Sport
«To‘pni yaxshi ushlab turolmadik» – futbolchilar turnirni tark etgandan keyin nimalar deyishdi?
JCh guruh bosqichi so‘nggi turi doirasida Kongo DR bilan o‘tkazilgan o‘yindan keyin milliy jamoa futbolchilari mikst-zonada turli nashrlar jurnalistlarining savollariga javob qaytarishdi.
Milliy jamoa sardori Eldor Shomurodov «Sport-Ekspress» muxbiri bilan suhbatda bunday darajadagi o‘yinlarda faqat bir jihatda kuchli bo‘lishning o‘zi yetarli bo‘lmasligi haqida gapirgan.
— Katta tajriba orttirdik, ammo afsuski, hech bo‘lmaganda bitta o‘yinda g‘alaba qozona olmadik. Hayot davom etadi. Endi nimaga intilishimiz va qanday rivojlanishimiz kerakligini bilamiz. Jahon chempionatida qatnashdik, ammo buni yaxshiroq amalga oshirishimiz mumkin edi, degan tuyg‘u bor. Natija salbiy bo‘lsa-da, bu turnirdan olib ketishimiz mumkin bo‘lgan ko‘plab ijobiy jihatlar ham bor. Bu turnir biz hali ko‘p narsani o‘rganishimiz va o‘sishimiz kerakligini ko‘rsatdi.
— Nima yetishmadi? Yoki O‘zbekiston jamoasining asl darajasi shumi?
— Ko‘p narsa yetishmadi. Bu yerda barchasi boshqacha. Bu yerda bitta narsada boshqalardan yaxshiroq bo‘lishing yetarli emas, balki barcha jihatlarda kuchliroq bo‘lishing kerak. Shuning uchun, biz barcha jabhalarda qo‘shishimiz kerak. Jamoamizning hozirgi darajasi shu ekan. Jahon chempionatida oddiy o‘yinlar bo‘lmaydi, bu yerda mayda xatolarni ham jazolashadi. Bizga tajriba yetishmadi va endi bu tajriba hosil bo‘ldi.
— Fabio Kannavaro ham matbuot anjumanida tajriba yetishmagani va ikkinchi bo‘limda faqat uzun uzatmalar bilan o‘ynalganini aytdi, bunday o‘ynash oldindan rejada bo‘lmaganmi?
— Ha. Buning ruhiy tomoni ham bor – hisobda oldinda borayotganingda, gol o‘tkazib yubormaslik va hisobni saqlashni istaysan. Va shundan xatolar boshlanadi. Bunday xatolardan biri to‘pni yaxshi ushlab tura olmaganimiz bo‘ldi.
— Jamoa turnirda kutganingizdan yomonroq o‘ynadimi?
— Jahon chempionatiga kelib, Kolumbiya va Portugaliyaga qarshi maydonga tushsang, qiyin bo‘lishini tushunasan. Agar istasang, bunga ijobiy qarashing mumkin. Ammo maydonda boshqa darajaga guvoh bo‘lasan. Biz qo‘limizdan kelganini qildik. O‘ylaymanki, O‘zbekiston futboli bizning bu yerga kelishimizdan ko‘p narsa yutdi. Iste’dodli yoshlarimizni ham kuzatishdi. Endi Yevropada futbolchilarimiz ko‘proq bo‘lishi mumkin.
— Afrika jamoalari bu chempionatda osiyoliklarga qaraganda yaxshiroq ishtirok etishdi. Bu ularning konfederatsiyasi siznikidan kuchliroq deganimi?
— Faqat jismoniy tomondan. Yevropada o‘ynaydiganlar – «fizika» va texnika uyg‘unligi nima ekanini biladi. Kongoliklarning esa barchasi o‘sha yerda o‘ynaydi. Bunday raqibga qarshi doim himoyalanish juda qiyin. Baribir to‘pga egalik qilish kerak edi!
— Ikkinchi bo‘limda jamoangiz hujum qilishni to‘xtatdi, hujumga o‘tganda ham faqat ikki-uch kishi bo‘lib. Bu Fabio Kannavaroning ko‘rsatmasi edimi yoki futbolchilarning tashabbusimi?
— Ha, agar gol ursak, qanday qilib bo‘lmasin hisobni saqlab qolishimiz kerak, degan ruhiy kayfiyat bor edi. Ammo Kongoga ham g‘alaba kerakligi o‘z so‘zini aytdi, bu jamoa jismonan juda kuchli edi. Shuning uchun ular faqat oldinga borishdi va bizni himoyadan o‘ynashga majbur qilishdi. Qolganini o‘zingiz ko‘rdingiz.
Biz to‘pni yaxshiroq ushlab turishimiz mumkin edi. Faqat bir jihatda yaxshi bo‘lish yetarli emasligini aytganimda shuni nazarda tutgandim. Agar siz pressingda yaxshi bo‘lsangiz, ammo to‘p bilan yaxshi ishlay olmasangiz, bu muammo baribir fosh bo‘ladi va buning uchun jazolanasiz. Hammasi tajribaga bog‘liq. Boshqa darajadagi o‘yin sur’atini, bunga odatlangan futbolchilarni ko‘rganingda, buni o‘rganish kerakligini tushunasan.
— Urgan chiroyli golingiz haqida aytib bering. To‘pni darvozabon ustidan «parashyut» qilib tashlash fikri qanday keldi?
— Gol chiroyli chiqdi, ammo bizga yordam bermadi. Gol urish doim yoqimli va o‘shanda hissiyotlar ijobiy edi. Ammo asosiysi – jamoa g‘alabasi, yutqazganimiz tufayli gol zavqi ham butunlay yo‘qqa chiqdi.
— Shunga qaramay, jahon chempionatlaridagi gollaringiz hisobini ochish muhimdir?
— Albatta, men uchun bu muhim. Baribir buni eslab yurasan – har kuni ham jahon chempionatida gol urib yurmaysan. Ammo yutganimizda – yanada yaxshiroq bo‘lardi.
— O‘sha vaziyatda Abbos Fayzullayev to‘pga tekkanmidi? Ya’ni golli uzatmani u berganmi?
— O‘zi to‘pga teginganini aytdi!
— Bu yerdan qandaydir qimmatli futbolka olib ketyapsizmi? Kolumbiya va Portugaliya bilan o‘yinlardan keyin futbolka almashdingizmi?
— Menda futbolka almashadigan kayfiyat yo‘q edi.
— Srechko Katanets, Timur Kapadze bilan taqqoslaydigan bo‘lsak, Kannavaro – jamoaga nima berdi?
— Ko‘p ijobiy narsalar! Bittalab aytib o‘tirmayman, lekin shunisi aniqki, chempionatda u xohlagandek o‘ynash uchun ko‘p vaqtimiz bo‘lmadi. Professional jihatdan u futbolchilarga ko‘p narsa beradi va o‘rgatadi. O‘yin tempini, professionallikni va bunday darajada o‘ynash uchun kerakli bo‘lgan boshqa barcha jihatlarni.
