Futbol gohida faqatgina g‘alabalari bilan emas, mag‘lubiyatsi bilan ham tarix yaratadi. 2026 yilgi Jahon chempionatida O‘zbekiston milliy terma jamoasining ishtirok etishi ana shunday unutilmas voqealardan biri bo‘ldi. Ha, hisoblar ko‘ngildagidek bo‘lmayapti. Ammo, yigitlarimiz mamlakat futbolini yangi bosqichga olib chiqqan, millionlab yurtdoshlarga g‘urur va ishonch bag‘ishlagan avlod sifatida tarix sahifalariga muhrlandi.

***

Futbol bir qarashda oddiy to‘p o‘yinidek ko‘rinadi. Bolaligidan bu to‘p ishqiga tushganlar qancha? Sanab bo‘lmaydi. Chunki, bu futbol maydonidagi 22 nafar o‘yinchidan ancha katta tushuncha. U millionlab yuraklarni bir vaqtning o‘zida quvontiradi, yig‘latadi, umid bag‘ishlaydi hamda sinovdan o‘tkazadi. Ba’zan bir g‘alaba butun mamlakatni quvonchga to‘ldirsa, ba’zan bir mag‘lubiyat millionlab yuraklarni ezib qo‘yadi.

2026 yil. O‘zbekiston futboli tarixida zarhal harflar bilan yoziladigan yil bo‘ldi. Jahon chempionatida O‘zbekiston milliy terma jamoasining ishtirok etayotgani, aytish joizki, o‘z-o‘zidan ulkan tarixiy yutuq. Mustaqillikdan keyingi 34 yil davomida orzu qilingan, necha avlod futbolchilari intilib yetolmagan marra zabt etildi. Shuning o‘ziyoq g‘alaba bo‘ldi, shuning o‘ziyoq millionlab o‘zbekistonliklar uchun bayram bo‘ldi. Shu darajaga yetib kelguncha, qancha mehnat, qancha mashaqqat, qancha umid va qancha ko‘z yoshi to‘kilganini faqat shu yo‘ldan o‘tganlar biladi. Shuning uchun ham AQSh stadionlarida “O‘zbekiston!” degan chaqiriqlar yangrashi, bayrog‘imizning dunyo arenasida hilpirashi har bir vatandosh uchun ulkan baxt bo‘ldi.

O‘zbekistonlik futbolchilar bu yo‘lda oson yurishmaganini hammamiz his qilib turibmiz. Saralash bahslarida ular bor kuchini, bor mahoratini ishga solishdi. Har bir o‘yinda yurt sha’ni uchun kurashishdi. Natijada dunyo futbolining eng nufuzli musobaqasi eshiklari O‘zbekiston uchun ochildi.

Birinchi uchrashuvda raqib Kolumbiya edi. Jahon futbolida o‘z o‘rniga ega kuchli jamoa. Shunda ham o‘zbekistonlik futbolchilar maydonga qo‘rqmay otilishdi. Kurashishdi. Harakat qilishdi. Ter to‘kishdi. Uchrashuv 3:1 hisobida raqib foydasiga hal bo‘ldi. Mag‘lubiyat og‘ir kechgani bor gap.  Ammo, aynan, shu o‘yinda – shu o‘yin tribunalarida butun dunyo futbolning eng go‘zal jihatlaridan biri insonparvarlik va do‘stlikka ham guvoh bo‘ldi.

O‘yindan keyin Isfandiyor ismli o‘zbekistonlik kichik muxlisning ko‘z yoshlari millionlab odamlarning yuragini larzaga soldi. Eslasangiz, shu onda kolumbiyalik muxlislar unga tasalli berishdi, bag‘riga bosishdi. “O‘zbekiston! O‘zbekiston” degan hayqiriqlar bilan butun stadionni to‘ldirishdi. Bu lahzada futbol natijalardan ham ustun tura olishini ko‘rsatdi. Turli tillar, turli millatlar, turli qit’alardan kelgan insonlarni birlashtira olgan ana shu manzara futbolning haqiqiy qudratini o‘zida aks ettira oldi.

Keyingi sinov yanada og‘irroq kechdi. O‘zbekiston terma jamoasi Krishtianu Ronaldu boshchiligidagi Portugaliyaga qarshi maydonga tushdi. AQShning Xyuston shahridagi stadionda bo‘lib o‘tgan bahs 5:0 bilan yakunlandi.

Ha, raqamlarga qaralsa,  bu yirik mag‘lubiyat. Biroq, futbolni tushunadiganlar yaxshi biladi: gohida hisob tablosi ham hamma haqiqatni aks ettiravermaydi.

O‘zbekistonlik futbolchilar oxirgi daqiqalargacha kurashdi. Hujum qildi. Imkoniyatlar yaratdi. Azizning darvoza to‘riga yo‘llagan zarbasi raqib futbolchisiga nisbatan ishlatgan kichik qoidabuzarligimiz sababli hisobga olinmadi. Lekin, shu vaziyatning o‘zi ham O‘zbekiston futbolchilari dunyoning eng kuchli jamoalari darvozasiga yo‘l topishi mumkinligini ko‘rsatdi.

Uchrashuvdan keyin jamoa sardori Eldor Shomurodov muxlislardan uzr so‘rab chiqdi. Bu so‘zlarni mag‘lubiyatni tan olish, deb qabul qilmaylik, aslida, bu so‘zlar mamlakat oldidagi mas’uliyatni his qilish namunasi bo‘ldi. Maydonda ham, maydon tashqarisida ham yigitlar mardona turishdi. Yengilishdi, taslim bo‘lishmadi.

