Sport ozuqasi kapsulalari ichiga sintetik narkotiklar joylangani fosh qilindi. Bu haqda Davlat bojxona qo‘mitasi xabar berdi. 

Toshkent xalqaro aeroportida bojxona xodimlari sintetik narkotiklarni go‘yoki biologik faol qo‘shimcha sifatida olib kirishga uringan qo‘shni davlat fuqarosini to‘xtatib qolishdi. 

Bojxonadan «yashil» yo‘lak orqali harakatlangan ushbu shaxsning sumkasida sportchilar ozuqasi sifatida iste’mol qilinadigan 2 quti biologik faol qo‘shimchalar bojxonachilarning diqqatini tortdi. 

Mazkur qutilarga qadoqlangan kapsulalar aslida oq rangda ishlab chiqariladi. Va qadog‘iga ko‘ra, ularda jami 760 dona kapsula bo‘lishi lozim edi. 

Ammo, har ikkala qutidagi jami kapsulalar soni 920 donani tashkil qildi. Boz ustiga, kapsulalar ham oq rangda emas, balki sariq va qizil ranglarda edi. Bu esa qutilarga joylangan kapsulalar qo‘lbola tarzda qadoqlanganini anglatadi. 

Bojxona qo‘mitasi Markaziy bojxona laboratoriyasining ekspert xulosasiga ko‘ra, mazkur kapsulalarga joylangan modda «Alfa PVP» turidagi sintetik narkotik modda ekanligi fosh bo‘ldi. Mazkur giyohvandlik vositalarining qora bozorida chakana narxi 350 ming dolllargacha yetadi. 

Faqatgina shu emas, «Toshkent AERO» Ixtisoslashtirilgan bojxona kompleksi tezkor tuzilmalari tomonidan tadbir Yuqorichirchiq tumanida davom ettirilib, ushbu yo‘lovchi keyinchalik «zakladka» usulida tarqatish uchun mo‘ljallangan giyohvandlik vositasini yashirib ketgan manzil-havola ham aniqlandi. 

Ko‘zdan pana, chet va xilvat joydagi ushbu manzil belgilangan tartibda va xolislar ishtirokida ko‘zdan kechirilganida, 1 dona polietilen paket ko‘mib qo‘yilgani fosh bo‘ldi. Unda esa bir necha bo‘laklarda og‘irligi taxminan yarim kilogram «gashish» moddasi borligi aniqlandi. 

Holat yuzasidan bojxona organlari tomonidan jinoyat ishi qo‘zg‘atildi.

Source link

O‘zbekiston Respublikasi Prezidenti Shavkat Mirziyoyev 15-aprel kuni Rossiya Federatsiyasi Prezidenti Administratsiyasi rahbarining birinchi o‘rinbosari Sergey Kiriyenko boshchiligidagi delegatsiyani qabul qildi.

Uchrashuv avvalida yuqori martabali mehmon davlatimiz rahbariga Rossiya Federatsiyasi Prezidenti Vladimir Putinning salomi va tilaklarini yetkazdi.

O‘zbekiston bilan Rossiya o‘rtasidagi strategik sheriklik va ittifoqchilik munosabatlarini chuqurlashtirish doirasida oliy darajada erishilgan kelishuvlarni amalga oshirish masalalari ko‘rib chiqildi.

Barcha yo‘nalishlarda faol muloqotlar olib borilayotgani mamnuniyat bilan qayd etildi. Tovar ayirboshlash hajmi barqaror o‘sib bormoqda, sanoat kooperatsiyasi bo‘yicha muhim loyihalar amalga oshirilib, madaniy-gumanitar almashinuv kengaymoqda.

Mamlakatimizda birinchi integratsiyalashgan atom elektr stansiyasini qurish loyihasini amalga oshirishga, shuningdek, tinch atom sohasidagi hamkorlikka alohida e’tibor qaratildi.

