Jamiyat
30 dan ortiq mamlakatda O‘zbekiston sharafini himoya qilgan o‘zbek qizi hikoyasi
50 mingdan ortiq xotin-qizlarga bilim bergan, ularning shaxsiy rivojlanishiga, til o‘rganishlarida va hayotda o‘z o‘rnini topishiga munosib hissa qo‘shgan, 30 dan ortiq mamlakatda O‘zbekiston nomidan chiqish qilgan o‘zbek qizi – Shohida Yusupova Kun.uz bilan suhbatda o‘z muvaffaqiyatlari siri bilan bo‘lishdi.
Shohida Yusupova – Zulfiya nomidagi Davlat mukofoti sovrindori, Harvard universitetining “Leadership: Creating Public Value” kursini tamomlagan. Oksford universiteti va Buyuk Britaniya Lordlar palatasi tomonidan tashkil etilgan xalqaro tanlovlarda g‘oliblikni qo‘lga kiritgan. Ayni paytda Italiyadagi Siyena universitetida “Xalqaro madaniy diplomatiya” yo‘nalishida magistraturada tahsil olmoqda. U 4 tilda erkin so‘zlasha oladi, sayyohlik firmasi asoschisi, 30 dan ortiq xalqaro tashkilotlar bilan hamkorlikda faoliyat olib boradi va u yerda o‘zbek yoshlari manfaatlarini faol ilgari surib, xalqaro loyihalari bilan dunyoning ko‘plab mamlakatlarida shuhrat qozongan o‘zbek qizi.
Hayotimni o‘zgartirgan savol
“Hayotimning o‘zgarib ketishida bir savol jiddiy sabab bo‘ldi. 2019 yilda talabalar bilan Turkiyaga xalqaro konferensiyada ishtirok etish uchun borgan edik. Taqdimot tugagach, shahar aylanish uchun chiqib, bir do‘konga kirdik. Sotuvchi bizning qayerdan kelganimizni so‘radi – faxrlanib “O‘zbekistondan” dedim.
Lekin sotuvchining e’tiborsizlik bilan, ochig‘ini aytganda, hurmatsizlik bilan “ha, ishlagani kelganmisizlar?” degan savolini qalbimni ming bo‘lakka parchalab yubordi. Bunday qarash mening yuragimga juda og‘ir botgan edi. Chunki o‘zbek ayollariga u yerda sayohatchi yoki bilimli talaba sifatida emas, balki qora ishchi sifatida qarashar ekan. O‘shanda o‘ylab qolgan edim, millatimizda iste’dodli va ilmli ayollar ko‘p. Lekin nega chetda ularga oddiy ishchi sifatida qarash urf bo‘lgan ekan. Bu menga sira yoqmagan edi.
O‘shanda o‘zbek ayollari ham 3–4 ta tilni biladigan, jahon minbarlarida o‘z fikrini dadil va erkin ayta oladigan ishbilarmon, zukko shaxslar ekanini butun dunyo bilishini xohlagandim.
2021 yil Turkiyada huddi shu konferensiyada 50 ta adabiyot sohasida faoliyat olib borayotgan nihoyatda iste’dodli ayollarning ijod namunalarini saralab-jamlab, xalqaro antologiya tuzdik. U yerda ularning nafaqat ijod namunalari, balki o‘z faoliyatlari va yutuqlari haqida ham qiziqarli ma’lumotlar bor edi. Va o‘sha kitobning taqdimotini milliyligimizga mos bir tarzda o‘tkazdik. Zamonaviy turk jamoatchiligi tomonidan juda yaxshi qabul qilindi.
Ochig‘ini aytaman, juda ko‘p iqtidorli ayollarimiz oddiy uy bekasi qiyofasiga yashirinib olishgan. Men ularni butun dunyo bilishini, tan olishini va e’tirof etishini istaydim”.
“Shine Qizlar Akademiyasi” – har bir qiz uchun imkoniyat maydoni
“2022 yilda ko‘plab qizlarning istaklari, talablari bilan “Shine qizlar akademiyasi”ni tashkil etdik. Davlat ro‘yxatidan o‘tkazdik. Bugungi kunga qadar 50 mingga yaqin ayol-qizlarimiz loyihalarimizda qatnashdi.
