Braziliyani turnirdan chiqarib yuborgan skandinavlar turnir g‘olibligi uchun favoritlardan biriga ham muammo tug‘dira oladimi? Kabo-Verde va Misr kabi kamtarona raqiblarga qarshi o‘yinlarda ham qiynalgan Argentina ustozi Yevropa jamoasiga qarshi o‘yin uchun yangi narsa o‘ylab topadimi?

Foto: Global Look Press, Getty Images

Bugun tunda jahon chempionatida chorakfinal bosqichi yakunlanadi. Dastlab Harri Keyn boshchiligidagi Angliya va turnir kashfiyotiga aylangan Norvegiyaga qarshi bahs olib boradi, tunda amaldagi chempion Argentina Shveytsariyaga qarshi o‘ynaydi. Ushbu juftlik g‘oliblari yarimfinalda o‘zaro raqib bo‘ladi.

Norvegiya – Angliya

12 iyul, 02:00. Hard Rock Stadium (Mayami)

Turnir startida ko‘pchilik Norvegiyani bir futbolchiga tayanib qolgan jamoa sifatida ko‘rayotgandi. Ammo guruh bosqichi va pley-offdagi dastlabki o‘yinlar Stole Solbakken yaxshi jamoa shakllantirganini ko‘rsatdi. Turnir davomida norveglarga munosabat o‘zgarib bordi. Braziliya ustidan qozonilgan g‘alabadan keyin esa shu qadar ishonchli chiqdiki, Erling Holand ikki gol urgan bo‘lsa-da, bu g‘alaba birgina uning dahosi mahsuli emasdi. Bu o‘yinda jamoa tarkibidagi barcha futbolchilar yaxshi taassurot qoldirishdi. Skandinavlar o‘shanda o‘yin borasida ham ustunlik qildi va nomdor raqibni faqat qarshi hujumlarga tayanishga majbur qildi, o‘z imkoniyatlaridan esa sovuqqonlik bilan foydalandi, bunga parallel ravishda brazillarning asosiy futbolchisi Vinisius to‘liq zararsizlantirildi.

Stole Solbakken o‘yin yakunlanganidan keyingi intervyusida Norvegiya avvalboshdan to‘pga egalik qilish va o‘yinni nazorat qilish uchun maydonga tushganini aytib o‘tdi. Amalda ham jamoa markaziy himoyachilar orqali hujum boshladi va uzoq vaqt bosim ostida to‘pga egalik qilishdan cho‘chimadi. Shuning uchun navbatdagi o‘yinda kim birinchi raqam ostida o‘ynashini oldindan aytib bo‘lmaydi. Qog‘ozda Angliya favorit, ammo Norvegiya amalda buni yo‘qqa chiqara olish salohiyatiga ega.

O‘yinga ko‘pchilik Holand va Keyn dueli prizmasi orqali ham qaramoqda. Ikki forvard ham turnirni yuqori darajada o‘tkazmoqda: Erling to‘rt o‘yinda 7 gol urib tashladi, Harrining hisobida 6 ta gol bor. Sayyoraning ayni vaqtdagi eng kuchli hujumchilarining to‘qnashuvini kuzatish qiziq, ammo o‘yin faqat ularning qarama-qarshiligidan iborat emas.

Angliyaning hozirgi avlodi so‘nggi ikki Yevropa chempionatida finalga chiqqan, 4 yil oldingi jahon chempionatida bo‘lajak finalchilar Fransiyaga yutqazib, turnirni tark etgandi. Bu safar Tomas Tuxel jamoasi o‘z oldiga mundialda yuqori natijalarga erishishni ko‘zlagan va chorakfinalda to‘xtamoqchi emas. Inglizlar deyarli har bir o‘yinda matonat ko‘rsatishiga to‘g‘ri kelmoqda (guruhda Xorvatiya, pley-offda Kongo DR va Meksika bilan o‘yinlar juda qiyin kechdi). Bu o‘yinlarda himoya chizig‘iga savollar tug‘ilgan bo‘lsa-da, jamoa tonusni saqlab qolmoqda.

