Jamiyat
Surxondaryoda sudyalar qotilni “bezori”ga aylantirishdi
Sho‘rchi dehqon bozori. Odamlar ko‘z o‘ngida qotillik yuz berdi: yonma-yon joylashgan oshxona egalarining janjali o‘lim bilan tugadi. Ikki erkak yoqalasharkan, birining jiyani kabob sixini olib chiqib, tog‘asi bilan mushtlashayotganning orqa kuragiga sanchdi va uni o‘ldirdi. Sud tog‘ani 15,5, jiyanni 9,5 yilga ozodlikdan mahrum qildi. Apellyatsiya sudi esa qasddan odam o‘ldirish jinoyatini bezorilik va qasddan badanga og‘ir shikast yetkazishga o‘zgartirib, jazoni yengillashtirdi. Marhumning yaqinlari buni adolatsizlik deb hisoblamoqda.
“Hayotdan mahrum qilish qasdi bilan harakat qilmagan va o‘lim yuz berishini istamagan”. Surxondaryoda apellyatsiya sudi ayni shu jumla bilan qasddan odam o‘ldirish jinoyatini qasddan badanga og‘ir shikast yetkazish jinoyatiga o‘zgartirdi va tayinlangan jazoni yengillashtirdi. Holbuki, “o‘lim yuz berishini istamagan” sudlanuvchi oshxonadan kabob sixini olib chiqqan va tog‘asi bilan urishayotgan erkakning ortidan borib, uning ko‘krak qafasiga (!) sanchgan.
Jinoyat tafsiloti
Jinoyat 2025 yil 16 iyul kuni Surxondaryo viloyati Sho‘rchi tumanidagi dehqon bozorida sodir etilgan. 1990 yilda tug‘ilgan Ulug‘bek Bo‘riyev o‘ziga qo‘shni oshxona egasi – 1987 yilda tug‘ilgan Elbek Eshmatov bilan janjallashgan. Oshxona egalari bir-biri bilan mushtlashib, yoqalashayotganda har ikki tomonning yaqinlari, o‘tib-qaytuvchilar ularni ajratib qo‘yishga urinishgan. Shunda Ulug‘bek Bo‘riyevning oshxonasida ishlovchi 16 yoshli jiyani Ozodbek Boltayev kabob sixini olib chiqib, tog‘asi bilan urishayotgan Elbek Eshmatovning orqasidan ko‘krak qafasiga sanchgan.
Elbek Eshmatov zarbadan o‘zini yo‘qotib, o‘tirib qolgan. So‘ngra uni shifoxonaga olib ketishgan. Biroq erkak o‘ziga yetkazilgan jarohat oqibatida vafot etgan. Sud-tibbiy ekspertizasi xulosasiga ko‘ra, Ozodbek Boltayev sanchgan kabob sixi Elbek Eshmatovning qovurg‘alari orasidan kirib, chap o‘pkasini to‘liq teshib o‘tgan.
Holat yuzasidan tog‘a va jiyanga Jinoyat kodeksining 97-moddasi “j, l, p” bandlari – o‘ta shafqatsizlik asosida, bezorilik oqibatida bir guruh shaxslar yoki uyushgan guruh a’zosi tomonidan yoxud o‘sha guruh manfaatlarini ko‘zlagan holda qasddan odam o‘ldirish bilan jinoyat ishi qo‘zg‘atilgan. 2025 yil 17 iyul kuni Ozodbek Boltayevga hamda 18 iyul kuni Ulug‘bek Bo‘riyevga nisbatan qamoqqa olish tarzidagi ehtiyot chorasi qo‘llangan.
Dastlabki sud hukmi
Tog‘a-jiyanning qilmishi jinoyat ishlari bo‘yicha Sho‘rchi tuman sudida sudya To‘lqin Abdiraimov raisligida ko‘rib chiqilib, 2025 yil 10 dekabr kuni hukm o‘qilgan.
Sud hujjatida keltirilishicha, Ulug‘bek Bo‘riyev aybiga iqrorlik bildirmagan. U marhum Elbek Eshmatov bilan taxminan 2024 yil oktyabr oyidan boshlab nizo kelib chiqqanini, ushbu nizoga mijoz talashish sabab bo‘lganini aytgan.
