Sport
«Liverpul» Turkiyada yutqazdi, grandlardan gollar shousi. YeChLda kun o‘yinlari
Seshanba oqshomida Chempionlar ligasining ikkinchi tur o‘yinlari start oldi: tur doirasidagi asosiy voqealar, o‘yinlardagi gollar va turnir jadvalidagi vaziyat.
Mbappe yana porladi – «Real» uchun navbatdagi het-trik
«Qayrat» – «Real» 0:5
Gollar: Mbappe, 25 – penalti (0:1). Mbappe, 52 (0:2). Mbappe, 74 (0:3). Kamavinga, 83 (0:4). Dias, 90+3 (0:5)
«Qayrat»: Kalmurza, Martinovich, Sorokin, Luish Mata, Tapalov (Baybek, 64), Kasabulat, Arad (Stanoyev, 64), Gromiko (Zariya, 80), Mrinskiy, Jorjinio (Edmilson, 64), Satpayev (Rikardinio, 80)
«Real»: Kurtua, Alaba, Hausen, F. Garsiya, Raul Asensio, Tshuameni (Bellinghem, 80), Sebalyos, Vinisius Junior (Dias, 70), Mastantuono (Rodrigu, 70), Mbappe (G. Garsiya, 81), Arda Guler (Kamavinga, 80)
Ogohlantirishlar: Gromiko, 48. Arad, 55
YeChLdagi debyutini Lissabonda «Sporting»dan 1:4 hisobida mag‘lub bo‘lish bilan boshlagan «Qayrat» turnir favoritlaridan biriga qarshi o‘z uyidagi o‘yinni dadil boshladi va ilk xavfli vaziyatga ham ega bo‘ldi, ammo 17 yoshli Satpayevning zarbasi Kurtuaga qiyinchilik tug‘dirmadi. Shundan keyin mehmonlar tashabbusni qo‘lga olishdi va mezbonlar ikkinchi o‘yinda ham yirik hisobda mag‘lubiyatga uchradi. «Real»ning Olmaotaga tashrifi butun mamlakat bo‘ylab katta ajiotaj keltirib chiqargandi, 26 minglik stadionni to‘ldirib o‘tirgan muxlislar esa Mbappening uch goliga guvoh bo‘lishdi. Kilian endi Madrid jamoasi safida YeChL o‘yinlarida qayd etilgan het-triklar soni bo‘yicha (4) Benzema bilan tenglashib oldi, safar o‘yinlaridagi het-triklar soni (3) bo‘yicha esa turnir tarixida unga teng keladigan futbolchi yo‘q, shuningdek, jami gollar soni (60 ta) bo‘yicha Tomas Myuller ortda qoldirildi.
Yo‘qotadigan narsasi qolmagan qozog‘istonliklar butun kuch bilan oldinga o‘tishdi, ammo hujumlar samara bermadi, Gromiko ishlagan penalti esa VAR aralashuvi bilan bekor qilindi. Ikkinchi bo‘limda zaxiradan o‘yinga qo‘shilgan Kamavinga va Braim ham bittadan gol urib, hisobni yanada yiriklashtirishdi. Bu o‘yin qozog‘istonliklarga katta futbol bayramini taqdim etdi, ammo «Real» – boshqa galaktika ekanini isbotladi.
Uchrashuvning asosiy haylayti Rodrigoning Qozog‘iston klubiga «transferi» bo‘ldi: final hushtagidan so‘ng braziliyalik futbolchi futbolchilardan biri bilan futbolkasini almashdi.
Sehrlangan raqib
«Galatasaroy» – «Liverpul» 1:0
Gol: Osimhen, 16 – penalti (1:0)
«Galatasaroy»: Ugurjan Chaqir, Sanches, Abdulkarim Bardakchi, Yakobs, Singo, Torreyra, Gundo‘g‘an (Sara, 75), Lemina, Barish Yilmaz (Eren Elmali, 85), Yunus Akgyun (Sholloi, 71), Osimhen (Ikardi, 71)
«Liverpul»: Alisson (Mamardashvili, 56), van Deyk, Konate, Kerkez, Frimpong (Bredli, 62), Gravenberh (Isak, 62), Jons, Soboslai, Gakpo (Saloh, 62), Virs, Ekitike (Makallister, 68)
Ogohlantirishlar: Lemina, 36. Abdulkarim Bardakchi, 61. Ikardi, 76. Yakobs, 76. Ugurjan Chaqir, 88 – Gravenberh, 45. Bredli, 73. Jons, 90
«Galatasaroy» tarkibiga jarohatidan to‘la forig‘ bo‘lgan Osimhen qaytdi va bu «sherlar»ni jiddiy kuchaytirdi. O‘yin debyutidayoq Alisson yakkama-yakka vaziyatga chiqib kelgan Barish Yilmazni to‘xtatishiga to‘g‘ri keldi. Javob hujumida esa mezbonlar posboni Ugurjan Chaqir ham seyv qilishiga to‘g‘ri keldi, u Ekitikening yaqin masofadan yo‘llagan zarbasini to‘sdi, qaytgan to‘pni Gakpo undan o‘tkazib darvoza tomon yo‘lladi, ammo himoyachi Yakobs to‘pni darvoza chizig‘i oldida to‘xtatib qoldi. Navbatdagi hujum esa turklarga muvaffaqiyat keltirdi, 15-daqiqada Yilmaz chap qanotdan jarima maydoniga kirib bordi va fint ishlatib, Soboslaini dog‘da qoldirdi, vengriyalik yarimhimoyachi esa unga fol ishlatishga majbur bo‘ldi va hakam 11 metrlik nuqtani ko‘rsatdi, nuqtaga yaqinlashgan Viktor Osimhen zarbani aniq ijro etdi.
Qizillar kutilganidek mezbonlar jarima maydonini qamal qilishdi, ikkinchi bo‘lim boshida javob gol urilishi mumkin edi, ammo Ekitike qulay pozitsiyada turib to‘pni tovonida darvoza to‘riga yo‘llashga urindi, bu zarba esa darvozabonga qiyinchilik tug‘dirmadi. Shundan keyin Arne Slot jamoasi jiddiy muammoga duch keldi. Yakkama-yakka vaziyatga chiqib kelayotgan Osimhenni qarshi olish uchun yugurib chiqqan Alisson jarohat olib, o‘rnini Mamardashviliga bo‘shatib berishiga to‘g‘ri keldi.
Darvozabonlar rokirovkasi natijaga ta’sir ko‘rsatmadi, o‘yin oxirida esa mehmonlar mag‘lubiyatdan qutulib qolishga yana bir bor yaqin kelishdi: avvaliga hakam Singo jarima maydoni ichida Isakni yiqitgan deb topdi, ammo videoassistentlar uning xatosini tuzatdi, aslida Uilfrid to‘pga birinchi bo‘lib ulgurgani oydinlashdi va «Liverpul» qatorasiga ikkinchi o‘yinda ham mag‘lubiyatni tan olishga majbur bo‘ldi.
