. Qaydnomadagi 26 futbolchidan 17 nafari Qatardagi mundialda ham jahon chempioni bo‘lgandi. Yakshanba oqshomidagi o‘yinda ular ikki karra jahon chempioni bo‘lish va ikki karra JCh chempioni bo‘lgan futbolchilar ro‘yxatini jiddiy darajada kengaytirish imkoniga ega – hozirda bunday ro‘yxatda 20 kishi bor. Bular asosan brazillar va italyanlardir, ammo u yerda bitta argentinalik – 1978 va 1986 yilgi mundiallarda Argentina milliy jamoasi safida bo‘lgan Daniel Passarella ham bor.
Pele esa uch karra jahon chempioni bo‘lishga muvaffaq bo‘lgan yagona futbolchidir. Ammo agar bu tunda Argentina g‘alaba qozonadigan bo‘lsa, uning rekordini ham keyingi mundiallarda qaysidir argentinalik takrorlashi mumkin bo‘ladi.
Rodri tarixga kirishi mumkin
Shu vaqtgacha faqat o‘n kishi «Oltin to‘p», jahon chempionati va Chempionlar ligasi/Yevropa chempionlari kubogini qo‘lga kiritgan:
Bobbi Charlton
Gerd Myuller
Frans Bekkenbauer
Paolo Rossi
Zinedin Zidan
Rivaldo
Ronaldinio
Kaka
Lionel Messi
Usmon Dembele
Ko‘rinib turibdiki, bu ro‘yxatda ispanlar yo‘q, shunday ekan, Rodri birinchisi bo‘lishi mumkin. 30 yoshli ushbu yarimhimoyachi 2023 yilda «Manchester Siti» bilan Chempionlar ligasi g‘olibi bo‘lgan, 2024 yilda «Oltin to‘p» uchun kurashda Vinisiusni ortda qoldirgan. Jahon chempionatida ham g‘olib chiqish uning nomini abadiylashtiradi.
Ispaniya rekordga qarab ketmoqda
Yarimfinalda Fransiya ustidan qozonilgan g‘alaba shuni anglatadiki, Ispaniya milliy jamoasi mag‘lubiyatsiz o‘yinlar seriyasini 37 o‘yinga yetkazgan. Luis de la Fuente shogirdlari oxirgi bor 2024 yil 22 mart kuni Kolumbiyaga qarshi o‘rtoqlik uchrashuvida yutqazgandi (0:1). O‘tgan yil Millatlar ligasi finalida Portugaliyaga penaltilar seriyasida boy berilgan o‘yin bu o‘rinda mag‘lubiyat deb hisoblanmaydi, chunki o‘yinning asosiy vaqti durang hisob bilan tugagan.
37 o‘yin – 2018 yildan 2021 yilga qadar bo‘lgan oraliqda umuman yutqazmagan Italiya milliy jamoasi rekordini takrorlashdir. Agar jahon chempionati finalida Ispaniya g‘alaba qozonsa yoki o‘yinni penaltilar seriyasigacha olib borsa, unda «Qizil furiya» jahon rekordini yangilaydi.
Kim eng yaxshi to‘purar bo‘ladi?
Bu safargi mundialda to‘purarlar o‘rtasida fantastik poyga kuzatilib, bir vaqtning o‘zida bir necha yulduzlar birinchilik uchun kurash olib borishdi. Uchinchi o‘rin uchun Fransiya va Angliya o‘rtasida kechgan bahsdan (4:6) keyin to‘purarlar ro‘yxati (gol+pas tizimida) quyidagi ko‘rinishda:
Kilian Mbappe (Fransiya) – 10+4
Lionel Messi (Argentina) – 8+4
Jud Bellinghem (Angliya) – 7+1
Erling Holand (Norvegiya) – 7+0
Usmon Dembele (Fransiya) – 6+2
Harri Keyn (Angliya) – 6+1
Mikel Oyyarsabal (Ispaniya) – 5+1
Gollar soni teng bo‘lib qolgan taqdirda «Oltin butsa» golli uzatmalar soni ko‘p bo‘lgan futbolchiga beriladi. Uchinchi o‘rin uchun kechgan bahsda Mbappe 2 gol urdi va bir golga uzatma berib, poygada yaqqol birinchi o‘ringa chiqib oldi. Hozirda faqat Messi va Oyyarsabalda unga yetib olish uchun nazariy imkoniyat mavjud.
