Jamiyat
IIB boshlig‘ining fitnasi o‘ziga qarshi ishladi
Farg‘ona viloyati Furqat tumanida maktab direktori bo‘lgan Gulira’no Qosimova uchun 2025 yilning 17 apreli dahshatli kunga aylangan. U YTHga uchragan turmush o‘rtog‘ini davolatishga o‘sha kuni tanishi, tuman soliq inspeksiyasi boshlig‘idan qarz so‘rab boradi. Bu soliq idorasi rahbari bilan o‘zaro adovati bo‘lgan Furqat tumani IIB boshlig‘iga qulay fursat edi: IIB xodimlari amaldor va direktorni go‘yoki “ushlab olganday” kaltaklashga tushadi, kiyimlarini yirtib, yalong‘och holda tasvirga olishadi. Ammo reja puxta o‘ylanmagan chog‘i, ayolning kutilmagan qat’iyati hammasini ostun-ustun qilib yubordi.
{Yii::t(}
O’tkazib yuborish 6s
O’tkazib yuborish
Furqat tumanidagi maktablardan birining direktori bo‘lgan 34 yoshli Gulira’no Qosimova tuman soliq inspeksiyasi va IIB boshliqlarining o‘zaro adovati qurboni bo‘ldi: IIB xodimlari ayolning sha’ni va qadr-qimmatini toptab, yerga qorishtirib tashlashdi. Direktor o‘zi bilmagan holda Furqat tumani IIB boshlig‘i Akmal Xo‘jayev tomonidan tuman soliq inspeksiyasi rahbari Qurbonali Abdurahmonovga qo‘yilgan “tuzoq”qa tushib qolgandi.
“Bir to‘da xodimlar qarshisida qip-yalang‘och edim”
2025 yil 17 aprel. Bu sana Gulira’no Qosimova uchun dahshatli kun bo‘lgan.
Gulira’no Qosimova
Direktor o‘zining tanishi, Furqat tumani soliq inspeksiyasi boshlig‘i Qurbonali Abdurahmonovdan YTHga uchragan turmush o‘rtog‘ini davolatish uchun qarz so‘rashga boradi. O‘sha paytda bir guruh IIB tezkor xodimlari to‘satdan paydo bo‘lib, direktor va amaldorni qip-yalang‘och qilib yechintirgan holda do‘pposlay ketishdi:
“Furqat tumanidagi 29-maktabda direktor bo‘lib ishlayman. Furqat tumani Ichki ishlar bo‘limi sobiq boshlig‘i Akmal Xo‘jayev bilan tuman soliq inspeksiyasi boshlig‘i Qurbonali Abdurahmonov o‘rtasidagi mojaro qurboni bo‘ldim. Haqiqatan ham Qurbonali aka bilan avvaldan tanishman. U kishi bilan birga ishlaganmiz.
Turmush o‘rtog‘im avtohalokatga uchrashi oqibatida o‘ng qo‘lidan jiddiy jarohat olgandi. Operatsiyasi uchun hammadan pul so‘rab yurgan vaqtim edi. Shifokorlarning sa’y-harakati bilan qo‘li saqlab qolindi. Ammo ko‘rikdan o‘tganimizda zudlik bilan qayta operatsiya qilinishi zarurligini, bu gal nervlarni ulash kerakligi, aks holda qo‘l qurib qolishini aytishdi.
Gulira’no Qosimovaning turmush o‘rtog‘i
Ko‘pchilikdan pul so‘radim. Oktyabr oyida avariya bo‘lgan bo‘lsa, birinchi operatsiyasini o‘tkazgan edik. Shu tariqa ikkinchi operatsiyasi uchun mablag‘ zarur bo‘ldi. Qurbonali akadan yordam so‘radim. Bu haqda turmush o‘rtog‘imning ham xabari bo‘lgan.
