O‘zbekiston xalq artisti Farrux Zokirov Kun.uz’ga bergan intervyusida ijodiy faoliyatidagi eng og‘ir davrlar, “zapret” yillari, davlat rahbari hamda birinchi xonim bilan bog‘liq xotiralari, otasi Karim Zokiriy o‘g‘lining ijodiga bergan bahosi va oilasi haqida samimiy gapirdi. Xonanda ayrim paytlar tug‘ilgan kunini “yig‘lab-yig‘lab” o‘tkazganini, biroq xalq mehri uni yana sahnaga qaytarganini aytadi.

“Bu ham sinov ekan. Elakdan o‘tganlar san’atda sheryurak bo‘ladi”

Farrux Zokirov ijodkor uchun taqiq — xalq tilidagi “zapret” qanchalik og‘riqli ekanini eslar ekan, shunday dedi: Endi buni ham ko‘rish kerak ekan. Tatib ko‘rish kerak, his qilish kerak. Bu ham sinov. Shunaqangi she’r yozib berdilar Mahmud Toir, “Yalla”ga bag‘ishlov sifatida. Qarang, to‘rt qatorning o‘zida bitta afsona:

Ellik besh yil elak bo‘ldi,

Ellik besh ming tilak bo‘ldi.

Bu elakdan o‘ta olganlar

San’atda sheryurak bo‘ldi.

“Men vazirlikdan ketib, xalqim va ijodimga qaytishni so‘radim”

“O‘sha paytda sizning hamkasblaringiz bilan muloqot bo‘lganmi? Hol-ahvol so‘rashdimi sizdan? Yoki siz ular bilan yig‘ilib, “meni taqiqdan olinglar, men ijod qilmoqchiman, menga erkinlik kerak”, deya olganmisiz, Farrux aka?” – degan savolga quyidagicha javob qaytardi suhbatdoshimiz.

Yo‘q. Bir shunaqa bo‘lgan, mana, vazirlikda ishladik. Ozgina bo‘lsa ham vazir ham bo‘ldik. Men o‘ylagan edimki, o‘sha paytda mening foydam tegarmikan, men teatrda o‘sganman, san’at olamida o‘sganman. Endi o‘sha paytlarda yo‘q, bu narsa kerak emas ekan. Bu haligi tizim, ertalab rahbariyatdan keladigan qog‘oz, kun bo‘yi o‘sha bilan ovoragarchilik. Endi to‘g‘ri tushuning. Madaniyat bilan sportni birlashtirishdi. Orada bo‘ldi. Esingizda bormi? Mana shu fursatdan foydalanib men aytdimki: “iltimos, keling, men xalqimga, ijodimga qaytay”. Ismlarini aytmay, yaxshi ham yaxshilik bilan men shu yerdan ketdim men, vazirlikdan. Men aytdimki: “Iltimos, men sahnada ko‘proq foyda keltiraman”. Nima deydi, u joydan ketishning o‘zi ham bo‘lmaydi endi, bilasiz-u, bunaqa protokollar. O‘shanda boshdan o‘tkazdik. Bu ham kerak, bu ham, haligi aytganimdek, bu hammasi sinov. Bu haligi aytganimdek elak. Bu elakdan o‘tdik.

“Prezidentimiz san’atimizning muxlisi. Bunga milliardlar ham yetmaydi”

Qahramonimiz suhbat davomida davlat rahbari bilan bog‘liq xotiralarni his-hayajon bilan esladi. Farrux Zokirovning aytishicha, davlat rahbari bilan munosabatlari uzoq yillardan beri davom etadi. Ayniqsa, 70 yillik yubileyidagi tashrifni xonanda katta hayajon bilan esladi. Uning aytishicha, dastlab yarim soatga rejalashtirilgan uchrashuv bir yarim soat davom etgan. “Prezidentimiz bizning san’atimizning muxlisi. Bunga nima yetsin? Buni milliardlarga ham sotib olib bo‘lmaydi”, – dedi san’atkor. Xonanda ayrim qiyin davrlarda aynan shunday e’tibor va qo‘llab-quvvatlash uni ruhlantirganini ta’kidladi.

“Baxt bor edi, lekin yig‘lab nishonlagan kunlar ham bo‘lgan”

Farrux Zokirov davlat rahbari tilga olgan og‘ir davrlarni ham esladi.

