Sport
JCh kundaligi. Bronza uchun triller va Tuxelni tanqid qilgan Tramp
Mbappe Messining, Olise Pelening rekordini yangiladi; Argentina va Ispaniya murabbiylari bir-birining futbolchilarini maqtamoqda, Messi Yamalning chaqaloqlikdagi mashhur suratini esladi.
Angliya va Fransiya milliy jamoalari JCh-2026 bronza medallari uchun bahsda haqiqiy shou uyushtirib berishdi. Jamoalar birgalikda 10 ta gol urishdi, bu bahsda Tomas Tuxel shogirdlari baribir g‘alabani ushlab qolishdi – 6:4.
Maydon tashqarisida ham qiziqarli voqealar davom etmoqda. Xalqaro olimpiya qo‘mitasi «Balogun ishi» bo‘yicha FIFA prezidenti Janni Infantinoni jazolamaydigan bo‘ldi, AQSh prezidenti Donald Tramp Tuxelning Argentina bilan o‘yindagi (1:2) taktikasini tanqid qildi, Ispaniya milliy jamoasi ustozi Luis de la Fuente esa finalda Lionel Messini personal qo‘riqlash yordam bermasligini tan oldi.
Hokkeycha hisob
Fransiya – Angliya 4:6
Gollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87 – penalti (3:5). Dembele, 90+6 (4:5). Bellinghem, 90+8 (4:6)
Fransiya: Menyan, Konate (Din, 46), Lakrua, Ernandez (Upamekano, 46), Gyusto (Kunde, 90), Rabio, Zair-Emeri, Sherki (Dembele, 46), Due (Barkolya, 46), Olise, Mbappe
Angliya: Henderson, Konsa, Geyi (Chaloba, 90), Kuansa (Jyeyms, 83), Spens, Rays, Rodjyers, Eze (Anderson, 79), Saka, Reshford (Uotkins, 46), Toni (Bellinghem, 79)
Tashqaridan qaraganda Fransiya – Angliya to‘qnashuvi jahon chempionatining eng yorqin afishasi edi. Ammo ushbu jamoalarning o‘zi o‘zaro o‘yinga jiddiy yondashgani yo‘q. Bir necha kun oldin ular finalni orzu qilishayotgandi, endi esa atigi uchinchi o‘rin uchun kurashishga to‘g‘ri kelardi. Tuxel ham oldindan aniq qilib aytdi: bu o‘yin uning futbolchilari uchun qiziq emas. Fransuzlardagi kabi.
«Bizning ham, Fransiya milliy jamoasining ham biror futbolchisi bu o‘yinda ishtirok etishni xohlamayapti. Barcha finalda o‘ynashni xohlagandi. Ammo qoida shunday, shuning uchun biz o‘yinga professionallarcha yondashamiz», – degandi murabbiy jurnalistlarga.
Shunga qaramay, bu o‘yin JCh tarixida qoladigan bo‘ldi. Sermahsullik bo‘yicha bu o‘yin kutilmalarni ortig‘i bilan oqladi. Murabbiylar rotatsiyaga qo‘l urgan bo‘lishsa-da, ikki tomondan Mbappe, Olise, Saka va Rays kabi yulduz futbolchilar ilk daqiqalardan harakat qilishdi.
Britanlar ilk daqiqalardan hujumkor harakat qilishdi va birinchi bo‘limning o‘zida raqib darvozasini to‘rt bor ishg‘ol etishdi. Rays 3-daqiqada hisobni ochgan, keyinroq Ezri Konsaga gol urishda yordam bergan bo‘lsa, Bukayo Saka dublni rasmiylashtirdi.
Fransuzlar esa ikkinchi bo‘limda bunday sharmandalikka rozi bo‘lishmadi va darhol javob qaytarishni boshlashdi. 66-daqiqaga kelib Dide Desham shogirdlari (bu uning jamoa boshqaruvidagi so‘nggi o‘yini edi) uchta gol urishdi: Mbappe dublni rasmiylashtirib, hozirgi turnirda ham, butun jahon chempionati tarixida ham Messini ortda qoldirdi (Kilianda endi bu turnirdagi gollar soni 10 ta, Leoda esa 8 ta, shuningdek, turnir tarixidagi barcha gollar bo‘yicha nisbat 22:21 fransuz hujumchisi foydasiga), yana bir golni uning assisti bilan Bredli Barkolya urdi.