Sudlanuvchiga ko‘ra, 16 iyul kunidagi janjal suv ustida kelib chiqqan: ishchilari va jiyani Ozodbek tashib kelgan suvni Elbek Eshmatov o‘z bachogidan olganini gapirgan. So‘ngra Ozodbek Boltayev tog‘asiga qo‘ng‘iroq qilib, Elbek Eshmatov onasidan haqorat qilgan holda uni quvlaganini aytgan.
O‘sha kungi janjalning boshlanish nuqtasi shu bo‘lgan. Ikki erkak bir-biri bilan mushtlasha ketgan.
“Elbek Eshmatov bir-ikki daqiqa o‘tgach meva sotuvchining savdo rastasi oldiga borib, o‘tirib qoldi. Men Elbek Eshmatov bahona qilyapti, deb o‘yladim. Shu payt IIB xodimlari kelib, hammani tinchlantirdi va meni o‘zlari bilan profilaktika inspektori xonasiga olib ketdi. Shundan keyin nima voqea bo‘lganini bilmayman.
…Jiyanim Ozodbek nima qilganini, qachon sixni olib Elbek Eshmatovning orqasidan urganini ko‘rmadim, o‘zimning janjalim bilan bo‘lib unga ahamiyat bermagandim. Agar bu holatni ko‘rganimda darhol janjalni to‘xtatib, Elbek Eshmatovni tezda shifoxonaga yetkazib olib borgan bo‘lardim”, degan Ulug‘bek Bo‘riyev o‘z ko‘rsatmasida.
Sudda pedagog ishtirokida so‘ralgan Ozodbek Boltayev o‘z aybiga qisman iqrorlik bildirgan. U o‘z ko‘rsatmasida agar Elbek Eshmatovning old tomonidan borganida unga kuchi yetmagan bo‘lishini, shu sababli orqasidan borib sixni sanchganini aytgan.
“Tog‘am Ulug‘bek va Elbek Eshmatov bir-birlari bilan urishmaganida men Elbek Eshmatovga tan jarohati yetkaza olmagan bo‘lardim. Sababi, Elbek aka juda gavdali va baquvvat edi”, degan Ozodbek Boltayev.
U qilmishidan pushaymonligini bildirgan.
Sud hukmi bilan tog‘a va jiyan Jinoyat kodeksining 97-moddasi 2-qismi “l, p” bandlari, ya’ni bezorilik oqibatida bir guruh shaxslar tomonidan qasddan odam o‘ldirish jinoyatini sodir etishda aybli deb topilgan. Ulug‘bek Bo‘riyevga 15 yil 6 oy, Ozodbek Boltayevga 9 yil 6 oy ozodlikdan mahrum qilish jazosi tayinlangan.
Apellyatsiyada hukm o‘zgardi
Jinoyat ishi Surxondaryo viloyati sudi jinoyat ishlari bo‘yicha sudlov hay’ati apellyatsiya instansiyasida sudya M.Malikov raisligida hay’at sudyalari O.Jumanov va K.Nazarov ishtirokida ko‘rib chiqilgan.
2026 yil 27 yanvardagi ajrim bilan dastlabki sud hukmi o‘zgartirilgan. Unga ko‘ra, Ozodbek Boltayevning harakatlari Jinoyat kodeksining 104-moddasi 3-qismi “d” bandi, ya’ni qasddan badanga og‘ir shikast yetkazish jabrlanuvchining o‘limiga sabab bo‘lishi, Ulug‘bek Bo‘riyevniki esa Jinoyat kodeksining 277-moddasi 3-qismi “g” bandi – jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib bezorilik sodir etish bilan qayta malakalangan.
Shu tariqa bir odamni kabob sixi sanchib o‘ldirgan jiyanning ozodlikdan mahrum qilish bilan bog‘liq jazo muddati 9,5 yildan 7 yilga, tog‘aniki esa 15,5 yildan 5 yilga tushirilgan.
Qotillik qanday qilib bezorilik hamda qasddan badanga og‘ir shikast yetkazishga o‘zgarib qoldi?
Apellyatsiya sudi ajrimida keltirilishicha, Ulug‘bek Bo‘riyev jiyani Ozodbek marhum Elbek Eshmatovga six bilan tan jarohati yetkazgani holatini ko‘rmagan va unga yordamlashmagan. Bunga dalil sifatida janjal aks etgan videolavhadagi holatlar keltirilgan. Ya’ni jiyani sixni Elbek Eshmatovga sanchgan vaqtida Ulug‘bek Bo‘riyev “marhumning qarshiligini bartaraf etish uchun biror bir harakatni sodir etmagan, uni o‘zini-o‘zi himoya qilish imkoniyatidan mahrum qilmagan”, deb xulosa qilingan.
