Uchtepa tumanida fuqarolarning 574,6 mln so‘mini firibgarlik yo‘li bilan qo‘lga kiritgan shaxslar fosh etildi. 

Bosh prokuratura huzuridagi Departamentning Uchtepa tumani bo‘limi tomonidan tergovga qadar tekshiruv o‘tkazildi.

Unda fuqarolar A.B. va M.B. o‘zlarini go‘yoki «Vatanparvar» MFY hududidagi 29-sonli uyning boshqaruv organi rahbari sifatida ko‘rsatib, mazkur uydagi xonadonlarda yashovchi fuqarolardan 574,6 mln so‘mni firibgarlik yo‘li bilan qo‘lga kiritganliklari aniqlangan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.

Source link

Qashqadaryo viloyatining so‘lim Miraki maskanida “Yoshlar – kelajak bunyodkorlari” V xalqaro ekologiya qurultoyi ishtirokchilari uchun navbatdagi kun ham sermazmun tadbirlarga boy bo‘ldi. 13 avgust – qurultoyning to‘rtinchi kunida yoshlar sport maydonlarida kuch va chaqqonliklarini sinagan bo‘lsa, intellektual va ijodiy bellashuvlarda bilim va iqtidorlarini namoyon etdi.

Kunning asosiy tadbirlaridan biri “Yoshlar spartakiadasi” ommaviy sport o‘yinlari bo‘ldi. Turli davlatlar va O‘zbekiston hududlaridan kelgan ishtirokchilar sport maydonlarida bir nechta yo‘nalishlarda o‘zaro bellashdi. Ertalab boshlangan musobaqalar tushdan keyin ham davom ettirildi.

Qurultoy doirasida sportning ommalashtirilishi alohida ahamiyat kasb etmoqda. Chunki ekologik madaniyatni shakllantirish bilan birga yoshlarni faol va sog‘lom turmush tarziga jalb etish ham zamonaviy jamiyat oldidagi muhim vazifalardan biridir.

Shu kuni intellektual bellashuvlar ham yoshlar e’tiborida bo‘ldi. “Kahoot” intellektual o‘yinida ishtirokchilar o‘z bilimlarini sinagan bo‘lsa, “TEDxQurultoy” tanlovida turli davlatlar va O‘zbekiston hududlaridan saralangan yoshlar o‘z g‘oyalarini taqdim etdi.

Bu bellashuvlar qurultoy ishtirokchilarining faqat ekologik mavzulardagi bilimini emas, balki mustaqil fikrlash, o‘z g‘oyasini asoslab berish va uni ommaga yetkazish qobiliyatini ham namoyon etish imkonini berdi. Dasturga ko‘ra, “TEDxQurultoy” tanlovida har bir ishtirokchi davlat va hududdan bir nafardan vakil qatnashgan.

Kunning yana bir muhim tadbiri – “Ekologiya bilimdonlari” ko‘rik-tanlovi bo‘ldi. Unda ishtirokchilar atrof-muhit, tabiatni muhofaza qilish va ekologik masalalarga oid bilimlarini sinovdan o‘tkazdi.

Tanlovning o‘ziga xos jihati shundaki, ekologik mavzu oddiy nazariy savollar doirasidan chiqib, yoshlarning dunyoqarashi va kundalik hayotdagi ekologik mas’uliyati bilan bog‘lanmoqda. Dasturga muvofiq, mazkur bellashuvda 600 nafar ishtirokchi qamrab olinishi belgilangan.

Kechki dastur esa yoshlarning ijodiy salohiyatini namoyon etishi uchun imkoniyat yaratdi. “Quvnoqlar va zukkolar” musobaqasida qurultoy ishtirokchilari jamoaviy chiqishlar orqali o‘zlarining hozirjavobligi, ijodkorligi va sahna madaniyatini namoyish etdi.

Mazkur musobaqaning xalqaro formatda o‘tkazilayotgani uni yanada qiziqarli qilmoqda. Turli mamlakat va hudud vakillarining bir sahnada bellashishi nafaqat ko‘ngilochar dastur, balki o‘zaro madaniy muloqot uchun ham o‘ziga xos maydon vazifasini bajarmoqda.