«Liverpul» ushbu raqibga qarshi Istanbuldagi o‘yinlarda noxush seriyani davom ettirmoqda (=1-2). Qolaversa, Angliya chempionlari YeChL safar o‘yinlarida birinchi bo‘limda gol o‘tkazib, tanaffusga mag‘lub holda yo‘l olgan o‘yinlarida vaziyatni o‘nglashi qiyin bo‘lmoqda. Jamoa shunday o‘yinlardan oxirgi yigirmatasida faqat ikkitasida g‘alaba qozona olgan, o‘n olti o‘yinda esa yutqazgandi. Endi bu raqamlar mersisaydliklar uchun yanada qayg‘uli ko‘rinish oldi.
Mourinioning omadsiz qaytishi
«Chelsi» – «Benfika» 1:0
Gollar: Rios, 18 – avtogol (1:0)
«Chelsi»: Sanches, Badiashile (Jyeyms, 80), Chaloba, Kukurelya, Gyusto (Achimpong, 80), Fernandes, Kaysedo, Buonanotte (Estevao, 54), Garnacho (Gittens, 61), Pedru Netu, Jorj (Joao Pedro, 61)
«Benfika»: Trubin, Silva (Arauju, 73), Otamendi, Dal, Dedich, Barrenechea, Rios (Barreyru, 77), Eursnes (Enrike Arauju, 89), Sudakov (Ivanovich, 77), Lukebakio (Shelderup, 77), Pavlidis
Ogohlantirishlar: Fernandes, 45. Buonanotte, 46. Joao Pedro, 62 – Barrenechea, 34. Rios, 49. Eursnes, 64. Otamendi, 83. Arauju, 88
Chetlatish: Joao Pedro, 90 (ikkinchi sariq)
Joze Mourinio «Benfika» bilan nafaqat qadrdon «Stemford Brij»ga, balki YeChLga ham qaytdi. U o‘zi uchun sevimli turnirda besh yarim yildan buyon qatnashmayotgandi – uning turnirdagi oxirgi o‘yini 2020 yil martiga to‘g‘ri keladi, o‘shanda uning boshqaruvidagi «Tottenhem» 1/8 finalda «Leypsig»dan mag‘lub bo‘lgandi.
Taqdir hazili shundaki, uning boshqaruvidagi «Fenerbahche» YeChL uchun o‘tish o‘yinlarida «Benfika»ga yutqazgandi va shundan keyin portugaliyalik mutaxassis turklar jamoasidan bo‘shatilgandi. Ammo
«Benfika» YeChLning birinchi turida kutilmaganda «Qorabog‘»ga yutqazib qo‘ygach, Brunu Lajye iste’foga chiqarildi va uning o‘rniga Mourinio chaqirildi.
Joze Mourinioni «Stemford Brij»da iliq qarshi olishdi: tribunalardagi muxlislar uning nomini olqishlashdi, portugaliyalik mutaxassis esa bunga javoban ularga havoda bo‘sa yo‘lladi. Maydonda esa «Benfika» raqibga jang taklif qildi, ammo «Chelsi» yakunda uch ochkoga ega bo‘ldi. Barchasini Richard Riosning avtogoli hal qildi, u 18-daqiqada Alexandro Garnachoning qanotdan uzatmasini to‘sishga urinib, o‘z jamoasi darvozasini ishg‘ol etib qo‘ydi. Ikkinchi bo‘limda Fredrik Eursnes juda yaxshi vaziyatga ega bo‘lgandi, ammo mezbonlar darvozaboni top-seyv ijro etib, jamoasi g‘alabasini saqlab qoldi.
Lautaro tarix yozmoqda
«Inter» – «Slaviya» 4:0
Gollar: Martines, 30 (1:0). Dyumfris, 34 (2:0). Martines, 65 (3:0)
«Inter»: Zommer, Acherbi, Bastoni, Bissek (Akanji, 66), Zelinski (Barella, 66), Suchich, Hoqon Chalxono‘g‘li, Dimarko, Dyumfris (Darmian, 76), Tyuram (Bonni, 66), Martines (Espozito, 66)
«Slaviya»: Stanek, Xaloupek, Zima, Hasioka (Xitil, 83), Vlchek, Zafeyris, Dorli, Sadilek (Xori, 46), Provod (Cham, 70), Dudera (Mbodji, 49), Kushey (Shrans, 46)
Ogohlantirishlar: Bissek, 48. Martines, 61 – Shrans, 56
O‘tgan mavsum finalchisi yarim soat davomida «Slaviya» mudofaasining zaif nuqtasini qidirdi, keyin esa darvozabonning xatosi tufayli hisobni ochdi. Stanek Lautaro Martinesning bosimi ostida uzatma berishda muvaffaqiyatsiz harakat qildi, to‘pga ega chiqqan argentinalik hujumchi esa bo‘sh darvozani ishg‘ol etdi. «Inter» sardori karerasidagi eng oddiy gollardan biri evaziga tarixga kirdi. U neradzurrilarning Chempionlar ligasida qatorasiga yetti mavsum davomida gol urgan birinchi futbolchisiga aylandi.
Martines ikkinchi bo‘limda Bastonining uzatmasidan keyin dublni rasmiylashtirdi. Bu golli hujumda Bastoniga tovonda uzatma berish orqali qatnashgan Markus Tyuram birinchi bo‘limda Dyumfrisning goliga ham assistentlik qilgandi. Kristian Kivu YeChLni qatorasiga ikki g‘alaba bilan boshlamoqda.
Noyyerning rekordi
«Pafos» – «Bavariya» 1:5
Gollar: Keyn, 15 (0:1). Rafael Gerreyru, 20 (0:2). Jyekson, 31 (0:3). Keyn, 34 (0:4). Orshich, 45 (1:4). Olise, 68 (1:5)
«Pafos»: Mixail, Goldar, David Luiz (Langa, 59), Lyukkassen, Shunich, Pepe, Pileas (Sema, 79), Jaja (Bassauamina, 59), Dragomir (Kina, 66), Orshich, Anderson Silva (Dimata, 59)
«Bavariya»: Noyyer, Upamekano (Ta, 72), Kim Min Je, Rafael Gerreyru, Laymer (Bishof, 83), Kimmix, Pavlovich, Keyn (Boe, 64), Dias (Gnabri, 46), Olise (Karl, 72), Jyekson
Ogohlantirish: Orshich, 46
Seshanba kuni nafaqat «Qayrat» balki Kiprning «Pafos» klubi ham tarixiy o‘yinda maydonga tushdi. Yevrokuboklar debyutanti o‘z maydonidagi ilk yevrokubok o‘yinini «Bavariya»ga qarshi o‘tkazdi. Lekin birinchi turda «Olimpiakos» maydonida kiprliklar golsiz durang qayd eta olgan bo‘lsa-da, bu safar ularda hech qanday imkoniyat yo‘q edi.