O‘zbekiston milliy jamoasining jahon chempionatlaridagi ilk goli muallifi bo‘lgan Abbos Fayzullayev esa «Chempionat» muxbiriga bergan intervyusida jamoa o‘z darajasida o‘ynay olmadi, deb hisoblashini aytgan.
— Natijaga qaramasdan, orzu amalga oshdi, deyish mumkinmi?
— Jahon chempionatida o‘ynaganimizni nazarda tutadigan bo‘lsak – ha. Ammo bu yetarli emas. Men g‘alaba qozonishni xohlayman. Biz esa buni uddalay olmadik. Umid qilamanki, keyingi jahon chempionatiga chiqamiz va o‘z g‘alabalarimizni qo‘lga kiritamiz. Hozir esa juda charchadim.
— Yaxshiroq o‘ynashingiz mumkinmidi? Yoki bu maksimummi?
— Yo‘q, bu maksimum emas. Biz nimaga qodirligimizni, qanday futbol o‘ynay olishimizni bilaman. Shunchaki bu yerda buni ko‘rsata olmadik.
Milliy jamoa himoyachisi Rustam Ashurmatov ham «Sport-Ekspress» muxbiriga bergan intervyusida jamoa bundan yaxshiroq natija qayd etishi mumkin bo‘lganini ta’kidlagan.
— Yaxshiroq o‘ynashimiz mumkin edi va biz, albatta, xafamiz. Biz birinchi jahon chempionatini orzu qilardik – lekin, albatta, shunchaki o‘ynashni emas, balki ochko to‘plash va g‘alaba qozonishni ham istardik. O‘xshamadi. Sabablar juda ko‘p va hozir ular haqida xolisona gapirishga hali erta. Shunisi aniqki, qaysidir pallalarda noto‘g‘ri harakat qilindi. Bu bizning birinchi jahon chempionatimiz va bu biz uchun saboq bo‘lishi kerak.
— Qaysi o‘yin barchasidan alamliroq bo‘ldi? Kolumbiya bilan o‘yinda hisobni tenglashtirgandingiz, bugungi o‘yinda hisobda oldinda bordingiz…
— Barchasi alamli. Kolumbiya bilan o‘yinda durang o‘ynashimiz, bugun g‘alaba qozonishimiz mumkin edi. Biz bu jahon chempionatini juda uzoq vaqt – 34 yil kutgandik! Ammo o‘xshamadi – hech bo‘lmaganda bitta ochko qo‘lga kirita olmadik.
— Kongo DR bilan o‘yinning birinchi bo‘limini juda yaxshi o‘tkazgandingiz, uni yutdingiz. Ikkinchi bo‘limda nima o‘zgardi?
— Biz yaxshi tayyorlangandik, yaxshi boshladik, darhol darvozani ishg‘ol etdik – hisobga olinmagan bo‘lsa ham. Keyin yana gol urdik. Gol urib olganimizdan keyin nimadir o‘zgardi, deb hisoblamayman. Biz shunday o‘ynashda davom etdik. Ammo raqib ham o‘yinga yaxshi tayyorlangandi. Ularga g‘alaba kerak edi va gol o‘tkazib yuborishganidan keyin yanada faolroq harakatlanishdi. Shundan keyin barchasi biz xohlaganimizdek kechmadi.
— Kongoliklar darvozasiga juda chiroyli gol urgan sardor Eldor Shomurodov uchun xursandmisiz?
— Albatta, u mening eng yaxshi do‘stim va jamoamiz sardori! U gol urgani, o‘yinda ham, turnirdagi gollari bo‘yicha ham hisobni ochgani zo‘r bo‘ldi. Afsuski, bu g‘alaba qozonishimizga yordam bermadi.
— Kongoliklar bilan o‘yindan keyin Fabio Kannavaro nimalar deyishga ulgurdi?
— Albatta, u ham g‘alabani xohlagandi. Aytishim mumkinki, u biz uchun, jamoa uchun barchasini qildi. Uning xafaligi biznikidan kamroq emas. U barchasini ortda qoldirish kerakligi va oldinda Osiyo chempionati turganini, unga ham tayyorlanishimiz kerakligini aytdi.
— Uch mag‘lubiyat fonida Kannavaro va futbolchilar orasidagi munosabatlar yomonlashmadimi?
— Yo‘q-yo‘q, murabbiylar shtabi bilan barchasi ajoyib. Hech qanday muammo yo‘q.
— Aftidan, muxlislar haqida ham shu gapni aytish mumkin. Uchta o‘yinda ham mag‘lubiyatga qaramay, ular tribualarda qolishdi va sizlar bilan iliq xayrlashishdi.
— Ha, to‘g‘risini aytsam, bu odamni xursand qiladi. Chunki jamoa yutqazganida, ular bizni qo‘llab-quvvatlashdi, bu juda qiyin. Shuning uchun, ularning reaksiyasi – bizga katta ishtiyoq beradi. Ularga jamoani oxirigacha qo‘llab-quvvatlaganlari uchun katta rahmat.
Milliy jamoa hujumchisi Igor Sergeyev xatolar ustida ishlanishini ta’kidlagan.
«Men o‘yin paytida ham aytdim, hozir ham yigitlarga takrorladim, boshni egmaslik kerak. Ha, alamli, ha, yoqimsiz. To‘g‘ri, bu hammaga, bizga ham, yaqinlarimizga ham, butun mamlakatga ham og‘ir. Lekin oldinga harakat qilamiz, ishlaymiz, taslim bo‘lmaymiz. Menimcha, endi ikki-uch barobar ko‘proq mehnat qilamiz», – deya uning so‘zlarini keltiradi Gazeta.
U o‘yindan keyin Fabio Kannavaro kiyim almashtirish xonasida futbolchilarga nima degani haqidagi savolni ochiq qoldirgan: «Keling, bu jamoa ichida qolsin. Uning ham o‘z xavotir va kechinmalari bor edi. U shunday gaplarni gapirdiki, menimcha, ular kiyim almashtirish xonasida qolishi kerak».
Sergeyev jamoa turnir boshlanishidan oldin ham raqiblarning kuchini yaxshi anglaganini ta’kidladi.
«Biz ham yosh bola emasmiz, raqiblar jiddiy, top-jamoalar ekanini tushunib turgandik. Portugaliya ham, Kolumbiya ham, o‘sha Kongo ham. Negadir hamma ularni hisobdan chiqarib qo‘ygandi, lekin biz videolarini ko‘rgandik. Juda yaxshi shakllangan jamoa. Umidlarimiz katta edi, kamida guruhdan chiqishni ko‘zlagandik. Ammo nima bo‘lgan bo‘lsa, bo‘ldi», – deydi u.
Uchta mag‘lubiyatdan keyin bo‘lishi mumkin bo‘lgan tanqidlar haqida gapirarkan, hujumchi jamoa ilgari ham bunday salbiy munosabatni boshdan kechirganini aytib o‘tdi.
«Norozi bo‘ladigan odamlar topiladi. Futbolni tushunmaydigan, shunchaki, tomosha qilib, yutishimizni xohlaydigan odamlar ham bor. Men ularni tushunaman. Jamoada bizni rosa tanqid ostiga olishgan paytlar ham bo‘lgan. Lekin biz o‘syapmiz va jahon chempionatiga chiqdik. Bunday salbiy qarashlar esa o‘tib ketadi», – dedi Sergeyev.