Qurbonali aka bilan uchrashib qarz so‘rab turgan vaqtimda fuqarolik kiyimida xodimlar paydo bo‘ldi. Ular ikkimizning kiyimlarimizni yirtishib, urib-do‘pposlashdi. Qip-yalang‘och qilishdi. Bir to‘da erkaklar qarshisida ojiz qoldim, xo‘rligim keldi. Nimalar bo‘layotganini anglolmay qolgandim”.
“Xotiningni boshqasi bilan ushlab oldik”
Yalinib-yolvorishiga qaramay Gulira’noning ko‘ylaklari yirtiladi, qip-yalang‘och qilib yechintirilib, xodimlar tomonidan ayovsizlarcha tahqirlanadi. Unga qo‘shib soliq idorasi boshlig‘i ham kaltaklanib, yechinishga majbur etiladi. Bu orada qo‘lida telefon kamerasini yoqib olgan xodimlar paydo bo‘ladi va go‘yoki jinsiy aloqa qilayotgan erkak va ayolni ushlab olganday holatni tasvirga tushira ketishadi. Qo‘lida qog‘oz va ruchkasi tayyor turgan xodimlardan biri Gulira’no Qosimovani “Soliq inspeksiyasi boshlig‘i Qurbonali Abdurahmonov meni jinsiy aloqa qilishga majburladi”, qabilida ariza yozib berasan, deya majburlashga tushadi. Ammo ularning urinishlar besamar ketadi, maktab direktori bundan bosh tortdi.
“Xo‘jayevning xodimlari ssenariylari asosida kiyimlarimizni yechib, s’yomka qilib, urib, kameraga qarab soliqning boshlig‘i meni majburlab, jinsiy munosabatda bo‘ldi, deb aytasan deyishdi. Hech qanday aloqa bo‘lgani yo‘q, bu narsalarni gapirmayman, men birovga tuhmat qilmayman, dedim qat’iy turib.
Ularning aytganlarini bajarmadim. Endi xodimlar turmush o‘rtog‘imni o‘rtaga qo‘shishdi, unga xotiningni boshqasi bilan ushlab oldik, deb aytamizga o‘tishdi. U yerdagi atay tashkil qilingan sahnani tasvirlab bera olmayman. Chunki O‘zbekistonda bunday voqea bo‘lishiga ishonmagan bo‘lardim. IIB xodimlari, bizning tinchligimni saqlab beradigan odamlarning o‘zi bu darajada pastkashlikka borishiga ishonmagandim”, deydi Gulira’no Qosimova.
Puxta ishlangan “tuzoq”
Aslida bularning barchasi avvaldan rejalashtirilgan “shou” edi. Tuman IIB boshlig‘i Akmal Xo‘jayev soliq inspeksiyasining boshlig‘i Qurbonali Abdurahmonov bilan tortishib qolgan, uni lavozimidan ag‘darish uchun payt poylab yurgandi. Maktab direktorining raqibi bilan uchrashib qolgani IIB boshlig‘i uchun ayni muddao bo‘ladi. Qizig‘i, IIBga holat bo‘yicha xabar berish vaqtlarida ham “jumboqlar” mavjud.
“IIB tezkor xodimlari avvaldan ssenariy tuzishgan, soliqning boshlig‘i meni majburlab jinsiy munosabatda bo‘ldi, deb yozib berishimni kutishgandi. Ularning asl maqsadi soliq “kattasi”ni ishdan bo‘shatish va qamash bo‘lgan. Lekin xodimlar maqsadiga erisha olmadi. Men ular xohlagan gapni aytib bermadim.
IIB boshlig‘i va soliq rahbari avvaldan tortishib qolgan, xodimlar qulay payt poylab Qurbonali akani kuzatib yurishgan ekan. Qurbonali akaning yoniga borib qolganim ular uchun ayni muddao bo‘lgan.
IIB navbatchilik qismiga “ushlanib qolganimiz” haqida ham xabar berilgan. Bunda ham qiziq chalkashliklar bor. IIBga soat 16:58 da olib kirilyapman majburan. Go‘yoki do‘kon sotuvchisi men bilan soliq boshlig‘ini ko‘rib qolibdi-da, soat 17:21 da 102 ga xabar beryapti. Bu yerda qani mantiq?!