Keynning chalqancha uslubda bergan ilk zarbasi darvoza ustuniga tegdi, lekin u to‘xtash haqida o‘ylamadi va keyingi zarbasi bilan olis burchakni aniq nishonga oldi. Unga assistentlik qilgan Olise bir necha daqiqa o‘tib ikkinchi golni ham tashkillashtirib berdi: uning markazga ko‘chishi va «devor» uslubida o‘ynashi Jyeksonning Rafael Gerreyruga golli pas berishi bilan yakunlandi. Biroz o‘tib Olise Jyeksonning o‘ziga ham «Bavariya»dagi ilk golini urishda yordam berdi. Bo‘lim davomida Keyn dublni nishonladi. Bu vaqtda esa Noyyer ochiqchasiga zerikib o‘tirdi va biroz bo‘shashdi ham, natijada bo‘lim oxirida Orshichdan gol o‘tkazib yubordi. Lekin shu kuni Manuel Iker Kasilyasning rekordini takrorlagan holda Chempionlar ligasida 101-g‘alabasiga erishdi. Ikkinchi bo‘limda esa tinib-tinchimas Olisening o‘zi ham gol urib, yakuniy hisobni o‘rnatdi.
«Tottenhem»da kambek
«Bude-Glimt» – «Tottenhem» 2:2
Gollar: Hauge, 53 (1:0). Hauge, 66 (2:0). van de Ven, 68 (2:1). Gundersen, 89 – avtogol (2:2)
Aniq ijro etilmagan penalti: Heg, 35’
«Bude-Glimt»: Xaykin, Bertuft, Aleyesami (Klyunge, 90+7), Berkan, Sevold, Berg, Fet, Even (Gundersen, 87), Xauge, Euklenn (Blomberg, 80), Heg (Helmersen, 80)
«Tottenhem»: Vikario, Danso, van de Ven, Spens (Udodji, 82), Porro, Bentankur (Grey, 82), Sarr (Palinya, 69), Bergvall (Simons, 60), Odober, Jonson (Quddus, 60), Risharlison
Ogohlantirishlar: Berg, 68. Euklenn, 72 – van de Ven, 58. Porro, 90
«Bude-Glimt» va «Tottenhem» may oyida Yevropa ligasi yarimfinalida o‘zaro to‘qnashgandi. O‘shanda norvegiyaliklar jamoasi jiddiy qarshilik ko‘rsatgan bo‘lsa-da, finalga chiqa olmagandi. Bu safar «Budyo-Glimt» revansh olish uchun maydonga chiqqandi va ilk daqiqalardan hujumga o‘tdi, ammo mezbonlar birinchi bo‘limda yaqqol vaziyatdan foydalana olishmadi – jamoa sardori Heg bu safar ham 11 metrdan gol ura olmadi, u birinchi turda «Slaviya»ga qarshi o‘yinda ham penaltini yo‘qqa chiqargandi. Ikkinchi bo‘limda esa Hauge qisqa vaqt ichida dublni rasmiylashtirdi va amalda o‘yin taqdirini hal qilgandek ko‘ringandi. Ammo londonliklar diqqatni jamlab, kambek qilishga o‘zida kuch topa oldi. Avvaliga himoyachi Van de Ven 68-daqiqada hisobni qisqartirdi, so‘nggi daqiqalarda esa mezbonlar alamli gol o‘tkazib yuborishdi: darvozabon Nikita Xaykin Risharlisonning yaqin masofadan yo‘llagan zarbasini qaytargandi, ammo to‘p bir necha daqiqa oldin hisobni ushlash uchun maydonga tushirilgan himoyachi Gundersenga tekkan holda darvoza to‘riga kirib ketdi.
Grizmanning yubileyi
«Atletiko» – «Ayntraxt» 5:1
Gollar: Raspadori, 4 (1:0). Le Norman, 33 (2:0). Grizmann, 45+1 (3:0). Burkardt, 57 (3:1). Simeone, 70 (4:1). Alvares, 82 – penalti (5:1)
«Atletiko»: Oblak, Langle, Le Norman, Rudjyeri, Lorente, Gallaher, Barrios (Molina, 75), Grizmann (Baena, 90), Simeone (Gonsales, 75), Alvares (Martin, 90), Raspadori (Koke, 55)
«Ayntraxt»: Santos, Teat, Kox, Braun (Baoyya, 71), Kollinz (Amenda, 58), Shaibi, Sxiri (Hoylund, 58), Uzun (Larsson, 58), Knauff, Doan (Getse, 74), Burkardt
Ogohlantirishlar: Langle, 13 – Braun, 41
Dam olish kunlarida Madrid derbisida besh gol urgan «Atletiko» YeChLda ham bu ishni davom ettirib, o‘yindagi birinchi zarbasiniyoq golga aylantirdi – Raspadori Ispaniyadagi ilk golini urdi. «Matraschilar» uchun bu golning o‘zi yubiley bo‘ldi – YeChLdagi 200-gol. Va Diyego Simeone shogirdlari to‘xtash haqida o‘ylashmadi. Le Norman burchak zarbasidan keyin hisobni ikkitaga oshirdi. Birinchi turda «Galatasaroy» darvozasiga beshta gol urgan, dam olish kunlarida «Borussiya» M bilan gollar shousini uyushtirgan (6:4) «Ayntraxt» esa shu kuni maydonda yo‘qolib qoldi.
Birinchi bo‘limga qo‘shib berilgan daqiqalarda madridliklar faxriysi Antuan Grizmann ham «Atletiko» safidagi yubiley 200-golini urishga erishdi va oldindan tayyorlangan maxsus futbolkani muxlislarga namoyish etdi.
Ikkinchi bo‘limda esa juda yuqori sport formasidagi Xulian Alvares o‘zini ko‘rsatdi. Argentinalik hujumchi avvaliga penaltidan panenka uslubida zarba berib, hisobdagi farqni oshirdi, keyin esa dublni rasmiylashtirdi.
«Atalanta» muxlislar oldida aybini yuvdi
«Atalanta» – «Bryugge» 2:1
Gollar: Tzolis, 38 (0:1). Samarjich, 74 – penalti (1:1). Pashalich, 87 (2:1)
«Atalanta»: Karnesekki, Jimsiti, Axanor, Kossunu (Musa, 53), Ederson (Samarjich, 61), de Ron, Bernaskoni, Bellanova (Dzappakosta, 46), Pashalich, Lukman (Sulemana, 61), Krstovich (Breshanini, 89)
«Bryugge»: Yakkers, Ordones (Romero, 89), Mexele, Seys, Sabbe (Meyyer, 89), Stankovich, Vanaken, Sandra (Kempbell, 89), Tzolis, Borjyesh (Vetlesen, 75), Tresoldi (Verman, 63)
Ogohlantirishlar: Musa, 58. de Ron, 81
Kunning natijasini taxmin qilish qiyin bo‘lgan o‘yini «Atalanta» g‘alabasi bilan yakunlandi. Bu jamoalar fevralda ham YeChL pley-off bosqichining o‘tish o‘yinlarida to‘qnashgan va «Atalanta» kutilmaganda ikki o‘yinda ham yutqazgandi (1:2, 1:3). Bu safar ham bergamoliklarning g‘alabasiga ko‘pchilik ishonmayotgandi. Jamoa jarohatlar girdobida qolgan, jumladan, «Bryugge»ning sobiq yulduzi De Ketelare ham hozirgi jamoasiga yordam bera olmayapti, birinchi bo‘limda esa mehmonlar Tsolisning zarbasi evaziga hisobda oldinga chiqib olishdi. Ammo ikkinchi bo‘limning ikkinchi yarmida mezbonlar vaziyatni o‘nglashga erishishdi, avvaliga zaxiradan tushgan Samarjich penaltini aniq ijro etdi, keyin esa boshqa bir joker, yozda «Milan» safidan kelib qo‘shilgan Musa burchak zarbasidan keyin qulay vaziyatda turgan Pashalichni golli pas bilan ta’minladi. Ivan Yurich shogirdlari birinchi turda «PSJ»dan uchralgan 0:4 hisobidagi yirik mag‘lubiyat uchun muxlislar qarshisida o‘zini oqlab oldi.