Uning so‘zlariga ko‘ra, hozir milliy jamoani avvalgidan ko‘ra ko‘proq qo‘llab-quvvatlashmoqda.
«Baribir, yutqazayotganimizga qaramay, bizni qo‘llab-quvvatlayotganlar ko‘p. Tariximizda ilk bor jahon chempionatiga chiqqanimizning o‘zi juda yaxshi natija. Bu xalq uchun, futbolga qiziqmaydigan, uni doim tomosha qilmaydigan va futbolning ichki olamidan xabari yo‘q insonlar uchun ham juda katta ijobiy turtki bo‘ldi», – dedi u.
Hujumchi Portugaliya bilan o‘yindagi natija umumiy taassurotga soya solganini tan oldi.
«Beshta to‘p o‘tkazib yuborish – bu ko‘p, albatta. Lekin salbiylik ko‘rishni xohlagan odam, doim salbiylik topadi. Ijobiylikni ko‘rishni istagan odam esa, har doim yaxshilikni ko‘ra oladi. Ha, yutqazdik, lekin yomon tajriba ham tajriba. Bundan ham xulosa chiqarib, o‘rganish mumkin va faqat oldinga harakat qilish kerak», – deya ta’kidladi Sergeyev.
Kelajakdagi maqsadlar haqida gapirarkan, Sergeyev milliy jamoa jahon chempionatidagi debyutdan so‘ng ortga qadam tashlamasligi kerakligini ta’kidladi.
«Mening shaxsiy [umidlarim] — ortga qadam tashlamaslik. Qanday rivojlangan, qanday yo‘l bosgan bo‘lsak, mayli sekin, mayli kichik qadamlar bilan bo‘lsa ham, xuddi shunday oldinga harakat qilishda davom etishimiz kerak. Ushbu jahon chempionatida nimalarga qodirligimizni ko‘rsata olmadik. Xatolar bo‘ldi. Endi keyingisiga chiqishga harakat qilishimiz, bu yerga shunchaki bir marta tasodifan kelib qolmaganimizni, balki har safar barqaror ravishda yo‘llanma olishimizni isbotlashimiz kerak. Keyin esa guruhdan ham muntazam chiqishga intilishimiz lozim», – dedi u.
U bunday maqsadlar ambitsiyali ko‘rinishi mumkinligini, ammo jamoa bosqichma-bosqich harakat qilishi kerakligini qayd etdi. «To‘g‘ri, bu biroz katta rejalardek tuyulishi mumkin, lekin mahalliy chempionatimiz ham o‘sishi, biz ham oldinga ketishimiz uchun qadamma-qadam harakat qilish lozim. Men aynan shuni xohlayman. Shunchaki jahon chempionatiga chiqdik, keldik, katta rahmat, endi yana 30 yil kutamiz, degan narsa bo‘lmasligi kerak. Mana shuni istamayman», – dedi Sergeyev.
Hujumchi Osiyo kubogida O‘zbekiston milliy jamoasi oldiga ancha yuqori vazifalar qo‘yilishi lozimligini qayd etgan. «Osiyoda vazifalar biroz boshqacha va menimcha, u yerda chempionlik uchun kurashish qo‘limizdan keladi», – deya ta’kidladi u.
FIFA saytida guruh bosqichi davomida urilgan jami 12 ta gol orasidan eng chiroylisini aniqlash uchun ovoz berish jarayoni o‘tkazilmoqda.
Foto: Alex Slitz/Getty Images
O‘zbekiston milliy jamoasi sardori Eldor Shomurodov Kongo DR darvozasiga urgan gol turnir guruh bosqichining eng chiroyli goli deb topilishi mumkin.
Hujumchi o‘yinning 10-daqiqasida jarima maydoniga oshirilgan to‘pga yetib borib, o‘tkir burchak ostida turganiga qaramay, to‘pni parashyut uslubida raqib darvozaboni ustidan oshirib tashlagan va hisobni ochgandi.
U endi Lionel Messi, Kilian Mbappe va Vinisius Junior kabi yulduzli futbolchilar bilan guruh bosqichining eng chiroyli goli muallifi bo‘lish uchun raqobatlashmoqda.
Ushbu havola orqali o‘zbekistonlik futbolchi uchun ovoz berish mumkin.
Sport
JCh kundaligi. 1/8 finalning ilk ishtirokchisi ma’lum, Koreya lagerida mojaro, Kabo-Verde sardorida muammo
JAR turnirni tark etdi.
Jahon chempionatida pley-off bosqichi start oldi. 1/16 finalning dastlabki o‘yinida Kanada va JAR milliy jamoalari kuch sinashdi. Kanadaliklar guruhda birinchi o‘rinni ololmagani tufayli o‘yinni Vankuverda emas, Los-Anjyelesda o‘tkazishiga to‘g‘ri keldi. Ko‘p soatlik safarda charchagan futbolchilar maydonda katta qiyinchilikka uchradi va faqat o‘yinga qo‘shib berilgan daqiqalarda g‘alaba golini urishga muvaffaq bo‘lishdi.
Maydon tashqarisida ham qiziqarli voqealar davom etmoqda: Kabo-Verde sardori Rayan Mendesh jinsiy zo‘ravonlikda ayblanmoqda, Janubiy Koreya prezidenti Li Je Men milliy jamoaning jahon chempionatini tark etishi yuzasidan tekshiruv o‘tkazishni buyurdi, FIFA rahbari Janni Infantino esa ekologiyaga zarar yetkazishda ayblanmoqda.
Kanada qiyinchilik bilan JARni taslim etdi
JAR – Kanada 0:1
Gol: Eushtakiu, 90+2 (0:1)
JAR: Uilyams, Mbokazi, Okon, Modiba, Mudau, Mokoena, Sitole, Mofokeng (Mbata, 46), Appollis, Maseko (Moremi, 86), Makgopa (Rayners, 86)
Kanada: Krepo, Kornelius, Bombito (De Fujyerol, 59), Lareya, Jonston, Eushtakiu, Saliba (Sigur, 59), Millar (Shaffelberg, 70), Byukenen (Deyvis, 75), J. Devid, Oluvaseyi (P. Devid, 70)
Ogohlantirishlar: Saliba, 54. Sigur, 67
Kanadaliklar guruh bosqichini barqaror o‘tkaza olishmagandi. Dastlab Bosniya bilan o‘yinda durang qayd etilgan (1:1), ikkinchi turda Qatar darvozasiga istagancha gol urishgan (6:0), so‘nggi turda Shveytsariyaga mag‘lub bo‘lishgandi (1:2). Ammo Jyessi Marsh shogirdlariga 4 ochko ham kvartetda ikkinchi o‘rinni olish uchun yetarli bo‘ldi va jamoa pley-offda JAR bilan o‘ynadi.
1/16 finalni ochib bergan ushbu uchrashuvga intrigani reper Dreyk oshirib berdi. Kanadalik mashhur musiqachi o‘z vatandoshlari keyingi bosqichga o‘tishi uchun 770 ming dollar tikkandi. Avvaliga kanadalik muxlislar uni tanqid qilishni boshlashdi, chunki u doim o‘yin natijalari uchun pul tikkanda yutqazgan, internetda bu borada «Dreyk tavqi la’nati» degan tushuncha ham paydo bo‘lgan.
