Prezident Shavkat Mirziyoyev Farg‘ona viloyatiga tashrifi doirasida Quva tumanida agrovoltaika texnologiyasi joriy etilgan qishloq xo‘jaligi majmuasi bilan tanishdi.

Yurtimizda qishloq va suv xo‘jaligida energiya sarfi ortib borayotgani hisobga olinib, «yashil» energiya quvvatlarini ko‘paytirishga alohida e’tibor qaratilmoqda. Agrovoltaika usuli bir yerning o‘zida ham mahsulot yetishtirish, ham quyosh panellari orqali elektr energiyasi ishlab chiqarish imkonini beradi. Hisob-kitoblarga ko‘ra, mamlakatimizda agrovoltaika yo‘nalishida 10 gigavattgacha quvvat yaratish salohiyati mavjud.

Bu yondashuv O‘zbekiston sharoitida, ayniqsa, quyoshli kunlar ko‘p bo‘lgan hududlar uchun samaralidir. Panellar ekinlarga soya berib, tuproq namligini uzoqroq saqlaydi, suv sarfini kamaytiradi. Ekinlar esa yer haroratini me’yorda ushlab, quyosh modullarining samarali ishlashiga yordam beradi.

Majmuada suv tejamkorligiga qaratilgan ilg‘or texnologiyalar ham joriy etilgan. Xususan, Avstriyaning «Bauer» kompaniyasi texnologiyasi asosida yomg‘irlatib sug‘orish tizimi qo‘llanilmoqda. Bu usul suvni ekin maydoniga bir me’yorda yetkazib, tuproq namligini saqlash, o‘g‘itni maqsadli berish va hosildorlikni oshirish imkonini beradi.

Mazkur texnologiya avval respublikadagi fermer xo‘jaliklarida sinovdan o‘tkazilib, suv sarfini 40 foizga, o‘g‘it sarfini 35 foizga, qo‘l mehnatini 90 foizga kamaytirish va hosildorlikni 25 foizga oshirish samarasini ko‘rsatgan.

110 gektar maydonni egallagan majmuada intensiv bog‘dorchilik, chorvachilik va baliqchilik yo‘nalishlari uyg‘unlashtirilgan. Bu qayta tiklanuvchi energiya manbalari va suv tejovchi texnologiyalar joriy etilgan mamlakatimizdagi ilk agromajmualardan biri hisoblanadi.

Hududda 10 mingta quyosh paneli o‘rnatilgan. Ular elektr energiyasi ishlab chiqarish bilan birga tuproq namligini saqlash va ekinlar uchun soya hosil qilishga xizmat qiladi. Baliqchilik hovuzlarida kislorod berish jarayoni elektr energiyasi hisobiga amalga oshiriladi, hovuz suvi esa mineral moddalarga boy holda uzumzor va bog‘larni oziqlantirishga yo‘naltiriladi.

Chorvachilik yo‘nalishida qoramollar quyosh panellari soyasida saqlanadi, bog‘ hududidagi o‘tlar bilan oziqlanadi, organik o‘g‘it esa yer unumdorligini oshirishga xizmat qiladi. Shu tariqa majmuada energiya, suv, ozuqa va o‘g‘it bir-birini to‘ldiruvchi yagona tizimga birlashtirilgan.

Bunday tizim qishloq xo‘jaligi, energetika va chorvachilikni o‘zaro bog‘lab, yerdan ikki karra samara olish, mahsulot tannarxini pasaytirish va bozorda raqobatbardoshlikni oshirish imkonini beradi. Eng muhimi, bu fermerlar daromadini ko‘paytirish, yangi ish o‘rinlari yaratish va mahalliy iqtisodiyotni rivojlantirishga xizmat qiladi.

Hozirda agromajmuada uzumning eksportbop «Avatar» navi yetishtirilib, zotdor qoramol va qo‘ylar parvarishlanmoqda, intensiv baliqchilik yo‘lga qo‘yilgan. Natijada 100 dan ortiq oilaning daromadi oshirilib, 350 nafar aholi bandligi ta’minlanmoqda. Eksport hajmi 2,5 million dollarni tashkil etadi.

