Guruhda yaqqol autsayder yo‘q.

Mezbon jamoa ishtirokidagi guruhlar doim diqqat markazida bo‘ladi. Bunday jamoalar o‘z muxlislari qarshisida ikki karra ishtiyoq bilan harakat qilishadi, bu safargi mundialda esa ilk bor mezbon jamoalar soni uchtani tashkil etadi. Shunday mezbonlardan biri bo‘lgan amerikaliklar D guruhidan o‘rin olishgan. AQSh vakillari guruhdan chiqish uchun Paragvay, Avstraliya va Turkiya kabi jamoalarga qarshi maydonga tushadi.

D guruhi taqvimi

1-tur

13 iyun, soat 06:00 (Toshkent vaqti)

AQSh – Paragvay

14 iyun, soat 09:00

Avstraliya – Turkiya

2-tur

20 iyunga o‘tar kechasi, soat 00:00

AQSh – Avstraliya

20 iyun, soat 06:00

Turkiya – Paragvay

3-tur

26 iyun, soat 07:00

Turkiya – AQSh

26 iyun, soat 07:00

Paragvay – Avstraliya

AQSh

Murabbiy

Maurisio Pochettino klublar futbolidagi faoliyati tufayli obro‘ qozongan va doimo katta klublar nigohidagi mutaxassis hisoblangan. «Tottenhem»da o‘ziga xos uslubga ega jamoa qurib, Chempionlar ligasi finaliga chiqqan, uning rezyumesida «PSJ» va «Chelsi» kabi boshqa nomdor klublar ham bor.

2024 yilda AQSh Pochettinoni milliy jamoa boshqaruviga olib kelish uchun olti million yevrolik yillik maosh tayinlashdan ikkilanmadi – u hozirda 2026 yilgi jahon chempionatida ishlovchi murabbiylar orasida eng yuqori maoshga ega bo‘lgan uchinchi mutaxassisdir. Maurisioning o‘zi ham faoliyatida yangilik qilishni istagandi va Qo‘shma Shtatlardan kelgan taklifga ikkilanmay rozilik bildirgandi.

Yulduzlar

Amerikaning hozirgi tarkibida eng mashhur futbolchi Kristian Pulishich hisoblanadi. Yoshligidanoq mahalliy futbol kelajagi sifatida qaralgan ushbu vinger ishonchni oqladi va Yevropaning top-darajadagi klublari safida o‘ynadi. U AQShdagi muxlislar qattiq ardoqlashadi va mamlakatda to‘rt marta yil futbolchisi deb topishgan – bunday rekord ko‘rsatkich bilan faqat Amerika futboli afsonasi Lendon Donovan maqtana oladi.

Hozirda 27 yoshda bo‘lgan Pulishich mamlakat milliy jamoasidagi eng yaxshi to‘purarlar ro‘yxatida kuchli to‘rtlikka kirish arafasida (hozirda 32 golga ega), u shuningdek, ushbu mundialda terma jamoada eng ko‘p o‘yin o‘tkazgan 20 futbolchi qatoriga kirishi kutilmoqda (hozirgacha 84 o‘yinda maydonga tushgan). Uydagi chempionat Pulishich uchun mamlakatning barcha davrlardagi eng yaxshi futbolchisi maqomini qo‘lga kiritish uchun imkoniyat bo‘lishi mumkin.

Jamoa hujum chizig‘ida Yevropaning nomdor klublarida to‘p surib kelayotgan Folarin Balogun, Ueston Makkenni, Malik Tilmann, Brenden Aaronson va Rikardo Pepi kabi boshqa yosh yulduzlar ham bor. 

Real maqsad

AQSh 1994 yilda ham jahon chempionatiga mezbonlik qilgan. O‘shanda amerikaliklar Ruminiya, Shveytsariya va Kolumbiya bilan bir guruhdan joy olib, uchinchi o‘rinni egallagan va pley-offga chiqqan, ammo bo‘lajak chempionlar Braziliyaga yutqazgan. Bu safar esa muxlislar guruhda uchinchi bo‘lishni qabul qila olishmaydi. Jamoa 1/16 finalda qulayroq raqib bilan o‘ynash uchun ham guruhda yaxshiroq harakat qilishi talab etiladi. Shu bilan birga, ushbu jamoadan chorakfinaldan yuqori natijani kutish ham to‘g‘ri bo‘lmaydi.

Tarkib

Darvozabonlar: Kris Breydi («Chikago Fayr»), Mett Friz («Nyu-York Siti»), Mett Tyorner («Nyu-Inglend Revolyushn»).

Himoyachilar: Maks Arfsten («Kolambus Kryu»), Serjino Dest (PSV), Aleks Frimen («Vilyarreal»), Mark Makkenzi («Tuluza»), Tim Rim («Sharlott»), Kris Richards («Kristal Pelas»), Entoni Robinson («Fulhem»), Maylz Robinson («Tsinsinnati»), Jozef Skalli («Borussiya» Myonhengladbah), Oston Trasti («Seltik»).

Yarimhimoyachilar: Tayler Adams («Bornmut»), Sebastyan Berhalter («Vankuver Uaytkeps»), Ueston Makkenni («Yuventus»), Jovanni Reyna («Borussiya» Myonhengladbah), Kristian Roldan («Sietl Saunders»), Malik Tillman («Bayyer»).

Hujumchilar: Brenden Aaronson («Lids Yunayted»), Folarin Balogun («Monako»), Rikardo Pepi (PSV), Kristian Pulishich («Milan»), Timoti Vea («Marsel»), Haji Rayt («Koventri Siti»), Aleks Sendehas («Amerika»).

Avstraliya

Murabbiy

Toni Popovich – Avstraliyaning yaqin o‘tmishida taniqlik futbolchilardan bo‘lgan, milliy jamoa safida 59 o‘yinda ishtirok etgan, ammo 2006 yilgi jahon chempionatida ilk o‘yindayoq jarohat olgandi. U keyinchalik murabbiy sifatida 2014 yil «Uestern Sidney Uonderers» klubi bilan Osiyo chempionlar ligasida g‘olib chiqadi. 2024 yildan buyon milliy jamoani boshqarmoqda, yashil qit’a vakillari saralash bosqichini ishonchli o‘tkazdi va 16 o‘yindan faqat bittasida yutqazdi.

Yulduzlar

Hozirgi Avstraliya tarkibida yaqqol ajralib turadigan yulduzlar yo‘q. Tarkibdagilardan hech biri Tim Kehill yoki Harri Kyuell darajasiga yaqinlasha olmaydi. Ammo darvozabon Metyu Rayanni alohida ajratib ko‘rsatish mumkin. 34 yoshli posbon Yevropaning yetakchi ligalarida o‘ynagan, «Arsenal»ning ikkinchi raqamli darvozaboni bo‘lgan, hozir esa «Levante» darvozasini qo‘riqlamoqda. U milliy jamoa safida yuzdan ortiq o‘yin o‘tkazgan va jamoa sardori hisoblanadi.