To‘g‘ri, Portugaliyaga qarshi o‘yindan keyin butun mamlakat bir lahza sukutga cho‘mgandek bo‘ldi. Ayrim ashaddiy muxlislar ijtimoiy tarmoqlarda keskin fikrlarni yozdi. Ehtiroslar toshdi. Mayli, buniyam yillar davomida yig‘ilgan orzularning og‘riqli aks-sadosi sifatida qabul qilaylik. Axir, futbol o‘zi shunday o‘yin emasmi? U oxirgi hushtakkacha yashaydi.

Nima bo‘lgandayam, to‘g‘ri yo‘lni tanlaylik: haqiqiy muxlislikni g‘azab bilan emas, jamoa yiqilgan kuni uning yonida turish bilan ko‘rsataylik. Faqat g‘alabalardaginamas, mag‘lubiyatda ham bir-birimizni qo‘llab-quvvatlashni o‘rganaylik.

Men ayol jurnalist sifatida, yashirmayman, shu maqolaniyam yig‘lab yozyapman, rosti. Bu hali-hanuz… 12 yoshimdan 54 yoshimga qadar futbol to‘piga ishqibozligimdan emas, Vatanimni sevganimdandir balki… deya, o‘zimni ovutaman. Haligacha qishloqqa borsam, qishloq bolalari bilan keng dala maydonida to‘p tepaman: akamlar xuddi yosh bolaga aytgandek, “bo‘ldi, to‘p tepishni bas qil, kir uyga!” deb ogohlantirishlariga qaramay, futbolni tushunsam-tushunmasam, to‘p tepaveraman, yuguraveraman, hujumga otilaveraman,  himoyaga talpinaveraman… O‘zimiz urgan gollarni ham, darvozamizga yo‘naltirilgan gollarni ham kulgi va “qiy-chuv” bilan qarshilaymiz… Televizor ortidagi chinakam bahslarni tomosha qilish esa boshqa-boshqa narsa. Futbol – bu kecha mening yuragimning hamiyatiga aylandi: yigitlarimiz juda kuchli o‘ynashdi, juda zo‘r o‘yin ko‘rsatishdi….

Bugun O‘zbekiston terma jamoasi g‘alaba qozonmagan bo‘lishi mumkin. Ammo, ular tarix yozishdi. Ular avval hech qaysi o‘zbek futbolchisi yetmagan sahnaga chiqishdi. Ular dunyoning eng kuchli jamoalariga qarshi mamlakat sharafini himoya qilishdi. Ular millionlab bolalarga orzu qilish mumkinligini isbotlashdi. Ehtimol, bu Jahon chempionati O‘zbekiston uchun kubok bilan tugamas. Ammo, u tajriba, ishonch va kelajakni bera oldi.

Aytish joizki, eng katta g‘alabalar ham bir vaqtlar mag‘lubiyatlar bag‘rida tug‘ilgan. Bugungi og‘riq ertangi zafarlarning poydevori ham bo‘lishi mumkin. Shuning uchun ham bu yigitlarimizga tanqiddan ko‘ra, ko‘proq dalda kerak. Shuni unutmaylikki, ular faqatgina futbol o‘ygashmayapti, ular butun mamlakatning yangi futbol tarixi sahifalarini yozishyapti.

Bir lahza O‘zbekiston futbolining bugungi har bir yutug‘i ham oson kechmaganini ko‘z oldimizdan o‘tkazaylik.  Bu yo‘lda faqatgina tiriklarning emas, futbol uchun umrini baxshida etgan insonlarning ham izi bor.

Bugun mana shu yo‘qotishlar, mana shu boy berishlar natijasi o‘laroq, O‘zbekiston nomi Jahon chempionati maydonlarida jaranglamoqda. Ehtimol, stadionlarda yangragan “O‘zbekiston!” degan hayqiriqlar, millionlab muxlislarning qalbidagi faxr va g‘urur tuyg‘ulari o‘sha buyuk yo‘llarning davomidir. Ehtimol, futbol uchun jonini fido qilgan, o‘zbek futboli tarixi sahifalariga nomini yozib ketgan insonlar xotirasi ham ana shu lahzalarda yodga olingandir. Chunki, futbolni faqat bugun maydonga tushgan o‘n bir nafar o‘yinchi emas, u  kecha, bugun va ertani bog‘lab turgan katta qismat yo‘li, deb atasak ham xato bo‘lmaydi. Shu bois, qanday natija qayd etilmasin, bu Jahon chempionatidagi har bir daqiqa o‘zbek futboli tarixidagi ulkan sahifadir. Va bu sahifalarni ko‘rib, o‘z vaqtida orzu qilib ketgan avlodlar xotirasi ham, shubhasiz, munosib ehtirom bilan yod etilishini unutmaylik…

Xullas, men futbolni sevaman, siz-chi? Siz ham sevasizmi: unda jamoamizning g‘alabasida ham, mag‘lubiyatida ham uning yonida turing! 

Laylo Hayitova

Source link

JChning 3-turida ham pley-offga chiqish imkonini saqlab qolishimiz muhim edi. Qadrdonimiz Kolumbiya Kongoni yengib, bizga ana shu imkonni taqdim etdi. To‘g‘ri, hammasi o‘z qo‘limizda emas, boshqa o‘yinlarni kuzatishga majburmiz. Lekin baribir oxirgi o‘yingacha imkon borligi futbolchilarni bo‘shashmay o‘ynashga undaydi. Buning ustiga, oxirgi turdagi raqibimiz Portugaliya kabi qo‘rqinchli emas, ularga tishimiz o‘tadi.

Qay holatda chiqamiz?

Oldingi JChlarida jamoalar soni 32 ta bo‘lgani uchun 8 ta guruhda birinchi va ikkinchi o‘rinni olganlar keyingi bosqichga chiqib, 1/8 final o‘yinlari boshlanardi. Bu gal jamoalar soni 48 ta. 12 ta guruhdan 2 tadan jamoa chiqsa, 24 ta bo‘ladi. 1/8 final uchun jamoalar ko‘p, 1/16 final uchun kam, shu sabab uchinchi o‘rinni olgan jamoalar ichida eng yaxshi natija qayd etgan 8 jamoa ham pley-offga chiqadi. Biz endi ana shu 8 jamoadan biri bo‘lish uchun harakat qilamiz. Bu uchun Kongoni faqat yengishimiz kerak, imkon bo‘lsa yirikroq hisobda.

