Jamiyat
dori qo‘llanilmaganmi yoki tashxis og‘ir bo‘lganmi?
Shofirkon tibbiyot birlashmasi tug‘ruq bo‘limida yangi tug‘ilgan chaqaloqning vafoti atrofida jiddiy bahslar yuzaga keldi.
Videolarda shifoxonada zarur psixotrop dori vositalari litsenziya muammosi sabab qo‘llanilmagani aytilsa, Sog‘liqni saqlash boshqarmasi chaqaloq tug‘ma og‘ir ahvolda bo‘lganini va o‘limga infeksiya hamda nafas yetishmovchiligi sabab bo‘lganini bildirmoqda. Hozirda holat yuzasidan prokuratura tomonidan surishtiruv ishlari olib borilmoqda.
2026-yil 25-may kuni Shofirkon tumani tibbiyot birlashmasi tug‘ruq bo‘limida og‘ir ahvolda chaqaloq dunyoga kelgan. Hodisa ortidan kelib tushgan videolarda shifokorlar va tibbiyot xodimlari tomonidan shifoxonada zarur dori vositalari mavjud emasligini ochiq aytilgan. Ma’lum qilinishicha, chaqaloqda kuchli tutqanoq kuzatilgan, ammo, uni tinchlantirish va miyaga kislorod yetib borishini ta’minlash uchun zarur bo‘lgan psixotrop dori vositasi qo‘llanilmagan. Oqibatda chaqaloqning hayotini saqlab qolishning iloji bo‘lmagan.
Biz bilan suhbatda bo‘lgan bo‘lim katta hamshirasining so‘ziga ko‘ra, birlashmaning yangi binosiga narkotik va psixotrop vositalarni saqlash uchun zarur litsenziya rasmiylashtirilmagan. «Bunga sabab binoning kadastr hujjatlari to‘liq bo‘lmagani»,— demoqda u.
Unga ko‘ra, shifoxona og‘ir bemorlar uchun hayotiy ahamiyatga ega bo‘lgan dorilarni qonuniy tarzda ishlata olmay qolgan.
Videotasvirdagi suhbatga ko‘ra, shifokorlardan biri agar bolani tinchlantiruvchi vosita ruxsatsiz qo‘llanilsa, ular jinoiy javobgarlikka tortilishini aytgan. Hodisa yuz bergan kuni esa shifoxonada kerakli dori mavjud bo‘lsa ham, litsenziya muammosi sabab uni ishlatishga hech kim jur’at qilmagani vaj keltirilgan.
Videolarda aytilgan yana bir jiddiy holat: tibbiyot birlashmasining moliyaviy faoliyatiga cheklov qo‘yilgani haqidagi ma’lumotlardir. Fuqarolik sudlari orqali undirilishi lozim bo‘lgan qarzlar sabab Majburiy ijro byurosi tomonidan hisob raqamlariga ta’qiq qo‘yilgani aytilmoqda.
Bundan tashqari, videotasvirda yangi shifoxona binosi obyekti uchun 66 milliard so‘m ajratilgani, ammo, hujjatlar to‘liq rasmiylashtirilmaganini iddao qilingan.
Bo‘lim katta hamshirasi Dilsora Tursunovaning aytishicha, og‘ir ahvolda tug‘ilgan chaqaloqlar 3–5 ball (tiriklik sindromi) bilan tug‘ilgan taqdirda ham o‘z vaqtida to‘g‘ri reanimatsiya va psixotrop terapiya orqali saqlab qolinishi mumkin bo‘lgan.
Videotasvirdagi ayanchli holatlar hech kimni e’tiborsiz qoldirmaydi. Shunga qaramasdan, biz masalaga oydinlik kiritish maqsadida Shofirkon tumani tibbiyot birlashmasi tug‘ruq bo‘limida chaqaloq o‘limi bilan bog‘liq holat yuzasidan Buxoro viloyat Sog‘likni saqlash boshqarmasi bosh mutaxassisi Sanjar Rabiyev bilan bog‘landik. Bosh mutaxassis voqeaga o‘z munosabatini bildirdi.
