Jamiyat
«Xodimlarim soliqchining uyiga kirishdan avval eshikni taqillatishgan» – sobiq IIB boshlig‘i Akmal Xo‘jayev ko‘rsatmasi tinglandi
Furqat tumani IIB mansabdorlari ustidan 25 noyabr kuni bo‘lib o‘tgan navbatdagi sud majlisida Akmal Xo‘jayev va uning o‘rinbosari bo‘lgan Jasur Rasulov ko‘rsatmalari tinglandi. Sobiq IIB boshlig‘i «tezkor tadbir» qonuniy bo‘lganini aytmoqda.
Kecha, 25 noyabr kuni bo‘lgan sud majlisida Furqat tumani sobiq IIB boshlig‘i Akmal Xo‘jayev hamda uning o‘rinbosari Jasur Rasulovning ko‘rsatmalari tinglandi.
“17 aprel kuni (tadbir bo‘lgan kun) Farg‘ona shahrida tadbirda edim. Tadbirni tamomlab, soat taxminan 15:00-16:00 lar chamasida Furqat tumaniga qaytayotganimda yo‘lda telegramimga qo‘ng‘iroq bo‘lib, soliq rahbari xizmat uyiga voyaga yetmagan maktab o‘quvchisini olib kirib ketgani haqida xabar kelib tushdi. O‘rinbosarim Jasur Rasulovga qo‘ng‘iroq qilib, holatdan uni xabarbor qildim va vaziyatni o‘rganishni buyurdim.
Shundan so‘ng Jasur Rasulov xodimlarini olib xizmat uyiga kiribdi. U yerda soliq boshlig‘i va maktab direktorini qip-yalang‘och holatda ko‘rishibdi. So‘ng ikkisini IIB binosiga olib kirishibdi. Voyaga yetmagan qiz kim ekan deb so‘rasam, 29-maktab direktori ekan, deyishdi. Xodimlarim tezkor tadbir uchun qilingan qarorlarni ham ko‘rsatishdi. Qo‘llarida qarori bor ekan.
Soliq boshlig‘i Qurbonali Abdurahmonov xizmat uyini fohishaxonaga aylantirvorgandi. Voyaga yetmagan qizni uyiga olib kirib ketyapti degan xabar kelgani uchun tezkor tadbirga ruxsat berganman. Davlatimiz tomonidan berilgan xizmat uylarida prokuror, prokuror yordamchisi, soliq boshlig‘i va men yashardim (ushbu amaldorlarga xizmat uylari bir joydan berilgan – tahr). Soliq inspeksiyasi boshlig‘i Qurbonali Abdurahmonovni xizmat uyingga begona ayollarni olib kirmagin, deb ko‘p marotaba ogohlantirgan edim.
Furqat tumaniga yetib kelib, IIB binosiga kirib, Gulira’no Qosimova va Qurbonali Abdurahmonovni ko‘rdim. Ular yonimga kela olishmadi. IIB binosida turib viloyat Soliq boshqarmasiga bo‘lgan holat haqida xabar berdim.
Xodimlarim soliqchining uyiga kirishdan avval eshikni taqillatishgan ekan. Ichkaridan xabar bo‘lmagach, undan keyin kirishgan xizmat uyiga. 2-qavatga chiqishsa, ikkisi jinsiy aloqa qilayotgan ekan.
Oradan 3 kun o‘tib, IIBga Qosimova va uning turmush o‘rtog‘i keldi. Gulira’noning turmush o‘rtog‘i ayoli tufayli gap-so‘z tarqagani, ko‘chada bosh ko‘tarib yura olmayotgani, o‘sha kungi telefonga olingan kadrlarni berishini so‘radi. Unga javoban Gulira’no yaxshi ayol ekani, anglashilmovchilik bo‘lganini aytib, turmush o‘rtog‘ini yupatishga harakat qildim.
“Eltuz” ijtimoiy tarmog‘ida men haqimda ma’lumotlar chiqdi. Hamma aybni menga yuklashdi. Gulira’no ijtimoiy tarmoqqa chiqib, “yechintirib urishdi, 2-qavatga olib chiqib urishdi” deyapti. Bularning barchasi tuhmat. Gulira’no va Qurbonaliga adovatim yo‘q. Qurbonaliga televizor yoki tefal olib ber demaganman.