Vaziyat qanday?

Shvetsiya, Jazoir, Xorvatiya, Paragvay, Shotlandiyada 3 ochkodan bor va ularning imkoniyati yaxshiroq. Lekin hech bir jamoa uchinchi o‘rinlar uchun beriladigan 8 yo‘llanmani naqd qilmagan.

Keling, har bir guruhni qarab chiqib, 3-o‘rinni kim olishi mumkinligiga to‘xtalamiz. Bugungi «A» guruhi o‘yinlarida Janubiy Koreya va Meksikaga muxlislik qilamiz. Ular Chexiya va JARni mag‘lub etishsa, bu guruhning uchinchi jamoasida 1 ochko bo‘ladi, kimdir durang o‘ynasa, 2 ochko. Biz uchun bo‘laveradi.

«B» guruhida ehtimoliy uchinchi o‘rin sohiblari Bosniya va Qatar o‘zaro o‘ynaydi. Bu o‘yinda bizni durang qoniqtiradi. Kimdir yutsa, ochkosi 4 ta bo‘lib, bitta yo‘llanmani naqd qiladi.

«C» guruhidagi Shotlandiya birinchi turda Haitini yengib pley-off tomon katta qadam tashlab bo‘lgan. Oxirgi turda Marokash Haitini yengsa kerak, shotlandlar Braziliyaga juda katta hisobda yutqazmasa, sakkiztalik yo‘llanmaga ilinadi.

«D» guruhida ikkinchi va uchinchi o‘rin uchun Avstraliya hamda Paragvay kurashadi. Biz uchun «kengurular» Paragvayni imkon qadar yirik hisobda yengishi yaxshi. Turkiya va AQSh o‘yini esa biz uchun hech nimani o‘zgartirmaydi, NATOchilar bilgan hisobida o‘ynayversin.

«E» guruhida vaziyat biz uchun yaxshi. Kot-d’Ivuar oxirgi turda Kyurasaoni yengsa kerak. Germaniya ham bo‘shashmay Ekvadorni mag‘lub etishiga umid qilamiz. Shunda bu guruhning uchinchi jamoasi 1 ochko bilan qolib ketadi. «F» guruhini yuqorida esladik, barchasi shvedlarning o‘z qo‘lida. «G» guruhida Eron yoki Belgiya ochko yo‘qotish kerak. Guruh peshqadami Misr Eronni, Belgiya Yangi Zelandiyani yengsa, qit’adoshimiz Eron 2 ochko bilan uchinchi bo‘ladi. Bu bizni qoniqtiradi. Belgiya va Eron o‘rin almashishi ham mumkin. Asosiysi, kimdir 2 ochko bilan uchinchi bo‘lsin.

«H» guruhida Ispaniya va Vozinya boshchilik Kabo-Verdega muslislik qilamiz. Afrikaliklar Saudiyani, Ispaniya Urugvayni yengsa, urugvayliklar 2 ochko bilan uchinchi bo‘ladi. Bu biz uchun yaxshi. «I» guruhida hozircha birorta ochkosi yo‘q Iroq va Senegal uchinchi o‘rin uchun kurashadi. Biz uchun bu o‘yinda durang bo‘lishi eng yaxshi natija.

«J» guruhida Avstriya hamda Jazoir ikkinchi va uchinchi o‘rin uchun kurashadi. Biz uchun bu o‘yinda yevropaliklar imkon qadar yirik hisobda yengishi yaxshi. «L» guruhida Gana va Xorvatiya ikki yo‘llanmani bo‘lib oladi. Katta ehtimol ularning ikkisi ham keyingi bosqichga chiqadi.

Guruhlarda yetakchilar ajralib qoldi va hozir asosiy intriga aynan eng yaxshi uchinchi o‘rinlar orasiga kirish uchun kechmoqda. Hozircha bu borada jadval quyidagicha:

Faqat besh jamoada uch ochkodan bor va sakkiz yo‘llanma uchun ular asosiy da’vogar. Yana ikki jamoada ikki ochkodan bor. Shunday ekan, bizda imkoniyat yomon emas. Bu uchun, albatta, Kongoni yengishimiz kerak, imkon qadar yirik hisobda. Xullas, buyog‘iga o‘rganib qolganimizdek, matematika va futbol birday davom etadi. Toshoynani sindirishdan avval otangizdan qolgan kalkulyatorni topib, changini artib qo‘ying, bugundan rosa asqatadi…

Source link

1 iyuldan pensiya, nafaqa va moddiy yordam to‘lovi, 1 sentabrdan oylik-maoshlar oshiriladi. O‘zbekiston futbol milliy jamoasi jahon chempionatida Portugaliyaga yirik hisobda yutqazdi. Qirg‘iziston va O‘zbekiston o‘zaro kelishuvga ko‘ra hududlarni almashdi. Soliq qo‘mitasi bank siriga keng miqyosda kirish imkoniyatini olmoqchi. Xavfli deb topilgan yonilg‘i shoxobchalari xavfsiz hududlarga ko‘chiriladi. Kunning muhim yangiliklari bilan tanishtiramiz.

1 iyuldan pensiya va nafaqalar, 1 sentabrdan oylik-maoshlar oshadi

Prezident farmoniga ko‘ra, 1 iyuldan pensiya va nafaqa hamda Ijtimoiy reyestrga kiritilgan oila bolalari nafaqasi va moddiy yordam to‘lovi miqdori 7 foizga oshiriladi.

