Sport
JChda 14-kun. Neymar maydonga qaytdi, Koreya yutqazib qo‘ydi
Pley-offning dastlabki juftligi aniq bo‘ldi; Janubiy Koreya va Qatar yutqazib qo‘yishi vaziyatni O‘zbekiston uchun yanada yomonlashtirib yubordi. Endi Kannavaro shogirdlari uchinchi o‘rin vakillari reytingida sakkizlikka kirishi uchun kongoliklarni faqat yirik hisobda yengishi talab etiladi.
Jahon chempionatida guruh bosqichi yakuniga yetmoqda, uchinchi turning dastlabki kuni ham voqealarga boy bo‘ldi. 24 iyundan 25 iyunga o‘tar kechasi 6 ta uchrashuv o‘tkazildi hamda A, B va C kvartetlarida jamoalarning yakuniy o‘rinlari ma’lum bo‘lli. Meksika milliy jamoasi Chexiyani yirik hisobda taslim etdi (3:0), JAR Janubiy Koreya ustidan sensatsion g‘alabaga erishdi (1:0), Marokash Haiti bilan o‘yinda kambek amalga oshirdi (4:2), Braziliya Shotlandiyaga hech qanday imkon qoldirmadi (3:0), Shveytsariya Kanadadan ustun keldi (2:1), Bosniya va Hersegovina esa Qatarni uyiga jo‘natdi (3:1).
Maydon tashqarisida ham qiziqarli voqealar bo‘lib o‘tdi: Janni Infantino suv ichib olish uchun qilinayotgan tanaffus FIFAga pul keltirmasligini ma’lum qildi, ganalik shaman esa Harri Keyndan tavqi la’natni «olib tashladi».
A guruhi
Meksika Ochoaga ham imkon berdi
Chexiya – Meksika 0:3
Gollar: Chaves, 55 (0:1). Kiniones, 61 (0:2). Fidalgo, 90+4 (0:3)
Chexiya: Kovarj, Granach, Kreychi, Xolesh (Souchek, 64, Xori, 87), Cherv (Soyka, 87), Sadilek, Dudera, Tsoufal, Shuls, Vishinski (Provod, 56), Glojyek (Shik, 64)
Meksika: Ranhel (Ochoa, 78), Montes, Reyyes, Chaves (Galyardo, 78), Sanches, Alvares, Romo (Vargas, 63), Mora (Fidalgo, 72), Kiniones, Alvarado, Martines (Ximenes, 63)
Ogohlantirishlar: Alvares, 64
1/16 finalga chiqish uchun Chexiyadan haddan tashqari qiyin vazifani uddalash talab etilardi – jahon chempionatidagi eng ishonchli himoya chizig‘ini yorib o‘tish. A guruhida dastlabki ikki turda JAR (2:0) va Janubiy Koreya (1:0) meksikaliklar darvozasiga gol urolmagandi. Bu ish yevropaliklarga ham nasib etmadi.
Birinchi bo‘lim teng kurashlar ostida kechdi, jamoalar chinakamiga xavfli vaziyatlar yarata olishmadi. Ammo tanaffusdan keyin turnir mezbonlaridan biri o‘yinni kuchaytirishdi va raqib darvozasini uch bor ishg‘ol etishdi: Mateo Chaves, Hulian Kinones va Alvaro Fidalgo o‘z nomlariga bittadan gol yozdirib qo‘yishdi.
O‘yin yakunlanishi arafasida meksikalik muxlislar uchun yana bir quvonchli voqea ro‘y berdi: bu chempionatda ilk bor jamoaning afsonaviy darvozaboni Gilermo Ochoa maydonga tushib keldi. 40 yoshli posbon uchun bu faoliyatidagi oltinchi mundial bo‘ldi. U o‘zi munosib bo‘lgan olqishlarga va qariyb 20 daqiqaga ega bo‘ldi.
Chexlar esa ikkinchi bo‘lim davomida ham aytarli vaziyat yarata olmadi. Miroslav Koubek shogirdlari guruhda so‘nggi o‘rinni egallab, turnirni tark etadigan bo‘ldi.
JAR ikkinchi o‘rin bilan pley-offga chiqdi
JAR – Janubiy Koreya 1:0
Gol: Maseko, 63 (1:0)
JAR: Uilyams, Mbokazi, Okon, Modiba, Mudau, Mbata, Sitole, Mofokeng (Adams, 80), Appollis (Moremi, 62), Maseko (Rayners, 75), Makgopa
Janubiy Koreya: Kim Sin Gu, Kim Min Je (Pak Jin Seob, 66), Li Gi Hek, Li Xan Bem, Xvang In Bom, Pek Sin Ho (Kastrop, 46), Li Te Sok (Kim Jin Kyu, 46), Sol Yen U, Hvang Hi Chhang (Son Heung Min, 46), Li Kan In, Hon Gu O (Guye Son Cho, 74)
Ogohlantirishlar: Modiba, 73 – Guye Son Cho, 79
Ikkinchi turda Chexiya bilan durangga erishgan (1:1) janubiy afrikaliklar pley-off yo‘llanmasini kafolatlash imkoniyatidan foydalanishga qaror qilishdi. Ikkinchi o‘rinni egallash uchun jamoadan ikkinchi o‘rin uchun asosiy da’vogar bo‘lgan Janubiy Koreyani mag‘lub etish talab etilardi.
Osiyoliklar jamoasi o‘yinning boshlang‘ich qismini ustunlikda o‘tkazdi, ammo asta-sekin tashabbus JAR qo‘liga o‘ta boshladi. Ugo Bros shogirdlari o‘yinni kuchaytirib borishdi va maydonning ikkinchi qismida ko‘proq ishlab, tez-tez zarbalar bera boshladi. Va ikkinchi bo‘limda o‘zi haqli bo‘lgan golni urishga erishdi: hujumchi Tapelo Maseko o‘z nomini tabloga yozdirib qo‘ydi. Shundan keyin afrikaliklar to‘pni raqibga topshirdi va so‘nggi daqiqalargacha himoyada ishonchli harakat qilishdi.
Minimal g‘alaba va guruhdagi ikkinchi o‘rin jamoani tarixda ilk bor pley-offga olib chiqdi – endi ularni Kanadaga qarshi o‘yin kutmoqda. Sensatsion ravishda yutqazib qo‘ygan janubiy koreyaliklar esa uchinchi o‘ringa tushib ketdi va guruh bosqichi yakunlanishini kutish rejimiga o‘tdi.
Shu bilan birga, osiyoliklarning bu mag‘lubiyati qit’aning boshqa bir vakili – O‘zbekiston uchun qimmatga tushdi. Agar koreyslar o‘z o‘yinida g‘alaba qozonganida JAR 1 ochko bilan uchinchi o‘rinda qolgan bo‘lar va O‘zbekistonga guruhdan chiqish uchun raqobatchi bo‘la olmasdi. Koreya esa endi to‘plar nisbati nisbatan yaxshiligi (-1) hisobiga katta ehtimol bilan uchinchi o‘rin vakillari orasidagi sakkizlikka kira oladi. To‘plar nisbati juda yomon bo‘lgan (-7) O‘zbekiston endi bu sakkizlikka kirishi uchun Kongo DR ustidan juda yirik hisobda g‘alaba qozonishi talab etiladi.