Norvegiyaga qarshi o‘yin oldidan esa o‘ng qanot himoyasida muammolar yuzaga kelgan: bu qanot uchun asosiy nomzod hisoblangan Jyeyms jarohatlandi, uning o‘rnini egallagan Spensda ham muammo paydo bo‘ldi, uchinchi nomzod hisoblangan Kuansa esa Meksika bilan o‘yinda qizil kartochka olib, ikki o‘yinga diskvalifikatsiya qilindi. Tomas Tuhel endi bu pozitsiyani tayanch yarimhimoyachilaridan biri bilan yopishgacha bo‘lgan radikal choralarga qo‘l urishga majbur bo‘lishi mumkin.

U Norvegiyaga qarshi o‘yin uchun birinchi galda Holandni jamoadoshlaridan uzib qo‘yishga qaratilgan reja tayyorlagani tayin, buning uchun birdaniga ikki yarimhimoyachi ushbu hujumchiga uzatmalar yo‘lini to‘sishga jalb etilishi kerak bo‘ladi. Ammo Erling butun o‘yin davomida payt poylab yurib, kutilmaganda portlashi va darvozani ishg‘ol qilishi mumkin. Shuning uchun inglizlar jamoasi himoyachilaridan hushyorlikni bir soniyaga bo‘lsa-da yo‘qotmaslik talab etiladi.

Argentina – Shveytsariya

12 iyul, 06:00. Arrowhead Stadium (Kanzas-Siti)

Ko‘pchilik bu turnirda Argentina uchun oson guruh va pley-offda oson yo‘lak tayyorlab berilgani haqidagi nazariyalarni tarqatish bilan band. Jamoa chindan ham guruhda Jazoir, Avstriya va Iordaniya kabi raqiblarga qarshi o‘yinlarda hech qanday muammoga uchramadi va 100 foizlik natija bilan guruhdan chiqdi.

Ammo 1/16 finalda turnir debyutanti Kabo-Verde bilan o‘yin kutilmaganda amaldagi chempionlar uchun ilk jiddiy sinovga aylandi. Vozinya boshchiligidagi orolliklar o‘yinning asosiy vaqtida nomdor raqibga turib bera oldi va faqat qo‘shimcha bo‘limlarda mag‘lub bo‘ldi (2:3).

1/8 finalda Misrga qarshi kechgan o‘yin esa allaqachon jahon chempionati va Argentina futboli tarixiga kirdi. «Albiseleste» 79-daqiqaga qadar ikki to‘p farqi bilan ortda bordi, faqat o‘yin oxirida uchta gol urib, irodali g‘alabaga erishdi.

Bir tomondan, bunday kambek Argentina futbolchilarida o‘ziga bo‘lgan ishonchni mustahkamlashi mumkin. Boshqa tomondan – jamoa o‘yinidagi muammolar yana bir bor ko‘zga tashlanib qoldi. Skaloni shogirdlari bu turnirda ochiq o‘yin namoyish etib, raqiblarga ko‘p narsaga ruxsat bermoqda, yuqori joylashgan himoya chizig‘i jamoa jarima maydoni tomon xavfli reydlarga sabab bo‘lmoqda. Agar Messi yuqori sport formasini saqlab qolmaganida, bu jamoa turnir favoritlari qatorida sanalmayotgan bo‘lardi.

Shveytsariya esa, aksincha, himoyadagi tartibli o‘yin orqali chorakfinalgacha yetib keldi. 1/8 finalda yevropaliklar qariyb ikki soat mobaynida Kolumbiyani tiyib turdi va uning tezkor hujumchilariga odatiy o‘yinini ko‘rsatishga imkon bermasdan, penaltilar seriyasiga yetib bordi va 1954 yildan buyon ilk bor jahon chempionatlarida chorakfinalga yo‘l oldi.