O‘zim Yangibozor tumanidagi Qalandardo‘rmon qishlog‘ida tug‘ilib o‘sganim uchun u yerda juda ko‘plab, orzulari ulug‘vor, lekin ishni qayerdan boshlashni bilmayotgan, tushkunlikka tushgan, ammo g‘oyatda qobiliyatli ayol-qizlarni bilardim. Ularning hayotini yaxshi tomonga o‘zgartira oladigan nimadir qilgim kelardi. Vaqti kelib bu loyihaga aylandi. Shunday ayollar va qizlar uchun imtiyozli ravishda ingliz va turk tillarini o‘rgatadigan kurslar tashkil qildim.
Eng avvalo, o‘zim 4 ta tilni puxta o‘rgandim, ularda erkin so‘zlasha olganim uchun alohida xalqaro til kurslarida o‘qib, xalqaro metodlarni o‘zlashtirdim. Har bir yoshdagi insonga mos keladigan o‘z uslublarimni ishlab chiqdim. Bu yondashuv tez orada natijasini berdi.
Kurslarimizda 3 oy o‘qib, C1 darajadagi sertifikatni qo‘lga kiritgan qizlar ham bo‘ldi. Loyihalarimizda ishtirok etib, xalqaro forumlarda qatnashayotgan, grant va stipendiyalar yutib olayotgan qizlarimiz soni tobora ko‘payib bormoqda.
Bizda ota-onasi bo‘lmagan, ajrashgan, kam ta’minlangan oilalar qizlari imtiyozli ravishda o‘qishlari mumkin. Talabalik yillarimda til o‘rganish bilan birga yangi kasblar bo‘yicha bilim olishni xohlaganman. Harvard universitetining rahbarlik va boshqaruv yo‘nalishida, Germaniyaning Berlin-biznes xalqaro institutining marketing va kommunikatsiyalar yo‘nalishida qo‘shimcha masofaviy ta’lim oldim.
Har bir ayolning shaxsiy brendi bo‘lsa…
Bugungi kunda bu bilimlarning hayotimdagi foydasi juda katta. Har bir ayol uchun o‘z shaxsiy brendini yaratishda, salohiyatini to‘liq namoyon qilishida bu kabi ilmlarning o‘rni beqiyos. Biz xalqaro miqyosda ilmli, o‘z ustida to‘xtovsiz ishlaydigan, orzularidan sira voz kechmaydigan va har qanday qiyinchilikdan qo‘rqmaydigan betakror o‘zbek qizlarining kuchli obrazini yaratmoqdamiz. Bu faqat mening emas, butun jamiyatimizning umumiy yutug‘i.
Akademiyada 4 ta tildagi o‘quv dasturlar, xalqaro metodika asosida kurslar, imtiyozli dasturlar va C1 darajagacha bilim beriladigan mukammal tizim mavjud. Ko‘plab ishtirokchilar bu orqali xalqaro tanlovlar, konferensiyalar va stipendiyalar g‘olibiga aylanmoqda, dunyo ko‘rmoqda, dunyoqarashi o‘zgarmoqda.
24 yoshimda 30 davlatni ko‘rdim. Aytishim kerakki, men hamisha moliyaviy mustaqil bo‘lishni xohlaganman. Dadamga doim hali zo‘r bo‘lib ketaman, sizga mashinalar olib beraman der edim.
Shunday kun keldiki, men bu aytganlarimning barchasini uddaladim. 21 yoshimda dala bilan tillashgan, doim halol mehnat ortidan biz farzandlarni katta qilgan dadamga avtomobil sovg‘a qildim. Uy bekasi bo‘lgan, menga va ukamga faqat o‘qishimimiz kerakligini uqtirib yashagan onamga ham Turkiya, Amirliklar, Ozarboyjon, Saudiyaga yo‘llanmalar olib berdim.
Bir paytlar o‘zimning shaxsiy uyim bo‘lishini orzu qilar edim, bugun poytaxtdan tashqari Dubaydan ham xonadon sotib olish nasib qildi. Men bularni nega aytyapman? O‘zining katta hayot yo‘lini boshlashga ikkilanayotgan, baland marralar sari dastlabki qadamlarni tashlashga cho‘chiyotgan qizlar jur’atli bo‘lishi uchun ularga ilhom berishni asosiy vazifam deb bilaman”.