Uni quvib o‘tish uchun Messi finalda yoki het-trik qayd etishi yoki 2 gol va 1 golli uzatma muallifi bo‘lishi talab etiladi. Ispaniyalik hujumchida esa amalda imkoniyat yo‘q: u finalda kamida beshta gol urishiga hech kim ishonmaydi.
Qolaversa, Messi JCh tarixidagi eng yaxshi to‘purar maqomini ham boy bergan: o‘tgan tundagi o‘yindan keyin Mbappe 22 gol bilan birinchi o‘ringa chiqib oldi, Messi undan bitta kam gol urgan.
«Oltin to‘p»ni kim oladi?
Yana bir muhim masala – «Oltin to‘p»ni kim qabul qilishi. Gap har ikki sovrin haqida ketmoqda – jahon chempionatining eng yaxshi futbolchisiga beriladigan va France Football tomonidan har yili topshiriladigan sovrinlar.
E’tiborli jihati, Messi 39 yoshida ham ushbu sovrinlar uchun real da’vogarlik qilmoqda. Yarimfinal o‘yinlaridan keyin argentinalik hujumchi ko‘p versiyalar bo‘yicha favoritga aylandi. Agar Argentina jahon chempioniga aylansa, uni turnirning eng yaxshi futbolchisi sifatida tan olmaslikning imkoni yo‘q. Agar Ispaniya g‘olib bo‘lsa, boshqa variantlar ham paydo bo‘ladi va ko‘p narsa final o‘yiniga bog‘liq.
Mbappe Messining, Olise Pelening rekordini yangiladi; Argentina va Ispaniya murabbiylari bir-birining futbolchilarini maqtamoqda, Messi Yamalning chaqaloqlikdagi mashhur suratini esladi.
Angliya va Fransiya milliy jamoalari JCh-2026 bronza medallari uchun bahsda haqiqiy shou uyushtirib berishdi. Jamoalar birgalikda 10 ta gol urishdi, bu bahsda Tomas Tuxel shogirdlari baribir g‘alabani ushlab qolishdi – 6:4.
Maydon tashqarisida ham qiziqarli voqealar davom etmoqda. Xalqaro olimpiya qo‘mitasi «Balogun ishi» bo‘yicha FIFA prezidenti Janni Infantinoni jazolamaydigan bo‘ldi, AQSh prezidenti Donald Tramp Tuxelning Argentina bilan o‘yindagi (1:2) taktikasini tanqid qildi, Ispaniya milliy jamoasi ustozi Luis de la Fuente esa finalda Lionel Messini personal qo‘riqlash yordam bermasligini tan oldi.
Hokkeycha hisob
Fransiya – Angliya 4:6
Gollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87 – penalti (3:5). Dembele, 90+6 (4:5). Bellinghem, 90+8 (4:6)
Fransiya: Menyan, Konate (Din, 46), Lakrua, Ernandez (Upamekano, 46), Gyusto (Kunde, 90), Rabio, Zair-Emeri, Sherki (Dembele, 46), Due (Barkolya, 46), Olise, Mbappe
Angliya: Henderson, Konsa, Geyi (Chaloba, 90), Kuansa (Jyeyms, 83), Spens, Rays, Rodjyers, Eze (Anderson, 79), Saka, Reshford (Uotkins, 46), Toni (Bellinghem, 79)
Tashqaridan qaraganda Fransiya – Angliya to‘qnashuvi jahon chempionatining eng yorqin afishasi edi. Ammo ushbu jamoalarning o‘zi o‘zaro o‘yinga jiddiy yondashgani yo‘q. Bir necha kun oldin ular finalni orzu qilishayotgandi, endi esa atigi uchinchi o‘rin uchun kurashishga to‘g‘ri kelardi. Tuxel ham oldindan aniq qilib aytdi: bu o‘yin uning futbolchilari uchun qiziq emas. Fransuzlardagi kabi.
«Bizning ham, Fransiya milliy jamoasining ham biror futbolchisi bu o‘yinda ishtirok etishni xohlamayapti. Barcha finalda o‘ynashni xohlagandi. Ammo qoida shunday, shuning uchun biz o‘yinga professionallarcha yondashamiz», – degandi murabbiy jurnalistlarga.
