Toshkent shahrining Yunusobod tumanida Niyozbek yo‘li ko‘chasida yo‘l harakatini tashkil etish tartibiga o‘zgarishlar kiritildi.

“Buyuk Turon” mahallasi hududida tirbandliklarning oldini olish va maktab o‘quvchilari xavfsizligini ta’minlash maqsadida tuman hokimining qarori qabul qilindi.

Yangi tartibga ko‘ra, Niyozbek yo‘lining 43-maktab hududiga tutash qismida bir tomonlama harakat joriy etildi. Endilikda transport vositalari Chingiz Aytmatov ko‘chasidan Amir Temur shohko‘chasi tomon harakatlanadi.

Shuningdek, ushbu ko‘chaga chiqish tartibi ham o‘zgartirildi: Niyozbek yo‘liga Amir Temur shohko‘chasi tomonidan ushbu ko‘chaning uchinchi yo‘lagi orqali kirish mumkin (mo‘ljal – «PAUL»).

Haydovchilarga kiritilgan o‘zgarishlarni inobatga olish, yangi yo‘l belgilariga amal qilish va yangilangan harakat sxemasiga qat’iy rioya qilish tavsiya etilmoqda.

Source link

Yong‘in oqibatida yuk avtomobilining saloni to‘liq va tirkamasi qisman yonib zararlangan.

«Qamchiq» dovonida «Iveko» yuk avtomobilida yong‘in sodir bo‘ldi. Bu haqda FVV xabar berdi.

Ma’lumot berilishicha, 11 aprel kuni soat 15:43 da A-373 avtomobil yo‘lining «Qamchiq» dovonidan o‘tgan qismida «Toshkent-Vodiy» yo‘nalishida harakatlangan «Iveko» rusumli yuk avtomobilida yong‘in yuzaga kelganligi to‘g‘risida «Qamchiq» maxsus qutqaruv boshqarmasiga xabar kelib tushgan.

Qutqaruv bo‘linmasi soat 15:53 da yetib borgan va soat 16:00 da yong‘in o‘chirilgan.

Yong‘in oqibatida yuk avtomobilining saloni to‘liq va tirkamasi qisman yonib zararlangan.

Tezkor harakatlar natijasida yong‘indan yuk avtomobili tirkamasining taxminan 90 foiz qismi saqlab qolingan.

Hodisa oqibatida tan jarohati olganlar yo‘q.

Source link

O‘sha binoning peshtoqiga uchta shior bitib qo‘yilgandi: Urush – tinchlikdir. Erk – qullikdir. Bilimsizlik – kuchdir. Va bu shiorni hayotga tatbiq qilish uchun noyob vazirliklar o‘ylab topilgandi. Masalan, Haqiqat vazirligi axborotni, ta’limni, san’atni nazorat qilardi – tarixni boshqatdan yozardi. Yoki urush qilishni yaxshi ko‘radigan Tinchlik vazirligi, sevishga ruxsat bermaydigan Muhabbat vazirligi bor edi.

Yuqorida keltirilgan fikrlar Jorj Oruellning “1984” romanidan olindi. Bu noyob asar o‘zbek kitobxonlariga ilk bor jasoratli jurnalist, o‘z so‘ziga ega shoir va mohir tarjimon Karim Bahriyev tomonidan taqdim qilinganini e’tirof etmoq joiz, albatta.

Kecha sen ko‘rgan voqea bugun rasman rad etildi. Ekranlar boshqacha gapiryapti. Rasmiy bayonotlar butunlay teskarisini aytyapti. Atrofdagilar ham sekin-asta shu haqiqatga ko‘nika boshladi. Shunda senda ikki yo‘l qoladi: yo o‘z xotirangga ishonasan yoki ommaga qo‘shilib ketasan. “1984” sizni boshdan-oyoq ana shu tanlov o‘rtasida qoldiradi. Bu asar insonni o‘ldirmay turib ham uni butunlay yo‘q qilish mumkinligi haqida.

Okeaniya davlatida hamma narsa nazorat ostida edi. Sizni hamisha Katta Og‘a kuzatib turadi. Katta Og‘a – bu odam emas, bu nazar. Muttasil insonni bezovta qiluvchi nazar. Sen uxlayapsanmi – u bor. Sen sukutdamisan – u baribir senga qarayapti. Bu yerda nazorat kamera bilan emas, his bilan ishlaydi: sen kuzatilayotganingga ishonasan.