Obameyangda yana bir yorqin o‘yin
«Marsel» «Ayaks» – 4:0
Gollar: Payshao, 6 (1:0). Payshao, 12 (2:0). Grinvud, 26 (3:0). Obameyang, 52 (4:0)
«Marsel»: Ruli, Agerd, Pavar, Emerson, Medina (Igan-Rayli, 36), O`Rayli (Gomesh, 62), Vermeren (Murilo, 82), Nadir (Vea, 46), Payshao (Heyberg, 62), Grinvud, Obameyang
«Ayaks»: Yarosh, Itakura, Bas (Goei, 55), Vayndal (Shutalo, 55), Roza, Glux, Klassen, Teylor, Reger (Mokio, 23), Gods (Moro, 84), Bergeys (Edvardsen, 46)
Ogohlantirishlar: Heyberg, 79. Agerd, 88 – Roza, 34. Itakura, 66. Goei, 76
«Ayaks»ning eng yaxshi davri ortda qolgani ayon bo‘lmoqda. Birinchi turda o‘z uyida «Inter»ga qarshi hech narsa qila olmagan amsterdamliklar «Marsel» maydonida yirik hisobda mag‘lub bo‘ldi. Faoliyatining so‘nggi damlarini o‘tkazayotgan Obameyang o‘yin startidayoq to‘pga bir teginishda Igor Payshaoni golli pas bilan ta’minladi, «Feyyenoord»ning sobiq vingeri jarima maydoni chizig‘i ustidan yo‘llagan zarbasi bilan o‘ziga yaxshi tanish bo‘lgan raqib darvozasini ishg‘ol etdi. Mehmonlar marselliklar pressingi qarshisida ojiz qolishdi va 13-daqiqada tajribali Klassen to‘p yo‘qotishidan keyin Payshao dublni rasmiylashtirdi. Grinvudning goli ham Roberto De Dzerbi shogirdlari uyushtirgan pressing mahsuli bo‘ldi. Ammo, kechaning asosiy qahramoni – baribir Obameyang bo‘ldi. Birinchi bo‘limda ikki golga assistentlik qilgan gabonlik hujumchi ikkinchi bo‘limda mehmonlarning standart vaziyatidan keyin boshlangan qarshi hujumda o‘z golini ham urdi, bu hujumda Payshao unga qarzini qaytardi. Saudiya Arabistonida o‘ynab kelishga ulgurgan qariya hujumchi YeChL o‘yinida 1+2 qayd etmoqda.
«Marsel» yaxshi taassuot qoldirmoqda, «Ayaks» esa startdagi ikki o‘yinda jami 0:6 hisobida yutqazdi. Amsterdamliklar YeChLda 2012 yildan buyon bu qadar yomon start qilmagandi.
«Manchester City» O‘zbekiston terma jamoasi himoyachisi Abduqodir Husanov bilan yangi besh yillik shartnoma imzolaganini rasman e’lon qildi. Yangi kelishuvga ko‘ra, futbolchi klub safida 2031 yilgacha to‘p suradi.
Husanov Angliya klubiga 2025 yil yanvar oyida kelib qo‘shilgan bo‘lib, qisqa vaqt ichida jamoaning asosiy futbolchilaridan biriga aylandi. 2025/26 yilgi mavsumning ikkinchi yarmida u Mark Geyi bilan markaziy himoyada ishonchli tandem hosil qilib, jamoaning so‘nggi 19 ta APL uchrashuvidan 16 tasida maydonga tushdi. Shuningdek, Angliya kubogi va Liga kubogi finallarida ham muhim rol o‘ynadi, deyiladi klub matbuot xizmatining xabarida.
Ta’kidlanishicha, 22 yoshli himoyachi «Manchester City» safida atigi 47 ta o‘yin o‘tkazganiga qaramay, yuqori tezligi va samarali himoyaviy harakatlari bilan Premyer-liganing eng istiqbolli yosh futbolchilaridan biri sifatida e’tirof etildi. U, shuningdek, klubning 2025/26 yilgi mavsumdagi eng yaxshi futbolchisi sovrini uchun nomzodlar uchligidan ham joy olgan edi.
Bundan tashqari, Husanov O‘zbekiston terma jamoasining tarixda ilk bor Jahon chempionatiga yo‘llanma olishi yo‘lida ham muhim hissa qo‘shdi.
Yangi shartnoma imzolangach, Abduqodir Husanov klubda qolayotganidan mamnunligini bildirib, «Manchester City»da har kuni rivojlanayotganini ta’kidladi.
«Bu men va oilam uchun juda quvonchli kun. Manchesterga kelganimdan buyon har bir lahzadan zavq oldim va futbolchi sifatida ko‘p narsani o‘rgandim. Endi yangi vazifam — Enso Mareska va uning murabbiylar shtabiga o‘zimni namoyon etish hamda jamoada muntazam o‘rin egallash. Muxlislarga qo‘llab-quvvatlagani uchun rahmat. Endi bor e’tiborim klub muvaffaqiyati uchun bor kuchimni berishga qaratilgan», — dedi Husanov.
Klubning futbol bo‘yicha direktori Ugu Viana esa Husanovning Angliyaga kelganidan buyon rivojlanishidan mamnun ekanini bildirib, uning jahon darajasidagi markaziy himoyachiga aylanishi uchun barcha imkoniyatlarga ega ekanini ta’kidladi. Uning so‘zlariga ko‘ra, 22 yoshli futbolchining eng yaxshi yillari hali oldinda va u Enso Mareskaning rejalarida muhim o‘rin tutadi.
Kelasi mundiallardan biri Fransiya va Germaniya o‘tishi mumkin.
«Le Parisien» nashrining xabar berishicha, Fransiya va Germaniya Jahon chempionatini birgalikda o‘tkazishni ko‘rib chiqmoqda.
Ikki mamlakat 2038 yoki 2042-yilgi Jahon chempionatini o‘tkazish uchun qo‘shma ariza topshirishi kutilyapti. 2030-yilgi Jahon chempionati Ispaniya, Portugaliya va Marokashda bo‘lib o‘tadi.
Ochilish o‘yinlari Urugvay, Argentina va Paragvayda bo‘lib o‘tadi. 2034-yilgi Jahon chempionati Saudiya Arabistonida bo‘lib o‘tadi.