Uning aytishicha, hayot doimo “silliq” bo‘lmagan. Ba’zi tug‘ilgan kunlar quvonch bilan emas, ichki og‘riqlar bilan o‘tgan. Shunga qaramay, san’atkor bunday sinovlarni hayot maktabi deb bilishini aytdi. “Xalq nazari boshqa narsa. Demak, qilgan xizmatlarimiz bekor ketmagan”, – dedi u.

“Birinchi xonimdagi nafosat o‘zbek ayolining timsoli”

Muxlislaringiz orasida birinchi xonim Ziroat Mirziyoyeva ham bor ekanlar. Ya’ni ular ham sizning qo‘shiqlaringizni maroq bilan eshitarkanlar. Birinchi xonim haqida ham bir fikrlaringiz bo‘lsa, yaxshi bo‘lardi.

Kelinoyimiz. Endi, avvalambor, sir bo‘lmasa kerak, men shunday baxtga ega bo‘lganmanki, muloqotda bo‘lish, bunaqangi oliyjanoblik… Qarang, men o‘sha qo‘shiqlarimda ifodalashga harakat qilaman, bizning o‘zbek ayollarining bir eng go‘zallik tomonlari mana kelinoyimizda bor.

Nafozat, go‘zallik, odob. Shu o‘zlarining shunday bir qarab turishlarida qanaqangi mehr bor, qandaydir go‘zallik bor. Shuning uchun hali aytyabman-u, men butun dunyo bo‘ylab yuraman, bizning o‘zbek ayoli, ayniqsa men bir narsani yana o‘shanga urg‘u beramanki, farqi yo‘q, o‘zbekmi, armanmi, rusmi, qirg‘izmi, o‘zbekistonlik ayollar bir boshqacha-da.

“Otam tanqid qilmaganining o‘zi katta baho edi”

Farrux Zokirov otasi Karim Zokirov bilan bog‘liq xotiralarni ham esladi.

Uning aytishicha, otasi qo‘shiqlarni ko‘p maqtamagan, lekin tanqid qilmasligining o‘zi katta e’tirof hisoblangan. Ayniqsa, “G‘ayra-g‘ayra” qo‘shig‘idan keyingi “Yomon emas, yaxshi, o‘g‘lim” degan gap xonanda uchun unutilmas baho bo‘lib qolgan. “Yalla” diniy qo‘shiq deb tanqid qilingan paytlar ham bo‘lgan”

San’atkor sovet davridagi bosimlarni ham esladi.

Uning aytishicha, 1985-yillarda markaziy matbuotda “Yalla” ansambli diniy yo‘nalishga yaqinlikda ayblangan. Biroq keyinchalik tarixchilar va musiqashunoslar “Yalla” nomining ildizi xalq og‘zaki ijodi va “Yo Alloh” iboralari bilan bog‘liq ekanini aytgan. “Demak, buning tarixiy asosi bor ekan”, – dedi Farrux Zokirov.

“Seni tashlab ketganim yolg‘on, o‘g‘lim”

Intervyumizning eng ta’sirli qismlaridan biri “O‘g‘lim” qo‘shig‘i haqida bo‘ldi. Farrux Zokirovning aytishicha, bu qo‘shiqning yaratilishida marhum Muhammad Yusufning hissasi katta bo‘lgan.

Alloh rahmat etsin, Muhammad Yusufning oldiga borganmiz, uchrashib, keyin men aytdimki, bir fikr bor, mana, suhbatlashsak, maslahatlashsak, shu “Erkak allasi” bo‘larmikin? Shuni chiqarsa bo‘larmikin? Bir mahalda o‘zgarib qoldi Muhammad Yusuf, Alloh rahmat etsin. Qizardi-da, “Farrux aka, uzr, hozir kelaman”, deb chiqib ketdi. Bir o‘n minutcha yo‘q. Keyin kirib, qaytib kirib keldi-da, ko‘zlari qizarib ketgan. “Eh, Farrux aka, mening boshimdan o‘tgan narsa”. Endi birinchi oila bo‘lmasdan anaqa, bunaqa-bunaqa bo‘lgan deb, menga she’r berganlar o‘sha kuni. Qalbimning shunaqangi nozik joyiga tegdi. Keyin o‘sha she’rni menga berganlar.

O‘ksimagin, jon o‘g‘lim, arslon o‘g‘lim.

Seni tashlab ketganim yolg‘on, o‘g‘lim”.