Hisobni minimumgacha qisqatirgach, fransuzlar hisobni tenglashtirish uchun bosim qilishda davom etishdi va o‘z maqsadiga erishishi ham mumkin edi, ammo Maykl Olise qulay vaziyatdan foydalana olmadi.
Ko‘p o‘tmay Saka penaltini aniq ijro etib, het-trikni nishonladi. Ammo bu bilan o‘yindagi intrigaga barham berilmadi: o‘yin yakunigacha jamoalar yana bittadan gol urishdi. 96-daqiqada Usmon Dembele, 98-daqiqada Jud Bellinghem o‘z nomini tabloga yozdirib qo‘yishdi.
Dembelening goliga uzatma bergan Olise esa birato‘la Pelening rekordini yangilab qo‘ydi: u bir turnirdagi assistlari sonini 7 taga yetkazib, braziliyalik afsonaviy hujumchining 1970 yildagi ko‘rsatkichini yaxshiladi.
Yakuniy hisob hokkeycha ko‘rinish oldi. Jami zarbalar ko‘rsatkichi ham anomal ko‘rinishda edi – 19:19 (darvoza sohasiga to‘g‘ri borgan zarbalar bo‘yicha 11:9, xG – 2,89 ga qarshi 2,77 inglizlar foydasiga).
Tuxel esa o‘yindan oldingi fikrlariga ters o‘laroq, o‘yindan keyin baxtiyor edi va maydon bo‘ylab yurib, o‘z shogirdlarini bronza bilan tabrikladi. Bu Angliya milliy jamoasi uchun 1960 yilgi mundialdan buyon ilk medal bo‘ldi.
XOQ Infantinoni jazolamaydi
Xalqaro olimpiya qo‘mitasi AQSh milliy jamoasi hujumchisi Folarin Balogunning diskvalifikatsiyasi kechiktirilgani bilan bog‘liq vaziyat uchun FIFA prezidenti Janni Infantinoga sanksiya qo‘llamoqchi emas.
Avvalroq FairSquare notijorat tashkiloti FIFA rahbarining harakatlari yuzasidan qo‘mitaga shikoyat yo‘llagani ma’lum bo‘lgandi. Ammo The Guardian manbasiga ko‘ra, XOQ xalqaro federatsiyalarning o‘z qoidalarini qo‘llash xususiyatlariga aralashishni istamaydi.
Nashrning boshqa suhbatdoshi so‘zlariga ko‘ra, XOQ va FIFA o‘rtasidagi kuchlar muvozanati so‘nggi yigirma yil ichida futbol tashkiloti foydasiga sezilarli darajada o‘zgargan – uning ta’siri tijorat daromadlari va yosh auditoriyani jalb qilish borasida ortib bormoqda.
Eslatib o‘tamiz, Balogun JCh 1/16 finalida Bosniya va Hersegovinaga qarshi o‘yinda (2:0) «jiddiy qoidabuzarlik» uchun to‘g‘ridan to‘g‘ri qizil kartochka olgandi va kamida ikkita o‘yinni o‘tkazib yuborishi kerak edi.
Ammo FIFA intizomiy qo‘mitasi diskvalifikatsiya amal qilishini bir yillik sinov muddati uchun to‘xtatdi va futbolchi 1/8 finalda Belgiyaga qarshi kechgan o‘yinda (1:4) maydonga tushdi. Keyinroq AQSh prezidenti Donald Tramp ushbu masalada Infantino bilan gaplashganini tan oldi.