Dunyoni qalbimda mehr bilan aylanaman
Shohidaning orzusi hamisha katta bo‘lgan: Qaysi xorijiy davlatga bormasin ona yurtini iftixor bilan namoyon etdi, o‘sha yurtlar xalqlarida o‘zbek nomiga ehtirom uyg‘otishga intildi.
Uning tashabbuslari – Turkiyada “O‘zbekistonning umidli chechaklari”, Ozarboyjonda “Iste’dodli qizlar”, Misrda “Ilhomlantiruvchi ovozlar”, Xitoyda “O‘zbekiston adabiy antologiyasi” va “Amazon” platformasida “O‘zbekiston qo‘shig‘i” kabi xalqaro loyihalarda o‘z ifodasini topdi. Bu e’tiborli izlanishlar ayol-qizlarimizning yuksak ma’naviy kuchi va dilbar qiyofasini butun dunyoga yaqqol ko‘rsatdi.
Xalqaro maydondagi chiqishlari — O‘zbekiston imiji uchun xizmat
Shohida Yusupova so‘nggi yillarda dunyoning yetakchi telekanallari, xalqaro forumlari va media platformalari orqali Yangi O‘zbekiston va o‘zbek ayol-qizlari haqida turkum suhbatlar berib kelmoqda.
Bu chiqishlari orqali u yurtimizning boy tarixi, betakror go‘zalligi, turizm salohiyati, ta’lim va ma’rifat sohalaridani o‘zgarishlari haqida jahon ahlini tanitishga hissa qo‘shmoqda.
Yakun: bir yurak, bir el, bir missiya
Shohida uchun bu faqat shaxsiy muvaffaqiyatlar emas – bu bir umrlik missiya. Uning orzusi: 100 minglab qizlarimizning ko‘zlarida porlagan umid va ishonch uchqunlarini reallikka aylantirishga chin sababchi bo‘lishdir.
“Har bir ayol agar qo‘llab-quvvatlash va ishonch, mehr va e’tibor bo‘lsa, qalblarni yayratadigan go‘zal bo‘stonga o‘xshaydi.
Menga ishonishdi. Men esa ularning ishonchini yurakda saqlab, butun dunyoga o‘zbek qizining bilimda, iymonda va orzuda qanday qudratga ega ekanini ko‘rsataman.
Har bir xalqaro chiqish, har bir yozilgan kitob, har bir o‘tkazilayotgan loyiha bu aziz va mo‘tabar Vatanimiz imiji uchun qo‘yilgan xayrli qadamdir.
Qayerda bo‘lmaylik, O‘zbekistonning jahonga qanday tanilishi – aynan bizga, yurt farzandlariga bog‘liq”, – deydi u.
Gulmira Toshniyozova suhbatlashdi.
Asadjan Xodjayev Raqamli texnologiyalar vazirining Komplayens va korrupsiyaga qarshi ichki nazorat bo‘yicha o‘rinbosari etib tayinlandi. Bu haqda vazirlik matbuot xizmati xabar berdi.
O‘zbekiston Respublikasi Prezidenti Administratsiyasi rahbarining tegishli farmoyishi bilan Asadjon Azatbekovich Raqamli texnologiyalar vazirining Komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi.
Asadjon Xodjayev (1970-yilda tug‘ilgan) — Toshkent elektrotexnika aloqasi instituti va O‘zbekiston Respublikasi Prezidenti huzuridagi Davlat boshqaruvi akademiyasi (2001-yil) bitiruvchisi. Mutaxassisligi — elektroaloqa muhandisi, iqtisodiyot magistri.
1995−2001-yillarda aloqa vazirligi, Pochta va telekommunikatsiya markaziy apparatida ishlagan, 2001−2003-yillarda «O‘zbekiston pochtasi» Davlat aksionerlik kompaniyasi bosh direktorining birinchi o‘rinbosari, UZINFOCOM Kompyuter va axborot texnologiyalarini rivojlantirish va joriy etish markazi direktorining birinchi o‘rinbosari lavozimlarida faoliyat ko‘rsatgan. 2019-yil noyabridan — 2020-yil iyuligacha Axborotlashtirish va telekommunikatsiyalar sohasida nazorat bo‘yicha davlat inspeksiyasi boshlig‘i, 2020-2025-yillarda AOKA rahbari sifatida ishlagan.