Rayan oldingi jahon chempionatida 12 ta seyv amalga oshirgan va to‘rt o‘yindan ikkitasida o‘z darvozasi daxlsizligini saqlab qolgandi. Avstraliyaliklar 1/8 finalda ishtirok etishida uning hissasi katta bo‘lgandi. To‘rt yil o‘tib jamoa yana uning qahramonlik ko‘rsatishidan umid qilmoqda.

Real maqsad

Avstraliya Osiyo saralashidan osonlik bilan o‘tdi, ammo uning tarkibi jahon chempionatining final bosqichida jiddiy natijalar uchun da’vogarlik qiladigan holatda emas. Jamoa 1/16 finaldan naryog‘iga o‘ta olishi dargumon.

Tarkib

Darvozabonlar: Patrik Bich («Melburn Siti»), Pol Izzo («Ranners»), Metyu Rayan («Levante»).

Himoyachilar: Aziz Bexich («Melburn Siti»), Jordan Bos («Feyyenoord»), Kemeron Burgess («Suonsi Siti»), Alessandro Chirkati («Parma»), Milosh Degenek (APOEL), Jyeyson Jyeriya («Albireks Nigata»), Lukas Herrington («Kolorado Repidz»), Jyeykob Italyano (GAK), Garri Suttar («Lester»), Kay Trevin («Nyu-York Siti»).

Yarimhimoyachilar: Kemeron Devlin («Hars»), Aydin Xrustich («Herakles»), Jyekson Irvin («Sankt-Pauli»), Konnor Metkalf («Sankt-Pauli»), Pol Okon-Engstler («Sidney»), Eyden O’Nil («Nyu-York Siti»).

Hujumchilar: Nestori Irankunda («Uotford»), Metyu Leki («Melburn Siti»), Aver Mabil («Eltam»), Muhammad Ture («Norvich»), Nishan Velupillay («Melburn Viktori»), Kristian Volpato («Sassuolo»), Tete Yyengi («Matida Zelviya»).

Paragvay

Murabbiy

Gustavo Alfaro ham Pochettino kabi argentinalik, ammo Yevropada uni deyarli tanishmaydi. U 27 yil mobaynida o‘z vatanidagi klublarda ishlagan, faqat bir marta xorijga chiqib, Saudiyaning «Al-Ahli» klubini boshqargan, 2020 yildan buyon esa Janubiy Amerikadagi terma jamoalar bilan ishlab kelmoqda.

2022 yilda u Ekvadorni jahon chempionatiga olib kelgandi, ammo guruh bosqichida qo‘lga kiritilgan to‘rt ochko pley-offga chiqish uchun yetarli bo‘lmagandi. Keyin Kosta-Rika bilan bir muddat ishladi, ushbu jamoa JCh-2026 saralashini aynan Alfaro qo‘li ostida boshlagandi, ammo 2024 yilgi Amerika kubogidagi muvaffaqiyatsizlikdan keyin Gustavo lavozimini tark etgandi. Kostarikaliklar boshqaruvidagi so‘nggi o‘yinida Alfaro aynan paragvayliklarni mag‘lub etgan, bir hafta o‘tib esa aynan ushbu jamoa boshqaruviga tayinlangandi. Yakunda Kosta-Rika jahon chempionatidan qolib ketdi, Paragvay esa 16 yil ichida ilk bor jahon birinchiligida ishtirok etadigan bo‘ldi.

Uning boshqaruvidagi Paragvaydan albatta yorqin o‘yin kutish kerak emas. Alfaro shogirdlari himoyaviy uslubda o‘ynab, taktik intizomga rioya qiladi. Paragvayliklar ikkinchi qavatda yaxshi harakatlana oladigan baland bo‘yli himoyachilari tufayli standart vaziyatlarda xavf tug‘dirishadi.

Yulduzlar

Jamoa safidagi asosiy yulduz o‘z vaqtida «Nyukasl»dagi o‘yinlari bilan mashhurlikka erishgan va hozirda MLS chempionatida to‘p surayotgan Migel Almiron hisoblanadi. Saralash bosqichini ushbu hujumchi deyarli almashtirishlarsiz o‘tkazdi.

Jamoadagi yana bir yulduz bir necha yil oldin APLning boshqa bir jamoasi «Brayton»da porlagan, o‘tgan yildan Fransiyaning «Strasbur» klubi a’zosi hisoblangan Hulio Ensiso edi. Ammo ushbu yarimhimoyachi turnir arafasidagi yig‘in vaqtida jarohat oldi va uzoq kutilgan mundialda qatnasha olmaydigan bo‘ldi.

Real maqsad

2010 yilda Paragvay chorakfinalda bo‘lajak chempion Ispaniyaga yutqazgandi – o‘yin taqdirini Vilyaning 82-daqiqada urgan yagona goli hal qilgandi. Bu safar o‘sha sensatsiyani takrorlash juda qiyin bo‘ladi. Ishtirokchilar soni oshirilgan chempionatda ko‘pchilik bilan bo‘lgani kabi ushbu jamoa uchun ham maksimal kutilma – 1/8 finalga chiqish bo‘ladi.

Tarkib

Darvozabonlar: Orlando Hill («San-Lorenso»), Gaston Olveyra («Olimpiya»), Roberto Fernandes («Serro Porteno»).

Himoyachilar: Xuan Kaseres («Dinamo» Moskva), Gustavo Velaskes («Serro Porteno»), Gustavo Gomes («Palmeyras»), Xunior Alonso («Atletiko Mineyro»), Xose Kanale («Lanus»), Omar Alderete («Sanderlend»), Aleksandro Maydana («Taleres»), Fabian Balbuena («Gremio»).

Yarimhimoyachilar: Diyego Gomes («Brayton»), Maurisio Magalyayns («Palmeyras»), Damyan Bobadilya («San-Paulu»), Brayan Oxeda («Orlando»), Andres Kubas («Vankuver»), Matias Galarsa («Atlanta»), Kaku («Al-Ayn»), Ramon Sosa («Palmeyras»), Migel Almiron («Atlanta Yunayted»).

Hujumchilar: Gustavo Kabalero («Porsmut»), Aleks Arche («Independente Rivadavia»), Gabriel Avalos («Independente»), Isidro Pitta («Red Bull Bragantino»), Xulio Ensiso («Strasburg»), Antonio Sanabriya («Kremoneze»).

Turkiya

Murabbiy

Vinchenso Montella Jahon chempionatiga borgan ikki italiyalikdan biri. Ushbu mutaxassis Turkiyani 2002 yildan buyon ilk bor jahon chempionatiga olib chiqdi. Montellaning o‘zi uchun ham 24 yil oldingi turnir oxirgisi bo‘lib turgandi – u o‘shanda guruh bosqichining uchinchi turida Meksikaga qarshi o‘yinda Del Piyero urgan golga assistentlik qilgan. Shundan buyon Turkiya ham, Vinchenso ham jahon birinchiliklarida ko‘rinish bermagan.

U o‘z murabbiylik faoliyatini «Roma»da boshladi va keyin Italiyaning boshqa bir qator klublarida ishladi, ammo jiddiy natijalarga erisha olmadi. «Sevilya»ga safar ham o‘xshamadi. 2021 yilda esa Montella Turkiyada paydo bo‘ldi, ammo «Adana»da ham natija ko‘rsata olmadi. Uning terma jamoalardagi faoliyati esa yaxshi boshlandi – Vinchenso Turkiyani Yevro-2024 saralashida qiyin vaziyatdan olib chiqdi va qit’a turnirida ham yaxshi qatnashib, faqat chorakfinalda Niderlandiyaga yutqazdi, endi esa okeanortidagi turnirda ham shov-shuv ko‘tarishga harakat qilib ko‘radi.