Endi yana ham qiziq holatni aytib beraman: soat 17:21 da berilgan xabarni navbatchi xodim R. Yormatov soat 17:00 da qabul qilib olyapti. Keyin o‘sha asosida bizni “ushlab” chiqyapti. Vaholanki, soat 16:58 da ichki ishlarning binosida bo‘lganman. Bularning mantiqsiz, qo‘pol ravishda, hujjatlarni soxtalashtirgani odamni hayratga soladi.
IIB tezkor xodimlari biz xohlagan narsani yozib berasanmi, yo‘qmi, deyishga o‘tishdi. Yo‘q, yozmayman, birovga tuhmat qilmayman, deb qat’iy turib oldim. Gapimizga quloq solmasang eringga xotiningni ushlab oldik, deymiz deyishdi. Aytaver, ekspertiza qildirasan, haqiqatan jinsiy aloqa qilgan bo‘lsam, bo‘ynimga qo‘yib berasan, dedim. Keyin ular noilojlikdan erimni chaqirtirishdi-da, anglashilmovchilik bo‘libdi, hammasi joyida deb qaytarib yuborishdi”, deya eslaydi o‘sha kungi voqealarni Gulira’no Qosimova.
Bo‘lib o‘tgan voqealar ortidan ruhiy tushkunlikka tushgan maktab direktori o‘z joniga qasd qiladi. Ammo baxtli tasodif tufayli hayotga qaytadi. Shundan so‘ng ayol o‘zini qo‘lga olib, sha’ni, oilasi uchun bu uyushtirilgan “shou”ni ommaga oshkor qilish uchun astoydil bel bog‘laydi va bunga erishadi ham. Kamera yozuvlari esa ayol uchun qo‘l keladi: uchastka noziri A’zam Hamidjonov tanishi bo‘lgan do‘kon sotuvchisi Davlat Yusupov oldiga kelib, ayol va erkak jinsiy aloqa qilayotgani haqida 102 qisqa raqamiga xabar berasan, deb tayinlayotgani kameraga muhrlanib qolgan.
“Boshimdan o‘tgan voqealar ruhiyatimga qattiq ta’sir ko‘rsatdi. Oilaliman, turmush o‘rtog‘im, 3 nafar farzandim, qaynota va qaynonam oldida, umuman olganda butun tumanda yomonotliq bo‘ldim. Garchi tuhmat qurboni bo‘lgan bo‘lsam-da odamlar buni tushunmasdi. Uyat bo‘lsa ham qaynona va qaynonamga boshimdan o‘tgan voqealarni gavdalantirish, bu ishlar aslida tuhmat ekaniga ishontirish uchun kiyimlarimni yechib, kaltak zarbidan ko‘karib ketgan tanamgacha ko‘rsatdim. Baribir bo‘lmadi, o‘z jonimga qasd qildim. Lekin shifokorlar hayotimni saqlab qolishdi.
“Uchastkavoy” A’zam Hamidjonov o‘zining avvaldan tanishi bo‘lgan do‘konchi Davlat Yusupovning yoniga borgan. Bu kamera yozuvlarida ham ko‘rinib turibdi. Davlat Yusupovning tuman prokuraturasiga bergan ko‘rsatmasidan bilish mumkinki, unga A’zam qandaydir videoni ko‘rsatib, uni 102 raqamiga telefon qilib, go‘yoki soliq boshlig‘i bir ayolni uyiga jinsiy aloqa qilish uchun olib kirib ketdi, deyishga ko‘ndiradi. Davlat Yusupov “uchastkavoy”ning senga hech narsa bo‘lmaydi, degan gaplariga ishongan va 102 ga telefon qilgan. Keyinchalik Davlat Yusupov tahdidlar ostida o‘z ko‘rsatmalarini o‘zgartirgan bo‘lsa ham, u ichki xavfsizlik xodimining telefon raqamigacha keltirib bergan. Detalizatsiyalarda haqiqatan ham o‘sha raqam bilan Yusupov Davlat gaplashganini ko‘rish mumkin”.
