Toshkentda jamoat transporti infratuzilmasini tubdan isloh qilish va uni zamonaviy urbanistika tamoyillariga moslashtirish yo‘lida mutlaqo kutilmagan, ammo ilg‘or qadam tashlandi. Sergeli tumanida poytaxt tarixidagi ilk sport-bekat rasman ishga tushirildi.

Odatda jamoat transportini kutish qimmatli vaqtimizni havoga sovurishdek tuyuladi. Biroq, Toshkent shahar Yo‘l harakatini tashkil etish markazi bu tushunchani butkul o‘zgartirishga qaror qildi. Sergeli tumanidagi eng gavjum nuqtalardan biri — mashina bozori yaqin atrofida joylashgan avtobus bekati negizida poytaxtning ilk sport-bekati barpo etildi.

Uushbu hudud nafaqat mashina bozori sababli yuqori transport oqimiga ega, balki bu yerdan jami 12 ta yo‘nalishdagi avtobuslar o‘tadi. Bu esa har kuni minglab yo‘lovchilar ushbu nuqtada to‘xtashini anglatadi. Endilikda poytaxtliklar va shahar mehmonlari avtobus kelguncha bo‘lgan 10-15 daqiqalik vaqtni shunchaki telefonga tikilib emas, balki turniklarda tortilish va yengil jismoniy mashqlar bajarish orqali o‘tkazishlari mumkin.

Infratuzilmani sog‘lom turmush tarzi bilan integratsiya qilish bugungi kunda dunyoning eng rivojlangan megapolislari qo‘llayotgan zamonaviy usuldir. Toshkent shahri ushbu loyihani joriy etishda xalqaro tajribaga tayandi. Masalan, Janubiy Koreya va Singapur aholi salomatligini kundalik qatnov yo‘nalishlariga singdirish bo‘yicha yetakchilar hisoblanadi. U yerda bekatlar nafaqat sport elementlari, balki salomatlikni monitoring qiluvchi raqamli datchiklar bilan ham jihozlangan. Fransiya va Kolumbiyada esa vorkaut-bekatlar orqali kamharakatlilik muammosiga qarshi kurashishni shahar dizaynining bir qismiga aylantirishgan.

Mutaxassislarning ta’kidlashicha, bunday yondashuv shahar infratuzilmasi faqatgina bir nuqtadan ikkinchi nuqtaga harakatlanish vositasi emas, balki aholining qulayligi, salomatligi va kundalik farovonligiga xizmat qiladigan jonli ekotizim bo‘lishi kerakligini isbotlaydi.

Har qanday bekatni ham shunchaki sport maydonchasiga aylantirib bo‘lmaydi. Mutasaddilar vorkaut-bekatlarni joylashtirishda bir nechta qat’iy mezonlarga tayanmoqda.

Birinchidan, bu xavfsizlikdir, ya’ni sport elementlari qatnov qismidan xavfsiz masofada va piyodalar harakatiga xalaqit bermaydigan qilib o‘rnatilishi shart. Ikkinchidan, konstruksiya mustahkamligiga e’tibor beriladi: tashqi muhit noqulayliklariga, ya’ni yomg‘ir va issiqqa chidamli, buzib yuborishga qarshi materiallardan foydalaniladi. Uchinchidan, qurilmalarning xavfsizligi doimiy nazoratda va texnik xizmatda bo‘ladi.

So‘nggi vaqtlarda Toshkentda eski, noqonuniy do‘konli bekatlar buzilib, o‘rniga kutish maydoni keng, perronlari qulay va zamonaviy servislar bilan jihozlangan yangi namunaviy bekatlar qurilayotgani jamoatchilik diqqat markazida turibdi. Sergelidagi sport-bekat ham ushbu keng ko‘lamli modernizatsiyaning o‘ziga xos mantiqiy davomidir.hokimligi va soha mutasaddilari ushbu loyihani muvaffaqiyatli deb topsa, poytaxt bo‘ylab sport-bekatlar sonini keskin ko‘paytirishni rejalashtirmoqda. Eng muhimi keyingi manzil qayerda bo‘lishini aynan shahar aholisining o‘zi belgilaydi.

Agar siz ham uyingiz, o‘qish joyingiz yoki ishxonangiz yaqindagi serqatnov bekatda shunday vorkaut maydonchasi bo‘lishini istasangiz, o‘z takliflaringizni Yo‘l harakatini tashkil etish markazining rasmiy telegram-boti orqali yuborishingiz mumkin. Shahar rivoji uning aholisi faolligidan boshlanadi.

Source link

27 iyun kuni O‘zbekiston milliy jamoasi jahon chempionatida Kongo DR qarshi maydonga tushadi. Bu uchrashuv oldidan Atlanta shahridagi Mercedes-Benz stadionida jamoa bosh murabbiyi Fabio Kannavaro ishtirokida matbuot anjumani o‘tkazildi. Bu o‘yin osonroq kechadi, faqat g‘alabani o‘ylayapmiz, degan u Anjuman chog‘ida.

O‘zbekiston milliy jamoasining jahon chempionati doirasidagi navbatdagi o‘yini Kongo jamoasiga qarshi 27 iyun kuni Atlanta shahrida, Mercedes-Benz stadionida bo‘lib o‘tadi. Ushbu uchrashuv avvalida jamoa bosh murabbiyi 26 iyun kuni matbuot anjumani o‘tkazdi. Fabio Kannavaroga ko‘ra, jamoa ikki kuchli raqib bilan o‘ynab bo‘ldi, endi Kongoga qarshi o‘yin nisbatan oson kechishi kerak.

“Ertangi raqibimiz Kolumbiya, Portugaliya bilan solishtirganda ancha osonroq. Bizga teoritik jihatdan biroz yengilroq bo‘ladi, chunki tarkib bo‘yicha eng kuchli jamoadan o‘tib oldik. Ijobiy natija qayd etish haqida o‘ylayapmiz”, dedi jamoa bosh murabbiyi.

