Jamiyat
Raqamli tuzoq va yoshlar — giyohvandlikka qarshi kurash
Har kuni millionlab yoshlar smartfonini qo‘liga oladi, ijtimoiy tarmoqlarga kiradi, yangiliklar o‘qiydi, videolar tomosha qiladi. Bu zamonaviy hayotning oddiy manzarasi. Ammo shu manzara ortida ko‘zga ko‘rinmas bir tahdid yashiringan. Bu — raqamli vositalar orqali yoshlar orasida kuchayib borayotgan giyohvandlikning yangi to‘lqini.
Bir paytlar giyohvand moddalarning noqonuniy savdosi ko‘cha-ko‘ylarda, yashirin uchrashuv joylarida amalga oshirilgan bo‘lsa, bugun u internet tarmoqlari, messenjerlar va ijtimoiy platformalarga ko‘chmoqda. Endi xavf eshigimizni taqillatib kelmaydi. U bizning uyimizga farzandlarimiz qo‘lidagi telefon orqali kirib kelmoqda.
Muammoning eng xavotirli jihati shundaki, giyohvandlik endi faqat tibbiy yoki huquqiy masala emas. U mamlakatning kelajagi, yoshlar salohiyati va jamiyat barqarorligiga daxldor strategik muammoga aylanib ulgurdi.
Global manzara
Bugungi kunda dunyo bo‘ylab giyohvand moddalar iste’moli bilan bog‘liq holatlar tobora ortib bormoqda. BMTning Narkotiklar va jinoyatchilik bo‘yicha boshqarmasi (UNODC)ning hisobotiga ko‘ra:
296 million kishi — 2022-yilda narkotik moddalarni kamida bir marta iste’mol qilgan. Bu 2012-yilga nisbatan 23 foizga ko‘p.
39,5 million kishi — narkotikka bog‘liqlik kasalligi bilan og‘riydi, ammo ularning 80 foizidan ortig‘i hech qanday davolanish yordamini olmagan.
500 mingdan ortiq odam — har yili narkotikka bog‘liq sabablar tufayli vafot etadi.
30 foiz — global narkotik savdosining raqamli kanallar (sayt va ijtimoiy tarmoqlar) orqali amalga oshirilayotgan qismi bo‘lib, bu ko‘rsatkich 2018-yilga nisbatan ikki barobar oshgan.
Yoshlar segmentida muammo yanada o‘tkir. 15-34 yoshlilar barcha narkotik iste’molchilarining 60 foizdan ortig‘ini tashkil etadi. Aynan shu guruh iqtisodiy jihatdan eng faol, oilaviy muhitni shakllantirishda muhim o‘rin tutadigan qatlam hisoblanadi.
O‘zbekistondagi tendensiya
Mamlakatimiz ham bu global muammodan chetda emas. O‘zbekiston geografik jihatdan muhim tranzit hududda joylashgani sababli xavf omillari doimo mavjud. Keyingi yillarda huquqni muhofaza qiluvchi organlar tomonidan giyohvandlik bilan bog‘liq jinoyatlarga qarshi qat’iy choralar ko‘rilayotgan bo‘lsa-da, raqamli muhitda tarqalayotgan yangi psixoaktiv modda (an’anaviy usullarda aniqlanishi qiyinroq bo‘lgan narkotik preparat)lar va yashirin onlayn savdo kanallari yangi chaqiriqlarni yuzaga keltirmoqda. Bu esa profilaktika, monitoring va huquqni muhofaza qilish faoliyati oldiga yangi vazifalarni qo‘ymoqda.
Qolaversa, narkotik iste’moli bilan bog‘liq tibbiy murojaatlar orasida 18-30 yosh guruhi ulushi ortib bormoqda.
Shu bois giyohvandlikka qarshi kurashga faqat jazo yoki taqiq nuqtai nazaridan yondashish yetarli emas. Dunyo tajribasi ham shuni ko‘rsatmoqda: muammoning ildiziga qarshi kurashish uchun davlat, ta’lim tizimi va fuqarolik jamiyati birgalikda harakat qilishi lozim.
“Bu mumkin emas”, “bunday qilma…”
Avvalo, davlatning roli hal qiluvchi ahamiyatga ega. Qonunlar, strategiyalar va muassasalar orqali muammoga qarshi tizimli yondashuv shakllantiriladi.
