Sirdaryo viloyatida Saudiya Arabistonining «ACWA Power» kompaniyasi tomonidan quvvati 1500 MVt bo‘lgan zamonaviy issiqlik elektr stansiyasi foydalanishga topshirilgan.

Energetika vazirligining ma’lum qilishicha, ushbu elektr stansiyasining 2-sonli gaz turbinasida rotor nosozligi kuzatilgan. Stansiya ishini tezkor tiklash maqsadida, investor hamda ishlab chiqaruvchining kafolatli shartnomaviy majburiyatlariga asosan Yaponiyaning «Mitsubishi» kompaniyasida yangi rotor qisqa muddatda tayyorlanib, maxsus reys bilan 8 dekabr kuni Toshkent xalqaro aeroportiga olib kelindi.

Og‘irligi 114 tonna bo‘lgan qurilma aeroportdan to‘g‘ridan-to‘g‘ri elektr stansiyasi maydoniga yetkazildi.

«Barcha jarayonlar tegishli vazirlik va idoralar, investor, pudratchi va texnologik hamkorlar bilan birgalikda amalga oshirildi. Yangi rotorni o‘rnatish va sinov-sozlash ishlari taxminan bir oy vaqt talab qiladi.

Bu quvvatlarni qoplash maqsadida qo‘shimcha zaxiradagi va yangi ishga tushirilyotgan bloklardan foydalanilyapti», – deyiladi vazirlik xabarida.

Yangi rotor gaz turbinasiga o‘rnatilgach, stansiyaning ishlab chiqarish quvvati tiklanadi va elektr ta’minotida vaqtincha ko‘rilayotgan choralarlarning oldi olinadi.

Shuningdek, ayni kunlarda havo bulutli (kam quyoshli) bo‘layotganligi va kunlar qisqaligi hisobidan quyosh fotoelektr stansiyalari orqali elektr energiyasini ishlab chiqarish kamaygani, shu sababli esa ishlab chiqarish va iste’mol balansini tartibga solish, ularning muvozanatini saqlash maqsadida ayrim hududlarning elektr ta’minotida asosan iste’mol ortgan pallalarda (17:00-21:00 lar oralig‘ida) qisqa muddatli uzilishlar kuzatilishi mumkinligi aytildi.

Qo‘shimcha qilinishicha, agar bunga zarurat tug‘ilsa, iste’molchilar oldindan xabardor qilinadi.

Source link

Prezident Shavkat Mirziyoyevning Qishloq xo‘jaligi sohasi xodimlari kuni munosabati bilan soha vakillari bilan muloqotida go‘sht va sut mahsulotlarini ko‘paytirish masalasi ham ko‘tarildi.

Qayd etilishicha, kelgusi yilda chetdan 100 ming bosh qoramol va 200 ming bosh qo‘y-echki olib kelinadi. Paxta va g‘alla yo‘nalishidagi fermerlarga o‘z yerida chorvachilikni yo‘lga qo‘yish uchun 20 sotixgacha joyda yengil konstruksiyali bino qurishga ruxsat beriladi. Import qilingan nasldor qoramol va bir kunlik jo‘ja uchun subsidiya ajratish tartibi yana 5 yilga uzaytiriladi.

Chorvachilik loyihalari uchun keyingi yil Jahon banki va Qishloq xo‘jaligini rivojlantirish xalqaro jamg‘armasidan olib kelingan resurslar hisobidan 157 million dollar yo‘naltiriladi. Ushbu mablag‘lar chorvadorlarga 10 yil muddatga 3 yillik imtiyozli davr bilan 17 foizdan beriladi.

Bunga qo‘shimcha JICAdan 150 million dollar, Osiyo taraqqiyot bankidan 60 million dollar jalb qilinadi. Bu mablag‘larni samarali ishlatib, kelgusi yilda 5 trillion so‘mlik 1 mingta loyihani ishga tushirish, Fransiya tajribasi asosida 167 ta tumanda 340 ta go‘sht va sut yo‘nalishidagi 50-60 boshli kichik chorvachilik xo‘jaliklarini tashkil etish muhimligi qayd etildi.

Source link

Qishloq xo‘jaligi sohasi xodimlari bilan bo‘lib o‘tgan muloqotda davlat rahbari ishning ko‘zini biladigan dehqonlar intensiv bog‘ yaratib, gektaridan 50 ming dollargacha hosil olayotganini ta’kidladi.

«Bunday bog‘larni keskin ko‘paytirish va yerga munosabatni tubdan o‘zgartirish kerak», – dedi Shavkat Mirziyoyev.