Yaponiyada o‘tkaziladigan Aichi-Nagoya-2026 yozgi Osiyo o‘yinlarining jamoaviy sport turlariga qur’a tashlash marosimi bo‘lib o‘tmoqda.
Unga ko‘ra, futbol bo‘yicha O‘zbekiston U23 terma jamoasi S guruhida Vetnam, Filippin va Kuvayt bilan bahs olib boradigan bo‘ldi.
A guruhi: Yaponiya, Tailand, Qirg‘iz Respublikasi, Gongkong
B guruhi: Xitoy, BAA, Eron, KXDR
C guruhi: Vetnam, O‘zbekiston, Filippin, Kuveyt
D guruhi: Koreya Respublikasi, Saudiya Arabistoni, Qatar.
Bugun tunda Ispaniya va Argentina keyingi to‘rt yillikning eng kuchli jamoasini aniqlaydi.
JCh-2026 finali
Ispaniya – Argentina
20 iyulga o‘tar kechasi, 00.00. New York/New Jersey Stadium (Nyu York)
Shunchaki eng kuchlilar
Bunday afishadagi final jahon chempionatiga ideal darajada mos keladi, chunki bu sayyoraning eng yaxshi ikki jamoasi o‘rtasidagi murosasiz to‘qnashuvdir.
Ispaniya – Yevropaning amaldagi chempioni, Argentina – amaldagi jahon chempioni va Amerika kubogi sohibi. Bundan tashqari, aynan shu ikki jamoa hozirda FIFA reytingida eng yuqori ikki o‘rinni egallab turibdi: janubiy amerikaliklar birinchi, yevropaliklar ikkinchi o‘rinda. Bu reyting yuritilishi boshlangan 1992 yildan buyon jahon chempionati finalida uning ikki yetakchisi o‘zaro o‘ynamoqda. Qo‘shimcha intriga – bunga qadar biror marta turnir arafasida reytingda birinchi o‘rinda bo‘lgan jamoa yakunda chempionlikni qo‘lga kiritmagan, shunday ekan, bu oqshom Argentina statistikaga ham qarshi borishiga to‘g‘ri keladi.
Bundan tashqari, tarixda birinchi bor jahon birinchiligining hal qiluvchi o‘yinida ikki qit’a chempionlari to‘qnashadi. Shu yil martida Ispaniya va Argentina Qatarda bitta o‘yindan iborat turnir – Finalissimada o‘zaro kuch sinashishi rejalashtirilgandi. Ammo AQSh va Isroil Eronga qarshi urush boshlagach, bu o‘yin bekor qilingandi. Endi bu ikki jamoa baribir yanada muhimroq sovrin uchun kuch sinashadigan bo‘ldi.
Leo va u cho‘miltirgan Lamin
Argentina finalga chiqishi bilan ijtimoiy tarmoqlarda 2007 yilgi fotosurat virusdek tarqaldi, unda 20 yoshli Lionel Messi tog‘orada Lamin Yamal ism-sharifli chaqaloqni cho‘miltirayotgani aks etgan – o‘shanda u hali yarim yosh ham emasdi. Bu 2008 yilgi xayriya taqvimi uchun olingan real kartinadir.
Tabiiyki, o‘shanda hech kim bu ikki shaxs 19 yil o‘tib jahon chempionati finalida bir-biriga qarshi o‘ynashini tasavvur qila olmasdi. Qolaversa, Yamal va Messi o‘ynayotgan jamoalarning yo‘li shu vaqtgacha kesishmagandi, shunday ekan, bu ularning ilk uchrashuvi bo‘ladi.
Bu dueldagi asosiy intriga fotosuratda ham emas. Leo uchun bu o‘yin katta ehtimol bilan, jahon chempionatlaridagi so‘nggi o‘yin bo‘lib qoladi. Argentinalik futbolchi – hozirgi asrning dastlabki choragida futbolning asosiy ramzlaridan biri. Lamin esa, aksincha, yangi davr yuzlaridan va «Barselona»da Messining vorisi. Pafosli qilib aytganda, buni ikki davr to‘qnashuvi deyish ham mumkin.
Yamalning yangi rekordi
13 iyul kuni Yamal 19 yoshga to‘ldi. U endi tarixdagi eng yosh jahon chempioni bo‘la olmaydi – bu titul 1958 yilgi mundialda 17 yoshda bo‘lgan Peleda qolmoqda. U jahon birinchiliklarida oltin medal qo‘lga kiritgan eng yosh yevropalik ham bo‘la olmaydi – italiyalik Juzeppe Bergomi 1982 yil 18 yoshida chempion bo‘lgandi.
Ammo Yamal yanada yuqoriroq darajadagi maqomga erishishi mumkin – jahon va Yevropa chempionatlarida g‘olib chiqqan eng yosh futbolchi. Ikki yil oldin ushbu vinger Ispaniya milliy jamoasi bilan 17 yoshga kirganini nishonlaganidan bir kun o‘tib qit’a chempionligini ham nishonlagandi, bugun tunda esa u yana bir katta sovrinni qo‘lga kiritishi mumkin. Bungacha hech kim 19 yoshida ham Yevropa va ham jahon chempionatlarida g‘olib bo‘la olmagan.
De la Fuente yoki Skaloni: ulardan biri tarixga kiradi
Ispaniya milliy jamoasi safida ikki yil oldin Yevro g‘olibi bo‘lgan 16 nafar futbolchi bor. Ammo asosiy intriga murabbiylar shtabida. Luis de la Fuente jamoani 2022 yilgi jahon chempionatidan keyin qabul qilib olib, avvaliga qit’a birinchiligida g‘olib bo‘ldi, endi navbat jahon birinchiligiga.
Agar jamoasi bu finalda ham g‘alaba qozonsa, unda de la Fuente Yevropa chempionati va jahon chempionatida g‘olib chiqqan uchinchi murabbiyga aylanadi. Bu borada birinchisi Helmut Shen bo‘lgandi, u bu natijaga GFR termasi bilan erishgan (Yevro-1972, JCh-1974), ikkinchisi esa – ispanlarning sobiq ustozi Visente del Boskedir (JCh-2010, Yevro-2012).
Argentina milliy jamoasi ustozi Lionel Skaloni ham tarixga kirish imkoniga ega. U allaqachon Amerika kubogida ikki bor g‘alaba qozondi, Finalissimada g‘olib chiqdi, eng asosiysi, jahon chempioni bo‘lishga ham ulgurgan. Hozircha o‘z jamoasi bilan ikki bor jahon chempioni bo‘lgan yagona murabbiy – 1934 va 1938 yillarda o‘z vatani jamoasini jahon chempioniga aylantirgan italiyalik Vittorio Potsso bo‘lib qolmoqda. Boshqa so‘z bilan aytganda, Skaloni qariyb bir asrdan buyon hech kim erisha olmayotgan natijaga erishishi mumkin.