Qilmish-qidirmish
Ayni paytda Furqat tuman IIB boshlig‘i Akmal Xo‘jayev o‘xshamay qolgan “shou”si ortidan egallab turgan lavozimidan ozod etilgan. Unga nisbatan jinoyat ishi qo‘zg‘atilib, tergov harakatlari olib borilgan.
Akmal Xodjayev, Furqat tumani IIB sobiq boshlig‘i
Akmal Xo‘jayevga Jinoyat kodeksining 141-1-moddasi (Shaxsiy hayot daxlsizligini buzish) 2-qismi “a, b” bandlari, 141-3-moddasi (Shaxsning sha’nini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi ma’lumotlarni oshkor qilish) 2-qismi “b” bandi, 142-moddasi (Fuqarolarning turar joyi daxlsizligini buzish), 206-moddasi (Hokimiyat yoki mansab vakolati doirasidan chetga chiqish) 1-qismi hamda 230-2-moddasi (Tezkor-qidiruv faoliyati natijalarini soxtalashtirish (qalbakilashtirish) 1-qismi bilan ayblov e’lon qilingan.
Suvdan quruq chiqayotganlar bor
“Shou” uyushtirishda hammaslak bo‘lgan sobiq IIB boshlig‘ining o‘rinbosari va ayolni tahqirlagan tezkor xodimlar hali ham o‘z lavozimlarida ishlashda davom etmoqda. Ayolning ta’kidlashicha, tuman IIB boshlig‘i o‘rinbosari Jasur Rasulov bo‘lgan ishlarni bosti-bosti qilish uchun unga tanishlari orqali 50 ming dollargacha pul taklif qilgan.
“Meni urib tahqirlagan tezkor qidiruv xodimlari Sohib, Tohir, Yusuf, A’zam va Dilshod edi. Sohib, Yusuf, keyin bir o‘rinbosar bizni s’yomka qilgandi. U yerda bolalar inspektori ham bor edi. Uch nafar profilaktika inspektori, uch nafar tezkor qidiruv xodimi, bir nafar terrorizmning boshlig‘i G‘ayrat ismli bola ham bo‘lgan.
Sohib yomon so‘zlar bilan haqorat qilib, urib, joyimdan uchirib yuborgan. Tohir sochimdan tortib kelib, yuzimni kameraga qaratgan. G‘azabni keltiradigan sahnada. Tepamda to‘rtta erkak, to‘rtta ichki ishlar xodimi turibdi. Men iltimos, chetroq turinglar, hech bo‘lmasa kiyimimni kiyib olay, ayol kishiman deyapman. Ular yo‘q, bu yerda shartni sen emas, biz qo‘yamiz deyishyapti. To‘rtta erkak menga qarab turdi, ularning ko‘z o‘ngida kiyindim.
Norozi bo‘layotganim, “shou”ni “nachalnik” tashkillashtiryapti, o‘rinbosar unga ko‘maklashyapti. Lekin ularning topshirig‘ini bajarganlar-chi? Ular javobgarlikdan chetda qolmoqda. IIB boshlig‘i va o‘rinbosari o‘z qilmishini tan oldi. Tegishli idoralardan meni shu ko‘yga solgan barcha IIB xodimlariga qat’iy chora ko‘rishlarini so‘rab qolaman.
Bu voqealardan keyin tegishli joylarga murojaat qildim. IIB boshlig‘i Xo‘jayev ishdan ketdi. O‘rinbosariga ayblov e’lon qilindi. Endi tez kunlarda sud bo‘lishi kutilyapti. Soliq idorasining boshlig‘i aybi yo‘qligi uchun ishiga tiklandi.
Endilikda esa Jasur ismli o‘rinbosar ishni bosti-bosti qilish uchun tanishlari orqali 50 ming dollargacha pul taklif qilyapti. Akmal Xo‘jayev va Jasur Rasulov dastlab ehtiyot chorasi sifatida qamoqqa olingandi, lekin 15 mln so‘m garov evaziga qo‘yib yuborilgan”, deydi ayol.