Nyu Yorkdagi smog JCh finaliga xalal bermaydi
Hafta davomida Ole nashri Ispaniya va Argentina o‘rtasidagi hal qiluvchi Kanadada avj olgan o‘rmon yong‘inlari tufayli boshqa joyga ko‘chirilishi mumkinligi haqida xabar tarqatgandi. Qo‘shni mamlakatda ko‘tarilgan tutun AQSh shimoli-sharqigacha kelgan va yirik shaharlarga yaqinlashgan – payshanba kuni havo ifloslanishi tufayli Chikagoda MLS o‘yini ko‘chirilgandi.
Smog 19 iyul kuni kechqurun jahon chempionati finali o‘tkaziladigan Nyu York shahriga ham yopirilgan. Ammo Bloomberg agentligi o‘z manbalariga tayanib xabar berishicha, FIFA o‘yin vaqti va joyini ko‘chirmoqchi emas.
Materialda xabar qilinishicha, futbol federatsiyalari vakillari bu haqda Oq uyning turnirga tayyorgarlik ko‘rish bo‘yicha ishchi guruhi rahbari Endryu Juliani bilan norasmiy suhbat o‘tkazgan. Ular o‘rtasida iqlim masalasi bo‘yicha rasmiy uchrashuvlar rejalashtirilmagan.
Ispaniya va Argentina murabbiylari Messi va Yamalni maqtamoqda
JCh hal qiluvchi o‘yini arafasida Argentina va Ispaniya milliy jamoalari ustozlari bir-birining futbolchilariga kompliment yog‘dirdi. Lionel Skaloni «Qizil furiya» vingeri Lamin Yamalga yuqori baho bergan, Luis de la Fuente – «Albiseleste» sardori Lionel Messi sha’niga maqtov yog‘dirgan.
«Yamal – futbol xazinasi, – deya Skalonining so‘zlarini keltiradi Ole. – Unga qarshi himoyalanish juda qiyin, u Ispaniyaga katta quvonch keltirishi mumkin bo‘lgan futbolchi. Umid qilamanki, yakshanba kuni bunday bo‘lmaydi. Albatta, uni mehmonxonaga qamab, maydonga chiqarmaslikni istardim».
De la Fuente esa ispanlar Messiga qarshi personal himoyalanmasligi, chunki bundan naf yo‘qligini aytdi.
«Men Leoni «Sevilya» yoshlar jamoasini shug‘ullantirib yurgan davrimdan buyon bilaman. Biz uning yoniga bir futbolchi qo‘ydik, keyin u kartochka oldi, men uni almashtirdim va Messi bizga uchta gol urdi. Uni personal qo‘riqlashni tashkil qilmaymiz, ammo diqqatli bo‘lamiz.
Messining o‘zi – alohida bir tarix. Afsona. 39 yoshda finalga chiqish – aql bovar qilmas ish! U shu yerdaligida o‘yinidan zavqlanish kerak. Diyego Maradonaning yo‘qligi bilinadi, chunki u endi biz bilan emas. Ammo Messi hamon shu yerda», – deya uning so‘zlarini keltiradi Marca.
Messi o‘zi va Yamalning chaqaloqlikdagi fotosini esladi
2007 yilda Leo Sport gazetasining YUNISEF bilan (o‘shanda «Barselona» homiylaridan edi) hamkorlikda tayyorlangan xayriya taqvimi uchun suratga tushgan. Bu loyiha doirasida klub futbolchilari bolalar bilan suratga tushardi: yosh ishtirokchilarni tanlash uchun tashkilot lotereya o‘tkazadi – va g‘oliblardan biri Yamalning ota-onasi bo‘ladi.
20 yoshli Messi plastik vannada besh oylik Laminni cho‘miltirayotgani aks etgan surat shu taxlit paydo bo‘lgan. 19 yil o‘tib futbolchilar JCh-2026 finalida bir-biriga qarshi o‘ynaydi. Turnirning hal qiluvchi o‘yini oldidan argentinalik hujumchi ushbu fakt haqida esladi va uni aql bovar qilmas hodisa deb atadi.
«To‘g‘risini aytsam, bu suratimiz juda ajoyib. Hayot shunaqa, to‘g‘rimi? Men u bilan go‘dakligida suratga tushganman, mana endi ikkimiz jahon chempionati finalida yuzma-yuz turibmiz.