Yulduzlar

Turkiyada yaxshi avlod yetishib chiqqan. Hozirgi tarkibdagi qator futbolchilar mamlakat tarixidagi eng yaxshi futbolchilarga aylanish salohiyatiga ega. Ulardan asosiysi esa Arda Gulerdir. «Real» yarimhimoyachisi mavsumdan mavsumga kuchayib bormoqda va transfer narxi allaqachon 90 million yevroga baholanmoqda.

Yana bir vunderkind – Gulerning tengdoshi, bir necha yildan buyon «Yuventus»ning asosiy futbolchisi hisoblanadigan 21 yoshli vinger Kenan Yildizdir. Bu ikki yulduz futbolchi maydonning turli qismlarida o‘ynashi esa Montellaning ishini osonlashtiradi. Ular maydonda bir-birini to‘ldiradigan futbolchilardir. Tarkibda turklarning ko‘p yillik yetakchisi Hoqon Chalxono‘g‘li ham borligini yoddan chiqarmaslik kerak. Ushbu faxriy futbolchi jamoadagi balansni ta’minlaydi.

Real maqsad

Yevrodagi kuchli ishtirok va tarkibdagi yuqori saviyali futbolchilardan kelib chiqib, Turkiyaning uzoqqa borishini taxmin qilish mumkin. Bundan tashqari, jamoa chiroyli o‘yin orqali futbol muxlislari mehrini qozonishi mumkin. 

Tarkib

Darvozabonlar: Oltoy Bayindir («Manchester Yunayted»), Mert Gunok («Fenerbahche»), Ugurjan Chaqir («Galatasaroy»).

Himoyachilar: Abdulkarim Bardakchi («Galatasaroy»), Chag‘lar Suyunchi («Fenerbahche»), Eren Elmali («Galatasaray»), Ferdi Kadio‘g‘li («Brayton»), Merih Demiral («Al-Ahli»), Mert Muldur («Fenerbahche»), O‘zan Qoboq («Hoffenhaym»), Samet Oqoydin («Rizespor»), Zeki Chelik («Roma»), Kaan Oyxon («Galatasaroy»).

Yarimhimoyachilar: Hoqon Chalxono‘g‘li («Inter»), Ismoil Yuksak («Fenerbahche»), O‘rxun Ko‘kchi («Beshiktosh»), Solih O‘zjan («Borussiya» Dortmund), Arda Guler («Real»), Irfon Qahvachi («Qosimposho»), O‘g‘uz Oydin («Fenerbahche»), Yunus Oqkun («Galatasaroy»).

Hujumchilar: Barish Alper Yilmaz («Galatasaroy»), Jan Uzun («Ayntraxt»), Deniz Gul («Portu»), Kenan Yildiz («Yuventus»), Karim Oqturko‘g‘li («Fenerbahche»).

Prognoz

AQSh
Turkiya
Paragvay
Avstraliya

Guruhda deyarli teng kuchga ega jamoalar to‘plangan, ammo ikki jamoani favorit sifatida ko‘rsatish mumkin. Katta ehtimol bilan, AQSh va Turkiya dastlabki ikki turda oltitadan ochko to‘playdi va so‘nggi turda kuch tejab, durangga imzo chekishi mumkin. Birinchi o‘rin taqdirini gollar nisbati hal qiladi va mezbonlar dastlabki turlarda imkon qadar ko‘proq gol urishga harakat qilishadi. Uchinchi o‘rin uchun esa Paragvay va Avstraliya raqobatlashadi, Janubiy Amerika va Osiyo raqobatida esa odatda birinchisi kuchliroq chiqadi.

Source link

Xalqaro futbol federatsiyasi prezidenti Janni Infantino jahon chempionati boshlanishi arafasida o‘tkazilgan matbuot anjumanida AQShga kirishdagi muammolar atrofida shov-shuv ko‘tarmaslikka va rohatlanib ishlashga chaqirdi.

Jurnalistlardan biri esa unga somalilik hakam Umar Artan bilan ro‘y bergan voqeani eslatib, uni o‘zining eng yaxshi hakamlaridan birini himoya qila olmaslikda aybladi, shuningdek, Eron milliy jamoasi o‘z mashg‘ulot bazasini Meksikaga ko‘chirishga majbur bo‘lgani, yana ko‘plab mamlakatlardan OAV vakillari va oddiy muxlislar jahon chempionati mezboni bo‘lgan mamlakatga kira olmaganini aytib, FIFA shafeligidagi turnir ustidan nazoratni yo‘qotganingizni tan olasizmi, deya so‘radi.

Bunga javoban Infantino Umar Artan bilan bo‘lgan voqea qayg‘uli ekani, ammo tashkilot barchasini nazorat qila olmasligini aytdi.

«Muammolarni hal qilishga harakat qilyapmiz, vaziyatni o‘rganyapmiz. Ba’zida shunchaki tinchlanish foydali bo‘lishi mumkin. Ba’zida baqirish, g‘azablanish yordam bermaydi, balki teskari effekt beradi. Sizni ishontirib aytamanki, biz doimo yechim topishga harakat qilamiz. Doim. Ammo biz dunyoning egasi emasmiz. Biz hukumatlar va politsiyachini boshqaradigan qirollar emasmiz», degan u.

Eslatib o‘tamiz, AQSh hukumati jahon chempionatida o‘yinlarni boshqarishi kerak bo‘lgan Umar Artanni Mayami xalqaro aeroportidan ortga qaytarib yubordi. Bunga Somali fuqarolari Amerikaga kirishi cheklangan davlatlar qatorida ekani sabab bo‘ldi. Umar diplomatik pasportga egaligi ham foyda bermadi.

Source link

Mundialning ikkinchi kunida V guruhida ham o‘yinlar boshlanadi. Bu guruhdan mezbon Kanada, o‘tgan mundialga mezbonlik qilgan Qatar hamda Yevropadan ikki vakil – Shveytsariya hamda Bosniya va Hersegovina o‘rin olgan.

Muxlislar jahon chempionatlarida hech bo‘lmaganda bitta top-jamoa bo‘lishiga, qolganlar faqat ikkinchi o‘rin uchun kurashishiga o‘rganib qolishgan. Ammo turnirda islohot o‘tkazilib, ishtirokchilar soni 48 taga oshirilgach, kuchli jamoalar barcha guruhlarga ham yetmay qoldi. JCh-2026 B guruhida ham amalda superyulduzlar yo‘q. Lekin buning o‘rniga muntazam ravishda barqaror o‘yin ko‘rsatuvchi Shveytsariya, 40 yoshli Edin Jyeko va o‘z uyidagi turnirda barchani hayron qoldirishga bel bog‘lagan Kanada bor.