Ma’lum bo‘lishicha, homilador ayol Iroda Iskandarova tug‘ruq bo‘limiga joriy yilning 24 may kuni yolg‘on tug‘ruq faoliyati bilan kelgan. Kechki soat 20:00 da tug‘ruq faoliyati faollashgan. Ayol partogramma asosida konservativ tug‘ruqqa qo‘yilgan. Tug‘ruq ona chanog‘iga homila boshi nomutanosibligi bilan asoratlangan. Operativ tug‘ruqqa olingan. Chaqaloq 4,500 grda Apgar shkalasi bo‘yicha 3-5 ballga baholangan.
— Chaqaloq akusher genekolog vrach Gavhar Abdug‘afforova hamda neonatolog Xadicha To‘xtayeva tomonidan dunyoga keltirilgan. U og‘ir ahvolda bo‘lgan. Chaqaloqqa tug‘ilgan zahoti birlamchi reanimatsion choralar ko‘rsatilgan. Dinamikada qonda leykotsitoz oshib borgan (infeksiya belgisi), nafas yetishmovchiligi kuchayib borgan. Ikki bor sanaviatsiya xizmati bo‘yicha viloyatdan bosh mutaxassislar neonatolog va reanematologlar tomonidan ko‘rilgan. Shunga qaramasdan, chaqaloqning umumiy ahvoli og‘irlashib, kislorodga bo‘lgan ehtiyoji oshib borib, biologik o‘lim yuzaga kelgan. Chaqaloqda qondagi letskotsitlar soni normada 5-6 ming bo‘lishi kerak, unda esa soat sayin 32 mingdan 64 minggacha ko‘tarilgani tibbiy kartasida qayd qilingan,—deydi Sanjar Rabiyev.
Biz bilan suhbatda bo‘lgan Sog‘liqni saqlash boshqarmasi mas’ul xodimi Feruz To‘layev esa chaqaloqning kasallik tarixi o‘rganilganda, unda psixotrop va narkotik vositalar qo‘llashga ehtiyoj bo‘lmaganini vaj keltirmoqda. Uning aytishicha, homila o‘limiga sabab bo‘lgan holat, taxminan, onadagi gestatsion qandli diabet, homila ichi infeksiyasi. Yanada aniqrog‘i, diagnozni patologo-anatomik tekshiruv xulosasiga ko‘ra, ma’lum bo‘ladi.
—To‘g‘ri, videotasvirdagi holat kuzatuvchida birlamchi xulosani keltirib chiqaradi: ya’ni, go‘yoki, chaqaloqni saqlab qolish uchun ayrim sabablarga ko‘ra, zarur dori vositasidan foydalanilmagan. Yo‘q, aslida, bunday emas. Bo‘lim katta hamshirasi bolaning umumiy ahvolini, og‘irlik darajasini davolovchi shifokor darajasida baholay olmaydi. Vaholanki, chaqaloqning biologik o‘lim holatini tahlil qilish tajribali shifokorlar hamda tibbiy ekspertlar tomonidan amalga oshiriladi. Bo‘lim bosh hamshirasi esa kasallik holatini tahlillar orqali bilmay turib, uni keng jamoatchilik muhokamasiga qo‘ymoqda,—dedi bosh shifokor Aziz Nosirov.