Lamin – juda iste’dodli futbolchi, men uni ko‘p kuzataman, chunki u men sevgan klub – «Barselona»da o‘ynaydi va men unga doimo eng yaxshi tilaklarni tilayman. 19 yoshida u dunyoning eng yaxshi futbolchilaridan biri hisoblanadi va uning butun karerasi hali oldinda», – deya Messining so‘zlarini keltiradi The Athletic.
Tuxelni Tramp ham tanqid qildi
Inglizlar JCh yarimfinalida Argentinaga qarshi o‘yinda birinchi bo‘lib hisob ochgan, ammo shundan keyin to‘liq himoyalangan va o‘yin oxirida ikki gol o‘tkazib, yutqazib qo‘ygandi (1:2).
O‘yindan keyin faqat dangasa kishilargina «Uch sherlar» ustozi Tomas Tuxelning bu o‘xshamagan rejasini tanqid qilmadi. Bunga hatto AQSh prezidenti Donald Tramp ham qo‘shildi.
«Angliya milliy jamoasida biz birga golf o‘ynaydigan ajoyib futbolchi bor – Harri Keyn. U ajoyib. Menimcha, ular uni himoyaga o‘tkazib, xatoga yo‘l qo‘yishdi. Ammo men futbolda nimani ham bilardim? Ular hisobda oldinga chiqishdi va eng yaxshi o‘yinchisini himoyaga qo‘yishdi.
Axir biroz hujum qilish kerak edi, shunday emasmi? Bu noodatiy qaror bo‘ldi», – degan Oq uy egasi FIFA rahbari Janni Infantino bilan birgalikdagi matbuot anjumanida.
Navbatdagi o‘yin
Jahon chempionatida atigi bitta o‘yin qoldi – eng muhimi – final.
20 iyulga o‘tar kechasi, 00.00. Ispaniya – Argentina
O‘zbekiston milliy terma jamoasining 22 yoshli himoyachisi Abduqodir Husanov Angliyaning «Manchester Siti» klubi bilan shartnomasini 2031-yilgacha uzaytirishi haqida xabar berilgandi.
OAV ma’lumotlariga ko‘ra, yangi 5 yillik shartnoma imzolangach, Husanovning yillik maoshi taxminan 7,5 million yevroga yetadi.
Futbolchi oyiga taxminan 625 ming yevro, haftasiga esa 144 ming yevro maosh oladi. Uning o‘rtacha daromadi kuniga qariyb 20,5 ming yevro, soatiga 856 yevro va daqiqasiga 14 yevrodan ortiqni tashkil etadi.
Shu tariqa, Husanovning 5 yil davomidagi umumiy daromadi 37,5 million yevroga yetishi mumkin. Bunda turli mukofot pullari hisobga olinmagan.
Abduqodir Husanov o‘tgan mavsumda «Manchester Siti» safida 37 ta uchrashuvda maydonga tushib, Angliya Kubogi va Liga Kubogini qo‘lga kiritishda ishtirok etgan. Shuningdek, u O‘zbekiston terma jamoasi bilan mamlakat tarixidagi ilk jahon chempionatida qatnashdi.
2027 yilgi Osiyo Kubogi O‘zbekiston milliy terma jamoasi uchun navbatdagi yirik musobaqa emas. Bu turnir so‘nggi yillarda mamlakatda amalga oshirilgan futbol islohotlarining haqiqiy samarasini ko‘rsatadigan muhim mezonga aylanishi mumkin. O‘zbekiston yaqinda mustaqilligining 35 yilligini nishonlaydi. O‘tgan vaqt ichida sportga va ayniqsa futbolga davlat darajasida katta e’tibor qaratildi. Shunday ekan, bu e’tibor natijasini ko‘raydigan vaqt ham keldi, deb bemalol aytish mumkin.