B guruhi taqvimi

1-tur

13 iyunga o‘tar kechasi, soat 00:00 (Toshkent vaqti)

Kanada – Bosniya va Hersogovina

14 iyunga o‘tar kechasi, soat 00:00

Qatar – Shveytsariya

2-tur

19 iyunga o‘tar kechasi, soat 00:00

Shveytsariya – Bosniya va Hersogovina

19 iyun, soat 01:00

Kanada – Qatar

3-tur

25 iyunga o‘tar kechasi, soat 00:00

Shveytsariya – Kanada

25 iyunga o‘tar kechasi, soat 00:00

Bosniya va Hersogovina – Qatar

Kanada

Murabbiy

Kanada milliy jamoasi ancha vaqt davomida KONKAKAFda autsayder jamoalar qatorida bo‘lib kelgan, ammo so‘nggi yillarda u yerda ham Alfonso Devis va Jonatan Devid kabi yulduzlar paydo bo‘ldi va o‘z-o‘zidan natijalar ham keldi. 2022 yilda 36 yil ichida ilk bor Kanada jahon chempionatiga chiqdi, 2024 yilda esa Amerika kubogi yarimfinaligacha yetib borib, Argentinaga yutqazdi.

Ammo shundan keyin jamoa o‘yinida pasayish uzatildi va jamoa tez o‘suvchi loyihalarga xos bo‘lgan muammolarga duch kela boshladi: kutilmalar jamoaning o‘zidan tezroq o‘sayotgandi. Vaziyatni tuzatish uchun o‘z vaqtida juda istiqbolli mutaxassis sifatida ko‘rilgan Jyessi Marshga ishonch bildirildi. U «Red Bull» tizimida katta tajriba to‘plagan, keyin esa «Lids»ni boshqargandi.

Marsh qo‘li ostidagi jamoalar doim tajovuzkor o‘ynaydi va ko‘p pressing qiladi, shuning uchun Kanada ham istisno bo‘lmadi. Shu bilan birga, jamoa bir necha yil oldingiga qaraganda kurashlarga tayyor va kuchliroq bo‘lib qolgan. Federatsiya jahon chempionati arafasida Jyessi bilan shartnomani 2030 yilga qadar uzaytirgani bejiz emas.

Shu bilan birga, so‘nggi vaqtlarda kanadaliklarda tarkib bilan bog‘liq muammolar kuzatilmoqda. Ayniqsa, mudofaa chizig‘i bundan ko‘p aziyat chekmoqda, bu chiziqda bir vaqtning o‘zida bir necha futbolchi jarohat tufayli safdan chiqdi, natijada murabbiy dastlabki kengaytirilgan qaydnomaga odatdagi 27 o‘rniga 32 futbolchini kiritishiga to‘g‘ri keldi. Hujum ham u qadar kuchli holatda emas va jamoa so‘nggi vaqtlarda bir necha bor maydonni golsiz tark etgan.

Yulduzlar

Alfonso Devis – Kanada futbolining asosiy yuzi. Shuningdek,  «Yuventus»dagi Jonatan Devid va «Sassuolo»dagi Ismael Kone ham bor, ammo mediadagi mashhurlik bobida ularning hech biri «Bavariya» futbolchisi darajasida emas.

Hozirda Devis eng yaxshi formasida emas, u so‘nggi yilni amalda to‘liq lazaretda o‘tkazdi. Avvaliga xochsimon bog‘lamlari yirtilgan, keyin mushaklarida shikastlanish ro‘y bergan, keyin esa jarohatlar qaytalangan. Yakunda u «Bavariya» asosiy tarkibidagi o‘rnini boy berdi. Hozir ham u Bosniyaga qarshi o‘yinda tushishga tayyorligi aniq emas. Kanada bir futbolchiga kuchli darajada bog‘lanib qolgan jamoa emas. Ammo bu jamoada baribir ko‘p narsa Alfonsoning qanotdan tezkor yurishlar qilishiga bog‘liq bo‘ladi.

Real maqsad

Kanadaning asosiy vazifasi – tarixda ilk bor jahon chempionati pley-off bosqichiga chiqish hisoblanadi. Va bu uddalash mumkin bo‘lgan vazifa: Shveytsariya – kvartetda yaqqol favorit, ammo shimoliy amerikaliklar jamoasi Bosniyani ham, Qatarni ham yenga oladigan darajada. Qolaversa, uyingda devorlar ham yordam beradi degan naql ishlashi mumkin.

Kanada uchun bu jahon chempionati – mamlakat ichkarisida sportning futbol turini ommalashtirish uchun imkoniyatdir. Jamoa bunga erishishi mumkin: tarkibda tezkor atletlar ham, Yevropa ligalarida o‘ynash tajribasiga ega bo‘lgan futbolchilar ham, yaxshi bilimlarga ega bo‘lgan murabbiy ham bor. Agar kanadaliklar turnir kashfiyotlaridan biriga aylansa, bu sensatsiya hisoblanmaydi.

Tarkib

Darvozabonlar: Maksim Krepo («Orlando Siti»), Ouen Gudman («Kristal Pelas»), Deyn Sen Kler («Inter Mayami»).

Himoyachilar: Moyze Bombito («Nitssa»), Derek Kornelius («Olimpik» Marsel), Alfonso Devis («Bavariya»), Lyuk De Fujyerol («Fulhem»), Alister Jonston («Seltik»), Alfi Jons («Midlsbro»), Richi Lari («Toronto»), Niko Sigur («Xayduk» Split), Joel Uoterman («Chikago Fayr»).

Yarimhimoyachilar: Ali Ahmad («Norvich Siti»), Teyjon Byukenen («Vilyarreal»), Matyo Shuaner («Los-Anjyeles»), Stefen Eushtakiu («Portu»), Marselo Flores («UANL Tigres»), Ismael Kone («Sassuolo»), Liam Millar («Hall Siti»), Jonatan Osorio («Toronto»), Natan-Dilan Saliba («Anderleht»), Jyeykob Shaffelburg («Los-Anjyeles»).

Hujumchilar: Jonatan Devid («Yuventus»), Promis Devid («Yunion Sent-Jillua»), Kayl Larin («Malyorka»), Tani Oluvaseyi («Vilyarreal»).

Bosniya va Hersegovina

Murabbiy

54 yoshli Sergey Barbarezni Bolqondan tashqarida deyarli hech kim tanimaydi, ammo Bosniya futbolida u katta nom hisoblanadi. Yoshligida baland bo‘yli futbolchi bo‘lgan Sergey Bundesligani zabt etgan (Germaniyaning 6 ta klubida, jumladan, «Borussiya» Dortmund, «Hamburg» va «Bayyer»da) o‘ynagan, bir marta mavsumning eng yaxshi to‘purariga aylangan. Ammo uning eng katta ishi – o‘z vatani milliy jamoasi boshqaruviga kelib, uni inqirozdan olib chiqish bo‘ldi. Holbuki, Barbarez bungacha biror joyda bosh murabbiy sifatida ishlamagandi.