Bunda yoshga doir eng kam pensiya miqdori oyiga 983 ming so‘m, nogironlik pensiyasining eng kam miqdori oyiga 1 mln 83 ming so‘m bo‘ladi.

1 sentabrdan budjet tashkilotlarida ish haqi, shuningdek, stipendiya miqdori ham 7 foizga oshiriladi. Jumladan, mehnatga haq to‘lashning eng kam miqdori oyiga 1 mln 360 ming so‘m, bazaviy hisoblash miqdori 440 ming so‘m etib belgilandi.

Milliy jamoa jahon chempionatida Portugaliyaga yirik hisobda yutqazdi

Bosh murabbiy Fabio Kannavaro shogirdlari JCh-2026 guruh bosqichining 2-turida Yevropaning nomdor vakiliga jiddiy qarshilik ko‘rsata olmadi va 0:5 hisobida yutqazdi. Krishtianu Ronaldu o‘yinda ikkita gol urdi. Shunday bo‘lsa-da, o‘zbekistonliklar guruhdan chiqish imkoniyatini yo‘qotmadi.

O‘yindan keyin Fabio Kannavaro ushbu jahon chempionati futbolchilar uchun tajriba bo‘lishini aytdi. Hujumchi Eldor Shomurodov mag‘lubiyat uchun muxlislardan uzr so‘radi va yakuniy o‘yinda g‘alaba uchun harakat qilishga va’da berdi.

Qirg‘iziston va O‘zbekiston o‘zaro kelishuvga ko‘ra hududlarni almashdi

O‘zbekiston bilan davlat chegarasini demarkatsiya qilish doirasida ikkita aholi punkti – Cho‘ng‘ara va Tosh-Tobo Qirg‘iziston tarkibiga o‘tdi. Ilgari Farg‘ona viloyati tarkibiga kirgan ushbu qishloqlarning 2 ming 500 ga yaqin aholisi etnik qirg‘izlar bo‘lib, endi Qirg‘iziston fuqaroligini oladi. Qirg‘iziston tomoni O‘zbekistonga chegara zonasida teng maydonli yer uchastkalarini bergan.

Eslatib o‘tamiz, ikki davlat tashqi ishlar vazirlari 2022 yil noyabr oyida Qirg‘iziston-O‘zbekiston davlat chegarasining alohida uchastkalari to‘g‘risidagi shartnomani imzolagan, 2023 yil yanvar oyida Shavkat Mirziyoyevning Bishkekka davlat tashrifi doirasida ikki davlat prezidentlari ratifikatsiya yorliqlarini almashgan edi.

Soliq qo‘mitasi bank siriga keng miqyosda kirish imkoniyatini olmoqchi

Soliq qo‘mitasi banklarga mijozlari haqidagi ko‘plab axborotlarni uzatib turish majburiyatini yuklovchi qaror loyihasini muhokamaga qo‘ydi.

Loyihada “Bank-soliq” nomli avtomatlashtirilgan axborot almashish modulini ishlab chiqish va joriy etish masalasi ilgari surilgan. Unda kartasiga oyiga 206 mln so‘mdan ortiq pul o‘tkazilgan fuqarolar haqidagi ma’lumotlar soliq organiga taqdim etib borilishi nazarda tutilgan. Tadbirkorlarning hisobiga naqd yoki terminal orqali har qanday summadagi tushumlar va ularning yirik operatsiyalari haqidagi ma’lumotlar ham soliq organida jamlanishi mumkin.

Hukumat qarori shaklidagi hujjat loyihasi bo‘yicha jamoatchilik muhokamasi 8 iyulgacha davom etadi.

Xavfli deb topilgan yonilg‘i shoxobchalari xavfsiz hududlarga ko‘chiriladi

Vazirlar Mahkamasining tegishli qarori bilan yonilg‘i quyish shoxobchalari va gaz to‘ldirish inshootlarida avariya hamda noxush hodisalarning oldini olishga qaratilgan qo‘shimcha chora-tadbirlar belgilandi. Qarorga muvofiq, hokimliklar 1 sentabrga qadar xavfsizlik, sanoat va yong‘in xavfsizligi, ekologik hamda shaharsozlik normalariga javob bermaydigan yonilg‘i quyish shoxobchalari va gaz to‘ldirish inshootlari reyestrini shakllantiradi.

Shundan so‘ng mazkur obektlarni bosqichma-bosqich xavfsiz hududlarga ko‘chirish bo‘yicha chora-tadbirlar ishlab chiqiladi. Qarorda ko‘chirilgan obektlar joylashgan yer uchastkalariga bo‘lgan huquqlar tadbirkorlar ixtiyorida saqlanib qolishi belgilangan.

Mazkur choralar yonilg‘i quyish shoxobchalari va gaz to‘ldirish inshootlarida xavfsizlik talablarini kuchaytirish, avariyalar xavfini kamaytirish hamda aholi xavfsizligini ta’minlashga qaratilgani ta’kidlanmoqda.

Source link

Mundialning ikkinchi turiga kelib, afsuski, biz qo‘rqqan voqea sodir bo‘ldi. O‘zbekiston Portugaliya bilan o‘yinda bardosh berolmadi, Ronaldu va sheriklari beshta gol urib, bizni yirik hisobda mag‘lub etishdi. Lekin tongda qadrdonimiz Kolumbiya Kongoni ham yengib, bizga yana bir imkon berdi.

Juda kuchli raqib

Portugaliya bilan birinchi turda o‘ynaganimizda, bunaqa yirik hisobda yengilmasdik deb o‘ylayman. Chunki Ronaldu jamoasi birinchi turga qanday chog‘lanish bilan tushganini ko‘rdingiz. Kongo bilan durangdan keyin ular manziliga tanqidlar yog‘ildi, yetmaganiga jamoa ichidagi intrigalar haqida mish-mishlar tarqalib, portugallarni ruhlantirib yubordi.