Shveytsariya azaldan favoritlar uchun noqulay raqib bo‘lib kelgan. Bu jamoa yorqin taassurot qoldirmasligi mumkin, lekin raqibning ustunliklarini yo‘qqa chiqara oladi. Shu o‘rinda 2014 yilgi chempionatini yodga olish mumkin, o‘shanda Argentina shveysarlar to‘sig‘idan faqat Di Mariyaning 118-daqiqada urgan goli orqali o‘ta olgandi. O‘shanda ham yevropaliklar maydon markazini betonlab tashlagan va raqibni faqat individual mahoratga tayanishga majbur qilgandi.

Argentina qarama-qarshi kurslarda kechuvchi o‘yinlarda o‘zini yaxshi his qiladi, ammo to‘pni butunlay topshirib, ikkinchi raqamda harakat qilishga rozi bo‘luvchi jamoalar bilan doimo katta muammolarga duch keladi. Shveytsariya esa xuddi shunday raqiblardan biri. Argentina bu turnirda ikki marta halokat yoqasidan qaytdi: Kabo-Verde va Misrga qarshi o‘yinlarda faqat saviya borasidagi farq qo‘l keldi. Endi esa yo‘ldan favoritlarga qarshi qanday o‘ynashni biladigan raqib chiqqan.

1/8 finaldagi kambek drama nuqtayi nazaridan ajoyib chiqdi, shu bilan birga, bu o‘yin Skaloni jamoasining mustahkamlik zaxirasi unchalik katta emasligini ko‘rsatib qo‘ydi. Shveytsariya bu safar ham

o‘yinni uzoq davom etadigan pozitsion kurashga aylantirishi aniq, bunday o‘yinda birgina xato ham qimmatga tushishi mumkin. Ammo Argentinada Messi bor va bu qurol ushbu turnirda hali otmay qolmadi.

Source link

Belgiyaning zaxira darvozaboni qo‘pol xatoga yo‘l qo‘ydi. Merino bu safar ham so‘nggi daqiqalarda qahramonga aylandi.

Foto: David Ramos/Getty Images

Ispaniya milliy jamoasi pley-offda so‘nggi daqiqalarda urilgan gol orqali g‘alaba qozonishda davom etmoqda. Luis de la Fuente shogirdlari chorakfinalda qiyinchilik bilan Belgiya to‘sig‘idan o‘tdi. Endi 14 iyul kuni muxlislarni yarimfinalda superjang kutmoqda – ispanlar fransuzlarga qarshi.

Ispaniya – Belgiya 2:1

Gollar: Ruis, 30 (1:0). De Ketelare, 41 (1:1). Merino, 88 (2:1)

Ispaniya: Simon, Lyaport, Kubarsi, Kukurelya, Porro, Ruis (Torres, 55), Rodri, Olmo (Merino, 86), Baena (Pedri, 55), Yamal, Oyyarsabal (Uilyams, 79)

Belgiya: Kurtua (Lammens, 71), Mehele, Ngoy, De Keyper (Seys, 61), Kastan, Vanaken (Vitsel, 60), Raskin, De Bryuyne (Salemakers, 86), Doku, Trossar (Lukaku, 60), De Ketelare

Ogohlantirishlar: Kubarsi, 43. Lyaport, 90 – De Bryuyne, 85. Vitsel, 90

Ikki jamoa ham boshlang‘ich tarkiblarda syurprizlarga qo‘l urdi. Belgiyaliklar safida 1/8 finalda AQShga qarshi o‘yinni to‘liq zaxira o‘rindig‘ida o‘tkazgan Kevin de Bryuyne hamda o‘sha o‘yinda ikkinchi bo‘limda tushirilgan Jyeremi Doku bu safar ilk daqiqalardan o‘ynadi. 

Bundan tashqari, Rudi Garsiya chigalyozdi mashg‘ulotlari vaqtida jarohatlangani tufayli Yuri Tilemans xizmatlaridan foydalana olmadi. Ispanlarda esa kutilmaganda jamoaning asosiy yarimhimoyachisi Pedri zaxirada qoldirildi.

Belgiyaliklar o‘yinni kuchli pressing bilan boshladi, de Bryuyne va de Ketelare 4-4-2 sxemasida harakatlangan tarkibda birinchi himoyachilar vazifasini o‘tashdi. Ammo ko‘p o‘tmay «Qizil furiya» tashabbusni o‘z qo‘liga oldi.