Bosniyaliklarning JCh sari yo‘li Yevropadagi eng dramatik yo‘llardan biri bo‘ldi. Jamoa guruh bosqichida Ruminiya bilan raqobatda ustun kelib, Avstriyadan keyingi ikkinchi o‘rinni egalladi va o‘tish bosqichida qatnashish huquqiga ega bo‘ldi. O‘tish bosqichida esa avvaliga Uelsni, keyin Italiyani penaltilar seriyasida mag‘lub etdi. Ayniqsa, italyanlarga qarshi hal qiluvchi uchrashuvda bosniyaliklar tajovuzkor o‘yin ko‘rsatib, yulduzli raqiblarga jiddiy kurash taklif eta olgandi.

Barbarez jamoasini oddiy prinsiplar asosiga qurgan: intensivlik, to‘pni raqibga topshirish va tezkor qarshi hujumlarga o‘tish. Uning jamoasi doim ikkinchi raqamda harakat qiladi, lekin o‘yinni jismoniy va hissiy kurashga aylantira oladi.

Yulduzlar

Yillar o‘tadi, Edin Jyeko esa jamoadagi asosiy yulduz bo‘lib qolaveradi. Mart oyida u 40 yoshga to‘ldi, ammo hamon jamoa sardori, eng yaxshi to‘purari va oldinga uzatiladigan to‘plarning asosiy manzili hisoblanadi. Milliy jamoadagi o‘yinlar soni bo‘yicha rekordchi hisoblangan ushbu hujumchi (148) saralash siklida ham jamoaga katta yordam berdi (6+1). Bundan tashqari, Jyeko – hozirgi jamoaning 2014 yilgi mundialda ham bor bo‘lgan ikki vakilidan biri hisoblanadi (ikkinchisi – 32 yoshli Sead Kolashinats). Jyekoning xizmatlariga hamon Yevropada talab bor, u keyingi mavsumni Bundesligada – elitaga qaytgan «Shalke» safida o‘tkazadi.

Albatta, endi jamoadagi barcha narsa avval bo‘lgani kabi birgina Edinga qarab qolmagan. Yangi avlod yetishib kelmoqda: tarkibda «Shtutgart»ning asosiy futbolchilaridan biri bo‘lgan Ermedin Demirovich bor, Germaniya chempionatida o‘ynovchi yana bir hujumchi Haris Tabakovich («Borussiya» Myonhengladbah) esa to‘purarlar poygasida Harri Keyn bilan raqobatlashdi, shuningdek, Amar Dedich va Tarik Muharemovich kabi himoyachilar Yevropada ham o‘z nomiga ega.

Real maqsad

Bosniya oldiga qo‘yilgan asosiy vazifa – guruhdan chiqish. Yuqorida aytilganidek, Shveytsariya birinchi o‘rinni hech kimga bermasligi tayin, Kanadaga uy omili yordam berishi mumkin, shuning uchun, ikkinchi o‘rin uchun kurash juda qattiq kechadi. Ammo Barbarez shogirdlari o‘zi autsayder deb qaralgan o‘yinlarda g‘alaba qozona olishini bir necha bor namoyish etgan.

Agar bosniyaliklar 1/8 finalgacha yetib bora olsa, bu milliy jamoa tarixidagi eng yuksak natijaga aylanadi. Uels va Italiya kabi raqiblardan o‘ta olgan jamoadan istalgan natijani kutish mumkin.

Tarkib

Darvozabonlar: Nikola Vasil («Sankt-Pauli), Martin Zlomislich («Riyeka), Osman Hajikich («Slaven Belupo»).

Himoyachilar: Sead Kolashinats («Atalanta»), Amar Dedich («Benfika»), Nihad Muyakich («Gaziantep»), Nikola Katich («Shalke»), Tarik Muharemovich («Sassuolo»), Stepan Radelich («Riyeka»), Dennis Hajikadunich («Sampdoriya»), Nidal Chelik («Lans»).

Yarimhimoyachilar: Amir Hajiahmetovich («Hall Siti»), Ivan Shunich («Pafos»), Ivan Bashich («Astana»), Jyenis Burnich («Karlsrue»), Ermin Mahmich («Slovan»), Benyamin Tahirovich («Brondbyu»), Armin Gigovich («Yang Boyz»), Kerim-Sem Alaybegovich («Red Bull Zalsburg»).

Hujumchilar: Amar Memich («Viktoriya Plzen»), Esmir Bayraktarevich (PSV), Ermedin Demirovich («Shtutgart»), Yovo Lukich («Universitatya»), Samed Bajdar («Saragosa»), Haris Tabakovich («Borussiya» Myonhengladbah), Edin Jyeko («Shalke»).

Shveytsariya

Murabbiy

2021 yilda Murat Yaqin Shveytsariya milliy jamoasi boshqaruviga tayinlanganida, ko‘pchilik bu tanlov qanchalik to‘g‘ri ekaniga shubha bilan qaragandi. Nima bo‘lganda ham undan oldingi bosh murabbiy Vladimir Petkovich davrida ham Shveytsariya muntazam ravishda yirik turnirlarga chiqib kelayotgan, jahon chempionatini 2002 yildan buyon o‘tkazib yubormagandi.

Ammo hozirgi kunga kelib ishonch bilan aytish mumkin: bu tanlov to‘g‘ri bo‘lgandi. Shveytsarlar uning boshqaruvi davrida ham barqarorlikni saqlab qoldi. Bu jamoa o‘yin davomida kuchni teng taqsimlaydi, doim raqobatbardosh bo‘lib qoladi va muntazam ravishda yirik turnirlarda guruh bosqichidan pley-offga chiqadi. 2024 yilgi Yevropa chempionatida Shveytsariya yarimfinalga chiqishga yaqin edi, ammo penaltilar seriyasida Angliyaga yutqazgandi.

U mahalliy media bilan tez-tez ziddiyatga boradi. Uni muntazam ravishda tarkib bo‘yicha tanlovlari, sxemalar bo‘yicha tajribalari va g‘alati qarorlari uchun tanqid qilishadi. Ammo u natijalar bilan javob bermoqda: jamoa saralash bosqichini Shvetsiya, Sloveniya va Kosovo bilan bir guruhda mag‘lubiyatsiz o‘tkazib, atigi ikki gol o‘tkazdi va guruhdagi barchadan ko‘proq gol urdi (14).

Yulduzlar

Shveytsariyaliklarning jahon chempionati uchun qaydnomasida – Angliya, Ispaniya, Italiya, Germaniya va Fransiya chempionatlarida to‘p suruvchi 24 futbolchi o‘rin olgan. Shuning o‘zi ko‘p narsadan darak beradi. Ular orasida esa jamoa sardori Granit Jaka yaqqol ajralib turadi. U bir vaqtlar haddan tashqari hissiyotga beriluvchi futbolchi edi, ko‘p kartochka olishi tufayli tanqid qilinardi. «Arsenal»daligida buning uchun o‘z klubi muxlislari tomonidan hushtakbozlikka ham uchragan. Ammo so‘nggi yillarda u o‘zgardi va ikkinchi yoshligini o‘tkazmoqda – avvaliga «Bayyer» bilan «Bavariya»ning bundesligidagi hukmronligiga chek qo‘ydi, keyin esa APLga qaytib, «Sanderlend» yevrokuboklarga chiqishiga o‘z hissasini qo‘shdi. Granit terma jamoada ham muhim ishlarni bajarishda davom etmoqda – yillar uning tezligiga va kuchiga ta’sir ko‘rsatmay qolmagan, ammo jamoa hujumlarini boshlab berishga va o‘yin tempini belgilashga aynan u mas’ul.