Gulira’no uni tahqirlab, do‘pposlagan “operatsiya”da qatnashgan barcha xodimlarga qonun doirasida qat’iy chora ko‘rilishini istaydi.
Farg‘ona viloyati prokuraturasining Kun.uz’ga ma’lum qilishicha, holat bo‘yicha prokuratura tomonidan tergov harakatlari o‘tkazilib, sobiq IIB boshlig‘i va mas’ul shaxslar bo‘yicha ayblov ishi mazmunan ko‘rish uchun sudga yuborilgan.
Sarvar Ziyoyev,
Kun.uz
Operator va montajchi – Sardor Mamirov.
Saida Mirziyoyeva Samarqand viloyatiga tashrifi davomida bir qator infratuzilma loyihalari hamda «Yangi O‘zbekiston» massivini rivojlantirish ishlari bilan tanishdi.
Xususan, musiqa maktabi kabi yangilanishga muhtoj binolar ko‘zdan kechirildi. «Geologlar» mahallasidagi bog‘cha nafaqat kapital ta’mirlanadi, balki tubdan qayta quriladi. Rekonstruksiyadan so‘ng u Samarqanddagi eng yirik maktabgacha ta’lim muassasasiga aylanadi va 600 nafargacha bolani qabul qiladi.
Tashrif yakunida Samarqand viloyati va tumanlari rahbariyati bilan uchrashuv o‘tkazildi.
Ta’kidlanishicha, hududlardagi bunday o‘zgarishlar Prezident tomonidan olib borilayotgan tizimli islohotlarning bir qismidir. Bunday tashriflardan asosiy maqsad — topshiriqlar ijrosini qog‘ozdagi hisobotlarda emas, balki joyiga chiqqan holda real ko‘rish va amaliy ko‘mak berishdan iborat.
«Rahbarimiz topshiriqlarining joylardagi ijrosini ta’minlashga jamoam bilan birga ko‘maklashish, haqqoniy holatni qog‘ozlardagi hisobotlarda emas, balki o‘z ko‘zim bilan ko‘rish uchun ham bu yerga tez-tez kelib turaman», — dedi Saida Mirziyoyeva.
O‘zbekiston prezidenti 2025-yil 26-dekabr kuni Oliy Majlis va O‘zbekiston xalqiga Murojaatnomasida korrupsiyaga qarshi kurashda keskin va qat’iy pozitsiyani e’lon qilib, 2026-yil korrupsiyaga qarshi kurashda «favqulodda holat» yili sifatida belgilanishini ta’kidlagan edi. Shundan kelib chiqib, Korrupsiyaga qarshi kurashish agentligida o‘tgan tanqidiy tahliliy yig‘ilishda komplayens nazorati tizimining bugungi holati va kechiktirib bo‘lmaydigan vazifalar ko‘rib chiqildi.
Yig‘ilishda Prezident Administratsiyasining Komplayens xizmati, Korrupsiyaga qarshi kurashish agentligi mas’ul xodimlari, shuningdek, davlat organlari va tashkilotlarining korrupsiyaga qarshi ichki nazorat (komplayens) tuzilmalari rahbarlari ishtirok etdi.
2030-yilgacha bo‘lgan ustuvor yo‘nalishlardan biri sifatida korrupsiya oqibatlari bilan kurashishdan ko‘ra, uning omillarini barvaqt aniqlash va preventiv mexanizmlar orqali tizimli korrupsiyaning oldini olish zarurligi qayd etildi, deyiladi xabarda.
Ta’kidlanishicha, yangi komplayens nazorati tizimi yordamida jinoyat ishlari doirasida 4,2 trln so‘m, yashirin iqtisodiyotni jilovlash hisobiga esa 8,5 trln so‘m mablag‘ undirilishi ta’minlangan. Shuningdek, 1,3 trln so‘mlik ortiqcha budjet xarajatlarining oldi olingan.
