Prezident Shavkat Mirziyoyev neft-gaz bozorida barqarorlikni ta’minlash, iqtisodiyot tarmoqlari va aholiga uglevodorod resurslarini uzluksiz yetkazib berish chora-tadbirlari yuzasidan taqdimot bilan tanishdi.

Mamlakatimizda sanoat quvvatlari kengayib, aholi ehtiyojlari ortib borayotgani tabiiy gaz va neft mahsulotlariga talabni oshirmoqda. Bunday sharoitda ichki bozorni zarur resurslar bilan barqaror ta’minlash, mavsumiy ehtiyojlarni oldindan hisobga olish va narxlarning asossiz o‘sishiga yo‘l qo‘ymaslik muhim ahamiyatga ega.

Taqdimotda neft va gaz qazib chiqarish, import qilish, qayta ishlash, zaxiralash hamda iste’molchilarga yetkazib berish holati ko‘rib chiqildi. Tarmoqlar va hududlar ehtiyojini aniq hisob-kitob qilish, ichki talabni ustuvor ta’minlash va yetkazib berish grafiklariga qat’iy rioya etish zarurligi ta’kidlandi.

“O‘zbekneftgaz” aksiyadorlik jamiyatida tabiiy gaz qazib chiqarish sur’atlarini barqaror saqlash, mavjud konlar imkoniyatidan samarali foydalanish va yangi quduqlarni o‘z vaqtida ishga tushirish bo‘yicha amalga oshirilayotgan ishlar muhokama qilindi.

Avgust oyida 27 ta quduqni ishga tushirish rejalashtirilgan. “Yangi Kultak”, “Niyoz”, “Qoratau”, “Marvarid” va “Tegirmon” konlaridagi ishlar hisobiga qo‘shimcha 887 ming kub metr tabiiy gaz qazib chiqarish imkoniyati yaratiladi.

Quduqlarni burg‘ilashdan tortib, ularni gaz uzatish tarmog‘iga ulashgacha bo‘lgan jarayonlarni kunlik nazoratga olish, elektr ta’minoti va ishlab chiqarish infratuzilmasining uzluksiz ishlashini ta’minlash muhimligi ta’kidlandi.

Neft va gazni qayta ishlash korxonalarini xomashyo bilan bir maromda ta’minlash, mavjud quvvatlardan samarali foydalanish hamda ichki bozorda talab yuqori bo‘lgan mahsulotlar ishlab chiqarishni ko‘paytirish masalalariga alohida e’tibor qaratildi.

Uglevodorod resurslarini hududlarga o‘z vaqtida va yetarli hajmda yetkazib berish, zarur zaxiralarni oldindan shakllantirish hamda ishlab chiqaruvchi, tashuvchi va sotuvchi korxonalar faoliyatini o‘zaro muvofiqlashtirish zarurligi ko‘rsatib o‘tildi.

Narxlar barqarorligini saqlash uchun bozorda yetarli taklifni ta’minlash, mahsulotlarni birja savdolariga talabdan kelib chiqib chiqarish, ishlab chiqarish va logistika xarajatlarini qisqartirish muhimligi ta’kidlandi. Resurslarni asossiz ushlab turish, sun’iy taqchillik yuzaga keltirish va narxlarni oshirishga qaratilgan holatlarning oldini olish bo‘yicha ta’sirchan nazorat o‘rnatish topshirildi.

Ichki bozorda talab va taklif muvozanatini saqlash, uglevodorod resurslari ta’minotida uzilishlarga hamda narxlarning asossiz o‘sishiga yo‘l qo‘ymaslik maqsadida “O‘zbekneftgaz” aksiyadorlik jamiyatiga neft va gaz qazib chiqarish bo‘yicha belgilangan prognoz ko‘rsatkichlarini so‘zsiz ta’minlash vazifasi qo‘yildi. Suyultirilgan gaz ishlab chiqarish hajmini yil yakuniga qadar rejadagi 520 ming tonna o‘rniga 606 ming tonnaga yetkazish topshirildi.

Mutasaddilarga ichki bozor ehtiyojini kunlik tahlil qilib borish, ta’minot bilan bog‘liq xavflarni oldindan aniqlash va zarur choralarni o‘z vaqtida ko‘rish bo‘yicha ko‘rsatmalar berildi.

Source link

Milliy statistika qo‘mitasi ma’lumotlariga ko‘ra, 2026-yil yanvar–iyun oylarida O‘zbekistonning tashqi savdo aylanmasi bo‘yicha Xitoy birinchi o‘rinni egalladi. Mamlakat bilan savdo hajmi 9 mlrd 500 mln AQSh dollarini tashkil etgan.

Rossiya Federatsiyasi 7 mlrd dollarlik ko‘rsatkich bilan ikkinchi o‘rinda. Uchinchi o‘rinda esa Qozog‘iston bo‘lib, ikki davlat o‘rtasidagi tashqi savdo aylanmasi 2 mlrd 800 mln dollarga yetgan.

Keyingi o‘rinlarni Turkiya — 1 mlrd 400 mln dollar, Afg‘oniston — 1 mlrd 100 mln dollar va Koreya Respublikasi — 940 mln dollar bilan egallagan.

Tashqi savdo aylanmasida Fransiya 890 mln 900 ming dollar bilan yettinchi o‘rinni egallagan. BAA bilan savdo hajmi 807 mln 700 ming dollarga yetgan.