Uning qo‘shimcha qilishicha, jahon chempionati avvalidan o‘tkazilgan o‘rtoqlik o‘yinlarida o‘zini yaxshi namoyon etgani sabab Abduvohid Ne’matovni asosiy darvozabon etib tanlangan.

“Abduvohid Ne’matov men bu yerga kelganimdan beri terma jamoa safida hamda o‘rtoqlik o‘yinlarida o‘zini yaxshi namoyon etgan. Shu sababli men unga imkoniyat berishga harakat qildim. Sababi jahon chempionati shunday musobaqaki, barchaga tajriba ulashishi kerak. Agar Abduvohiddek yaxshi darvozabonim bo‘lsa, nega bunday foydalanmasligim kerak”, deydi Kannavaro.

Kolumbiya va Portugaliyaga qarshi uchrashuvda 22 ta o‘yinchi ishtirok etgan. Faqatgina 4 nafar futbolchi ushbu jahon chempionatida hali ishtirok etmadi, ya’ni debyut qilmadi. Bular uchinchi darvozabon Botirali Ergashev, Avazbek O‘lmasaliyev, Umar Eshmurodov hamda Jamshid Iskanderov.

22 ta o‘yinchini maydonga tushirish haqidagi savolgan Kannavaro javob berarkan, bu yaxshi va barcha futbolchilar terma jamoada o‘ynab ko‘rdi, Kolumbiya va Portugaliyaga qarshi, deya ta’kidlagan.

Matbuot anjumanidan so‘ng jamoa o‘yin oldidan mashg‘ulotlarga yo‘l olgan. Bosh murabbiy Kannavaro shuningdek, Osiyo deganda Iordaniya, Iroq, Yaponiya, Avstraliya kabi davlatlar jamoalari kabi o‘ynash darajasiga chiqish lozimligini eslatdi.

Source link

Ukrainalik bokschi kamarlarni bo‘shatayotganini, biroq sportdan ketmasligini ta’kidladi.

Foto: Francois Nel/Getty Images

Ukrainalik Oleksandr Usik superog‘ir vazn toifasida Xalqaro boks federatsiyasi (IBF), Butunjahon boks assotsiatsiyasi (WBA) va Butunjahon boks kengashi (WBC) versiyalari bo‘yicha chempionlik kamarlaridan voz kechdi. Bu haqda 39 yoshli bokschi ijtimoiy tarmoqda ma’lum qildi.

«Men hozir o‘zimga tegishli bo‘lgan barcha kamarlarni bo‘shatib bermoqchiman, toki navbatdagi nomzodlar ular uchun jang qilsin. Men kamarlarni bo‘shatyapman, lekin sportdan ketmayapman. Menda hali «so‘nggi raqs» bor», dedi Usik.

So‘nggi jangida Usik 23 may kuni Giza ehromlari majmuasi hududida niderlandiyalik kikbokschi Rik Verxuvenni 11-raundda texnik nokautga uchratib, WBC chempionlik unvonini himoya qilgan edi.

Usik professional ringdagi barcha 25 ta jangida g‘alaba qozongan. U ikki marta superog‘ir vaznda, yana bir marta birinchi og‘ir vaznda mutlaq jahon chempioni bo‘lgan.

Chempionlik kamarlaridan voz kechish professional sportda kundalik holat bo‘lmasa-da, normal hodisa sanaladi. Bu odatda sportchining faoliyatini yakunlaganini anglatmaydi. Ba’zida bokschilar boshqa vazn toifasiga o‘tish, serdaromadroq janglar o‘tkazish yoki yirik to‘qnashuvlarni tashkil etishga to‘sqinlik qiladigan majburiy himoya janglaridan qochish uchun o‘z ixtiyori bilan unvonlarini bo‘shatib beradi.

Source link

Ikki o‘yinda jamoalar durangga «kelishdi».

Jahon chempionatida uchinchi tur avjida – 25 va 26 iyun kunlari E, F va D guruhlarida so‘nggi uchrashuvlar o‘tkazildi. Kyurasao Kot-d’Ivuarga yutqazdi (0:2) va turnirni tark etdi, Germaniya sensatsion ravishda Ekvadorga yutqazib qo‘ydi (1:2), Niderlandiya Tunisni osonlik bilan mag‘lub etdi (3:1), Turkiya esa natijasi ahamiyatsiz o‘yinda mezbon AQShdan ustun keldi (3:2), Yaponiya esa Shvetsiya bilan (1:1), Paragvay Avstraliya bilan o‘yinda (0:0) o‘zlariga kerak bo‘lgan natijalarni qayd etishdi.

Dik Advokat JCh bilan xayrlashdi

Kyurasao – Kot-d`Ivuar 0:2

Gollar: Pepe, 7 (0:1). Pepe, 64 (0:2)

Kyurasao: Rom, Gari (Noslin, 77), Obispo, Fonvill (Kastaner, 77), Floranus, Brenet (Sambo, 90), Komenensiya (Antonisse, 61), L. Bakuna, J. Bakuna, Chong, Lokadia (Kuvas, 90)

Kot-d`Ivuar: Fofana, U. Diomande, Kossunu, Operi, Due, Kesse (Seri, 77), Sangare, Pepe (Vai, 67), Ya. Diomande (Diakite, 67), Diallo (Oulai, 46), Bonni (Ture, 67)

Ogohlantirishlar: J. Bakuna, 75. Kastaner, 83 – Pepe, 34

Oqshom yorqin syujyet bilan boshlandi – Kyurasao tarix yaratish uchun maydonga tushdi. Ikkinchi turdan keyin Dik Advokat jamoasi shunday holatda ediki, Kot-d’Ivuar bilan o‘yindagi g‘alaba orolliklar ikkinchi o‘rin bilan to‘g‘ridan to‘g‘ri pley-offga chiqishini ta’minlardi. Ikki hafta oldin ko‘pchilik nomini ham eshitmagan debyutant va JCh tarixidagi eng kichik jamoa uchun bu aql bovar qilmas ssenariy bo‘lgan bo‘lardi.