Shu bilan birga, ayrim bo‘linmalar faoliyatida hanuzgacha ijobiy o‘zgarishlar kuzatilmayotgani keskin tanqid qilindi va yo‘l qo‘yilayotgan kamchiliklar ochiq muhokama qilindi.
Birinchidan, komplayens bo‘linmalarining asosiy vazifasi korrupsiyaviy holatlarning oldini olishga qaratilgan tizimli preventiv choralarni ishlab chiqish va amaliyotga tatbiq etish bo‘lsa-da, aksariyat davlat organlari va tashkilotlari tomonidan faoliyati talab darajasida ish tashkil etilmagan.
Shuningdek, ayrim davlat organlarida komplayens bo‘linmalari qonunchilikda belgilangan minimal mezonlar asosida tashkil etilmagan. O‘rganilgan 50 ta tashkilotning 23 tasida bu talablar bajarilmagan.
Ikkinchidan, ayrim vazirlik va hokimliklarda nazorat tadbirlari umuman o‘tkazilmagan. Ba’zi tashkilotlarda o‘tkazilgan tekshiruvlarda esa moliyaviy qonunbuzilishlar umuman aniqlanmagan, bu esa nazorat samaradorligiga shubha uyg‘otadi.
Uchinchidan, manfaatlar to‘qnashuvining oldini olish bo‘yicha ishlar yetarlicha samara bermayapti. Xususan, joriy yilning o‘zida manfaatlar to‘qnashuvi yo‘l qo‘yganlik bo‘yicha 105 ta ma’muriy huquqbuzarliklar sodir etilgan.
To‘rtinchidan, ayrim davlat organlari tomonidan ijtimoiy ahamiyatga molik ma’lumotlar rasmiy veb-saytlarda o‘z vaqtida va to‘liq joylashtirilmayapti.
Beshinchidan, komplayens tizimida kadr va tashkiliy muammolar saqlanib qolmoqda, ayrim lavozimlar uzoq vaqt vakant holatda qolmoqda.
Oltinchidan, davlat xaridlari sohasida korrupsiya xavfining yuqoriligi saqlanib qolmoqda. So‘nggi yillarda 800 nafardan ortiq shaxs ushbu yo‘nalishda jinoiy javobgarlikka tortilgan.
Prezident Administratsiyasining Komplayens xizmati vazirlik va idoralar rahbarlariga shaxsiy mas’uliyatini oshirish hamda tizimni natijador mexanizmga aylantirish bo‘yicha qat’iy vazifalarni belgilab berdi. Bundan buyon komplayens bo‘linmalari faoliyati korrupsiyaviy omillarni barvaqt aniqlash va preventiv choralarni samarali amalga oshirish darajasiga qarab baholanadi. Shuningdek, mas’uliyatsizlikka yo‘l qo‘ygan mutasaddilarga nisbatan keskin choralar ko‘rilishi haqida ogohlantirildi, deyiladi xabarda.
Andijon viloyatida «Haj» ziyoratiga yuborishni va’da qilgan shaxs ushlandi.
Bosh prokuratura huzuridagi Departamentning Asaka tumani bo‘limi va boshqa huquqni muhofaza qiluvchi organ xodimlari hamkorligida tezkor tadbir o‘tkazilgan.
Unda fuqaro M.Ch. 18 000 AQSh dollar evaziga fuqarolar A.I. va B.X.ni «Haj» ziyorati uchun Saudiya Arabistoniga yuborishini aytib, kelishilgan puldan 9 000 AQSh dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent shahridagi tuman elektr tarmoqlari korxonasining ikki nafar muhandisi pora bilan ushlangandi.
Toshkentda narkolaboratoriya ochgan yirik jinoiy guruh fosh etildi.
IIV Tezkor qidiruv departamenti, Toshkent shahar IIBB hamda DXX tomonidan giyohvandlik moddalari va kuchli ta’sir qiluvchi vositalarning savdosi bilan shug‘ullangan jinoiy guruh qo‘lga olinib, yirik narkolaboratoriyalar fosh etildi.
