Sport
BAAdagi o‘zbekistonliklar milliy jamoa o‘yiniga chipta xarid qilishda muammolarga duch kelishyapti
5 iyun kuni futbol bo‘yicha O‘zbekiston milliy jamoasi safarda JCh-2026 yo‘llanmasi uchun BAA bilan o‘ynaydi. Mehmon jamoa muxlislari uchun 1200 o‘ringa ega 3 ta maxsus sektor ajratilgan bo‘lib, chiptalar to‘liq sotib bo‘lingan yoki hali sotuvga chiqarilmagan. Shu sababli BAA rezident ID kartasiga ega o‘zbekistonliklar boshqa sektorlardan joy olishgan. Ammo ularning elektron pochtasiga chipta bekor qilingani haqida xabarlar kela boshladi.
Joriy yil 5 iyun kuni futbol bo‘yicha O‘zbekiston milliy jamoasi JCh-2026 saralashi 3-bosqichi doirasida Birlashgan Arab Amirliklari jamoasi bilan o‘ynaydi. Uchrashuv Abu-Dabidagi “Al-Nahyan” stadionida bo‘lib o‘tadi.
Ayni vaqtda O‘zbekiston terma jamoasi o‘rin olgan A guruhida Eron terma jamoasi yetakchilik qilmoqda va ular jahon chempionati yo‘llanmasini hal qilib bo‘ldi. O‘zbekiston terma jamoasi yo‘llanmani kafolatlashi uchun BAA bilan safarda kamida durang o‘ynashi yoki Toshkentda Qatarni mag‘lub etishi lozim bo‘ladi. Shunda terma jamoa raqiblarining o‘yinlaridagi natijadan qat’i nazar mundialga boradi. O‘z navbatida BAA o‘z maydonida O‘zbekistonni mag‘lub eta olmasa, to‘g‘ridan to‘g‘ri yo‘llanmadan quruq qoladi.
Shu jihatdan, BAA–O‘zbekiston o‘yinining ahamiyati yuqori darajaga ko‘tarildi. O‘zbekistondan Abu-Dabiga minglab muxlislar tashrif buyurib, milliy jamoani stadiondan turib qo‘llab-quvvatlashi kutilyapti. Ushbu holat fonida chipta bilan bog‘liq muammoli jihatlar yuzaga keldi.
Vaziyat qanday?
Abu-Dabi shahrida o‘tkaziladigan bellashuv uchun chiptalar bir necha kun oldin Ticketmaster.ae sayti orqali sotuvga chiqarildi. OFK reglamentiga muvofiq mehmonlar uchun stadion sig‘imining sakkiz foiziga teng sondagi chiptalar taqdim etiladi. “Al-Nahyan” o‘yingohi o‘ziga 15 ming muxlisni sig‘dira oladi. O‘zbekiston terma jamoasi muxlislari uchun 1200 o‘ringa ega 3 ta maxsus joy ajratilgan — 24, 25 va 26-blok. Ayni paytda bu sektorlardagi hamma chiptalar sotib bo‘lingan yoki hali sotuvga chiqarilmagan. Qolgan sektorlar esa deyarli hali sotilmagan, standart narx – 20 dirham (70 ming so‘m).
Agar o‘zbekistonlik yoki boshqa xorij fuqarosi mezbon sektorlardan chipta xarid qilsa, stadionga kirish uchun BAA rezident ID kartasi kerak bo‘ladi. Shundan kelib chiqib, BAA ID kartasiga ega o‘zbekistonliklar o‘yinga chipta xarid qilishgan. Ammo bir necha kundan keyin ularning elektron pochtasiga chipta bekor qilingani va xarid uchun sarflangan pul 5-10 ish kunida qaytarilishi haqida xabar kelgan. Bu esa noroziliklarga sabab bo‘lyapti.
Xalqaro tartib qanday?
FIFA qoidalariga ko‘ra, mezbon davlat raqib jamoa muxlislari uchun stadion sig‘imining 5–10 foizgacha qismini ajratishi lozim. Bu joylar odatda xavfsizlikni ta’minlash maqsadida “mehmon sektorlari” sifatida belgilanadi. Ya’ni BAA minimal bilet kvotalari talabini bajargan.
Ammo rezident bo‘lishiga qaramasdan, millati yoki fuqaroligi asosida bilet olishni cheklash normal holat sifatida baholanmaydi. Odatda, rezidentlarga bunday cheklovlar qo‘yilmaydi. Masalan, Germaniya terma jamoasi Turkiyani o‘z maydonida qabul qilganida, nemis fuqaroligiga ega yoki bu yerda qonuniy yashash huquqini olgan turklarning ham bemalol mezbonlar uchun ajratilgan sektorlarda o‘yinni tomosha qilib turganini ko‘p kuzatganmiz. BAAning ayni paytdagi talabi umumiy prinsiplariga zid va diskriminatsiya sifatida ham baholanishi mumkin.
Aftidan BAA mutasaddilari stadionda muxlislar to‘qnashuvi yoki tartibsizlik kelib chiqishidan ko‘ra, mehmon muxlislar soni ko‘payib ketib, tribunada ustunlikka erishish ehtimolidan qo‘rqayotgandek go‘yo.
Ma’lumot uchun, A guruhidagi qolgan o‘yinlar quyidagicha: 5 iyun kuni BAA O‘zbekistonni, Qatar Eronni, Shimoliy Koreya esa Qirg‘iziston terma jamoasini o‘z uyida qabul qiladi. 10 iyun kuni esa O‘zbekiston Qatar bilan, Qirg‘iziston BAA bilan, Eron Shimoliy Koreya bilan o‘z maydonida o‘ynaydi.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