Musobaqaga asosiy favoritlardan biri sifatida kelgan jamoa birinchi turdagi muvaffaqiyatsizlikdan keyin hammaga zo‘r ekanini isbotlash uchun alam bilan maydonga tushdi. Va tish-tirnog‘igacha qurollangan harbiylarga to‘la tank oldidan biz chiqib qoldik. Boshqa jamoa bo‘lsa ham, bardosh berolmasdi, ishonavering. Chunki raqibda chog‘lanish juda kuchli edi.

Portugaliyaning o‘yinlarini uzoq yillardan beri betaraf muxlis sifatida ko‘rib, zavqlanardik, lekin kecha bu jamoa kuchini yaqindan ko‘rdik. O‘zbekistonning o‘yinini boshqacha diqqat bilan tomosha qilamiz axir. Raqibning barcha chiziqlari kuchli ekanini o‘z tanamizda his qildik. Brunu Fernandesh degan dunyo futbolining eng zo‘r pleymeykeri birgina uzatma bilan 41 yoshli hujumchini yakkama-yakka vaziyatga olib chiqishini ham ko‘rdik.

Raqib bizga qarshi o‘yinga shunaqa zo‘r tayyorlangan ekanki, o‘z uslubida o‘ynash kamlik qiladi deb o‘ylab, standartlarga ham jiddiy e’tibor qaratdi. Ikkinchi golda hamma Ronaldu tepishini kutdi, lekin Mendesh gol urdi. Aslida u himoyachi bo‘lsa ham, zarbasi juda zo‘r, standartlarni yaxshi amalga oshiradi. Internetda Nunu tepgan penaltilarni ko‘rib chiqing, menimcha, xato qilganini topolmaysiz.

To‘rtinchi golni portugallar mashg‘ulotlarda tayyorlangan burchak zarbasidan keyin urishdi. Raqibini kuchsiz demay, standartlarga ham alohida tayyorlangan jamoa, shubhasiz, g‘alabaga munosibdir. Tan olaylik, Portugaliya dunyoning eng kuchli jamoalaridan biri ekanini isbotladi.

Husanovning ko‘z yoshlari…

Albatta, o‘yinda ko‘p xato qildik, hamma golda kimdir xato qiladi, ammo men bu haqda gapirmoqchi emasman. Biz bu o‘yinda hech qanday mashg‘ulotlar, hech qaysi xorijiy yig‘inlar berolmaydigan tajriba orttirdik. Osiyo grandlariga qarshi o‘yinlarda ham mana shunaqa dovdirardik. Ishoning, endi Osiyoning hech bir jamoasiga qarshi oyog‘imiz qaltiramaydi! Chunki biz o‘ynash mumkin bo‘lgan eng kuchli raqibga qarshi o‘ynab bo‘ldik, bundan zo‘ri bo‘lmaydi.

Yanvarda Saudiya Arabistonida Osiyo chempionati boshlanadi. O‘sha musobaqada butkul boshqacha, ruhan o‘sgan, hech kimdan qo‘rqmaydigan O‘zbekistonni ko‘rishimizga ishonaman. Krishtianu va jamoasiga shunchaki tan berish kerak. Ular bizni tezda unutib yuborishar, lekin biz Portugaliyadan olgan katta darsimizni aslo unutmaymiz. Azizning bekor qilingan golini, Eldorning tanasida bor kuchini sarflab yugurganini, Jalol Jayid degan hushtagiga «yopishib olgan» marokashlik hakamni, futbolimiz yulduzi Abduqodir Husanovning ko‘z yoshlarini unutmaymiz. Men bu jamoa bilan yana bir marta o‘ynashimizni juda xohlardim.

Futbolchilarimiz o‘yindan keyin yig‘lashdi, chunki ular o‘yinga butun millat ko‘z tikib turganini bilardi. Raqib Portugaliya, nima qilaylik, deb bir amallab o‘yinni tugatib, keyin Ronaldu bilan rasm tushishga oshiqishmadi. Yutqazib qo‘yishganidan uyalishdi. Lekin siz uyaladigan ish qilmadingiz, yigitlar. Sharafli, lekin mashaqqatli yo‘lni boshlab berdingiz. Bunaqa yo‘llarda hammasi silliq kechmaydi. Raqib «Real», «Barselona», PSJ yulduzlaridan tashkil topgandi. Bizda unaqa imkon yo‘q, tarkibimiz o‘zimizga yarasha, asosiy muammosi futbolchilarga maosh to‘lash bo‘lib qolgan mahalliy chempionatdan futbolchi olishga majburmiz. Lekin hozircha. Bu mundialdan keyin yana bir qator futbolchilarimiz uchun Yevropa eshiklari ochilishiga umid qilamiz.

Kolumbiya yordam qildi

Match day’ning oxirgi o‘yinida Kolumbiya Kongoni 1:0 hisobida yengib muddatidan avval pley-off masalasini hal qildi. Dias jamoasi bu g‘alaba orqali bizga yordam berib yubordi. Endi O‘zbekiston oxirgi turda Kongoni yengsa, pley-offga chiqishi mumkin. Albatta, bu o‘z qo‘limizda emas, boshqa o‘yinlarni ham kutishga majburmiz, lekin baribir uchinchi o‘yinda ham imkoniyatni saqlab qolganimiz juda zo‘r bo‘ldi.

Kecha tunda yana ikki o‘yin o‘tkazildi. Bizning o‘yindan keyin Angliya Karlush Keyrush boshchiligidagi Ganani yenga olmadi — 0:0. Bu durangdan keyin Gana guruhdan chiqish masalasini hal qildi. Angliya ham guruhda qolib ketmasligi aniq. Guruhdagi yana bir o‘yinda Xorvatiya Panamani mag‘lub etdi. Bu guruhdan katta ehtimol uch jamoa pley-offga chiqadi. Bugundan jahon chempionatida 3-tur o‘yinlari boshlanadi.