Shu tariqa, 13 avgust Mirakidagi xalqaro ekologik yig‘inning mazmunan rang-barang kunlaridan biri bo‘ldi. Bir tomonda sport maydonlaridagi bellashuvlar yoshlarni jismoniy faollikka chorlagan bo‘lsa, ikkinchi tomonda intellektual va ekologik tanlovlar ularning bilim va tafakkurini sinovdan o‘tkazdi. Ijodiy musobaqalar esa ishtirokchilarga o‘z iste’dodini namoyon etish imkonini berdi.

Qurultoy dasturining bunday uyg‘unligi uning maqsadi faqat ekologik mavzularni muhokama qilish bilan cheklanmasligini ko‘rsatadi. Yoshlarning bilimi, jismoniy faolligi, ijodiy qobiliyati va jamoada ishlash ko‘nikmalarini bir vaqtning o‘zida rivojlantirish – kelajak avlodni har tomonlama qo‘llab-quvvatlashning muhim shartlaridan biridir.

Source link

Prezident Shavkat Mirziyoyev sud-huquq islohotlarining natijalari va sohadagi ustuvor vazifalarni muhokama qilish yuzasidan sud tizimi rahbarlari bilan uchrashuv o‘tkazdi.

Muloqotda sudlar faoliyatini 2030 yilga qadar rivojlantirishga qaratilgan «Odil sudlov – 2030» strategiyasi loyihasi taqdimot qilindi.

So‘nggi yillarda sud hokimiyati mustaqilligini mustahkamlash, inson huquqlarini sud orqali himoya qilish va odil sudlovga erishish imkoniyatlarini kengaytirish bo‘yicha izchil islohotlar amalga oshirildi. Shu bilan birga, aholi murojaatlari va sud amaliyoti tahlili tizimda yechimini kutayotgan masalalar mavjudligini ko‘rsatdi.

Shu munosabat bilan islohotlar natijasi, avvalo, fuqaroning sudga ortiqcha ovoragarchiliksiz murojaat qilishi, buzilgan huquqi o‘z vaqtida tiklanishi va qabul qilingan qarorning adolatli ekaniga ishonch hosil qilishida namoyon bo‘lishi kerakligi ko‘rsatib o‘tildi.

«Odil sudlov – 2030» strategiyasi aholining takliflari, olimlar, amaliyotchi yuristlar va advokatlar bilan muloqotlar, shuningdek, ilg‘or xorijiy tajriba asosida ishlab chiqilgan. Strategiyada 57 ta vazifa, uni amalga oshirish bo‘yicha 2026-2028 yillarga mo‘ljallangan Harakatlar dasturida 160 ta aniq chora-tadbir hamda 2030 yilga qadar erishilishi lozim bo‘lgan 33 ta maqsad belgilangan.

Jumladan, quyi sudlar qarorlarini qayta ko‘rib chiqish xolisligini oshirish maqsadida 2027 yil 1 iyuldan 5 ta hududlararo sud tashkil etiladi. Viloyat sudlarida apellyasiya va kassatsiya instansiyalari saqlanib, taftish instansiyasining vakolatlari hududlararo sudlarga beriladi. Bu bir sudning o‘z qarorini o‘zi qayta ko‘rib chiqishi amaliyotiga chek qo‘yadi va fuqarolarning adolat izlab poytaxtga borish zaruratini kamaytiradi.

Kundalik hayotiy muammolarni hal etuvchi, odamlarning ishi ko‘proq tushadigan sudlar fuqarolik ishlari bo‘yicha sudlar ekanligini inobatga olib, ularni xalqqa yaqinlashtirish maqsadida 2030 yilga qadar zaruratga qarab qariyb barcha tuman va shaharlarda fuqarolik sudlarining faoliyati bosqichma-bosqich yo‘lga qo‘yiladi. Barcha sudlarda axborot olish, murojaat topshirish va raqamli xizmatlardan foydalanish «yagona darcha» tamoyili asosida ta’minlanadi.

Sudga berilgan ariza boshqa sudga tegishli bo‘lsa, u fuqaroga qaytarilmaydi, sudning o‘zi uni tegishli sudga yuboradi. Arizada juz’iy kamchilik aniqlangan taqdirda sud uni bartaraf etishda fuqaroga faol ko‘maklashadi.