Viloyat prokuraturasi biror bir ko‘rsatmalarimni inobatga olmadi. Hamma harakatlarimiz, tezkor tadbir qonuniy bo‘lgan. Gulira’no Qosimovaga kimdir o‘rgatyapti. Tadbir avvaldan reja qilingan deyishyapti. Bu ham tuhmat. Dori ichib, o‘z joniga qasd qilgan deyishyapti. Bu holat ham shubhali”, dedi o‘z ko‘rsatmasida sobiq IIB boshlig‘i Akmal Xo‘jayev.
Akmal Xo‘jayev ko‘rsatmasidan so‘ng prokuror sobiq IIB boshlig‘iga ko‘rsatmasi yuzasidan savollar berdi. Lekin Akmal Xo‘jayev bo‘lib o‘tgan holat bo‘yicha barcha ko‘rsatmalarni berib bo‘lgani, prokurorning savoliga javob bermasligini bildirdi va o‘z advokatining savollariga javob berish bilan kifoyalandi.
Shundan so‘ng IIB boshlig‘i o‘rinbosari Jasur Rasulovning ko‘rsatmasi tinglandi:
“Aybimga iqror emasman. 18 yildan beri IIBda ishlayman. Furqat tumanida shu yilning 26 martidan ish faoliyatimni boshlaganman. Men faqat Akmal Xo‘jayevning buyrug‘ini bajarganman xolos. Furqat tumani prokuraturasida bizni bir tomonlama so‘roq qilishgan. Gulira’no Qosimova omma e’tiborini o‘ziga jalb qilish uchun tez-tez OAVda chiqish qilyapti. Bizga nisbatan tuhmatlar bo‘lyapti.
17 aprel kuni xizmat vazifasini bajarish uchun kirganmiz. Gulira’no Qosimova va Qurbonali Abdurahmonovga nisbatan g‘arazli niyatimiz bo‘lmagan. Aslida 5 aprel kuni “soliqchi xizmat uyiga yengiltabiat ayollarni olib kiryapti” degan xabar kelib tushgan. Tezkor tadbir qilganimizning sababi jinoyatchilikning oldini olish bo‘lgan. Xizmat uyida voyaga yetmagan bizning yoki kimningdir singlisining nomusi toptalishi mumkin edi-ku.
17 aprel kuni Akmal Xo‘jayev qo‘ng‘iroq qilib soliqchining xizmat uyida shunday holat bo‘layotgan ekan, tekshiringlar, dedi. G‘ayrat Otaqulovga qo‘ng‘iroq qildim. 3-4 daqiqa ichida tadbir qilish uchun qaror tayyorlab berdi, tasdiqlab berdim.
Uchastka noziri eshik ochiq ekan, dedi. Ichkariga kirmasdan avval chaqirdik. Hech kim javob bermadi. Men ko‘chada qoldim. Xodimlar ichkariga kirib ketishdi. Keyin 2-qavatdan baqir-chaqir ovozlar eshitildi. 2-qavatga ko‘tarilsam, soliqchi va maktab direktori yalang‘och holatda ekan. Xodimlar ayolning yuzini ko‘rib turib shaxsini aniqlashga harakat qilishdi. Keyin “uchastkavoy” A’zam ayol 29-maktabning direktori ekanini aytdi. Ayolning voyaga yetganini bilib, keyin xodimlarimga pastga tushaveringlar, dedim. Ikkisi “uchastkavoy” mashinasiga o‘tirib IIB binosiga borishdi. So‘rovxonada Gulira’no Qosimova bilan gaplashdim. U soliq boshlig‘i ko‘p yaxshilik qilganini aytib, menga gap tegsa tegsin, lekin soliqchiga gap tegmasin, deb iltimos qildi.
Tadbir qilinishiga do‘kon sotuvchisi Davlat Yusupovning 102 ga qo‘ng‘iroq qilib holat bo‘yicha xabar bergani asos emas. Bunga biz avvaldan aniqlagan ma’lumotlarimiz asos hisoblanadi. Viloyat prokuraturasi tomonidan ko‘rsatilgan ayblovlar asossiz. Aybsizligimni isbotlab beraman”, deya ko‘rsatma berdi tezkor tadbirga bosh bo‘lgan Jasur Rasulov.