Jurnalist: E’tibor qilgan bo‘lsangiz, videodagi tasvirlardan birida agar bolani tinchlantiruvchi vosita ruxsatsiz qo‘llanilsa, ular jinoiy javobgarlikka tortilishini ham aytib o‘tgan. Siz bevosita ularning ham munosabatlarini inkor etayapsiz…
— Aslida, bu holatni hamshiraning xulosasiga tayanib o‘rganishni to‘g‘ri, deb o‘ylamayman. To‘g‘ri, tibbiyot birlashmasining qaysidir taraf moliyaviy faoliyatiga cheklov qo‘yilgani, bor gap. Ammo, ta’qiq dori-darmonga qo‘yilmagan: shuningdek, oylik ish haqlari ham tenglashtirilgan darajada. Ya’ni, oylik va dori-darmonga ta’qiq qo‘yilmagan. Ishchi guruh xulosasiga ko‘ra, videotasvirdagi siz aytayotgan bu holatda ham chaqaloq ahvoli noto‘g‘ri baholangan. Va aynan, shifokor Homid Soliyev tomonidan noto‘g‘ri talqin qilingan. Bundan tashqari, bevosita bemorning kasallik tarixida tutqanoq sindromlarining qayd etilmagani shifokorning munosabati noto‘g‘ri ekanini isbotlaydi. Litsenziyaning esa o‘ziga yarasha kech qolishi sabablari bor,—dedi Feruz To‘layev.
Feruz To‘layevning ta’kidlashicha, bemorga sog‘likni saqlash vazirligining tegishli buyruq va standartlari asosida tibbiy xizmat ko‘rsatilgan.
Suhbatdoshlarga ko‘ra, holatni o‘rganish uchun Sog‘liqni saqlash boshqarmasiga aloqador bo‘lmagan mustaqil mutaxassislar (neoreanematologlar tomonidan ko‘rsatilgan sanaviatsiya xizmati) jalb qilingan. Ekspertlar keltirilib, chaqaloqning ahvoli va ko‘rsatilgan tibbiy yordam qayta tahlil qilingan.
Mas’ul xodim videoda bayon etilgan «psixotrop dori bo‘lmagani uchun chaqaloq vafot etdi» degan iddaolari to‘liq tasdig‘ini topmaganini bildirdi.
— Bolaga, umuman, psixotrop kerak bo‘lmagan, og‘riqsizlantirish ham talab etilmagan, — dedi u.
Bosh shifokor Aziz Nosirovning ta’kidlashicha, bu xulosalar ekspertlar fikri va tibbiy hujjatlar bilan asoslangan.
Sog‘liqni saqlash boshqarmasi va ekspertlar fikricha, chaqaloqqa psixotrop dori qo‘llashga ehtiyoj bo‘lmagan. Ular o‘lim sababini ehtimoliy gestatsion qandli diabet va homila ichi infeksiyasi bilan izohlamoqda.
***
Shu tariqa, Shofirkondagi chaqaloq o‘limi bo‘yicha ikki xil qarash yuzaga kelmoqda: biri – litsenziya va dori muammosi hal qiluvchi omil bo‘lganini aytsa, ikkinchisi – bolaning tug‘ma og‘ir ahvolda tug‘ilganini sabab sifatida ko‘rsatmoqda.
Hozirda mazkur holat yuzasidan Shofirkon tuman prokuraturasi tomonidan tergovga qadar surishtiruv ishlari davom ettirilmoqda. Bu haqda «Xabar.uz»ga prokuratura axborot xizmati Dilshod Safarov ma’lum qildi.
Mavzuga qaytamiz.
Prezident Shavkat Mirziyoyev mahalla bankirlari ish tizimi tubdan o‘zgarishini ma’lum qildi. Endi bir bankirga ko‘pi bilan uchta mahalla biriktirilib, biznes faolligi, yangi ish o‘rinlari va aholi daromadini oshirish bo‘yicha KPI belgilanadi. Shuningdek, banklarga har bir mahallaning “o‘sish nuqtasi”ni aniqlash va daromadli loyihalarni ko‘paytirishni buyurdi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Yig‘ilishda mahalla bankirlarining ish uslubi ham tubdan o‘zgarishi belgilandi. Ta’kidlanishicha, joylarda yaxshi tajribalar bor. Masalan, Angor tumani Yangiobod mahallasidagi 2 kilometr zovur usti yopilib, 110 ta servis obekti ishga tushirildi. Natijada mahalla atrofida yashaydigan 1 ming 225 nafar odam ishli va daromadli bo‘ldi.