7 sentyabr kuni Markaziy Osiyo atrof-muhit va iqlim o‘zgarishini o‘rganish universiteti (Green University)da “Xalqaro moviy osmon uchun toza havo kuni”ga bag‘ishlangan tadbir bo‘lib o‘tdi. Unda Ekologiya va iqlim o‘zgarishi milliy qo‘mitasi raisi maslahatchisi Alisher Salomov, Yaponiyaning O‘zbekistondagi elchisi Kenji Xirata, UNEPning Yevropa mintaqaviy byurosi mintaqaviy direktori o‘rinbosari (onlayn) Xosseyn Fadaei, BMT Taraqqiyot dasturining doimiy vakili o‘rinbosari Anas Karman, «Zamin» xalqaro jamoat fondi direktori Aziz G‘aniyev, mahalliy va xorijlik mutaxassislar ishtirok etdi.
Tadbirda nutq so‘zlagan Alisher Salomov O‘zbekistonda Prezident rahbarligida atrof-muhitni muhofaza qilish sog‘liqni saqlash, sanoat, transport, energetika, qishloq xo‘jaligi va iqlim siyosatini o‘zaro bog‘lovchi, davlat siyosatining ustuvor yo‘nalishiga aylanganligini qayd etdi. U 2026–2030 yillarga mo‘ljallangan “Toza havo” umummilliy loyihasini misol qilib keltirdi.
“Bizning milliy maqsadimiz — 2030 yilga qadar atmosfera havosiga chiqariladigan ifloslantiruvchi moddalar miqdorini 10,5 foizga kamaytirish. Mazkur maqsad aholi salomatligini yaxshilash, shaharlarimizni yashash uchun yanada qulay qilish, sanoatni tozalash va barqaror iqtisodiy o‘sishni ta’minlashga bo‘lgan qat’iy majburiyatimizni ifodalaydi”, — dedi Alisher Salomov.
Rais maslahatchisi o‘z nutqida mintaqada havo sifati bo‘yicha hamkorlikni kengaytirish maqsadida O‘zbekiston Respublikasi Prezidenti tomonidan Xalqaro toza havo konsorsiumini tashkil etish tashabbusi ilgari surilganligini va ushbu tashabbus Qozog‘iston Respublikasi Prezidenti tomonidan ham qo‘llab-quvvatlanganligini alohida ta’kidladi. O‘z navbatida samarali hamkorlik uchun Yaponiya hukumatiga, BMT Taraqqiyot dasturiga (UNDP), BMT Atrof-muhit dasturiga (UNEP), Finlyandiya meteorologiya institutiga, «Zamin» fondiga hamda barcha hamkorlarga samimiy minnatdorlik bildirdi.
«Zamin» xalqaro jamoat fondi direktori Aziz G‘aniyev “Toza havo” umummilliy loyihasi shunchaki monitoring stansiyalarini o‘rnatishdan ko‘ra ancha kengroq ma’noga ega ekanligini aytib o‘tdi.
“2020 yilda havo sifatini monitoring qilish tizimini kuchaytirish maqsadida boshlangan tashabbus bugungi kunga kelib, hukumat, ekspertlar, olimlar va xalqaro hamkorlar uchun ishonchli havo sifati ma’lumotlarini yanada ochiq, qulay va amaliy foydalanish imkonini beruvchi keng qamrovli milliy tizimga aylandi. Bu esa, pirovardida, O‘zbekiston aholisi uchun yanada toza havo va sog‘lom atrof-muhitni ta’minlashga xizmat qiladigan mustahkam zamin yaratmoqda”, — dedi u.