Shunga qaramay, bu o‘yin JCh tarixida qoladigan bo‘ldi. Sermahsullik bo‘yicha bu o‘yin kutilmalarni ortig‘i bilan oqladi. Murabbiylar rotatsiyaga qo‘l urgan bo‘lishsa-da, ikki tomondan Mbappe, Olise, Saka va Rays kabi yulduz futbolchilar ilk daqiqalardan harakat qilishdi.
Britanlar ilk daqiqalardan hujumkor harakat qilishdi va birinchi bo‘limning o‘zida raqib darvozasini to‘rt bor ishg‘ol etishdi. Rays 3-daqiqada hisobni ochgan, keyinroq Ezri Konsaga gol urishda yordam bergan bo‘lsa, Bukayo Saka dublni rasmiylashtirdi.
Fransuzlar esa ikkinchi bo‘limda bunday sharmandalikka rozi bo‘lishmadi va darhol javob qaytarishni boshlashdi. 66-daqiqaga kelib Dide Desham shogirdlari (bu uning jamoa boshqaruvidagi so‘nggi o‘yini edi) uchta gol urishdi: Mbappe dublni rasmiylashtirib, hozirgi turnirda ham, butun jahon chempionati tarixida ham Messini ortda qoldirdi (Kilianda endi bu turnirdagi gollar soni 10 ta, Leoda esa 8 ta, shuningdek, turnir tarixidagi barcha gollar bo‘yicha nisbat 22:21 fransuz hujumchisi foydasiga), yana bir golni uning assisti bilan Bredli Barkolya urdi.
Hisobni minimumgacha qisqatirgach, fransuzlar hisobni tenglashtirish uchun bosim qilishda davom etishdi va o‘z maqsadiga erishishi ham mumkin edi, ammo Maykl Olise qulay vaziyatdan foydalana olmadi.
Ko‘p o‘tmay Saka penaltini aniq ijro etib, het-trikni nishonladi. Ammo bu bilan o‘yindagi intrigaga barham berilmadi: o‘yin yakunigacha jamoalar yana bittadan gol urishdi. 96-daqiqada Usmon Dembele, 98-daqiqada Jud Bellinghem o‘z nomini tabloga yozdirib qo‘yishdi.
Dembelening goliga uzatma bergan Olise esa birato‘la Pelening rekordini yangilab qo‘ydi: u bir turnirdagi assistlari sonini 7 taga yetkazib, braziliyalik afsonaviy hujumchining 1970 yildagi ko‘rsatkichini yaxshiladi.
Yakuniy hisob hokkeycha ko‘rinish oldi. Jami zarbalar ko‘rsatkichi ham anomal ko‘rinishda edi – 19:19 (darvoza sohasiga to‘g‘ri borgan zarbalar bo‘yicha 11:9, xG – 2,89 ga qarshi 2,77 inglizlar foydasiga).
Tuxel esa o‘yindan oldingi fikrlariga ters o‘laroq, o‘yindan keyin baxtiyor edi va maydon bo‘ylab yurib, o‘z shogirdlarini bronza bilan tabrikladi. Bu Angliya milliy jamoasi uchun 1960 yilgi mundialdan buyon ilk medal bo‘ldi.
XOQ Infantinoni jazolamaydi
Xalqaro olimpiya qo‘mitasi AQSh milliy jamoasi hujumchisi Folarin Balogunning diskvalifikatsiyasi kechiktirilgani bilan bog‘liq vaziyat uchun FIFA prezidenti Janni Infantinoga sanksiya qo‘llamoqchi emas.
Avvalroq FairSquare notijorat tashkiloti FIFA rahbarining harakatlari yuzasidan qo‘mitaga shikoyat yo‘llagani ma’lum bo‘lgandi. Ammo The Guardian manbasiga ko‘ra, XOQ xalqaro federatsiyalarning o‘z qoidalarini qo‘llash xususiyatlariga aralashishni istamaydi.
Nashrning boshqa suhbatdoshi so‘zlariga ko‘ra, XOQ va FIFA o‘rtasidagi kuchlar muvozanati so‘nggi yigirma yil ichida futbol tashkiloti foydasiga sezilarli darajada o‘zgargan – uning ta’siri tijorat daromadlari va yosh auditoriyani jalb qilish borasida ortib bormoqda.
Eslatib o‘tamiz, Balogun JCh 1/16 finalida Bosniya va Hersegovinaga qarshi o‘yinda (2:0) «jiddiy qoidabuzarlik» uchun to‘g‘ridan to‘g‘ri qizil kartochka olgandi va kamida ikkita o‘yinni o‘tkazib yuborishi kerak edi.