Raqamli texnologiyalar, yoshlar va axborot siyosati, ommaviy axborot vositalari hamda fuqarolarning tashabbuslarini rivojlantirish borasidagi o‘zaro hamkorlikni faollashtirish yuzasidan kelishuvlarga erishildi.

Source link

Adibning o‘g‘li Habibulla Qodiriy hikoya qiladi.

…Boloxona uyimizda kechki taomdan so‘ng dadam, Rahimberdi, Qudratilla amakilarim choy ichishib, undan-mundan so‘zlashib o‘tirishar edi. Dadam dedilar:
– Kecha meni yozuvchilar soyuziga chaqirishdi…
– Nima yangilik, aka? – deb so‘radilar Qudratilla amakim.
– Hozir soyuzda yozuvchilarni “tozalash”, saragini-sarakka, puchagini-puchakka ajratish ishlari qizg‘in boryapti…

To‘rt-beshta yozuvchilardan iborat komissiya bir yozuvchini chaqiradilar-da, ko‘ngillariga kelgan savolni galma-gal beraveradilar. Bechora yozuvchi sho‘rva ichgan ko‘rday terlab javob qilaveradi. Yozuvchiga bundan ham razolatliroq jazo bormi?
– Masalan, qanday savollar berishadi, aka?
– Nega millatchi bo‘lgansan, yozganlaringda millatchilik ruhi bor, shuni bo‘yningga olasanmi, yo‘qmi?

Sovet hukumatini yoqtirmaysan, falon vaqtda falonchining uyiga borgansan, o‘shanda nimalar haqida gap bo‘lgan, u senga nima dedi, sen unga nima deding, qanday kitob ko‘rsatdi?
Falon vaqtda uyingga falonchilar kelgan, o‘shanda nima to‘g‘risida gap bo‘lgan? Falonchi yosh yozuvchini nima deb ranjitding?.. Shunga o‘xshash bachkana, miji-miji, kovla-kovla gaplar…

– Sizga ham savol berishdimi, aka?
– Berishdi… Anqaboy degani savol berdi: “Sizning kim va qanaqa yozuvchiligingizni bilamiz, savolimiz shu: “Xudo bormi, yo‘qmi?”
Hammalari jim bo‘lib qoldi. “Bor”, dedim.
“Qanday isbot qilasiz borligini?”

Uning e’tiborsiz, yuzaki, mensimaganday bergan savoli g‘ashimni keltirdi:
“Xudo bormi-yo‘qligini isbot qilish o‘ylaganingizcha oson, bo‘yoqchining nili emas. Buning uchun hech bo‘lmaganda, arab, fors, turk, rus tillarini mukammal bilishingiz va bilibgina qo‘ymay, o‘sha tillardagi diniy manbalarni sinchiklab o‘qigan, o‘rgangan, falsafiy mushohada qilgan bo‘lishingiz kerak.

Shundagina diniy munozaraga kirisha olishingiz mumkin. Masalan, “Ixlos” surasini o‘qing-chi, men sizga muqaddima o‘rnida sharh qilib beray!..” dedim.
Anqaboy anqayib qoldi. Rayosatda jim o‘tirgan siyosiy idora vakillari: “Bunaqa masalalarni qo‘yinglar!” deb luqma solishdi.

Rahimberdi amakim dedilar:
– Dilingda bo‘lmasa ham, tilingda “yo‘q” deb qo‘ya qolsang bo‘lardi, uka.
– O‘rislarning shunday zo‘r yozuvchilari borki, e’tiqod bilan yashaydilar va hozir ham balki yasharlar. Ularga hech kim bir narsa demagan, demaydi ham. Axir bu konstitutsiyamizda shunday ko‘rsatilgan, – dedilar. – Endi men bir kishining ikki og‘iz so‘zi deb qirq yillik iymonimdan qaytaymi? Munofiqlik, vijdonsizlik bo‘lmaydimi bu!..»

Bu voqea O‘rta Osiyoga tomon esib turgan bo‘ronlarning biri va ashaddiysi edi.

«Otamdan xotira» kitobidan.

