Sport
«To‘pni yaxshi ushlab turolmadik» – futbolchilar turnirni tark etgandan keyin nimalar deyishdi?
JCh guruh bosqichi so‘nggi turi doirasida Kongo DR bilan o‘tkazilgan o‘yindan keyin milliy jamoa futbolchilari mikst-zonada turli nashrlar jurnalistlarining savollariga javob qaytarishdi.
Milliy jamoa sardori Eldor Shomurodov «Sport-Ekspress» muxbiri bilan suhbatda bunday darajadagi o‘yinlarda faqat bir jihatda kuchli bo‘lishning o‘zi yetarli bo‘lmasligi haqida gapirgan.
— Katta tajriba orttirdik, ammo afsuski, hech bo‘lmaganda bitta o‘yinda g‘alaba qozona olmadik. Hayot davom etadi. Endi nimaga intilishimiz va qanday rivojlanishimiz kerakligini bilamiz. Jahon chempionatida qatnashdik, ammo buni yaxshiroq amalga oshirishimiz mumkin edi, degan tuyg‘u bor. Natija salbiy bo‘lsa-da, bu turnirdan olib ketishimiz mumkin bo‘lgan ko‘plab ijobiy jihatlar ham bor. Bu turnir biz hali ko‘p narsani o‘rganishimiz va o‘sishimiz kerakligini ko‘rsatdi.
— Nima yetishmadi? Yoki O‘zbekiston jamoasining asl darajasi shumi?
— Ko‘p narsa yetishmadi. Bu yerda barchasi boshqacha. Bu yerda bitta narsada boshqalardan yaxshiroq bo‘lishing yetarli emas, balki barcha jihatlarda kuchliroq bo‘lishing kerak. Shuning uchun, biz barcha jabhalarda qo‘shishimiz kerak. Jamoamizning hozirgi darajasi shu ekan. Jahon chempionatida oddiy o‘yinlar bo‘lmaydi, bu yerda mayda xatolarni ham jazolashadi. Bizga tajriba yetishmadi va endi bu tajriba hosil bo‘ldi.
— Fabio Kannavaro ham matbuot anjumanida tajriba yetishmagani va ikkinchi bo‘limda faqat uzun uzatmalar bilan o‘ynalganini aytdi, bunday o‘ynash oldindan rejada bo‘lmaganmi?
— Ha. Buning ruhiy tomoni ham bor – hisobda oldinda borayotganingda, gol o‘tkazib yubormaslik va hisobni saqlashni istaysan. Va shundan xatolar boshlanadi. Bunday xatolardan biri to‘pni yaxshi ushlab tura olmaganimiz bo‘ldi.
— Jamoa turnirda kutganingizdan yomonroq o‘ynadimi?
— Jahon chempionatiga kelib, Kolumbiya va Portugaliyaga qarshi maydonga tushsang, qiyin bo‘lishini tushunasan. Agar istasang, bunga ijobiy qarashing mumkin. Ammo maydonda boshqa darajaga guvoh bo‘lasan. Biz qo‘limizdan kelganini qildik. O‘ylaymanki, O‘zbekiston futboli bizning bu yerga kelishimizdan ko‘p narsa yutdi. Iste’dodli yoshlarimizni ham kuzatishdi. Endi Yevropada futbolchilarimiz ko‘proq bo‘lishi mumkin.
— Afrika jamoalari bu chempionatda osiyoliklarga qaraganda yaxshiroq ishtirok etishdi. Bu ularning konfederatsiyasi siznikidan kuchliroq deganimi?
— Faqat jismoniy tomondan. Yevropada o‘ynaydiganlar – «fizika» va texnika uyg‘unligi nima ekanini biladi. Kongoliklarning esa barchasi o‘sha yerda o‘ynaydi. Bunday raqibga qarshi doim himoyalanish juda qiyin. Baribir to‘pga egalik qilish kerak edi!
— Ikkinchi bo‘limda jamoangiz hujum qilishni to‘xtatdi, hujumga o‘tganda ham faqat ikki-uch kishi bo‘lib. Bu Fabio Kannavaroning ko‘rsatmasi edimi yoki futbolchilarning tashabbusimi?
— Ha, agar gol ursak, qanday qilib bo‘lmasin hisobni saqlab qolishimiz kerak, degan ruhiy kayfiyat bor edi. Ammo Kongoga ham g‘alaba kerakligi o‘z so‘zini aytdi, bu jamoa jismonan juda kuchli edi. Shuning uchun ular faqat oldinga borishdi va bizni himoyadan o‘ynashga majbur qilishdi. Qolganini o‘zingiz ko‘rdingiz.
Biz to‘pni yaxshiroq ushlab turishimiz mumkin edi. Faqat bir jihatda yaxshi bo‘lish yetarli emasligini aytganimda shuni nazarda tutgandim. Agar siz pressingda yaxshi bo‘lsangiz, ammo to‘p bilan yaxshi ishlay olmasangiz, bu muammo baribir fosh bo‘ladi va buning uchun jazolanasiz. Hammasi tajribaga bog‘liq. Boshqa darajadagi o‘yin sur’atini, bunga odatlangan futbolchilarni ko‘rganingda, buni o‘rganish kerakligini tushunasan.
— Urgan chiroyli golingiz haqida aytib bering. To‘pni darvozabon ustidan «parashyut» qilib tashlash fikri qanday keldi?