Sud 28 noyabrga qadar tanaffus e’lon qildi.
Eslatib o‘tamiz, Kun.uz oldinroq Furqat tumanida maktab direktori bo‘lgan Gulira’no Qosimova bilan sodir bo‘lgan holat haqida surishtiruv e’lon qilgandi. Unda Furqat tumani IIB xodimlari ayolni kaltaklab, kiyimlarini yirtib, yalang‘och holda tasvirga olgani haqida gap boradi. Holat Senat qo‘mitasi tomonidan nazoratga olingan. Ombudsman Furqat tumani IIBning 4 nafar mas’ul xodimi jinoiy javobgarlikdan ozod etilganini ma’lum qilib, holatga aloqador bo‘lgan har bir shaxsning qilmishi to‘liq va xolisona o‘rganilishini so‘ragan.
Avvalgi sud majlisida ko‘rsatma bergan Furqat tuman soliq inspeksiyasi sobiq boshlig‘i, ish bo‘yicha jabrlanuvchilardan biri bo‘lgan Qurbonali Abdurahmonov o‘zi bilan bir vaqtda ishlagan tuman IIB boshlig‘i Akmal Xo‘jayev unga militsiya xodimlari kuniga 20 ta televizor olib berasan degan topshiriq berganini, u rad etganidan so‘ng IIB boshlig‘i “IIBga qarshi chiqish qanday bo‘lishini ko‘rsatib qo‘yish” bilan tahdid qilganini eslagandi.
22 oktyabr kuni o‘tgan sud majlisida esa guvoh tariqasida chaqirilgan IIB xodimlari G‘ayrat Otaqulov va Yusuf Yoqubov sudga kelmagani bois sudlanuvchilar Akmal Xo‘jayev (sobiq IIB boshlig‘i) va Jasur Rasulov (IIB boshlig‘ining sobiq o‘rinbosari) guvohlar eshitilmay turib ko‘rsatma bermasliklarini aytgandi.
24 oktyabr kuni Furqat tumani IIB mansabdorlari ustidan navbatdagi sud majlisida jabrlanuvchi ayol yechintirilgani aytilayotgan “tezkor tadbir” ishtirokchisi bo‘lmish IIB tezkor xodimi Yusufbek Yoqubov so‘roq qilingan va “davlat siri” degan vaj bilan sudda OAV ishtiroki cheklab qo‘yilgandi.
7 noyabr kungi sud majlisida sudya jabrlanuvchi Gulira’no Qosimovani “ish yuritish tartibini buzgani uchun” sud zalidan chiqarib yuborgan edi.
Shundan so‘ng G.Qosimova ijtimoiy tarmoq orqali videomurojaat yo‘llab, sudya unga nisbatan adolatsizlik qilayotganini, IIB sobiq amaldorlariga yon bosayotganini aytdi. Ushbu bayonot ortida 12 noyabrdan boshlab sud majlisi OAV ishtiroki uchun ochib qo‘yildi.
21 noyabr kuni bo‘lib o‘tgan sud majlisida esa Akmal Xo‘jayev va uning o‘rinbosari bo‘lgan Jasur Rasulov ko‘rsatmalari tinglanishi kerak edi. Har ikki sobiq xodim «videoyozuv bo‘yicha ekspertiza xulosasi chiqsa tanishib, keyin ko‘rsatma beraman» deya ko‘rsatma berishdan yana bosh tortgandi.
Shu kunlarda “Yangi sahifa” nashriyotida taniqli diplomat Yodgorxo‘ja Shodmonovning “Ikki qutb orasida” nomli kitobi chop etildi. Har bir insonning o‘z hayot yo‘li, manzillari va yorqin xotiralari bo‘ladi. Ammo shunday kasblar borki, ular nafaqat sharafli, balki nihoyatda mas’uliyatlidir – elchilik faoliyati ana shunday sohalardan biri.
2005-2009 yillarda Afg‘onistonning Mozori Sharif shahrida Bosh konsul, 2012-2021 yillarda esa O‘zbekistonning Afg‘onistondagi Favqulodda va Muxtor elchisi sifatida sermahsul faoliyat yuritgan muallifning ushbu asari ham tarixiy, ham ilmiy va badiiy jihatdan beqiyos qimmatga ega. Ta’kidlash joizki, so‘nggi yillarda diplomat Abror G‘ulomovning avtobiografik asari nashr etilib, xalqimizga armug‘on qilinganiga guvoh bo‘lgan edik. Endilikda ushbu an’ananing Yodgorxo‘ja Shodmonov tomonidan davom ettirilishi quvonarli hol.