Uinston Smit shu tizimning ichida, Haqiqat vazirligida ishlaydi. Bu vazirlik aslida eng katta yolg‘onlarni ichida yashiradi. Bu yerda xabarlar o‘zgartiriladi, arxivlar qayta yoziladi, hamma narsa tahrir qilinadi. Bu vazirlik jismonan yo‘q qilingan insonlarni hujjatlardan ham o‘chirib yuboradi. Ular hech qachon bo‘lmaganday.

Uinston do‘stimiz buni tushunadi. Natijada isyon sifatida kundalik yoza boshlaydi. Bu jinoyat edi. Fikr jinoyati degan atama ham tez-tez qo‘llanardi. Sen aytmagan, hatto aytolmagan fikring uchun ham jazolanasan.

Juliya ismli bir qiz Uinstonning hayotiga kirib keladi. U ham tashqi tomondan itoatkor, lekin ichida isyonchi. Uning noroziligi ko‘proq ideologiyaga emas, tuyg‘ularning bo‘g‘ilishiga qaratilgandi. Bu jamiyatda sevish mumkin emasdi, his qilyapsanmi, jinoyatchisan!

Juliya xonim Uinston do‘stimizga juda qadim zamonlarda sevgi bo‘lganini, hatto hozir ham mavjudligini anglatadi. Demak, hali insoniyat butunlay yo‘q bo‘lib ketmagan, u tuyg‘ulari sabab mavjud, demoqchi bo‘ladi.

Ular bir-biriga qo‘l tekkizish orqali tizimni rad etadi. Chunki Okeaniyada hissiyot ham davlatning mulkiga aylangandi. Insonlar hissiyot bilan turmush qurishi jinoyat edi. Hatto turmush o‘rtog‘ingizni ham sevolmasdingiz.

Yigit va qizning ozodligi uzoqqa bormaydi. Uinston do‘sti Brayyenga tuyg‘ularini bildirib qo‘yadi. Biroq do‘stingning ham do‘sti bor. Jorj Oruell totalitar tizimda sen ishongan odam – sening eng xavfli dushmaning bo‘lishi mumkin, deydi.

Asarning shu nuqtasidan boshlab syujyet yo‘q. Faqat eksperiment va qiynoqlar, odamni qanday qilib yo‘q qilish usuliga guvoh bo‘lasiz. Insonni qanday qilib parchalab tashlash mumkin? Qanday qilib uni o‘z haqiqatidan voz kechtirish mumkin, degan savollarga javob izlaysiz.

Agar 2*2=4 desang, demak sen erkinsan. 2*2=5 ekaniga ishonmaguningcha bu muolajalar davom etaveradi. Shundagina sen ulardan biriga aylanasan.

Asarda bir dahshatli xona bor, u haqida gapirmoqchi emasmiz. Shunisi aniqki, o‘sha xona jismoniy qiynoqlardan ham qo‘rqinchli maskan.

Siz nima deb o‘ylaysiz, yigit qizni sotadimi? O‘zini yo‘q qilishlariga yo‘l qo‘yib beradimi? “Meni emas, uni qiynoqqa sol, u aybdor”, deydimi? Masalan, Uinstonday qat’iyatli inson bunday qilmasligi kerak harqalay.

Bir so‘z bilan aytganda, “1984” albatta, o‘qilishi shart bo‘lgan romanlardan biri hisoblanadi. Bu noyob asar sizning olamga qarashlaringiz, tafakkur va tasavvur dunyoingizni sezilarli darajada o‘zgartirishi aniq.

Source link

Andijon shahrida 1 mlrd so‘mlik tabiiy gazdan noqonuniy foydalanish holati fosh etildi. 

Bosh prokuratura huzuridagi Departamentning Andijon shahri bo‘limi tomonidan tergovga qadar tekshiruv o‘tkazilgan.Unda YaTT M.A. aholiga xizmat ko‘rsatish binosini tijorat maqsadida umumiy foydalanishdagi gaz tarmog‘iga o‘zboshimchalik bilan ulab, jami 1 mlrd so‘mlik tabiiy gazdan noqonuniy foydalanganligi aniqlangan.

Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.

Source link

Ba’zida hayot bizga eshiklarni ochadi, lekin ulardan kirish uchun “yo‘llanma” bermaydi. 2014 yilda beshta xorijiy universitetga o‘qishga kirib, ammo moddiy yetishmovchilik sababli uyda qolgan o‘zbek qizining hikoyasi bugun yuzlab yoshlar uchun dunyo darvozasini ochib beruvchi katta loyihaga aylandi. Tursunoy Usmonova bilan suhbatimiz — yiqilishlar, besh yillik sabr va ta’limdagi “tiklangan adolat” haqida.