17 nafar argentinalikda ikki karra jahon chempioni bo‘lish imkoni bor
Argentina milliy jamoasi tarkibi so‘nggi to‘rt yilda deyarli o‘zgarmadi. Qaydnomadagi 26 futbolchidan 17 nafari Qatardagi mundialda ham jahon chempioni bo‘lgandi. Yakshanba oqshomidagi o‘yinda ular ikki karra jahon chempioni bo‘lish va ikki karra JCh chempioni bo‘lgan futbolchilar ro‘yxatini jiddiy darajada kengaytirish imkoniga ega – hozirda bunday ro‘yxatda 20 kishi bor. Bular asosan brazillar va italyanlardir, ammo u yerda bitta argentinalik – 1978 va 1986 yilgi mundiallarda Argentina milliy jamoasi safida bo‘lgan Daniel Passarella ham bor.
Pele esa uch karra jahon chempioni bo‘lishga muvaffaq bo‘lgan yagona futbolchidir. Ammo agar bu tunda Argentina g‘alaba qozonadigan bo‘lsa, uning rekordini ham keyingi mundiallarda qaysidir argentinalik takrorlashi mumkin bo‘ladi.
Rodri tarixga kirishi mumkin
Shu vaqtgacha faqat o‘n kishi «Oltin to‘p», jahon chempionati va Chempionlar ligasi/Yevropa chempionlari kubogini qo‘lga kiritgan:
Bobbi Charlton
Gerd Myuller
Frans Bekkenbauer
Paolo Rossi
Zinedin Zidan
Rivaldo
Ronaldinio
Kaka
Lionel Messi
Usmon Dembele
Ko‘rinib turibdiki, bu ro‘yxatda ispanlar yo‘q, shunday ekan, Rodri birinchisi bo‘lishi mumkin. 30 yoshli ushbu yarimhimoyachi 2023 yilda «Manchester Siti» bilan Chempionlar ligasi g‘olibi bo‘lgan, 2024 yilda «Oltin to‘p» uchun kurashda Vinisiusni ortda qoldirgan. Jahon chempionatida ham g‘olib chiqish uning nomini abadiylashtiradi.
Ispaniya rekordga qarab ketmoqda
Yarimfinalda Fransiya ustidan qozonilgan g‘alaba shuni anglatadiki, Ispaniya milliy jamoasi mag‘lubiyatsiz o‘yinlar seriyasini 37 o‘yinga yetkazgan. Luis de la Fuente shogirdlari oxirgi bor 2024 yil 22 mart kuni Kolumbiyaga qarshi o‘rtoqlik uchrashuvida yutqazgandi (0:1). O‘tgan yil Millatlar ligasi finalida Portugaliyaga penaltilar seriyasida boy berilgan o‘yin bu o‘rinda mag‘lubiyat deb hisoblanmaydi, chunki o‘yinning asosiy vaqti durang hisob bilan tugagan.
37 o‘yin – 2018 yildan 2021 yilga qadar bo‘lgan oraliqda umuman yutqazmagan Italiya milliy jamoasi rekordini takrorlashdir. Agar jahon chempionati finalida Ispaniya g‘alaba qozonsa yoki o‘yinni penaltilar seriyasigacha olib borsa, unda «Qizil furiya» jahon rekordini yangilaydi.
Kim eng yaxshi to‘purar bo‘ladi?
Bu safargi mundialda to‘purarlar o‘rtasida fantastik poyga kuzatilib, bir vaqtning o‘zida bir necha yulduzlar birinchilik uchun kurash olib borishdi. Uchinchi o‘rin uchun Fransiya va Angliya o‘rtasida kechgan bahsdan (4:6) keyin to‘purarlar ro‘yxati (gol+pas tizimida) quyidagi ko‘rinishda:
Kilian Mbappe (Fransiya) – 10+4
Lionel Messi (Argentina) – 8+4
Jud Bellinghem (Angliya) – 7+1
Erling Holand (Norvegiya) – 7+0
Usmon Dembele (Fransiya) – 6+2
Harri Keyn (Angliya) – 6+1
Mikel Oyyarsabal (Ispaniya) – 5+1
Gollar soni teng bo‘lib qolgan taqdirda «Oltin butsa» golli uzatmalar soni ko‘p bo‘lgan futbolchiga beriladi. Uchinchi o‘rin uchun kechgan bahsda Mbappe 2 gol urdi va bir golga uzatma berib, poygada yaqqol birinchi o‘ringa chiqib oldi. Hozirda faqat Messi va Oyyarsabalda unga yetib olish uchun nazariy imkoniyat mavjud.
Uni quvib o‘tish uchun Messi finalda yoki het-trik qayd etishi yoki 2 gol va 1 golli uzatma muallifi bo‘lishi talab etiladi. Ispaniyalik hujumchida esa amalda imkoniyat yo‘q: u finalda kamida beshta gol urishiga hech kim ishonmaydi.
Qolaversa, Messi JCh tarixidagi eng yaxshi to‘purar maqomini ham boy bergan: o‘tgan tundagi o‘yindan keyin Mbappe 22 gol bilan birinchi o‘ringa chiqib oldi, Messi undan bitta kam gol urgan.
«Oltin to‘p»ni kim oladi?
Yana bir muhim masala – «Oltin to‘p»ni kim qabul qilishi. Gap har ikki sovrin haqida ketmoqda – jahon chempionatining eng yaxshi futbolchisiga beriladigan va France Football tomonidan har yili topshiriladigan sovrinlar.
E’tiborli jihati, Messi 39 yoshida ham ushbu sovrinlar uchun real da’vogarlik qilmoqda. Yarimfinal o‘yinlaridan keyin argentinalik hujumchi ko‘p versiyalar bo‘yicha favoritga aylandi. Agar Argentina jahon chempioniga aylansa, uni turnirning eng yaxshi futbolchisi sifatida tan olmaslikning imkoni yo‘q. Agar Ispaniya g‘olib bo‘lsa, boshqa variantlar ham paydo bo‘ladi va ko‘p narsa final o‘yiniga bog‘liq.
Mbappe Messining, Olise Pelening rekordini yangiladi; Argentina va Ispaniya murabbiylari bir-birining futbolchilarini maqtamoqda, Messi Yamalning chaqaloqlikdagi mashhur suratini esladi.
Angliya va Fransiya milliy jamoalari JCh-2026 bronza medallari uchun bahsda haqiqiy shou uyushtirib berishdi. Jamoalar birgalikda 10 ta gol urishdi, bu bahsda Tomas Tuxel shogirdlari baribir g‘alabani ushlab qolishdi – 6:4.
Maydon tashqarisida ham qiziqarli voqealar davom etmoqda. Xalqaro olimpiya qo‘mitasi «Balogun ishi» bo‘yicha FIFA prezidenti Janni Infantinoni jazolamaydigan bo‘ldi, AQSh prezidenti Donald Tramp Tuxelning Argentina bilan o‘yindagi (1:2) taktikasini tanqid qildi, Ispaniya milliy jamoasi ustozi Luis de la Fuente esa finalda Lionel Messini personal qo‘riqlash yordam bermasligini tan oldi.