Kanada esa o‘yin davomida ustunlik qila olmadi. Jamoada bir necha xavfli vaziyatlar yuzaga keldi, ammo futbolchilar bundan foydalana olishmadi.
O‘yin overtaymlarga qarab ketayotgandi, ammo 90+2-daqiqada Stiven Eushtakiu jarima maydoni yaqinida to‘pni qabul qildi va chap pastki burchak tomon kuchli zarba berib, hisobni ochdi. Qolgan daqiqalarda afrikaliklar vaziyatni o‘zgartira olishmadi.
Kanada endi keyingi bosqichda Marokash va Niderlandiya juftligiga qarshi o‘ynaydi.
Koreyslar norozi
Xon Men Bo shogirdlari dastlabki turda Chexiyani mag‘lub etib (2:1), turnirni a’lo kayfiyatda boshlashgandi. Lekin keyingi ikki turda Meksika va JARdan 0:1 hisoblarida mag‘lub bo‘lishdi va turnirni tark etishdi. Endi bu muvaffaqiyatlik uchun aynan bosh murabbiyni aybdor qilishmoqda.
57 yoshli mutaxassis natija uchun uzr so‘radi va mas’uliyatni o‘z zimmasiga oldi. Ammo mahalliy jamoatchilik buni shu holida qoldirmoqchi emas. Mamlakat prezidenti Li Je Men esa olovga moy quydi.
«Agar qobiliyatli odamlarni emas, o‘z odamlaringizni afzal ko‘rsangiz va rahbarlik lavozimlariga layoqatsiz odamni tanlasangiz, natija oldindan ma’lum bo‘ladi… Madaniyat, sport va turizm vazirligidan ushbu voqeaning tafsilotlarini sinchiklab o‘rganishni so‘rayman», – deya yozgan ushbu siyosatchi ijtimoiy tarmoqda.
Endi murabbiyning yuzi davlat televideniyesida blur qilinmoqda, do‘konlar va restoranlar eshiklari oldida esa «Xon Men Bo Kirishi taqiqlanadi» deb yozilgan tablichkalar o‘rnatilmoqda.
Urugvaylik futbolchilar tashlab ketildi
Urugvay milliy jamoasi jahon chempionatidagi ishtirokini guruh bosqichidayoq yakunladi. Marselo Biyelsa shogirdlari uchinchi turda Ispaniyaga 0:1 hisobida yutqazdi va H guruhida ikki ochko bilan uchinchi o‘rinni egallab, pley-off bosqichiga chiqa olmadi.
Marca nashri yozishicha, shundan keyin Urugvay futbol assotsiatsiyasi milliy jamoa futbolchilarini Meksikadan Montevideoga olib qaytish uchun oldindan bron qilingan charter reysni bekor qilgan. Ispaniya bilan o‘yin Meksikaning Sapopane shahrida bo‘lib o‘tgan. Charter reys bekor qilingach, futbolchilar, murabbiylar shtabi a’zolari va boshqa xodimlar uyga odatiy reysda qaytishiga to‘g‘ri kelgan.
Bu Urugvay milliy jamoasi atrofidagi ilk mojaro emas. Manbalarga ko‘ra, Ispaniyaga qarshi hal qiluvchi o‘yin oldidan futbolchilar va bosh murabbiy o‘rtasida kelishmovchilik yuzaga kelgan. Ernesto Valverde boshchiligidagi bir guruh futbolchilar 3 ochko bilan ham pley-offga chiqish mumkinligini inobatga olgan holda himoyaviy uslubda o‘ynashni taklif qilishgan, murabbiy esa buning aksini – kuchli pressingga asoslangan futbol o‘ynashni talab qilgan. Bu mavzu muhokama qilingan yig‘ilishni futbolchilar namoyishkorona tark etishgan. Yakunda murabbiy ko‘rsatmalariga amal qilmagan jamoa turnirni ham tark etdi.
Infantino yetkazayotgan zarar
FIFA rahbari Janni Infantino har kuni ikki, ba’zida uchta o‘yinga tashrif buyurayotgani aks etgan kadrlar chiqmoqda. BBC jurnalistlariga ko‘ra, u guruh bosqichining imkon qadar barcha o‘yinlariga kirish uchun xususiy jyetdan foydalangan.
Baholarga ko‘ra, jahon chempionati boshlanganidan buyon uning samolyoti 66 soatdan ortiq vaqt mobaynida havoda bo‘lib, 31 144 milya (50 122 km) masofani uchib o‘tgan. Surishtiruvda ekologiya masalasiga alohida e’tibor qaratilgan: uning parvozlaridan iqlimga yetkazilgan zarar taxminan 78 kishining yillik issiqxona gazlari chiqindilariga teng.
Kabo-Verde sardori og‘ir jinoyatda ayblanmoqda
«Ko‘k akulalar» sensatsiya ko‘rsatib, Ispaniya, Urugvay va Saudiya Arabistoni joylashgan guruhda ikkinchi o‘rinni olgan holda pley-offga chiqishdi, jamoa darvozaboni Vozinya esa jahon miqyosidagi yulduzga aylandi. Lekin jamoa sardori Rayan Mendeshda jiddiy muammo yuzaga keldi.
Globo xabariga ko‘ra, 36 yoshli futbolchini jinsiy zo‘ravonlikda ayblashmoqda. Hodisa 27 mart kuni Oklenddagi (Yangi Zelandiya) mehmonxonada ro‘y bergan, o‘shanda Kabo-Verde milliy jamoasi o‘rtoqlik uchrashuvi oldidan o‘sha yerda to‘xtagandi. Mahalliy futbol
federatsiyasi tomonidan tarjimon sifatida yollangan qizning da’vo qilishicha, Mendesh uning xonasiga bostirib kirgan, bo‘g‘gan, urgan, tishlagan va qarshilik ko‘rsatishiga qaramay, zo‘rlagan.
FIFA holat yuzasidan tekshiruv boshlanganini ma’lum qildi.
«Xalqaro futbol federatsiyasi Yangi Zelandiya rasmiylari bilan aloqada. Hozirgi vaqtda qo‘shimcha izoh bera olmasligimizni to‘g‘ri qabul qilishingizni so‘raymiz», – deyiladi bayonotda.
Kompyuter Fransiyaga ishonmoqda
Guruh bosqichi yakunlangach, Opta superkompyuteri 2026 yilgi jahon chempionati favoritlari bo‘yicha taxminlarini yangiladi.
Dastur tahlillariga ko‘ra, g‘oliblik uchun eng katta imkoniyat Fransiyada. Dide Desham shogirdlarining bosh sovrinni qo‘lga kiritish imkoniyatlari 18,66 foizga teng deb baholanmoqda. Reytingda ikkinchi o‘rinni Argentina (16,26 foiz), uchinchini – Ispaniya (13,47 foiz) egallab turibdi.