Apellyatsiya sudi “Sudlanuvchi Ulug‘bek Bo‘riyev voyaga yetmagan sudlanuvchi Ozodbek Boltayev bilan jinoiy til biriktirib, bezorilik zamirida Elbek Eshmatovni qasddan o‘ldirish jinoyatini sodir etganini tasdiqlovchi obektiv dalillar mavjud emas”, degan to‘xtamga kelgan. Ajrimda keltirilishicha, Ulug‘bek Bo‘riyevning harakatlarini bir guruh shaxslar bo‘lib, qasddan odam o‘ldirish sifatida kvalifikatsiya qilish uchun u marhumning qarshiligini bartaraf etib turishi hamda Ozodbek Boltayev bundan foydalangan holda Elbek Eshmatovga halok etuvchi shikast yetkazgan bo‘lishi lozim.
Shuningdek, apellyatsiya sudi “Ozodbek Boltayev Elbek Eshmatovni “qasddan o‘ldirish uchun real imkoniyati bo‘lgan, biroq uni hayotdan mahrum etish qasdi bilan harakat qilmagan va o‘lim yuz berishini istamagan”, degan to‘xtamga kelgan. Bunga dalil sifatida holat yozib olingan videoda Ozodbek Boltayev sixni marhumga sanchib olgach, oshxona oldiga kelib, janjalni kuzatib turgani keltirilgan.
Apellyatsiya sudi dastlabki sud hukmini o‘zgartirishda keltirgan eng muhim asoslar shulardan iborat.
“Bu adolatdan emas”
Marhum Elbek Eshmatovning yaqinlari apellyatsiya sudining ajrimini adolatli emas, deb hisoblamoqda. Shu sababli taftish shikoyati kiritilgan.
Shikoyatga ko‘ra, Ozodbek Boltayev kabob sixi bilan kutilmagan vaqtda va Elbek Eshmatovning orqa tomonidan yugurib borgan holatda ko‘krak qafasiga zarba berishi uni hayotdan mahrum etish qasdi bilan harakat qilganini, qilmishining ijtimoiy xavfli oqibatlariga ko‘zi yetganini, o‘lim yuz berishini istaganini tasdiqlab turibdi. “Agarda Ozodbek Elbek Eshmatovni qasddan o‘ldirib, uni hayotdan mahrum etish qasdi bilan harakat qilmaganida va uning o‘limi yuz berishini istamaganida uzunligi 52 sm bo‘lgan kabob sixini qo‘liga olmagan va u bilan tan jarohati yetkazmagan bo‘lar edi”, deyiladi shikoyatda.
Bundan tashqari, zarba marhumning aynan hayoti uchun muhim bo‘lgan ko‘krak qafasiga berilganiga e’tibor qaratilgan. Bu orqali Ozodbek Boltayev Elbek Eshmatovning o‘limi yuz berishini istamaganida hayoti uchun muhim bo‘lmagan tana a’zolariga, masalan, oyoq sohasiga tan jarohati yetkazgan bo‘lardi, degan fikr urg‘ulangan.
Shikoyatda apellyatsiya sudining Ozodbek Boltayev sixni marhumga sanchib olgach, voqea joyidan ketib qolgani, unda Elbek Eshmatovni “qasddan o‘ldirish uchun real imkoniyati bo‘lgani” haqidagi asosiga qarshi “zarba hayoti uchun muhim bo‘lgan a’zoga berilgani, ikkinchi va uchinchi jarohatlarni yetkazishga zarurat bo‘lmagani” haqida asos keltirilgan.
Taftish shikoyatida apellyatsiya sudining Ulug‘bek Bo‘riyev jiyani sixni sanchganini ko‘rmagani hamda Elbek Eshmatovning qarshiligini bartaraf etish uchun biror bir harakatni sodir etmagani haqidagi asoslarga ham e’tirozlar mavjud.