78 yoshli niderlandiyalik mutaxassis o‘yindan oldin yaxshi natijadan umid qilayotganini yashirmadi.

«O‘yin qiyin bo‘ladi. Bizda uchinchi o‘yin ham o‘zimizdan kuchli jamoaga qarshi bo‘ladi, ammo Kyurasao uchun ham bunday raqiblarga qarshi o‘yinlar kerak. Ekvador bilan o‘yinda nimaga qodirligimizni ko‘rsatdik. Nafaqat himoyalanamiz, balki hujum uchun to‘g‘ri paytlarni ham topa olamiz», – dedi Advokat.

Lekin mo‘jiza ro‘y bermadi. Ivuarliklar 7-daqiqadayoq orolliklar jamoasi himoyasidagi qo‘pol xatodan foydalanib, hisobni ochishdi, ikkinchi bo‘lim o‘rtalarida esa «Vilyarreal» hujumchisi Nikolya Pepe dublni rasmiylashtirdi.

KONKAKAF vakillari o‘yin oxirini to‘liq hujumda o‘tkazdi. Ammo bitta ham javob qaytara olishmadi va Ye guruhida so‘nggi o‘rinni egallagan holda turnirni tark etishdi.

Ekvadordan superkambek

Ekvador – Germaniya 2:1

Gollar: Sane, 2 (0:1). Angulo, 9 (1:1). Plata, 77 (2:1)

Ekvador: Galindes, Ordones, Pacho, Inkapiye (Estupinyan, 71), Franko (Presiado, 64), Vite, Moy. Kaysedo, Angulo (Torres, 85), Yyeboa (X. Kaysedo, 85), Valensiya (Rodriges, 64), Plata

Germaniya: Noyyer, Ryudiger, Ta, Raum, Kimmih (Tiau, 60), Pavlovich (Shtiller, 46), Nmecha (Bayyer, 64), Musiala, Virs (Gros, 73), Sane, Havers (Undav, 60)

Ogohlantirishlar: Inkapiye, 43. Franko, 50. Plata, 89 – Pavlovich, 44

Bir tomondan, bu o‘yinda sensatsiya ro‘y berishini taxmin qilish mumkin edi. O‘tgan turda Kyurasao bilan o‘yinda ochko yo‘qotgan (0:0) ekvadorliklardan so‘nggi turda raqib kim bo‘lishidan qat’i nazar uch ochko uchun o‘ynash talab etilardi, raqib esa allaqachon guruh g‘olibligi masalasini hal qilib, pley-offga tayyorgarlik ko‘rayotgan jamoa edi. Boshqa tomondan, o‘yinning ikkinchi daqiqasidayoq Leroy Sane hisobni ochdi va Janubiy Amerika vakillariga qattiq zarba berdi.

Ammo ekvadorliklar taslim bo‘lishmadi va tezda hisobni tezlashtirishdi. Ikkinchi bo‘limda esa o‘yin bosh hakami Tori Penso videoassistentlar yordamida janubiy amerikaliklar darvozasiga qo‘yilgan penaltini bekor qildi.

O‘yin oxirlarida esa fantastika ro‘y berdi: Ekvador hujumchisi Gonsalo Plata burchak zarbasi ijro etilishi vaqtida nemislar jarima maydonida yuzaga kelgan talato‘pdan foydalanib, g‘alaba golini urdi (2:1). Bu epizodda o‘zining so‘nggi xalqaro turnirini o‘tkazayotgan Maneul Noyyer to‘pga chiqishda xatoga yo‘l qo‘ydi, Sebastyan Bekkasese shogirdlari esa iroda ko‘rsatib, uchinchi o‘rin bilan pley-offga yo‘l oldi.

Niderlandiyaning ishonchli g‘alabasi

Tunis – Niderlandiya 1:3

Gollar: Shiri, 3 – avtogol (0:1). Brobbi, 7 (0:2). Masturi, 54 (1:2). van Hekke, 62 (1:3)

Tunis: Damen, Talbi, Shiri, Ben Amida (Ashuri, 68), Abdi, Valeri, Garbi (Shauat, 75), Xedira (Mahmud, 67), Mejbri, Slimane (Ben Uanes, 68), Masturi (Tunekti, 90)

Niderlandiya: Verbryuggen, van Deyk, van Hekke, Ake, Dyumfris, de Yong (Kopmeyners, 72), Reynders (Klyuyvert, 72), Gravenberh, Gakpo (Lang, 84), Malen (Sammervill, 72), Brobbi (Depay, 78)

Tunis birinchi turdan keyinoq bosh murabbiyi Sabri Lyamushini iste’foga chiqarib, jahon chempionati tarixiga kirgandi. Afrikaliklar jamoasi o‘tkazilgan gollar soni bo‘yicha yana bir antirekord o‘rnatishga qarab ketayotgandi, chunki jamoa yettinchi daqiqaga kelib ikki gol o‘tkazib yubordi.

Avvaliga Tunis yarimhimoyachisi Ele Shiri Denzel Dumfrisning qanotdan uzatmasidan keyin o‘z jamoasi darvozasini ishg‘ol etib qo‘ydi. Keyin niderlandlar forvardi Brayan Brobbi jarima zarbasini ajoyib ijro etdi va turnirdagi uchinchi golini nishonladi.

Lekin o‘yin gollar shousiga aylanib ketmadi. Ikkinchi bo‘lim boshida jamoalar bittadan gol almashishdi – Hazim Masturi va Yan Pol van Hekke o‘z nomlarini tabloga yozdirib qo‘yishdi.