Endilikda nafaqat mamlakatimiz, balki butun mintaqa uchun noyob bo‘lgan ushbu tajribani respublikaning 13 ta hududida 2 ming gektar maydonda ommalashtirish rejalashtirilgan.

Davlatimiz rahbari majmua faoliyati bilan tanishar ekan, agrodronlar yordamida ekinlarni dorilash va monitoring qilish ishlarini ham ko‘zdan kechirdi.

Prezident Shavkat Mirziyoyev Quva tumanidagi «Karkidon» suv ombori hududida barpo etilgan yangi turizm majmuasida amalga oshirilayotgan loyihalar bilan tanishdi.

Bu maskan Farg‘ona vodiysida yozgi dam olish, ekoturizm va faol hordiq chiqarish uchun eng jozibador manzillardan biriga aylanishi kutilmoqda.

Davlatimiz rahbarining 2025-yil 1-apreldagi qaroriga muvofiq, bu yerda qiymati 635 milliard so‘mlik zamonaviy turizm majmuasi shakllantirilmoqda. Hududda yo‘l infratuzilmasi yaxshilanib, obodonlashtirish ishlari davom etmoqda.

508 gektar maydonni egallagan majmua agroturizm, ekoturizm va ekstremal turizm imkoniyatlarini birlashtirgan. Bu yerda 45 ta shale, 57 ta zamonaviy mehmon uyi, agroturizm majmuasi, gullar bog‘i, lavandazor, ekobozor, sokin hududlar va restoranlar tashkil etilgan.

Prezidentimiz hududda yaratilgan sharoitlar bilan tanishar ekan, bunday loyihalar aholi farovonligi, hudud iqtisodiyoti va mamlakatimizning sayyohlik salohiyatini oshirishda muhim ahamiyatga ega ekanini ta’kidladi. Turizm mamlakatni dunyoga tanitish, yangi ish o‘rinlari yaratish va xizmatlar eksportini kengaytirishning samarali yo‘nalishlaridan biri ekani qayd etildi.

Loyiha doirasida yuzdan ortiq tadbirkorlik sub’yekti tashkil etilib, 2 mingga yaqin yangi ish o‘rni yaratiladi. Yiliga 750 ming nafar sayyohni qabul qilish, 3 milliard so‘mlik budjet tushumi hamda 5 million dollarlik xizmatlar eksportini ta’minlash ko‘zda tutilgan. Majmua 2027 yildan to‘liq quvvatda ishga tushiriladi.

Kelgusida bu yerda motokross maydonlari, 2 kilometrli dor yo‘li, karting va golf maydonlari tashkil etiladi. Bu imkoniyatlar «Karkidon» majmuasini faol turizm yo‘nalishidagi flagman maskanlardan biriga aylantiradi.

Mutasaddilarga turizm va xizmat ko‘rsatish sohalarini yanada rivojlantirish, mahalliy va xorijiy sayyohlar uchun qulay sharoitlar yaratish, eng muhimi, aholi manfaatiga xizmat qiladigan barqaror tizimni shakllantirish bo‘yicha topshiriqlar berildi.

Tashrif davomida davlatimiz rahbari yangi mehmonxona va savdo majmualari faoliyati bilan ham tanishdi. Shu yerning o‘zida sayyohlik sohasida istiqbolda amalga oshiriladigan loyihalar taqdimot qilindi.

Jumladan, Taxtako‘pir tumanida Qoratereng ko‘li, Xonobod tumanida sun’iy ko‘l, Xatirchi tumanida «Ko‘ksaroy suv ombori, Pop tumanida Arashan ko‘li, Nurobod tumanida «Sobirsoy» va Kattaqo‘rg‘on tumanidagi «Kattaqo‘rg‘on» suv omborlari atrofida ham yirik turizm majmualarini barpo etish rejalashtirilgan.