— Gol chiroyli chiqdi, ammo bizga yordam bermadi. Gol urish doim yoqimli va o‘shanda hissiyotlar ijobiy edi. Ammo asosiysi – jamoa g‘alabasi, yutqazganimiz tufayli gol zavqi ham butunlay yo‘qqa chiqdi.
— Shunga qaramay, jahon chempionatlaridagi gollaringiz hisobini ochish muhimdir?
— Albatta, men uchun bu muhim. Baribir buni eslab yurasan – har kuni ham jahon chempionatida gol urib yurmaysan. Ammo yutganimizda – yanada yaxshiroq bo‘lardi.
— O‘sha vaziyatda Abbos Fayzullayev to‘pga tekkanmidi? Ya’ni golli uzatmani u berganmi?
— O‘zi to‘pga teginganini aytdi!
— Bu yerdan qandaydir qimmatli futbolka olib ketyapsizmi? Kolumbiya va Portugaliya bilan o‘yinlardan keyin futbolka almashdingizmi?
— Menda futbolka almashadigan kayfiyat yo‘q edi.
— Srechko Katanets, Timur Kapadze bilan taqqoslaydigan bo‘lsak, Kannavaro – jamoaga nima berdi?
— Ko‘p ijobiy narsalar! Bittalab aytib o‘tirmayman, lekin shunisi aniqki, chempionatda u xohlagandek o‘ynash uchun ko‘p vaqtimiz bo‘lmadi. Professional jihatdan u futbolchilarga ko‘p narsa beradi va o‘rgatadi. O‘yin tempini, professionallikni va bunday darajada o‘ynash uchun kerakli bo‘lgan boshqa barcha jihatlarni.
O‘zbekiston milliy jamoasining jahon chempionatlaridagi ilk goli muallifi bo‘lgan Abbos Fayzullayev esa «Chempionat» muxbiriga bergan intervyusida jamoa o‘z darajasida o‘ynay olmadi, deb hisoblashini aytgan.
— Natijaga qaramasdan, orzu amalga oshdi, deyish mumkinmi?
— Jahon chempionatida o‘ynaganimizni nazarda tutadigan bo‘lsak – ha. Ammo bu yetarli emas. Men g‘alaba qozonishni xohlayman. Biz esa buni uddalay olmadik. Umid qilamanki, keyingi jahon chempionatiga chiqamiz va o‘z g‘alabalarimizni qo‘lga kiritamiz. Hozir esa juda charchadim.
— Yaxshiroq o‘ynashingiz mumkinmidi? Yoki bu maksimummi?
— Yo‘q, bu maksimum emas. Biz nimaga qodirligimizni, qanday futbol o‘ynay olishimizni bilaman. Shunchaki bu yerda buni ko‘rsata olmadik.
Milliy jamoa himoyachisi Rustam Ashurmatov ham «Sport-Ekspress» muxbiriga bergan intervyusida jamoa bundan yaxshiroq natija qayd etishi mumkin bo‘lganini ta’kidlagan.
— Yaxshiroq o‘ynashimiz mumkin edi va biz, albatta, xafamiz. Biz birinchi jahon chempionatini orzu qilardik – lekin, albatta, shunchaki o‘ynashni emas, balki ochko to‘plash va g‘alaba qozonishni ham istardik. O‘xshamadi. Sabablar juda ko‘p va hozir ular haqida xolisona gapirishga hali erta. Shunisi aniqki, qaysidir pallalarda noto‘g‘ri harakat qilindi. Bu bizning birinchi jahon chempionatimiz va bu biz uchun saboq bo‘lishi kerak.
— Qaysi o‘yin barchasidan alamliroq bo‘ldi? Kolumbiya bilan o‘yinda hisobni tenglashtirgandingiz, bugungi o‘yinda hisobda oldinda bordingiz…
— Barchasi alamli. Kolumbiya bilan o‘yinda durang o‘ynashimiz, bugun g‘alaba qozonishimiz mumkin edi. Biz bu jahon chempionatini juda uzoq vaqt – 34 yil kutgandik! Ammo o‘xshamadi – hech bo‘lmaganda bitta ochko qo‘lga kirita olmadik.
— Kongo DR bilan o‘yinning birinchi bo‘limini juda yaxshi o‘tkazgandingiz, uni yutdingiz. Ikkinchi bo‘limda nima o‘zgardi?
— Biz yaxshi tayyorlangandik, yaxshi boshladik, darhol darvozani ishg‘ol etdik – hisobga olinmagan bo‘lsa ham. Keyin yana gol urdik. Gol urib olganimizdan keyin nimadir o‘zgardi, deb hisoblamayman. Biz shunday o‘ynashda davom etdik. Ammo raqib ham o‘yinga yaxshi tayyorlangandi. Ularga g‘alaba kerak edi va gol o‘tkazib yuborishganidan keyin yanada faolroq harakatlanishdi. Shundan keyin barchasi biz xohlaganimizdek kechmadi.
— Kongoliklar darvozasiga juda chiroyli gol urgan sardor Eldor Shomurodov uchun xursandmisiz?
— Albatta, u mening eng yaxshi do‘stim va jamoamiz sardori! U gol urgani, o‘yinda ham, turnirdagi gollari bo‘yicha ham hisobni ochgani zo‘r bo‘ldi. Afsuski, bu g‘alaba qozonishimizga yordam bermadi.