Qayd etilishicha, bugun respublikada 90 ming gektar eskirgan va kam hosilli bog‘-tokzorlar bor. Eski bog‘lardan olinayotgan hosil gektariga 10 tonnaga ham yetmaydi. Shu bois, yangi bog‘ va tokzorlarni tashkil qilish, eskilarini yangilash bo‘yicha uch yillik dastur qabul qilinadi.

Prezident bog‘dorchilik xo‘jaliklari uchun qator yangiliklarni e’lon qildi.

Endilikda Agrosanoatni rivojlantirish jamg‘armasidan intensiv bog‘ tashkil qilish uchun 7 yilga 3 yillik imtiyozli davr bilan 14 foizli kredit beriladi. Tadbirkorlik kompaniyasi tomonidan muzlatkichli ombor uchun kredit foizining asosiy stavkadan oshgan 8 foizgacha qismi qoplanadi. Savdoni rivojlantirish kompaniyasi sabzavot eksportchilari va bog‘bonlarga qadoqlash xarajatining 50 foizini kompensatsiya qiladi.

Bundan tashqari, sertifikatlangan ko‘chat sotib olish xarajatining 50 foizi budjetdan to‘lanadi. Meva turiga qarab shpalerlar uchun fermerlarga 20 ming so‘mdan 70 ming so‘mgacha subsidiya ajratiladi.

Paxta va g‘allada bo‘lgani kabi meva-sabzavot yo‘nalishidagi fermerlar uchun ham arzonlashgan narxda o‘g‘it va yoqilg‘i xarid qilish imkoniyati yaratiladi.

Source link

9 dekabr kuni Toshkent shahar Olmazor tumanida avariyaviy holat tufayli Nexia-3 rusumli avtomashina ustunga borib urildi. Hodisa natijasida haydovchiga shifokorlar tomonidan birinchi tibbiy yordam ko‘rsatildi.

Toshkent shahar IIBB YHXB ma’lumotiga ko‘ra, joriy yil 9 dekabr kuni soat 09:00 larda Olmazor tumani Sebzor ko‘chasida Tracker-2 rusumli avtomashina haydovchisi Nexia-3 avtomashinasiga nisbatan avariyaviy xavfli holat yuzaga keltirgan.

Natijada Nexia-3 rulini boshqarish imkoniyatini yo‘qotgan haydovchi yo‘l chetidagi yoritgichlar uchun mo‘ljallangan ustunga borib urilgan va yo‘l-transport hodisasi sodir bo‘lgan.

YTH oqibatida Nexia-3 haydovchisiga shifokorlar tomonidan birinchi tibbiy yordam ko‘rsatilgan.

Mazkur holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.

Huquqni muhofaza qiluvchi organlar barcha yo‘l harakati qatnashchilaridan qoidalarga qat’iy rioya qilish, ayniqsa, zich harakat va tor ko‘chalarda ehtiyotkorlikni yanada oshirishni so‘ragan.

Source link

Qamchiq dovonida noqulay ob-havo sharoiti tufayli qiyin ahvolga tushib qolgan haydovchilar va yo‘lovchilarga Favqulodda vaziyatlar vazirligi qutqaruvchilari amaliy yordam ko‘rsatmoqda. Qor ko‘chkisi xavfi yuzaga kelgani sababli dovon vaqtincha yopilgan.

Qamchiq dovonida mavjud noqulay ob-havo sharoiti – kuchli yomg‘ir va qor yog‘ishi, shamol hamda yo‘lning muzlashi tufayli haydovchilar va yo‘lovchilar uchun harakat qiyinlashgan. Ayrim transport vositalari yo‘lning ayrim qismlarida to‘xtab qolgani, ayrim haydovchi va yo‘lovchilar esa murakkab vaziyatga tushib qolgani xabar qilinmoqda.

Shu munosabat bilan Favqulodda vaziyatlar vazirligi qutqaruv otryadlari dovonda qat’iy tartibda ish olib borib, transport vositalari haydovchilari va yo‘lovchilarga yordam ko‘rsatmoqda. Qutqaruvchilar yo‘l chetida qolib ketgan fuqarolarni xavfsiz hududga ko‘chirish, zarur hollarda issiq ichimlik va birinchi navbatdagi yordamni tashkil etish bilan shug‘ullanmoqda.

Qor ko‘chkisi xavfi yuzaga kelgani sababli Qamchiq dovoni orqali harakat vaqtincha cheklangan. Mutasaddi idoralar tomonidan yo‘l holati doimiy nazoratga olingani, xavfsizlik ta’minlanganidan so‘ng harakat bosqichma-bosqich tiklanishi ma’lum qilinmoqda.

Fuqarolarga beparvo bo‘lmaslik, bekorga yo‘lga chiqmaslik, havo va yo‘l sharoiti haqida rasmiy axborot manbalari orqali berilayotgan ma’lumotlarni doimiy kuzatib borish tavsiya etilmoqda.

Source link