Arnasoy tumanidagi Baxtli mahallasining bankiri 20 ta xonadonga 50 million so‘mdan kredit ajratib, mehmon uylarini ishga tushirdi. Har bir xonadon bir mavsumda 100 million so‘mgacha daromad olmoqda. Ish yurishib ketgani uchun yana 80 ta oila shunday mehmon uylari tashkil qilishga kirishdi.
Endi banklar har bir mahallaning “o‘sish nuqtasi”ni aniqlab, tashabbuskorlarni topishi va daromadli loyihalarni ko‘paytirishi zarur. Bundan buyon bitta mahalla bankiriga ko‘pi bilan uchta mahalla biriktiriladi.
Ikki haftada tashabbuskor, zamonaviy fikrlaydigan oliygoh bitiruvchilari va yosh mutaxassislar orasidan 400 nafar yangi mahalla bankiri tanlab olinadi. Ular bir oy davomida namunali mahallalarga olib borilib, tajriba o‘rganadi.
Joriy yil oilaviy tadbirkorlik loyihalari uchun qo‘shimcha 2 trillion so‘m imtiyozli resurs berildi. “Og‘ir” mahallalar uchun kredit stavkasi 17,5 foizdan 12 foizga tushirildi.
Endi mahalla bankirlari o‘zi topgan loyihasi uchun ushbu resursdan foydalanishi mumkin bo‘ladi. Bu tizimni 1 avgustdan amaliyotga joriy etish vazifasi qo‘yildi.
Mahalla bankirlariga biznes faollikni oshirish, tadbirkorlik, ish o‘rni va aholi daromadini ko‘paytirish bo‘yicha KPI belgilanadi. Tuman va shahar hokimlari mahalla raislari bilan birga har bir mahalla bankiriga yil yakunigacha aniq buyurtma shakllantirib beradi.
Davlat banklari bu yil 100 tadan mahallani ixtisoslashtirish tashabbusi bilan chiqqan. O‘tgan yili 9 ta davlat banki ishtirokida mahallalarda agrosanoatni rivojlantirish uchun “Agrostar” kompaniyalari tashkil qilingan edi.
Endi banklar mahallani ixtisoslashtirish bilan cheklanib qolmasdan, “Agrostar”larni jalb qilgan holda “yetishtirish – qayta ishlash – saqlash – qadoqlash – sotish” zanjirini yaratadi. Bir oyda dastur qilib, 1 mingta mahallada ish boshlash topshirildi.
Prezident Shavkat Mirziyoyev mahalla raislariga yangi vakolatlar berilishini ma’lum qildi. Endi ular hududda xususiy bog‘cha, maktab, klinika va sport inshootlari qurish uchun yerlarni auksionga chiqarish, shuningdek, “mahalla yettiligi” ishini muvofiqlashtirish huquqiga ega bo‘ladi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalarda soliq tushumlari, jinoyatchilikni jilovlash va aholi muammolarini hal etish bo‘yicha mas’ullarga savollar qo‘yildi. Davlat rahbari mahalla odamlar uchun chinakam “ishonch, tayanch va imkoniyatlar markazi” bo‘lishi zarurligini ta’kidladi.
Yangi Quva mahallasi misolida aholini ish bilan ta’minlash va daromadini oshirish bo‘yicha yangi tartib ko‘rsatib o‘tildi. Ushbu mahallada 51 nafar ishsiz fuqaro bor, ularning 4 nafari agrotexnikumni bitirgan va xonadonida 10 sotixdan tomorqasi mavjud.
Mahalla raisi tomorqada gul ko‘chatiga ixtisoslashgan yengil konstruksiyali issiqxona qurish uchun mahalla bankiriga buyurtma beradi. Qolgan ishsiz aholi bo‘yicha ham mahalla raisi kim tadbirkor bo‘lmoqchi, qaysi oila daromadini oshirmoqchi, kimga kredit, uskuna yoki yer kerakligini aniqlab, bankirga aniq vazifa qo‘yadi.