— Kongoliklar bilan o‘yindan keyin Fabio Kannavaro nimalar deyishga ulgurdi?
— Albatta, u ham g‘alabani xohlagandi. Aytishim mumkinki, u biz uchun, jamoa uchun barchasini qildi. Uning xafaligi biznikidan kamroq emas. U barchasini ortda qoldirish kerakligi va oldinda Osiyo chempionati turganini, unga ham tayyorlanishimiz kerakligini aytdi.
— Uch mag‘lubiyat fonida Kannavaro va futbolchilar orasidagi munosabatlar yomonlashmadimi?
— Yo‘q-yo‘q, murabbiylar shtabi bilan barchasi ajoyib. Hech qanday muammo yo‘q.
— Aftidan, muxlislar haqida ham shu gapni aytish mumkin. Uchta o‘yinda ham mag‘lubiyatga qaramay, ular tribualarda qolishdi va sizlar bilan iliq xayrlashishdi.
— Ha, to‘g‘risini aytsam, bu odamni xursand qiladi. Chunki jamoa yutqazganida, ular bizni qo‘llab-quvvatlashdi, bu juda qiyin. Shuning uchun, ularning reaksiyasi – bizga katta ishtiyoq beradi. Ularga jamoani oxirigacha qo‘llab-quvvatlaganlari uchun katta rahmat.
Milliy jamoa hujumchisi Igor Sergeyev xatolar ustida ishlanishini ta’kidlagan.
«Men o‘yin paytida ham aytdim, hozir ham yigitlarga takrorladim, boshni egmaslik kerak. Ha, alamli, ha, yoqimsiz. To‘g‘ri, bu hammaga, bizga ham, yaqinlarimizga ham, butun mamlakatga ham og‘ir. Lekin oldinga harakat qilamiz, ishlaymiz, taslim bo‘lmaymiz. Menimcha, endi ikki-uch barobar ko‘proq mehnat qilamiz», – deya uning so‘zlarini keltiradi Gazeta.
U o‘yindan keyin Fabio Kannavaro kiyim almashtirish xonasida futbolchilarga nima degani haqidagi savolni ochiq qoldirgan: «Keling, bu jamoa ichida qolsin. Uning ham o‘z xavotir va kechinmalari bor edi. U shunday gaplarni gapirdiki, menimcha, ular kiyim almashtirish xonasida qolishi kerak».
Sergeyev jamoa turnir boshlanishidan oldin ham raqiblarning kuchini yaxshi anglaganini ta’kidladi.
«Biz ham yosh bola emasmiz, raqiblar jiddiy, top-jamoalar ekanini tushunib turgandik. Portugaliya ham, Kolumbiya ham, o‘sha Kongo ham. Negadir hamma ularni hisobdan chiqarib qo‘ygandi, lekin biz videolarini ko‘rgandik. Juda yaxshi shakllangan jamoa. Umidlarimiz katta edi, kamida guruhdan chiqishni ko‘zlagandik. Ammo nima bo‘lgan bo‘lsa, bo‘ldi», – deydi u.
Uchta mag‘lubiyatdan keyin bo‘lishi mumkin bo‘lgan tanqidlar haqida gapirarkan, hujumchi jamoa ilgari ham bunday salbiy munosabatni boshdan kechirganini aytib o‘tdi.
«Norozi bo‘ladigan odamlar topiladi. Futbolni tushunmaydigan, shunchaki, tomosha qilib, yutishimizni xohlaydigan odamlar ham bor. Men ularni tushunaman. Jamoada bizni rosa tanqid ostiga olishgan paytlar ham bo‘lgan. Lekin biz o‘syapmiz va jahon chempionatiga chiqdik. Bunday salbiy qarashlar esa o‘tib ketadi», – dedi Sergeyev.
Uning so‘zlariga ko‘ra, hozir milliy jamoani avvalgidan ko‘ra ko‘proq qo‘llab-quvvatlashmoqda.
«Baribir, yutqazayotganimizga qaramay, bizni qo‘llab-quvvatlayotganlar ko‘p. Tariximizda ilk bor jahon chempionatiga chiqqanimizning o‘zi juda yaxshi natija. Bu xalq uchun, futbolga qiziqmaydigan, uni doim tomosha qilmaydigan va futbolning ichki olamidan xabari yo‘q insonlar uchun ham juda katta ijobiy turtki bo‘ldi», – dedi u.
Hujumchi Portugaliya bilan o‘yindagi natija umumiy taassurotga soya solganini tan oldi.
«Beshta to‘p o‘tkazib yuborish – bu ko‘p, albatta. Lekin salbiylik ko‘rishni xohlagan odam, doim salbiylik topadi. Ijobiylikni ko‘rishni istagan odam esa, har doim yaxshilikni ko‘ra oladi. Ha, yutqazdik, lekin yomon tajriba ham tajriba. Bundan ham xulosa chiqarib, o‘rganish mumkin va faqat oldinga harakat qilish kerak», – deya ta’kidladi Sergeyev.
Kelajakdagi maqsadlar haqida gapirarkan, Sergeyev milliy jamoa jahon chempionatidagi debyutdan so‘ng ortga qadam tashlamasligi kerakligini ta’kidladi.