B guruhi
Kelishilgan durang bo‘lmadi
Shveytsariya – Kanada 2:1
Gollar: Vargas, 46 (1:0). Manzambi, 57 (2:0). P. Devid, 76 (2:1)
Shveytsariya: Kobel, Elvedi, Akanji, Rodriges, Hakes (Vidmer, 74), Froyler, Jaka, Manzambi (Fassnaht, 85), Vargas (Ndoy, 80), Sou (Ebisher, 74), Embolo (Itten, 85)
Kanada: Krepo, De Fujyerol, Kornelius, Lareya (Shaffelberg, 83), Jonston, Shuaner (Eushtakiu, 58), Saliba, Ahmad (Millar, 58), Byukenen (P. Devid, 74), Larin (Oluvaseyi, 58), J. Devid
Ogohlantirishlar: Jaka, 32 – Larin, 32. Millar, 87
Kanada ham, Shveytsariya ham ikkinchi turdan keyin 4 tadan ochko jamg‘arib, amalda pley-off masalasini hal qilgandi. So‘nggi turda o‘zaro kechadigan o‘yinda jamoalarni durang ham qoniqtirardi – shunda Bosniya va Hersegovina – Qatar o‘yini natijasidan qat’i nazar birinchi va ikkinchi o‘rinlar saqlab qolingan bo‘lardi.
O‘yinning birinchi bo‘limi davomida amalda ham jamoalar durangga qarshi emasdek ko‘rindi. Ammo ikkinchi bo‘lim boshlanishi bilan shveysarlarning yosh yulduzi Joan Manzambi Ruben Vargasni golli pas bilan ta’minladi va hisob ochildi. Ko‘p o‘tmay jahon chempionati kashfiyotlaridan biri bo‘layotgan yosh vunderkindning o‘zi hisobdagi ustunlikni mustahkamladi.
Ammo turnir mezbonlari shunchaki taslim bo‘lishni istashmadi va zaxiradan o‘yinga qo‘shilgan Devid Promis bitta javob golini urdi. O‘yin oxirigacha hisobni tenglashtirish uchun kanadaliklarda yana bir necha imkoniyat bo‘ldi, ammo o‘yin baribir Shveytsariyaning g‘alabasi bilan yakunlandi (2:1). Shu bilan birga, mag‘lubiyat ham Jyessi Marsh shogirdlarini ikkinchi o‘rindan pastga tushirib yubormadi – bosniyaliklar Kanadadan o‘tib ketishi uchun parallel o‘yinda o‘ta yirik hisobda g‘alaba qozonishi talab etilardi.
Qatar ojizlik qildi
Bosniya va Hersegovina – Qatar 3:1
Gollar: Alaybegovich, 29 (1:0). Abunada, 34 – avtogol (2:0). Al-Haydos, 42 (2:1). Maxmich, 80 (3:1)
Bosniya va Hersegovina: Vasil, Katich (Hajikadunich, 63), Radelich, Kolashinats, Malich (Tahirovich, 46), Bashich, Shunich (Memich, 46), Alaybegovich (Burnich, 82), Bayraktarevich, Demirovich, Jyeko (Maxmich, 63)
Qatar: Abunada, Layye, Huhi, Al-Brake, Pedru Migel, Fati (Al-Mannai, 79), Budiaf (Almuoz Ali, 72), Abdulsalom (Hatim, 46), Al-Haydos (Al-Ganehi, 55), Edmilson Junior (Al-Ayeldin, 79), Afif
Ogohlantirishlar: Maxmich, 82 – Fati, 78
Qatarliklar o‘tgan turda Kanadadan o‘ta yirik hisobda yutqazganiga qaramay (0:6), hamon uchinchi o‘rin orqali pley-offga chiqish imkoniyatini saqlab turgandi. Buning uchun Bosniya va Hersegovinani imkon qadar yirik hisobda mag‘lub etish talab etilardi.
Ammo 18 yoshli Karim Alaybegovich 29-daqiqada qatarliklarning umidlarini so‘ndirdi. U jahon chempionatida gol urgan eng yosh futbolchilar o‘nligiga kirib, Lamin Yamal va Lionel Messini ortda qoldirdi.
Ko‘po‘ o‘tmay Qatar o‘z futbolchisidan ham gol o‘tkazib yubordi: Sulton Al-Brake avtogol muallifiga aylandi. Shundan keyin barcha yevropaliklar hisobni yiriklashtirishiga tayyorlana boshladi (bosniyaliklarga ikkinchi o‘ringa chiqish uchun yana 7 ta gol kerak bo‘lardi), lekin bo‘lim oxirlarida Hasan Al-Haydos hisobni qisqartirdi.
Qatarliklarda bundan ortig‘iga kuch topilmadi. O‘yin oxirida Ermin Maxmich yana bir gol urdi va yakuniy hisobni o‘rnatdi – 3:1.
Qatar kutilganidek guruhda to‘rtinchi o‘rinni egalladi, ammo shu kuni arablarda ham o‘z qit’adoshlari – O‘zbekistonga yordam berish imkoniyati bor edi. Agar bu o‘yinda durang natija qayd etilganida Bosniya va Hersegovina ikki ochko bilan qolar va pley-off uchun kurashdan chiqqan bo‘lardi. Ammo endi to‘rt ochkoga ega bo‘lgan bu jamoa katta ehtimol bilan uchinchi o‘rinlar orasidagi sakkizlikning eng yuqorisida bo‘ladi.
C guruhi
Haiti marokashliklarga muammo tug‘dirdi
Marokash – Haiti 4:2
Gollar: Bunu, 10 – avtogol (0:1). Hakimi, 39 (1:1). Izidor, 43 (1:2). Saybari, 45+1 (2:2). Rahimi, 78 (3:2). Yosin, 89 (4:2)
Marokash: Bunu, Riyoz, Halhal, Salohiddin (Mazraviy, 83), Hakimi, Amrabat, Al-Aynaviy (Al Murabet, 83), Saybari (Unai, 70), Al-Hannus, Dias (Rahimiy, 70), Al-Kaabi (Yosin, 70)
Haiti: Plasid, Ade, Delkrua, Eksperens, Dyuvern (Arkus, 80), Bellegard, Denli (Simon, 80), Providens (Didson, 67), Kazimir, Jozef (Perro, 83), Izidor (Nazon, 67)
Ogohlantirishlar: Plasid, 79. Nazon, 79. Kazimir, 90
C guruhida Marokash va Haiti o‘rtasidagi kechgan o‘yinda esa amalda intriga yo‘q edi. KONKAKAF vakillari dastlabki turlarda yutqazib, pley-offga chiqishdan umid uzgandi, birinchi turda Braziliyadan ochko tortib olgan (1:1) va keyin Shotlandiyani minimal hisobda mag‘lub etgan (1:0) afrikaliklar esa o‘zini juda qulay his qilayotgandi. Bunday o‘yinda futbolchilar muxlislar uchun o‘ynashdi va gollar shousini uyushtirishdi.
Va barchasi Haiti kutilmaganda tezkor gol urishi bilan boshlandi: 10-daqiqadayoq Lenni Jozef qanotdan oshirilgan to‘pga tovoni bilan zarba berdi, to‘p darvozabonga tekkan holda yo‘nalishini o‘zgartirib, to‘rga borib tushdi. Afrikaliklar javob qaytarish uchun oldinga tashlanishdi va bir qancha supervaziyatlar yaratishdi va faqat 39-daqiqaga kelib Ashraf Hakimining sa’y-harakatlari bilan hisobni tenglashtirishdi. Ammo haitiliklar darhol javob qaytarishdi – «Sanderlend» hujumchisi Vilson Izidor to‘qqizlik tomon kuchli zarba yo‘lladi.