O‘zbekiston futboli tarixida birinchi marta jahon chempionati yo‘llanmasini qo‘lga kiritgani tasodif emas. Bu natija bir necha yil davomida davlat siyosati darajasiga ko‘tarilgan futbol islohotlari, infratuzilmaga yo‘naltirilgan sarmoyalar, yoshlar akademiyalari faoliyati va boshqaruv tizimidagi o‘zgarishlarning mantiqiy davomidir.
Ammo eng katta savol hali ham ochiq qolmoqda: bu o‘sish Osiyo Kubogida chempionlik uchun yetarlimi?
Davlat siyosati o‘z samarasini bermoqda
So‘nggi yillarda Prezident Shavkat Mirziyoyev rahbarligida futbolni rivojlantirish davlat siyosatining muhim yo‘nalishlaridan biriga aylandi. Bu jarayon faqat kattalar futboli bilan cheklanib qolmadi.
Yangi futbol akademiyalari tashkil etildi, bolalar va o‘smirlar futboliga e’tibor kuchaytirildi, hakamlik tizimi takomillashtirildi, VAR texnologiyasi joriy qilindi, futbol sohasini raqamlashtirish bo‘yicha alohida qarorlar qabul qilindi. Superliga klublarining moliyaviy barqarorligini ta’minlash, iqtidorli futbolchilarni aniqlash va xorijda o‘ynayotgan futbolchilarni qo‘llab-quvvatlash ham ustuvor vazifalar sifatida belgilandi.
Bu o‘zgarishlar natijasida O‘zbekiston nafaqat kuchli terma jamoaga, balki xalqaro musobaqalarni qabul qilish imkoniyatiga ega futbol mamlakatiga ham aylanmoqda. 2027 yilgi U-17 Osiyo chempionatiga mezbonlik huquqining qo‘lga kiritilishi ham xalqaro futbol tashkilotlarining mamlakat infratuzilmasiga bo‘lgan ishonchini ko‘rsatadi.
Oltin avlod shakllandi
Hozirgi terma jamoa O‘zbekiston mustaqillik tarixidagi eng kuchli tarkiblardan biri sifatida baholanmoqda.
Yevropa chempionatlarida o‘ynayotgan futbolchilar soni ortdi. Eldor Shomurodov kabi tajribali yetakchilar bilan bir qatorda yosh avlod ham xalqaro maydonda tobora ko‘proq tajriba to‘plamoqda. “Manchester Siti”dagi Abduqodir Husanov Yevropaning yetakchi himoyachilaridan hisoblanadi. Muhammadali O‘rinboyev Belgiyaning “Antverpen”ida o‘ynamoqda, Abbosbek Fayzullayev Shomurodov bilan birga Turkiyaning “Bashakshehiri”da to‘p suryapti. Yaqindagina Jahongir O‘rozov Qozonning “Rubin” klubi safiga o‘tdi. Shuningdek Portugaliyaning “Braga” jamoasida faoliyatini boshlagan Sayfiddin Sodiqov va Sadriddin Hasanovlardan ham umid katta.
Eng muhimi, terma jamoada avlodlar almashinuvi og‘riqsiz kechmoqda. Ilgarigi yillarda bir-ikki yetakchi futbolchiga qaram bo‘lgan jamoa endi har bir chiziqda raqobatga ega. Bu esa uzoq davom etadigan turnirlarda hal qiluvchi ahamiyat kasb etadi.
Chempionlik uchun nima yetishmayapti?
Shunga qaramay, Osiyo Kubogida g‘olib chiqish oson vazifa emas. Qit’ada Yaponiya, Janubiy Koreya, Eron, Avstraliya kabi muntazam ravishda jahon darajasida raqobatlashayotgan terma jamoalar mavjud.
O‘zbekiston ular bilan nafaqat texnika yoki jismoniy tayyorgarlik, balki hal qiluvchi uchrashuvlardagi psixologik barqarorlik, katta turnir tajribasi va sovuqqonlik borasida ham raqobatlasha olishi lozim.