«Mening shaxsiy [umidlarim] — ortga qadam tashlamaslik. Qanday rivojlangan, qanday yo‘l bosgan bo‘lsak, mayli sekin, mayli kichik qadamlar bilan bo‘lsa ham, xuddi shunday oldinga harakat qilishda davom etishimiz kerak. Ushbu jahon chempionatida nimalarga qodirligimizni ko‘rsata olmadik. Xatolar bo‘ldi. Endi keyingisiga chiqishga harakat qilishimiz, bu yerga shunchaki bir marta tasodifan kelib qolmaganimizni, balki har safar barqaror ravishda yo‘llanma olishimizni isbotlashimiz kerak. Keyin esa guruhdan ham muntazam chiqishga intilishimiz lozim», – dedi u.
U bunday maqsadlar ambitsiyali ko‘rinishi mumkinligini, ammo jamoa bosqichma-bosqich harakat qilishi kerakligini qayd etdi. «To‘g‘ri, bu biroz katta rejalardek tuyulishi mumkin, lekin mahalliy chempionatimiz ham o‘sishi, biz ham oldinga ketishimiz uchun qadamma-qadam harakat qilish lozim. Men aynan shuni xohlayman. Shunchaki jahon chempionatiga chiqdik, keldik, katta rahmat, endi yana 30 yil kutamiz, degan narsa bo‘lmasligi kerak. Mana shuni istamayman», – dedi Sergeyev.
Hujumchi Osiyo kubogida O‘zbekiston milliy jamoasi oldiga ancha yuqori vazifalar qo‘yilishi lozimligini qayd etgan. «Osiyoda vazifalar biroz boshqacha va menimcha, u yerda chempionlik uchun kurashish qo‘limizdan keladi», – deya ta’kidladi u.
30 iyun kuni kechqurun va 1 iyul tongida jahon chempionati 1/16 bosqichi doirasida Kot-d’Ivuar – Norvegiya, Fransiya – Shvetsiya hamda Meksika – Ekvador juftliklari ishtirokidagi o‘yinlar bo‘lib o‘tadi.
Kot-d’Ivuar – Norvegiya
30 iyun, 22:00. AT&T Stadium, Arlington
Bu jamoalar o‘yinida kurash, hujumlar va gollar ko‘p bo‘lishini taxmin qilish mumkin. Skandinavlar jamoasi ustozi Stole Solbakken Kot-d’Ivuar – bu safargi jahon chempionatining jismoniy jihatdan eng kuchli jamoalaridan biri ekanini e’tirof etdi. U bilan bahslashish qiyin, afrikaliklarda kuchli himoya chizig‘i, Pepe, Diallo va Diomande qiyofasida kuchl qanotlar mavjud. Fil suyagi qirg‘og‘i jamoasi guruh bosqichida Ekvador va Germaniya bilan o‘yinlarda teng kurash taklif etib, bu o‘yinlarda 4 ochko oldi, Kyurasaoga qarshi o‘yinda esa ortiqcha kuch sarflamasdan g‘alaba qozondi va o‘z tarixida ilk bor pley-offga chiqdi. Aynan ushbu jamoa turnir kashfiyotiga aylanishi mumkin.
Ammo Solbakken aynan pley-offning birinchi o‘yiniga kuch tejash uchun guruh bosqichining so‘nggi turida Fransiyaga qarshi kechgan bahs uchun ikkinchi tarkibni tashladi va Norvegiyaning asosiy tarkibi a’zolari jismoniy tayyorgarlik borasida raqibdan ortda qolmasligi tayin. Jamoa hujum chizig‘i vakillari – Holand va Nusa tezkor qarshi hujumlarda foydalanishga tayyor turadi. Qolaversa, norveglar jamoasida bir-birini tushunib o‘ynashda muammo yo‘q, jamoa sardori Edegorning nostandart qarorlari esa o‘yin taqdirini hal qilishi mumkin. Bundan tashqari, skandinavlar turnir davomida o‘zini juda kamtarona tutmoqda – Senegal bilan o‘yinda pley-off masalasi muddatidan oldin hal qilinganidan keyin Holand futbolchilar o‘zidan favorit yasab olmasligi kerakligini aytgandi.
Umuman, bu oqshom ikki jamoadan birining g‘alabasi sensatsiya sifatida baholanmaydi, bu jamoalardan biri keyingi bosqichda Braziliya bilan o‘yinda sensatsiya qilishi mumkin.
Fransiya – Shvetsiya
02 iyul, 02:00. New York/New Jersey Stadium, Nyu York
Shvetsiya guruhni barqaror o‘tkaza olmadi va ikkinchi turda Niderlandiya bilan o‘yinda og‘riqli mag‘lubiyatni qabul qilib oldi (1:5). Grem Potter ushbu o‘yinda niderlandlarning qanotlariga bo‘sh hududlar taqdim etib, taktik jihatdan muvaffaqiyatsizlikka uchradi. Kuchli vingerlarga ega bo‘lgan Fransiya bilan bunday xatoni takrorlash halokatli tus olishi tayin. Qolaversa, jamoaning asosiy himoyachilaridan biri Xiyen jiddiy jarohat oldi va bu skandinavlar jamoasi uchun juda yomon xabar. Boshqa tomondan, shvedlar himoya chizig‘ini yuqori o‘rnatadigan fransuzlarni qarshi hujumlarda jazolashi mumkin, buni guruhning birinchi turida Senegal ko‘rsatib bergandi. Shvetsiyaning hujumdagi asosiy qurollari Yokeresh, Elanga va Isak tezkor futbolchilar bo‘lib, himoyachilar ortiga ochilishni juda yaxshi uddalashadi.