Yangi Quva mahallasida bog‘cha yetishmasligi sabab 50 nafar bola qo‘shni mahallaga qatnayapti, hududda esa 70 sotix bo‘sh yer bor. Shu munosabat mahallalarda xususiy bog‘cha, maktab, klinika va sport inshootlari qurish uchun yerni auksionga chiqarish vakolati ham mahalla raisiga beriladi.
Davlat rahbari mahalla raisi ijtimoiy muammolarni hal qilish, tozalikni ta’minlash va daromadni ko‘paytirishga xizmat qiladigan loyihalarda tashabbuskor bo‘lishi zarurligini ta’kidladi.
Bunday loyihalar uchun “mahalla yettiligi”ga 10 million so‘mdan grant ajratiladi. Agar 8 ming 992 ta mahallaning har birida bittadan shunday loyiha amalga oshirilsa, hududlardagi muhit sezilarli o‘zgaradi. Ushbu maqsadlar uchun jami 240 milliard so‘m resurs shakllantiriladi.
Mahalla raisi o‘z hududining haqiqiy boshqaruvchisi bo‘lishi shart. Buning uchun u hokim yordamchisi, xotin-qizlar faoli, yoshlar yetakchisi, ijtimoiy xodim, profilaktika inspektori, soliqchi va mahalla bankirining haftalik hamda oylik ish rejasini tasdiqlab beradi. Rais “yettilik” a’zolariga aniq vazifa qo‘yib, ulardan so‘rov qilib boradi.
Shuningdek, “yettilik” faoliyatini metodik qo‘llab-quvvatlash va hududdagi muammolarga ilmiy yondashish uchun Mahallani rivojlantirish milliy instituti tashkil etiladi. U “yettilik”ni o‘qitadi, mahallalardagi dolzarb masalalarga ilmiy yechimlar ishlab chiqadi.
Prezident Shavkat Mirziyoyev mahallalar moliyaviy mustaqilligini oshirishga qaratilgan yangi choralarni e’lon qildi. Ularga qo‘shimcha soliq tushumlari va boshqa manbalar hisobidan bu yil 1,6 trillion so‘m, kelasi yildan esa 2 trillion so‘mgacha mablag‘ qoldirilishi rejalashtirilmoqda.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalar budjetini mustahkamlash bo‘yicha yangi tashabbuslar ilgari surildi. Joriy yil mahallalar budjetiga 600 milliard so‘m mablag‘ qolishi reja qilingan edi.
Iyun oyidagi Prezident farmoni bilan mahallada qoladigan yer va mol-mulk solig‘ining ulushi 10 foizdan 15 foizga oshirildi. Sanitariya qoidalarini buzganlik va noqonuniy qurilish uchun jarimalarning 10 foizi mahallaga tushadigan bo‘ldi.
Shuningdek, 5 ming kvadrat metrgacha bo‘sh binolarni mahallaning o‘zi sotuvga chiqarishiga ruxsat berildi. Buning hisobidan mahallalar budjetiga yana 405 milliard so‘m tushadi.
Endi mahalladagi noturar obektlardan tushgan yer va mulk solig‘ining 5 foizi ham mahallaning o‘ziga beriladi. Bu orqali mahallalar ixtiyorida yiliga yana 400 milliard so‘m mablag‘ qoladi.
Yil davomida eng ko‘p tadbirkorlarni ro‘yxatga olgan, eng ko‘p yangi ish o‘rni yaratgan, tushum darajasi eng yuqori bo‘lgan va eng ko‘p qo‘shimcha soliq bazasi topgan 200 ta mahallaga 2 milliard so‘mdan mukofot beriladi.
Umuman, yangi tashabbuslar hisobiga mahallalar budjetiga tushum bu yil 1 trillion 600 milliard so‘mga, kelasi yildan esa 2 trillion so‘mga yetadi.