Hokkeycha hisob
Fransiya – Angliya 4:6
Gollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87 – penalti (3:5). Dembele, 90+6 (4:5). Bellinghem, 90+8 (4:6)
Fransiya: Menyan, Konate (Din, 46), Lakrua, Ernandez (Upamekano, 46), Gyusto (Kunde, 90), Rabio, Zair-Emeri, Sherki (Dembele, 46), Due (Barkolya, 46), Olise, Mbappe
Angliya: Henderson, Konsa, Geyi (Chaloba, 90), Kuansa (Jyeyms, 83), Spens, Rays, Rodjyers, Eze (Anderson, 79), Saka, Reshford (Uotkins, 46), Toni (Bellinghem, 79)
Tashqaridan qaraganda Fransiya – Angliya to‘qnashuvi jahon chempionatining eng yorqin afishasi edi. Ammo ushbu jamoalarning o‘zi o‘zaro o‘yinga jiddiy yondashgani yo‘q. Bir necha kun oldin ular finalni orzu qilishayotgandi, endi esa atigi uchinchi o‘rin uchun kurashishga to‘g‘ri kelardi. Tuxel ham oldindan aniq qilib aytdi: bu o‘yin uning futbolchilari uchun qiziq emas. Fransuzlardagi kabi.
«Bizning ham, Fransiya milliy jamoasining ham biror futbolchisi bu o‘yinda ishtirok etishni xohlamayapti. Barcha finalda o‘ynashni xohlagandi. Ammo qoida shunday, shuning uchun biz o‘yinga professionallarcha yondashamiz», – degandi murabbiy jurnalistlarga.
Shunga qaramay, bu o‘yin JCh tarixida qoladigan bo‘ldi. Sermahsullik bo‘yicha bu o‘yin kutilmalarni ortig‘i bilan oqladi. Murabbiylar rotatsiyaga qo‘l urgan bo‘lishsa-da, ikki tomondan Mbappe, Olise, Saka va Rays kabi yulduz futbolchilar ilk daqiqalardan harakat qilishdi.
Britanlar ilk daqiqalardan hujumkor harakat qilishdi va birinchi bo‘limning o‘zida raqib darvozasini to‘rt bor ishg‘ol etishdi. Rays 3-daqiqada hisobni ochgan, keyinroq Ezri Konsaga gol urishda yordam bergan bo‘lsa, Bukayo Saka dublni rasmiylashtirdi.
Fransuzlar esa ikkinchi bo‘limda bunday sharmandalikka rozi bo‘lishmadi va darhol javob qaytarishni boshlashdi. 66-daqiqaga kelib Dide Desham shogirdlari (bu uning jamoa boshqaruvidagi so‘nggi o‘yini edi) uchta gol urishdi: Mbappe dublni rasmiylashtirib, hozirgi turnirda ham, butun jahon chempionati tarixida ham Messini ortda qoldirdi (Kilianda endi bu turnirdagi gollar soni 10 ta, Leoda esa 8 ta, shuningdek, turnir tarixidagi barcha gollar bo‘yicha nisbat 22:21 fransuz hujumchisi foydasiga), yana bir golni uning assisti bilan Bredli Barkolya urdi.
Hisobni minimumgacha qisqatirgach, fransuzlar hisobni tenglashtirish uchun bosim qilishda davom etishdi va o‘z maqsadiga erishishi ham mumkin edi, ammo Maykl Olise qulay vaziyatdan foydalana olmadi.
Ko‘p o‘tmay Saka penaltini aniq ijro etib, het-trikni nishonladi. Ammo bu bilan o‘yindagi intrigaga barham berilmadi: o‘yin yakunigacha jamoalar yana bittadan gol urishdi. 96-daqiqada Usmon Dembele, 98-daqiqada Jud Bellinghem o‘z nomini tabloga yozdirib qo‘yishdi.
Dembelening goliga uzatma bergan Olise esa birato‘la Pelening rekordini yangilab qo‘ydi: u bir turnirdagi assistlari sonini 7 taga yetkazib, braziliyalik afsonaviy hujumchining 1970 yildagi ko‘rsatkichini yaxshiladi.
Yakuniy hisob hokkeycha ko‘rinish oldi. Jami zarbalar ko‘rsatkichi ham anomal ko‘rinishda edi – 19:19 (darvoza sohasiga to‘g‘ri borgan zarbalar bo‘yicha 11:9, xG – 2,89 ga qarshi 2,77 inglizlar foydasiga).
Tuxel esa o‘yindan oldingi fikrlariga ters o‘laroq, o‘yindan keyin baxtiyor edi va maydon bo‘ylab yurib, o‘z shogirdlarini bronza bilan tabrikladi. Bu Angliya milliy jamoasi uchun 1960 yilgi mundialdan buyon ilk medal bo‘ldi.
XOQ Infantinoni jazolamaydi
Xalqaro olimpiya qo‘mitasi AQSh milliy jamoasi hujumchisi Folarin Balogunning diskvalifikatsiyasi kechiktirilgani bilan bog‘liq vaziyat uchun FIFA prezidenti Janni Infantinoga sanksiya qo‘llamoqchi emas.
Avvalroq FairSquare notijorat tashkiloti FIFA rahbarining harakatlari yuzasidan qo‘mitaga shikoyat yo‘llagani ma’lum bo‘lgandi. Ammo The Guardian manbasiga ko‘ra, XOQ xalqaro federatsiyalarning o‘z qoidalarini qo‘llash xususiyatlariga aralashishni istamaydi.
Nashrning boshqa suhbatdoshi so‘zlariga ko‘ra, XOQ va FIFA o‘rtasidagi kuchlar muvozanati so‘nggi yigirma yil ichida futbol tashkiloti foydasiga sezilarli darajada o‘zgargan – uning ta’siri tijorat daromadlari va yosh auditoriyani jalb qilish borasida ortib bormoqda.
Eslatib o‘tamiz, Balogun JCh 1/16 finalida Bosniya va Hersegovinaga qarshi o‘yinda (2:0) «jiddiy qoidabuzarlik» uchun to‘g‘ridan to‘g‘ri qizil kartochka olgandi va kamida ikkita o‘yinni o‘tkazib yuborishi kerak edi.
Ammo FIFA intizomiy qo‘mitasi diskvalifikatsiya amal qilishini bir yillik sinov muddati uchun to‘xtatdi va futbolchi 1/8 finalda Belgiyaga qarshi kechgan o‘yinda (1:4) maydonga tushdi. Keyinroq AQSh prezidenti Donald Tramp ushbu masalada Infantino bilan gaplashganini tan oldi.
Nyu Yorkdagi smog JCh finaliga xalal bermaydi
Hafta davomida Ole nashri Ispaniya va Argentina o‘rtasidagi hal qiluvchi Kanadada avj olgan o‘rmon yong‘inlari tufayli boshqa joyga ko‘chirilishi mumkinligi haqida xabar tarqatgandi. Qo‘shni mamlakatda ko‘tarilgan tutun AQSh shimoli-sharqigacha kelgan va yirik shaharlarga yaqinlashgan – payshanba kuni havo ifloslanishi tufayli Chikagoda MLS o‘yini ko‘chirilgandi.