Source link

So‘nggi tur arafasida guruhlarda qanday intrigalar bor va kimga qanday natija kerak?

2026 yilgi jahon chempionatida barcha jamoalar ikkitadan o‘yin o‘tkazib bo‘lishdi va uchinchi turni boshlash arafasida. Shundan keyin pley-offning barcha ishtirokchilari nomi ma’lum bo‘ladi.

Chempionat reglamentiga ko‘ra, yangi format bo‘yicha guruhlardan 32 ta jamoa keyingi bosqichga o‘tadi: 12 ta guruhda birinchi va ikkinchi o‘rin egalari avtomatik ravishda pley-off ishtirokchisiga aylanadi, shuningdek, uchinchi o‘rinni olgan 12 ta jamoadan eng yaxshi natijaga ega 8 jamoa ular safiga qo‘shiladi.

Bir guruhda ikki yoki undan ortiq jamoalarning ochkolari soni teng kelib qolgan taqdirda, ko‘rsatkichlar quyidagi tartibda hisobga olinadi:

– o‘zaro o‘yinlardagi ochkolar soni;

– o‘zaro o‘yinlardagi gollar nisbati;

– o‘zaro o‘yinlarda urilgan gollar soni;

– umumiy to‘plar nisbati;

– jami urilgan gollar soni;

– feyr-pley reytingidagi intizomiy ballar soni kamligi: sariq kartochka – 1 ball, to‘g‘ridan to‘g‘ri bo‘lmagan qizil kartochka – 3 ball, to‘g‘ridan to‘g‘ri qizil kartochka – 4 ball, sariq va to‘g‘ridan to‘g‘ri qizil kartochka – 5 ball;

– FIFA reytingidagi o‘rin.

Uchinchi o‘rin egalari orasidagi eng yaxshi jamoalarni aniqlash uchun:

– jami ochkolar soni;

– jami gollar nisbati;

– jami urilgan gollar soni;

– feyr-pley reytingidagi intizomiy ballar soni kamligi;

– FIFA reytingidagi o‘rin.

Ikki turdan keyin Meksika (A), AQSh (D), Germaniya (E), Argentina (J) milliy jamoalari ikkitadan o‘yinda g‘alaba qozonib, guruh g‘olibligini naqd qilishgan. Shuningdek, Fransiya va Norvegiya (ikkisi ham I guruhida) hamda Kolumbiya (K) ham ikkitadan g‘alabaga erishib, pley-off masalasini muddatidan oldin hal qilishgan, lekin bu guruhlarda kim birinchi o‘rinni egallashi hozircha aniq emas.

A guruhi

A guruhida ikki turdan keyin bitta intriga allaqachon yopilgan: Meksika birinchi o‘rinni kafolatlagan va 1/16 finalga chiqqan. Janubiy Koreya ikkinchi o‘rinda kelmoqda, Chexiya va JAR so‘nggi turda turnirda qolish uchun kurashadi.

3-tur o‘yinlari. Chexiya – Meksika, JAR – Koreya. Ikki o‘yin ham 25 iyun kuni Toshkent vaqti bilan soat 04.00 da boshlanadi.

– Meksika allaqachon guruh g‘olibligini kafolatlagan. Chexiyaga yutqazsa ham mezbonlar birinchi o‘rindan tushib ketmaydi: JAR ustidan g‘alaba qozonsa, Koreyada ham ochkolar soni 6 taga yetadi, ammo meksikaliklar o‘zaro o‘yindagi g‘alaba evaziga (1:0) yuqorida qoladi.

– Koreyaga to‘g‘ridan to‘g‘ri 1/16 finalga yo‘l olish uchun JAR bilan o‘yindagi durang ham kifoya qiladi. Osiyoliklar jamoasi o‘zaro uchrashuv natijasiga ko‘ra (2:1) Chexiyadan ustun. Janubiy afrikaliklardan mag‘lubiyat koreyaliklar uchun jiddiy muammolar tug‘dirishi mumkin: agar chexlar ham Meksikani yengadigan bo‘lsa, Son Heung Ming jamoadoshlari uch ochko bilan to‘rtinchi o‘ringa tushib ketadi, agar chexlar g‘alaba qozona olmasa, uchinchi o‘rin egalarining yakuniy turnir jadvali shakllanishini kutishga to‘g‘ri keladi.

– To‘g‘ridan to‘g‘ri yo‘llanmaga ega bo‘lish uchun Chexiyaga birinchi navbatda Meksika ustidan g‘alaba qozonish, shu bilan birga, Koreya JAR bilan o‘yinda kerakli hisobda yutqazishi kerak bo‘ladi. Chexiya va JAR o‘rtasidagi o‘zaro o‘yinda durang qayd etilgandi – 1:1, ochkolar teng kelib qolgan taqdirda barchasini umumiy gollar nisbati hal qiladi, hozircha Yevropa vakillarida vaziyat yaxshiroq (+1). Chexlarni minimal hisobdagi g‘alaba ham qoniqtirishi uchun janubiy afrikaliklar ham bittadan ortiq gol farqi bilan g‘alaba qozonmasligi talab etiladi. Agar Chexiya JARga qaraganda bitta kamroq gol ursa, bu jamoalarda to‘plar nisbati bo‘yicha ham tenglik yuzaga keladi – shundan keyin urilgan gollar soniga qaraladi, undan keyin ish intizomiy ballarni hisoblash va FIFA reytingidagi o‘rinlarni ko‘rib chiqishgacha borishi mumkin. Lekin to‘rt ochko ham uchinchi o‘rin bilan guruhdan chiqish imkoni bo‘ladi – buning uchun kamida to‘rtta guruhdagi uchinchi o‘rin egalaridan yaxshiroq ko‘rsatkichlarga ega bo‘lish talab qilinadi.