Shuningdek, Angliya (9,68 foiz), Braziliya (6,47 foiz) va Niderlandiyaning (5,11 foiz) imkoniyatlari nisbatan yuqori baholanmoqda.
Navbatdagi o‘yinlar
29 iyun kuni kechqurun 30 iyun tongida 1/16 final doirasida uchta uchrashuv bo‘lib o‘tadi.
29 iyun. 22.00. Braziliya – Yaponiya
30 iyun. 01.30. Germaniya – Paragvay
30 iyun. 06.00. Niderlandiya – Marokash
Eldor Shomurodov uchun zarbani muvaffaqiyatli amalga oshirish shu qadar murakkab bo‘lganidan xG modeli uning gol bilan yakunlanish ehtimolini bir foizdan sal ko‘proq deb baholadi.
Foto: Anvar Ilyasov/ Getty Images
O‘zbekiston milliy jamoasi hujumchisi Eldor Shomurodov jahon chempionatidagi eng ehtimoli past gol muallifi bo‘ldi. Bu haqda OptaJose statistika portali o‘zining X ijtimoiy tarmog‘idagi sahifasida ma’lum qildi.
Portalning yozishicha, uning goli uchun xG ko‘rsatkichi atigi 0,013 ni tashkil etgan.
Kongoga qarshi guruh bosqichi so‘nggi uchrashuvining 10-daqiqasida Eldor Shomurodov Akmal Mozgovoyning uzatmasidan so‘ng hisobni ochdi.
Qayd etilishicha, zarbani muvaffaqiyatli amalga oshirish shu qadar murakkab ediki, xG modeli uning gol bilan yakunlanish ehtimolini bir foizdan sal ko‘proq deb baholadi.
Bu Eldor Shomurodovning jahon chempionatidagi debyut goli bo‘ldi. U o‘yinning 30-soniyasidayoq Mpasi-Nzau qo‘riqlayotgan darvozani ishg‘ol etgandi, ammo gol ofsayd tufayli bekor qilindi. Yakunda Fabio Kannavaro shogirdlari 1:3 hisobida mag‘lub bo‘lishdi.
Ma’lumot uchun xG (Expected Goals — kutilgan gollar) — futboldagi zamonaviy statistik ko‘rsatkich bo‘lib, darvozaga berilgan zarbaning gol bilan yakunlanish ehtimolini baholaydi. Model har bir zarbaga 0 dan 1 gacha bo‘lgan qiymat beradi: bunda 0 — gol urish deyarli mumkin emasligini, 1 esa muqarrar golni anglatadi. Baholash minglab o‘xshash holatlar bo‘yicha yig‘ilgan ma’lumotlar asosida bo‘ladi.
Baholash ehtimoliga darvozagacha bo‘lgan masofa, zarba burchagi, hujum turi, zarba tananing qaysi qismi bilan berilgani, himoyachilar qarshiligi va darvozabonning joylashuvi ta’sir ko‘rsatadi.
Shu tariqa xG yaratilgan vaziyatlar sifatini baholash imkonini beradi va jamoa yoki futbolchi o‘rtacha samaradorlik sharoitida qancha gol urishi kerak bo‘lganini ko‘rsatadi.
Guruh bosqichi yakunlandi. O‘zbekistonning mag‘lubiyati Janubiy Koreya va Eronni ham guruhda qoldirdi; Eronliklar esa so‘nggi daqiqalargacha Avstriya va Jazoir o‘yini natijasiga qarab, imkoniyat saqlab turishgandi, ammo yakunda baribir turnirni tark etadigan bo‘lishdi.
2026 yilgi jahon chempionatida guruh bosqichi rasman yakunlandi. 28 iyunga o‘tar kechasi J, K va L guruhlarida so‘nggi uchrashuvlar bo‘lib o‘tdi. Jazoir va Avstriya yorqin kechgan o‘yinda durangga imzo chekishdi (3:3), Argentina ikkinchi tarkibi bilan Iordaniyani mag‘lubiyatga uchratdi (3:1), Portugaliya Kolumbiya darvozasiga yo‘l topolmadi (0:0), O‘zbekiston Kongo DR bilan o‘yinda yutqazib, turnirni tark etdi (1:3), Angliya Panamadan (2:0), Xorvatiya – Ganadan (2:1) ustun keldi.
Jazoir va Avstriya «kelishuvi»
Jazoir – Avstriya 3:3
Gollar: Arnautovich, 28 (0:1). Belgali, 45 (1:1). Zabitser, 55 (1:2). Mahrez, 60 (2:2). Mahrez, 90+3 (3:2). Kalayjich, 90+6 (3:3)
Jazoir: Benbu, Mandi, Bensebayni, Hajam (Belayd, 71), Belgali (Ayt Nuri, 71), Shaybi, Bintolib, Maza, Auar (Gedjyemis, 90), Mahrez, Guiri (Shergi, 71)
Avstriya: A. Shlager, Alaba (Danso, 62), Linhart, Mvene (Kalayjich, 90), Posh, K. Shlager (Vanner, 46), Zayvald, Shmid (Grillich, 46), Zabitser, Laymer, Arnautovich (Gregorich, 46)
Ogohlantirish: Arnautovich, 11
Uchinchi tur oldidan J guruhida ikkinchi va uchinchi o‘rinlarni egallab turgan Avstriya va Jazoir o‘rtasidagi o‘yinda durang ikki jamoani ham pley-offga olib chiqishi ma’lum edi. Bunday holat bu safargi jahon chempionatida yangilik emas – avvalroq D kvartetida Paragvay va Avstraliya, F guruhida Yaponiya va Shvetsiya shunday holatda qolgandi. Yakunda ushbu jamoalarning o‘zaro o‘yinlarida durang hisoblar qayd etilgandi.
Shu bilan birga, jazoirliklar va avstriyaliklarni «kelishilgan» o‘yinda ayblab bo‘lmaydi. Jamoalar ilk daqiqalardan hujumkor o‘yin namoyish etishdi va birinchi bo‘limda bittadan gol urishdi. Ikkinchi bo‘limda Avstriya yana hisobda oldinga chiqib oldi – bunday hisob guruhlardagi uchinchi o‘rin egalari orasida sakkizlikni yopib turgan Eron uchun foydali edi. Ammo shundan keyin Mahrez hisobni tenglashtirdi va so‘nggi daqiqalargacha eronliklar sakkizlikdan tashqarida turdi. Qo‘shimcha bo‘limlarda ushbu futbolchi dublni rasmiylashtirdi va endi eronliklar Afrika vakillariga muxlislik qila boshladi – bu hisob endi Avstriyani uchinchi o‘rin egalari reytingida Erondan pastga tushirib yuborgandi. Ammo osiyoliklarning quvonchi uzoqqa cho‘zilmadi va Avstriya baribir hisobni tenglashtirdi. Natijada Eron uchinchi o‘rin egalari reytingida yana to‘qqizinchi o‘ringa tushib ketdi va mundialni tark etdi.
Ikkinchi o‘rin bilan pley-offga chiqqan Avstriyani endi Ispaniyaga qarshi o‘yin kutmoqda. Jazoir esa 1/16 finalda Shveytsariya bilan o‘ynaydi.