Jahon chempionatiga chiqish bilan Osiyo Kubogida chempion bo‘lish o‘rtasida katta farq bor. Birinchisi saralash bosqichida barqarorlikni talab qilsa, ikkinchisi qisqa muddatli pley-offlarda har bir xatoning bahosi juda yuqori bo‘lgan musobaqadir.
Real imkoniyat yoki orzu?
Endi bevosita Osiyo Kubogida g‘alaba qozonish maqsadiga kelsak. Agar bu savol besh-olti yil avval berilganida, javob aniq edi – orzu.
Bugun esa vaziyat mutlaqo o‘zgargan.
O‘zbekiston endi Osiyo Kubogiga sensatsiya qilish uchun emas, chempionlik uchun da’vogar sifatida bormoqda. Bu maqom jahon chempionatiga chiqish, futbol infratuzilmasining rivojlanishi va davlat tomonidan izchil qo‘llab-quvvatlanayotgan islohotlar natijasida qo‘lga kiritildi.
Albatta, O‘zbekistonni turnirning asosiy favoriti deb aytishga hali erta. Ammo chempionlik uchun kurashadigan 4-5 jamoa qatorida bo‘lish – tabiiy voqelikdir.
Shu ma’noda, “Osiyo Kubogida g‘oliblik orzumi?” degan savolga javob ham o‘zgardi.
Endi bu orzu emas.
Bu – amalga oshishi mumkin bo‘lgan real maqsaddir. Faqat to‘g‘ri tayyorgarlik, to‘g‘ri strategiya va hal qiluvchi bahslarda xarakter namoyish etilsa bo‘lgani, Osiyo Kubogi bizniki bo‘ladi!
Bizga tarixdagi ilk mundial yo‘llanmasini taqdim eta olgan yigitlar bu ishning ham uddasidan chiqa olishlariga ishonamiz!
Sport
Shavkat Mirziyoyev suv-motor sporti bo‘yicha Qirg‘iziston Gran-prisining ochilish marosimida ishtirok etdi (foto)
Norasmiy Maslahat uchrashuvi doirasida O‘zbekiston, Qirg‘iziston, Qozog‘iston va Tojikiston prezidentlari Issiqko‘lda suv-motor sporti bo‘yicha Qirg‘iziston Gran-prisining tantanali ochilish marosimida ishtirok etdilar.
Yetakchilar musobaqa ishtirokchilari va mehmonlarini qutladilar.
Shavkat Mirziyoyev rafiqasi bilan birga sportchilarning saralash poygasini kuzatdi.
Gran-pri Xalqaro suv-motor sporti ittifoqi shafeligida o‘tkazilayotgan «suvdagi Formula-1» nomi bilan mashhur bo‘lgan F1H2O jahon chempionatining ikkinchi bosqichi hisoblanadi. Musobaqalarda har yili turli mamlakatlardan professional jamoa va sportchilar ishtirok etadi. Jahon chempionati bosqichi Markaziy Osiyoda ilk bor o‘tkazilmoqda.
Dasturdan mashg‘ulotlar, saralash bosqichi hamda soatiga 220 kilometrdan ortiq tezlikda harakatlanuvchi tezyurar qayiqlardagi asosiy poyga o‘rin olgan.
Sport
Shavkat Mirziyoyev Qirg‘izistonda ilk xalqaro toifadagi golf klubi ochilishida qatnashdi (foto)
Qirg‘izistonda ilk xalqaro toifadagi golf klubi ochildi.
Cho‘lponota shahriga tashrif doirasida O‘zbekiston Respublikasi Prezidenti Shavkat Mirziyoyev Markaziy Osiyo va Ozarbayjon davlat rahbarlari bilan birgalikda Qirg‘izistondagi ilk xalqaro toifadagi golf klubining tantanali ochilish marosimida ishtirok etdi.
Yetakchilar bu yerda barpo etilgan zamonaviy sport va turizm infratuzilmasi bilan tanishdilar. Yangi majmua golfni ommalashtirish, sport turizmini rivojlantirishga xizmat qilishi ta’kidlandi.