Men Yodgorxo‘ja aka haqida “Jahon” axborot agentligida ishlab yurgan kezlarimda hamkasblar va ustozlarimizdan ko‘p ijobiy fikrlar eshitganman. 1961 yilda tug‘ilgan muallif o‘z faoliyati davomida dastlab yoshlar tashkilotlarida, Toshkent davlat texnika universiteti prorektori lavozimida hamda “Yoshlik” talabalar shaharchasi hokimi o‘rinbosari sifatida samarali mehnat qilgan.
1999-2000 yillarda Tashqi ishlar vazirligining Diplomatik servis xizmati kotibiyati mudiri, 2000-2005 yillarda Kadrlar va o‘quv muassasalari boshqarmasi boshlig‘ining o‘rinbosari, keyinchalik boshlig‘i, Afg‘onistondagi Bosh konsullikdan qaytgach esa 2010-2012 yillarda Konsullik boshqarmasi boshlig‘ining o‘rinbosari lavozimida sidqidildan xizmat qildi. Ko‘plab insonlarga yordam qo‘lini cho‘zgan, Vatan ravnaqi yo‘lida bor bilim va tajribasini safarbar etgan kamtarin va malakali diplomatning mehnatlari davlatimiz tomonidan yuksak qadrlanib, 2022 yilda “Do‘stlik” ordeni bilan taqdirlangani ham fikrimiz isbotidir.
Qiziqarli va samimiy tilda yozilgan ushbu kitobni mutolaa qilar ekansiz, elchilik davri muallif uchun chinakam sinov va mazmunli hayot maktabi bo‘lganiga amin bo‘lasiz.
“Bu yillar davomida men nafaqat xizmat burchimni ado etdim, balki dunyoqarashimni kengaytirdim, inson qiymatini, tinchlik qadrini va mehr-oqibatning beqiyos kuchini yanada teranroq his etdim. Bu yurtda vaqt bilan yuzma-yuz turib zamon va hayot ziddiyatlari bilan to‘g‘ridan-to‘g‘ri to‘qnash keldim, o‘zligimni teran angladim. Ana shu ikki qutb o‘rtasida kechgan hayot menga sabrning chegarasiz kuchini, do‘stlikning beqiyos qudratini, osoyishtalikning eng bebaho ne’mat ekanini chuqurroq anglatdi. Diplomatik xizmatning mashaqqati, kunu tun mas’uliyati, xavf-xatar va sinovlari mening irodamni chindan ham chiniqtirdi”, deb yozadi muallif.
Kitob orqali Afg‘oniston bizga qo‘shni bo‘lsa-da, ichki vaziyati va murakkab siyosiy-harbiy jarayonlari biz uchun ancha notanish bo‘lgan davlatning haqiqiy manzarasini anglaymiz. Salkam yarim asrdan buyon tinchlik nimaligini bilmay kelayotgan bu yurt odamlarining yuksak g‘ururi, samimiyati va mehmondo‘stligi o‘quvchida katta taassurot qoldiradi. Muallif Balx, Jauzjon, Samangon, Faryob, Hirot kabi viloyatlar, Kobul, Mozori Sharif, G‘azni kabi shaharlar haqida shunday mahorat bilan hikoya qiladiki, voqealar beixtiyor ko‘z oldingizda jonlanadi.
Ayniqsa, Afg‘onistonning 100 ga yaqin yetakchilari, qo‘mondonlari va nufuzli shaxslari haqidagi ma’lumotlar, ularning siyosiy tiynati va salohiyati tarixiy izchillikda mahorat bilan ochib berilgan. Shuningdek, muallifning oddiy afg‘on dehqoniga bo‘lgan ehtiromi, ularning matonati va yashovchanligiga bergan ta’rifi kitobning ta’sirchanligini oshirgan.