Ammo FIFA intizomiy qo‘mitasi diskvalifikatsiya amal qilishini bir yillik sinov muddati uchun to‘xtatdi va futbolchi 1/8 finalda Belgiyaga qarshi kechgan o‘yinda (1:4) maydonga tushdi. Keyinroq AQSh prezidenti Donald Tramp ushbu masalada Infantino bilan gaplashganini tan oldi.
Nyu Yorkdagi smog JCh finaliga xalal bermaydi
Hafta davomida Ole nashri Ispaniya va Argentina o‘rtasidagi hal qiluvchi Kanadada avj olgan o‘rmon yong‘inlari tufayli boshqa joyga ko‘chirilishi mumkinligi haqida xabar tarqatgandi. Qo‘shni mamlakatda ko‘tarilgan tutun AQSh shimoli-sharqigacha kelgan va yirik shaharlarga yaqinlashgan – payshanba kuni havo ifloslanishi tufayli Chikagoda MLS o‘yini ko‘chirilgandi.
Smog 19 iyul kuni kechqurun jahon chempionati finali o‘tkaziladigan Nyu York shahriga ham yopirilgan. Ammo Bloomberg agentligi o‘z manbalariga tayanib xabar berishicha, FIFA o‘yin vaqti va joyini ko‘chirmoqchi emas.
Materialda xabar qilinishicha, futbol federatsiyalari vakillari bu haqda Oq uyning turnirga tayyorgarlik ko‘rish bo‘yicha ishchi guruhi rahbari Endryu Juliani bilan norasmiy suhbat o‘tkazgan. Ular o‘rtasida iqlim masalasi bo‘yicha rasmiy uchrashuvlar rejalashtirilmagan.
Ispaniya va Argentina murabbiylari Messi va Yamalni maqtamoqda
JCh hal qiluvchi o‘yini arafasida Argentina va Ispaniya milliy jamoalari ustozlari bir-birining futbolchilariga kompliment yog‘dirdi. Lionel Skaloni «Qizil furiya» vingeri Lamin Yamalga yuqori baho bergan, Luis de la Fuente – «Albiseleste» sardori Lionel Messi sha’niga maqtov yog‘dirgan.
«Yamal – futbol xazinasi, – deya Skalonining so‘zlarini keltiradi Ole. – Unga qarshi himoyalanish juda qiyin, u Ispaniyaga katta quvonch keltirishi mumkin bo‘lgan futbolchi. Umid qilamanki, yakshanba kuni bunday bo‘lmaydi. Albatta, uni mehmonxonaga qamab, maydonga chiqarmaslikni istardim».
De la Fuente esa ispanlar Messiga qarshi personal himoyalanmasligi, chunki bundan naf yo‘qligini aytdi.
«Men Leoni «Sevilya» yoshlar jamoasini shug‘ullantirib yurgan davrimdan buyon bilaman. Biz uning yoniga bir futbolchi qo‘ydik, keyin u kartochka oldi, men uni almashtirdim va Messi bizga uchta gol urdi. Uni personal qo‘riqlashni tashkil qilmaymiz, ammo diqqatli bo‘lamiz.
Messining o‘zi – alohida bir tarix. Afsona. 39 yoshda finalga chiqish – aql bovar qilmas ish! U shu yerdaligida o‘yinidan zavqlanish kerak. Diyego Maradonaning yo‘qligi bilinadi, chunki u endi biz bilan emas. Ammo Messi hamon shu yerda», – deya uning so‘zlarini keltiradi Marca.
Messi o‘zi va Yamalning chaqaloqlikdagi fotosini esladi
2007 yilda Leo Sport gazetasining YUNISEF bilan (o‘shanda «Barselona» homiylaridan edi) hamkorlikda tayyorlangan xayriya taqvimi uchun suratga tushgan. Bu loyiha doirasida klub futbolchilari bolalar bilan suratga tushardi: yosh ishtirokchilarni tanlash uchun tashkilot lotereya o‘tkazadi – va g‘oliblardan biri Yamalning ota-onasi bo‘ladi.
20 yoshli Messi plastik vannada besh oylik Laminni cho‘miltirayotgani aks etgan surat shu taxlit paydo bo‘lgan. 19 yil o‘tib futbolchilar JCh-2026 finalida bir-biriga qarshi o‘ynaydi. Turnirning hal qiluvchi o‘yini oldidan argentinalik hujumchi ushbu fakt haqida esladi va uni aql bovar qilmas hodisa deb atadi.