Davlat rahbarlari qardosh Qirg‘iz Respublikasi Prezidenti Sadir Japarov va xalqini yangi obyektning ochilishi bilan tabriklab, mamlakatning turizm salohiyatini rivojlantirishga qaratilgan keng ko‘lamli loyihalarni amalga oshirishda muvaffaqiyatlar tiladilar.
FIFA rahbari Janni Infantino futboldan yanayam ko‘p pul ishlamoqchi. The Times nashri qo‘lga kiritgan ma’lumotlarga ko‘ra, Infantino milliy terma jamoalar hamda klublar o‘rtasidagi jahon chempionatlarini boshqaradigan kompaniyaga asos solmoqchi.
Kelgusi yili FIFA prezidenti saylanadi, Infantino — yagona nomzod, u saylansa, 2031-yilgacha tashkilotni boshqaradi. Shundan so‘ng u mazkur kompaniyaga rahbarlik qilishi mumkin.
Yangi kompaniya aksiyalari xususiy sarmoyadorlarga taklif etilishi aytilmoqda. Xabarga ko‘ra, AQSh prezidenti Donald Tramp ma’muriyatiga yaqin doiralar bilan aloqalar yo‘lga qo‘yilgan. Xususan, Trampning kuyovi Jared Kushnerning ukasi — Joshua Kushner va JPMorgan banki Infantino kompaniyasining asosiy sarmoyadorlaridan biri bo‘lishi ehtimol qilinmoqda.
Aksiyalarni taqsimlash tartibi quyidagicha bo‘lishi mumkin: nazorat paketi FIFA ixtiyorida qoladi, xususiy sarmoyadorlar esa dastlabki bosqichda aksiyalarning 20–30 foizini sotib olish imkoniga ega bo‘ladi. Qolgan qariyb 20 foiz aksiya esa FIFA tarkibidagi 211 ta milliy futbol uyushmasiga ajratiladi. Har bir uyushmaga taxminan 20 million AQSh dollariga teng qiymatdagi aksiyalar tegadi, ular o‘z xohishlariga ko‘ra, bu aksiyalarni sotishlari ham mumkin. Moliyaviy imkoniyatlari cheklangan kichik futbol uyushmalari bu jozibador taklifni quchoq ochib kutib olishlari aniq.
Bu islohotning ehtimoliy kutilmalaridan biri jahon chempionatlari — milliy terma jamoalar hamda klublar o‘rtasidagi musobaqalarni tez-tez o‘tkazish bo‘lishi mumkin. Chunki kompaniyaning asosiy maqsadi daromadni imkon qadar ko‘paytirishdir. Qolaversa, musobaqada ishtirok etuvchi jamoalar sonini oshirish masalasi ham ko‘rib chiqilyapti.
Xotira va miya holatini yaxshilovchi meva nomi aytildi
Markaziy bank dollar bo‘yicha yangi ma’lumot berdi
Nogironligi bo‘lgan abituriyentlarga imtihonda qo‘shimcha vaqt beriladi
-
Siyosat5 days agoShavkat Mirziyoyev ilgari surgan rezolyusiya BMTda ko‘pchilik ovoz bilan qabul qilindi
-
Mahalliy5 days ago
Uzrli sabab tufayli milliy sertifikat imtihonida qatnasholmaganlarga to‘lov qaytariladi
-
Mahalliy4 days ago
Toshkentning 10 ta tuman hokimiga nisbatan xizmat tekshiruvi o‘tkaziladi
-
Iqtisodiyot4 days ago
O‘zbekistonning Markaziy Osiyo va Ozarbayjon bilan savdosi keskin o‘sdi
-
Mahalliy2 days ago
Nogironligi bo‘lgan abituriyentlarga imtihonda qo‘shimcha vaqt beriladi
-
Jamiyat3 days ago
Endi boshpanasizlar Ijtimoiy markazlarga sud qarorisiz joylashtiriladi
-
Iqtisodiyot5 days ago
O‘zbekistonning yalpi ichki mahsuloti 1 kvadrillion so‘mdan oshdi
-
Sport3 days ago
Husanovning yillik maoshi taxminan 7,5 million yevroga yetadi