O‘rmondan topilgan ayol jasadi 36 kundan beri qidiruvda bo‘lgan samarqandlik ayolga tegishli bo‘lishi mumkin. Gumonlanuvchi sifatida ham O‘zbekiston fuqarosi qo‘lga olingan.

Turkiyaning Balikesir viloyatida 46 yoshli samarqandlik Dilafruz Cho‘liyeva 21 yanvar kuni bedarak yo‘qolganidan beri undan hech qanday xabar bo‘lmagan. 2 mart kuni o‘rmon hududidan ayol kishining tanib bo‘lmaydigan holatdagi jasadi topilgani va kiyimlar unga tegishli bo‘lishi mumkinligi taxmini qidiruvdagi o‘zbekistonlik ayol taqdiri yuzasidan xavotirlarni yanada kuchaytirdi.

Ma’lumotlarga ko‘ra, Dilafruz Cho‘liyeva Turkiyada qonuniy yashash va ishlash ruxsatnomasiga ega bo‘lgan. U Balikesir viloyatining Burhoniya tumanidagi xonadonda ishlagan. 21 yanvar kuni u Edremitdan Burhoniyaga qaytayotib soat 20:00–20:30 atrofida avtobusdan tushgan. Shundan keyin u bilan aloqa uzilgan. 22 yanvar kuni ishga chiqmagan. 23 yanvar kuni ish beruvchilari uni qidirib, politsiyaga xabar berishgan.

Yaqinlari 24 yanvar kuni uning yo‘qolganini bilib, Turkiyadagi O‘zbekiston elchixonasi va konsulxonasiga, shuningdek Tashqi ishlar va Ichki ishlar vazirliklariga murojaat qilishgan.

Politsiya tergovi doirasida Ilyos ismli shaxs gumondor sifatida so‘roq qilingan. Aytilishicha, Cho‘liyevaning telefonidan oxirgi signal ushbu shaxsning uyi atrofida qayd etilgan. U o‘z bayonotida Cho‘liyevani tanishini, ammo u Istanbulga ketganini aytgan.

2 mart kuni Turkiyada o‘rmon hududidan ayol kishining tanib bo‘lmaydigan holatdagi jasadi topilgan. Kiyimlar va ayrim alomatlarga qarab, yaqinlari bu jasad Dilafruz Cho‘liyevaga tegishli bo‘lishi mumkinligini bildirgan.

Hozircha bu ma’lumot rasman tasdiqlanmagan. Biroq hodisa yuzasidan gumonlanuvchi sifatida o‘zbekistonlik fuqarolar qo‘lga olingani xabar qilinmoqda.

Ta’kidlash joiz, so‘nggi oylarda Turkiyada o‘zbek ayollari bilan bog‘liq bir necha fojiali holatlar kuzatilgan. Jumladan, Istanbulda o‘zbekistonlik fuqarolar – Durdona Hakimova va Sayyora Ergashaliyevaning o‘limi jamoatchilikda katta muhokamalarga sabab bo‘lgan edi.

Dilafruz Cho‘liyevaning taqdiri bo‘yicha rasmiy ekspertiza va DNK natijalari kutilmoqda.

Source link

O‘zbekiston Pokiston va Afg‘oniston kuchlari o‘rtasidagi to‘qnashuvga munosabat bildirdi. 

O‘zbekiston Afg‘oniston va Pokiston o‘rtasidagi chegara hududida vaziyatning keskinlashayotganidan chuqur xavotirdaligini ma’lum qilgan. 

«Biz tomonlarni darhol otishmani to‘xtatishga, vazminlikka va keskinlikning yanada kuchayishiga olib kelishi mumkin bo‘lgan harakatlardan tiyilishga chaqiramiz. 

Shuningdek, O‘zbekiston tomoni yuzaga keladigan barcha kelishmovchiliklar faqat tinch yo‘l bilan, siyosiy va diplomatik muloqotlar orqali, davlatlarning suvereniteti, hududiy yaxlitligi va o‘zaro hurmat prinsiplari asosida hal etilishi lozimligini yana bir bor ta’kidlaydi», deyiladi TIV xabarida. 

Eslatib o‘tamiz, avval Pokiston qo‘shinlari Afg‘onistonning yirik shaharlari — Kobul va Qandahorda Tolibon hukumatiga tegishli harbiy ob’yektlarga havo zarbalari berdi. Tolibon harakati esa Pokiston harbiy inshootlariga «javob zarbalari» berganini ma’lum qildi. Har ikki tomon katta yo‘qotishlar haqida xabar bermoqda. 

Source link

Yo‘l harakati qoidalarini buzganlik uchun rasmiylashtirilgan ma’muriy bayonnomalarni (jarima xatlarini) yetkazib berish xizmati to‘xtatiladi. 

Respublikada «Xavfsiz shahar» konsepsiyasini amalga oshirish doirasida jamoat xavfsizligini ta’minlash jarayonlarini raqamlashtirish, shu jumladan maxsus avtomatlashtirilgan foto va video qayd etish texnika vositalari orqali yo‘l harakati qoidalari buzilganligi uchun jarima solish to‘g‘risidagi qarorlarni yetkazishda inson omilini kamaytirish, ishonchliligini oshirish hamda aholi uchun qulayliklar yaratish maqsadida yo‘lga qo‘yiladi.