Messining oltinchi goli
Iordaniya – Argentina 1:3
Gollar: Lo Selso, 19 (0:1). L. Martines, 31 – penalti (0:2). At-Ta’mariy, 55 (1:2). Messi, 80 (1:3)
Iordaniya: Abulayla, Al-Arab, Abu Dahab (Ubayd, 90), Nasib, Al-Ravabdeh, Ar-Rashdon (Jamus, 76), Abu Taha, Haddod, Olvan (Abu Zrayk, 90), Azayzeh (Al-Mardiy, 46), Al-Fahuriy (At-Ta’mariy, 46)
Argentina: E. Martines, Senesi, Otamendi, Talyafiko, Palasios, Paredes, Pas (Makallister, 61), Lo Selso (Messi, 60), Simeone (Barko, 71), Alvares (Lopes, 82), L. Martines (Almada, 60)
Ogohlantirishlar: Abu Taha, 17. Al-Arab, 64. Abu Zrayk, 90
Argentina guruh masalasini muddatidan oldinroq hal qilib qo‘ygandi va murabbiylar shtabi Iordaniyaga qarshi o‘yinda jiddiy rotatsiya amalga oshirdi, jumladan, oldingi ikki o‘yinda besh gol urgan Lionel Messi ham zaxirada qoldirildi.
«Albiseleste» ikkinchi tarkibi bilan ham iordaniyaliklardan bir bosh ustunligini namoyish etdi va birinchi bo‘limni 2:0 hisobidagi ustunlik bilan yakunladi. Tanaffusdan keyin Iordaniya bitta javob goli qaytardi, shundan besh daqiqa o‘tib Lionel Skaloni baribir Messini maydonga tushirishga qaror qildi.
39 yoshli forvard o‘ziga berilgan daqiqalardan unumli foydalandi va 80-daqiqada jarima zarbasini golga aylantirib, o‘yinning yakuniy hisobini o‘rnatdi – 3:1.
Bu Leo uchun joriy mundialdagi oltinchi, jami 19-gol bo‘ldi – argentinalik yulduz hamon ajoyib formada. Argentinaning pley-offdagi raqibi oldinroq ma’lum bo‘lgandi – bu Kabo-Verde. Iordaniya esa guruhdagi barcha o‘yinlarda yutqazgan holda turnirni tark etadigan bo‘ldi.
Portugaliyadan yana nursiz o‘yin
Kolumbiya – Portugaliya 0:0
Kolumbiya: Vargas, Lukumi, Sanches, Machado, S. Arias (Munios, 87), Lerma (Rios, 60), Puerta, D. Arias (Kastanio, 76), Dias, Xames Rodriges (Kintero, 76), Kordoba (Suares, 60)
Portugaliya: D. Koshta, Ruben Diash, Veyga, Nunu Mendesh (Mateush Nunesh, 90+3), Joau Kanselu (Dalot, 46), Ruben Nevesh (Joau Nevesh, 46), Vitinya (S. Koshta, 70), Brunu Fernandesh, Joau Feliks (Leau, 70), Pedru Netu, Krishtianu Ronaldu
Ogohlantirish: Puerta, 86
Messidan farqli ravishda, uning azaliy raqobatchisi Krishtianu Ronaldu yana nursiz o‘yin o‘tkazdi. Uning boshchiligidagi Portugaliya turnir startida Kongo DR bilan o‘yinda ham muvaffaqiyatsizlikka uchragan (1:1), ammo keyin O‘zbekistonni yirik hisobda tor-mor etgandi (5:0). Krish o‘sha o‘yinda dublni rasmiylashtirgan va o‘yindan keyin kameraga qarab «Men qaytdim!» deya hayqirgandi.
Ammo Ronaldu endi bu so‘zlari uchun yana malomatga qolmoqda –
Kolumbiyaga qarshi so‘nggi tur uchrashuvini portugallar juda nursiz o‘tkazishdi, jamoa sardori ham o‘yinda yo‘qolib qoldi. Lotin Amerikasi vakillari esa tetikroq ko‘rinishdi, ko‘proq hujum qilishdi va ko‘proq zarba berishdi (jami zarbalar soni bo‘yicha 24:13, darvoza sohasiga to‘g‘ri borgan zarbalar bo‘yicha 6:2). Yakunda ikki jamoa ham gol urolmadi – 0:0.
Ikkinchi durang tufayli Ronaldu va jamoadoshlari guruhda ikkinchi o‘rinni egalladi va pley-offda qiynaladigan bo‘ldi. 1/16 finalda jamoani dastlab Xorvatiya bilan o‘yin kutmoqda, bu jamoa to‘sig‘idan o‘tilgan taqdirda ham keyingi ehtimoliy raqiblar qatorida Ispaniya va Fransiya kabi nomlar bor. Shu bilan birga, Portugaliya va Argentinaning yo‘llari finalgacha kesishmaydi – agar portugallar guruhda birinchi o‘rinni egallaganida, barchasi boshqacha kechishi mumkin edi.
O‘zbekiston bilan xayrlashuv
Kongo DR – O‘zbekiston 3:1
Gollar: Shomurodov, 10 (0:1). Vissa, 68 – penalti (1:1). Mayyele, 78 (2:1). Vissa, 90+1 (3:1)
Kongo DR: Mpasi-Nzau, Tuanzebe, Mbemba, Masuaku (Kayyembe, 83), Van-Bissaka, Mutussami (Mukau, 72), Sadiki, Sipenga (Bongonda, 72), Mbuku (Elia, 72), Bakambu (Mayyele, 51), Vissa
O‘zbekiston: Ne’matov, Husanov, O‘rozov (Iskandarov, 82), Ashurmatov, Mozgovoy (Sergeyev, 82), Shukurov (G‘aniyev, 59), Nasrullayev, Alijonov, Hamdamov (Hamrobekov, 59), Fayzullayev (O‘runov, 73), Shomurodov
Ogohlantirishlar: Sadiki, 21. Mbuku, 45. Mutussami, 62 – Husanov, 43. Nasrullayev, 48
Ushbu guruhning parallel uchrashuvida Kongo DR va O‘zbekiston uchinchi o‘rin uchun bahs olib borishdi. Fabio Kannavaro dastlabki ikki o‘yinda yutqazgan, ammo nazariy jihatdan pley-off uchun imkoniyat saqlab qolgandi. Buning uchun osiyoliklar o‘z o‘yinida imkon qadar yirik (7 to‘p farqi bilan) hisobda g‘alaba qozonishi va boshqa guruhlardagi natijalarga qarashi kerak bo‘lardi. Afrikaliklarni esa har qanday hisobdagi g‘alaba qoniqtirardi va jamoa 4 ochko bilan keyingi bosqichga chiqishi aniq edi.
O‘yinda hisobni O‘zbekiston ochdi – 10-daqiqadayoq Eldor Shomurodov turnir guruh bosqichidagi eng chiroyli gollardan birini urdi. Ikkinchi bo‘limda esa Kannavaro shogirdlari butkul himoyaga yotib olishdi, ammo hisobdagi ustunlikni saqlab qola olishmadi. Avvaliga Husanov penaltiga sababchi bo‘ldi va Vissa muvozanatni tikladi. Biroz o‘tib raqibning Husanov qo‘riqlashi kerak bo‘lgan hujumchisi osonlik bilan ikkinchi golni urdi. O‘yinga qo‘shib berilgan daqiqalarda esa o‘zbekistonliklar jarima maydonida yuzaga kelgan parokandalikdan foydalangan Vissa dublni rasmiylashtirdi – 3:1.