“Jinoyatda ikki yoki undan ortiq shaxsning oldindan til biriktirmay jinoyat sodir etishda qatnashishi oddiy ishtirokchilik deb topiladi. Jinoyat kodeksining 97-moddasi 2-qismi “p” bandida bir guruh shaxslar tomonidan qasddan odam o‘ldirish uchun javobgarlik belgilangan. Ya’ni “bir guruh shaxslar tomonidan oldindan jinoiy til biriktirib” deb emas, “bir guruh shaxslar tomonidan” deb ko‘rsatilgan. Bundan ko‘rinadiki, ishtirokchilik shakliga ko‘ra ikki yoki undan ortiq shaxsning oldindan til biriktirmasdan, oddiy ishtirokchilik shaklida qasddan odam o‘ldirishi Jinoyat kodeksining 97-moddasi 2-qismi “p” bandi bilan malakalanadi. Ozodbek Boltayev jabrlanuvchi Elbek Eshmatovga six bilan tan jarohati yetkazgan holatini sudlanuvchi Ulug‘bek Bo‘riyev ko‘rmagani ular o‘rtasida oddiy ishtirokchilik yo‘q, degan xulosaga kelishga asos bo‘lmaydi”, deya keltirilgan shikoyatda.
Ozodbek Boltayevning o‘zi ham suddagi ko‘rsatmasida tog‘asi va Elbek Eshmatov bir-birlari bilan urishmaganida Elbek Eshmatovga tan jarohati yetkaza olmagan bo‘lishi haqida gapirgan.
Marhumning bevasi holat sodir bo‘lgandayoq ijtimoiy tarmoqdagi murojaatida qotillar oldindan tahdid qilib kelishgani, lekin tegishli organlarga qilingan murojaat befoyda bo‘lganini aytib bergandi.
Qalovini topsa, qor ham yonadi
Kun.uz ushbu holatda sud hujjatlariga, tayinlangan jazolarga huquqiy baho berishdan yiroq. Ammo apellyatsiya sudi o‘ta og‘ir jinoyatni yengillashtirib bergani sudlanuvchilarda jazoni kamaytirish, muddatidan ilgari shartli ozod qilishda yaxshigina imkoniyat paydo qiladi. Bu Akmal Shukurov ishini yodga solmoqda.
Akmal Shukurov ishida u tomonidan berilgan va jabrlanuvchini koma holatiga tushirib qo‘ygan zarba Toshkent shahar sudining 4 nafar sudyasi qamoqqa olinishigacha yetib kelgandi. O‘shanda u tungi klub oldida tanishini himoya qilishga uringan Boris Avakyanga kuchli zarba berib, komaga tushirib qo‘ygan, so‘ngra voqea joyidan qochib ketib, ko‘p o‘tmay Qozog‘istonda qo‘lga olingan va O‘zbekistonga ekstraditsiya qilingan Akmal Shukurovga dastlabki sud hukmi bilan 8 yil 1 oy muddatga ozodlikdan mahrum qilish jazosi tayinlangandi.
Toshkent shahar sudi jinoyat ishlari bo‘yicha apellyatsiya instansiyasi sudi 9 dekabrdagi ajrimi bilan 8 yil 1 oy ozodlikdan mahrum qilish jazosini 4 yil 1 oy muddatga ozodlikni cheklash jazosiga o‘zgartirib, Akmal Shukurovni darhol sud zalidan qamoqdan ozod qilib yubordi.
Bu holat OAVda olib chiqilgach, 18 dekabr kuni jinoyat ishi Toshkent shahar prokuraturasi tomonidan kiritilgan protest asosida taftish instansiyasida qayta ko‘rib chiqildi va Akmal Shukurovga 6 yil muddatga ozodlikdan mahrum qilish jazosi tayinlanib, u qamoqqa qaytarildi. Shundan so‘ng jinoyat ishini apellyatsiyada ko‘rgan sudyalarga nisbatan xizmat tekshiruvi tayinlandi, ko‘p o‘tmay esa ular qamoqqa olingandi.
Prezident Shavkat Mirziyoyevga yoqilg‘i-energetika sohasidagi murojaatlar tahlili taqdim etildi. Davlat rahbari kuz-qish mavsumiga tayyorgarlik doirasida elektr va gaz ta’minotidagi tizimli muammolarni bartaraf etish, tarmoqlarni ta’mirlash hamda aholini uzluksiz energiya bilan ta’minlash bo‘yicha mas’ullarga topshiriq berdi.