Birinchi bo‘limdagi kuling brekkacha belgiyaliklar raqib jarima maydonida atigi bir marta to‘pga teginishgani ham o‘yin kartinasini yaqqol ifodalaydi. Kichik tanaffusdan keyin ko‘p o‘tmay ispanlar hisobni ochishdi: Olmoning zarbasini Kurtua qaytardi, ammo to‘pga birinchi bo‘lib Ruis yetib keldi.

Ispaniya bu turnirda biror marta gol o‘tkazmagani hisobga olinsa, belgiyaliklar tang ahvolda qolishgandi. Ammo aynan ushbu jamoaga Ispaniyaga birinchi golni urish nasib qildi. Garsiya markaziy forvard pozitsiyasiga ko‘chirgan yarimhimoyachi Sharl de Ketelare turnirdagi navbatdagi golini urdi (u o‘tgan turda AQSh darvozasiga dubl qayd etgandi).

«Qizil furiya» ikkinchi bo‘lim davomida ham ustunlikka erishdi, «qizil iblislar» darvozaboni Tibo Kurtua jarohat olishi esa o‘yin taqdirini hal qildi.

Uning o‘rniga zaxiradan tushirilgan Lammens o‘yin oxirida qo‘pol xatoga yo‘l qo‘ydi – u Kubarsining zarbasidan keyin to‘pni ushlab qololmadi, to‘pga birinchi bo‘lib yetib kelgan Mikel Merino darvozani ishg‘ol etdi. «Arsenal»ning ushbu yarimhimoyachisi o‘tgan bosqichda Portugaliya darvozasiga ham o‘yin oxiridagi g‘alaba goliga mualliflik qilgandi.

Garsiya shogirdlarida o‘yinni qutqarish uchun kuch ham, vaqt ham qolmagandi. O‘yinga qo‘shib berilgan daqiqalarda Simon to‘pga chiqishda xatoga yo‘l qo‘yib, raqibga gol sovg‘a qilishi mumkin edi, ammo Lukaku bu safar qahramonlik ko‘rsata olmadi. O‘yin davomida zarbalar berish bo‘yicha Ispaniya yaqqol ustunlik qildi (17 ga qarshi 5, darvoza sohasiga to‘g‘ri borgan zarbalar bo‘yicha 8:2), xG ko‘rsatkichi bo‘yicha ham katta farq yuzaga keldi (0,37 ga qarshi 2,08). 

Endi Ispaniya 14 iyul kuni yarimfinalda Fransiyaga qarshi maydonga tushadi.

Source link

La Parisien nashrining o‘z manbasiga tayanib xabar berishicha, Fransiya terma jamoasining sobiq futbolchisi Samir Nasri politsiya tomonidan giyohvand moddalar savdosi bilan bog‘liq pul yuvishda ayblanib hibsga olingan.

Manbaga ko‘ra, «Manchester Siti» va «Olimpik de Marsel» klublarining sobiq yarim himoyachisi, hozirda Canal Plus eksperti, giyohvand moddalar importi, jinoiy tashkilot tuzish va uyushgan guruh tarkibida pul yuvishda ayblanib so‘roq qilingan. Samir Nasri o‘z vaqtida «Arsenal»da ham to‘p surgan. 

9-iyul kuni u Parij politsiya bo‘limida taxminan 10 soat vaqtini hibsda o‘tkazdi, deb ta’kidladi manba. U payshanba kuni kechqurun ayblovsiz qo‘yib yuborildi.

Nasri Ivri-sur-Seine shahridagi XS tungi klubi bilan bog‘liq voqeada ishtirok etmoqda, u 2016-yildan beri uning ham egasi hisoblanadi. Tergov ma’lumotlariga ko‘ra, 2021 va 2023-yillar oralig‘ida ushbu muassasa orqali katta miqdordagi naqd pullar Marsel giyohvand moddalar sotuvchisi Hakim Berrebushning rafiqasiga o‘tkazilgan, Berrebushning o‘zi esa qamoqda bo‘lgan. Nasri bu ish bo‘yicha iyun oyi oxirida so‘roq qilingan.