Bu kabi loyihalar mamlakatimizning sayyohlik salohiyatini kengaytirish, hududlarda xizmat ko‘rsatish sohasini rivojlantirish va aholi daromadini oshirishga xizmat qiladi.

Source link

London shahridagi O‘zbekiston Respublikasi Elchixonasi binosida buyuk davlat arbobi, zabardast sarkarda va ma’rifatparvar, qudratli davlat asoschisi, jahon tarixidagi eng ulug‘ shaxslardan biri — Amir Temur tavalludining 690 yilligi munosabati bilan xalqaro madaniy-ilmiy tadbir o‘tkaziladi.

O‘zbekiston Respublikasi Prezidenti Shavkat Mirziyoyevning Amir Temur tavalludining 690 yilligini keng nishonlash to‘g‘risidagi qaroriga muvofiq, ushbu muhim sana dunyo bo‘ylab xalqaro darajada keng nishonlanmoqda. Shu munosabat bilan aprel oyi Amir Temur oyi etib e’lon qilingan.

2026 yil 8–12-aprel kunlari Toshkent va Samarqand shaharlarida Amir Temur va Temuriylar sivilizatsiyasining jahon tarixidagi o‘rni va ahamiyatiga bag‘ishlangan xalqaro ilmiy-amaliy konferensiya bo‘lib o‘tdi.

Yubiley dasturining davomi sifatida 22-aprel kuni Madrid shahrida olimlar, ekspertlar va diplomatik korpus vakillari ishtirokida xalqaro ilmiy-ma’rifiy tadbir tashkil etildi.

Londonda bo‘lib o‘tadigan ushbu tadbir keng ko‘lamli yubiley tantanalarining davomi bo‘lib, Sharq va G‘arb o‘rtasidagi ko‘p asrlik intellektual va madaniy muloqotning uzviy davomiyligini ifoda etadi.

Tadbir doirasida yetakchi milliy va xalqaro olimlar, ekspertlar, xalqaro tashkilotlar hamda hamkor tuzilmalar vakillari ishtirokida ma’ruzalar va muhokamalar o‘tkazilishi rejalashtirilgan.

Shuningdek, YeXHT va Buyuk Britaniyaning tegishli huquq-tartibot organlari vakillari ishtirokida madaniy merosni muhofaza qilish, tarixiy artefaktlarni noqonuniy aylanishini oldini olish, xalqaro huquqiy hamkorlikni mustahkamlash hamda jahon madaniy merosini saqlash masalalari muhokama etiladi.

O‘zbekistondagi Islom sivilizatsiyasi markazi direktori, O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyati (WOSCU) boshqaruv raisi Firdavs Abduxaliqov bu haqda to‘xtalib shunday dedi:

«Yaqinlashib kelayotgan tadbirning eng muhim qismi — noqonuniy ravishda olib chiqilgan madaniy artefaktlarni O‘zbekistondagi Islom sivilizatsiyasi markaziga tantanali ravishda topshirish marosimi bo‘ladi. Bu holat xalqaro hamjamiyat tomonidan O‘zbekiston Prezidentining madaniy merosni qaytarish borasidagi siyosatini qo‘llab-quvvatlanayotganining yorqin ifodasidir. Shuningdek, bu madaniy-tarixiy merosni himoya qilish, restitutsiya va insoniyat xotirasini asrash bo‘yicha xalqaro hamkorlik mustahkamlanayotganini ko‘rsatadi. Biz shuningdek, Sotheby’s va Christie’s kabi auksionlarda ishtirok etish hamda O‘zbekiston madaniy merosiga oid qator noyob predmetlarni xarid qilish maqsadida bir qator art galereyalarga tashrif buyurishni ham rejalashtirmoqdamiz».

Tadbir doirasida WOSCU tomonidan chop etilgan yangi fundamental ilmiy nashr — «Dunyo kolleksiyalaridagi O‘zbekiston madaniy merosi turkumiga kiruvchi “Markaziy Osiyo qo‘lyozma merosi Kembrij universiteti kutubxonalarida» nomli asar taqdimoti ham bo‘lib o‘tadi. Ushbu ilmiy loyiha doktor Firuza Melvill va O‘zbekistonlik mutaxassislar hamkorligida uch yil davomida tayyorlangan.