«To‘g‘risini aytsam, bu suratimiz juda ajoyib. Hayot shunaqa, to‘g‘rimi? Men u bilan go‘dakligida suratga tushganman, mana endi ikkimiz jahon chempionati finalida yuzma-yuz turibmiz.
Lamin – juda iste’dodli futbolchi, men uni ko‘p kuzataman, chunki u men sevgan klub – «Barselona»da o‘ynaydi va men unga doimo eng yaxshi tilaklarni tilayman. 19 yoshida u dunyoning eng yaxshi futbolchilaridan biri hisoblanadi va uning butun karerasi hali oldinda», – deya Messining so‘zlarini keltiradi The Athletic.
Tuxelni Tramp ham tanqid qildi
Inglizlar JCh yarimfinalida Argentinaga qarshi o‘yinda birinchi bo‘lib hisob ochgan, ammo shundan keyin to‘liq himoyalangan va o‘yin oxirida ikki gol o‘tkazib, yutqazib qo‘ygandi (1:2).
O‘yindan keyin faqat dangasa kishilargina «Uch sherlar» ustozi Tomas Tuxelning bu o‘xshamagan rejasini tanqid qilmadi. Bunga hatto AQSh prezidenti Donald Tramp ham qo‘shildi.
«Angliya milliy jamoasida biz birga golf o‘ynaydigan ajoyib futbolchi bor – Harri Keyn. U ajoyib. Menimcha, ular uni himoyaga o‘tkazib, xatoga yo‘l qo‘yishdi. Ammo men futbolda nimani ham bilardim? Ular hisobda oldinga chiqishdi va eng yaxshi o‘yinchisini himoyaga qo‘yishdi.
Axir biroz hujum qilish kerak edi, shunday emasmi? Bu noodatiy qaror bo‘ldi», – degan Oq uy egasi FIFA rahbari Janni Infantino bilan birgalikdagi matbuot anjumanida.
Navbatdagi o‘yin
Jahon chempionatida atigi bitta o‘yin qoldi – eng muhimi – final.
20 iyulga o‘tar kechasi, 00.00. Ispaniya – Argentina
JCh uchinchi o‘rini uchun o‘yinda 10 ta gol urildi.
Bronza uchun o‘yin haqiqiy shouga aylandi
Fransiya – Angliya 4:6
Gollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87 – penalti (3:5). Dembele, 90+6 (4:5). Bellinghem, 90+8 (4:6)
Fransiya: Menyan, Konate (Din, 46), Lakrua, Ernandez (Upamekano, 46), Gyusto (Kunde, 90), Rabio, Zair-Emeri, Sherki (Dembele, 46), Due (Barkolya, 46), Olise, Mbappe
Angliya: Henderson, Konsa, Geyi (Chaloba, 90), Kuansa (Jyeyms, 83), Spens, Rays, Rodjyers, Eze (Anderson, 79), Saka, Reshford (Uotkins, 46), Toni (Bellinghem, 79)
«Angliya o‘ynashni xohlamaydi, biz ham. Ammo o‘tkazish kerak bo‘lgan butun bir o‘yin bor», – degandi yarimfinaldagi mag‘lubiyatdan keyin Fransiya milliy jamoasi ustozi Dide Desham.
«Bizning futbolchilarimizdan hech biri, shuningdek, fransuzlardan hech biri bu o‘yinda o‘ynashni xohlamaydi. Hamma jahon chempionatida g‘alaba qozonish uchun o‘ynaydi, ammo vaziyat shunday bo‘lib qoldi», – deya Deshamning fikrini takrorlagandi Tomas Tuxel Argentina bilan o‘yindan keyin.
Shuningdek, ijtimoiy tarmoqlarda jahon chempionatlarida uchinchi o‘rin uchun o‘yinlarni bekor qilish lozimligi haqida chaqiriqlar yangradi.
Ikki murabbiy ham o‘yinga o‘rtoqlik uchrashuvidek yondashishdi va maydonga deyarli ikkinchi tarkiblarini tushirishdi. Bu esa futbol muxlislari uchun ayni muddao bo‘ldi – jiddiy mas’uliyat yo‘q bo‘lgan o‘yinda jamoalar tom ma’noda yechilib ketishdi va muxlislar uchun haqiqiy shou uyushtirib berishdi.