“Jamshid ukamni hammadan ko‘p maqtashardi”

Mendan keyingi ukam rahmatli Jamshid. Ajoyib inson: kamtarin, shunaqangi mehribon, hali aytishadi-yu, “qo‘yning og‘zidan cho‘p olmaydigan” insonlardan biri Jamshid ukam, deya O‘zbekistonda xizmat ko‘rsatgan artist, kino va teatr aktyori rahmatli Jamshid Zokirov haqida esladi.

Qayerga bormaylik, mana, qarindoshlarga, Qo‘qongami, u-bu yerlarga borganimizda, “Karim aka, Jamshid o‘g‘lingiz boshqacha-da”, deyishardi. Yuvosh bo‘lgan, mehribon bo‘lgan, sal dadamga ham ko‘proq o‘xshab ketardi. Men, masalan, oyimga ko‘proq o‘xshayman. Shu men uchun haligi rashk emas, men ham shu harakat qilardimki, menga ham shunaqa deyishsa. Endi boshqacha hazil ham qilishardi. Masalan, endi bir tasavvur qiling, buyuk Halima Nosirova, buyuk Tamaraxonim, Mukarrama Turg‘unboyeva… Endi dadam bilan ular aka-ukaday, opa-singilday, mana shunaqa. Juda ham bularning munosabatiga, bularning muomalasiga havas qiladigan, bu ham bir maktab edi. Masalan, men endi kichkinaman, “Karim aka, buningiz boshqacharoq-a, sarig‘roq-a?” deb. Endi hazil, o‘shaning orasida balkim duolar bo‘lganmi… Endi aytyabman-ku, shunaqangi buyuk insonlarning duosini, suhbatini, maslahatini olganmiz.

“San’atdagi eng katta mukofot — xalqning muhabbati”

Intervyu davomida Farrux Zokirov bir necha bor xalq mehrini eng katta boylik deb ta’kidladi. San’atkorning aytishicha, mukofotlar, unvonlar yoki mansablardan ham muhimrog‘i — xalqning qalbidan joy olishdir. “Buni hech qanday boylik bilan sotib olib bo‘lmaydi”, – dedi u.

Source link

Toshkent metropolitenida 2026 yil may oyida yo‘lovchilar oqimi o‘tgan yilning mos davriga nisbatan sezilarli darajada oshdi. Ayniqsa, haftaning payshanba va juma kunlari metro eng gavjum kunlar sifatida qayd etilmoqda. 8 may kuni esa poytaxt metrosi bir sutkada 1 mln 117 ming 61 nafar yo‘lovchiga xizmat ko‘rsatib, tarixiy rekord o‘rnatdi.

Statistik ma’lumotlarga ko‘ra, 2025 yil 8 may kuni metropoliten xizmatlaridan 986 ming 916 nafar yo‘lovchi foydalangan bo‘lsa, 2026 yil 7 may kuni bu ko‘rsatkich 1 mln 105 ming 883 nafarga yetgan. Natijada yo‘lovchilar oqimi 12 foizga oshgan.

Shuningdek, 2025 yil 15 may kuni 953 ming 220 nafar yo‘lovchi metro xizmatidan foydalangan bo‘lsa, 2026 yil 14 may kuni ushbu ko‘rsatkich 1 mln 44 ming 736 nafarga yetdi. Bu esa 9,6 foizlik o‘sishni ko‘rsatmoqda.

Yana bir muhim natija sifatida, 2026 yil 8 may kuni Toshkent metropoliteni bir kun davomida 1 mln 117 ming 61 nafar yo‘lovchiga xizmat ko‘rsatib, rekord ko‘rsatkichni qayd etdi. Bu o‘tgan yilning mos davriga nisbatan 80,5 foizga yuqori natija hisoblanadi.

Source link

Toshkent shahrining Chilonzor tumanida tungi vaqtda piyoda ishtirokida yo‘l-transport hodisasi sodir bo‘ldi. Hodisa oqibatida bir nafar fuqaro jarohatlanib, unga tez tibbiy yordam ko‘rsatilgan.

Toshkent shahar IIBB YHXB Axborot xizmati ma’lumotiga ko‘ra, voqea joriy yilning 16 may kuni soat taxminan 01:00 larda Chilonzor tumanidagi Bunyodkor shohko‘chasida, Oliy Majlis binosi qarshisida sodir bo‘lgan.