Iqtisodiy nizolarni tezkor hal etish uchun «iqtisodiy ishlarni proaktiv boshqarish» standarti joriy etiladi. Bu tadbirkorlarning idorama-idora sarson bo‘lishi va hujjatlarni qayta-qayta topshirishiga chek qo‘yadi.

Inson erki – oliy qadriyat ekanligidan kelib chiqib, tergov, surishtiruv bosqichida inson huquqlari kafolatlarini kuchaytirish uchun «asosli gumon» (prima facie) standarti joriy etiladi. Tergov sudyasi sanksiya berish masalasini ko‘rib chiqishda shaxsni ushlab turishning qonuniyligi, gumon yoki ayblov uchun asoslar yetarliligini tekshirish va zarur qo‘shimcha hujjatlarni talab qilish imkoniga ega bo‘ladi. Bu esa shaxsning erkinligi asossiz cheklanishining oldini oladi.

Yagona sud amaliyotini ta’minlash maqsadida Oliy sud Rayosati qarorlarini qamrab oladigan ochiq «Pretsedentlar reyestri» yuritiladi.

Sudyalarni odil sudlovga daxldor bo‘lmagan tashkiliy vazifalardan ozod etish uchun 2028 yildan «sud ma’murchiligi» instituti joriy etiladi.

«Raqamli sud» konsepsiyasi barcha sudlarda to‘laqonli ishga tushirilib, my.sud.uz portali va uning mobil ilovasi takomillashtiriladi. Sudlarga murojaatlarning kamida 50 foizini elektron shaklda berish, sud majlislarining 100 foizini audioyozuv orqali qayd etish va Oliy sud axborot tizimlari foydalanuvchilarining sonini kamida 5 baravar oshirish rejalashtirilgan.

Shuningdek, mediatsiya va yarashuv mexanizmlarini kengaytirish, noqonuniy deb topilgan ma’muriy hujjatlarning ochiq reyestri yuritishni qamrab olish, «xalq vakillari hay’ati» ishtirokida ko‘riladigan jinoyat turlari sonini kamida 3 taga yetkazish maqsad qilingan.

Taqdimotda sud apparati xodimlari uchun maxsus xizmat kiyimi namunasi ham ko‘rib chiqildi. Bu fuqarolarga sud xodimlarini oson tanib olish, ularning kasbiy mas’uliyatini oshirishga xizmat qiladi.

Uchrashuvda konstitutsiyaviy sud ishlarini yuritishni yanada takomillashtirish, sudyalar hamjamiyati organlari faoliyati samaradorligini oshirish, sud mustaqilligini mustahkamlash hamda tizimdagi kadrlarning xorijda malakasini oshirish bo‘yicha takliflar ham ko‘rib chiqildi.

Davlatimiz rahbari strategiya loyihasini ma’qullab, unda nazarda tutilgan islohotlarni ro‘yobga chiqarishga qaratilgan tegishli farmonni imzoladi.

Source link

13-avgust kuni Toshkent viloyati Xalq qabulxonasiga media-tur tashkil etilib, aholi murojaatlari bilan ishlash tizimidagi yangiliklar, joriy yilning birinchi yarmidagi murojaatlar statistikasi hamda fuqarolar muammolarini hal etish bo‘yicha amalga oshirilayotgan ishlar haqida ma’lumot berildi.

Qayd etilishicha, viloyat Xalq qabulxonasi fuqarolarning murojaatlarini qulay tarzda bayon etishi va qabulga kirishi uchun zamonaviy usulda tashkil etilgan. Shu yerda viloyatdagi vaziyatni onlayn kuzatish, mahallalardan kelib tushayotgan shoshilinch murojaatlarga tezkor javob berish va ishlarni muvofiqlashtirish maqsadida viloyat vaziyatlar markazi ham tashkil etilgan.

Bino kirish qismida fuqarolarni sun’iy intellekt gologrammasi kutib oladi. U savol beruvchilarga huquqiy maslahat berish bilan birga, murojaatchini tegishli mutaxassisga yo‘naltiradi.

Elektron navbat olishda qiynalgan fuqaroga Xalq qabulxonasi mutaxassisi yordam beradi. Fuqarolar viloyat hokimi yoki uning o‘rinbosarlari qabuliga infokiosk orqali yozilishi, shuningdek, tegishli vazirlik va idoralarga videomurojaat qoldirishi mumkin.