Birinchi bo‘limga qo‘shib berilgan daqiqalarda esa Ismoil Saybari yana muvozanatni tikladi (u qatorasiga uch o‘yinda gol urmoqda) va jamoalar tanaffusga 2:2 hisobida yo‘l olishdi.
Ikkinchi bo‘limda o‘yin sur’ati pasaydi. Haitiliklar durang hisobni saqlash va jahon chempionatidagi ilk ochkosini qo‘lga kiritishga harakat qilishdi, ammo buni uddalay olishmadi. O‘yin oxirida marokashliklar zaxirani ishga solib, Sufyon Rahimiy hamda Jasim Yosinning gollari evaziga ishonchli g‘alabaga erishdi – 4:2.
Vinisius Messini ta’qib qilmoqda
Shotlandiya – Braziliya 0:3
Gollar: Vinisius Junior, 7 (0:1). Vinisius Junior, 45+3 (0:2). Kunya, 60 (0:3)
Shotlandiya: Gann, Hendri, Makkenna, Roberson (Tirni, 46), Patterson (Ralston, 81), Fergyuson, Maklin, Maktominay, Makginn (Kertis, 90+1), Douk (Kristi, 81), Shenklend (Adams, 90+1)
Braziliya: Alisson, Gabriel Magalyayns, Markinios, Duglas Santos (Aleks Sandru, 82), Danilu Luis, Kazemiro (Fabinio, 66), Lukas Paketa (Martinelli, 66), Gimarayns, Vinisius Junior, Rayan (Endrik, 82), Kunya (Neymar, 76)
Ogohlantirishlar: Kristi, 89 – Danilu Luis, 62. Fabinio, 82
Parallel bahsda Braziliya guruhda birinchi o‘rinni egallashni maqsad qilgan holda harakat qildi. Shotlandlarning bu o‘yin uchun taktikasi tushunarli edi: ularni kichik hisobdagi mag‘lubiyat ham qoniqtirardi va jamoa ilk daqiqalardan chuqur himoyalanishdi. Ammo bu reja yettinchi daqiqadayoq buzilib ketdi: yevropaliklar qisqa to‘p uzatishlar bilan himoyadan chiqishda xatoga yo‘l qo‘yishdi, pentakampeonlar muvaffaqiyatli pressing uyushtirishdi va Vinisius Junior hisobni ochdi.
Birinchi bo‘lim oxirlarida Braziliyaning bosimi yana natija keltirdi: Brunu Gimarayns «Real» vingeriga havodan to‘p oshirdi – u esa to‘pni o‘ziga bo‘ysundirib, dublni rasmiylashtirdi. Qatorasiga uchinchi o‘yinda gol urayotgan Vini endi to‘purarlar poygasida 4 gol bilan Messini (5) ta’qib etuvchilar guruhiga qo‘shildi (Holand va Mbappeda ham hozircha 4 tadan gol bor). 60-daqiqada esa Mateus Kunya ham o‘z hisobiga gol yozib qo‘yib, janubiy amerikaliklarning yirik hisobdagi g‘alabasini ta’minladi – 3:0.
Shundan keyin jamoalar sur’atni pasaytirishdi va o‘yinning asosiy voqeasi ro‘y berdi: jarohatidan tuzalgan Neymar maydonga olqishlar ostida tushib keldi. Braziliya tarixidagi eng yaxshi to‘purar milliy jamoada 2023 yildan buyon o‘ynamayotgandi, Karlo Anchelotti esa unga imkoniyat berdi.
Futbolchi murabbiyning ishonchini oqladi va o‘ziga berilgan daqiqalarda yo‘qolib qolmadi: sheriklariga vaziyatlar yaratdi va o‘zi ham bir bor zarba berdi. Unda hali gol urish uchun ham imkoniyat bo‘lishi mumkin – jamoa guruhda birinchi o‘rinni olib, pley-offga chiqdi.
FIFA o‘yin vaqtidagi pauzalar orqali pul ishlamayapti
Jahon chempionatida bo‘limlar o‘rtasida yuzaga kelayotgan va uch daqiqa davom etayotgan tanaffuslar muxlislarda ham, murabbiylarda ham norozilik uyg‘otmoqda.
Ko‘pchilik bu qoidada «FIFAning qo‘li borligi»ni, reklama slotlari ko‘payishi evaziga tashkilot ko‘proq pul ishlayotganini taxmin qilgandi. Ammo Janni Infantino bunday ayblovni rad etib chiqdi.
«FIFAda qo‘shimcha daromad yo‘q, chunki barcha tijorat shartnomalari oldindan imzolangan. Biz uchun bu moliyaviy masala emas, balki sof sport masalasi», – deya FIFA rahbarining so‘zlarini keltiradi tashkilot sayti.
Keyndan tavqi la’nat «olib tashlandi»
Ganadan bo‘lgan shaman Nana Kvaku Bonsam o‘z jamoasining Angliya bilan o‘yinidan oldin raqiblar hujumchisi Harri Keynni la’natlaganini aytib chiqqandi. Natijada ushbu futbolchi yaqqol golli vaziyatdan foydalana olmadi va o‘yin durang hisobda yakunlandi (0:0) va ko‘pchilik ushbu shamanning so‘zlariga ishonib qoldi.
O‘yindan keyin esa ushbu sehrgar futbolchiga gol urishda davom etishi mumkinligini bildirdi. «Men dunyodagi eng qudratli shamanman. Endi Angliyaning keyingi o‘yinlarida gol ura olishi uchun Keynni ozod etaman. Mendan xafa bo‘lmasin», – deya Bonsamning so‘zlarini keltirgan Daily Star.
Bellinghem nega chetlatilmadi?
Aynan Gana bilan bo‘lib o‘tgan o‘sha o‘yin (0:0) ortidan Jud Bellinghem mojaroli holat markazida qoldi. U o‘yinning 38-daqiqasida ganaliklar hujumchisi Jordan Ayyu bilan gaplashayotganida og‘zini qo‘li bilan bekitib olgandi, yangi qoidalarga ko‘ra esa bu harakat qizil kartochka bilan jazolanishi kerak.
Turnir davomida xuddi shunday holat uchun Paragvay hujumchisi Migel Almiron maydondan chetlatilgandi. Judning vaziyati esa hakamlar e’tiboridan chetda qoldi.
Paragvay futbol federatsiyasidagilar norozilik bildirib chiqdi.
«Qoida barcha jamoalarga bir xil qo‘llanilishi kerak, aks holda u o‘z obro‘sini yo‘qotadi», – deya tashkilotdagi manbaning so‘zlarini keltiradi AS nashri.
Navbatdagi o‘yinlar
Uchinchi tur avjiga chiqmoqda. 25 iyun kuni kechqurun va 26 iyunga o‘tar kechasi yana oltita o‘yin bo‘lib o‘tadi:
01.00 Kyurasao – Kot-d’Ivuar
01.00 Ekvador – Germaniya
04.00 Tunis – Niderlandiya
04.00 Yaponiya – Shvetsiya
07.00 Paragvay – Avstraliya
07.00 Turkiya – AQSh
Bugun tunda Ispaniya va Argentina keyingi to‘rt yillikning eng kuchli jamoasini aniqlaydi.
JCh-2026 finali
Ispaniya – Argentina
20 iyulga o‘tar kechasi, 00.00. New York/New Jersey Stadium (Nyu York)
Shunchaki eng kuchlilar
Bunday afishadagi final jahon chempionatiga ideal darajada mos keladi, chunki bu sayyoraning eng yaxshi ikki jamoasi o‘rtasidagi murosasiz to‘qnashuvdir.
