Parij, 2025-yil 13-mart — Fransiya Prezidenti Emmanuel Makron O‘zbekiston Prezidenti Shavkat Mirziyoyevning Parijga rasmiy tashrifini iliq kutib oldi. Fransiya yetakchisi o‘zining tvitter sahifasida ushbu tashrif doirasida ikki davlat o‘rtasidagi do‘stlik aloqalarini yanada rivojlantirish va strategik hamkorlikni mustahkamlashga va’da berdi.

Makronning rasmiy tvitida quyidagi so‘zlar bitilgan:

“Parijga xush kelibsiz, hurmatli Shavkat! Mazkur davlat tashrifi bilan birga, biz Fransiya va O‘zbekiston o‘rtasidagi do‘stlik rishtalarini yanada yuksaltirib, kelajakka yo‘naltirilgan sheriklik uchun berilgan va’dani bajaramiz. Yashasin O’zbekiston, yashasin Fransiya!”

Bu bayonot Fransiya va O‘zbekiston o‘rtasidagi diplomatik munosabatlarning mustahkamligini aks ettirib, ikki davlatning yaqin hamkorlikka intilishining belgisidir. Ushbu tashrif davomida O‘zbekiston va Fransiya yetakchilari turli sohalarda hamkorlikni kengaytirish, jumladan, iqtisodiyot, madaniyat va ta’lim yo‘nalishlarida yangi kelishuvlarga erishishni rejalashtirmoqda.

Shuningdek, Prezident Mirziyoyevning Fransiyaga safari doirasida bir qator yirik investitsion loyihalar, ilmiy-akademik almashinuv dasturlari va madaniy tadbirlar muhokama qilinishi kutilmoqda. Bu esa O‘zbekiston va Fransiya o‘rtasidagi tarixiy rishtalarni yanada mustahkamlashga xizmat qilishi shubhasiz.

Ekspertlar fikriga ko‘ra, ushbu tashrif O‘zbekiston va Fransiya o‘rtasidagi munosabatlarni yangi bosqichga olib chiqib, hamkorlikning yangi imkoniyatlarini ochib berishi mumkin. Makronning iliq kutib olish bayonoti esa ikki davlat o‘rtasidagi do‘stona munosabatlarning yaqqol ifodasi sifatida baholanmoqda.

Prezident Shavkat Mirziyoyev 13-mart, payshanba kuni Parij shahridagi Burbon saroyida Fransiya Milliy majlisi Raisi Yael Braun-Pive bilan uchrashuv o‘tkazdi.

Ikki davlat o‘rtasidagi parlamentlararo almashinuvni yanada kengaytirish masalalari ko‘rib chiqildi.

Ushbu tashrifning tarixiy ahamiyati, O‘zbekiston va Fransiya o‘rtasida strategik sheriklik munosabatlari o‘rnatilgani katta mamnuniyat bilan qayd etildi.

Fransiya parlamenti quyi palatasi rahbari Yangi O‘zbekistonda amalga oshirilayotgan demokratik o‘zgarishlarni, vakillik organlarining roli, xotin-qizlar, bolalar, yoshlar va nogironligi bo‘lgan shaxslar huquqlari hamda ekologik xavfsizlik kafolatlari kuchayganini yuqori baholadi.

O‘zbekiston-Fransiya parlamentlararo forumini tashkil etish va «yo‘l xaritasi» asosida do‘stlik guruhlari ishini qayta tiklash masalalari muhokama qilindi.

O‘zbekiston yetakchisi Milliy majlis Raisini joriy yil aprel oyida Toshkent shahrida bo‘lib o‘tadigan Parlamentlararo ittifoqning 150-yubiley assambleyasida ishtirok etish uchun mamlakatimizga taklif etdi.

Uchrashuv yakunida O‘zbekiston Prezidenti Faxriy mehmonlar kitobida qayd yozib qoldirdi.