Shuning uchun Fransiya bosh murabbiyi Dide Desham Saliba tezroq tiklanishini, Rabio, Kone va Tchuameni (ulardan ikki nafari boshlang‘ich tarkibga kirishi aniq) kabi yarimhimoyachilar maydon markazida ishonchli o‘ynashidan umid qiladi. Uning asosiy kuziri esa – hujum chizig‘idir. Mbappe va Dembele ajoyib sport formasida, Olise ham o‘yindan o‘yinga ochilib bormoqda. Uch ranglilar jamoasida gol urishda muammo bo‘lmasligi tayin, ammo himoya chizig‘iga savollar saqlanib qolmoqda.
Fransuzlar qiyin setkaga tushgandi, lekin bu tomondagi Germaniya va Niderlandiya allaqachon turnirni tark etdi, endi jamoa nimchorakfinalga chiqsa, Paragvay bilan o‘ynaydi, chorakfinaldagi ehtimoliy raqib Marokash va Kanadadan biri bo‘ladi, agar yarimfinalgacha yetib borilsa – Portugaliya, Ispaniya yoki Belgiyadan biri to‘g‘ri kelishi mumkin.
Meksika – Ekvador
1 iyul, 06:00. Estadio Azteca, Mexiko
Meksikaliklar A guruhini ideal ko‘rsatkichlar bilan yakunlashdi: 3 o‘yinda 9 ochko va birorta gol o‘tkazib yuborilmadi. Ammo jamoa bosh murabbiyi Haviyer Agirre shunday muvaffaqiyatli startdan keyin ham o‘yin sifatidan norozi va kuchni 90 daqiqaga taqsimlashda muammolar kuzatilayotganini aytmoqda. Shu bilan birga, turnir mezbonlari pley-offning ilk o‘yinini Mexikodagi «Atsteka» stadionida o‘tkazadi.
Tarkibdagi ijrochilar bo‘yicha meksikaliklar Ekvadordan ortda qoladi, lekin Janubiy Amerika jamoasi guruh bosqichini barqaror o‘tkaza olmagani va pley-offga katta qiyinchilik bilan chiqqanini inobatga olib, jamoalarning imkoniyatlarini teng baholash mumkin. Ekvadorliklar himoyada yaxshi, ammo oldingi chiziqda sifat yetishmayapti. Jamoa dastlabki ikki turda Kot-d’Ivuar va Kyurasao darvozasi tomon o‘nlab zarbalar yo‘llab, birorta gol urolmagandi. Germaniya bilan o‘yinda esa ekvadorliklar oxirigacha harakat qilishdi va iroda ko‘rsatib, g‘alabani ilib ketishdi.
Ushbu juftlik g‘olibi, 1/8 finalda katta ehtimol bilan Angliyaga to‘qnash keladi. Keyingi bosqichga kim chiqsa ham, favoritga qarshi ikkinchi raqam ostida harakatlanishni biladi. Undan oldin esa Meksika ham, Ekvador ham o‘zaro uchrashuvda barcha kuchini maydonga tashlashiga to‘g‘ri keladi. Bu jamoalar ham ikki teng kuchli raqiblardir.
Prezident futbolchilar muhim tajriba orttirgani, aybdorlarni qidirish va ortiqcha his-tuyg‘ular bilan e’tiroz bildirish esa «xalqimizga xos ish emas»ligini ta’kidlagan. Davlat rahbari katta g‘alabalar hali oldinda ekanini aytgan.
Foto: Prezident matbuot xizmati
Prezident Shavkat Mirziyoyev yoshlar bilan uchrashuvda O‘zbekiston milliy jamoasining futbol bo‘yicha jahon chempionatidagi ishtirokiga to‘xtalib o‘tdi.
«Milliy jamoamizning AQSh va Meksika maydonlaridagi o‘yinlarini butun xalqimiz bilan bir tan-u, bir jon bo‘lib, katta his-hayajon bilan kuzatib bordik. Futbolchilarimiz FIFA reytingida 5-o‘rinda turgan Portugaliya, 13-o‘rindagi Kolumbiya hamda ko‘plab futbolchilari Yevropaning yetakchi klublarida to‘p suradigan Kongo jamoalari bilan o‘tkazilgan o‘yinlar orqali o‘ziga tajriba orttirdi, mundial nafasini his qildi desak, to‘g‘ri bo‘ladi. Abbos Fayzullayev va Eldor Shomurodov jahon chempionatidagi ilk gollarini kiritib, xalqimizga xursandchilik bag‘ishladi.
Milliy terma jamoamizning jahon chempionatidagi ishtiroki to‘g‘risida turli fikrlar bildirilmoqda.
Lekin vatanimiz sharafini himoya qilgan terma jamoamiz a’zolariga ortiqcha his-tuyg‘u bilan e’tiroz bildirish, ulardan ayb qidirish xalqimizga xos ish emas. Aksincha, bugun ularni qo‘llab-quvvatlash, ruhini ko‘tarish har qachongidan ham muhim», – dedi prezident.
Katta g‘alabalar hali oldinda ekani, buning uchun futbolni rivojlantirishga yanada keng sharoitlar yaratilishi, bu sohaga investitsiya ko‘paytirilishi ta’kidlandi. Eng avvalo, bolalar futboliga e’tibor kuchaytirilib, mazkur sport umummilliy harakatga aylantiriladi.