O‘yinning uchinchi daqiqasidayoq Due o‘z darvozasiga yaqin hududda xato qildi, to‘pni undan olib qo‘ygan «Arsenal» yarimhimoyachisi Deklan Rays jarima maydoniga kirib bordi va hisobni ochdi.
18-daqiqada esa Rays burchakdan oshirgan to‘pni «Aston Villa» himoyachisi Ezri Konsa darvozaga to‘g‘rilab yubordi va hisobdagi farqni oshirdi.
Kuling brekdan keyin karnaval davom etdi. «Arsenal»ning boshqa bir futbolchisi Bukayo Saka katta sahnaga chiqdi va bo‘lim oxirigacha dublni rasmiylashtirib, hisobni yirik ko‘rinishga keltirdi – 4:0.
Fransuzlar ikkinchi bo‘limga kelib uyg‘onishdi. Mbappe bo‘lim boshida dastlabki javob golini urdi, keyin esa Barkolyaning goliga assistentlik qildi.
Shundan keyin ham fransuzlar ketma-ket hujumlar uyushtirishdi va faqat Hendersonning seyvlari hisobdagi farqni saqlab turdi. Ammo Kilian o‘z maqsadiga erishib, o‘yindagi ikkinchi golini ham urdi. Bu uning joriy chempionatdagi 10-, barcha jahon chempionatlaridagi 22-goli bo‘ldi va ikki holatda ham u Lionel Messini ortda qoldirdi (argentinalik hujumchida hozirgi turnirda 8, jami 21 gol bor).
O‘yin oxirida fransuzlar hisobni tenglashtirishi mumkin edi, ammo Olisening jarima maydoni markazidan yo‘llagan zarbasidan keyin to‘p darvoza sohasiga to‘g‘ri bormadi. Javob hujumida esa inglizlar penalti ishladi: Gyusto Spensini yiqitdi, belgilangan jarima zarbasini Saka aniq ijro etib, hisobdagi farqni yana oshirdi – 5:3.
Bu hali hammasi emasdi, qo‘shimcha daqiqalarda Dembele yana hisobni qisqartirdi, Bellinghem esa inglizlarning oltinchi golini urdi – 6:4.
Bu ikki jamoa ham himoyani unutib, faqat hujum haqida o‘ylagan fantastik bahs bo‘ldi. O‘yindan keyin jamoasi 6 ta gol o‘tkazgan Desham (bu uning milliy jamoa boshqaruvidagi so‘nggi o‘yini edi) hech narsadan ranjigan ko‘rinmasdi va Tuxelga kulimsirab qo‘l tashladi. Germaniyalik mutaxassis esa muxlislar oldidagi aybini yuvdi – Angliya jahon chempionatlarida so‘nggi 60 yillikdagi ilk medalini qo‘lga kiritdi.
Rossiya jinoiy javobgarlikka tortilgan muhojirlarga fuqarolikni rad etadi
Markaziy bank iyun oyida 21 ta bankni jarimaga tortdi
NYT hisoboti: Eronning ishonchli tahdidi Prezident Trampni Turkiyadagi havo kuchlari 1-ni almashtirishga undadi
-
Dunyodan4 days ago
Vengriya prezidenti isteʼfoga chiqish toʻgʻrisidagi konstitutsiyaviy oʻzgartirishni imzoladi
-
Mahalliy5 days ago
O‘zbekistonda Integratsiyalashgan dasturlar oliy maktabi tashkil etiladi
-
Iqtisodiyot3 days ago
«Milliy sanoat zanjiri» ko‘rgazmasi – Transport tizimida 12,8 milliard dollarlik 36 ta investitsiya loyihasi amalga oshirilmoqda
-
Dunyodan4 days ago
Eron AQSh bilan kelishuv memorandumi bo’yicha o’z majburiyatlarini to’xtatdi
-
Turk dunyosi4 days agoTurkiya uchinchi davlatlar bilan S400 tizimining kelajagi haqida gaplashmoqda
-
Jamiyat4 days ago
Alkogol ichimliklarni reklama qilgan bloger ma’muriy javobgarlikka tortildi
-
Iqtisodiyot1 day ago
O‘zbekistonda qurilgan yo‘llar sifatini tekshirish uchun laboratoriya sinovlari o‘tkaziladi
-
Mahalliy3 days ago
Yangi o‘quv yili uchun davlat stipendiyalari kvotalari tasdiqlandi