Shveytsariyaliklarda himoya chizig‘i ham kuchli. Saralash bosqichida himoya chizig‘idagi Manuel Akanji va Niko Elvedi juftligi buni ko‘rsatib berdi, Gregor Kobel esa anchadan buyon Yevropaning eng yaxshi darvozabonlari sirasiga kiradi. Ushbu jamoada 20 yoshli havbek Yoxan Manzambining («Frayburg») o‘yinlariga ham e’tibor qaratish tavsiya etiladi, u o‘tgan mavsumni juda kuchli o‘tkazdi va Transfermarkt bo‘yicha narxini 50 million yevroga ko‘tarib oldi.

Real maqsad

Shveytsariya guruhdan birinchi o‘rin bilan chiqishiga hech kim shubha qilmayapti va kvartet favoriti sifatida ko‘rilmoqda. Jamoa tarkibi va yirik turnirlardagi katta tajriba bunga asos beradi.

Ammo pley-offda vaziyat murakkablashadi. Shveytsariya turnir g‘olibligi uchun da’vogar hisoblanadigan top-terma jamoalar qatorida emas, u faqat jamoaviy o‘yinga tayanadi. Shu tufayli doimiy ravishda chorakfinalgacha yetib boradi.

Va aynan kuchli sakkizlikka kirish – eng real va munosib natija sifatida baholanadi. Agar Yaqin shogirdlari yanada uzoqroqqa boradigan bo‘lsa, bu shveysarlarning o‘z uyida o‘tgan 1954 yilgi jahon chempionatidan buyon qayd etilgan eng yuqori natijasiga aylanadi.

Tarkib

Darvozabonlar: Gregor Kobel («Borussiya» Dortmund»), Marvin Keller («Yang Boyz»), Ivon Mvogo («Loryan»).

Himoyachilar: Manuel Akanji («Inter»), Niko Elvedi («Borussiya» Myonhengladbah), Miro Muhaym («Hamburg»), Rikardo Rodriges («Betis»), Silvan Vidmer («Mayns»), Luka Xakes («Shtutgart»), Orel Amenda («Ayntraxt»), Eray Jyomert («Valensiya»).

Yarimhimoyachilar: Ardon Yashari («Milan»), Denis Zakariyo («Monako»), Granit Jaka («Sanderlend»), Yoxan Manzambi («Frayburg»), Jibril Sou («Sevilya»), Mihel Ebisher («Piza»), Remo Froyler («Bolonya»), Kristian Fassnaht («Yang Boyz»), Fabian Rider («Augsburg»), Noa Okafor («Lids»), Ruben Vargas («Sevilya»), Dan Ndoy («Nottinghem Forest»).

Hujumchilar: Sedrik Itten («Fortuna»), Bril Embolo («Renn»), Zeki Amduni («Byornli»).

Qatar

Murabbiy

O‘z uyida o‘tkazilgan jahon chempionatida muvaffaqiyatsizlikka uchragach, Qatar yoqimsiz reallik qarshisida qoldi. Mahalliy futbol o‘sib borayotgani haqidagi ertaklar tugab, uning o‘rnini shafqatsiz reallik egalladi. Qatarliklar shundan keyin Qatorasiga ikkinchi bor Osiyo Kubogida g‘olib chiqishdi, ammo shu bilan birga, jamoa o‘zidan kuchliroq jamoalarga qarshi hech qanday raqobat ko‘rsata olmay qolgani yaqqol ko‘rinib qolgandi. Qolaversa, mintaqadagi siyosiy muammolar tufayli qatarliklar 2025 yil dekabridan buyon biror marta rasmiy o‘yinda maydonga tushmagan.

Ko‘p umid bosh murabbiy Hulen Lopetegiga bog‘langan. U 2018 yilgi jahon chempionatiga Ispaniyani olib borgandi, ammo o‘shanda «Real» taklifi tufayli jamoani tashlab ketib, o‘z faoliyati uchun qo‘rqinchli voqealar zanjirini boshlab bergandi. Ammo tajriba hech qayerga yo‘qolmadi: u uch yil «Sevilya»da, yana uch yil APL klublarida ishladi. Hulen qayerda bo‘lmasin, o‘z jamoalarini pragmatik va yopiq futbolga o‘rgatadi.

Hozirda Qatar ham ehtiyotkorona o‘yin qilishga o‘tgan. Ko‘pincha 4-2-3-1 sxemasidan foydalanadi, intizom, qarshi hujumlar va standart vaziyatlarga katta e’tibor qaratadi. Qatardagilar bunga e’tiroz bildirishi qiyin, chunki aynan shunday uslub evaziga jamoa o‘tish bosqichida BAAdan ustun keldi va jahon chempionatiga yo‘llanma oldi.

Yulduzlar

Jamoaning asosiy futbolchisi – Akrom Afif. Uni Osiyodan tashqarida ko‘pchilik tanimasligi mumkin, ammo u qit’a miqyosidagi yulduz hisoblanadi. Aynan Afif 2023 yilgi Osiyo kubogining eng yaxshi futbolchisi deb topilgan va Qatarga qatorasiga ikkinchi titulni olib bergandi. U Iordaniyaga qarshi finalda het-trik qayd etgandi.

Qatar jamoasida barcha hujumlar aynan u orqali amalga oshiriladi. U chiziqlar orqali harakatlanib, yarimqanotlarda bo‘sh joy qidiradi, sheriklari uchun vaziyatlar yaratadi va kutilmagan qarorlari bilan raqiblarni shoshirib qo‘yadi. Agar Qatar bu turnirda munosib ishtirok etmoqchi bo‘lsa, buning uchun Afifning o‘yini chiqishi talab etiladi.

Real maqsad

O‘z mezbonligidagi turnirdagi muvaffaqiyatsizlikdan keyin Qatar oldidagi minimum vazifa – jahon chempionatlaridagi ilk ochkoni qo‘lga kiritish hisoblanadi. 2022 yilda qatarliklar guruhdagi uchta o‘yinda ham yutqazgan va turnirning eng kuchsiz jamoasiga aylangandi. Hozir ham vaziyat ijobiy tomonga o‘zgarmagan, Shveytsariya va Kanada ancha yuqori darajada, faqat Bosniya bilan hech bo‘lmaganda durang o‘ynash uchun urinib ko‘rish mumkin. Ammo Lopetegi shogirdlari ochko olmasdan, munosib qarshilik ko‘rsata olsa ham, bu oldinga yurish hisoblanadi.

Tarkib

Darvozabon: Saloh Zakariyo («Ad-Duhayl»), Meshaal Issa Barsham («As-Sadd»), Mahmud Abunada («Ar-Rayyan»).

Himoyachilar: Bualem Huhi («As-Sadd»), Pedru Migel («As-Sadd»), Sulton Al-Brake («Ad-Duhayl»), Al-Hashmi Al-Husseyn («Al-Arabi»), Ayub Al-Ui («Al-G‘arafa»), Issa Layye («Al-Arabi»), Lukas Mendes («Al-Vakra»), Homam Al-Amin («Kultural Leonesa»).