Xalq qabulxonasida murojaatlarni tahlil qilish va hisobotlarni yuritish uchun diagnostika markazi ham tashkil etilgan. Zarur hollarda muammolarni joyiga chiqib o‘rganish uchun mutaxassislar, «mahalla yettiligi» a’zolari va yoshlar vakillaridan iborat ishchi guruhlar tuziladi.

Ma’lumot o‘rnida, Prezidentning 2026-yil 1-apreldagi «Aholi bilan muloqot tizimini samarali tashkil qilish bo‘yicha qo‘shimcha chora-tadbirlar to‘g‘risida»gi PF-51-sonli Farmoni bilan murojaatlar bilan ishlash tizimida yangi tartiblar joriy etilmoqda.

Jumladan, 1-maydan boshlab murojaatlar «shoshilinch», «odatiy» va «maslahat talab qiluvchi» toifalarga ajratilib, ularning ijrosi ustidan vaqt nazorati o‘rnatildi. Davlat organlarining reytingi ham murojaatlarni hal etish samaradorligi asosida ochiq e’lon qilib borilmoqda.

Endilikda fuqaro bilan gaplashmasdan turib murojaatni yopib qo‘yishga yo‘l qo‘yilmaydi. Shuningdek, tez orada murojaatchiga uning murojaati qaysi bosqichda ekani, kim tomonidan ko‘rib chiqilayotgani va natijasi haqida SMS-xabarnoma yuborish xizmati ishga tushirilishi rejalashtirilgan.

Source link

Bugun xalqaro turizm bozorida mamlakatning tarixiy obidalari, betakror tabiati yoki milliy taomlari bilan bir qatorda yana bir muhim mezon – “xavfsizlik” tobora katta ahamiyat kasb etmoqda. Sayyoh qayerga borishidan qat’i nazar, o‘zini erkin, xotirjam va himoyalangan his qilishni istaydi.

O‘zbekiston mustaqillikka erishganiga 35 yil to‘ldi. Afsuski mana shu yillarning katta qismi – 25 yili turizm uchun yopiq muhitda o‘tdi.

Vaziyat shu qadar yomonlashdiki, hatto 2016 yilga qadar O‘zbekiston dunyoning eng yopiq mamlakatlaridan biri hisoblanardi. Ammo mana 10 yildirki ahvol tubdan o‘zgargan, endilikda turizm O‘zbekistonda nafaqat rivojlanib bormoqda, balki iqtisodiyotning drayverlaridan biriga ham aylangan.

Bu ishlarni amalga oshirishning o‘zi bo‘lmadi. Faqatgina qator islohotlar va tashabbuslardan so‘ng O‘zbekiston nomi dunyoga qayta tanila boshladi. O‘zbekistonning keyingi yillardagi taraqqiyot tajribasi mamlakatning turistik imiji faqat Samarqand, Buxoro va Xiva kabi tarixiy shaharlar bilan emas, balki xavfsiz, qulay va mehmondo‘st yo‘nalish sifatida ham shakllanayotganini ko‘rsatmoqda.

Bu o‘zgarishlarning amaliy natijasi turistlar oqimida yaqqol namoyon bo‘lmoqda. 2025 yil yakuniga ko‘ra, O‘zbekistonga 11,7 million nafar xorijiy turist tashrif buyurdi. Bu 2024 yilga nisbatan 116,1 foizlik o‘sish demakdir. Turistik xizmatlar eksporti esa 4,8 milliard dollarga yetdi.

E’tiborlisi, 2026 yilning birinchi choragida ham o‘sish dinamikasi saqlanib qoldi. Dastlabki ma’lumotlarga ko‘ra, yanvar-mart oylarida 164 ta davlatdan 2,87 million nafar xorijiy fuqaro O‘zbekistonga turistik maqsadlarda tashrif buyurgan. Bu o‘tgan yilning shu davriga nisbatan 36,6 foiz ko‘pdir.

Xavfsizlik – turistik imijning asosiy ustuni

Turizmda xavfsizlik deganda faqat jinoyatchilikning past darajasi emas, balki sayyohning mamlakatga kirishidan tortib, mehmonxonaga joylashishi, shahar bo‘ylab harakatlanishi, tarixiy obyektlar va tabiiy hududlarga borishigacha bo‘lgan jarayonda o‘zini himoyalangan his qilishi tushuniladi.