– JARni Koreya bilan o‘yinda faqat g‘alaba qoniqtiradi. Shu shart bajarilsa va Chexiya Meksikani yenga olmasa, janubiy afrikaliklar ikkinchi o‘rin bilan to‘g‘ridan to‘g‘ri pley-offga chiqadi. Agar chexlar ham o‘z o‘yinida g‘alaba qozonadigan bo‘lsa, janubiy amerikaliklarga Yevropa vakillariga qaraganda yirikroq g‘alaba kerak bo‘ladi. Va yana shu gap – jamoa 4 ochko bilan uchinchi o‘rinda qolsa ham, umumiy reytingda yuqoriroqda joylashib, pley-offga o‘tishi aniq, lekin ikki ochko bilan uchinchi o‘rin orqali guruhdan chiqish amalda imkonsiz.

A guruhi vakillariga pley-offda kim raqib bo‘ladi?

Ushbu guruh g‘olibi C, E, F, H yoki I guruhlaridan uchinchi o‘rin bilan chiqqan jamoalardan biriga qarshi o‘ynaydi. Meksika allaqachon guruhdagi o‘z o‘rnini biladi, ammo kim raqib bo‘lishi aniq emas.

Guruhdagi ikkinchi o‘rin B guruhidan ikkinchi o‘rin bilan chiqadigan jamoaga (hozir bu Shveytsariya) qarshi o‘ynaydi.

Guruhning uchinchi jamoasi (agar turnirdagi ishtirokini davom ettirsa), E yoki G guruhlari g‘olibiga to‘qnash kelishi mumkin.

B guruhi

Kanada va Shveytsariya 4 tadan ochko jamg‘arib, Bosniya va Hersegovina hamda Qatardan oldinlab ketishgan. Hozircha bu jamoalar to‘g‘ridan to‘g‘ri yo‘llanmani rasmiylashtirmadi, ammo guruh jadvali yetakchilariga o‘zaro o‘yinda yutqazmaslik yetarli bo‘ladi. Bosniyaliklar va qatarliklarda uchinchi o‘rin uchun imkoniyat saqlanib qolmoqda, guruhdan to‘g‘ridan to‘g‘ri yo‘llanmaga ega bo‘lish uchun esa so‘nggi turda jamolardan biri yirik hisobda g‘alaba qozonishi talab etiladi.

3-tur o‘yinlari. Shveytsariya – Kanada, Bosniya va Hersegovina – Qatar. Ikki o‘yin ham 24 iyunga o‘tar kechasi soat 00.00 da boshlanadi.

– Kanadaga guruh g‘olibi bo‘lish uchun Shveytsariya bilan o‘yinda durang natija kifoya qiladi. Ochkolar tengligicha qolgan taqdirda, turnir mezbonlari to‘plar nisbati bo‘yicha ustunlikka ega bo‘ladi: kanadaliklarda – +6, shveysarlarda – +3.

– Shveytsariya faqat Kanadani yengish orqali birinchi o‘ringa chiqishi mumkin. Durang natija yevropaliklarni ikkinchi o‘rin orqali pley-offga olib chiqadi, hatto mag‘lubiyatga uchralgan taqdirda ham eng yaxshi ko‘rsatkichga ega uchinchi o‘rinlardan biri sifatida 1/16 finalga yo‘l olish mumkin.

– Ikkinchi turda Qatarni yirik hisobda mag‘lub etgan (6:0) Kanada faqat quyidagi shart bilan uchinchi o‘ringa tushib ketishi mumkin: Shveytsariyadan mag‘lubiyatga uchrab, Bosniya Qatar ustidan yirik hisobda g‘alaba qozonsa. Ikki o‘yindagi to‘plar farqi 9 taga yetsa (masalan, kanadaliklar 0:3 hisobida yutqazsa va bosniyaliklar 6:0 hisobida g‘alaba qozonsa), o‘zaro o‘yinda durang qayd etilgani (1:1) tufayli keyingi o‘lchovlarga (urilgan gollar soni, intizomiy reyting, FIFA reytingi) qaraladi.

– Ikkinchi turda Bosniyani yirik hisobda (4:1) mag‘lub etgan Shveytsariya uchinchi o‘ringa tushib ketishi uchun quyidagi shartlar bajarilishi kerak: Kanadaga yutqazishi va Qatar Bosniya ustidan yirik hisobda g‘alaba qozonishi. Va bu yerda ham to‘plar farqi roppa-rosa 9 ta bo‘lsa, unda o‘zaro uchrashuvdagi tenglik (1:1) tufayli keyingi o‘lchovlarga qaraladi.

– Bosniyaga Qatar ustidan g‘alaba kerak. 4 ochkoga ega bo‘ladigan istalgan jamoa uchinchi o‘rin egalari orasida kuchli sakkizlikka kiradit. To‘g‘ridan to‘g‘ri yo‘llanma uchun esa o‘z o‘yinida yirik hisobda g‘alaba qozonish va Kanada va Shveytsariyadan yirik hisobda yutqazishini kutish kerak bo‘ladi.

– Qatarni Bosniya bilan o‘yinda faqat g‘alaba qoniqtiradi. To‘g‘ridan to‘g‘ri chiqish uchun esa Bosniyani yirik hisobda yengish va Shveytsariya Kanadaga yirik hisobda yutqazishiga umid qilish kerak bo‘ladi.

– Bosniya va Qatar o‘rtasidagi bahsda durang ikki jamoani ham guruhda qoldiradi: 2 ochko – uchinchi o‘rin egalari reytingida sakkizlikka kirish uchun yetarli bo‘lmaydi. Bunday ssenariyda to‘plar nisbati tufayli Bosniya uchinchi, Qatar to‘rtinchi bo‘ladi.

B guruhi vakillariga pley-offda kim raqib bo‘ladi?