Ushbu jinoiy guruh a’zolari jinoiy faoliyat olib borish maqsadida vazifalarni o‘zaro taqsimlab olishgan.
Jumladan, 2000-yilda tug‘ilgan Sh.U.«ombor mudiri», 2000-yilda tug‘ilgan O.M., 2000-y.t. O.T.lar «laborant», 2004-yilda tug‘ilgan Sh.O‘. «qadoqlovchi» vazifalarini bajarishgan.
Tayyorlangan kuchli ta’sir qiluvchi vositalarni aholi orasida, ta’lim muassasalari oldida tarqatish maqsadida «tarqatuvchi»larni («zakladchiklar») yollashgan. Shuningdek, ijtimoiy tarmoq platformasida onlayn narkodo‘kon ochishgan.
Narkolaboratoriya tashkil qilish maqsadida jinoiy guruh a’zolari ikkita xonadonni ijaraga olgan. Ushbu xonadonlarda kuchli ta’sir qiluvchi vositalarni qadoqlash uchun zarar bo‘lgan asbob-anjomlar, kapsulalar, kukun ko‘rinishidagi kuchli ta’sir qiluvchi moddalar, prekursorlarni saqlashgan.
Hamkorlikda o‘tkazilgan tezkor-tadbirlar davomida «tarqatuvchi» vazifasini bajargan shaxslar: 1993-yilda tug‘ilgan V.A., 2003-yilda tug‘ilgan D.Yu., 2004- yilda tug‘ilgan I.R.lar ushlangan. Xolislar ishtirokida tekshirilganda ularning yonidan jami 1 050 dona kuchli ta’sir qiluvchi vositalar, telefon apparatlari aniqlangan va dalolatnoma asosida rasmiylashtirib olingan.
Toshkent viloyatida davom ettirilgan tezkor tadbirda Sh.O‘., Sh.U., O.M.lar ijarada yashab kelgan xonadonda tintuv tergov harakati o‘tkazilgan. Xolislar ishtirokida ko‘zdan kechirilgan ushbu xonadonda 9 kg «Pregabalin», 500 gramm )«Tropikamid» moddalari, 600 dona kapsuladagi «Pregabalin» kuchli ta’sir qiluvchi dori vositalari, qadoqlash uchun zarur asbob-anjomlar daliliy ashyolar tariqasida olingan.
Shuningdek, Olmaliq shahrida O.T. ijarada yashayotgan xonadon xolislar ishtirokida ko‘zdan kechirilganda 6 kg «Pregabalin», 500 gramm «Tropikamid» kuchli ta’sir qiluvchi moddalar hamda qadoqlash uchun zarur asbob-anjomlar aniqlanib, bayonnoma asosida rasmiylashtirib olindi.
Mazkur shaxslarga nisbatan O‘zbekiston Respublikasi Jinoyat kodeksining 251-prim.1-moddasi («Giyohvandlik vositalari, ularning analoglari yoki psixotrop moddalar hisoblanmaydigan kuchli ta’sir qiluvchi moddalarni targ‘ib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish») bilan jinoyat ishi qo‘zg‘atilib, jinoiy guruh a’zolariga nisbatan qamoq ehtiyot chorasi qo‘llangan. Tergov harakatlari davom etmoqda.
Huquqni muhofaza qiluvchi organ xodimlarining sa’y-harakatlari bilan 360 mingdan ortiq bir marotabalik dozaga teng bo‘lgan kuchli ta’sir qiluvchi vositalarining aholi orasida tarqalishi oldi olindi.
Joriy yil 24-aprel kuni Yaponiya immigratsiya xizmatlari agentligi Yaponiyada noqonuniy ravishda yashab turgan O‘zbekistonning ikki fuqarosini mamlakatdan chiqarib yubordi. Bu haqda Yaponiyaning O‘zbekistondagi elchixonasi xabar berdi.