Endi kongoliklar keyingi bosqichda Angliya bilan o‘ynaydi. O‘zbekiston esa turnirni uchta mag‘lubiyat va o‘tkazilgan 11 ta gol bilan yakunladi – bu 2026 yilgi mundialning eng yomon ko‘rsatkichlaridan biri. Qolaversa, bu o‘yinda Kongo ochko yo‘qotishiga umid qilgan Janubiy Koreya esa uch ochkosi bilan guruhda qolib ketdi.
Inglizlar masalani hal qilishdi
Panama – Angliya 0:2
Gollar: Bellinghem, 62 (0:1). Keyn, 67 (0:2)
Panama: Moskera, Kordoba, Eskobar, Andrade, Guterres (Deyvis, 88), Murilio, Barsenas (Dias, 71), Harvi (Kintero, 88), X. Rodriges (Londonio, 71), Martines, T. Rodriges (Faxardo, 46)
Angliya: Pikford, Konsa, Geyi, O`Rayli, Kuansa (Spens, 63), Anderson (Henderson, 84), Bellinghem (Eze, 71), Rodjyers, Reshford, Saka (Madueke, 63), Keyn (Uotkins, 84)
Ogohlantirishlar: Faxardo, 53. Andrade, 83 – Kuansa, 60
Angliya milliy jamoasi birinchi turda Xorvatiyaga qarshi yorqin o‘yin ko‘rsatib, ishonchli g‘alabaga erishgandi (4:2) va jamoa muxlislari Garet Sautgeyt boshqaruvi davridagi zerikarli o‘yinlar ortda qolgani haqida o‘ylay boshlashdi. Ammo bu aldamchi hissiyot bo‘lib chiqdi – ikkinchi turda Ganaga qarshi kechgan o‘yinda britanlar golsiz durangga imzo chekishdi.
Panamaga qarshi o‘yinda Tomas Tuxel shogirdlari yana bir bor o‘zining haqiqiy kuchini namoyish etish talab etilayotgandi. Lekin o‘yinning birinchi bo‘limi yana muxlislar hafsalasini pir qildi. O‘yin «Uch sherlar» ustunligi ostida o‘tgan bo‘lsa-da, raqib bir soatdan ortiq vaqt davomida imkon bermadi. Faqat shundan keyin saviya o‘z so‘zini aytdi: Jud Bellinghem va Harri Keyn besh daqiqa ichida ikki gol urib, Angliyaga ishonchli g‘alaba taqdim etdi.
Endi inglizlarni keyingi bosqichni Kongo DR bilan o‘yin kutmoqda. Panama esa turnirni birorta ochko qo‘lga kiritmagan holda tark etdi.
Xorvatiyada hammasi joyida
Xorvatiya – Gana 2:1
Gollar: Suchich, 31 (1:0). Lyukkassen, 73 (1:1). Vlashich, 83 (2:1)
Xorvatiya: Livakovich, Pongrachich, Shutalo, Perishich, Stanishich, Kovachich (M. Pashalich, 78), Modrich, Suchich, Baturina (Gvardiol, 88), Vlashich (M. Pashalich, 88), Budimir (Matanovich, 66)
Gana: Asare, Ajyeti (Pepra Oppong, 46), Lyukkassen, Mensa, Senayya, Parti, Sibo (Yirenkiy, 85), Ovusu (Fatavu, 46), Sulemana (Tomas-Asante, 71), Semenio, Ayyu (Nuama, 71)
Ogohlantirishlar: Perishich, 68 – Pepra Oppong, 90
Dastlabki turda Angliyadan to‘rtta gol o‘tkazganiga qaramay, xorvatlar o‘sha o‘yinda munosib qarshilik ko‘rsatgandi. Panamaga qarshi o‘yin esa nursiz kechganiga qaramay, muhim ochkolar qo‘lga kiritildi (1:0). Pley-off yo‘llanmasi uchun uchinchi turda Gana bilan o‘yinda kamida bitta ochko qo‘lga kiritilishi kifoya edi.
Xorvatlar birinchi bo‘lib qadam tashlashdi va Petar Suchich birinchi bo‘limdayoq hisobni ochdi. Ikkinchi bo‘lim o‘rtalarida esa Derrek Lyukkassen muvozanatni tikladi, ammo bu hisob ham uzoq saqlanib qolmadi – bir necha daqiqa o‘tib Zlatko Dalich shogirdlari g‘alaba golini urishdi.
Yevropaliklar L guruhida ikkinchi o‘rin bilan 1/16 finalga chiqishdi va pley-offda Portugaliya bilan o‘ynaydigan bo‘ldi. Ganaga esa 4 ochko uchinchi o‘rin egalari orasida sakkizlikka kirish uchun yetarli bo‘ldi – navbatdagi raqib Kolumbiya bo‘ladi.
Guruhlardagi uchinchi o‘rinlar jadvali:
O‘zbekiston tezkor gol bilan hisobni ochgandi, ammo ikkinchi bo‘limda Husanov penaltiga sababchi bo‘ldi va hisob tenglashdi. Qolgan daqiqalarda Kannavaro shogirdlari yana ikkita gol o‘tkazib, mundial bilan xayrlashdi.
Kongoliklar endi Angliya bilan o‘ynaydi
Kongo DR – O‘zbekiston 3:1
Gollar: Shomurodov, 10 (0:1). Vissa, 68 – penalti (1:1). Mayyele, 78 (2:1). Vissa, 90+1 (3:1)
Kongo DR: Mpasi-Nzau, Tuanzebe, Mbemba, Masuaku (Kayyembe, 83), Van-Bissaka, Mutussami (Mukau, 72), Sadiki, Sipenga (Bongonda, 72), Mbuku (Elia, 72), Bakambu (Mayyele, 51), Vissa
O‘zbekiston: Ne’matov, Husanov, O‘rozov (Iskandarov, 82), Ashurmatov, Mozgovoy (Sergeyev, 82), Shukurov (G‘aniyev, 59), Nasrullayev, Alijonov, Hamdamov (Hamrobekov, 59), Fayzullayev (O‘runov, 73), Shomurodov
Ogohlantirishlar: Sadiki, 21. Mbuku, 45. Mutussami, 62 – Husanov, 43. Nasrullayev, 48
Jahon chempionati guruh bosqichidagi yangi formatni ko‘pchilik tanqid qilgandi, lekin uning ijobiy jihatlari ham bor. Shulardan biri – so‘nggi turda turnir motivatsiyasiga ega bo‘lmagan jamoalar kam bo‘ladi. Qatorasiga ikki o‘yinda jami 8 gol o‘tkazib yuborgan O‘zbekiston ham pley-offga chiqish uchun imkoniyat saqlab qolgandi.