Dastlabki ma’lumotlarga ko‘ra, 2007 yilda tug‘ilgan haydovchi Tracker rusumli transport vositasini boshqarib ketayotib, yo‘lning belgilanmagan qismidan harakatlanib o‘tayotgan 2007 yilda tug‘ilgan piyodani urib yuborgan.

Yo‘l-transport hodisasi oqibatida piyoda turli tan jarohatlari olgan. Unga voqea joyiga yetib kelgan shifokorlar tomonidan birinchi tez tibbiy yordam ko‘rsatilgan. Hozirda uning ahvoli bo‘yicha qo‘shimcha ma’lumot berilmagan.

Mazkur holat yuzasidan Toshkent shahar IIBB YHXB tomonidan surishtiruv harakatlari olib borilmoqda. Huquqni muhofaza qiluvchi organlar hodisaning barcha holatlarini o‘rganmoqda.

Shu munosabat bilan YHXB barcha haydovchi va piyodalarni yo‘l harakati qoidalariga qat’iy amal qilishga chaqirdi. Xususan, piyodalarga faqat belgilangan joylardan harakatlanib o‘tish, haydovchilarga esa tungi vaqtda harakat vaqtida yanada ehtiyotkor bo‘lish tavsiya etildi.

Source link

O‘zgidromet ma’lumotlariga ko‘ra, bugun kunduzi respublika hududining aksariyat qismida yog‘ingarchilik kutilmaydi. Faqat Toshkent, Jizzax va Sirdaryo viloyatlarida kunning ikkinchi yarmida ayrim joylarda qisqa muddatli yomg‘ir yog‘ishi, momaqaldiroq bo‘lishi mumkin. Shamol 7–12 m/s tezlikda esadi, shimoliy hududlarda ayrim joylarda 13–18 m/s gacha kuchayishi va chang-to‘zonlar kuzatilishi mumkin. Havo harorati 30–35 daraja bo‘ladi.

Toshkent shahrida kechga tomon qisqa muddatli yomg‘ir yog‘ishi, momaqaldiroq bo‘lishi mumkin. Shamol 3–8 m/s tezlikda esadi, ba’zan 10–12 m/s gacha kuchayishi va ayrim joylarda chang-to‘zonlar kuzatilishi mumkin. Havo harorati 32–34 daraja bo‘ladi.

Tog‘ oldi va tog‘li hududlarning ayrim joylarida qisqa muddatli yomg‘ir yog‘ishi, momaqaldiroq bo‘lishi mumkin. Sel-suv toshqini xavfi saqlanib qolmoqda. Shamol 7–12 m/s tezlikda esadi, momaqaldiroq paytida 15–20 m/s gacha kuchayishi mumkin. Havo harorati 20–25 daraja bo‘ladi.

Source link

2026 yil boshi holatiga ko‘ra, O‘zbekistonda har 1 000 nafar ayolga o‘rtacha 1 015 nafar erkak to‘g‘ri kelmoqda. Eng yuqori ko‘rsatkich Namangan viloyatida qayd etilgan.

Milliy statistika qo‘mitasi ma’lumotlariga ko‘ra, 2026 yil 1 yanvar holatida mamlakat bo‘yicha har 1 000 nafar ayolga 1 015 nafar erkak to‘g‘ri kelgan.

Hududlar kesimida bu borada eng yuqori ko‘rsatkich Namangan viloyatida kuzatilib, u yerda har 1 000 nafar ayolga 1 034 nafar erkak to‘g‘ri kelgan.

Shuningdek, yuqori ko‘rsatkichlar Qashqadaryo viloyatida — 1 029 nafar, Andijon viloyatida — 1 027 nafar, Navoiy viloyatida — 1 026 nafar va Surxondaryo viloyatida — 1 025 nafarni tashkil etgan.

Jizzax va Farg‘ona viloyatlarida bu ko‘rsatkich 1 019 nafardan, Samarqand viloyatida 1 016 nafardan iborat bo‘lgan.

Qoraqalpog‘iston Respublikasida har 1 000 nafar ayolga 1 010 nafar erkak, Sirdaryo viloyatida 1 009 nafar, Toshkent viloyatida 1 008 nafar, Buxoro viloyatida 1 006 nafar va Xorazm viloyatida 1 004 nafar erkak to‘g‘ri kelgan.

Toshkent shahri esa ro‘yxatda eng past ko‘rsatkich qayd etilgan hudud bo‘lib, poytaxtda har 1 000 nafar ayolga 966 nafar erkak to‘g‘ri kelishi ma’lum qilingan.

 

Source link