Ispaniya – Yevropaning amaldagi chempioni, Argentina – amaldagi jahon chempioni va Amerika kubogi sohibi. Bundan tashqari, aynan shu ikki jamoa hozirda FIFA reytingida eng yuqori ikki o‘rinni egallab turibdi: janubiy amerikaliklar birinchi, yevropaliklar ikkinchi o‘rinda. Bu reyting yuritilishi boshlangan 1992 yildan buyon jahon chempionati finalida uning ikki yetakchisi o‘zaro o‘ynamoqda. Qo‘shimcha intriga – bunga qadar biror marta turnir arafasida reytingda birinchi o‘rinda bo‘lgan jamoa yakunda chempionlikni qo‘lga kiritmagan, shunday ekan, bu oqshom Argentina statistikaga ham qarshi borishiga to‘g‘ri keladi.
Bundan tashqari, tarixda birinchi bor jahon birinchiligining hal qiluvchi o‘yinida ikki qit’a chempionlari to‘qnashadi. Shu yil martida Ispaniya va Argentina Qatarda bitta o‘yindan iborat turnir – Finalissimada o‘zaro kuch sinashishi rejalashtirilgandi. Ammo AQSh va Isroil Eronga qarshi urush boshlagach, bu o‘yin bekor qilingandi. Endi bu ikki jamoa baribir yanada muhimroq sovrin uchun kuch sinashadigan bo‘ldi.
Leo va u cho‘miltirgan Lamin
Argentina finalga chiqishi bilan ijtimoiy tarmoqlarda 2007 yilgi fotosurat virusdek tarqaldi, unda 20 yoshli Lionel Messi tog‘orada Lamin Yamal ism-sharifli chaqaloqni cho‘miltirayotgani aks etgan – o‘shanda u hali yarim yosh ham emasdi. Bu 2008 yilgi xayriya taqvimi uchun olingan real kartinadir.
Tabiiyki, o‘shanda hech kim bu ikki shaxs 19 yil o‘tib jahon chempionati finalida bir-biriga qarshi o‘ynashini tasavvur qila olmasdi. Qolaversa, Yamal va Messi o‘ynayotgan jamoalarning yo‘li shu vaqtgacha kesishmagandi, shunday ekan, bu ularning ilk uchrashuvi bo‘ladi.
Bu dueldagi asosiy intriga fotosuratda ham emas. Leo uchun bu o‘yin katta ehtimol bilan, jahon chempionatlaridagi so‘nggi o‘yin bo‘lib qoladi. Argentinalik futbolchi – hozirgi asrning dastlabki choragida futbolning asosiy ramzlaridan biri. Lamin esa, aksincha, yangi davr yuzlaridan va «Barselona»da Messining vorisi. Pafosli qilib aytganda, buni ikki davr to‘qnashuvi deyish ham mumkin.
Yamalning yangi rekordi
13 iyul kuni Yamal 19 yoshga to‘ldi. U endi tarixdagi eng yosh jahon chempioni bo‘la olmaydi – bu titul 1958 yilgi mundialda 17 yoshda bo‘lgan Peleda qolmoqda. U jahon birinchiliklarida oltin medal qo‘lga kiritgan eng yosh yevropalik ham bo‘la olmaydi – italiyalik Juzeppe Bergomi 1982 yil 18 yoshida chempion bo‘lgandi.
Ammo Yamal yanada yuqoriroq darajadagi maqomga erishishi mumkin – jahon va Yevropa chempionatlarida g‘olib chiqqan eng yosh futbolchi. Ikki yil oldin ushbu vinger Ispaniya milliy jamoasi bilan 17 yoshga kirganini nishonlaganidan bir kun o‘tib qit’a chempionligini ham nishonlagandi, bugun tunda esa u yana bir katta sovrinni qo‘lga kiritishi mumkin. Bungacha hech kim 19 yoshida ham Yevropa va ham jahon chempionatlarida g‘olib bo‘la olmagan.
De la Fuente yoki Skaloni: ulardan biri tarixga kiradi
Ispaniya milliy jamoasi safida ikki yil oldin Yevro g‘olibi bo‘lgan 16 nafar futbolchi bor. Ammo asosiy intriga murabbiylar shtabida. Luis de la Fuente jamoani 2022 yilgi jahon chempionatidan keyin qabul qilib olib, avvaliga qit’a birinchiligida g‘olib bo‘ldi, endi navbat jahon birinchiligiga.
Agar jamoasi bu finalda ham g‘alaba qozonsa, unda de la Fuente Yevropa chempionati va jahon chempionatida g‘olib chiqqan uchinchi murabbiyga aylanadi. Bu borada birinchisi Helmut Shen bo‘lgandi, u bu natijaga GFR termasi bilan erishgan (Yevro-1972, JCh-1974), ikkinchisi esa – ispanlarning sobiq ustozi Visente del Boskedir (JCh-2010, Yevro-2012).
Argentina milliy jamoasi ustozi Lionel Skaloni ham tarixga kirish imkoniga ega. U allaqachon Amerika kubogida ikki bor g‘alaba qozondi, Finalissimada g‘olib chiqdi, eng asosiysi, jahon chempioni bo‘lishga ham ulgurgan. Hozircha o‘z jamoasi bilan ikki bor jahon chempioni bo‘lgan yagona murabbiy – 1934 va 1938 yillarda o‘z vatani jamoasini jahon chempioniga aylantirgan italiyalik Vittorio Potsso bo‘lib qolmoqda. Boshqa so‘z bilan aytganda, Skaloni qariyb bir asrdan buyon hech kim erisha olmayotgan natijaga erishishi mumkin.
17 nafar argentinalikda ikki karra jahon chempioni bo‘lish imkoni bor
Argentina milliy jamoasi tarkibi so‘nggi to‘rt yilda deyarli o‘zgarmadi. Qaydnomadagi 26 futbolchidan 17 nafari Qatardagi mundialda ham jahon chempioni bo‘lgandi. Yakshanba oqshomidagi o‘yinda ular ikki karra jahon chempioni bo‘lish va ikki karra JCh chempioni bo‘lgan futbolchilar ro‘yxatini jiddiy darajada kengaytirish imkoniga ega – hozirda bunday ro‘yxatda 20 kishi bor. Bular asosan brazillar va italyanlardir, ammo u yerda bitta argentinalik – 1978 va 1986 yilgi mundiallarda Argentina milliy jamoasi safida bo‘lgan Daniel Passarella ham bor.
Pele esa uch karra jahon chempioni bo‘lishga muvaffaq bo‘lgan yagona futbolchidir. Ammo agar bu tunda Argentina g‘alaba qozonadigan bo‘lsa, uning rekordini ham keyingi mundiallarda qaysidir argentinalik takrorlashi mumkin bo‘ladi.
Rodri tarixga kirishi mumkin
Shu vaqtgacha faqat o‘n kishi «Oltin to‘p», jahon chempionati va Chempionlar ligasi/Yevropa chempionlari kubogini qo‘lga kiritgan:
Bobbi Charlton
Gerd Myuller
Frans Bekkenbauer
Paolo Rossi
Zinedin Zidan
Rivaldo
Ronaldinio
Kaka
Lionel Messi
Usmon Dembele
Ko‘rinib turibdiki, bu ro‘yxatda ispanlar yo‘q, shunday ekan, Rodri birinchisi bo‘lishi mumkin. 30 yoshli ushbu yarimhimoyachi 2023 yilda «Manchester Siti» bilan Chempionlar ligasi g‘olibi bo‘lgan, 2024 yilda «Oltin to‘p» uchun kurashda Vinisiusni ortda qoldirgan. Jahon chempionatida ham g‘olib chiqish uning nomini abadiylashtiradi.