Tadbir davomida O‘zbekistonda havo sifatini monitoring qilish tizimi rivojiga bag‘ishlangan videorolik taqdim etildi. Shuningdek, mahalliy va xorijlik mutaxassislar tomonidan O‘zbekistonda havo sifatini monitoring qilish tizimini rivojlantirish, havo ifloslanishining iqtisodiy va ekologik ta’siri, monitoring ma’lumotlaridan samarali foydalanish, shuningdek, transchegaraviy havo ifloslanishi va chang bo‘ronlari bo‘yicha xalqaro va mintaqaviy hamkorlikni kuchaytirish hamda havo sifatini yaxshilash kabi dolzarb mavzularda ma’ruzalar qilindi.
Xususan, Gidrometeorologiya ilmiy-tadqiqot instituti direktori Doniyor Turg‘unov “O‘zbekistonning toza havoni ta’minlash borasidagi taraqqiyoti: besh yillik tizimli o‘zgarishlar”, UNEPning mintaqaviy koordinatori Tomas Markes O‘zbekistonda toza havoni ta’minlashda UNEPning ahamiyati, FMI havo sifati va energetika guruhi rahbari Katya Loven “Havo sifatini zamonaviy monitoring qilish: ma’lumotlardan samarali yechimlargacha”, BMT Taraqqiyot dasturining atrof-muhit va loyihalar bo‘yicha mutaxassisi Gavhar Qudaybergenova “Toza havoni ta’minlash va barqaror shahar rivoji uchun kompleks yechimlar”, BMT YIKning Uzoq masofalarga transchegaraviy havo ifloslanishi to‘g‘risidagi konvensiyasi kotibi Albena Karadjova “Chegarasiz toza havo: xalqaro va mintaqaviy hamkorlik”, Ekologiya milliy qo‘mitasi bosh mutaxassisi Aziza Sharofova esa “O‘zbekistonning chora-tadbirlari va havo sifatini yaxshilash rejalari” mavzulariga e’tibor qaratdi.
Tadbir davlat tashkilotlari, xalqaro tashkilotlar va ekspertlarni bir joyga jamlab, O‘zbekistonning havo sifatini monitoring qilish borasidagi yutuqlari va kelgusidagi ustuvor yo‘nalishlarini muhokama qilish imkonini yaratdi. Unda havo sifatini monitoring qilish va ifloslanishning iqtisodiy ta’sirini baholashdan tortib, amaliy choralar hamda xalqaro va mintaqaviy hamkorlik masalalarigacha bo‘lgan mavzular ko‘rib chiqildi. Transchegaraviy havo ifloslanishi, chang bo‘ronlari va xalqaro hamkorlik mexanizmlaridan foydalanish imkoniyatlariga alohida e’tibor qaratildi.
Ma’lumot uchun, O‘zbekistonda havo sifatini monitoring qilish tarmog‘i va «Ekonazorat» platformasi kengaytirilmoqda. «Zamin» fondi ko‘magida 28 ta avtomatik havo monitoringi stansiyasi HORIBA (Yaponiya, Germaniya) kompaniyasi tomonidan ishlab chiqarilgan. Mazkur tizimni respublika bo‘ylab yanada kengaytirish maqsadida 347 ta kichik avtomatlashtirilgan havo sifati monitoring stansiyasini ishga tushirish rejalashtirilgan. Ushbu stansiyalardan olinadigan ma’lumotlar Qo‘mitaning yagona axborot tizimiga integratsiya qilinadi. Bu hududlarni qamrab olish ko‘lamini kengaytirish, ifloslanish holatini yanada aniq baholash va dalillarga asoslangan qarorlar qabul qilish imkonini beradi.
O‘zbekistonda HUMO barqaror tokenidan to‘lov vositasi sifatida foydalanish bo‘yicha pilot loyiha boshlanmoqda.
Loyiha Markaziy bank va Istiqbolli loyihalar milliy agentligi nazoratida amalga oshiriladi. Uning maqsadi raqamli to‘lovlarning yangi shaklini amaliyotda sinab ko‘rishdan iborat.
Loyiha doirasida 1 HUMO tokeni 1 so‘mga teng bo‘ladi. Tokenlar O‘zbekistonning davlat qimmatli qog‘ozlari bilan ta’minlanishi rejalashtirilgan.
HUMO tokeni orqali O‘zbekiston hududida tovarlar, ishlar va xizmatlar uchun to‘lov qilish imkoniyati sinovdan o‘tkaziladi. Shuningdek, tokenlarni chiqarish, muomalaga kiritish va muomaladan chiqarish mexanizmlari ham tekshiriladi.