Tadbir O‘zbekiston Respublikasi Tashqi ishlar vazirligi, Fanlar akademiyasi, O‘zbekiston madaniy merosini saqlash, o‘rganish va ommalashtirish bo‘yicha Butunjahon jamiyati hamda bir qator davlat va jamoat tashkilotlari tomonidan qo‘llab-quvvatlanmoqda.

Bugun Amir Temur nomi yana alohida ahamiyat bilan tilga olinmoqda — u davlat boshqaruvidagi donoligi, strategik tafakkur va madaniy yaratuvchanlik timsoli sifatida namoyon bo‘lmoqda. Londonda bo‘lib o‘tayotgan ushbu forum esa Temuriylar merosining zamonaviy dunyoda ham xalqlar, davlatlar va ilmiy jamoalarni birlashtirishda muhim o‘rin tutayotganini yana bir bor tasdiqlaydi.

Source link

Joriy yil 2-may kuni Toshkent shahrida Yevropa kuni keng miqyosda nishonlanadi. Ushbu sana munosabat bilan poytaxtda Yevropa Ittifoqi festivali tashkil etiladi.

«Bu Yevropa jamoasi ruhidagi ochiq shahar tadbiri bo‘lib, bir makonda xalqaro loyihalar, YeIga a’zo mamlakatlar elchixonalari va bugungi kunda mavjud imkoniyatlarni yaxshiroq tushunishni istagan insonlar uchrashadi», – deb xabar berdi YeI delegatsiyasi.

Festival doirasida Yevropa Ittifoqi moliyalashtirayotgan dasturlarning vakillari bilan bevosita muloqot qilish, ta’lim, ko‘nikmalarni rivojlantirish, ekologiya, hamjamiyatlarni qo‘llab-quvvatlash, inson huquqlarini himoya qilish va boshqa yo‘nalishlardagi xalqaro tashabbuslar O‘zbekistonda qanday ishlayotgani borasida qimmatli ma’lumotlar olish mumkin.

Dasturning alohida qismi YeI mamlakatlari bilan jonli tanishuv bo‘lib, elchixonalar o‘z turizm salohiyatini, ta’lim olish imkoniyatlarini va madaniy xilma-xilliklarini taqdim etadi.

Bolalar hamda kattalar uchun yengil va ochiq shahar bayrami formatidagi festival interaktiv zonalarni ham o‘z ichiga oladi.

Tashkilotchilarga ko‘ra, qiziquvchilar tadbirga oila a’zolari va yaqinlari bilan tashrif buyurishi mumkin. Kirish bepul.

Yevropa Ittifoqi festivali 2-may kuni soat 11:00–16:00 da Toshkent shahridagi Yoshlar ijod saroyida (Mustaqillik shohko‘chasi, 2) bo‘lib o‘tadi.

Source link

Buxoroda «Ark» qo‘rg‘onidan start olgan yurish marofoni eski shaharning tarixiy obidalari orasidan o‘tib, Labi Hovuz ansamliga qadar davom etdi. Salkam 5 mingga yaqin sportsevarlar mazkur ommaviy tadbirda birlashishdi.

Buxoro viloyati hokimligi, viloyat Sport boshqarmasi hamda Oliy ta’lim muassasasalari hamkorligida o‘tkazilgan marafon marshrutida professor-o‘qituvchilar, talaba-yoshlar hamda keng jamoatchilik vakillari ishtirok etishdi.

– Bugungi marafonni faqat sport musobaqasi sifatida baholash to‘g‘ri bo‘lmaydi. Zero, bu yoshlarni yagona maqsad yo‘lida birlashtiradigan muhim ijtimoiy tashabbus hamdir, -deydi Buxoro davlat Pedagogika instituti rektori Bahodir Ma’murov.