Ushbu guruh g‘olibi E, F, G, I yoki J guruhlaridan uchinchi o‘rin bilan chiqadigan jamoalardan biriga qarshi o‘ynaydi.

Guruhning ikkinchi vakili A guruhining ikkinchi vakiliga (hozir bu Koriya) to‘qnash keladi.

Guruhning uchinchi vakili (agar guruhdan chiqa olsa), D yoki E guruhlari g‘oliblaridan biri bilan o‘ynashi mumkin.

C guruhi

Braziliya va Marokash 4 tadan ochkoga ega, ammo 1/16 final yo‘llanmasini hali rasmiylashtirmagan. 3 ochkoga ega Shotlandiya ham top-2 uchun kurashda qolmoqda. Haiti esa so‘nggi tur natijalaridan qat’i nazar o‘zaro o‘yindagi mag‘lubiyat tufayli shotlandlarni quvib o‘ta olmaydi va to‘rtinchi o‘rindan yuqoriga ko‘tarila olmaydi.

3-tur o‘yinlari. Shotlandiya – Braziliya, Marokash – Haiti. Ikki o‘yin ham 25 iyunga o‘tar kechasi soat 03.00 da boshlanadi.

– Braziliya 1/16 finalga to‘g‘ridan to‘g‘ri yo‘llanma olishi uchun Shotlandiyani mag‘lub etishi kifoya. Parallel uchrashuvda Marokash Haitini yenga olmasa, guruhda birinchi o‘rin pentakampeonlarda qoladi. Shu bilan birga, Marokash Haitini mag‘lub etgan taqdirda ham Braziliya o‘z o‘yinida g‘alaba qozonib ham birinchi o‘rinda qolishi mumkin. Brazillar marokashliklar bilan o‘zaro o‘yinda durang hisob qayd etishgan (1:1), hozircha to‘plar nisbati afrikaliklarnikiga qaraganda yaxshiroq (+2), shuning uchun janubiy amerikaliklar ochkolar teng kelgan taqdirda yuqorida qolishadi.

– Marokashga 1/16 finalga chiqish uchun Haitiga yutqazmaslik kifoya qiladi. G‘alaba afrikaliklarni birinchi o‘ringa olib chiqishi mumkin, ammo buning uchun Braziliya Shotlandiya bilan o‘yinda ochko yo‘qotishi yoki marokashliklar o‘z o‘yinida yirikroq hisobda g‘alaba qozonib, to‘plar nisbatini yaxshiroq qilib olishi kerak bo‘ladi. Shu bilan birga, mag‘lubiyat ham Marokashni uchinchi o‘ringa tushirib yubormasligi mumkin – buning uchun Shotlandiya Braziliyani mag‘lub etmasligi kerak, ochkolar teng kelib qolgan taqdirda marokashliklar shotlandlar bilan o‘zaro o‘yin natijasiga ko‘ra (1:0) yuqorida qoladi. Marokash uchun eng xavfli ssenariy – o‘z o‘yinida Haitiga mag‘lub bo‘lishi va Shotlandiya Braziliyadan ustun kelishidir, bu holda brazillar bilan qo‘shimcha ko‘rsatkichlar bo‘yicha bahslashishga to‘g‘ri keladi.

– Agar Braziliya va Marokash o‘z o‘yinlarida yutqazadigan bo‘lsa, ularda 4 tadan ochko bo‘ladi, o‘zaro o‘yinda durang qayd etilgani tufayli barchasini to‘plar nisbati hal qiladi. Hozirda Braziliyada bu yaxshiroq – +3, Marokashda esa – +1. Brazillar voqealarning salbiy rivojida ham ikkinchi o‘rinni o‘zida saqlab qolishadi, buning uchun Anchelotti shogirdlari oxirgi turda ikki yoki undan ko‘p to‘p farqi bilan yutqazmasligi kerak – aks holda afrikaliklar Janubiy Amerika vakillaridan yuqoriga chiqib ketadi.

– To‘g‘ridan to‘g‘ri pley-offga chiqish uchun Shotlandiya Braziliya ustidan g‘alaba qozonishi kerak bo‘ladi. Britanlar jamoasi shunda 6 ochko bilan top-2 dan o‘rin olishi aniq, Marokash Haiti bilan o‘yinda ochko yo‘qotgan taqdirda birinchi o‘rinni ham o‘ziniki qiladi. Braziliya bilan durang hisob Shotlandiyani 4 ochko bilan uchinchi o‘rinda qoldiradi va bu uchinchi o‘rinlar orasidagi eng yaxshi natijalardan biri bo‘lishi aniq. Mag‘lubiyat ham shotlandlarni uchinchi o‘rindan pastga tushirib yubormaydi, ammo bu holda ular boshqa guruhlardagi 3-o‘rin egalarining natijalari yomonroq bo‘lishiga umid qilishi kerak bo‘lib qoladi.

– Haiti allaqachon 1/16 finalga chiqish imkoniyatini yo‘qotgan. KONKAKAF vakillari so‘nggi o‘yinida Marokashni mag‘lub etgan taqdirda ham uchinchi o‘rin uchun raqobatchisi Shotlandiya bilan o‘zaro o‘yindagi mag‘lubiyat (0:1) tufayli yuqoriga ko‘tarila olmaydi.

C guruhi vakillariga pley-offda kim raqib bo‘ladi?

Ushbu guruh g‘olibi F guruhidan ikkinchi o‘rin bilan chiqqan jamoaga qarshi o‘ynaydi (hozir bu Yaponiya).

Guruhning ikkinchi o‘rin egasi F guruhi g‘olibiga (hozir bu Niderlandiya) qarshi maydonga tushadi.

Guruhda uchinchi o‘rinni olgan jamoa (agar turnirda qolsa), A, E yoki I guruhi g‘oliblaridan biriga qarshi o‘ynashi mumkin.

Source link