Loyihani amalga oshirish uchun bank, protsessing va blokcheyn tizimlari o‘zaro integratsiya qilinadi. Unda «HUMO Digital» MChJ hamda kripto-depozitariy, kripto-birja va kripto-do‘kon litsenziyalariga ega «Asterium» AJ ishtirok etadi.
Pilot loyiha maxsus huquqiy rejim — «regulyator qumdoni» doirasida o‘tkaziladi. Bu yangi moliyaviy texnologiyalarni cheklangan va nazorat qilinadigan muhitda sinab ko‘rish imkonini beradi.
Sinov jarayonida tokenlarning yetarli darajada ta’minlangani, operatsiyalar shaffofligi, kiberxavfsizlik, iste’molchilar huquqlarini himoya qilish va moliyaviy xatarlarni boshqarish masalalariga alohida e’tibor qaratiladi.
Markaziy bank loyihaning moliyaviy va narxlar barqarorligiga ta’sirini ham kuzatib boradi.
Pilot loyihaning dastlabki muddati 12 oy etib belgilangan. Zarur hollarda u uzaytirilishi mumkin, biroq umumiy muddat 3 yildan oshmaydi.
Loyiha yakunlariga ko‘ra, davlat qimmatli qog‘ozlari bilan ta’minlangan raqamli tokendan O‘zbekistonda to‘lov vositasi sifatida foydalanish imkoniyatlari va xatarlari baholanadi.
Hokim yordamchilarining asosiy vazifalarini belgilab beruvchi yo‘riqnoma tasdiqlandi. Unda aholi bandligini ta’minlashdan tortib, mahalla ixtisoslashuvini rivojlantirish va norasmiy bandlikni qisqartirishgacha bo‘lgan yo‘nalishlar qamrab olingan.
Yo‘riqnomaga ko‘ra, hokim yordamchilari har chorakda ishsizlar va daromadini oshirish istagida bo‘lgan fuqarolar haqida ma’lumot shakllantiradi. Shuningdek, mahalladagi ish beruvchilar va bo‘sh ish o‘rinlari ro‘yxatini tuzib, ishsizlarni mavjud vakansiyalarga yo‘naltiradi hamda ularning keyingi bandlik holatini kuzatib boradi.
Aholini kasb-hunar va xorijiy tillarga o‘qitish ham hokim yordamchilarining vazifalaridan biri bo‘ladi. Ular o‘qish istagidagi fuqarolarni aniqlab, kasbiy ta’lim tashkilotlariga yo‘naltiradi va o‘qishni tamomlaganlarning bandligini ta’minlash choralarini ko‘radi.
Kambag‘al oilalar uchun esa oilaning imkoniyati, ko‘nikmasi va qiziqishidan kelib chiqqan holda individual reja ishlab chiqiladi. Unga muvofiq barqaror bandlik xizmatlari ko‘rsatiladi va oila daromadining o‘sishi doimiy monitoring qilinadi.
Hokim yordamchilari mahallalarda mikroloyihalar tashabbuskorlarini aniqlash, ularni moliyalashtirish va ishga tushirish, shuningdek, loyihalar faoliyatini kuzatib borish bilan ham shug‘ullanadi. Mahallaning iqtisodiy salohiyati va resurslaridan kelib chiqib, «o‘sish nuqtalari» aniqlanadi va har yili ikki marta mahalla ixtisoslashuvi yo‘nalishi belgilab boriladi.
Tomorqa va ijara yerlaridan samarali foydalanish bo‘yicha «Bir kontur — bir mahsulot» va «Bir mahalla — bir mahsulot» tamoyillari asosida mahsulot yetishtirish tashkil etiladi. Tomorqa egalari va dehqonlarni o‘qitish, kooperatsiya aloqalarini yo‘lga qo‘yish, subsidiya va grantlar ajratishga ko‘maklashish ham nazarda tutilgan. Tomorqa va ijara yerlari yiliga uch marta xatlovdan o‘tkaziladi.