Samir Nasri Berrebush oilasini bolaligidan biladi. So‘roq paytida 39 yoshli sportchi 2020-yilda Dubayda bo‘lib o‘tgan uchrashuvida klubdagi ulushlarini Hakim Berrebushga og‘zaki ravishda o‘tkazganini, ammo bitim hech qachon rasmiylashtirilmaganini da’vo qildi.

Source link

Ispaniya turnir g‘olibligi uchun favorit, ammo Belgiya o‘yindan o‘yinga kuchaymoqda.

Bugun tunda Ispaniya va Belgiya o‘rtasidagi uchrashuv bilan jahon chempionatida chorakfinal bosqichi davom ettiriladi. Ushbu jamoalar katta turnirlarda tez-tez to‘qnash kelishadi va bu borada ustunlik Pireney yarimoroli vakillarida.

Lekin Belgiya AQShga qarshi o‘yini bilan o‘zini hisobdan chiqarishga hali erta ekanini namoyish etib qo‘ydi.

Ushbu bahs g‘olibi yarimfinalda Fransiyaga qarshi o‘ynaydi.

Ispaniya – Belgiya

11 iyulga o‘tar kechasi, 00:00. SoFi Stadium (Los-Anjyeles)

Jamoalarning turnirdagi yo‘li

Luis de la Fuente shogirdlari turnir startida kutilmaganda Kabo-Verde bilan o‘yinda ochko yo‘qotgandi, ammo keyingi raqiblarning barchasi mag‘lub etildi: guruhda Saudiya Arabistoni (4:0) va Urugvay (1:0), pley-offda – Avstriya (3:0) va Portugaliya (1:0).

Pireney yarimorolidagi qo‘shnilari bilan o‘yinni zaxiradan tushgan futbolchilar hal qilishdi: 91-daqiqada Ferran Torres Mikel Merinoni darvozabon bilan yakkama-yakka vaziyatga chiqarib yubordi, «Arsenal» yarimhimoyachisi o‘z imkoniyatidan foydalandi.

«Qizil furiya» 2010 yildan buyon ilk bor JCh chorakfinaliga chiqdi va qatorasiga olti o‘yinda gol o‘tkazmagan ilk jamoa sifatida turnir tarixiga kirdi – bu seriya 2022 yilgi mundial nimchorakfinalida Marokashga qarshi o‘yindagi golsiz durang (o‘shanda penaltilar seriyasida Afrika vakillari ustun kelishgan) bilan boshlangandi.

Ispanlar darvozaboni Unai Simon esa jahon chempionatida 609 daqiqadan buyon darvozasi daxlsizligini saqlab qolgan darvozabon sifatida yangi rekord o‘rnatdi, bungacha eng yaxshi natija 1990 yilgi turnirda 517 daqiqa mobaynida gol o‘tkazmagan italiyalik Valter Dzengaga tegishli bo‘lib turgandi.

Belgiya esa 1/4 finalgacha yo‘lda katta qiyinchiliklarga uchradi: Rudi Garsiya shogirdlari guruh bosqichidagi birinchi o‘yinda Eron darvozasini ishg‘ol eta olmadi (0:0), Misr bilan ham ochkolarni bo‘lishib oldi (1:1), uchinchi turda esa bor alamini Yangi Zelandiyadan oldi (5:1), 1/16 finalda Senegalga qarshi o‘yinda aql bovar qilmas kambek amalga oshirishga to‘g‘ri keldi – jamoa so‘nggi daqiqalarda 0:2 hisobidan chiqib ketib, o‘yinni qo‘shimcha bo‘limlarga olib o‘tdi va u yerda g‘alaba golini urdi (3:2). 1/8 finalda AQShga kechgan mojaroli o‘yinda esa yirik hisobda g‘alaba qozondi (4:1).