Foto: Prezident matbuot xizmati
Prezident Shavkat Mirziyoyevga 17 iyul kuni yoqilg‘i-energetika sohasida fuqarolar murojaatlarini ko‘rib chiqish hamda ularda ko‘tarilgan muammolarni kuz-qish mavsumiga tayyorgarlik doirasida bartaraf etish yuzasidan axborot berildi.
Qayd qilinishicha, 2026 yilning birinchi yarmida yoqilg‘i-energetika sohasiga oid 40 mingga yaqin murojaat kelib tushgan. Ularning 50 foizi tabiiy va suyultirilgan gaz, 38,3 foizi elektr ta’minoti bilan bog‘liq.
Murojaatlarda asosan suyultirilgan gaz ballonini to‘ldirish, elektr ta’minotidagi uzilishlar, elektr tarmoqlarini qurish va ta’mirlash hamda tabiiy gaz bosimi bilan bog‘liq masalalar ko‘tarilgan.
Kuz-qish mavsumidan oldin takror murojaatlar kelib tushayotgan mahalla va obektlarni xatlovdan o‘tkazish, elektr va gaz tarmoqlarining texnik holatini o‘rganish, aniqlangan kamchiliklarni bartaraf etish bo‘yicha hududlar kesimida manzilli rejalar ishlab chiqish vazifasi qo‘yildi.
Ayniqsa, elektr ta’minotida uzilishlar ko‘p kuzatilayotgan hududlarda tarmoq va transformatorlarni ta’mirlash, avariya brigadalarining shayligini oshirish, tabiiy gaz bosimi bilan bog‘liq muammolar mavjud joylarda ta’minot barqarorligini ta’minlash muhimligi qayd etildi.
Shuningdek, suyultirilgan gaz ballonlarini to‘ldirish va aholiga yetkazib berish grafiklariga qat’iy rioya qilish, ehtiyoj yuqori bo‘lgan hududlarda qo‘shimcha zaxira va imkoniyatlarni safarbar etish zarurligi ko‘rsatib o‘tildi.
Davlat rahbari mutasaddilarga murojaatlarda ko‘tarilgan tizimli muammolarni kuz-qish mavsumi boshlanguniga qadar hal etish bo‘yicha topshiriq berdi.
Yagona interaktiv davlat xizmatlari portali saytini (my.gov.uz) soxtalashtirib, fuqarolarning pulini o‘zlashtirgan jinoiy guruh a’zolari qo‘lga olindi.
Ichki ishlar vazirligi Kiberjinoyatlarga qarshi kurashish departamenti xabariga ko‘ra, ular soxta sayt yaratib, Instagram orqali «kompensatsiya rasmiylashtirish markazi» nomi ostida yolg‘on reklama tarqatgan.
Tergov ma’lumotlariga ko‘ra, jinoiy guruhni 1993 yilda Xorazm viloyatida tug‘ilgan shaxs tashkil etgan. U soxta sayt orqali fuqarolarning karta ma’lumotlarini qo‘lga kiritib, pullarni yechib olgan. Guruh 26 nafar fuqaro nomiga rasmiylashtirilgan 293 ta bank kartasidan foydalangan. O‘g‘irlangan mablag‘lar dastlab ushbu kartalarga o‘tkazilgan, keyin esa Telegram messenjeridagi maxsus kriptobotlar orqali kriptoaktivlarga aylantirilgan.
Tergov davomida mazkur jinoiy guruh respublika bo‘ylab 456 nafar fuqarodan 1 milliard so‘mdan ortiq mablag‘ni o‘zlashtirgani aniqlangan.
Holat yuzasidan Jinoyat kodeksining 168-moddasi (firibgarlik) hamda 278-6-moddasi bilan jinoyat ishi qo‘zg‘atilgan va tergov harakatlari davom etmoqda.
Energotizim barqarorligini ta’minlash va yirik avariyalarning oldini olish maqsadida Qashqadaryo, Jizzax, Xorazm va Toshkent viloyatining ayrim hududlarida 2 soatlik majburiy elektr cheklovlari joriy etildi.
16 iyul kuni O‘zbekiston yagona energetika tizimida sutkalik elektr energiyasi iste’moli 291 million kVt·soatni tashkil etib, o‘tgan yozgi mavsumdagi eng yuqori ko‘rsatkichdan 18,4 million kVt·soatga (6,7 foizga) oshdi. Shu kuni elektr energiyasi ishlab chiqarish hajmi ham 295,4 million kVt·soatga yetib, yangi rekord o‘rnatildi. Bu haqda Energetika vazirligi xabar berdi.