Bundan tashqari, hokim yordamchilari mahalladagi bo‘sh bino va yer uchastkalarini aniqlab, ularni elektron savdoga chiqarishga ko‘maklashadi. Quyosh panellari, geliokollektor va nasos kabi energiya samarador qurilmalarni o‘rnatish istagidagi fuqarolar bilan ishlash ham ularning vazifasiga kiradi.
Yo‘riqnomada norasmiy bandlikni qisqartirishga ham alohida e’tibor qaratilgan. Hokim yordamchilari norasmiy ishlayotgan fuqarolar va tadbirkorlarni aniqlab, ular haqidagi ma’lumotlarni «Onlayn mahalla» platformasiga kiritadi hamda faoliyatini rasmiylashtirishga ko‘maklashadi.
O‘zbekistonning inklyuziv loyihasi Yevropa ijtimoiy xizmatlar sohasidagi nufuzli mukofot finalistlari qatorida
«Zamin» fondi ko‘magida Ijtimoiy himoya milliy agentligi tomonidan amalga oshirilayotgan Xalqaro inklyuziv xab loyihasi Yevropa ijtimoiy xizmatlar sohasidagi eng nufuzli platformalardan biri — European Social Services Awards 2026 mukofotining short-listiga kirdi.
Joriy yilda mukofotning 10 ta nominatsiyasi bo‘yicha qariyb 200 ta loyiha taqdim etilgan. Xalqaro inklyuziv xab «Nogironligi bo‘lgan insonlar uchun ijtimoiy xizmatlarning inklyuzivligi va qulayligi» nominatsiyasida finalchilar qatoridan joy oldi.
Ekspertlar loyihaning nogironligi bo‘lgan insonlar uchun kasbiy ta’lim olishdan tortib, mehnat bozoriga kirish va mustaqil hayot kechirishgacha bo‘lgan jarayonlarni qamrab oluvchi yaxlit modelini alohida e’tirof etgan.
Xalqaro inklyuziv xab modeli insonning faqat muayyan ijtimoiy xizmatdan foydalanishini emas, balki uning ta’lim olishi, kasb egallashi, ishga joylashishi va jamiyatda mustaqil hayot kechirishi uchun zarur sharoitlarni yagona tizimga birlashtirishga qaratilgan.
Endi loyihani mukofotning keyingi bosqichi — oktyabr oyida o‘tkaziladigan ochiq ovoz berish jarayoni kutmoqda.
European Social Services Awards 2026 g‘oliblari 19–20-noyabr kunlari Italiyaning Rim shahrida bo‘lib o‘tadigan tadbirda e’lon qilinadi.
O‘zbekistonda amalga oshirilayotgan inklyuziv loyihaning Yevropa miqyosidagi nufuzli mukofot finalchilari qatoriga kirishi mamlakatda nogironligi bo‘lgan insonlarni qo‘llab-quvvatlash va ularning jamiyatda to‘laqonli ishtirokini ta’minlash borasidagi yondashuvlar xalqaro maydonda ham e’tirof etilayotganini ko‘rsatadi.
Asadjon Xodjayev Raqamli texnologiyalar vaziri o‘rinbosari etib tayinlandi
2030 yilga qadar havoni ifloslantiruvchi moddalar miqdori 10,5 foizga kamaytiriladi
O‘zbekistonda raqamli valyuta to‘lov vositasi sifatida sinab ko‘riladi
-
Sport2 days ago
Husan Botirov Biatlon federatsiyasi raisi etib saylandi
-
Jamiyat2 days ago
Prezidentning xususiylashtirishga oid farmoni e’lon qilindi
-
Jamiyat3 days ago
Toshkentda yana bir BRT yo‘lagi foydalanishga topshirildi
-
Siyosat5 days ago
Shavkat Mirziyoyev rasmiy tashrif bilan Serbiyaga boradi
-
Siyosat3 days ago
Shavkat Mirziyoyev Serbiyaga yetib bordi
-
Jamiyat1 day ago
Hokim yordamchilarining 9 ta asosiy vazifasi belgilab berildi
-
Jamiyat2 days ago
Sudyalikka nomzodlar uchun yosh senzi 30 yoshga tushirilishi mumkin
-
Iqtisodiyot2 days agoDollar qimmatladi, yevroda ham ko‘tarilish kuzatildi