Mezbonlarga qarshi o‘yinda Sharl de Ketelare dubl qayd etdi, bundan tashqari, yana bir golga hammualliflik qildi, Hans Vanaken gol+pas bo‘yicha 1+1 ko‘rsatkichini qayd etdi, Romelu Lukaku yana zaxiradan tushib, gol urdi, turnirni juda kuchli o‘tkazayotgan Leandro Trossar esa navbatdagi assistni o‘z hisobiga yozib qo‘ydi.

«Qizil iblislar» uchun bu 2018 yilgi mundialdan buyon ilk chorakfinal hisoblanadi. Jamoa so‘nggi to‘rt mundialda faqat bir marta bu bosqichga yetib kela olmagan, 2022 yilgi jahon chempionatida guruhda qolib ketgandi.

O‘zaro uchrashuvlar statistikasi

Ushbu jamoalar o‘z tarixida uchinchi marta jahon chempionatlarida to‘qnashmoqda. 1986 yilda «qizil iblislar» pireneyliklarni chorakfinalda qoldirib ketgandi: o‘shanda o‘yinning asosiy vaqtida kuchlar teng kelgan (1:1), ammo Belgiya penaltilar seriyasini o‘z foydasiga hal qilgan (5:4). Ispaniya to‘rt yil o‘tib revansh oladi – guruh bosqichining uchinchi turida g‘alaba qozonadi (2:1).

Boshqa to‘qqizta rasmiy o‘yinda «Qizil furiya» besh bor g‘alaba qozongan, faqat ikki marta yutqazgan – Yevro-1980 guruh bosqichida (1:2) va JCh-1970 saralashida (1:2), ikki uchrashuvda durang qayd etilgan.

Ushbu jamoalar shu vaqtgacha 11 marta o‘rtoqlik uchrashuvlarida ham maydonga tushgan. Bu borada ham ustunlik ispanlarda – olti g‘alaba, ikki mag‘lubiyat, uch durang. So‘nggi g‘alaba 2016 yil sentabriga to‘g‘ri keladi, o‘shanda David Silva ikkita javobsiz gol urgandi.

Belgiya bu safar nima tayyorlagan?

Amaldagi Yevropa chempionlari hisoblangan Ispaniya JCh startidan oldin ham turnir g‘olibligi uchun asosiy favoritlardan biri sifatida ko‘rilayotgandi, hozir ham Fransiyadan keyingi ikkinchi asosiy da’vogar bo‘lib turibdi. Luis de la Fuente shogirdlari o‘yinlarning borishini ishonch bilan nazorat qilmoqda va turli darajadagi raqiblarni bir xilda ishonch bilan mag‘lub etmoqda. Va jamoa ushbu juftlikda ham yaqqol favorit hisoblangan bo‘lardi, ammo Belgiya birdan kuchli o‘ynay boshladi.

Turnir startida ushbu jamoaga ko‘p savollar tug‘ilgandi, ulardan asosiysi shunday edi: eski gvardiya hali ham biror narsaga qodirmi? Va AQSh bilan o‘yin bu savolga javob berdi: gap umuman tarkibda emas. Balki Belgiyada ko‘p yillardan buyon ilk marta yetakchilarga bog‘liq bo‘lmagan holda sifatli o‘yin tuzilmasi yuzaga kelgan. Rudi Garsiya De Breyne, Lukaku va Dokuni zaxira o‘rindig‘ida qoldirdi va belgiyaliklar o‘yindan oldin teng raqib sifatida ko‘rilgan AQShni osonlik bilan tor-mor etdi.

Belgiya endi to‘psiz ham yaxshi harakatlanuvchi, hujumga tez chiquvchi jamoaga aylanganini namoyish etdi, forvard pozitsiyasiga o‘tkazilgan Sharl de Ketelare dublni rasmiylashtirdi. Garsiya amalda jamoadagi oldingi iyerarxiyadan voz kechgan va muayyan o‘yinga mos keladigan futbolchilarga ishonch bildirmoqda. Shunday ekan, Kevin De Bryuyne, Lukaku va Doku Ispaniyaga qarshi o‘yinda boshlang‘ich tarkibdan o‘rin olishi aniq emas. Shu bilan birga, «qizil furiya» bilan qiyinroq bo‘lishi aniq – bu to‘pga egalikni tezda o‘ziga qaytaradigan va qanotlarni ishonchli himoyalaydigan jamoadir.