Davlatimiz rahbarining 2024-yil 6-maydagi «O‘zbekiston Respublikasida giyohvandlik vositalari va psixotrop moddalarning noqonuniy aylanmasiga chek qo‘yish orqali ularning aholi salomatligi va mamlakatimiz genofondiga salbiy ta’sirini bartaraf etish strategik chora-tadbirlari to‘g‘risida»gi Farmoni bilan tasdiqlangan «O‘zbekiston Respublikasida giyohvandlik va narkojinoyatlarga qarshi kurashish bo‘yicha 2024–2028-yillarga mo‘ljallangan Milliy strategiya» va sohadagi huquqiy islohotlar bu borada muhim qadam bo‘ldi. Lekin har qanday qonun faqat qog‘ozda qolib ketmasligi uchun uni hayotga tatbiq etadigan ijtimoiy muhit ham bo‘lishi kerak.
Ana shu nuqtada ta’lim tizimi birinchi safga chiqadi. Maktab va oliy ta’lim muassasalari millionlab yoshlar bilan har kuni muloqot qiladigan yagona tizim hisoblanadi. Shuning uchun profilaktikaning eng samarali maydoni ham aynan ta’lim sohasidir.
Biroq bu yerda muhim savol tug‘iladi: yoshlarga giyohvandlik haqida qanday gapirish kerak?
Ko‘p yillar davomida qo‘llanilgan “bu mumkin emas”, “bunday qilma” qabilidagi quruq taqiqlar kutilgan natijani bermagan. Psixologlar fikricha, ayniqsa o‘smir yoshidagi bolalar taqiqlangan narsalarga nisbatan ko‘proq qiziqish bildirishi mumkin.
Shuning uchun zamonaviy profilaktika taqiqlash emas, tushuntirish va hayotiy ko‘nikmalarni shakllantirishga asoslanishi zarur. Yoshlarga mustaqil qaror qabul qilish, bosimlarga qarshi tura olish, tanqidiy fikrlash va raqamli xavfsizlik qoidalarini o‘rgatish bugun har qachongidan muhim.
“Raqamli immunitet”ni shakllantirish vaqti keldi
Bu borada ayniqsa, raqamli savodxonlik masalasi alohida ahamiyat kasb etmoqda. Chunki bugungi yosh internetdagi har qanday ma’lumotni haqiqat sifatida qabul qilishi mumkin. Giyohvandlikni targ‘ib qiluvchi kontent esa ko‘pincha zamonaviy hayot tarzi, erkinlik yoki “omadli hayot” ko‘rinishida taqdim etiladi.
Aslida esa har bir narkotik modda ortida inson salomatligi, kelajagi va taqdiriga tahdid yashiringan.
Ta’lim muassasalarida “raqamli immunitet”ni shakllantirish vaqti keldi. Bu yoshlarni internetdagi manipulyasiyalardan himoya qilish, xavfli axborotni tanib olish va unga qarshi ongli munosabatni shakllantirish demakdir.
Fuqarolik jamiyati institutlari ham ishtirokchi
Davlat va ta’lim tizimining sa’y-harakatlari ham yetarli bo‘lmasligi mumkin. Chunki yoshlarning hayoti maktab yoki oliygoh bilan cheklanmaydi. U oilada, mahallada, do‘stlar davrasida va jamoatchilik muhitida shakllanadi.
Shu sababli fuqarolik jamiyati institutlari ham giyohvandlikka qarshi kurashning muhim ishtirokchisi hisoblanadi.
O‘zbekistonning eng katta ustunliklaridan biri mahalla institutidir. Mahalla faqat quyi boshqaruv tizimi emas, balki ijtimoiy nazorat va o‘zaro yordam muhiti hamdir. Ko‘p hollarda oiladagi muammolarni davlat idoralaridan oldin mahalla faollari sezishi mumkin.
Nodavlat notijorat tashkilotlari ham profilaktika ishlarida muhim o‘rin tutadi. Ular aholi bilan yaqin ishlaydi, yangi yondashuvlarni sinab ko‘radi va jamoatchilik ishonchini qozona oladi.