Yodgorxo‘ja Shodmonov Afg‘oniston Islom Respublikasining ikki prezidenti davrida ham, “Tolibon” hokimiyatga kelgan og‘ir kunlarda ham o‘z burchiga sodiq qoldi. Elchixona yaqinidagi mudhish terrorchilik harakati oqibatida og‘ir jarohat olib, uzoq muddat davolangan bo‘lsa-da, mardlik bilan o‘z missiyasini davom ettirdi. Uning siymosida o‘z davlati manfaatini har narsadan ustun qo‘yadigan, vatandoshlarini himoya qilishni muqaddas burch deb biladigan haqiqiy vatanparvar diplomatni ko‘ramiz.
Asarning keyingi boblarida 2016 yildan buyon Prezident Shavkat Mirziyoyev tomonidan olib borilayotgan ochiqlik, konstruktiv muloqot va pragmatik tashqi siyosatning mazmun-mohiyati shaxsiy tajribalar asosida batafsil yoritilgan.
“Ikki qutb orasida” kitobi shunchaki voqealar bayoni emas, balki elchining qalb iztiroblari, hayratlari va teran mushohadalari in’ikosidir. Nodir fotosuratlar bilan boyitilgan ushbu asar diplomatlar, afg‘onshunoslar, talabalar va keng kitobxonlar ommasi uchun qimmatli qo‘llanma bo‘lib xizmat qiladi.
Laziz Rahmatov,
Siyosiy fanlar bo‘yicha falsafa doktori (PhD),
O‘zbekiston Yozuvchilar uyushmasi a’zosi
Hukumatning 202-son qarori bilan 2026–2027-yillarda jamiyatda huquqiy madaniyatni yuksaltirish bo‘yicha chora-tadbirlar dasturi tasdiqlandi. Ushbu dastur aholining huquqiy ongi va savodxonligini oshirishga qaratilgan kompleks choralarni o‘z ichiga oladi.
Dastur doirasida «Onlayn-mahalla» platformasi va «mahalla yettiligi» orqali aholi muammolari tahlil qilinib, ularga qonuniy yechimlar beruvchi sodda media materiallar tayyorlanadi. Bu materiallar annotatsiya, video, infografika va bukletlar ko‘rinishida taqdim etiladi.
Yil yakunida fuqarolar murojaatlari asosida «TOP-100 huquqiy tavsiya» to‘plami shakllantiriladi. Shuningdek, yangi qonunlar mutaxassislar ishtirokida intervyu va podkastlar orqali tushuntirilib, «Adliya TV»da joylashtiriladi.
Dasturda zamonaviy texnologiyalarga alohida e’tibor qaratilgan. Xususan, qurilish sohasida qonunchilikni tushuntiruvchi AI-chatbotli «Qurilishda qonuniylik» mobil ilovasi yaratiladi.
Ushbu ilova orqali foydalanuvchilar interaktiv o‘yinlar, testlar va videolar yordamida bilim olishi mumkin. Shu bilan birga, noqonuniy qurilish holatlari haqida xabar berish imkoniyati ham yaratiladi.
Bundan tashqari, «Advice.uz» va «Gender-madad» platformalari takomillashtiriladi. Ijtimoiy tarmoqlarda «sovrinli viktorinalar» o‘tkazish orqali aholining huquqiy bilimlari oshiriladi.
Dastur doirasida bolalar o‘rtasida huquqiy madaniyatni shakllantirishga ham katta e’tibor berilgan. Huquqiy videoroliklar ishlab chiqilib, keng targ‘ib qilinadi.
Shuningdek, «Oilani asrang – zo‘ravonlikni to‘xtating!» shiori ostida ijtimoiy chellenjlar va roliklar tanlovi tashkil etiladi. Ta’lim muassasalarida «Huquqiy bilimlar oyligi» o‘tkazish ham rejalashtirilgan.
Qarorga muvofiq, dasturda belgilangan chora-tadbirlarni o‘z vaqtida va sifatli amalga oshirish uchun tegishli davlat organlari rahbarlari shaxsan javobgar hisoblanadi hamda har chorakda Adliya vazirligiga hisobot taqdim etadi.
Jamiyat
Piskentda «suvta’minot» rahbari sheriklari bilan qariyb 4 mlrd so‘mlik quvurlarni «tuya qilgan»
«Toshkent viloyati suv ta’minoti» AJning Piskent tumani filiali rahbari B.K., «A.» AJ mansabdor shaxslari va boshqalar bilan oldindan jinoiy til biriktirgan holda, umumiy qiymati 3 mlrd 931,2 mln so‘mlik suv quvurlarining 3 mlrd 78,4 mln so‘mlik qismi, ya’ni jami 14 800 metrini qazib olib, o‘zlashtirish yo‘li bilan talon-toroj qilganligi aniqlandi.