1/8 finalda Portugaliya bilan o‘yinda Ispaniya hech qayerga shoshilmadi va o‘yinning so‘nggi qismida zaxira hisobiga g‘alabani o‘z tomoniga og‘dirdi. Va navbatdagi o‘yinda ham aynan zaxira o‘rindig‘i hal qiluvchi omilga aylanishi mumkin – ispanlarning tarkibi sifat jihatdan kuchliroq va hatto Ferran Torres ham o‘yin taqdirini hal qilishi mumkin. Ammo Belgiya nihoyat xarakter namoyish etishni o‘rgangan – aytish mumkinki, so‘nggi 10 yillikdagi katta turnirlarda jamoaga aynan shu narsa yetishmagandi. Shu tufayli, bu o‘yinda istalgan voqea ro‘y berishi mumkin.

Source link

Mbappe Messi kabi birinchi bo‘limda penaltini ura olmadi, ikkinchi bo‘limda esa u kabi o‘yin taqdirini hal qildi va to‘purarlar poygasida unga yetib oldi. Ammo o‘yin oxirlarida jarohat tufayli almashtirildi.

Fransuzlarda kayfiyat bo‘yicha hammasi joyida

Fransiya – Marokash 2:0

Gollar: Mbappe, 60 (1:0). Dembele, 66 (2:0)

Aniq ijro etilmagan penalti: Mbappe, 28’

Fransiya: Menyan, Upamekano, Saliba, Din, Kunde (Gyusto, 87), Kone (Zair-Emeri, 71), Rabio, Olise, Due (Barkolya, 77), Dembele, Mbappe (Mateta, 77)

Marokash: Bunu, Mazraviy, Diop, Salohiddin (Ouadi, 74), Hakimi, Buaddi (Amrabat, 62), Al-Aynaviy, Unai, Talbi (Sbai, 85), Dias (Yasin, 74), Al-Hannus (Rahimi, 62)

Ogohlantirish: Diop, 63

Kilian Mbappe jahon chempionatida Fransiya milliy jamoasini o‘z ortidan ergashtirishda davom etmoqda. Chorakfinalda Marokashga qarshi o‘yinda 27 yoshli hujumchi birinchi bo‘limda penaltidan foydalana olmagandi, lekin ikkinchi bo‘limda ajoyib gol urib hisobni, keyin esa Dembelening goliga assistentlik qildi.

Fransuzlar ikkinchi bo‘limning birinchi yarmida 11 metrlik jarima zarbasi ishladi – Nussayr Mazraviy jarima maydoni ichida Kilianni yiqitdi va bosh hakam Fakundo Telio darhol «nuqta»ni ko‘rsatdi. Jabrlanuvchining o‘zi zarba berish uchun yo‘l oldi.

Ammo u darhol zarba bera olmadi – vaziyatga VAR aralashib, epizodni sinchiklab ko‘rib chiqish boshlandi. Mbappe 3 daqiqadan ortiq vaqt davomida kutib turishga majbur bo‘ldi, hakamning qarori to‘g‘riligi tasdiqlanganidan keyin esa u juda ishonchsiz zarba yo‘lladi – pastdan va kuchsiz kelgan to‘pni darvozabon Yosin Bunu osonlik bilan qaytardi.

Aftidan, penaltini ko‘rib chiqish jarayoni haddan tashqari cho‘zilishi hujumchiga ta’sir ko‘rsatgan va u aniq zarba bera olmagach, hakamning oldiga kelib, e’tiroz bildirdi.

Mbappe uchun bu holat yoqimsiz zarba bo‘ldi. U Fransiya milliy jamoasining jahon chempionatlarida penaltidan gol ura olmagan ikkinchi futbolchiga aylandi, birinchisi 2014 yilgi mundialda muvaffaqiyatsizlikka uchragan Karim Benzema bo‘lgandi.