Ronald Kuman shogirdlari 3:1 hisobidagi g‘alabani saqlab qolishdi va guruhda birinchi o‘rinni egallashdi. Uchta o‘yinda ham yutqazgan Tunis esa uyga qaytadi.

«O‘zaro manfaatli hamkorlik»

Yaponiya – Shvetsiya 1:1

Gollar: Maeda, 56 (1:0). Elanga, 62 (1:1)

Yaponiya: Sudzuki, Itakura (Taniguti, 39), X. Ito, Seko (Nagatomo, 75), Tanaka, Kamada, Nakamura (Vatanabe, 75), Sugavara, Doan (D. Ito, 67), Maeda, Ueda (Ogava, 66)

Shvetsiya: Videll Setterstrem, Hin (Bergvall, 37), Gudmundsson (Nyugren, 88), Lagerbilke, Lindelyof (Starfelt, 87), Ayyari, Stroud (Svensson, 75), Bernhardsson (Sema, 75), Isak, Elanga, Yokeresh

Ogohlantirishlar: Taniguti, 77 – Hin, 32. Yokeresh, 85

Bu uchrashuvda ikki jamoani ham durang qoniqtirardi. Bunday holatda ikki jamoada ham ochkolar soni 4 tadan bo‘lar, yaponlar ikkinchi o‘rinni egallar, shvedlar esa to‘plar nisbatiga ko‘ra uchinchi o‘rinda qolar, ammo uchinchi o‘rin vakillari orasida kuchli sakkizlikka kirardi.

Amalda ham jamoalar hisobga qarab o‘ynashdi va birinchi bo‘limda deyarli golli vaziyatlar yuzaga kelmadi. Ikkinchi bo‘lim esa biroz qiziqarliroq kechdi: avvaliga Ritsu Doan jarima maydoniga yaqinlashib borgan Daydzen Maedani ajoyib pas bilan ta’minladi, u esa o‘z imkoniyatini qo‘ldan boy bermadi. Lekin ko‘p o‘tmay shvetsiyaliklar Entoni Elanganing burchakka yo‘naltirilgan kuchli zarbasi bilan muvozanatni tiklashdi (1:1).

Guruhda yakuniy vaziyat kutilganidek ko‘rinish oldi. Yaponiya ikkinchi, Shvetsiya uchinchi o‘rin bilan pley-offga chiqdi. Buni «o‘zaro manfaatli hamkorlik» desa bo‘ladi.

Ikkinchi qulay durang

Paragvay – Avstraliya 0:0

Paragvay: Hil, Velaskes, Alderete (Kanale, 84), G. Gomes, Maydana (Maurisiu, 46), Kaseres, Kubas, Galarsa (Alonso, 90+2), D. Gomes (Bobadilya, 90+2), Ensiso, Avalos (Arse, 67)

Avstraliya: Bich, Suttar, Herrington, Chirkati, O`Nill, Irvayn (Okon-Engstler, 84), Behich, Bos, Metkalf, Volpato (Xrustich, 58), Irankunda (Yengi, 84)

Ogohlantirishlar: D. Gomes, 77 – Irvayn, 46

Bu ikki jamoani ham durang hisob qoniqtiradigan yana bir o‘yin edi. Bunday hisob nisbatan avstraliyaliklarga yaxshiroq edi, bu holda yashil qit’a vakillari ikkinchi o‘rindan tushib ketmasdi. Paragvayliklarda esa ikki o‘yindan keyin to‘plar nisbati yomonroq edi (-2), ammo to‘rt ochko bilan jamoa uchinchi o‘rin egalari orasida kuchli sakkizlikdan o‘rin olishi tayin edi.

Jamoalar o‘yin davomida uzoq masofalardan ko‘plab zarbalar berishdi (19 urinish), ammo deyarli yaqqol golli vaziyat kuzatilmadi. Yakunda golsiz durang saqlanib qoldi, lekin buning uchun hech kim bu jamoalarni ayblay olmaydi.

Turkiya kuchli o‘ynadi, ammo endi kech

Turkiya – AQSh 3:2

Gollar: Trasti, 3 (0:1). Arda Guler, 10 (1:1). Barish Yilmaz, 31 (2:1). Berhalter, 49 (2:2). Xon Oyxon, 90+8 (3:2)

Turkiya: Ugurjan Chaqir, O‘zan Qoboq, Abdulkarim Bardakchi, Zeki Chelik (Chag‘lar Suyunchi, 84), O‘zjan, O‘rxun Ko‘kchi (Xon Oyxon, 88), Eren Elmali, O‘g‘uz Oydin (Mert Muldur, 90+1), Arda Guler, Kenan Yildiz (Uzun, 84), Barish Yilmaz (Irfon Qahvachi, 90+1)

AQSh: Terner, Robinson, Makkenzi, Trasti, Skalli (Frimen, 77), Berhalter, Reyna (Dest, 76), Makkenni (Tillman, 86), Vea (Pulishich, 58), Aaronson (Zendehas, 77), Pepi

Ogohlantirishlar: Berhalter, 19

Turklar 2002 yildan buyon ilk bor jahon chempionatiga tashrif buyurgan va ulardan ko‘pchilik yaxshiroq natija kutayotgandi, ammo Vinchenso Montella shogirdlari ikkinchi turdan keyinoq guruhdan chiqa olmasligi ma’lum bo‘lib ulgurgandi: ushbu jamoa ikki o‘yinda 62 bor zarba yo‘lladi, ammo birorta gol urolmay, ikki o‘yinda ham yutqazdi. Natijada turklar so‘nggi o‘yinda faqat muxlislar uchun o‘ynashi kerak bo‘lib qoldi.

Mezbonlarga qarshi o‘yin ham Turkiya uchun juda yomon boshlandi: amerikaliklar jamoasi himoyachisi Oston Trasti uchinchi daqiqadayoq hisobni ochdi. Lekin ko‘p o‘tmay Arda Guler turklarning turnirdagi ilk golini urdi. Bo‘lim oxirida esa Burak Yilmaz jamoani oldinga olib chiqdi.

