Sport
Janubiy Afrika milliy jamoasining 25 yoshli futbolchisi vafot etdi
Jyeyden Adams 2026 yilgi jahon chempionati guruh bosqichining uchta o‘yinida maydonga tushgandi.
Janubiy Afrika milliy jamoasi va “Mamelodi Sandaunz” klubi yarimhimoyachisi Jyeyden Adams 25 yoshida vafot etdi, deb xabar berdi The Guardian.
Futbolchi o‘limining sababi ma’lum qilinmagan.
JAR sport vaziri Geyton Makkenzi ushbu xabar bo‘yicha bayonot berdi.
“Bugun Janubiy Afrika futboli o‘zining eng yorqin yosh iste’dodlaridan birini yo‘qotdi. Mamlakatimiz uning oilasi, jamoadoshlari va yosh iqtidorning akademiyadan JAR milliy jamoasiga qadar o‘sib borishini kuzatgan millionlab muxlislar bilan birgalikda qayg‘uda”, – dedi Makkenzi.
Adams professional faoliyatini “Stellenbos” klubida boshlagan bo‘lib, 2025 yilda mamlakatning eng sovrindor “Mamelodi Sandaunz” klubiga o‘tgandi.
U milliy jamoa tarkibida to‘qqizta o‘yin o‘tkazgan va bitta golga mualliflik qilgan. Adams 2026 yilgi jahon chempionati guruh bosqichining uchta o‘yinida maydonga tushgandi.