2025 yilda yerni xususiylashtirish bo‘yicha 112 mingta ariza kelib tushgan, shundan 14 foizi bosh reja yo‘qligi uchun rad etilgan. Prezident topshirig‘i bilan, yerlarni xususiylashtirish bo‘yicha arizalarga inson omilisiz 5-10 daqiqa ichida onlayn javob beradigan tizimga o‘tiladi. Yil oxirigacha 200 tadan ortiq aholi punktining bosh rejasi yoki master rejasini oxiriga yetkazish buyurildi.

Foto: Prezident matbuot xizmati

O‘zbekiston prezidenti urbanizatsiya mavzusidagi 14 aprel kungi yig‘ilishda bosh rejalar masalasiga to‘xtalib o‘tdi.

Ma’lum qilinishicha, bosh rejalarni ishlab chiqish uchun budjetdan yiliga 200-250 milliard so‘m berilmoqda. Shavkat Mirziyoyev bu mablag‘lar bosh rejasi bo‘lmagan yoki eskirgan hududlarga sarflanishi shartligini ta’kidladi.

Kichik shahar va shaharchalarda ham katta loyiha qilaman degan tadbirkorlar borligi, shaharsozlik hujjati yo‘qligi uchun ularning ishi to‘xtab turgani qayd etildi. O‘zi mablag‘ tikib, tezroq bosh reja ishlab chiqilishidan manfaatdor tadbirkorlar ham ko‘p.

Viloyat hokimlari va Urbanizatsiya qo‘mitasiga joriy yilda budjet mablag‘i hisobidan 6 ta shahar, 44 ta shaharcha bo‘yicha bosh reja, yana 104 ta qishloq bo‘yicha master rejani oxiriga yetkazish, bunga qo‘shimcha tashabbuskor biznes vakillari bilan yana 50 ta aholi punkti bo‘yicha shaharsozlik hujjatini ishlab chiqishni boshlash topshirildi.

Qayd etilishicha, “bosh rejasi yo‘q” degan bahona bilan 2025 yilda yerni xususiylashtirish bo‘yicha 112 ming arizaning 14 foizi rad etilgan. Hokimlarga buning oqibatida 4 ming gektar yerni aktivga aylantirish, xususiylashtirish hisobidan budjetga 550 milliard so‘m qo‘shimcha tushum boy berilgani ko‘rsatib o‘tildi. Uch oyda yerlarni xususiylashtirish bo‘yicha arizalarga inson omilisiz 5-10 daqiqa ichida onlayn javob beradigan tizimga o‘tish topshirildi.

Ta’kidlanishicha, bosh rejalarni tasdiqlash orqali juda katta maqsad va vazifalar belgilanmoqda, lekin bosh rejada ko‘rsatilgan suv, kanalizatsiya, issiqlik, gaz, elektr liniyalari, yo‘llar qachon, qaysi navbatda va qanday manbalar hisobidan quriladi degan savolga javob yo‘q.

Aslida, har bir bosh rejani ro‘yobga chiqarish bo‘yicha yilma-yil kompleks dastur qilinib, aholi, tadbirkor va mas’ullarga yetkazilishi kerakligi qayd etildi. Bunday dasturlar yo‘qligi uchun ham infratuzilmaga 1 so‘mlik xarajat ketadigan joyga 2-3 karra ko‘p mablag‘ sarflanayotgani, pala-partish qurilishlar haligacha davom etayotgani ko‘rsatib o‘tildi.

Har bir viloyat hokimiga ikki oyda viloyat va tuman markazlarining tasdiqlangan bosh rejalarini ro‘yobga chiqarish bo‘yicha kompleks dasturlarni ishlab chiqish topshirildi.

Mutasaddilarga kompleks dasturlardagi tadbirlarning qaysi biri respublika va mahalliy budjetdan, qaysilari xalqaro moliya tashkilotlari hisobidan bo‘lishini aniq belgilab berish vazifasi qo‘yildi.

Source link

Soliq qo‘mitasi ma’lumotlariga ko‘ra, 2026-yil 1-aprel holatida qurilish sohasida soliq qarzi 100 mln so‘mdan yuqori bo‘lgan 1 944 ta korxona aniqlangan. Ularning umumiy qarzdorligi 3,2 trln so‘mni tashkil etgan.

Shundan 1,3 trln so‘mi, ya’ni 40,4 foizi eng katta qarzdor 10 ta korxona hissasiga to‘g‘ri kelmoqda. Bu esa sohada soliq qarzining asosiy qismi ma’lum korxonalar hissasiga to‘g‘ri kelishini ko‘rsatadi.