Ikkinchi bo‘lim boshida Sebastian Berhalter hisobni tenglashtirdi. Shundan keyin o‘yin durangga qarab keta boshladi, ammo qo‘shimcha daqiqalarda uyushtirilgan so‘nggi hujumni Xon Oyxon gol bilan yakunladi va turklarning turnirdagi ilk va oxirgi g‘alabasini ta’minladi – 3:2.

Mourinio o‘zinikilarga qarshi

«Real» bosh murabbiyi Joze Mourinio jahon chempionatida o‘z futbolchilariga qarshi muxlislik qiladi. 63 yoshli mutaxassisda buning uchun tushunarli sabab bor.

«JChdan men nima kutyapmanmi? To‘g‘risini aytaman: Madrid futbolchilari yutqazsin va ta’tilga chiqishsin. Chunki men yigitlar mavsumoldi yig‘iniga ertaroq kelishini istayman», – dedi u Beast Mode On podkastida.

Joze iyun oyi boshida «Real» bosh murabbiyi etib tayinlandi va hozircha madridliklar klubining mundialga yo‘l olgan futbolchilari bilan hali ko‘rishmadi. Bunday futbolchilar jamoada kam emas: Kilian Mbappe va Orelen Tchuameni (Fransiya), Jud Bellinhem (Angliya), Vinisius Junior (Braziliya), Federiko Valverde (Urugvay), Antonio Ryudiger (Germaniya), Tibo Kurtua (Belgiya), Braim Dias (Marokash), shuningdek, yozgi transferlar doirasida safga qo‘shib olingan Mark Kukurelya (Ispaniya), Bernardu Silva (Portugaliya), Ibraima Konate (Fransiya) va Denzel Dyumfris (Niderlandiya).

Darvoqe, Mourinioning istagi asta-sekinlik bilan ro‘yobga chiqmoqda – Arda Guler Turkiya milliy jamoasi bilan allaqachon turnirni tark etdi.

Turning asosiy o‘yini xavf ostida

Nafaqat ushbu turdagi, balki guruh bosqichidagi eng yorqin afisha –  Norvegiya va Fransiya o‘rtasidagi bahsdir. Erling Holand va Kilian Mbappe boshchiligidagi ushbu jamoalar allaqachon pley-off masalasini hal qilishdi va endi I kvartetida birinchi o‘rin uchun bahslashadi. Ammo bu bellashuv o‘z vaqtida o‘tkazilmasligi mumkin – meteorologlar 26 iyun kuni Foksboroda o‘ta noqulay ob-havo kuzatilishini prognoz qilmoqda. Bunday holatda qat’iy protokol amal qiladi, unga ko‘ra, o‘yin noma’lum vaqtga ko‘chiriladi.

Fransuzlar uchun bu turnirdagi ikkinchi shunday hodisaga aylanishi mumkin – o‘tgan turda Dide Desham shogirdlarining Iroq bilan o‘yinida ikki soatdan ortiq vaqt davomida tanaffus yuzaga kelgandi. Lekin bu «Uchranglilar»ga 3:0 hisobida g‘alaba qozonishga to‘sqinlik qilmagandi.

2026 yilgi jahon chempionatida bir necha bor bu kabi holatlar kuzatildi: turnirning ilk kunlarida Angliya milliy jamoasi bazasi joylashgan hududda kuchli tornado ro‘y bergan, kuchli chaqmoq chaqishi portugallar va ispanlar ochiq havodagi mashg‘ulotlarni bekor qilishiga olib kelgandi. Ammo faqat fransuzlar to‘g‘ridan to‘g‘ri o‘yin vaqtida jabrlanuvchiga aylangan va bu ular bilan ikkinchi bor ro‘y berishi kutilmoqda.

Navbatdagi o‘yinlar

Uchinchi tur davom etmoqda. 26 iyun kuni kechqurun va 27 iyunga o‘tar kechasi quyidagi uchrashuvlar bo‘lib o‘tadi:

00.00. I guruhi. Norvegiya — Fransiya

00.00. I guruhi. Senegal — Iroq

05.00. H guruhi. Urugvay — Ispaniya

05.00. H guruhi. Kabo-Verde — Saudiya Arabistoni

08.00. G guruhi. Yangi Zelandiya — Belgiya

08.00. G guruhi. Misr — Eron

Source link

Lamin Yamal… Bu nomni eshitmagan futbol ishqibozi bo‘lmasa kerak. O‘zining jozibali o‘yinlari bilan 16 yoshidayoq muxlislar e’tiboriga tushgan va ko‘plab rekordlarni yangilagan bu yigit futbol olamiga o‘zgacha zavq bilan kirib keldi. Hozirgi kunda Ispaniya terma jamoasi va “Barselona”ning almashtirib bo‘lmas o‘yinchisiga aylangan Laminning ham tarixi bor.

So‘nggi yigirma yilda jahonning eng kuchli futbolchilari bo‘lib turgan Messi va Ronaldu davri o‘z nihoyasiga yetmoqda. Biri 41 yoshda, boshqasi 24 iyunda 39 ga to‘lgan bu yulduzlarning o‘rnini yana kimlar bosa olishi aniqmas.

Yosh futbolchilar orasidan yangi Messi yoki yangi Ronaldu chiqish-chiqmasligi mavhum bo‘lib turgan paytda futbol olamiga 18 yoshga to‘lmasdan ajoyib natijalar ko‘rsatgan va bir qancha rekordlar o‘rnatgan Lamin Yamal ism sharifli o‘smir kirib keldi.

U 16 yoshidayoq Ispaniya birinchiligi – La liga chempioni, 17 yoshgacha bo‘lganlar o‘rtasida Yevropa chempioni, La ligada mavsumning eng yaxshi yosh o‘yinchisi bo‘ladi. Shuningdek, Ispaniyaning asosiy terma jamoasiga chaqiriladi.