Ispaniya rekordga qarab ketmoqda
Yarimfinalda Fransiya ustidan qozonilgan g‘alaba shuni anglatadiki, Ispaniya milliy jamoasi mag‘lubiyatsiz o‘yinlar seriyasini 37 o‘yinga yetkazgan. Luis de la Fuente shogirdlari oxirgi bor 2024 yil 22 mart kuni Kolumbiyaga qarshi o‘rtoqlik uchrashuvida yutqazgandi (0:1). O‘tgan yil Millatlar ligasi finalida Portugaliyaga penaltilar seriyasida boy berilgan o‘yin bu o‘rinda mag‘lubiyat deb hisoblanmaydi, chunki o‘yinning asosiy vaqti durang hisob bilan tugagan.
37 o‘yin – 2018 yildan 2021 yilga qadar bo‘lgan oraliqda umuman yutqazmagan Italiya milliy jamoasi rekordini takrorlashdir. Agar jahon chempionati finalida Ispaniya g‘alaba qozonsa yoki o‘yinni penaltilar seriyasigacha olib borsa, unda «Qizil furiya» jahon rekordini yangilaydi.
Kim eng yaxshi to‘purar bo‘ladi?
Bu safargi mundialda to‘purarlar o‘rtasida fantastik poyga kuzatilib, bir vaqtning o‘zida bir necha yulduzlar birinchilik uchun kurash olib borishdi. Uchinchi o‘rin uchun Fransiya va Angliya o‘rtasida kechgan bahsdan (4:6) keyin to‘purarlar ro‘yxati (gol+pas tizimida) quyidagi ko‘rinishda:
Kilian Mbappe (Fransiya) – 10+4
Lionel Messi (Argentina) – 8+4
Jud Bellinghem (Angliya) – 7+1
Erling Holand (Norvegiya) – 7+0
Usmon Dembele (Fransiya) – 6+2
Harri Keyn (Angliya) – 6+1
Mikel Oyyarsabal (Ispaniya) – 5+1
Gollar soni teng bo‘lib qolgan taqdirda «Oltin butsa» golli uzatmalar soni ko‘p bo‘lgan futbolchiga beriladi. Uchinchi o‘rin uchun kechgan bahsda Mbappe 2 gol urdi va bir golga uzatma berib, poygada yaqqol birinchi o‘ringa chiqib oldi. Hozirda faqat Messi va Oyyarsabalda unga yetib olish uchun nazariy imkoniyat mavjud.
Uni quvib o‘tish uchun Messi finalda yoki het-trik qayd etishi yoki 2 gol va 1 golli uzatma muallifi bo‘lishi talab etiladi. Ispaniyalik hujumchida esa amalda imkoniyat yo‘q: u finalda kamida beshta gol urishiga hech kim ishonmaydi.
Qolaversa, Messi JCh tarixidagi eng yaxshi to‘purar maqomini ham boy bergan: o‘tgan tundagi o‘yindan keyin Mbappe 22 gol bilan birinchi o‘ringa chiqib oldi, Messi undan bitta kam gol urgan.
«Oltin to‘p»ni kim oladi?
Yana bir muhim masala – «Oltin to‘p»ni kim qabul qilishi. Gap har ikki sovrin haqida ketmoqda – jahon chempionatining eng yaxshi futbolchisiga beriladigan va France Football tomonidan har yili topshiriladigan sovrinlar.
E’tiborli jihati, Messi 39 yoshida ham ushbu sovrinlar uchun real da’vogarlik qilmoqda. Yarimfinal o‘yinlaridan keyin argentinalik hujumchi ko‘p versiyalar bo‘yicha favoritga aylandi. Agar Argentina jahon chempioniga aylansa, uni turnirning eng yaxshi futbolchisi sifatida tan olmaslikning imkoni yo‘q. Agar Ispaniya g‘olib bo‘lsa, boshqa variantlar ham paydo bo‘ladi va ko‘p narsa final o‘yiniga bog‘liq.
Mbappe Messining, Olise Pelening rekordini yangiladi; Argentina va Ispaniya murabbiylari bir-birining futbolchilarini maqtamoqda, Messi Yamalning chaqaloqlikdagi mashhur suratini esladi.
Angliya va Fransiya milliy jamoalari JCh-2026 bronza medallari uchun bahsda haqiqiy shou uyushtirib berishdi. Jamoalar birgalikda 10 ta gol urishdi, bu bahsda Tomas Tuxel shogirdlari baribir g‘alabani ushlab qolishdi – 6:4.
Maydon tashqarisida ham qiziqarli voqealar davom etmoqda. Xalqaro olimpiya qo‘mitasi «Balogun ishi» bo‘yicha FIFA prezidenti Janni Infantinoni jazolamaydigan bo‘ldi, AQSh prezidenti Donald Tramp Tuxelning Argentina bilan o‘yindagi (1:2) taktikasini tanqid qildi, Ispaniya milliy jamoasi ustozi Luis de la Fuente esa finalda Lionel Messini personal qo‘riqlash yordam bermasligini tan oldi.
Hokkeycha hisob
Fransiya – Angliya 4:6
Gollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87 – penalti (3:5). Dembele, 90+6 (4:5). Bellinghem, 90+8 (4:6)
Fransiya: Menyan, Konate (Din, 46), Lakrua, Ernandez (Upamekano, 46), Gyusto (Kunde, 90), Rabio, Zair-Emeri, Sherki (Dembele, 46), Due (Barkolya, 46), Olise, Mbappe
Angliya: Henderson, Konsa, Geyi (Chaloba, 90), Kuansa (Jyeyms, 83), Spens, Rays, Rodjyers, Eze (Anderson, 79), Saka, Reshford (Uotkins, 46), Toni (Bellinghem, 79)
Tashqaridan qaraganda Fransiya – Angliya to‘qnashuvi jahon chempionatining eng yorqin afishasi edi. Ammo ushbu jamoalarning o‘zi o‘zaro o‘yinga jiddiy yondashgani yo‘q. Bir necha kun oldin ular finalni orzu qilishayotgandi, endi esa atigi uchinchi o‘rin uchun kurashishga to‘g‘ri kelardi. Tuxel ham oldindan aniq qilib aytdi: bu o‘yin uning futbolchilari uchun qiziq emas. Fransuzlardagi kabi.
«Bizning ham, Fransiya milliy jamoasining ham biror futbolchisi bu o‘yinda ishtirok etishni xohlamayapti. Barcha finalda o‘ynashni xohlagandi. Ammo qoida shunday, shuning uchun biz o‘yinga professionallarcha yondashamiz», – degandi murabbiy jurnalistlarga.
Shunga qaramay, bu o‘yin JCh tarixida qoladigan bo‘ldi. Sermahsullik bo‘yicha bu o‘yin kutilmalarni ortig‘i bilan oqladi. Murabbiylar rotatsiyaga qo‘l urgan bo‘lishsa-da, ikki tomondan Mbappe, Olise, Saka va Rays kabi yulduz futbolchilar ilk daqiqalardan harakat qilishdi.