Qayd qilinishicha, anomal issiq ta’sirida elektr uzatish tarmoqlari va uskunalari me’yordan ortiq qizib, kunduzi elektr energiyasi iste’molining keskin oshishi tarmoqlardagi yuklamani yanada kuchaytirmoqda.
Shu sababli, energotizim barqarorligini ta’minlash va yirik avariyalarning oldini olish maqsadida Qashqadaryo, Jizzax, Xorazm va Toshkent viloyatining ayrim hududlarida 2 soatlik majburiy elektr cheklovlari joriy etildi.
Prezident Shavkat Mirziyoyev madaniyat va san’atni rivojlantirish hamda milliy merosni xalqaro miqyosda targ‘ib qilishga qaratilgan loyihalar taqdimoti bilan tanishdi. Unga ko‘ra, O‘zbekistonning noyob arxeologik va amaliy san’at namunalari jahonning yetakchi muzeylarida namoyish etiladi, «Tamerlano» operasi 2027 yilda Nyu-Yorkdagi Karnegi-xoll sahnasida qo‘yiladi, shuningdek, mamlakatda yirik xalqaro madaniy tadbirlarni tashkil etishning yangi tizimi joriy etiladi.
Prezident Shavkat Mirziyoyev 17 iyul kuni madaniyat va san’atni rivojlantirish, milliy merosimizni asrab-avaylash hamda xalqaro miqyosda keng targ‘ib qilishga qaratilgan loyiha va tadbirlar taqdimoti bilan tanishdi.
Dastlab nufuzli xorijiy muzey va ko‘rgazma maydonlarida O‘zbekistonning arxeologik va ilmiy merosi, shuningdek, amaliy san’at asarlarini namoyish etish bo‘yicha rejalar ko‘rib chiqildi.
Jumladan, 2026 yil sentabr oyida Dohadagi Islom san’ati muzeyida “Uzbekistan: Heritage in Motion” ko‘rgazmasini, noyabr oyida esa Milandagi Prada fondida O‘zbekistonning noyob eksponatlari ishtirokida “Global Antiquity” xalqaro arxeologiya ko‘rgazmasini tashkil etish rejalashtirilgan. 2027 yilda Venetsiyadagi Palatsso Grimani va Yaponiyaning Nara milliy muzeyida O‘zbekistonning bronza davridan ilk o‘rta asrlargacha bo‘lgan tarixini aks ettiruvchi 200 dan ziyod arxeologik topilmalar namoyish etiladi. Milandagi Palatsso Realeda oltin kashtachilik, so‘zana, ikat, zargarlik buyumlari va amaliy san’at asarlaridan iborat 150 dan ortiq eksponat taqdim etiladi.
Florensiyada Abu Ali ibn Sinoning hayoti va ilmiy merosiga bag‘ishlangan ko‘rgazma o‘tkazish, shuningdek, Yaponiya, Buyuk Britaniya, Xitoy, Saudiya Arabistoni va boshqa davlatlardagi yetakchi madaniy muassasalar bilan qo‘shma loyihalarni amalga oshirish rejalari bayon qilindi.
Madaniy meros obektlarini restavratsiya qilish masalalariga alohida e’tibor qaratildi. Knyaz Nikolay Romanov saroyida O‘zbekiston davlat san’at muzeyi filialini tashkil etish ko‘zda tutilgan. Bunda majmuaning tarixiy qiyofasi saqlab qolinib, 300 ga yaqin eksponatdan iborat doimiy ekspozitsiya shakllantiriladi.
Muxtor Ashrafiy uy-muzeyida binoning fasadi va tarixiy intererlari restavratsiya qilinib, ekspozitsiya yangilanmoqda. Muzey zamonaviy muhandislik tizimlari, xavfsizlik va iqlim nazorati vositalari, multimedia uskunalari, shuningdek, ovoz yozish studiyasi bilan jihozlanadi.
Taqdimotda “Tamerlano” operasini jahonning nufuzli sahnalarida namoyish etish natijalari va kelgusi rejalar ko‘rib chiqildi.