Bugungi kunda aynan ishonch eng muhim resursga aylanmoqda. Yoshlar rasmiy chaqiriqlardan ko‘ra o‘z tengdoshlarining fikriga ko‘proq quloq tutishadi. Shuning uchun ijtimoiy tarmoqlarda sog‘lom turmush tarzini targ‘ib qiluvchi yosh blogerlar, talabalar va faollarni qo‘llab-quvvatlash muhim ahamiyatga ega.
Xalqaro tajriba ham shuni ko‘rsatadiki, giyohvandlikka qarshi eng samarali kurash faqat huquqiy choralar bilan emas, balki jamiyatning barcha qatlamlarini jalb qilish orqali amalga oshiriladi.
Janubiy Koreya tajribasida qat’iy nazorat ta’lim va profilaktika bilan uyg‘unlashtirilgan. Germaniyada esa asosiy e’tibor insonni jazolash emas, balki uni davolash va jamiyatga qaytarishga qaratilgan. AQSh tajribasi esa yoshlar bilan doimiy ishlash va ommaviy axborot vositalarining ahamiyatini ko‘rsatadi.
Bu tajribalardan chiqadigan eng muhim xulosa bitta: giyohvandlikka qarshi kurashni faqat bir tashkilot yoki bir sohaning zimmasiga yuklab bo‘lmaydi. Bugun farzandlarimizga tahdid solayotgan xavflar hamkorlikni talab qilmoqda.
Uch ustun
Davlat qonun bilan himoya qilishi kerak. Ta’lim tizimi bilim va ongni shakllantirishi zarur. Fuqarolik jamiyati esa ishonchli ijtimoiy muhitni yaratishi lozim. Ana shu uch ustun birgalikda harakat qilgandagina giyohvandlikka qarshi barqaror immunitetni shakllantirish mumkin bo‘ladi.
Eng muhimi, biz muammoni kech bo‘lmasdan anglashimiz zarur. Chunki har bir saqlab qolingan yosh taqdir, bu faqat bir insonning emas, balki butun mamlakat kelajagining saqlab qolinishidir.
Giyohvandlikka qarshi kurash huquqni muhofaza qilish organlarininggina vazifasi emas. Bu har bir ota-ona, har bir o‘qituvchi, har bir mahalla faoli va har bir fuqaroning mas’uliyatidir. Kelajak uchun kurash esa aynan shu mas’uliyatdan boshlanadi.
Nurillo To‘xtasinov,
Toshkent davlat yuridik universiteti
«Davlat boshqaruvi» kafedrasi katta o‘qituvchisi
Jamiyat
Davlat organlari formasiga o‘xshash kiyimlardan foydalanganlik uchun javobgarlik belgilanmoqda
Oliy Majlis Qonunchilik palatasida «O‘zbekiston Respublikasining Ma’muriy javobgarlik to‘g‘risidagi kodeksiga davlat tuzilmalari xodimlarining formali kiyim-boshidan qonunga xilof ravishda foydalanish holatlarining oldini olishga qaratilgan o‘zgartirish va qo‘shimcha kiritish haqida»gi qonun loyihasi birinchi o‘qishda qabul qilindi.
Qonun tashabbuskorlarining ta’kidlashicha, davlat organlari, vazirlik va idoralar xodimlari uchun tasdiqlangan formali kiyim-bosh muayyan davlat organi vakili ekanini anglatadi, fuqarolarda ishonch uyg‘otadi hamda uni kiygan shaxs qonun bilan belgilangan vakolat va mas’uliyatga ega ekanini bildiradi. Shu bois bunday forma davlat xizmatining muhim ramzlaridan biri hisoblanadi.
Biroq keyingi yillarda ayrim tashkilotlar va shaxslar tomonidan davlat organlarining tasdiqlangan formasiga adashtirib yuborish darajasida o‘xshash kiyimlardan foydalanish yoki shunday formalarni joriy etish holatlari kuzatilayotgani qayd etildi. Bu esa fuqarolarni chalg‘itishi, davlat idoralari obro‘siga salbiy ta’sir ko‘rsatishi va ayrim shaxslarga o‘zini davlat xodimi sifatida tanishtirib, odamlar ishonchini suiiste’mol qilish imkonini berishi mumkin.