Britanlar ilk daqiqalardan hujumkor harakat qilishdi va birinchi bo‘limning o‘zida raqib darvozasini to‘rt bor ishg‘ol etishdi. Rays 3-daqiqada hisobni ochgan, keyinroq Ezri Konsaga gol urishda yordam bergan bo‘lsa, Bukayo Saka dublni rasmiylashtirdi.
Fransuzlar esa ikkinchi bo‘limda bunday sharmandalikka rozi bo‘lishmadi va darhol javob qaytarishni boshlashdi. 66-daqiqaga kelib Dide Desham shogirdlari (bu uning jamoa boshqaruvidagi so‘nggi o‘yini edi) uchta gol urishdi: Mbappe dublni rasmiylashtirib, hozirgi turnirda ham, butun jahon chempionati tarixida ham Messini ortda qoldirdi (Kilianda endi bu turnirdagi gollar soni 10 ta, Leoda esa 8 ta, shuningdek, turnir tarixidagi barcha gollar bo‘yicha nisbat 22:21 fransuz hujumchisi foydasiga), yana bir golni uning assisti bilan Bredli Barkolya urdi.
Hisobni minimumgacha qisqatirgach, fransuzlar hisobni tenglashtirish uchun bosim qilishda davom etishdi va o‘z maqsadiga erishishi ham mumkin edi, ammo Maykl Olise qulay vaziyatdan foydalana olmadi.
Ko‘p o‘tmay Saka penaltini aniq ijro etib, het-trikni nishonladi. Ammo bu bilan o‘yindagi intrigaga barham berilmadi: o‘yin yakunigacha jamoalar yana bittadan gol urishdi. 96-daqiqada Usmon Dembele, 98-daqiqada Jud Bellinghem o‘z nomini tabloga yozdirib qo‘yishdi.
Dembelening goliga uzatma bergan Olise esa birato‘la Pelening rekordini yangilab qo‘ydi: u bir turnirdagi assistlari sonini 7 taga yetkazib, braziliyalik afsonaviy hujumchining 1970 yildagi ko‘rsatkichini yaxshiladi.
Yakuniy hisob hokkeycha ko‘rinish oldi. Jami zarbalar ko‘rsatkichi ham anomal ko‘rinishda edi – 19:19 (darvoza sohasiga to‘g‘ri borgan zarbalar bo‘yicha 11:9, xG – 2,89 ga qarshi 2,77 inglizlar foydasiga).
Tuxel esa o‘yindan oldingi fikrlariga ters o‘laroq, o‘yindan keyin baxtiyor edi va maydon bo‘ylab yurib, o‘z shogirdlarini bronza bilan tabrikladi. Bu Angliya milliy jamoasi uchun 1960 yilgi mundialdan buyon ilk medal bo‘ldi.
XOQ Infantinoni jazolamaydi
Xalqaro olimpiya qo‘mitasi AQSh milliy jamoasi hujumchisi Folarin Balogunning diskvalifikatsiyasi kechiktirilgani bilan bog‘liq vaziyat uchun FIFA prezidenti Janni Infantinoga sanksiya qo‘llamoqchi emas.
Avvalroq FairSquare notijorat tashkiloti FIFA rahbarining harakatlari yuzasidan qo‘mitaga shikoyat yo‘llagani ma’lum bo‘lgandi. Ammo The Guardian manbasiga ko‘ra, XOQ xalqaro federatsiyalarning o‘z qoidalarini qo‘llash xususiyatlariga aralashishni istamaydi.
Nashrning boshqa suhbatdoshi so‘zlariga ko‘ra, XOQ va FIFA o‘rtasidagi kuchlar muvozanati so‘nggi yigirma yil ichida futbol tashkiloti foydasiga sezilarli darajada o‘zgargan – uning ta’siri tijorat daromadlari va yosh auditoriyani jalb qilish borasida ortib bormoqda.
Eslatib o‘tamiz, Balogun JCh 1/16 finalida Bosniya va Hersegovinaga qarshi o‘yinda (2:0) «jiddiy qoidabuzarlik» uchun to‘g‘ridan to‘g‘ri qizil kartochka olgandi va kamida ikkita o‘yinni o‘tkazib yuborishi kerak edi.
Ammo FIFA intizomiy qo‘mitasi diskvalifikatsiya amal qilishini bir yillik sinov muddati uchun to‘xtatdi va futbolchi 1/8 finalda Belgiyaga qarshi kechgan o‘yinda (1:4) maydonga tushdi. Keyinroq AQSh prezidenti Donald Tramp ushbu masalada Infantino bilan gaplashganini tan oldi.
Nyu Yorkdagi smog JCh finaliga xalal bermaydi
Hafta davomida Ole nashri Ispaniya va Argentina o‘rtasidagi hal qiluvchi Kanadada avj olgan o‘rmon yong‘inlari tufayli boshqa joyga ko‘chirilishi mumkinligi haqida xabar tarqatgandi. Qo‘shni mamlakatda ko‘tarilgan tutun AQSh shimoli-sharqigacha kelgan va yirik shaharlarga yaqinlashgan – payshanba kuni havo ifloslanishi tufayli Chikagoda MLS o‘yini ko‘chirilgandi.
Smog 19 iyul kuni kechqurun jahon chempionati finali o‘tkaziladigan Nyu York shahriga ham yopirilgan. Ammo Bloomberg agentligi o‘z manbalariga tayanib xabar berishicha, FIFA o‘yin vaqti va joyini ko‘chirmoqchi emas.
Materialda xabar qilinishicha, futbol federatsiyalari vakillari bu haqda Oq uyning turnirga tayyorgarlik ko‘rish bo‘yicha ishchi guruhi rahbari Endryu Juliani bilan norasmiy suhbat o‘tkazgan. Ular o‘rtasida iqlim masalasi bo‘yicha rasmiy uchrashuvlar rejalashtirilmagan.
Ispaniya va Argentina murabbiylari Messi va Yamalni maqtamoqda
JCh hal qiluvchi o‘yini arafasida Argentina va Ispaniya milliy jamoalari ustozlari bir-birining futbolchilariga kompliment yog‘dirdi. Lionel Skaloni «Qizil furiya» vingeri Lamin Yamalga yuqori baho bergan, Luis de la Fuente – «Albiseleste» sardori Lionel Messi sha’niga maqtov yog‘dirgan.
«Yamal – futbol xazinasi, – deya Skalonining so‘zlarini keltiradi Ole. – Unga qarshi himoyalanish juda qiyin, u Ispaniyaga katta quvonch keltirishi mumkin bo‘lgan futbolchi. Umid qilamanki, yakshanba kuni bunday bo‘lmaydi. Albatta, uni mehmonxonaga qamab, maydonga chiqarmaslikni istardim».
De la Fuente esa ispanlar Messiga qarshi personal himoyalanmasligi, chunki bundan naf yo‘qligini aytdi.
«Men Leoni «Sevilya» yoshlar jamoasini shug‘ullantirib yurgan davrimdan buyon bilaman. Biz uning yoniga bir futbolchi qo‘ydik, keyin u kartochka oldi, men uni almashtirdim va Messi bizga uchta gol urdi. Uni personal qo‘riqlashni tashkil qilmaymiz, ammo diqqatli bo‘lamiz.
Messining o‘zi – alohida bir tarix. Afsona. 39 yoshda finalga chiqish – aql bovar qilmas ish! U shu yerdaligida o‘yinidan zavqlanish kerak. Diyego Maradonaning yo‘qligi bilinadi, chunki u endi biz bilan emas. Ammo Messi hamon shu yerda», – deya uning so‘zlarini keltiradi Marca.