Ishtirokchilar tarixiy obidalar oralab o‘tish jarayonida milliy meros va sog‘lom hayot uyg‘unligini his qildilar. Talabalarning ta’kidlashicha, bu kabi ommaviy tadbirlar ularga ham jismoniy, ham ma’naviy kuch bag‘ishlaydi.

– Buxoroyi sharifga uchinchi bor kelayapman. Ishonsangiz, har gal safarim yilning turli fasllariga to‘g‘ri keladi. Bundan qat’iy nazar, yo forum, yoki festivallar ustidan chiqib qolaman. Buxoroning eski shahri har doim zamonaviy va o‘ziga xos bayramlarga to‘la. O‘zbekiston jamiyatining jamiyatda sog‘lom muhitni yaratish uchun olib borayotgani amallari meni lol qoldiradi.  Bugungi marafon ham shu amallarning biri. Ko‘z tegmasin! Havas qildim. Men ham bevosita shu marafonning ishtirokchisiga aylandim, – germaniyalik sayyoh Angela Klum.

Source link

Andijon viloyati IIB YHXB inspektori Bekzod G‘oyibnazarov avtomobilini sotuvga qo‘ygan bir necha kishini chuv tushirdi. U odamlarning ishonchiga kirishda o‘z xizmat mavqeyidan foydalangan, rasmiy formada videolarga tushib, va’dalar bergan. Serjant hali o‘z nomiga o‘tmagan mashinalarni sotib yuborib, pullarni onlayn qimorga tikkani aytilyapti.

Bekzod G‘oyibnazarov 2025 yilning 13 oktyabr kuni Gentra mashinasini sotayotgan Abdulloh Ne’matov bilan uchrashadi. Avtomobil 8 500 dollarga savdo qilinadi va xodim 20 dekabr kuni bu pulni berishini ma’lum qiladi. Lekin oradan 7 oy o‘tibdiki, na puldan va na mashinadan darak yo‘q.

Formali xodim aldamasa kerak, deya o‘zini ovutishga harakat qilgan Abdulloh nihoyat chuv tushganini anglab yetadi va bu haqda inspeksiya va Andijon shahar prokuraturasida xabar qiladi.

YHXB inspektori bu vaziyatdan ham chiqib ketish yo‘lini tutib, mashina egasidan arizasini qaytarib olishni so‘raydi, evaziga har oy oylik maoshidan 1 000 dollardan berib borib qarzini to‘lashini va’da qiladi. Lekin bu gal ham Abdulloh Ne’matovning qo‘yni puch yong‘oqqa to‘lgan edi.

Serjant Bekzod G‘oyibnazarov boshqalarning ham ishonchiga kirib, pulini qo‘lga kiritib, bermay yurgani ma’lum bo‘ldi.

“Formada syomkaga tushib beraman, sotavering uka…”

Xodimning hiylasiga uchgan Abdulloh Ne’matov:

— Gentra mashinam bor edi, Andijon viloyat YHXB xodimi Bekzod G‘oyibnazarov 2025 yilning oktyabr oyida mashinani menga sotasiz, deb qo‘yarda qo‘ymay iltimos qildi. Yo‘q, sotmayman, desam ham, “uka, formada syomkaga tushib beraman”, deb turib oldi. 8 500 AQSh dollariga savdoni pishitdik. Kelishilgan pulni 20 dekabr kuni berishi kerak edi.

Mashinaga o‘tirib kelishuv haqida video ham qildik. Formasiga ishonib mashinani qanday qilib sotib yuborganimni o‘zim ham bilmay qoldim. Gentra’ni kimgadir sotgan ekan. Uni sotib olgan odamning nomiga xujjatlarni ham rasmiylashtirib berdim.

Oradan 7 oy o‘tibdiki, puldan ham, mashinadan ham darak yo‘q. Bu haqda inspeksiyaga murojaat qildim, inspeksiya xizmat tekshiruv olib borib, xujjatlarni prokuraturaga chiqardi. Ish prokuraturaga chiqqandan keyin Bekzod G‘oyibnazarov: “Arizangizni qaytarib oling, har oyning 25-sanasida oyligimdan 1 000 dollardan beraman, 8 oyda qutulaman qarzimdan”, deb iltimos qildi. Ko‘ngliga qarab bu safar ham xo‘p, dedim. Lekin u endi telefonimni ham ko‘tarmay qo‘ydi.