Qonun loyihasi bilan Ma’muriy javobgarlik to‘g‘risidagi kodeksga davlat organlarining tasdiqlangan harbiy yoki idoraviy formali kiyim-boshiga adashtirib yuborish darajasida o‘xshash hamda unga xos farqlovchi belgilar va yoki ramzlarga ega formali kiyim-boshni joriy etganlik yoki undan foydalanganlik uchun ma’muriy javobgarlik belgilash taklif etilmoqda.
Qayd etilishicha, mazkur normalar, avvalo, fuqarolarning huquq va manfaatlarini himoya qilish, davlat organlariga bo‘lgan ishonchni mustahkamlash hamda davlat xizmati obro‘sini muhofaza qilishga xizmat qiladi.
O‘zbekiston bo‘ylab Sanepidqo‘mita tizimida korrupsiya holatlari fosh etildi.
Bosh prokuratura huzuridagi Departamentning Sirdaryo viloyati boshqarmasi tomonidan tezkor tadbir o‘tkazilgan.
Unda Guliston shahar Sanitariya-epidemiologik osoyishtalik va jamoat salomatligi bo‘limi shifokor yordamchisi M.A. go‘yoki yuqori lavozimlarda ishlovchi tanishlari orqali “M.M.” MChJ tomonidan tayyorlanadigan tayyor ovqat mahsulotiga ijobiy xulosa olib berishi evaziga 300 AQSh dollari va 1,2 mln so‘mni olgan vaqtida ashyoviy dalillar bilan ushlangan.
Departamentning Toyloq tumani bo‘limi va boshqa huquqni muhofaza qiluvchi organ xodimlari hamkorligida tezkor tadbir o‘tkazildi. Unda Sanitariya-Epidemiologik osoyishtalik va jamoat salomatligi qo‘mitasining Toyloq tuman bo‘limi sanitar vrachi F.B. 9 mln so‘m evaziga go‘yoki yuqori lavozimlarda ishlovchi tanishlari orqali YaTT “S.E.”ning non mahsulotlari ishlab chiqarish sexiga sanitar gigiyenik xulosasini rasmiylashtirib berishini aytib, kelishilgan puldan 400 AQSh dollarini olgan vaqtida ashyoviy dalillar bilan ushlanib, tekshiruvda muqaddam 100 AQSh dollari va 500 ming so‘mni firibgarlik yo‘li bilan qo‘lga kiritganligi aniqlangan.
Departamentning Xorazm viloyati boshqarmasi xodimlari va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda Urganch shahar sanitariya-epidemiologik osoyishtalik va jamoatchilik salomatligi bo‘limi xodimi G‘.A. fuqaro B.D.ga go‘yoki yuqori lavozimlarda ishlovchi tanishlari orqali Urganch shahrida umumiy ovqatlanish shoxobchasi ochish uchun ruxsatnoma rasmiylashtirib berishi va 6 oy davomida jarima qo‘llamaslikni va’da qilib, 2,4 mln so‘mni firibgarlik yo‘li bilan olgan vaqtida ashyoviy dalillar bilan ushlangan.
Departamentning Namangan viloyati boshqarmasi tomonidan o‘tkazilgan tezkor tadbirda Namangan shahar sanitariya-epidemiologik osoyishtalik va jamoatchilik salomatligi bo‘limi shifokor yordamchisi A.S. (muqaddam sudlangan) fuqaro M.O.ning nomiga shahar hududida nodavlat maktabgacha ta’lim muassasasini ochish uchun ijobiy xulosa olib berish evaziga 1,2 mln so‘m olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 25, 168-moddasi (firibgarlik) va 25, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
28-iyul kuni Ko‘ksaroy qarorgohida xorijiy davlatlarning O‘zbekistonga yangi tayinlangan elchilarining ishonch yorliqlarini topshirish marosimi bo‘lib o‘tdi.
Prezident Shavkat Mirziyoyev Italiya, Falastin, Saudiya Arabistoni, Kuvayt, Jazoir, Malayziya, Pokiston, Ozarbayjon va Qozog‘istonning favqulodda va muxtor elchilaridan ishonch yorliqlarini qabul qildi.
Davlat rahbari diplomatlarni Yangi O‘zbekistondagi faoliyati boshlangani bilan tabriklar ekan, bugungi murakkab geosiyosiy sharoitda diplomatiyaning o‘rni va ahamiyati har qachongidan ham ortib borayotganini ta’kidladi. Shuningdek, har bir mamlakat bilan o‘zaro manfaatli hamkorlikni kengaytirish bo‘yicha ustuvor vazifalarga alohida to‘xtaldi.