Messi o‘zi va Yamalning chaqaloqlikdagi fotosini esladi
2007 yilda Leo Sport gazetasining YUNISEF bilan (o‘shanda «Barselona» homiylaridan edi) hamkorlikda tayyorlangan xayriya taqvimi uchun suratga tushgan. Bu loyiha doirasida klub futbolchilari bolalar bilan suratga tushardi: yosh ishtirokchilarni tanlash uchun tashkilot lotereya o‘tkazadi – va g‘oliblardan biri Yamalning ota-onasi bo‘ladi.
20 yoshli Messi plastik vannada besh oylik Laminni cho‘miltirayotgani aks etgan surat shu taxlit paydo bo‘lgan. 19 yil o‘tib futbolchilar JCh-2026 finalida bir-biriga qarshi o‘ynaydi. Turnirning hal qiluvchi o‘yini oldidan argentinalik hujumchi ushbu fakt haqida esladi va uni aql bovar qilmas hodisa deb atadi.
«To‘g‘risini aytsam, bu suratimiz juda ajoyib. Hayot shunaqa, to‘g‘rimi? Men u bilan go‘dakligida suratga tushganman, mana endi ikkimiz jahon chempionati finalida yuzma-yuz turibmiz.
Lamin – juda iste’dodli futbolchi, men uni ko‘p kuzataman, chunki u men sevgan klub – «Barselona»da o‘ynaydi va men unga doimo eng yaxshi tilaklarni tilayman. 19 yoshida u dunyoning eng yaxshi futbolchilaridan biri hisoblanadi va uning butun karerasi hali oldinda», – deya Messining so‘zlarini keltiradi The Athletic.
Tuxelni Tramp ham tanqid qildi
Inglizlar JCh yarimfinalida Argentinaga qarshi o‘yinda birinchi bo‘lib hisob ochgan, ammo shundan keyin to‘liq himoyalangan va o‘yin oxirida ikki gol o‘tkazib, yutqazib qo‘ygandi (1:2).
O‘yindan keyin faqat dangasa kishilargina «Uch sherlar» ustozi Tomas Tuxelning bu o‘xshamagan rejasini tanqid qilmadi. Bunga hatto AQSh prezidenti Donald Tramp ham qo‘shildi.
«Angliya milliy jamoasida biz birga golf o‘ynaydigan ajoyib futbolchi bor – Harri Keyn. U ajoyib. Menimcha, ular uni himoyaga o‘tkazib, xatoga yo‘l qo‘yishdi. Ammo men futbolda nimani ham bilardim? Ular hisobda oldinga chiqishdi va eng yaxshi o‘yinchisini himoyaga qo‘yishdi.
Axir biroz hujum qilish kerak edi, shunday emasmi? Bu noodatiy qaror bo‘ldi», – degan Oq uy egasi FIFA rahbari Janni Infantino bilan birgalikdagi matbuot anjumanida.
Navbatdagi o‘yin
Jahon chempionatida atigi bitta o‘yin qoldi – eng muhimi – final.
20 iyulga o‘tar kechasi, 00.00. Ispaniya – Argentina
JCh uchinchi o‘rini uchun o‘yinda 10 ta gol urildi.
Bronza uchun o‘yin haqiqiy shouga aylandi
Fransiya – Angliya 4:6
Gollar: Rays, 3 (0:1). Konsa, 18 (0:2). Saka, 37 (0:3). Saka, 45+1 (0:4). Mbappe, 48 (1:4). Barkolya, 54 (2:4). Mbappe, 66 (3:4). Saka, 87 – penalti (3:5). Dembele, 90+6 (4:5). Bellinghem, 90+8 (4:6)
Fransiya: Menyan, Konate (Din, 46), Lakrua, Ernandez (Upamekano, 46), Gyusto (Kunde, 90), Rabio, Zair-Emeri, Sherki (Dembele, 46), Due (Barkolya, 46), Olise, Mbappe
Angliya: Henderson, Konsa, Geyi (Chaloba, 90), Kuansa (Jyeyms, 83), Spens, Rays, Rodjyers, Eze (Anderson, 79), Saka, Reshford (Uotkins, 46), Toni (Bellinghem, 79)
«Angliya o‘ynashni xohlamaydi, biz ham. Ammo o‘tkazish kerak bo‘lgan butun bir o‘yin bor», – degandi yarimfinaldagi mag‘lubiyatdan keyin Fransiya milliy jamoasi ustozi Dide Desham.
«Bizning futbolchilarimizdan hech biri, shuningdek, fransuzlardan hech biri bu o‘yinda o‘ynashni xohlamaydi. Hamma jahon chempionatida g‘alaba qozonish uchun o‘ynaydi, ammo vaziyat shunday bo‘lib qoldi», – deya Deshamning fikrini takrorlagandi Tomas Tuxel Argentina bilan o‘yindan keyin.
Shuningdek, ijtimoiy tarmoqlarda jahon chempionatlarida uchinchi o‘rin uchun o‘yinlarni bekor qilish lozimligi haqida chaqiriqlar yangradi.
Ikki murabbiy ham o‘yinga o‘rtoqlik uchrashuvidek yondashishdi va maydonga deyarli ikkinchi tarkiblarini tushirishdi. Bu esa futbol muxlislari uchun ayni muddao bo‘ldi – jiddiy mas’uliyat yo‘q bo‘lgan o‘yinda jamoalar tom ma’noda yechilib ketishdi va muxlislar uchun haqiqiy shou uyushtirib berishdi.
O‘yinning uchinchi daqiqasidayoq Due o‘z darvozasiga yaqin hududda xato qildi, to‘pni undan olib qo‘ygan «Arsenal» yarimhimoyachisi Deklan Rays jarima maydoniga kirib bordi va hisobni ochdi.
18-daqiqada esa Rays burchakdan oshirgan to‘pni «Aston Villa» himoyachisi Ezri Konsa darvozaga to‘g‘rilab yubordi va hisobdagi farqni oshirdi.
Kuling brekdan keyin karnaval davom etdi. «Arsenal»ning boshqa bir futbolchisi Bukayo Saka katta sahnaga chiqdi va bo‘lim oxirigacha dublni rasmiylashtirib, hisobni yirik ko‘rinishga keltirdi – 4:0.
Fransuzlar ikkinchi bo‘limga kelib uyg‘onishdi. Mbappe bo‘lim boshida dastlabki javob golini urdi, keyin esa Barkolyaning goliga assistentlik qildi.
Shundan keyin ham fransuzlar ketma-ket hujumlar uyushtirishdi va faqat Hendersonning seyvlari hisobdagi farqni saqlab turdi. Ammo Kilian o‘z maqsadiga erishib, o‘yindagi ikkinchi golini ham urdi. Bu uning joriy chempionatdagi 10-, barcha jahon chempionatlaridagi 22-goli bo‘ldi va ikki holatda ham u Lionel Messini ortda qoldirdi (argentinalik hujumchida hozirgi turnirda 8, jami 21 gol bor).
O‘yin oxirida fransuzlar hisobni tenglashtirishi mumkin edi, ammo Olisening jarima maydoni markazidan yo‘llagan zarbasidan keyin to‘p darvoza sohasiga to‘g‘ri bormadi. Javob hujumida esa inglizlar penalti ishladi: Gyusto Spensini yiqitdi, belgilangan jarima zarbasini Saka aniq ijro etib, hisobdagi farqni yana oshirdi – 5:3.
Bu hali hammasi emasdi, qo‘shimcha daqiqalarda Dembele yana hisobni qisqartirdi, Bellinghem esa inglizlarning oltinchi golini urdi – 6:4.