Source link

«O‘zbekiston Respublikasi xalq artisti Farruh Zokirov ijodini keng targ‘ib qilish hamda yosh avlodga munosib yetkazish to‘g‘risida»gi prezident qarori qabul qilindi.

Qarorga ko‘ra, Toshkent shahri Yashnobod tumanidagi 7-sonli bolalar musiqa va san’at maktabiga Farruh Zokirov nomi beriladi.

Maktabda:

– «Yalla» nomidagi bolalar ansambli faoliyati tashkil etiladi;

– Yoshlar ijodiy laboratoriyasi hamda «ustoz-shogird» an’analari asosida estrada yo‘nalishi bo‘yicha ijrochilik mahorat maktabi tashkil etiladi;

– Maktabning ustoz-ijodkorlari Davlat budjeti hisobidan har oyda mehnatga haq to‘lash eng kam miqdorining 5 baravari miqdorida rag‘batlantiriladi;

Yoshlar ijodiy laboratoriyasi doirasida:

– 2026/2027 o‘quv yilidan Qoraqalpog‘iston Respublikasi, viloyatlar va Toshkent shahridan 3 nafardan bolalar musiqa va san’at maktabining iqtidorli o‘quvchilaridan iborat guruh shakllantirilib boriladi hamda ta’til davrida yozgi to‘garakka jalb etilib, estrada xonandaligi bo‘yicha maxsus bepul kurslarda o‘qitiladi;

– 2026/2027 o‘quv yiligacha zamonaviy ovoz yozish va tasvirga olish studiyasi tashkil etiladi hamda u sahna jihoz va liboslari bilan ta’minlanadi;

– Maktab va yozgi to‘garakka jalb qilingan o‘quvchilarning ijod namunalari televideniye va xalqaro onlayn platformalarda namoyish etib boriladi.

Source link

Aktrisa 90-yillarda «Bozor ko‘rmagan yigit» kinonovellasidagi roli bilan tanilgan, shuningdek, 2000-yillardagi «Chol va nabira», «Tilim qursin» kabi filmlar orqali mashhurlikka erishgandi.

O‘zbekiston Respublikasida xizmat ko‘rsatgan artist Dono Boboxonova 15 aprel kuni 80 yoshda vafot etdi. Bu haqda O‘zbekiston davlat drama teatri xabar berdi.

Dono Boboxonova (Danisiya Dayanovna Boboxonova)1946 yil 20 noyabrda Qozog‘iston hududida tug‘ilgan. 1970 yilda Toshkent teatr va rassomlik institutini (hozirgi Mannon Uyg‘ur nomidagi Toshkent davlat san’at instituti) tamomlagan.

Aktyorlik faoliyatini 1968 yilda «Yosh gvardiyachilar» (hozirgi Abror Hidoyatov nomidagi o‘zbek davlat drama teatri) teatrida boshlagan. 1990-yillardan kino sohasiga kirib kelgan. Xususan, «Bechora odamlar» (1992) filmida, shuningdek «Bozor ko‘rmagan yigit» va «Arazlasang, o‘laman» kabi kinonovellalarda rol o‘ynagan.

O‘zbek kino ixlosmandlari uni ko‘proq «Ulfatlar-2» (2008), «Chol va nabira» (2009), «Tilla buva» (2012), «Dadamning sovg‘asi» (2012), «Tilim qursin» (2013), «Vafodorim» (2013), «Kuch birlikda» (2013-2014), «Berlin-Oqqo‘rg‘on» (2018) kabi filmlardagi rollari orqali eslab qolishgan.

«Tilim qursin» filmidan

Dono Boboxonova to‘qqiz nabira va to‘rt evaraning buvisi edi.

U aktrisalik faoliyatidan tashqari she’r yozish bilan shug‘ullangan va 20 dan ortiq she’riy to‘plamlari, bir qancha roman va hikoyalari bosilgan.

1996 yili «O‘zbekiston Respublikasida xizmat ko‘rsatgan artist» faxriy unvoni bilan taqdirlangan.

Source link