Jumladan, Italiya bilan «yashil» energetika, metallurgiya, kimyo sanoati, qishloq xo‘jaligi, sog‘liqni saqlash, farmatsevtika, ta’lim va turizm sohalarida amalga oshirilayotgan loyihalar yuqori baholandi. Shuningdek, Lombardiya va Toskana hududlari bilan hamkorlikni kengaytirish muhimligi qayd etildi.
Falastin elchisi bilan muloqotda O‘zbekiston Isroil–Falastin mojarosini «ikki xalq uchun ikki davlat» tamoyili asosida hal etish tarafdori ekani yana bir bor tasdiqlandi. Shuningdek, mamlakatimiz Tinchlik kengashiga ta’sischi davlat sifatida G‘azoni qayta tiklashga ko‘maklashishga qaratilgan tashabbuslarni qo‘llab-quvvatlayotgani ta’kidlandi.
Saudiya Arabistoni bilan hamkorlik namunaviy darajaga chiqqanligi, ikki davlat o‘rtasida umumiy qiymati 25 milliard dollarlik investitsiya loyihalari portfeli shakllangani qayd etildi. Tibbiyot, farmatsevtika va «yashil» energetika sohalaridagi hamkorlikni kengaytirish, shuningdek, Haj va Umra ziyoratlari uchun yaratilayotgan sharoitlar yuksak baholandi.
Kuvayt bilan investitsiya, infratuzilma, sog‘liqni saqlash va ta’lim sohalarida yangi qo‘shma loyihalarni amalga oshirish, neft-kimyo tarmog‘i hamda davlat-xususiy sheriklik mexanizmlarini rivojlantirish bo‘yicha katta imkoniyatlar mavjudligi qayd etildi.
Jazoir bilan neft-gaz, energetika, tog‘-kon sanoati, qishloq xo‘jaligi va turizm sohalarida hamkorlikni kuchaytirish, Hukumatlararo qo‘shma komissiya tashkil etish hamda Imtiyozli savdo bitimini imzolash muhim vazifalar sifatida belgilandi.
Malayziya bilan yarim o‘tkazgichlar sanoati, neft-kimyo, islom moliyasi va ziyorat turizmi kabi istiqbolli sohalarda sheriklikni kengaytirish bo‘yicha katta salohiyat mavjudligi ta’kidlandi.
Pokiston bilan strategik sheriklik munosabatlarini yanada chuqurlashtirish, Toshkent–Karachi to‘g‘ridan-to‘g‘ri aviaqatnovlarini rivojlantirish, Transafg‘on transport yo‘lagini amalga oshirish, sanoat kooperatsiyasi, energetika, to‘qimachilik, farmatsevtika va turizm sohalarida hamkorlikni kengaytirish ustuvor vazifalar sifatida qayd etildi.
Ozarbayjon bilan munosabatlar strategik sheriklik va ittifoqchilik darajasiga chiqqanligi, savdo aylanmasi 40 foizga oshgani, qo‘shma korxonalar soni qariyb 450 taga yetgani ma’lum qilindi. Tomonlar investitsiya portfelini yaqin yillarda 10 milliard dollarga yetkazishni maqsad qilgan.
Qozog‘iston bilan ham savdo hajmini 10 milliard dollarga yetkazish, qiymati 8 milliard dollarlik qo‘shma investitsiya loyihalarini amalga oshirish hamda «Markaziy Osiyo» xalqaro sanoat kooperatsiyasi markazini to‘liq ishga tushirish ustuvor vazifalar sifatida belgilandi.
Marosim yakunida Prezident Shavkat Mirziyoyev yangi tayinlangan elchilarga diplomatik faoliyatida muvaffaqiyat tilab, ularni O‘zbekiston hududlari va xususiy sektor bilan faol ishlashga, mamlakatda amalga oshirilayotgan islohotlar hamda bunyodkorlik jarayonlari bilan yaqindan tanishishga chaqirdi. Elchilar esa O‘zbekiston bilan ko‘p qirrali hamkorlikni yanada rivojlantirish uchun bor imkoniyatlarini safarbar qilishlarini bildirdilar.