Mazkur holat Korrupsiyaga qarshi kurashish agentligi, Iqtisodiy jinoyatlarga qarshi kurashish departamentining Toshkent viloyat boshqarmasi hamda «O‘zsuvta’minot» AJ komplayens xizmati bilan hamkorlikda o‘tkazilgan nazorat tadbirida aniqlangan.
Ayni paytda qayd etilgan holatlar yuzasidan «Toshkent viloyati suv ta’minoti» AJning Piskent tumani filiali rahbari B.K., «A.» AJning mansabdor shaxslari hamda boshqalarga nisbatan Iqtisodiy jinoyatlarga qarshi kurashish departamentining Toshkent viloyat boshqarmasi tomonidan jinoyat kodeksining 167-moddasi 3-qismi «a» bandi bilan jinoyat ishi qo‘zg‘atildi.
Avtobus, elektrobus va tramvayda yo‘l haqi naqd pul (QR kodli chipta) orqali to‘langanda 4 ming so‘mni tashkil etadi. Transport va bank kartasi orqali to‘lov qilinganda narx o‘zgarmaydi – 2 ming so‘mligicha qoladi.
Foto: Samarqand viloyati transport boshqarmasi
Samarqand shahrida 1 maydan jamoat transportida yo‘lkira narxi oshiriladi. Bu haqdagi qaror Xalq deputatlari viloyat Kengashining 23 aprel kuni bo‘lib o‘tgan sessiyasida qabul qilindi. Unda jamoat transportida elektron to‘lovlarni rag‘batlantirishga qaratilgan yangi tariflar tasdiqlangan.
Qarorga ko‘ra, 1 maydan avtobus, elektrobus va tramvayda yo‘l haqi naqd pul (QR kodli chipta) orqali to‘langanda 4 ming so‘mni tashkil etadi. Bu amaldagi tarifga nisbatan 1 ming so‘mga oshirilgan. Shu bilan birga, transport va bank kartasi orqali to‘lov qilinganda narx o‘zgarmaydi – 2 ming so‘mligicha qoladi.
Shuningdek, mutasaddilarga jamoat transporti harakatini barcha yo‘nalishlarda soat 22:00 gacha uzaytirish, turistik yo‘nalishlarda esa 24 soat davomida ta’minlash vazifasi yuklatildi.
Shu bilan birga, Samarqand viloyati transport boshqarmasi ma’lum qilishicha, yaqin kunlarda jamoat transportida yo‘l haqini naqd pul orqali to‘lash mutlaqo bekor qilinadi. Aholidan naqd pulsiz to‘lov usullariga o‘tish so‘ralgan. Yo‘lovchilar transport va bank kartalari, shuningdek mobil ilovalar orqali to‘lovni amalga oshirishi mumkin. Yo‘l chiptalarini infokiosklar orqali xarid qilish imkoniyati ham mavjud.
Sudlanuvchilar O‘zbekistonning turli hududlarida 20 dan ortiq MChJ ochib, past foizda mashina olib berishni va’da qilgan holda, yuzlab odamlarni chuv tushirgan. 14 nafar sudlanuvchiga qariyb mingta epizod bo‘yicha ayb e’lon qilib, jami 88,5 mlrd so‘m zarar hisoblangandi. Ular sudda 130 ta epizod bo‘yicha aybsiz deb topildi.
Oson shartlarda mashina olib berishni va’da qilib, odamlarni chuv tushirgan “Umid avto”chilar jinoiy jazoga tortildi. 14 nafar shaxsga nisbatan qo‘zg‘atilgan jinoyat ishi JIB Yunusobod tuman sudida sudya Shamsiddin Tojiyev raisligida ko‘rib chiqilib, hukm o‘qildi.
Sud majlisida qatnashgan Kun.uz jurnalistining xabar berishicha, sudlanuvchilarga 987 ta epizod bo‘yicha ayb e’lon qilinib, jami 88,5 mlrd so‘m zarar hisoblangan. Sudda ular 130 ta epizod bo‘yicha aybsiz deb topilib, oqlandi. Ayrim jabrlanuvchilar esa da’vosi yo‘qligini ma’lum qilgan.