Prezident Shavkat Mirziyoyev mahallalarda obodonlashtirish ishlarini umummilliy harakatga aylantirish va eng namunali mahallalarni soliq imtiyozlari bilan rag‘batlantirishni taklif etdi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Ta’kidlanishicha, har bir viloyat hokimi, uning o‘rinbosarlari va viloyat tashkilotlari rahbarlari bittadan tumanni, tumanlardagi mas’ullar esa bittadan mahallani olib, bir oy davomida ozodalik va obodonlashtirish bo‘yicha keng ko‘lamli ishlarni tashkil etadi.
Mahallada obodonchilik ishlarini tashkil etish bo‘yicha Bosh vazir boshchiligida respublika shtabi tuziladi. Hududiy shtablarga hokimlar rahbarlik qiladi. Bu ishlar bir oylik aksiya emas, balki yil bo‘yi ishlaydigan umummilliy harakatga aylantirilishi zarurligi ta’kidlandi.
Mehnatga yarasha rag‘bat bo‘lishi kerakligi ta’kidlandi. Shu bois, yil yakuni bilan ko‘p qavatli uylardagi “Eng orasta xonadon”, mahalladagi “Eng fayzli hovli”, hududdagi “Eng obod ko‘cha”, tuman va viloyatdagi “Eng namunali mahalla” nominatsiyalari joriy etiladi.
Tanlov g‘oliblari bo‘lgan ko‘p qavatli uylardagi kvartiralar uchun mol-mulk solig‘idan, hovli-joylar uchun esa yer solig‘idan imtiyoz beriladi.
Yaxshi tajriba yaratgan “mahalla yettiligi” mukofotlanadi, ularning ish uslubi boshqa hududlarga namuna qilib ko‘rsatiladi. Mahallalardagi ilg‘or tajribalarni keng yoritish zarurligi ham qayd etildi.
Hududlarda temir yo‘l atrofini obodonlashtirish ishlari boshlangan. Birgina Toshkent – Xiva yo‘nalishidagi temir yo‘l bo‘yida 285 ta mahalla bor, ushbu yo‘nalish 45 ta tumandan o‘tadi.
Qolgan viloyat hokimlariga ham bir haftada hududidan o‘tgan magistral yo‘llar va temir yo‘l bo‘ylari, ular atrofidagi uy-joy va tijorat obektlarini to‘liq xatlovdan o‘tkazish vazifasi qo‘yildi.
Ikki haftada ushbu hududlarni namunali qiyofaga keltirish bo‘yicha katta dastur ishlab chiqib, amaliy natijaga erishish topshirildi.
“Mahalla – xalqqa eng yaqin boshqaruv bo‘g‘ini. Odamlarning kundalik masalalari shu yerning o‘zida, ortiqcha ovoragarchiliksiz hal bo‘lishi kerak”, dedi prezident.
Hozir “yettilik” orqali 100 ga yaqin xizmat ko‘rsatilmoqda. Endi barcha davlat xizmatlari bosqichma-bosqich mahallaga tushiriladi.
Namangan viloyatiga tashrif chog‘ida Norin tumanidagi Yangi Namangan mahallasi misolida samarali tajriba yo‘lga qo‘yilgan. Bu yerda Axborot va xizmat markazi tashkil etilib, 8 ta olis mahalla aholisi uchun bir joyda 980 ta davlat xizmati ko‘rsatilmoqda.
Xovos tumanidagi Qahramon mahallasida ham Vengriyaning “aqlli qishloq” tajribasi asosida shunday markaz tashkil etilmoqda.
Yil yakunigacha Norin va Xovos tajribalarini Qo‘ng‘irot, Konimex, Boysun, Qamashi, Qo‘shrabot, Tuproqqal’a, G‘ijduvon, Forish, Beshariq, Jalaquduq va Ohangaron tumanlarida joriy etish topshirildi. Urganch shahridagi Olimpiya mahallasida yo‘lga qo‘yilgan “aqlli mahalla” tajribasi esa har bir viloyatning 10 tadan mahallasida tatbiq qilinadi.