Bunu esa o‘z seyvi bilan penaltilar bo‘yicha haqiqiy mutaxassis sifatida tarixga kirdi. Opta xabariga ko‘ra, 35 yoshli marokashlik JChda o‘yindan keyingi seriya ham hisoblanganda, jami to‘rt bor penalti qaytargan. Bunday natija bilan shu vaqtgacha faqat Iker Kasilyas, Dominik Livakovich, Daniyel Subashich, Serxio Goykochea va Harald Shumaxer kabi darvozabonlar maqtana olardi. Bunuda bu boradagi umumiy statistika ham yuqori – u 9 ta penaltidan atigi ikkitasini o‘tkazgan (4 tasini qaytargan, yana 3 zarba xato ketgan).

Ammo penaltilar bo‘yicha kuchli statistikasi Bunuga yordam bera olmadi. 60-daqiqada Mbappe baribir o‘z maqsadiga erishdi va jarima maydoni tashqarisidan yo‘llagan chiroyli zarbasi bilan hisobni ochdi. Bu Kilianning joriy mundialdagi sakkizinchi goliga aylandi va u to‘purarlar poygasida Lionel Messiga yetib oldi. Bundan tashqari, u jahon chempionatlarida urilgan jami gollar soni bo‘yicha (20) argentinalik hujumchiga (21) maksimal darajada yaqinlashib oldi.

Biroz o‘tib u Usmon Dembelening goliga ham assistentlik qildi va o‘yin taqdiri amalda hal bo‘ldi. Marokash butun o‘yin davomida oldingi chiziqda jiddiy vaziyatga ega bo‘lmadi. Fransuzlar zarbalar soni bo‘yicha ham (22:5, darvoza sohasiga to‘g‘ri borgan zarbalar – 8:1), xG ko‘rsatkichi (3,05 ga qarshi 0,14) bo‘yicha ham yaqqol ustunlik qilishdi. 

Kilian endi ikkita jahon chempionatida «gol+pas» bo‘yicha 10+ ko‘rsatkich qayd etgan ilk futbolchiga aylandi. O‘tgan turnirda u 8+2 natijasiga erishgandi, bunisida allaqachon 8+3.

Ammo u shu kuni o‘yinni oxirigacha davom ettira olmadi. 77-daqiqada u og‘riq his qilib, gazonga yotib oldi va o‘z o‘rnini Matetaga bo‘shatib berdi.

Unga aynan nima bo‘lgani aniq emas. O‘yin davomida ikki epizodda unga nisbatan qo‘pollik ishlatilgandi. Birinchisi, penalti ishlangan vaziyat. Lekin shundan keyin u yarim soatdan ortiq vaqt mobaynida o‘ynashda davom etgani hisobga olinsa, muammoga bu sabab bo‘lmagani aniq.

Ikkinchi epizod esa 63-daqiqada ro‘y berdi: Issa Diop qanotda Mbappening oyog‘iga tepdi va o‘yindagi yagona sariq kartochkani qabul qilib oldi. Hujumchi o‘shanda oyog‘ini ushlab, gazonda yotgan, ammo o‘rnidan turib, o‘yinni davom ettirgandi. 14 daqiqa o‘tib baribir o‘zini almashtirishni so‘radi.

Zaxira o‘rindig‘ida esa o‘ng oyog‘i to‘piq qismiga muz bog‘langan holda o‘tirdi.

O‘yindan keyingi intervyusida Kilian muxlislarni tinchlantirdi: «Barchasi joyida! – deya qayd etdi u. – To‘pig‘imga zarba qabul qilib oldim, ammo barchasi normal. Mateta so‘nggi 15 daqiqalik uchun mendan yaxshiroq holatda edi».

Agar jamoa sardorining gapi to‘g‘ri bo‘lsa, bu kichik jarohat unga yarimfinalda o‘ynashga to‘sqinlik qilmaydi. Yarimfinal o‘yini 14 iyul kuni bo‘lib o‘tadi, undagi raqib esa Ispaniya va Belgiya juftligida aniqlanadi.

Source link