2014 yil: Beshta “Ha” va bitta og‘riqli “Yo‘q”

Tasavvur qiling, siz 18 yoshdasiz. Orzularingiz osmon qadar baland. Tunlarni kitob ustida o‘tkazib, Germaniyaning eng nufuzli beshta universitetidan qabul xatlarini olasiz. Amerika va Koreyadan ham xushxabarlar keladi. Har bir elektron pochta xabari — bu yangi hayot, yangi dunyo va yorqin kelajak va’dasi. Ammo bu xursandchilik uzoqqa cho‘zilmaydi.

“O‘sha damlarni eslasam, ham quvonch, ham achchiq bir bo‘shliqni his qilaman,” — deydi Tursunoy Usmonova. “Pochtamga kelgan ’Congratulations!’ degan yozuvlarni ko‘rib sakrab quvonganman. Ammo keyin sukut boshlangan. Chunki o‘qishga kirish — bu yo‘lning bor-yo‘g‘i 10 foizi ekanini o‘shanda tushunganman. Qolgan 90 foizi — mablag‘, chipta, viza va turar joy edi.”

2014 yilda O‘zbekistonda bugungidek axborot oqimi yo‘q edi. Telegram kanallari, YouTube’dagi grantlar haqidagi gidlardan asar ham yo‘q edi. Tursunoy o‘zi kabi oddiy oiladan chiqqan qiz qanday qilib to‘liq grant yutishi mumkinligini o‘rgatadigan bitta ham mentor topa olmagan. Ota-onasining esa Germaniyadagi kontrakt va yashash xarajatlarini to‘lashga imkoni yo‘q edi.

Bu Tursunoy uchun shunchaki omadsizlik emas, balki shaxsiy fojia edi. U o‘z salohiyati borligini bilar, lekin tizimdagi tushunarsiz “moliyaviy devor” uning yo‘lini to‘sib qo‘ygandi. Natijada, Germaniya universitetlari o‘rniga u Toshkent axborot texnologiyalari universitetining (TATU) Axborot xavfsizligi yo‘nalishiga hujjat topshirishga majbur bo‘ladi.

Besh yillik sukunat va ichki kurash

TATUda o‘qish yomon emasdi, ammo “boy berilgan imkoniyat” hissi Tursunoyni tinch qo‘ymasdi. Ko‘pchilik bunday vaziyatda taqdirga tan berib, oqim bo‘ylab suzishni tanlaydi. Ammo Tursunoy boshqacha yo‘l tutdi. U besh yil davomida har kuni ingliz tilidagi xalqaro forumlarni titdi, xorijiy universitetlarning talablarini sinchiklab o‘rgandi.

“Besh yil davomida men rad javoblari bilan do‘stlashdim. Har bir ’reject’ (rad javobi) menga nimanidir o‘rgatdi. Birida motivatsion xatim bo‘sh edi, boshqasida moliyaviy hujjatlarni noto‘g‘ri to‘ldirgan edim. Lekin men taslim bo‘lmadim. Bilardimki, qayerdadir baribir o‘sha men qidirayotgan ’too‘liq imkoniyat’ bor,” — deya ta’kidlaydi qahramonimiz.

Bu yillar davomida u nafaqat o‘qidi, balki IT sohasini mukammal o‘rgandi. Python, C++, Java kabi dasturlash tillarini o‘zlashtirib, mantiqiy fikrlashini charxladi. Ammo uning asl missiyasi baribir ta’lim sohasida edi.

Global UGRAD: Muzlarning erishi

Nihoyat, 4-kursda, ko‘pchilik o‘qishni bitirib ishga kirish haqida o‘ylayotgan bir paytda, Tursunoyning pochtasiga uzoq kutilgan xabar keldi. U AQSh Davlat departamentining eng raqobatbardosh dasturlaridan biri — Global UGRAD finalchisiga aylangan edi.

Bu dastur shunchaki o‘qish emasdi. Bu — Amerika hukumati tomonidan to‘liq qoplanadigan (o‘qish, aviachipta, turar joy, oylik stipendiya) mo‘’jiza edi. Tursunoy Amerikaning Grand Valley State University universitetiga yo‘l oldi.