Bu imkoniyat juda kichik edi – Kongo DR bilan o‘yindan oldin Opta Fabio Kannavaro shogirdlarining 1/16 finalga chiqish imkoniyatini 0,1 foizga baholayotgandi. O‘zbekistonliklar uchinchi o‘rin egalari orasida sakkizlikka kirish uchun raqibni yetti to‘p farqi bilan mag‘lub etishi va gollar nisbatini yaxshilashi talab etilardi. Shu bilan birga, O‘zbekistonning bu o‘yindagi raqibi ishonchli himoyasi bilan maqtana oladigan jamoa edi – kongoliklar JCh-2026 saralash turnirida 12 uchrashuvda jami 7 gol o‘tkazgandi.
Kannavaro Portugaliyadan uchralgan 0:5 hisobidagi mag‘lubiyatdan keyin yana rotatsiyaga qo‘l urdi, ammo jamoaning asosiy yulduzlari – Husanov, Shomurodov, Fayzullayev – boshlang‘ich tarkibdagi o‘rnini saqlab qoldi. Afrikaliklar ustozi Sebastiyan Desabr ham jiddiy o‘zgarish amala oshirdi – kongoliklar uch markaziy himoyachidan iborat sxemadan voz kechib, 4-4-2 ga o‘tdi. Fransuz murabbiyining qarorini tushunish mumkin edi – Kongo DR pley-offga chiqishi uchun g‘alaba qozonishi talab etilardi.
Bu o‘yinda ikki jamoaga ham g‘alaba kerakligi betaraf muxlislar uchun hujumkor o‘yin va’da qilayotgandi. Amalda ham muxlislar ilk daqiqadayoq gol ko‘rishdi. O‘yinning 30-soniyasidayoq Shomurodov Mpasi-Nzau qo‘riqlayotgan darvozani ishg‘ol etdi, ammo gol ofsayd tufayli bekor qilindi.
O‘zbekiston bu bilan to‘xtamadi va 10-daqiqada yana gol urdi: Mozgovoy to‘pni jarima maydoniga yetkazdi, u yerda Fayzullayev to‘pni teginmay o‘tkazib yubordi va uning bu harakati himoyachilarni chalg‘itdi, Shomurodov esa o‘tkir burchak ostida turganiga qaramay, nozik uslubda zarba berdi va darvozani ishg‘ol etdi.
Ko‘p o‘tmay afrikaliklar javob qaytarishdi: Mbuku jarima maydoni yaqinida to‘pni qabul qilib, chap oyog‘ida to‘qqizlik tomon qaytarib bo‘lmas zarba yo‘lladi. Ammo vaziyatga VAR aralashdi va hujum boshlanayotganda fol ishlatilgani ma’lum bo‘lib, ushbu gol bekor qilindi.
Birinchi bo‘lim o‘rtalarida suv ichish uchun qilingan tanaffusdan keyin kongoliklar o‘ziga keldi va ketma-ket hujumlar uyushtira boshladi, shunday hujumlardan birida Vissa jarima maydoni markazidan zarba berish imkoniyatiga ega bo‘ldi, faqat zarbaga biroz aniqlik yetishmadi.
Bo‘lim oxirida esa o‘zbekistonliklar ikkinchi golni urishga yaqin keldi. 38-daqiqada Hamdamov qanotdan uzatma berdi, to‘p rikoshet bo‘lib, darvozaga kirib ketishiga bir baxya qolgandi, ammo Mpasi qiyinchilik bilan to‘pni qaytarib qoldi. Bo‘limga qo‘shib berilgan daqiqalarda Fayzullayevning jarima zarbasidan keyin to‘p to‘sin yuqorisidan o‘tib ketdi.
Tanaffusdan keyin ko‘p o‘tmay Desabr forvardlardan birini almashtirdi va Bakambu o‘rnini Mayyele egalladi. Lekin ikkinchi bo‘limdagi ilk golli vaziyatni yana Shomurodov yuzaga keldi: ammo bu safar uning zarbasidan keyin to‘p darvoza to‘riga tashqi tomondan tegdi.
Afrikaliklar oldinga tashlanishdi va golga yaqinlasha boshlashdi – avvaliga Ne’matov Mbukuning murakkab zarbasini qaytardi, ammo ikkinchi bo‘lim o‘rtalarida Vissa jarima maydoni ichida Husanovni o‘ziga fol ishlatishga majbur qildi. «Nyukasl» hujumchisi 11 metrdan ideal zarba berdi va hisobni tenglashtirdi.
Suv ichish uchun qilingan navbatdagi tanaffus vaqtida Desabr uchtalik almashtirish qildi – Mukau, Bongonda va Elia kabi yangi kuchlar maydonga chiqib keldi. Ulardan uchinchisi o‘yin taqdirini hal qilgan uzatma muallifiga aylandi, u himoyachilar ortiga tashlab bergan to‘pga birinchi bo‘lib yetib borgan Mayyele to‘pni darvozabon ustidan oshirib, to‘rga joyladi.
O‘yinga qo‘shib berilgan daqiqalarda Elia yana bir muhim uzatma amalga oshirdi, maydon tashqarisiga chiqib ketayotgan to‘pni quvib yetgan (bu vaziyatda barcha, jumladan, himoyachi Alijonov ham shunday o‘ylagan va to‘pni ham, raqibni ham ta’qib qilmaslikni ma’qul ko‘rgandi) futbolchi bu safar Vissaga assistentlik qildi.
3:1 – O‘zbekiston uchinchi o‘yinda ham mag‘lubiyatga uchrab, uyga qaytadigan bo‘ldi. Iroda ko‘rsatgan kongoliklar esa endi pley-offda Angliyaga qarshi kechadigan o‘yinga tayyorlanishni boshlashi mumkin.
Shomurodov JCh guruh bosqichidagi eng chiroyli gol muallifi bo‘lishga da’vogar
Andijonda Malibu piyodalar yo‘lidan o‘tayotgan uch kishini urib ketdi
O‘zbekistonning qaysi hududlarida moliyaviy xizmatlardan ko‘proq foydalanilmoqda?
-
Jamiyat4 days ago«Andijon polkasi» tadbiriga ketayotgan o‘quvchilar YTHga uchradi
-
Sport3 days agoYaponiya futbolining buyuk sabog‘i: mag‘lubiyatdan to‘g‘ri xulosa chiqarish
-
Dunyodan2 days agoQirgʻiziston va Oʻzbekiston chegarani delimitatsiya qilish doirasida hudud almashadilar
-
Dunyodan4 days agoQirg‘izistonda navbatdagi prezidentlik saylovlari qachon o‘tkazilishi ma’lum qilindi.
-
Jamiyat3 days agoVatanparvar jurnalistlarni o‘zimga do‘st va maslakdosh deb bilaman
-
Iqtisodiyot5 days ago
O‘zbekiston banklari aktivlari 962,8 trln so‘mga yetdi
-
Iqtisodiyot4 days ago
Dollar bir necha kunlik ko‘tarilishdan so‘ng pastladi
-
Dunyodan4 days ago
AQSh Senati prezident Trampning Eron bo’yicha vakolatlarini cheklashni qo’llab-quvvatlaydi