Eng yirik qarzdorlar qatorida «NEW BUILDING TRADE SERVIS» MChJ — 362,7 mlrd so‘m, «KO PRIKQURILISH» AJ — 303,5 mlrd so‘m, «AZIYA INVEST FAVORIT» MChJ — 137 mlrd so‘m, «TASH BUILDING» MChJ — 119 mlrd so‘m va «TASH CONSTRUCTIONS HOUSE» MChJ — 101,4 mlrd so‘m qarz bilan yetakchilik qilmoqda.

Hududlar kesimida eng yuqori ko‘rsatkich Toshkent shahrida qayd etilgan bo‘lib, umumiy qarz 975,7 mlrd so‘mga yetgan. Ikkinchi o‘rinda Andijon viloyati — 714,5 mlrd so‘m bilan turibdi. Toshkent viloyati esa 229,1 mlrd so‘m qarz bilan uchinchi o‘rinni egallagan.

Source link

2026-yilning yanvar–fevral oylarida O‘zbekistonda 3,7 trln so‘mlik elektr uskunalar ishlab chiqarildi. Milliy statistika qo‘mitasiga ko‘ra, bu ko‘rsatkich 2025-yilning mos davriga nisbatan 10,8 foizga oshgan.

Qayd etilishicha, eng yuqori ko‘rsatkich Toshkent shahri hissasiga to‘g‘ri kelib, 2,2 trln so‘mlik mahsulot ishlab chiqarilgan. Shuningdek, Toshkent viloyatida 740,3 mlrd so‘mlik elektr uskunalar ishlab chiqarilgan.

Boshqa hududlar orasida Namangan viloyati 234,6 mlrd so‘m, Samarqand viloyati 177,1 mlrd so‘m va Andijon viloyati 162,7 mlrd so‘m ko‘rsatkich bilan yetakchi o‘rinlarni egallagan.

Qolgan hududlarda ishlab chiqarish hajmi nisbatan past. Jumladan, Qoraqalpog‘iston Respublikasida 0,5 mlrd so‘m, Surxondaryo viloyatida 1 mlrd so‘mlik mahsulot ishlab chiqarilgan.

Source link

Tadbirkorlarga moliyaviy jarimalar bo‘yicha qator yengilliklar beriladi. 

Prezident Shavkat Mirziyoyev 13-aprel kuni tadbirkorlik sub’yektlariga nisbatan moliyaviy jarimalarni qo‘llash tartibini yanada liberallashtirish, bu borada ortiqcha byurokratik to‘siqlarni qisqartirish hamda davlat organlari va mansabdor shaxslar faoliyati ustidan sud nazorati samaradorligini oshirishga qaratilgan takliflar taqdimoti bilan tanishdi.

Taqdimotda bugungi kunda moliyaviy jarimalarni qo‘llash amaliyotida tadbirkorlar uchun qator muammolar saqlanib qolayotgani qayd etildi. Xususan, ayni paytda jarimalarning aksariyati vakolatli organlar, qolganlar esa sudlar tomonidan qo‘llanilayotgani sud nazoratini kuchaytirish zarurligini ko‘rsatmoqda.

Shu munosabat bilan joriy yil 1-oktyabrdan moliyaviy jarimalarni ixtiyoriy to‘lashni rag‘batlantiruvchi yangi va yagona tartibni joriy etish taklif qilindi. Unga ko‘ra, tadbirkorlik sub’yekti vakolatli organning qarori topshirilgan kundan boshlab bir oy ichida jarimaning 50 foizini to‘lasa, qolgan qismini to‘lashdan ozod etiladi.

Shuningdek, jarimani olti oy davomida teng ulushlarda bo‘lib-bo‘lib to‘lash imkoniyatini yaratish nazarda tutilmoqda. Bunda qaror topshirilganidan so‘ng bir oy ichida jarima summasining oltidan bir qismi to‘lansa, mazkur tartib avtomatik ravishda amal qiladi.

Sud nazoratini kuchaytirish maqsadida vakolatli organning moliyaviy jarimani qo‘llash to‘g‘risidagi qarori sud tomonidan bekor qilingan yoki haqiqiy emas deb topilgan taqdirda undirilgan mablag‘larni 15 kun muddatda qaytarish mexanizmini belgilash taklif etildi. Agar ushbu muddat buzilsa, kechiktirilgan har bir kalendar kun uchun Markaziy bank asosiy stavkasidan kelib chiqqan holda foiz hisoblanishi nazarda tutilmoqda.