Reytingning to‘qqizinchi o‘rnida Qirg‘iz Respublikasi qayd etilgan — 624 mln 600 ming dollar. O‘ninchi o‘rinni esa Germaniya egallagan bo‘lib, mamlakat bilan tashqi savdo aylanmasi 623 mln 200 ming dollarni tashkil etgan.

Source link

Milliy statistika qo‘mitasiga ko‘ra, 2026-yil yanvar–iyun oylarida iqtisodiyot va ijtimoiy sohani rivojlantirish uchun barcha moliyalashtirish manbalari hisobidan 338 trln 900 mlrd so‘m asosiy kapitalga investitsiyalar o‘zlashtirilgan.

Bu ko‘rsatkich 2025-yilning mos davriga nisbatan 17,5 foizga oshgan. Investitsiyalarning eng katta qismi ishlab chiqarish sanoatiga to‘g‘ri kelib, bu yo‘nalishda 100 trln 500 mlrd so‘m mablag‘ o‘zlashtirilgan.

Keyingi o‘rinlarda qishloq, o‘rmon va baliqchilik xo‘jaligi — 32 trln 900 mlrd so‘m, qurilish — 32 trln 500 mlrd so‘m, elektr energiyasi, gaz, bug‘ va konditsiyalangan havo yo‘nalishi — 29 trln 900 mlrd so‘m bilan qayd etilgan.

Turar joy qurilishiga 27 trln 300 mlrd so‘m, tog‘-kon sanoatiga 21 trln 800 mlrd so‘m, tashish va saqlash sohasiga 16 trln 300 mlrd so‘m investitsiya kiritilgan.

Ulgurji va chakana savdo, avtotransport vositalari va mototransport vositalarini ta’mirlashga 13 trln 700 mlrd so‘m, suv bilan ta’minlash, kanalizatsiya, chiqindilarni yig‘ish va qayta foydalanish sohasiga 7 trln 400 mlrd so‘m yo‘naltirilgan.

Ta’lim sohasida o‘zlashtirilgan investitsiyalar 7 trln 200 mlrd so‘m, axborot va aloqa sohasida 5 trln 800 mlrd so‘m, yashash va ovqatlanish xizmatlarida 5 trln 600 mlrd so‘mni tashkil etgan.

Kasbiy, ilmiy va texnik faoliyat hamda sog‘liqni saqlash va ijtimoiy xizmatlarga 4 trln 600 mlrd so‘mdan, moliya va sug‘urta faoliyatiga 2 trln 400 mlrd so‘m sarflangan.

San’at, ko‘ngil ochish va dam olish sohasiga 2 trln so‘m investitsiya o‘zlashtirilgan. Boshqa faoliyat turlari hisobiga esa 24 trln 400 mlrd so‘m to‘g‘ri kelgan.

Source link

Dollar kursida yana pasayish yuz berdi



Source link

Oliy Majlis Senatining 18-yalpi majlisida «Raqamli texnologiyalar xalqaro markazi to‘g‘risida»gi Konstitutsiyaviy qonun muhokama qilindi. Qonun bilan respublika IT-park hududida «Enterprise Uzbekistan» raqamli texnologiyalar xalqaro markazini tashkil etishning huquqiy poydevori yaratilmoqda.

Mazkur hujjat Senatning 17-yalpi majlisida ham muhokama qilinib, takliflar asosida takomillashtirish uchun Qonunchilik palatasiga yuborilgan edi. Senatorlar va deputatlardan iborat kelishuv komissiyasi davlat organlari hamda tashkilotlar vakillari ishtirokida qonunni qayta ishladi.

Markazni tashkil etish, faoliyatini yo‘lga qo‘yish, hududlarini o‘zgartirish, strategik boshqarish va asosiy mansabdor shaxslarni tayinlash kabi masalalar Prezidentning tegishli farmon va qarorlari asosida amalga oshirilishi belgilanmoqda.

Qonun doirasida markaz uchun moslashuvchan soliq va bojxona rejimi joriy etilishi, ayrim faoliyat turlari bo‘yicha soliq imtiyozlari berilishi ko‘zda tutilgan. Asbob-uskuna, texnologiya va materiallarni olib kirish tartibi ham soddalashtiriladi.

Shuningdek, markaz ishtirokchilarini ro‘yxatdan o‘tkazish va boshqarish uchun «yagona darcha» mexanizmi yaratiladi. Intellektual mulk va investitsiyalarni himoya qilish kafolatlari ham nazarda tutilmoqda.

Markaz faoliyati natijasida 2030-yilga qadar raqamli xizmatlar eksportini 5 milliard AQSh dollariga yetkazish hamda iqtisodiyotda 300 mingdan ortiq yangi ish o‘rni yaratish maqsad qilingan.

Qonun qabul qilinishi xorijiy investorlarning mulkiy va intellektual huquqlarini xalqaro standartlar asosida kafolatlashga xizmat qilishi ta’kidlandi. Bu esa «Apple», «Google», «Microsoft» va «Amazon» kabi yirik IT kompaniyalarining O‘zbekiston bozoriga kirib kelishini rag‘batlantirishi kutilmoqda.

Senatorlar fikricha, yangi huquqiy mexanizm IT sohasining yalpi ichki mahsulotdagi ulushini oshirish, to‘g‘ridan-to‘g‘ri xorijiy investitsiyalar va IT xizmatlari eksportini ko‘paytirish, shuningdek, yangi ish o‘rinlari yaratishga xizmat qiladi.

Muhokama yakunida Konstitutsiyaviy qonun Senat tomonidan ma’qullandi.

Source link