Ma’lum bo‘lishicha, fuqarolardan biri Yaponiyaga «talaba» vizasi bilan kirgan, ammo keyinchalik o‘qishdan haydalganiga qaramay, mamlakatda noqonuniy ravishda qolib ketgan va vakolatli rasmiylar tomonidan hibsga olingan.
Ikkinchi fuqaro Yaponiyaga qisqa muddatli viza bilan kirib, ruxsat berilgan qolish muddati tugashiga qaramay mamlakatdan chiqib ketmagan.
Diplomatik vakolatxonaning eslatishicha,«turizm», «yaqinlarni ko‘rish», «biznes (konferensiya, madaniy almashinuv kabi)» maqsadidagi qisqa muddatli viza bilan Yaponiyada ishlash qat’iyan man etiladi. O‘zbekistonda qarz (kredit) olib bo‘lsa ham Yaponiyaga o‘qishga borgan, ammo yapon tilini o‘rgana olmay o‘qishdan chetlatilgan fuqaroning Yaponiyada yashash maqomi bekor qilinadi.
«Yaponiyaga «turizm» yoki «talaba» maqomidagi viza bilan kirib,«uzoq muddat qolish mumkin» yoki «ishlash mumkin» degan chaqiruvlar butunlay yolg‘on. Shu kabi yolg‘on maqsadlar bilan Yaponiyaga kirishga yo‘l qo‘yilmaydi.«Talaba» vizasi ishlash uchun emas, balki faqatgina mamlakatda o‘qish uchungina beriladi», – deyiladi elchixona xabarida.
Ta’kidlanishicha, Yaponiyada noqonuniy ravishda yashayotgan shaxslar aniqlansa, ular politsiya tomonidan hibsga olinadi va bunday shaxslarga nisbatan immigratsiya muassasasida ushlab turish yoki deportatsiya qilish kabi qat’iy choralar ko‘riladi.
«Bundan tashqari, Yaponiya hukumati shu kabi shaxslar haqida O‘zbekiston hukumatiga ma’lumotlarni berib borayotganligi sababli, O‘zbekistonga qaytgandan keyin ham ularga nisbatan tegishli choralar ko‘rilishi mumkin. Shu sababli,«Yaponiyada ishlash mumkin» deb da’vo qiluvchi vositachilarning va’dalariga osonlik bilan ishonib qolmang, ogoh bo‘ling!» – deb ogohlantiradi Yaponiyaning Toshkentdagi elchixonasi.
Dollar va yevro kursi birdan ko‘tarildi
Saida Mirziyoyeva Samarqanddagi bir qator infratuzilma loyihalari bilan tanishdi (foto)
Quvasoydagi korxona 25 mln dollarlik mahsulotni tashqi bozorga chiqaradi
-
Iqtisodiyot4 days ago
Markaziy bank: 24-aprelda dollar pasayadi
-
Iqtisodiyot4 days ago“QQSni oson qaytarib olish ta’minlanmasa, stavkani 6 foizga tushirishni taklif qilamiz” – Davron Vahobov
-
Dunyodan4 days ago
Buyuk Britaniyada “chekmaydigan avlod” dunyoga keldi
-
Dunyodan4 days ago
Eron oliy rahbari yuzi va oyog‘idan jiddiy jarohat oldi
-
Iqtisodiyot4 days agoQirg‘iziston ilk marta Yevropa Ittifoqining sanksiyalarni chetlab o‘tishga qarshi kurashish mexanizmiga tushdi
-
Siyosat3 days agoYevropa Ittifoqi Rossiya mudofaa sanoatiga xomashyo yetkazib bergan ikki O‘zbekiston shirkatiga sanksiyalar kiritdi
-
Siyosat4 days agoToshkent yangi integratsiyalashgan raqamli avtoturargoh piloti yordamida yo‘l harakati muammolarini hal qilmoqda
-
Iqtisodiyot4 days ago
Ikki oyda xorijga 466,6 mln dollarlik to‘qimachilik mahsulotlari sotildi