Moliyaviy jarimalarni qo‘llash jarayonlarini raqamlashtirishga ham alohida e’tibor qaratildi. Biznes-ombudsman tomonidan yuritiladigan «Yagona davlat nazorati» axborot tizimida tadbirkorlik sub’yektlariga nisbatan qo‘llanilgan moliyaviy jarimalarning elektron reyestrini joriy etish taklif qilindi.

Vakolatli organlarning qarorlari qabul qilinganidan keyin elektron raqamli imzo bilan mazkur tizimga kiritilishi shart bo‘ladi. Axborot tizimiga kiritilmagan va elektron raqamli imzo bilan tasdiqlanmagan qarorlar haqiqiy emas deb hisoblanadi hamda ular asosida jarima undirilmaydi.

Shuningdek, mobil ilova orqali moliyaviy jarimalar hisobini yuritish, ularni monitoring qilish va onlayn to‘lash imkoniyatini yaratish, manfaatdor idoralarning axborot tizimlarini o‘zaro integratsiya qilish zarurligi qayd etildi. Soliq to‘lovchi – tadbirkorlik sub’yektining shaxsiy kabineti orqali moliyaviy jarima to‘g‘risidagi qarorlar ustidan onlayn shikoyat berish va shikoyat kiritilishi bilan qaror ijrosini avtomatik to‘xtatib turish imkoniyatini joriy etish nazarda tutilmoqda.

Taqdimotda huquqiy ta’sir choralarini qo‘llash tartibini unifikatsiya qilishga qaratilgan «Huquqiy ta’sir choralari to‘g‘risida» gi qonun loyihasini ishlab chiqish taklifi bildirildi.

Davlatimiz rahbari tadbirkorlik sub’yektlarining huquq va qonuniy manfaatlarini ishonchli himoya qilish, ularni qonunga rioya etgan holda faoliyat yuritishga rag‘batlantirish, jarima qo‘llash amaliyotida adolat va shaffoflikni ta’minlash eng mhim vazifalardan ekanini ta’kidladi.

Takliflarni puxta ishlab chiqib, sud nazoratini kuchaytirish, raqamlashtirishni jadallashtirish va sohada yagona, aniq hamda adolatli huquqiy mexanizmni shakllantirish bo‘yicha mutasaddilarga tegishli topshiriqlar berildi.

Source link

2025-yilning IV choragida O‘zbekistonda ko‘chmas mulk bozorida o‘sish sur’atlari sezilarli tezlashdi. Markaziy bank ma’lumotlariga ko‘ra, ushbu davrda oldi-sotdi bitimlari soni 89,7 mingtani tashkil etib, o‘tgan yilning shu davriga nisbatan 24,5 foizga oshgan.

2025-yil boshidan jami tranzaksiyalar hajmi 319,5 mingtaga yetgan bo‘lib, umumiy o‘sish 15,8 foizni tashkil etdi. Ayniqsa, Buxoro, Sirdaryo va Samarqand viloyatlarida yuqori o‘sish sur’atlari qayd etildi.

2025-yil davomida ajratilgan ipoteka kreditlari hajmi 29 foizga oshib, 21,2 trln so‘mni tashkil etdi. Ularning uy-joy oldi-sotdidagi ulushi 22 foizga yetgan.

Shu bilan birga, aholi real daromadlari IV chorakda 9,2 foizga o‘sgani bozorda talabni qo‘llab-quvvatlovchi asosiy omillardan biri bo‘ldi.

Qurilish sohasida ham faollik yuqori darajada saqlanib, foydalanishga topshirilgan uy-joylar umumiy maydoni 15,9 mln kvadrat metrga yetdi. Bu o‘tgan yilga nisbatan 7,2 foizga ko‘p.

Uy-joy narxlari dollar hisobida o‘sishda davom etgan. Xususan, birlamchi bozorda 5,7 foiz, ikkilamchi bozorda esa 7,9 foizga qimmatlashgan.

Biroq so‘m hisobida narxlar nisbatan barqaror shakllangan. Bu holat sotuvchilarning narxni xorijiy valyutaga bog‘lab saqlashga intilayotgani bilan izohlanishi mumkin.

Ijara bozorida ham o‘sish kuzatilib, yil yakunida narxlar 8,3 foizga oshgan. Shu bilan birga, Toshkent shahrida yer uchastkalari narxi 9,4 foizga pasaygan.

Source link