Kelasi yilning yanvarida Saudiya Arabistoni maydonlarida o‘tkaziladigan futbol bo‘yicha Osiyo kubogiga tayyorgarlik hozirdan boshlanadi.
«Biz jamoamizga ishonamiz va ushbu musobaqada ham butun xalqimiz bilan qo‘llab-quvvatlaymiz!» – dedi prezident.
Sport
JCh kundaligi. Yaponlarda drama, Marokashda kambek, Paragvaydan sensatsiya Niderlandiya va Germaniya penaltilar seriyasida yutqazib, turnirni tark etdi, Braziliya yurishini davom ettiradi.
JCh kundaligi. Yaponlarda drama, Marokashda kambek, Paragvaydan sensatsiya
Niderlandiya va Germaniya penaltilar seriyasida yutqazib, turnirni tark etdi, Braziliya yurishini davom ettiradi.
Source link
Nemislar Paragvay bilan o‘yinda 120 daqiqa qiynalishdi, penaltilar seriyasida esa Noyyerning seyvi ham yordam bermadi.
Germaniya – Paragvay 1:1
Gollar: Ensiso, 42 (0:1). Havers, 54 (1:1)
Penaltilar seriyasi: Havers – (0:0)(darvozabon). Maurisiu – (0:1). Kimmih – (1:1). Gomes – (1:2). Musiala – (2:2). Galarsa – (2:3). Voltemade – (2:3)(darvozabon). Sanabriya – (2:3)(xato). Amiri – (3:3). Balbuena – (3:3)(darvozabon). Ta – (3:3)(xato). Kanale – (3:4)
Germaniya: Noyyer, Ryudiger (Tiau, 110), Ta, Braun, Kimmih, Pavlovich (Anton, 79), Nmecha (Goretska, 46), Virs (Amiri, 110), Sane (Voltemade, 88), Havers, Undav (Musiala, 63)
Paragvay: Hil, Kanale, Gomes, Alonso (Balbuena, 120+2), Kaseres (Oxeda, 99), Kubas, Bobadilya (Sanabriya, 99), Galarsa, Almiron (Velaskes, 91), Ensiso (Maurisiu, 57), Avalos (Kabalero, 55)
Ogohlantirishlar: Havers, 106. Musiala, 115 – Kubas, 65. Galarsa, 117
Jahon chempionati pley-off bosqichidagi ilk sensatsiya ro‘y berdi. Germaniya milliy jamoasi Paragvay bilan o‘yinda yutqazib qo‘ydi va muddatidan oldin uyga qaytadigan bo‘ldi.
Yulian Nagelsman Deniz Undavni boshlang‘ich tarkibga kiritish orqali syurpriz taqdim etdi. «Shtutgart» hujumchisi guruh bosqichida uchta o‘yinda ham zaxiradan tushirilgan, lekin jamoaning eng yaxshi to‘purari bo‘lib turgandi. Ammo 1/16 final o‘yinida nemislar hujumda Undav – Kay Havers tandemi bilan harakatlandi, Jamol Musiala esa zaxira o‘rindig‘ida qoldirildi.
Guruh bosqichida Kyurasao va Kot-d`Ivuar bilan o‘yinlarda 3 gol va 2 golli uzatma muallifi bo‘lgan Deniz bu o‘yinning 6-daqiqasidayoq hisobni ochishi mumkin edi. Ammo uning bu safargi zarbasi xato ketdi va bu Germaniyaning birinchi bo‘limdagi yagona vaziyati bo‘lib qoldi. Paragvay bosh murabbiyi Gustavo Alfaro kutilganidek «avtobus» qo‘ydi, janubiy amerikaliklar to‘pni raqibga topshirib, 11 kishi bo‘lib himoyalanishdi va nemislarni o‘z jarima maydoniga kiritishmadi.
41-daqiqada esa paragvayliklarning kam sonli hujumlaridan biri gol bilan yakunlandi. Jamoa burchak zarbasini ijro etganida Noyyer to‘pni musht bilan uzoqlashtirdi va nemislar qarshi hujumga o‘tib ketishi mumkin edi, ammo Bobadilya to‘pni olib qo‘ydi va o‘z jamoasining tezkor qarshi hujumini boshlab berdi, bu hujumni Ensiso boshda urilgan gol bilan yakunladi.
Shusiz ham gol urishga qiynalib turgan Germaniyaning vazifasi yanada og‘irlashdi, endi bir emas, ikki gol urish talab etilardi. Bu vaqtda esa tajribali futbolchilar ham qo‘pol xatolarga yo‘l qo‘yayotgandi – Kimmihning xatosidan keyin Noyyer o‘zini ko‘rsatmaganida, Paragvay muddatidan oldin 1/8 final yo‘llanmasini hal qilishi mumkin edi. Bundestim esa bu vaqtga kelib biror marta darvoza sohasiga to‘g‘ri borgan zarba yo‘llamagandi.
Birinchi aniq zarba 54-daqiqada berildi va bu hisobni tenglashtiruvchi zarba bo‘ldi. Virs qanotdan to‘p oshirdi, Havers bosh bilan uni darvozaning olis burchagiga aniq yo‘naltirdi. Bu o‘yin boshidan buyon aniq chiqqan birinchi kross uzatma edi (21 urinishdan).