O‘zbekistonda bolalarning hayot sifati va huquqlarini baholashga xizmat qiladigan Bolalar farovonligi indeksi joriy etiladi.
«Inson huquqlari – 2030» strategiyasiga muvofiq, Bolalar ombudsmani, Adliya vazirligi, Iqtisodiyot va moliya vazirligi hamda Ijtimoiy himoya milliy agentligi 2027-yil 1-aprelga qadar mazkur indeksni ishlab chiqib, Vazirlar Mahkamasiga kiritadi.
Hujjatda qayd etilishicha, indeksni joriy etishdan maqsad mamlakatda «Bolaning eng yaxshi manfaatlari» prinsipini hayotga tatbiq etish va bolalarning farovonlik darajasini tizimli baholash mexanizmlarini shakllantirishdan iborat.
Ichimlik suvi ta’minoti va oqova suv tizimi yanada yaxshilanadi.
«Ichimlik suvi ta’minoti va oqova suv tizimini yanada yaxshilashga qaratilgan qo‘shimcha chora-tadbirlar to‘g‘risida»gi Prezident Farmoni (PF–140-son, 24.07.2026-y.) qabul qilindi.
Farmonga ko‘ra, 2026-yil 1-sentyabrdan «O‘zsuvta’minot» AJ (Jamiyat)ga foydalanish uchun topshiriladigan barcha ichimlik suvi va oqova suv infratuzilmasini rivojlantirish loyihalari «Dasturlarning amalga oshirilishini monitoring qilish va manzilli ro‘yxatlarni kelishishning avtomatlashtirilgan axborot tizimi» elektron platformasida aks ettiriladi.
Jamiyat va uning tizim korxonalari o‘rtasida shartnomaviy munosabatlarni samarali yo‘lga qo‘yish maqsadida tor doiradagi malaka oshirish, o‘qitish va ekspluatatsiyaga oid shartnomaviy munosabatlar to‘g‘ridan-to‘g‘ri amalga oshiriladi.
Ichimlik suvi ta’minoti va oqova suv sohasidagi yangi loyihalarga xalqaro moliya institutlari va xorijiy hukumat moliya tashkilotlari (XMI/XHMT) qarz va grant mablag‘lari oldindan xarid, retroaktiv va shu kabi boshqa moliyalashtirish usulini tanlagan holda jalb qilinadi.
2027-yil 1-yanvardan:
-markazlashgan ichimlik suvi bilan ta’minlash iqtisodiy jihatdan samarasiz yoki o‘zini oqlamaydigan hududlarda xizmat ko‘rsatish alohida yondashuv asosida (maxsus texnikalarda suv yetkazib berish, shoxobchalarni tashkil etish va shu kabilar) amalga oshiriladi.
-tarif siyosatini takomillashtirish maqsadida ichimlik suvi ta’minoti va oqova suv xizmatlari tariflarini tasdiqlash vakolati Vazirlar Mahkamasi huzuridagi Idoralararo tarif komissiyasiga o‘tkaziladi.
Davlat organlari formasiga o‘xshash kiyimlardan foydalanganlik uchun javobgarlik belgilanmoqda
To‘rt hududda Sanepidqo‘mita tizimi xodimlari ushlandi
Xitoy Xalq ozodlik armiyasining 99 yilligi Toshkentda nishonlandi
-
Jamiyat5 days ago
Namanganda qarzdorning qimmatbaho avtomashinasi xatlandi
-
Iqtisodiyot2 days ago
Bank depozitlari bir yilda 118 trln so‘mga ko‘paydi
-
Dunyodan2 days ago
Yaponiyalik ayollar 41 marta rekord o’rnatdilar
-
Sport4 days ago
Abduqodir Husanov «Manchester City» bilan shartnomasini 2031 yilgacha uzaytirdi
-
Dunyodan4 days ago
Afg‘onistondagi suv toshqinlarida 20 kishi halok bo‘ldi
-
Iqtisodiyot4 days ago
Bir necha kun ko‘tarilgan dollar birdan keskin pastladi
-
Jamiyat1 day agoIchimlik suvi narxlarini tasdiqlash vakolati Idoralararo tarif komissiyasiga o‘tkaziladi
-
Iqtisodiyot2 days ago
Energetika vazirligi va uning quyi bo‘g‘inlari jiddiy tanqid ostiga olindi