Jamiyat
Prezident ijtimoiy yordam so‘rayotgan odamlarning arizasi asossiz rad etilayotganini tanqid qildi
Prezident Shavkat Mirziyoyev ijtimoiy reyestrga muhtoj oilalarni asossiz kiritmaslik holatlarini keskin tanqid qildi. Yig‘ilishda yil yakunigacha 25 turdagi ijtimoiy xizmatni mahallalarga tushirish va reyestr yuritilishi ustidan nazoratni kuchaytirish topshirildi.
Foto: Prezident matbuot xizmati
Prezident Shavkat Mirziyoyev raisligida 16 iyul kuni “mahalla yettiligi” faoliyatini yangicha tashkil qilish bo‘yicha ustuvor vazifalar yuzasidan videoselektor yig‘ilishi o‘tkazildi.
Mahallalarda ijtimoiy yordamlar ko‘lamini kengaytirish masalasi muhokama qilindi. Joylarda ijtimoiy reyestrga kiritishni asossiz rad etish yoki sun’iy ravishda reyestrdan chiqarish holatlari uchrayotgani tanqid qilindi.
Oqibatda ehtiyojmand oilalar ijtimoiy yordam olish, farzandini bog‘cha va to‘garakka berish kabi kafolatlangan xizmatlardan foydalana olmayapti. 184 ta mahallada bir oy ichida kelgan 2 ming arizaning barchasi asossiz rad qilingan.
Bunday holatlar Bo‘ston, Oltinko‘l, Xovos, Toshloq, Sharof Rashidov, Uchquduq va Dehqonobod tumanlarida ko‘pligi qayd etildi. Shu sababli reyestrga kirish masalasida prezidentga murojaatlar yil boshidan 1,5 barobar oshib, 30 mingdan 46 mingga ko‘paygan.
Bosh prokuraturaga ijtimoiy reyestr to‘g‘ri yuritilishini qat’iy nazorat qilish, Ijtimoiy himoya milliy agentligi direktorining birinchi o‘rinbosari Shahnoza Mirziyoyevaga reyestr haqqoniyligi yuzasidan prezidentga muntazam axborot berib borish topshirildi.
Mutasaddilar oldiga yil yakunigacha nogironlikni erta aniqlash, xonadonlarni moslashtirish, ijtimoiy uyga joylashtirish kabi 25 turdagi xizmatni mahallaga tushirish vazifasi qo‘yildi.
Uch oyda demensiya va aqliy zaifligi bo‘lgan shaxslar uchun 250 ta mahallada kunduzgi va uyda parvarish xizmati hamda “Madad” uylari, 75 ta mahallada o‘zgalar parvarishiga muhtoj keksalar uchun “Faol hayot” dasturi, shuningdek, qarovsiz qolgan va zo‘ravonlikka uchragan bolalar uchun “Qo‘llab-quvvatlash markaz”lari tashkil etiladi.
Prezident banklarga har bir mahallada daromadli loyihalarni ko‘paytirishni buyurdi
Mahalla raisiga bog‘cha va maktab qurish uchun yerni auksionga chiqarish vakolati beriladi
Mahallalar budjetiga tushadigan mablag‘lar ko‘paytiriladi
-
Jamiyat5 days agoBektemir tumanida «zakladchik»lar qo‘lga olindi
-
Dunyodan5 days ago
Frantsiyada ko’pchilik qo’rqqan narsa yuz berdi.
-
Siyosat3 days ago
Prezident Shavkat Mirziyoyev Qatar amiriga ta’ziya bildirdi
-
Sport5 days agoAngliya Norvegiyani turnirdan chiqarib yubordi
-
Sport4 days agoInfantino yana JCh ishtirokchilari sonini oshirish g‘oyasi haqida gapirdi
-
Dunyodan5 days ago
NATO 2026-yilda Ukrainaga 70 milliard yevro miqdorida yordam ajratmoqchi
-
Jamiyat4 days agoToshkent metrosiga yana 3 ta zamonaviy poyezd qo‘shildi
-
Sport4 days agoSinner ikkinchi marta ketma-ket Uimbldon chempioni bo‘ldi