Paragvayda esa goldan keyin jamoaning asosiy futbolchisi Ensiso jarohat tufayli almashtirishni so‘radi. Lekin u chiqib ketganidan keyin ham Alfaro shogirdlari kurashni davom ettirdi.
70-daqiqada nemislar birinchi golini takrorlashi mumkin edi: Virs yana qanotdan to‘p oshirdi, Havers to‘p uchun kurashda yutib chiqdi va zarba berdi, ammo bu safar darvozabon Orlando Hil hisob o‘zgarishiga yo‘l qo‘ymadi.
O‘yinning asosiy vaqtida durang saqlanib qoldi va jamoalar yana 30 daqiqa davomida g‘olibni aniqlash uchun harakat qilishdi. Germaniya qo‘shimcha bo‘limlarda yana bir gol urishning uddasidan chiqdi, ammo VAR vaziyatga aralashib, darvozabonga fol ishlatilganini qayd etdi. Paragvay esa penaltilar seriyasiga tayyorlandi va bu qaror o‘zini oqladi.
Janubiy amerikaliklarning 26 yoshli darvozaboni Orlando Hil Havers tomonidan yo‘llangan birinchi zarbaniyoq qaytardi. Keyin esa Voltemade ham uni alday olmadi. Paragvay g‘alabaga juda yaqin turganida Noyyer o‘zini ko‘rsatdi: u Sanabriyani xato qilishga majbur qildi, keyin esa Balbuenaning zarbasini qaytardi.
Manuelning bu seyvi kambekni boshlab beradigandek ko‘ringandi, ammo nuqtaga yaqinlashgan Ta to‘pni to‘sin yuqorisidan o‘tkazib yo‘lladi. Shu tariqa, nemislar qatorasiga uchinchi mundialda nimchorak finalga chiqa olmaydigan bo‘ldi. Paragvay esa keyingi bosqichda Fransiya va Shvetsiya juftligi g‘olibiga qarshi bahs olib boradi.
Jamoa bosh murabbiyi Xon Men Bo murabbiy iste’fo berdi – ammo u endi mamlakatda eng ko‘p nafratga sazovor insonga aylandi, mahalliy telekanallar uning yuzini xuddi jinoyatchilarniki kabi «blyur» qilishmoqda. Do‘konlar va restoranlar eshigi oldida uning ichkariga kirishi taqiqlangani yozilgan tablichkalar qo‘yilgan. Mamlakat prezidenti muvaffaqiyatsizlik sabablarini tekshirishga chaqirdi.
Janubiy Koreya milliy jamoasi 2026 yilgi jahon chempionatini tark etishi katta mojaroga sabab bo‘ldi. Jamoa bosh murabbiyi Xon Men Bo iste’fos berdi va fanatlardan uzr so‘radi. Ammo xalq g‘azabidan qochib qutula olmadi: uni prezident Li Je Men ham tanqid qildi, televideniyeda uning yuzini «blyur» qildi, mahalliy tadbirkorlar esa uning o‘z do‘konlari va restoranlariga kirishini taqiqladi.
«Voqea tafsilotlarini sinchiklab tekshirishni so‘rayman»
57 yoshli mutaxassis uchun bu Janubiy Koreya milliy jamoasi boshqaruvidagi birinchi jahon chempionati emasdi. U 2014 yil Braziliyada o‘tkazilgan mundialda ham jamoani boshqargandi: o‘shanda uning shogirdlari Belgiya, Jazoir va Rossiya bilan bir guruhda so‘nggi o‘rinda qolib ketgan.
Xon Men Boni o‘shanda ham ayovsiz tanqid qilishgan, muxlislar aeroportdayoq o‘z e’tirozlarini uning o‘ziga bildirishgandi. O‘n yil o‘tib u qaytdi, ammo bu safar ham o‘xshamadi.
Holbuki Janubiy Koreya turnirni juda yaxshi boshlagan, Chexiya ustidan irodali g‘alabaga erishgandi (2:1). Bunday muvaffaqiyatli startdan keyin Meksika va JARga qarshi ikki o‘yinda ham mag‘lubiyatni deyarli hech kim tasavvur qilmayotgandi. Ammo jamoa bu ikki o‘yinda ham yaxshi o‘ynaganiga qaramay, bir xil 0:1 hisoblarida yutqazdi va jahon chempionatini tark etdi.
Bunday natija uchun Xon Men Boni koreyslar kechira olishmadi. Matbuot anjumanida u jamoa boshqaruvidan ketishi haqida oldindan tayyorlab qo‘yilgan matnni o‘qib berdi.
«Koreya futbolini sevadigan va milliy jamoani qo‘llab-quvvatlaydigan muxlislarimizdan uzr so‘rayman. Biz kutilgan natijalarga erisha olmadik va buning uchun barcha mas’uliyat faqat mening zimmamda», – deya uning so‘zlarini keltiradi Yonhap nashri.
Ammo murabbiy uchun shu bilan mavzu yopilmadi. Uni barcha kulfatlar uchun aybdor deb topishdi – va JAR bilan o‘yinning boshlang‘ich tarkibiga jamoa sardori Son Heung Minni kiritmaganini esga olishdi: yulduzli futbolchi faqat ikkinchi bo‘lim davomida maydonga tushirilgandi.