Qarorlarning ko‘chirma nusxasi va unga ilova qilingan materiallar sinov tariqasida quyidagi manbalar orqali yuborilishi yo‘lga qo‘yilgan:

— davlat xizmatlari portali: — my.gov.uz (MyGov mobil ilovasi)

— SafeRoad mobil ilovasi

— Road24 mobil ilovasi

— Yagona interaktiv davlat xizmatlari mobil ilovasi (MIB)

— Hamroh mobil ilovasi Qaror rasmiylashtirilishi bilan 6079 raqamidan SMS-xabarnoma yuboriladi.

Agar SMS-xabarnoma kelmasa, my.gov.uz portaliga kirib, telefon raqamingizni ro‘yxatdan o‘tkazishingiz lozim — shundan so‘ng barcha xabarnomalar avtomatik ravishda yuboriladi.

Mazkur raqamli xizmatlardan foydalanish vaqti cheklanmagan, qo‘shimcha ro‘yxatdan o‘tish yoki hujjat taqdim etish talab etilmaydi, qaror rasmiylashtirilishi bilan bir vaqtda barcha materiallar bilan tanishish hamda qonunchilikda belgilangan muddatlarda jarimani to‘lash imkoniyati mavjud.

Source link

DXX hamda ichki ishlar va bojxona organlari hamkorligida o‘tkazilgan tezkor tadbirlarda Toshkent shahrida kuchli ta’sir qiluvchi dori vositalarining noqonuniy muomalasiga chek qo‘yildi. Reydlar davomida “Regapen” va “Zardeks”, shuningdek, qo‘lbola tayyorlangan dorilarning katta partiyasi ashyoviy dalil sifatida olindi.

Ma’lum qilinishicha, DXX va IIO xodimlari hamkorligida o‘tkazilgan tadbirda Toshkent viloyatining Zangiota tumanida yashovchi, 1996 yil tug‘ilgan shaxs hamda uning 1999 yil tug‘ilgan samarqandlik tanishi poytaxt hududida to‘xtatilib tekshirilgan. Natijada ularning yonidan 8400 dona “Regapen” kuchli ta’sir qiluvchi dori vositasi borligi aniqlangan.

Shuningdek, ular vaqtinchalik ombor sifatida foydalangan Chilonzor tumanidagi xonadondan 12 600 dona “Regapen”, 10 000 dona turli xildagi, ishlab chiqaruvchisi aniq bo‘lmagan qo‘lbola dorilar, dorilarni qadoqlash uchun 500 dona idish, qalbaki qadoqlarga qaydlarni yozishga mo‘ljallangan markerlovchi mini-printer ashyoviy dalil sifatida olingan.

Ikkinchi holatda DXXning Toshkent shahar bo‘yicha boshqarmasi hamda ichki ishlar va bojxona organlari hamkorligida o‘tkazilgan tezkor tadbirda 1994 yil tug‘ilgan shaxs 6 dona “Zardeks” dori vositasini 600 ming so‘mga sotgan paytida ushlangan.

Tezkor tadbir davom ettirilib, ushbu dori vositalarini yetkazib berib turgan Namangan shahrida yashovchi, 1987 yil tug‘ilgan, muqaddam sudlangan fuqaro ham poytaxt hududida qo‘lga olingan. Uning “Treker” rusumli avtomashinasidan 12 400 dona “Zardeks” va 14 dona “Regapen” protsessual tartibda rasmiylashtirib olingan.

Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.

DXX giyohvandlik vositalari bilan bog‘liq holatlarga duch kelinganda 1520 qisqa raqamiga qo‘ng‘iroq qilib xabar berish mumkinligini eslatdi. Shaxs ma’lumotlarining sir saqlanishi kafolatlanishi ta’kidlandi.

Source link

Toshkent viloyati hokimi Toshkent tumani hamda Chirchiq shahridagi yo‘llarni ta’mirlash xarajatlari uchun Viloyat mahalliy budjetining 2026-yil boshiga shakllanadigan erkin qoldiq mablag‘lari hisobidan jami 5,3 mlrd so‘m mablag‘ ajratdi.

Hokim farmoyishiga ko‘ra, ajtilgan mablag‘larning 3,5 mlrd so‘mi Toshkent tumanining 9 ta ichki ko‘chalarini jami 11,5 km uzunlikdagi ta’mirtalab qismini ta’mirlash uchun ishlatiladi. Qolgan 1,8 mlrd so‘m esa Chirchiq shahridagi Harbiy poligonga olib boruvchi yo‘lning ta’mirlash ishlarini yakuniga yetkazish xarajatlari uchun sarflanadi.

Ushbu mablag‘larning belgilangan tartibda maqsadli sarflanishi ustidan esa viloyat «Mintaqaviy yo‘llarga buyurtmachi xizmati» davlat muassasasi (N.Tog‘aynazarov), Iqtisodiy jinoyatlarga qarshi kurashish departamenti huzuridagi Davlat moliyaviy nazorati inspeksiyasi viloyat boshqarmasi (O.Odilov) hamda viloyat hokimining birinchi o‘rinbosari O.Tursunovlar tegishli nazoratni o‘rnatadilar.

Source link