Lamin 17 yoshida Ispaniya terma jamoasi tarkibida o‘ynab, Yevropa chempioni bo‘ladi. Yevropaning eng iqtidorli futbolchisiga beriladigan Golden Boy mukofotini qo‘lga kiritadi.

Ko‘plab boshqa futbolchilar qatori Lamin Yamalning ham qiziqarli hayot yo‘li bor. Jumladan, uning Lamin Yamal deb nomlanishining ham o‘z tarixi bor. Hozir shular haqida gaplashamiz.

Do‘stlar sharafiga nomlangan bola

To‘liq ism-sharifi Lamin Yamal Nasroviy Ebana bo‘lgan futbolchi 2007 yil 13 iyulda Ispaniyaning muxtoriyat huquqiga ega bo‘lgan Kataloniya provinsiyasida afrikalik muhojirlar oilasida tug‘iladi.

Lamin Yamalning otasi kelib chiqishi marokashlik bo‘lgan Munir Nasroviy, onasi Ekvotorial gvineyalik Sheyla Ebana ism-sharifli ayol bo‘lgan.

Munir va Sheyla Ispaniyada tanishib oila quradi. O‘sha paytlarda oilaning moliyaviy vaziyati birmuncha og‘ir edi. Shu sababli ularga do‘stlari yordam berib turadi. Ayniqsa Munirning Lamin va Yamal ismli do‘stlari ularning oilasiga ko‘p yaxshiliklar qiladi.

Shu sababli xotini homilador bo‘lgan paytda Munir do‘stlariga agar o‘g‘il farzand ko‘rsa ularning nomini qo‘yishini aytadi. Ko‘p o‘tmay Munir va Sheyla o‘g‘il farzand ko‘rishadi. Ota do‘stlariga bergan va’dasini bajaradi va bolaga Lamin Yamal Nasroviy Ebana deb ism-sharif beradi.

Lamin Yamal uch yoshga to‘lganida oila ajrashib ketadi. O‘shanda u navbati bilan har ikki tomonda – otasi va onasi bilan birga yashaydi. Otasining oldiga kelganida uning tarbiyasi bilan asosan Munirning onasi shug‘ullanadi.

Messi cho‘miltirgan chaqaloq

Bugun ijtimoiy tarmoqlarda futbol dahosi Messining qora tanli chaqaloqni ko‘tarib turgani, uni cho‘miltirayotgani aks etgan suratlar birmuncha mashhur.

Ma’lum bo‘lishicha Messi cho‘miltirayotgan chaqaloq aynan Lamin Yamal. Xo‘sh, futbol yulduzi nega Laminni cho‘miltiradi, uni ko‘tarib suratga tushadi?

Gap shundaki, 2007 yil dekabrda, hali Lamin Yamal olti oylik chaqaloq bo‘lgan kezda “Barselona”ning o‘sha vaqtdagi titul homiylari Diario Sport va YUNISEF maxsus fotosessiya uyushtirishga qaror qiladi

O‘shanda bolalar himoyasi bilan shug‘ullanuvchi YUNISEF fotosessiyada ishtirok etadigan chaqaloqlarni Kataloniyaning nisbatan qashshoq odamlar yashovchi hududlaridan qidirib topadi.

Bolalar orasida qahramonimiz Lamin Yamal ham bor edi. Bolaning ota-onasi fotosessiyada ishtirok etishga nomzodlar tanlovida g‘olib chiqqandi.

Fotosessiyada Barselona yulduzlari va tanlab olingan bolalar ishtirok etadi. Tasodifni qarangki, Messining chekiga aynan Lamin Yamal tushadi va futbolchi u bilan turli ko‘rinishlarda suratga tushadi.

Qisqasi, Messi mitti Laminni bolalar vannasida cho‘miltirayotgani aks etgan surat shunday yaraladi. O‘shanda bu katta futbolga “Barselona” orqali kirib kelgan eng iste’dodli ikki o‘yinchining ajabtovur uchrashuvi bo‘ladi.

Lamin Yamal “La-Masiya”da

Lamin Yamal futbol o‘ynashni to‘rt yoshida mahalliy “La Torreta” havaskor jamoasida boshlaydi. U olti yoshga to‘lganda “Barselona” skautlari e’tiboriga tushadi. Laminni “Barselona” futbol akademiyasi – “La-Masiya”ga mashg‘ulot o‘tkazishga chaqirishadi.

Bola dastlabki mashg‘ulotdanoq “La-Masiya” murabbiylarida ijobiy taassurot qoldiradi va ko‘p o‘tmay Lamin bilan dastlabki shartnoma imzolanadi. U “La-Masiya”da shug‘ullana boshlaydi.

O‘sha paytlarda Laminning kumirlari Ronaldino, Messi va Neymar bo‘lgan. Shu tariqa kechagina qashshoq kvartalda to‘p tepib yurgan bola 7 yoshga to‘lmasdan dunyodagi eng zo‘r futbol akademiyasiga qabul qilinadi.

Lamin “La-Masiya”dagi mashg‘ulotlarda qatnashish bilan birga bolalar o‘rtasidagi turli musobaqalarda qatnashadi va ko‘plab gollar urib, o‘zining qanchalik mahoratli ekanini isbotlaydi.

Lamin “Barselona” va Ispaniya terma jamoasida

Ko‘p o‘tmay Lamin Yamal akademiyadagi eng iqtidorli futbolchiga aylanadi. Bu “Barselona” murabbiylarini befarq qoldirmaydi va 2022 yilga kelib 15 yoshli Lamin asosiy jamoa bilan mashg‘ulotlarda qatnashish imkoniyatiga ega bo‘ladi.

O‘sha paytda “Barselona”ni boshqarib turgan Xavi Laminni ilk bor 2023 yil bahorda La Liga doirasidagi o‘yinlarning birida maydonga tushiradi.