O‘zbekistonda bu masala tizimli yondashuv asosida yo‘lga qo‘yilmoqda. Xususan, 2025 yil fevral oyida mamlakat Turistlarni himoya qilish xalqaro kodeksiga qo‘shildi. Uning qoidalarini milliy turizm siyosati va xizmat ko‘rsatish amaliyotiga tatbiq etish bo‘yicha «Yo‘l xaritasi» ishlab chiqildi. 70 dan ortiq turizm subyekti shartnomalarida turistlar huquqi va xavfsizligiga oid qoidalarni takomillashtirdi.

Bu, bir qarashda, huquqiy-texnik jarayon bo‘lib ko‘rinishi mumkin. Ammo xalqaro turizm nuqtai nazaridan uning ahamiyati katta. Chunki sayyoh uchun xavfsizlik nafaqat real holat, balki “ishonch” masalasidir. Turist o‘z huquqlari himoya qilinishini, muammoga duch kelganda yordam olish mexanizmi mavjudligini bilsa, mamlakat haqidagi ijobiy tasavvuri yanada mustahkamlanadi.

O‘zbekistonda turistlar xavfsizligini ta’minlashga ixtisoslashgan tizim ham faol ishlamoqda. Ichki ishlar organlarining turistik va transport obyektlarida xavfsizlikni ta’minlash bo‘yicha bo‘linmalari aeroportlar, vokzallar, temir yo‘llar va sayyohlar gavjum hududlarda profilaktik choralarni amalga oshirmoqda. 2025 yil yanvar-iyul oylarida aeroportlar orqali amalga oshirilgan 76 mingdan ortiq reysda 12 milliondan ziyod yo‘lovchining xavfsizligi ta’minlangan.

Xorijiy baholar ham ishonchni mustahkamlamoqda

Mamlakatning turistik imiji faqat ichki statistika bilan emas, xorijiy davlatlarning rasmiy tavsiyalari va xalqaro medianing e’tibori bilan ham belgilanadi.

Masalan, AQSh Davlat departamentining 2026 yil 26 yanvarda yangilangan sayohat tavsiyasida O‘zbekiston uchun “odatiy ehtiyot choralariga rioya qilish” darajasi belgilangan va mamlakat, umuman olganda, amerikalik sayyohlar uchun xavfsiz yo‘nalish sifatida baholangan.

Shu bilan birga, O‘zbekistonda turistlar uchun 24 soat ishlaydigan «Safe Tourism» Call Centre – 1173 xizmati mavjud bo‘lib, unda o‘zbek, rus va ingliz tillarida yordam ko‘rsatish imkoniyati bor.

Mehmondo‘stlik – milliy brendga aylanayotgan qadriyat

O‘zbekistonning yangi turistik imijini faqat xavfsizlik bilan izohlab bo‘lmaydi. Bu yerda asrlar davomida shakllangan mehmondo‘stlik madaniyati muhim omil bo‘lib qolmoqda.

Samarqanddagi Registon, Buxorodagi Labi Hovuz, Xivadagi Ichan qal’a kabi tarixiy maskanlar sayyohga O‘zbekistonning buyuk o‘tmishi haqida hikoya qilsa, mahalliy aholining muomalasi, milliy taomlar, hunarmandchilik va oilaviy mehmon uylari mamlakatning bugungi qiyofasini namoyon etadi.

Eng muhimi, turizm endi faqat tarixiy shaharlarga sayohat qilishdan iborat emas. Ekologik, gastronomik, etno va qishloq turizmi kabi yo‘nalishlar ham tobora rivojlanmoqda. 2025 yilda respublikada 1023 ta yangi joylashtirish vositasi ishga tushirilib, mehmonxona, oilaviy mehmon uylari va xostellar soni sezilarli oshdi.

Bu esa turistga katta shaharlardan tashqari hududlarga ham sayohat qilish, mahalliy aholi turmush tarzi bilan tanishish va O‘zbekistonni yanada kengroq kashf etish imkonini bermoqda.