Joriy yilda ushbu asar Dubay operasi, Venadagi “Muzikferayn”, Sankt-Peterburgdagi Mariinskiy teatri hamda Versal saroyi Qirollik operasi sahnalarida namoyish etildi. Stefano Poda sahnalashtirgan operada Georg Fridrix Gendel musiqasi Kirill Rixter talqinida, o‘zbek milliy cholg‘u asboblaridan foydalanilgan holda ijro etildi. Loyihada O‘zbekiston Milliy simfonik orkestri, xor, xalq cholg‘ulari orkestri va taniqli solistlar ishtirok etdi.
2027 yil mart oyida “Tamerlano” operasini Nyu-Yorkdagi mashhur “Karnegi-xoll” konsert zali sahnasida namoyish etish rejalashtirilgan. Bu o‘zbek opera san’ati va milliy ijrochilik maktabining yuksak salohiyatini xorijiy auditoriyaga keng namoyish etish imkonini beradi.
Yirik konsertlar, festivallar, tanlov va ko‘rgazmalarni tashkil etishning yagona tizimini shakllantirish masalasi ham ko‘rib chiqildi. Madaniyat vazirligi huzuridagi “Xalqaro festivallar direksiyasi” davlat muassasasi negizida Madaniyat va san’atni rivojlantirish jamg‘armasi huzurida Madaniy loyihalar milliy operatorini tashkil etish taklif qilindi.
Milliy operator yirik xalqaro tadbirlarni tashkil etish va ularni xorijda targ‘ib qilish, taniqli ijrochilar ishtirokidagi konsertlarga buyurtmachi sifatida ish olib borish, shuningdek, “Sharq taronalari” xalqaro musiqa festivalini tayyorlash uchun mas’ul bo‘ladi.
Joriy yil 8 iyun kuni Samarqanddagi Registon maydonida mashhur xonanda Jon Lejyendning konserti o‘tkazildi. Avgust oyida Pekindagi Buyuk Xitoy devorida, sentabr oyida esa Registon maydonida taniqli pianinochi Lang Langning konsertini o‘tkazish rejalashtirilgan. Oktabr oyida Toshkentdagi “O‘zbekiston” xalqaro anjumanlar saroyida bastakor Maks Rixterning konserti bo‘lib o‘tadi.
Joriy yilda Venetsiya va Milan shaharlarida o‘tkazilayotgan yirik xalqaro madaniy tadbirlarda O‘zbekistonning ishtiroki natijalari ham taqdim etildi.
Venetsiyadagi 61-xalqaro san’at biyennalesida O‘zbekiston “The Aural Sea” loyihasi bilan milliy pavilonda ishtirok etmoqda. Loyiha Orol dengizi va Qoraqalpog‘iston mavzusini xotira, afsona va hikoyalar orqali ochib beradi. Pavilonga hozirga qadar 60 mingdan ziyod kishi tashrif buyurgan. Loyihaga bag‘ishlangan materiallarning umumiy media qamrovi 145 milliondan oshgan.
Biyennale doirasida Palatsso Kavalli-Frankettida o‘zbekistonlik rassom Vyacheslav Axunovning “Instrumens of the Mind” shaxsiy ko‘rgazmasi ham tashkil etildi. Unda rassomning 1970 yillardan bugungi kunga qadar yaratilgan 200 dan ortiq asari namoyish etilmoqda. Ko‘rgazmaga 30 dan ziyod mamlakatdan 12 mingdan ortiq kishi tashrif buyurgan.
“Milan Design Week 2026” doirasida tashkil etilgan “O‘rik gullaganda” milliy pavilonida 12 nafar xalqaro dizayner hamda O‘zbekiston va Qoraqalpog‘istondan 12 nafar hunarmandning hamkorlikdagi ishlari namoyish qilindi. O‘zbekiston paviloni “Fuorisalone Award 2026” mukofoti hakamlar hay’atining maxsus e’tirofiga sazovor bo‘ldi. Uni 18 mingdan ziyod kishi ko‘rdi, loyihaning xalqaro axborot qamrovi 171 millionga yetdi.
Shuningdek, Madaniyat va san’atni rivojlantirish jamg‘armasining 2026-2027 yillarga mo‘ljallangan tadbir va loyihalari muhokama qilindi.