Bu 29 aprel kuni “Real Betis” jamoasiga qarshi o‘yinda sodir bo‘ladi. O‘sha kuni Lamin 15 yosh 291 kunlik edi.

15 va 16 yoshlarida Ispaniyaning turli yoshdagi terma jamoalarida o‘ynagan Lamin Yamal 2023 yil 1 sentabr kuni asosiy terma jamoaga chaqiruv oladi.

So‘ng 8 sentabr kuni murabbiy Luis de la Fuente uni Yevro-2024 musobaqasi doirasida o‘tkazilgan Gurjistonga qarshi o‘yinda maydonga tushiradi. O‘shanda Lamin Yamal 16 yosh 50 kunlik edi. Mahoratli o‘yinchi bu o‘yinda gol urishga muvaffaq bo‘ladi.

Shundan so‘ng Lamin Yamal Ispaniya terma jamoasining asosiy o‘yinchisiga aylanadi va yana gollar urishda davom etadi. Shuningdek, u “Barselona”da ham almashtirib bo‘lmas futbolchiga aylanadi.

Lamin Yamal hozirgacha “Barselona” tarkibida barcha rasmiy musobaqalarda 151 ta o‘yin o‘tkazgan va 48 gol urib, 45 ta golli uzatma bergan. Ispaniya terma jamoasi safida esa 26 ta rasmiy o‘yinda qatnashgan va 6 ta gol urib, 12 ta golli uzatma bergan. Hali 19 ga ham to‘lmagan futbolchi uchun yuqoridagi ko‘rsatkichlar juda zo‘r natija hisoblanadi.

Lamin Yamalning rekordlari

Lamin Yamalning rekordlari bir necha yo‘nalishda amalga oshirilgan. Jumladan, U “Barselona”da, terma jamoada va Yevropa Chempionlar Ligasida alohida rekordlar qayd etgan.

“Barselona”dagi rekordlar

·       “Barselona”da o‘ynagan eng yosh o‘yinchi – 15 yosh 291 kunligida (2003 yil aprel, “Real Betis”ga qarshi o‘yin).

·       XXI asrda La Ligada boshlang‘ich tarkibda maydonga tushgan eng yosh o‘yinchi – 16 yosh 38 kunligida (“Kadis” jamoasiga qarshi bahs).

·       La Ligada golli uzatma bergan eng yosh futbolchi – 16 yosh 45 kunligida (“Vilyareal”ga qarshi o‘yinda).

·       La Ligada gol urgan eng yosh o‘yinchi – 16 yosh 87 kunligida (“Granada” jamoasiga qarshi bahsda).

·       “El-klassiko” tarixidagi eng yosh futbolchi – 16 yosh 107 kunligida.

·       Ispaniya superkubogida o‘ynagan eng yosh futbolchi – 16 yosh 182 kunligida.

·       La Ligada dubl qayd etgan eng yosh futbolchi – 16 yosh 213 kunligida (bu hodisa 2024 yil yanvarda “Atletik” jamoasiga qarshi o‘yinda sodir bo‘ladi).

·       “Barselona” tarixida rasmiy o‘yinlarda 50, 100 va 150 ta o‘yin o‘tkazgan eng yosh futbolchi.

·       “Barselona”da La Liga doirasida 100 ta o‘yin o‘tkazgan eng yosh o‘yinchi.

·       “Barselona” bilan 100 ta g‘alabaga erishgan eng yosh o‘yinchi.

·       “Barselona” tarkibida 40 ta gol urishga muvaffaq bo‘lgan eng yosh o‘yinchi.

Chempionlar Ligasidagi rekordlari

·       Chempionlar Ligasida debyut qilgan “Barselona”ning eng yosh o‘yinchisi – 16 yosh 68 kunligida (Belgiyaning “Antverpen” jamoasiga qarshi).

·       Chempionlar Ligasida boshlang‘ich tarkibda maydonga tushgan eng yosh o‘yinchi – 16 yosh 83 kunligida (2023 yil 4 oktyabr, Portuga qarshi o‘yinda).

·       Chempionlar Ligasida golli uzatma bergan eng yosh futbolchi – 16 yosh 153 kunligida.

·       Chempionlar Ligasida bir o‘yinda gol urgan va golli uzatma bergan eng yosh o‘yinchi – 16 yosh 287 kunligida (2024 yil 16 aprel, PSJga qarshi o‘yinda).

·       Chempionlar Ligasida dastlabki 10, 20 va 30 ta o‘yin o‘tkazgan eng yosh futbolchi.

Ispaniya terma jamoasidagi rekordlari

·       Ispaniya terma jamoasida debyut qilgan eng yosh futbolchi – 16 yosh 57 kunligida (2023 yil sentabr, Gurjistonga qarshi o‘yinda).

·       Ispaniya terma jamoasida gol urgan eng yosh futbolchi – 16 yosh 57 kunligida (2023 yil sentabr, Gurjistonga qarshi o‘yinda).

·       Ispaniya termasi safida Yevropa chempionatida to‘p surgan eng yosh o‘yinchi – 16 yosh 339 kunligida.

·       Ispaniya termasi safida Yevropa chempionatida golli uzatma bergan eng yosh o‘yinchi – 16 yosh 339 kunligida.

·       Yevropa chempionati pley-off bosqichida o‘ynagan eng yosh o‘yinchi – 16 yosh 354 kunligida.

·       Yevropa chempionatida gol urgan eng yosh o‘yinchi – 16 yosh 362 kunligida.

·       Yevropa chempionati finalida to‘p surgan eng yosh o‘yinchi – 17 yosh 1 kunligida.

·       Xalqaro darajadagi musobaqa (Yevropa chempionati)da g‘olib bo‘lgan eng yosh o‘yinchi – 17 yosh 1 kunligida.