Odamlarning aytishiga qaraganda, xodim onlayn qimorga yutqizib qo‘yib ko‘pchilikdan qarz bo‘lib ketgan ekan. Do‘konchidan 5-6 ta iPhone olib, uni ham bermay yurgani haqida eshitdim. Yana bir kishining Captiva mashinasini olib, uni ham pulini bermay sotib yuborgan ekan.

Formali odamni aldab ketishi aqliga sig‘maydi-da, bunday bo‘lishini xayolimgayam keltirmagan edim. Arizamni qaytarib olganimdan keyin yana yo‘q. Hech qayerdan topib bo‘lmayapti. Aloqaga chiqmayapti. Telefon qilyapman, o‘chiq telefoni. Telegram’dan yozsam o‘qimayapti. Hech qayerdan topib bo‘lmayapti. Ishxonasidagi xodimlar bilan ham gaplashdim. Qarzi juda ko‘p, kechib yuboraver pulingni deyishyapti.

Tegishli tashkilotlardan pulimizni olib berishlarini iltimos qilamiz…

Abdulloh Ne’matov

“Uyimizni sotuvga qo‘yganmiz, sotilsa beraman…”

Inspektorga aldanib qolgan Sherzod Xoldorov:

— Mashinafurushman. 21 yanvar kuni inspektor Bekzod G‘oyibnazarov sotiladigan Captiva bor, deb chaqirdi. Uchrashdik. Mashina bir ayolning nomida ekan. 7 200 dollarga kelishdik. Men bu pulni o‘sha ayolning ukasiga berdim. Inspektor pulni mashina egasidan olib, onlayn qimorga tikib yuborgan ekan. O‘zi ham buni tan olyapti: “1XBET o‘ynab yomon yo‘lga kirib qoldim, akalar, ozgina muhlat beringlar”, dedi.

Captiva egasi bo‘lgan ayol endi mashinani nomimga o‘tkazib bermayapti. Mashina uyimda turibdi. Boshim qotgan. Pullarini to‘lab berganmiz, bizda syomkalarigacha bor.

Telefonlarini o‘chirib olgan, uyiga borsak, “pul yo‘q”, deyapti. Onasi tinmay yig‘lab: “Uyimizni sotuvga qo‘yganmiz, sotilsa beraman”, deyapti. Lekin uy sotiladi deb yozilgan e’lon ham yo‘q-da…

Sherzod Xoldorov

“Inspektor ishdan bo‘shatilgan…”

Andijon viloyati IIB YXHB Axborot xizmati bo‘limi boshlig‘i Abdumajid Rayimjonov:

— Andijon viloyati Ichki ishlar boshqarmasi Jamoat xavfsizligi xizmati Yo‘l harakati xavfsizligi boshqarmasining 5-safarbar guruh inspektori, serjant Bekzod G‘oyibnazarov 2013 yildan beri tizimda ishlab kelgan. 2025 yil oxirlarida xodim ustidan bir necha arizalar kelib tushgan. Ya’ni, pul oldi-berdi masalasida.

Abdumajid Rayimjonov

Xodim ustidan murojaatlar ko‘payib ketganligi sababli viloyat Yo‘l harakati xavfsizligi boshqarmasi rahbariyati tomonidan holat tanqidiy muhokama qilinib, xodimga nisbatan xizmat tekshiruvi tayinlangan. Viloyat Ichki ishlar boshqarmasida attestatsiya tartibiga muhokamaga havola etilgan va attestatsiya tartibida ko‘rib chiqilganidan so‘ng, bu xodimni viloyat Ichki ishlar boshqarmasi boshlig‘ining tegishli buyrug‘iga asosan 2026 yil 30 martda Ichki ishlar organlari safidan, ya’ni tizimdan bo‘shatilgan.

Source link