Jurnalist Nuel Lanzonning yozishicha, Xon Men Bo xavfsizlik nuqtayi nazaridan Janubiy Koreyaga jamoadan alohida holda qaytgan. Hech kim 2014 yilgi tahqirli aksiya takrorlanishini xohlamagan: o‘shanda jamoani kutib olish vaqtida muxlislar murabbiylar shtabi vakillari hamda futbolchilarga qarata shirinliklar va boshqa buyumlarni uloqtirishgandi.
Mahalliy TVda esa allaqachon bosh murabbiyning yuzi xuddi jinoyatchilarniki kabi «blyur» qilinmoqda, do‘konlar va restoranlarda esa «Xon Men Bo kirishi taqiqlanadi» yozuvli tablichkalar paydo bo‘lgan.
Hafsalasizlik va nafrat to‘lqinidan keyin mamlakat prezidenti Li Je Men ham munosabat bildirib chiqdi. U ro‘y bergan hodisa sabablarini o‘rganishni so‘ragan.
«Agar qobiliyatli odamlarni emas, o‘z odamlaringizni afzal ko‘rsangiz va rahbarlik lavozimlariga layoqatsiz odamni tanlasangiz, natija oldindan ma’lum bo‘ladi… Madaniyat, sport va turizm vazirligidan ushbu voqeaning tafsilotlarini sinchiklab o‘rganishni so‘rayman», – deya yozgan ushbu siyosatchi ijtimoiy tarmoqda.
Vazirlik rahbari bunga darhol javob qaytargan.
«Butun xalqning umidi va g‘ururi qayta tirilishi uchun butun futbol ma’muriy tizimida tezkor ravishda keng ko‘lamli islohotlarni amalga oshirish uchun o‘zimni ayamasdan, bor kuchimni ishga solaman», – deya yozdi Chhve Hvi Yen ijtimoiy tarmoqda.
Shotlandiya milliy jamoasida ham iste’fo, ammo u yerda tinchlik
Shotlandiyalik muxlislar ham muvaffaqiyatsizlikdan norozi. Ushbu jamoa ham jahon chempionatini g‘alaba bilan boshlagandi (Haiti 1:0 hisobida mag‘lub etilgan), ammo keyingi turlarda Marokash (0:1) va Braziliyaga qarshi kechgan o‘yinlar (0:3) mag‘lubiyat bilan yakunlandi va jamoa pley-offga chiqa olmadi.
Shotlandiya futbol assotsiatsiyasi saytida bosh murabbiy Stiv Klark iste’foga chiqarilgani haqida press-reliz joylashtirilgan. 62 yoshli mutaxassis futbolchilarga minnatdorchilik bildirgan hamda o‘zidan keyin ishlaydigan murabbiyga omad tilagan.
«Futbolchilar maqtov va tahsinga loyiq va men uchun ularning murabbiyi bo‘lish haqiqiy sharaf edi. Meni qabul qilganingiz uchun rahmat, mendan keyin ishlaydigan murabbiyga omad», – deyiladi matnda.
Shu bilan birga, mamlakat futboli vakillari Stivni himoya qilib chiqishdi. Jamoaning sobiq futbolchisi Kris Boyd ushbu mutaxassis jamoani ikki marta Yevropa chempionatiga olib chiqqanini eslatgan.
«O‘ylaymanki, ko‘pchilik o‘tirib, Shotlandiya milliy jamoasi ilgari qayerda bo‘lganini va hozir qayerda ekanini eslab ko‘rishi kerak. Rostini aytsam, so‘nggi uch-to‘rt kun ichida uning boshiga yog‘ilgan barcha tanqidlar shunchaki sharmandalikdir», — deya Boydning so‘zlarini keltirgan SkySpors.
Shu bilan bir vaqtda, jahon chempionatida ko‘pchilikning hafsalasini pir qilgan Turkiya milliy jamoasi (AQSh, Avstraliya va Paragvy bilan bir guruhda to‘rtinchi o‘rinni egalladi) bosh murabbiy bo‘yicha hech qanday o‘zgarish qilmoqchi emasligi ko‘pchilikni ajablantirdi.
Takvim ma’lumotiga ko‘ra, bosh murabbiy Vinchenso Montella o‘z lavozimini saqlab qoladi.
Deputatlarga «Tashabbusli budjet» loyihalari bo‘yicha yangi imkoniyatlar berildi
Toshkentda YTH oqibatida Lacetti ikkiga bo‘linib ketdi
JCh-2026 anonsi. Mbappe va Holand pley-offda start oladi
-
Dunyodan3 days agoQirgʻiziston va Oʻzbekiston chegarani delimitatsiya qilish doirasida hudud almashadilar
-
Sport4 days agoYaponiya futbolining buyuk sabog‘i: mag‘lubiyatdan to‘g‘ri xulosa chiqarish
-
Siyosat4 days agoPrezident Shavkat Mirziyoyev AQSh Savdo vakili Jeymison Grini qabul qildi
-
Iqtisodiyot4 days ago
Ertaga dollar tushib, yevro biroz ko‘tariladi
-
Dunyodan2 days agoEron Hormuz boʻgʻozi orqali oʻtayotgan kemalarni ogohlantirdi
-
Jamiyat4 days agoVatanparvar jurnalistlarni o‘zimga do‘st va maslakdosh deb bilaman
-
Iqtisodiyot2 days ago“Xohlagan ekinni ekish mumkin” – Yangi tartib fermerga nima beradi?
-
Sport4 days agoDo‘stlar sharafiga Lamin Yamal deb nomlangan bola – jahon futbol yulduzi haqida