Lamin Yamal qo‘lga kiritgan sovrinlar va mukofotlar

Lamin Yamal 18 yoshda bo‘lishiga qaramasdan juda ko‘plab shaxsiy va jamoaviy sovrinlar hamda mukofotlarni qo‘lga kiritgan. Jumladan u:

·       3 karra La Liga chempioni;

·       1 marta Ispaniya kubogi sohibi;

·       2 marta Ispaniya Superkubogi egasi;

·       1 marta Yevropa chempioni;

·       17 yoshlilar o‘rtasidagi Yevropa chempionati to‘purari;

·       Yevro-2024da eng yaxshi yosh o‘yinchi;

·       Yevro-2024 da eng chiroyli gol sohibi;

·       La Liga 2025/2026 mavsumda eng yaxshi o‘yinchi;

·       2024 yilda Yevropaning eng yaxshi yosh o‘yinchisiga beriladigan Golden Boy mukofoti sohibi;

·       Xalqaro futbol tarixi va statistikasi federatsiyasi – IFFHS versiyasiga ko‘ra 2024 yilda jahonning eng yaxshi yosh o‘yinchisi;

·       “Frans futbol” nashriga ko‘ra 2024 va 2025 yillarda jahonning eng yaxshi yosh o‘yinchisi;

·       2025 yilda Maradona mukofoti va boshqa yana ko‘plab sovrinlar sohibi bo‘lgan.

Lamin Yamal ikkinchi Messi bo‘la oladimi?

Bugun ayrimlar Yamal shu tarzda to‘p surishda davom etsa, juda ko‘p ko‘rsatkichlar bo‘yicha Messidan ham o‘tib ketishi mumkinligini aytmoqda. Boshqalar esa u Messini ortda qoldirishi uchun argentinalikka o‘xshab 20 yil davomida barqaror to‘p surishi lozimligini ta’kidlaydi.

Albatta, Messiga o‘xshab 20 yil davomida barqaror o‘ynash, o‘ynaganda ham gollarni va golli uzatmalarni qalashtirib tashlash osonmas.

Shu paytgacha ko‘rsatgan o‘yiniga qarab aytadigan bo‘lsak va yosh ko‘rsatkichiga qarab baholansa, hozircha Lamin Yamal Messidan oldinda ketmoqda.

Biroq Messi ulg‘aygan sari kuchayib borgan, o‘yin uslubini o‘zgartirgan va takomillashtirgan. 16 yoshidayoq o‘ta iste’dodli bo‘lgan Yamal argentinalik dahoga o‘xshab kelajakda o‘yinini kuchaytirib, takomillashtira oladimi-yo‘qmi hozircha bu mavhum masala.

Laminga kelajakda buyuk futbolchi bo‘lishiga to‘siq bo‘lishi mumkin bo‘lgan bir qancha omillar bor. Ular orasida futbolchilarning doimiy hamrohi sanaladigan jarohatlar birinchi o‘rinda turadi.

Uzoqqa bormaylik, bir necha yil oldin “Barselona”ning va jahon futbolining bo‘lajak yulduzi deb ta’riflangan Ansu Fatining faoliyati aynan jarohatlar tufayli barbod bo‘ldi.

Shu jihatdan olganda Lamin Yamal kelajakda o‘yinlar davomida keskin to‘qnashuvlardan qochib, o‘zini ehtiyot qilishi va jiddiy jarohatlar olmasligi lozim bo‘ladi.

Futbolchining intizomni bir chetga surib, nosog‘lom hayot kechirishi uning buyuk kelajagiga soya solishi mumkin. Ochiqroq aytganda tungi klublarda sang‘ib yurish, ayollarga o‘chlik va hokazolar futbolchining o‘sishiga xalaqit beradigan ishlar hisoblanadi.

Shu o‘rinda bir misol, 2008 yilda Barselona murabbiyi Xosep Gvardiola Ronaldinoni jamoadan ketkazadi. Bunga asosiy sabab Ronaldino tungi klublarning doimiy mijozi edi. Lekin uning ketkazilishiga birgina bu sabab bo‘lmagan.

O‘shanda Ronaldino tungi klublarga yosh Messini ham torta boshlaydi va bu ish Gvardiolaning toqatini toq qiladi. U agar Ronaldinoni jamoadan ketkazmasa ikki futbolchining o‘yinida pasayish bo‘lishi va Messining iste’dodi yo‘q bo‘lib ketishi mumkinligini anglab yetadi. Shu tufayli qat’iy chora ko‘radi.

Shuningdek, Lamin Yamal kamolotga yetishi uchun qiziqqon xarakterini biroz o‘zgartirishi va Messiga o‘xshab og‘ir va bosiq bo‘lishi shart.

Bundan tashqari Lamin Yamalning buyuk futbolchi bo‘lishi uchun murabbiy ham muhim rol o‘ynaydi.  Futbolchi bu masalada nolimasa ham bo‘ladi. Hatto murabbiylikda tajribasi biroz kam bo‘lgan Xavi ham unga ishongan va 15 yoshidayoq asosiy jamoaga jalb etgandi.

“Barselona”ning hozirgi murabbiyi Hans Flik va Ispaniya termasini boshqarib turgan Luis de la Fuente unga muntazam ishonch bildirib kelmoqda.

Yamal ikkinchi Messi bo‘la oladimi-yo‘qmi, buni vaqt ko‘rsatadi. Biz esa otasining do‘stlari sharafiga nomlangan yosh yulduz o‘yinlaridan bahra olishda davom etamiz.

P.S. Maqola yozilayotgan kezda Yamal jahon chempionati guruh bosqichi doirasida Ispaniya-Saudiya o‘yinida maydonga tushib 10-daqiqada gol urdi. Natijada u Peledan so‘ng 19 yoshga to‘lmasdan jahon chempionatida gol urgan ikkinchi futbolchiga aylandi.

Source link