Vizasiz rejimdan raqamli xizmatlargacha

Xavfsizlik va mehmondo‘stlikni zamonaviy infratuzilma to‘ldirmasa, turistik imij barqaror bo‘lmaydi. Shu sababli so‘nggi yillarda vizani rasmiylashtirish jarayonlarini soddalashtirish, elektron viza tizimi, vizasiz rejim geografiyasini kengaytirish, transport qatnovlarini ko‘paytirish va raqamli xizmatlarni joriy etishga alohida e’tibor qaratilmoqda. Rasmiy ma’lumotlarga ko‘ra, O‘zbekiston 90 dan ortiq davlat fuqarolari uchun vizasiz sayohat imkoniyatini yaratgan.

Turistlar uchun «Tourist Map» interaktiv portali va mobil ilovasining ishlab chiqilishi ham raqamli qulayliklarni oshirishga qaratilgan muhim qadamlardan biri bo‘ldi.

Bularning barchasi bitta maqsadga – sayyohning mamlakatdagi har bir bosqichini imkoni boricha oson va tushunarli qilishga xizmat qiladi.

O‘zbekistonning dunyodagi yangi qiyofasi

O‘zbekistonning turistik imiji o‘zgarib borayotganini xalqaro media e’tibori ham tasdiqlaydi. 2025 yilda BBC Travel O‘zbekistonni sayohat uchun eng yaxshi 25 ta yo‘nalish qatoriga kiritdi. The New York Times Buxoroni tashrif buyurishga arziydigan eng yaxshi manzillar ro‘yxatiga kiritdi. National Geographic esa Xivani sayyohlik uchun tavsiya etilgan yo‘nalishlardan biri sifatida qayd etdi.

Bu e’tiroflar tasodifiy emas. Chunki mamlakat turizm siyosati endi faqat turistlarni jalb qilish bilan cheklanib qolmayapti. Asosiy vazifalardan biri – ularni mamlakatda uzoqroq ushlab qolish, ko‘proq xizmatlardan foydalanishini ta’minlash va eng muhimi, O‘zbekistondan ijobiy taassurot bilan qaytarish.

2025 yil noyabr oyida qabul qilingan qarorlar asosida 2030 yilga qadar turizmning mamlakat yalpi ichki mahsulotidagi ulushini 7 foizga yetkazish, xorijiy turistlar sonini 20 million nafarga chiqarish va turistik xizmatlar eksportini 6 milliard dollardan oshirish maqsad qilingan.

Bu raqamlar ortida oddiy statistikadan ko‘ra kattaroq maqsad bor. O‘zbekiston o‘zini Markaziy Osiyoning tarixiy markazigina emas, balki zamonaviy, ochiq, xavfsiz va mehmondo‘st turistik makon sifatida namoyon etishga intilmoqda.

Ishonch – eng qimmat mahsulot

Bugun sayyohlik bozorida mamlakatlar o‘rtasida raqobat nafaqat tarixiy yodgorliklar, tabiiy manzaralar yoki narxlar bo‘yicha kechmoqda. Raqobatning eng muhim nuqtalaridan biri – “ishonch”.

Sayyoh O‘zbekistonga kelganda uni qadimiy sivilizatsiya izlari, Sharq me’morchiligi, milliy taomlar va mehmondo‘st xalq kutib oladi. Ammo u shu bilan birga zamonaviy aeroportlar, qulay mehmonxonalar, raqamli xizmatlar, turistlar huquqini himoya qilish tizimi va xavfsizlik infratuzilmasini ham ko‘rishi kerak.

Ana shunda tarix va zamonaviylik, milliy qadriyat va zamonaviy servis, mehmondo‘stlik va xavfsizlik bir butun turistik mahsulotga aylanadi.

O‘zbekistonning yangi turistik imiji ham aynan shu uyg‘unlik asosida shakllanmoqda. Mamlakat endilikda dunyoga faqat “Buyuk Ipak yo‘li merosi” sifatida emas, balki “sayohat qilish qulay, xavfsizlikka e’tibor qaratilgan va mehmonni qadrlaydigan zamonaviy turistik yo‘nalish” sifatida ham tanilib bormoqda.

Bu imijni yanada mustahkamlash esa nafaqat turizm sohasining, balki butun mamlakatning xalqaro nufuzi, iqtisodiy jozibadorligi va «O‘zbekiston brendi»ning kelajagi uchun muhim ahamiyatga ega.

Source link