11-13 sentabr kunlari Nukus shahrida Orol madaniyati sammiti o‘tkaziladi. Madaniyat, ilm-fan, me’morlik, dizayn va ekologiya sohalari vakillari Orolbo‘yini barqaror rivojlantirish masalalarini muhokama qiladi. 2027 yil yanvar oyida “Aral School” xalqaro dasturining Orol dengizi havzasi iqlimi va landshaftiga bag‘ishlangan yangi mavsumi boshlanadi.
Alisher Navoiy nomidagi O‘zbekiston davlat akademik katta teatri repertuarini yangilash doirasida Jakomo Puchchinining “Turandot” operasi va Pyotr Chaykovskiyning “Shelkunchik” baletini yangicha talqinda sahnalashtirish rejalari ko‘rib chiqildi. Loyihalarni amalga oshirishga yetakchi mahalliy va xorijiy rejissyorlar, dirijyorlar, xoreograflar va sahnalashtirish bo‘yicha mutaxassislarni jalb etish rejalashtirilgan.
2027 yilgi Buxoro biyennalesi doirasida madaniy meros obektlarini restavratsiya qilish, tarixiy hududlar va jamoat makonlarini obodonlashtirish, shuningdek, ko‘rgazma maydonlarini tayyorlash rejalashtirilgan. Biyennalega 50 dan ziyod xorijiy rassom va dizayner hamda mamlakatimiz kreativ industriyalarining 300 dan ortiq vakili jalb etiladi.
Bundan tashqari, “Milan Design Week” va “Art Basel” tadbirlarida ishtirok etish, “Art for Tomorrow” xalqaro anjumanini o‘tkazish, Qatar muzeylari bilan hunarmandchilik va dizayn sohasida hamkorlikni rivojlantirish, shuningdek, Buxoroda badiiy rezidensiya va xalqaro zargarlik maktabini tashkil etish bo‘yicha takliflar ko‘rib chiqildi.
Davlat rahbari loyihalarni puxta tayyorlash, restavratsiya ishlari sifatini qat’iy nazorat qilish, milliy mazmunni zamonaviy yondashuvlar bilan uyg‘unlashtirish hamda xalqaro madaniy hamkorlikning amaliy natijadorligini oshirish bo‘yicha ko‘rsatmalar berdi.
Samarqand viloyatining Urgut tumanida Isroilga ishga jo‘natishni va’da qilib, buning evaziga 16 ming AQSh dollari talab qilgan shaxs tezkor tadbir davomida qo‘lga olindi. U kelishilgan pulning bir qismini olgan vaqtida ashyoviy dalillar bilan ushlangan.
Foto: Prokuratura departamenti
Bosh prokuratura huzuridagi departamentning Urgut tumani bo‘limi hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda xorijga ishga yuborish bilan bog‘liq firibgarlik holatiga chek qo‘yildi.
Ma’lum qilinishicha, fuqaro R.B. fuqaro R.M.ni Isroilga ishlash uchun yuborishini aytib, bu xizmat evaziga 16 ming AQSh dollari talab qilgan.
Tezkor tadbir davomida gumonlanuvchi kelishilgan mablag‘ning 2 ming AQSh dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 25 va 168-moddalari bilan jinoyat ishi qo‘zg‘atilgan. Hozirda ushbu ish bo‘yicha tergov harakatlari olib borilmoqda.
Marokashda dunyodagi eng yirik futbol stadioni qurilmoqda
Oliy ta’lim muassasalari uchun kvotalar tasdiqlandi
Prezident kuz-qish oldidan energetika muammolarini hal etishni topshirdi
-
Siyosat4 days ago
Prezident Shavkat Mirziyoyev Qatar amiriga ta’ziya bildirdi
-
Jamiyat5 days agoToshkent metrosiga yana 3 ta zamonaviy poyezd qo‘shildi
-
Iqtisodiyot4 days agotadbirkor va davlat organlari o‘rtasida huquqiy bahs yuzaga keldi
-
Mahalliy4 days ago
O‘zbekistondagi 10 mingdan ortiq maktab «Canva»dan bepul foydalanadi
-
Iqtisodiyot3 days agoMarkaziy bank huzurida Islomiy moliya kengashi tashkil etildi
-
Siyosat4 days ago
Shavkat Mirziyoyev elektropoyezdda Bekobodga bordi
-
Sport5 days agoSinner ikkinchi marta ketma-ket Uimbldon chempioni bo‘ldi
-
Sport5 days agoIspaniyada Fransiya milliy jamoasi haqidagi bayonot ortidan siyosiy mojaro avj oldi