Smog 19 iyul kuni kechqurun jahon chempionati finali o‘tkaziladigan Nyu York shahriga ham yopirilgan. Ammo Bloomberg agentligi o‘z manbalariga tayanib xabar berishicha, FIFA o‘yin vaqti va joyini ko‘chirmoqchi emas.
Materialda xabar qilinishicha, futbol federatsiyalari vakillari bu haqda Oq uyning turnirga tayyorgarlik ko‘rish bo‘yicha ishchi guruhi rahbari Endryu Juliani bilan norasmiy suhbat o‘tkazgan. Ular o‘rtasida iqlim masalasi bo‘yicha rasmiy uchrashuvlar rejalashtirilmagan.
Ispaniya va Argentina murabbiylari Messi va Yamalni maqtamoqda
JCh hal qiluvchi o‘yini arafasida Argentina va Ispaniya milliy jamoalari ustozlari bir-birining futbolchilariga kompliment yog‘dirdi. Lionel Skaloni «Qizil furiya» vingeri Lamin Yamalga yuqori baho bergan, Luis de la Fuente – «Albiseleste» sardori Lionel Messi sha’niga maqtov yog‘dirgan.
«Yamal – futbol xazinasi, – deya Skalonining so‘zlarini keltiradi Ole. – Unga qarshi himoyalanish juda qiyin, u Ispaniyaga katta quvonch keltirishi mumkin bo‘lgan futbolchi. Umid qilamanki, yakshanba kuni bunday bo‘lmaydi. Albatta, uni mehmonxonaga qamab, maydonga chiqarmaslikni istardim».
De la Fuente esa ispanlar Messiga qarshi personal himoyalanmasligi, chunki bundan naf yo‘qligini aytdi.
«Men Leoni «Sevilya» yoshlar jamoasini shug‘ullantirib yurgan davrimdan buyon bilaman. Biz uning yoniga bir futbolchi qo‘ydik, keyin u kartochka oldi, men uni almashtirdim va Messi bizga uchta gol urdi. Uni personal qo‘riqlashni tashkil qilmaymiz, ammo diqqatli bo‘lamiz.
Messining o‘zi – alohida bir tarix. Afsona. 39 yoshda finalga chiqish – aql bovar qilmas ish! U shu yerdaligida o‘yinidan zavqlanish kerak. Diyego Maradonaning yo‘qligi bilinadi, chunki u endi biz bilan emas. Ammo Messi hamon shu yerda», – deya uning so‘zlarini keltiradi Marca.
Messi o‘zi va Yamalning chaqaloqlikdagi fotosini esladi
2007 yilda Leo Sport gazetasining YUNISEF bilan (o‘shanda «Barselona» homiylaridan edi) hamkorlikda tayyorlangan xayriya taqvimi uchun suratga tushgan. Bu loyiha doirasida klub futbolchilari bolalar bilan suratga tushardi: yosh ishtirokchilarni tanlash uchun tashkilot lotereya o‘tkazadi – va g‘oliblardan biri Yamalning ota-onasi bo‘ladi.
20 yoshli Messi plastik vannada besh oylik Laminni cho‘miltirayotgani aks etgan surat shu taxlit paydo bo‘lgan. 19 yil o‘tib futbolchilar JCh-2026 finalida bir-biriga qarshi o‘ynaydi. Turnirning hal qiluvchi o‘yini oldidan argentinalik hujumchi ushbu fakt haqida esladi va uni aql bovar qilmas hodisa deb atadi.
«To‘g‘risini aytsam, bu suratimiz juda ajoyib. Hayot shunaqa, to‘g‘rimi? Men u bilan go‘dakligida suratga tushganman, mana endi ikkimiz jahon chempionati finalida yuzma-yuz turibmiz.
Lamin – juda iste’dodli futbolchi, men uni ko‘p kuzataman, chunki u men sevgan klub – «Barselona»da o‘ynaydi va men unga doimo eng yaxshi tilaklarni tilayman. 19 yoshida u dunyoning eng yaxshi futbolchilaridan biri hisoblanadi va uning butun karerasi hali oldinda», – deya Messining so‘zlarini keltiradi The Athletic.
Tuxelni Tramp ham tanqid qildi
Inglizlar JCh yarimfinalida Argentinaga qarshi o‘yinda birinchi bo‘lib hisob ochgan, ammo shundan keyin to‘liq himoyalangan va o‘yin oxirida ikki gol o‘tkazib, yutqazib qo‘ygandi (1:2).
O‘yindan keyin faqat dangasa kishilargina «Uch sherlar» ustozi Tomas Tuxelning bu o‘xshamagan rejasini tanqid qilmadi. Bunga hatto AQSh prezidenti Donald Tramp ham qo‘shildi.
«Angliya milliy jamoasida biz birga golf o‘ynaydigan ajoyib futbolchi bor – Harri Keyn. U ajoyib. Menimcha, ular uni himoyaga o‘tkazib, xatoga yo‘l qo‘yishdi. Ammo men futbolda nimani ham bilardim? Ular hisobda oldinga chiqishdi va eng yaxshi o‘yinchisini himoyaga qo‘yishdi.
Axir biroz hujum qilish kerak edi, shunday emasmi? Bu noodatiy qaror bo‘ldi», – degan Oq uy egasi FIFA rahbari Janni Infantino bilan birgalikdagi matbuot anjumanida.
Navbatdagi o‘yin
Jahon chempionatida atigi bitta o‘yin qoldi – eng muhimi – final.
20 iyulga o‘tar kechasi, 00.00. Ispaniya – Argentina
Bank depozitlari bir yilda 118 trln so‘mga ko‘paydi
Energetika vazirligi va uning quyi bo‘g‘inlari jiddiy tanqid ostiga olindi
Yaponiyalik ayollar 41 marta rekord o’rnatdilar
-
Iqtisodiyot4 days ago
Toshkent yarim yilda 1,5 mlrd dollarlik mahsulot va xizmatlarni eksport qildi
-
Dunyodan4 days ago
Ukraina armiyasining bosh qo‘mondoni almashtirildi.
-
Iqtisodiyot4 days ago
O‘zbekistonda qurilgan yo‘llar sifatini tekshirish uchun laboratoriya sinovlari o‘tkaziladi
-
Turk dunyosi4 days agoNYT hisoboti: Eronning ishonchli tahdidi Prezident Trampni Turkiyadagi havo kuchlari 1-ni almashtirishga undadi
-
Dunyodan3 days agoRossiya jinoiy javobgarlikka tortilgan muhojirlarga fuqarolikni rad etadi
-
Sport5 days ago
O‘zbekiston terma jamoasining Osiyo o‘yinlaridagi raqiblari aniq bo‘ldi
-
Mahalliy5 days ago
Test kitobini yirtgan abituriyent, «shpargalka» sabab yo‘qotilgan 3 yil: imtihon manzaralari
-
Sport2 days ago
Abduqodir Husanov «Manchester City» bilan shartnomasini 2031 yilgacha uzaytirdi