U yerda u birinchi marta haqiqiy akademik erkinlikni, talaba markaziy figura bo‘lgan ta’lim tizimini va eng muhimi — xalqaro standartlarni ko‘rdi. “Men Amerikada kutubxonaning ichida yashashga tayyor edim. U yerdagi har bir resurs, har bir laboratoriya menga 2014 yildagi yo‘qotilgan yillarimning o‘rnini to‘ldirish uchun berilgandek edi,” — deb xotirlaydi Tursunoy.

Adliya vazirligidan “American Councils”gacha

O‘zbekistonga qaytgach, Tursunoy o‘zgarib bo‘lgan edi. U endi shunchaki “aqlli talaba” emas, balki tizim qanday ishlashini tushunadigan mutaxassis edi. U o‘z faoliyatini Adliya vazirligi huzuridagi Davlat xizmatlari agentligida axborot texnologiyalari bo‘yicha bosh mutaxassis sifatida boshladi.

Ammo ichki intilish uni baribir ta’limga qaytardi. Tursunoyning American Councils for International Education (Xalqaro ta’lim bo‘yicha Amerika kengashlari) tashkilotidagi faoliyati uning hayotidagi eng muhim burilish nuqtalaridan biri bo‘ldi. Bu yerda u xalqaro dasturlarni (UniCEN, FEP, FLEX) muvofiqlashtirar ekan, tanlov jarayonlari qanday kechishini, xalqaro komissiya nomzoddan nimalarni kutishini ichkaridan o‘rgandi.

Ukasining orzusidan yuzlab talabalar muvaffaqiyatigacha

Tursunoyning loyihasi shunchaki oilaviy yordamdan boshlangan. 2020 yilda uning ukasi “Men ham Amerikada o‘qimoqchiman,” deganida, Tursunoy barcha tajribasini unga sarfladi. Natija esa hayratlanarli bo‘ldi: ukasi birdaniga 15 ta universitetdan grant yutdi.

Bu xabar tarqalgach, Tursunoyga murojaatlar ko‘payib ketdi. Shu tariqa “T&T Progress” loyihasi dunyoga keldi. Bugun ushbu loyiha yoshga dunyoning Top-300 taligiga kiruvchi universitetlarga kirishda yordam bermoqda. Natijalar esa zalvorli: Harvard (magistratura), Carnegie Mellon, University of Toronto, Boston University, NYU kabi nufuzli dargohlarga qabul va El-Yurt Umidi, Fulbright, Chevening grantlari sohiblari.

Gap shunchaki o‘qishga kirishda ham emas. Loyiha talabalari qo‘lga kiritayotgan “full ride” (to‘liq qoplovchi) grantlar miqdori 280,000 dan 320,000 AQSh dollarigacha yetmoqda. Bu mablag‘lar kontrakt, aviachipta, yashash va tibbiy sug‘urtani to‘liq o‘z ichiga oladi.

Tiklangan adolat falsafasi

“Agar bola iqtidorli bo‘lsa-yu, faqat puli yo‘qligi uchun o‘qiy olmasa — bu adolatsizlik. Orzular ota-onaning cho‘ntagiga qarab belgilanmasligi kerak,” — deydi Tursunoy qat’iyat bilan.

Tursunoyning o‘zi ham magistraturani “El-yurt umidi” granti asosisa Webster universitetida MBA yo‘nalishi bo‘yicha tamomlagan. U bugun nafaqat mentor, balki IT sohasini biladigan, uchta tilda erkin gaplashadigan va xalqaro biznes boshqaruvi bo‘yicha mutaxassis — zamonaviy o‘zbek ayoli timsolidir.

Kelajak rejalari:

Hozirda u EdTech sohasida yangi loyihalar ustida ishlamoqda. Maqsad — sun’iy intellekt yordamida har bir o‘quvchining qobiliyatini aniqlash va unga eng mos universitetlarni topib berish.

“2014 yilda men yig‘laganman. Bugun esa mening talabalarim quvonchidan yig‘layapti. Mana shu mening eng katta g‘alabam,” — deydi u samimiy tabassum bilan.

Xulosa o‘rnida:

Tursunoy Usmonovaning hikoyasi — bu o‘z vaqtida berilmagan imkoniyat uchun dunyodan o‘ch olish emas, balki o‘sha imkoniyatni boshqalarga yaratib berish orqali dunyoni yaxshilash hikoyasidir. Esda tuting: ba’zida eng katta yiqilish — eng baland parvoz uchun tramplin bo‘ladi.

Asror MIRZO tayyorladi

Source link