Yarimhimoyachilar: Ahmad Fathi («Al-Arabi»), Jassim Gaber («Ar-Rayyan»), Assim Madibo («Al-Vakra»), Abdulaziz Hatim («Ar-Rayyan»), Karim Budiaf («Ad-Duhayl»), Muhammad Al-Mannai («Ash-Shamal»).

Hujumchilar: Almuaz Ali («Ad-Duhayl»), Akrom Afif («As-Sadd»), Tahsin Muhammad Jamshid («Ad-Duhayl»), Edmilson Junior («Ad-Duhayl»), Ahmad Al-Ganehi («Al-G‘arafa»), Ahmad Alaliddin («Ar-Rayyan»), Hasan Al-Haydos («As-Sadd»), Muhammad Muntariy («Al-G‘arafa»), Yusuf Abdurisag («Al-Vakra»).

Prognoz

Shveytsariya
Kanada
Bosniya va Hersegovina
Qatar

Shveytsariya uchun guruh bo‘lishi yengil sayr bo‘lmasligi aniq, ammo birinchi o‘rin uchun undan boshqa nomzod ham yo‘q. Chunki resurslar va tajriba Yaqinga qo‘l kelishi va bu natijani ta’minlashi tayin. Kanada Bosniya bilan solishtirganda nisbatan yorqin o‘yin namoyish etishi kutilmoqda. Qolaversa, o‘z uyida o‘ynashi ham jamoa foydasiga bo‘ladi. Qatar esa bu qadar kuchsiz tarkibi amalda guruhdan chiqish imkoniyatiga ega emas.

Source link

Janubiy Koreya Chexiyaga qarshi o‘yinda to‘liq ustunlikka erishdi, lekin birinchi bo‘lib gol o‘tkazib yuborib, iroda ko‘rsatishiga to‘g‘ri keldi.

Foto: Alex Slitz/Getty Images

JCh-2026. A guruhi. 2-tur

Janubiy Koreya – Chexiya 2:1

Gollar: Hvang In Bom (67), Oh Hyong Gyu (80) – Kreychi (59).

Janubiy Koreya: Kim Sang Gyu, Liz Hang Beom, Kim Min Je, Li Gi Hyuk, Seul Yun Vu, Hvang In Bom (Kim Jin Gyu, 84), Sin Ho Bek (Pak Jing Seob, 84), Li Tae Sok (Eom Ji Sung, 69), Li Kang In, Li Je Son (Hvann Hi Chang, 62), Son Heung Min (Oh Hyong Gyu, 69).

Chexiya: Kovar, Chalupek, Hranats, Kreychi, Tsoufal, Souchek, Soyka (Xitil, 85), Zeleni, Shuls (Glojyek, 64), Provod (Sadilek, 64), Shik (Xori, 64).

Ogohlantirish: Li Gi Hyuk (90+6).

JCh-2026 A guruhidagi ikkinchi o‘yin ham Meksika hududida o‘tkazildi. Birinchisida mezbonlar Mexikoda JAR ustidan g‘alaba qozongandi, Janubiy Koreya va Chexiyadan kelgan futbolchilar esa Sapopandagi «Akron» nomli o‘yingohda kuch sinashishdi.

O‘yinning dastlabki daqiqalarida ikki jamoa ham navbatma-navbat hujumga o‘tishdi. Keyin esa koreyalik futbolchilar tashabbusni to‘liq o‘z qo‘llariga olishdi. Dastlab jamoaning asosiy yulduzi Son Heung Min xavfli zarba berdi, ammo yevropaliklar bu zarbani qaytarishdi. Keyin esa Li Hang Bom standart vaziyat vaqtida bosh bilan yana bir xavfli zarba yo‘lladi, to‘p to‘sin yuqorisidan o‘tib ketdi.

Li Kan Inning zarbasini ham Matey Kovarj qaytarib qoldi. Birinchi bo‘lim oxirlarida Sonda yana yaxshi vaziyatlar yuzaga keldi, ammo uning zarbalariga aniqlik yetishmadi. Osiyo vakillari birinchi bo‘lim davomida sakkiz bor zarba berishdi, ammo gol ura olishmadi.

Birinchi bo‘limdagi eng yodda qolarli vaziyat Pavel Shulsning futbolkasi yirtilib ketishi bo‘ldi. Bu holatda Li Hang Bom raqibni to‘xtatish uchun uning formasidan ushlab qolgandi. Bu epizod Chexiya milliy jamoasi uchun futbolkalarni tayyorlagan ishlab chiqaruvchining zarariga ishlagan tayin.

Birinchi bo‘limda chexlar pressing uyushtirish orqali raqibni o‘z hududiga o‘tkazmaslikka urindi, koreyslar esa oldindan o‘ylangan kombinatsiyalarni amalga oshirish bilan shug‘ullanishdi.

Ikkinchi bo‘lim startida ham Kovarj o‘zini ko‘rsatishiga to‘g‘ri keldi  – u bu safar Hvang In Byomning zarbasini qaytardi, keyin esa Sonni golsiz qoldirdi. «Tottenhem»ning sobiq hujumchisi to‘pni darvozabon ustidan oshirib tashlashga uringandi, ammo Kovarj aldanmadi. O‘yin Chexiya darvozasi baribir ishg‘ol etilishiga qarab ketayotgandi, ammo hisob Yevropa vakillari tomonidan ochildi. Chexlarning darvoza sohasiga to‘g‘ri borgan ilk zarbasi golga aylandi. Vladimir Tsoufal qanotdan to‘pni jarima maydoniga oshirdi, to‘pga barchadan oldin yetib borgan Ladislav Kreychi bosh bilan aniq harakat qildi.

Koreyaliklar hisobni tenglashtirishi uchun sakkiz daqiqa yetarli bo‘ldi. Osiyoliklar raqibning chap qanotiga kuchli bosim uyushtirishdi va Hvang In Byom hujumni ajoyib gol bilan yakunladi. U bir harakat bilan himoyachi Robin Granachni va darvozabonni yo‘ldan oldi, keyin esa to‘pni darvozaning olis burchagiga joylashtirdi.

Chexlar yana bu o‘yindagi asosiy quroli – standart vaziyatdan foydalanishga harakat qildi va Tomash Souchek yana bosh bilan darvozani ishg‘ol etdi. Ammo hakam bu holatda ofsayd qayd etdi va golni bekor qildi. Koreyslar esa navbatdagi hujumda o‘zi haqli bo‘lgan g‘alaba golini urdi. Hvang In Byom bu safar zaxiradan o‘yinga qo‘shilgan O Hyong Kyuni golli pas bilan ta’minladi. Kovarj yaqin masofadan yo‘llagan zarba qarshisida ojiz qoldi.

Biroz o‘tib chexlar hisobni tenglashtirishi mumkin edi, ammo darvozabon Kim Sin Kyu Adam Glojyekning yaqin burchakka yo‘llagan ayyorona zarbasidan keyin rikoshet bo‘lib kelgan to‘pni darvoza chizig‘i ustida to‘xtatib qolishga ulgurdi. O‘yinga qo‘shib berilgan daqiqalarda esa Mixal Sadilek ham qulay vaziyatdan foydalana olmadi. Uning zarbasi darvoza sohasiga to‘g‘ri bordi, ammo darvozabon bu vaziyatda ham ishonchli harakat qildi.