Bu ikki jamoa ham himoyani unutib, faqat hujum haqida o‘ylagan fantastik bahs bo‘ldi. O‘yindan keyin jamoasi 6 ta gol o‘tkazgan Desham (bu uning milliy jamoa boshqaruvidagi so‘nggi o‘yini edi) hech narsadan ranjigan ko‘rinmasdi va Tuxelga kulimsirab qo‘l tashladi. Germaniyalik mutaxassis esa muxlislar oldidagi aybini yuvdi – Angliya jahon chempionatlarida so‘nggi 60 yillikdagi ilk medalini qo‘lga kiritdi.
Ko‘cha ekranlari, barlardagi chegirmalar va kuchaytirilgan xavfsizlik choralari – Ispaniya va Argentina shaharlari jahon chempionati finaliga tayyorgarlik ko‘rmoqda. Ikki davlat milliy jamoalari o‘rtasidagi bahs Nyu-Yorkda 20 iyul kuni soat 00:00da boshlanadi.
Sun’iy intellekt yaratgan surat
Ispan OAVning yozishicha, butun Madrid ulkan fan-zonaga aylanib bo‘ldi. Shahar hokimiyati odamlar oqimini turli hududlarga oldindan taqsimlashga urinmoqda va ekranlarni bir-biridan uzoq masofalarga o‘rnatmoqda. Politsiya xavfsizlikni ta’minlash uchun maxsus harakatlar rejasini ishlab chiqmoqda. Mamlakatning boshqa shaharlarida ham finalga shu tarzda tayyorgarlik ko‘rilmoqda.
Barselonada bahs katta maydonlarda translatsiya qilinadi. Shuningdek, «Barselona» klubi stadioni bo‘lmish Camp Nou yaqinida ham ulkan ekran o‘rnatiladi.
Ispaniya bosh vaziri Pedro Sanches finalni tomosha qilish uchun Nyu-Yorkka uchishi ma’lum qilingan.
Argentina prezidenti Xaviyer Miley «irim» qilib AQShga bormasligini aytdi. U final bahsini boshqa barcha o‘yinlarni qayerda tomosha qilgan bo‘lsa, o‘sha yerda ko‘rishini bildirdi. Shuningdek, Miley bir oydan oshiq vaqtdan buyon irim qilib bitta kurtkada yurganini aytdi. Aytishlaricha, final kuni ko‘plab kompaniyalar, do‘konlar va muassasalar vaqtincha ishlamaydi.
19 iyul kuni soat 02:00 da inglizlar va fransuzlar uchinchi o‘rin uchun kurashishadi. AQShning barcha federal xizmatlari xodimlari Mayamidagi match xavfsizligini ta’minlashadi. Ayni paytda FQB, immigratsiya xizmati, maxfiy xizmatlarning barcha kuchlari ushbu tadbirga jalb etilgan.
Finaldan bir necha kun oldin ijtimoiy tarmoqlarda bundan 19 yil ilgari olingan, Lionel Messi Ispaniya milliy jamoasining hozirgi a’zosi Lamin Yamalni cho‘miltirayotgani aks etgan fotosurat tarqaldi. Ular ertaga ilk bor maydonda bir-birlari bilan to‘qnash kelishadi.
Sun’iy yo‘ldosh tasvirlarida Marokashning Kasablanka shahri yaqinida barpo etilayotgan 115 ming o‘rinli Grand Stade Hassan II stadioni qurilishi aks etdi. Yangi arena 2030 yilgi futbol bo‘yicha jahon chempionatiga tayyorgarlik dasturining asosiy loyihalaridan biri hisoblanadi.
Marokash dunyodagi eng katta futbol stadioni bo‘lishi kutilayotgan Grand Stade Hassan II arenasini qurmoqda. Loyiha mamlakatning 2030 yilgi jahon chempionatiga tayyorgarlik ko‘rish, turnir finalini qabul qilish huquqi uchun kurashish va Afrikaning yetakchi sayyohlik hamda iqtisodiy markazlaridan biri sifatidagi mavqeini mustahkamlashga qaratilgan keng ko‘lamli davlat dasturi doirasida amalga oshirilmoqda.
Yangi stadion Kasablanka yaqinida qurilmoqda. U aeroportlar, mehmonxonalar, transport tarmoqlari va shahar infratuzilmasini rivojlantirish hamda modernizatsiya qilishni nazarda tutuvchi yirik dasturning markaziy obektlaridan biri bo‘ladi.
Loyihaga ko‘ra, stadion 115 ming nafar tomoshabinni sig‘dira oladi. Qurilish yakunlangach, u sig‘imi bo‘yicha dunyodagi eng yirik futbol stadioniga aylanishi kutilmoqda.
Grand Stade Hassan II Marokashning 2030 yilgi jahon chempionati final uchrashuvini o‘tkazish huquqi uchun kurashidagi asosiy ustunliklaridan biri sifatida ko‘rilmoqda. Final qayerda o‘tkazilishi bo‘yicha FIFA hozircha yakuniy qaror qabul qilmagan. Biroq stadion loyihasi dastlabdan Marokashni turnirning eng muhim uchrashuvini qabul qilishga asosiy da’vogarlardan biriga aylantirish maqsadida ishlab chiqilgan.
Arena konsepsiyasi xalqaro Populous arxitektura kompaniyasi hamda Oualalou + Choi studiyasi ishtirokida tayyorlangan. Loyiha an’anaviy marokashliklar madaniyati va mahalliy me’morchilik unsurlaridan ilhomlangan bo‘lib, stadion tashqi ko‘rinishi katta chodirni eslatishi rejalashtirilgan.
Marokash rasmiylari ushbu inshoot orqali mamlakatning yirik infratuzilma loyihalarini amalga oshirish, xorijiy sarmoyalarni jalb qilish va shaharlarni modernizatsiya etish imkoniyatlarini namoyish qilishni maqsad qilgan.
Shu bois Grand Stade Hassan II faqat sport inshooti emas, balki Marokashning xalqaro nufuzini oshirish, turizmni rivojlantirish va Afrikadagi iqtisodiy mavqeini mustahkamlashga xizmat qiluvchi strategik loyiha sifatida baholanmoqda.
Yamal Messiga qarshi. JCh finali intrigalari
JCh kundaligi. Bronza uchun triller va Tuxelni tanqid qilgan Tramp
Saka het-trik qildi, Mbappe Messini quvib o‘tdi
-
Iqtisodiyot4 days agoMarkaziy bank huzurida Islomiy moliya kengashi tashkil etildi
-
Dunyodan3 days ago
Prezident Tramp uning o‘ldirilishi masalasiga oydinlik kiritmoqda
-
Dunyodan5 days agoMahmud Ahmadinejod atrofidagi sirli o’yin: “Mossad bilan hamkorlik”
-
Dunyodan3 days agoMalayziya Isroil fuqarolarini deportatsiya qilmoqda
-
Jamiyat4 days agoChimyonda tog‘ sayri qutqaruv operatsiyasi bilan yakunlandi
-
Sport4 days agoAngliya va Argentina nega bir-birini yomon ko‘radi? Ashaddiy dushmanlik tarixi
-
Jamiyat4 days agoO‘zini o‘zi band qilganlarga ijtimoiy soliq to‘lash majburiy bo‘lishi mumkin
-
Jamiyat4 days ago
MICE turizm tadbirlarini tashkil qilgan tadbirkorlarga QQSdan imtiyoz beriladi