Shu tariqa, A guruhida birinchi turdan keyin Meksika va Janubiy Koreya 3 tadan ochko jamg‘argan holda, guruhda peshqadamlik qilmoqda. 2-turda aynan shu ikki jamoa to‘qnashadi, Chexiya esa JAR bilan o‘yinda ochko olishga harakat qilib ko‘radi.

Source link

Turnir mezbonlaridan biri bo‘lgan Meksika JAR ustidan oson g‘alabaga erishdi. O‘yinda uch futbolchiga qizil kartochka ko‘rsatildi – bunaqasi JCh ochilish o‘yinlarida hali kuzatilmagan.

2026 yilgi jahon chempionati rasman start oldi. Meksika turnirning birinchi o‘yinida JAR ustidan ishonchli g‘alabaga erishdi (2:0).

Meksika – JAR 2:0

Gollar: Kiniones, 9 (1:0). Himenes, 67 (2:0)

Meksika: Ranhel, Montes, Vaskes, Galyardo, Reyyes, Lira (Alvares, 76), Fidalgo (Mora, 66), Guterres (Chaves, 66), Kiniones (Vega, 79), Alvarado, Himenes (Gonsales, 76)

JAR: Uilyams, Mbokazi, Sibisi, Okon, Modiba (Appollis, 77), Mudau, Sitole, Adams (Zvane, 61), Mokoena, Foster (Mbata, 56), Rayners (Makgopa, 77)

Ogohlantirishlar: Guterres, 23 – Mokoena, 17. Sibisi, 74

Chetlatish: Sitole, 49. Zvane, 84. Montes, 90 

Afrikaliklar ikkinchi bo‘lim boshida, hisob 0:1 ekanida son jihatdan ozchilik bo‘lib qolishdi. Yaya Sitole 49-daqiqada JChdagi debyut o‘yinida to‘g‘ridan to‘g‘ri qizil kartochka oldi – birinchi gol urilgan vaziyatda ham aynan u xatoga yo‘l qo‘ygandi. Qizil ko‘rsatilgan vaziyatda esa u Brayan Guterresni jarima maydoniga kirishda qo‘pollik ishlatib to‘xtatdi – hakam buni so‘nggi umid foli deb baholadi.

O‘yin oxirlashganida, hisob 2:0 ko‘rinishiga kelib bo‘lganida esa VAR aralashuvi JAR jamoasida ikkinchi qizil kartochkaga olib keldi. O‘yinga zaxiradan qo‘shilgan Temba Zvane hujum vaqtida Alvaradoning boshiga qo‘li bilan zarba berdi. O‘yin bosh hakami Vilton Sampayo monitorga borib vaziyatni ko‘rib chiqdi va cho‘ntagidan qizil kartochkasini chiqardi.

Va bu hali hammasi emasdi. O‘yinga qo‘shib berilgan daqiqalarda Meksika ham o‘n kishi bo‘lib qoldi. Jamoa sardori Sesar Montes darvozabon bilan yakkama-yakka vaziyatga chiqib borayotgan Kxuliso Mudauni yiqitdi.

Ochilish o‘yinidagi uchta qizil kartochka – JCh tarixida ilk bor kuzatilmoqda. 

Yana nimalar bo‘ldi: Himenesning JChdagi ilk goli, 17 yoshli meksikalik debyuti

Meksika tarkiblar teng holatda ham, ko‘pchilik bo‘lib olganida ham kuchli o‘yin namoyish etdi.

● Mezbonlar ilk daqiqalardan bosim uyushtirdi. Jamoaning tajribali hujumchisi Raul Himenes 5-daqiqadayoq ajoyib imkoniyatga ega bo‘lgandi, ammo JAR darvozaboni Ronuen Uilyams uning kuchli zarbasini qaytardi.

● Lekin Uilyams 9-daqiqada to‘pni oyoqlari orasidan o‘tkazib yubordi – meksikaliklar vingeri Hulian Andres Kiniones o‘z imkoniyatidan foydalandi. Bu vaziyatda Yaya Sitole pressing ostida to‘p yo‘qotdi va raqibga gol sovg‘a qildi. Meksikaliklar yarimhimoyachisi Erik Lira to‘pni egallab, darhol Kinionesga tashlab berdi, u esa markazga ko‘chdi va to‘pni darvozabon oyoqlari orasidan o‘tkazdi.

● Kiniones – KONKAKAF mamlakatlarining JChdagi ilk golni urgan ilk futbolchisiga aylandi. Qolaversa, bu meksikaliklar 2006 yildan buyon JCh o‘yinlarida urgan eng tezkor gol bo‘ldi – o‘shanda jamoa himoyachisi Rafael Markes Argentina darvozasini ishg‘ol etgandi.

Kiniones – Meksika milliy jamoasi safida o‘ynayotgan ilk kolumbiyalikdir. U Kolumbiyada dunyoga kelgan, ammo faoliyatining katta qismini Meksikada o‘tkazgan. Hozirda Saudiya Arabistonining «Al-Qodisiya» jamoasi safida to‘p suradi, u yakunlangan mavsumda Krishtianu Ronaldudan ko‘proq gol urgan: 33 gol va to‘rt assist.

● Ko‘pchilik bo‘lib qolganidan keyin meksikaliklar g‘alabali hisobni mustahkamlashdi. Himenes ikkinchi bo‘lim o‘rtalarida urgan goldan keyin amalda o‘yinda intriga qolmadi: tajribali hujumchi Roberto Alvaradoning uzatmasidan unumli foydalandi. E’tiborli tomoni, bu uning JChdagi ilk goli bo‘ldi, holbuki u bungacha 2014 yildan buyon uchta jahon chempionatida ishtirok etgandi. Lekin oldingi turnirlarda unda o‘yin amaliyoti ko‘p bo‘lmagan va asosan zaxiradan maydonga tushgandi.

● O‘yinning oxirgi 25 daqiqasida Meksika safida 17 yoshli Hilberto Mora harakat qildi – u JCh-2026 ning eng yosh futbolchisidir. U maydonga tushayotganida tribunalarda yig‘ilgan muxlislar uning nomini aytib, olqishlashdi. Mora allaqachon Lamin Yamalning rekordlarini buzishga kirishgan. U xalqaro turnir o‘yinida g‘alabaga erishgan eng yosh futbolchidir: 16 yosh-u 265 kunligida KONKAKAF-2025 Oltin kubogini qo‘lga kiritgandi. Mahalliy «Tixuana» klubida o‘ynovchi ushbu yosh futbolchining natijasi Ginness rekordlar kitobidan o‘rin olgan.

● Meksikaliklar o‘yinda mutlaq ustunlikka erishdi: zarbalar bo‘yicha ko‘rsatkich 16:3 ko‘rinishini oldi. JAR juda bo‘sh ko‘rindi – amalda xavfli vaziyatlar yarata olishmadi.

Meksika keyingi turda Janubiy Koreyaga qarshi, JAR – Chexiya bilan o‘ynaydi.

Source link