Shu tariqa sudlanuvchilardan 834 ta epizod bo‘yicha jabrlanuvchilarga 60 mlrd so‘mdan ko‘proq zarar undirish belgilandi. Bunda har bir sudlanuvchi o‘zi aybli deb topilgan epizodlar bo‘yicha zararni qoplashi nazarda tutilgan.
Sud hukmiga ko‘ra, sudlanuvchilarga quyidagicha jazo tayinlandi:
Qodirov Dilshod Muhammadjonovich – Jinoyat kodeksining 168-moddasi (firibgarlik) 4-qismi “a,v” bandlari bilan aybli deb topilib, boshqa jinoyat ishi doirasida muqaddam tayinlangan jazoni qisman qo‘shish yo‘li bilan 10 yilga ozodlikdan mahrum qilish;
Abdurahmonov Abdumannop Abduhakim o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, boshqa jinoyat ishi doirasida muqaddam tayinlangan jazoni qisman qo‘shish yo‘li bilan 10 yilga ozodlikdan mahrum qilish;
Abduhakimov Ibroxim Anvar o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Nig‘monjonov Muhammadmuso Ruslan o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, boshqa jinoyat ishi doirasida muqaddam tayinlangan jazoni qisman qo‘shish yo‘li bilan 8 yilga ozodlikdan mahrum qilish hamda BHMning 410 baravari miqdorida jarima;
Saidov Ixtiyor Baxtiyor o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Raximov Mirqodir Raxmat o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 9 yilga ozodlikdan mahrum qilish;
Toirjonov Akrom Baxtiyor o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Muhammadjonov Shukurullo Risxivoy o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Tal’atov Sarvar Tohir o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Ismoilov Iskandar G‘ayrat o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Toshtemirov Og‘abek Zokir o‘g‘li – Jinoyat kodeksining 168-moddasi 4-qismi “a,v” bandlari bilan aybli deb topilib, 8 yilga ozodlikdan mahrum qilish;
Xudoyberdiyeva Umidabonu Raxim qizi – Jinoyat kodeksining 168-moddasi 4-qismi “a,v” bandlari bilan aybli deb topilib, 5 yilga ozodlikdan mahrum qilish;
Nematov Shuxratjon Nusrat o‘g‘li – Jinoyat kodeksining 168-moddasi 4-qismi “v” bandi bilan aybli deb topilib, boshqa jinoyat ishi doirasida muqaddam tayinlangan jazoni qisman qo‘shish yo‘li bilan 6,5 yilga ozodlikdan mahrum qilish;
Mahmudov Mirjalol Muqumjon o‘g‘li – Jinoyat kodeksining 168-moddasi 4-qismi “v” bandi bilan aybli deb topilib, 6 yilga ozodlikdan mahrum qilish.
Ma’lumot uchun, “Umid avto” rahbari Abdumannop Abdurahmonov 2025 yil yanvar oyi boshida qamoqqa olingandi. 2025 yil iyun oyi oxiriga kelib esa mashina olib berish bahonasida 840 dan ortiq odamni chuv tushirgan guruh ushlangandi.
Abdumannop Abdurahmonov va boshqalar past foizda avtomashina sotib olish niyatidagi fuqarolarga istalgan turdagi avtomashinani yetkazishi to‘g‘risida ijtimoiy tarmoqlarda targ‘ibot olib borgan. Ular Toshkent shahri va respublikaning turli nuqtalarida “Umid avto companies”, “Umid Savdo Fayz Invest”, “Umid Avto Lizing”, “Umid Auto” kabi 20 dan ortiq MChJ tashkil etib, fuqarolarning mablag‘larni o‘zlashtirish bilan shug‘ullanib kelgani aytilgandi.
Abdumannop Abdurahmonov Kun.uz’ga bergan izohida mashinalar o‘z vaqtida topshirilmaganini 2022-2023 yillarda bir necha o‘nlab lizing kompaniyalar yoppasiga yopilib ketgani bilan izohlagandi.
O‘zMIJ IPO‘si boshlandi: aksiyalar ikkita bozorda sotiladi
O‘zbekistonda qaysi sohalarda yuqori haq to‘lanadi?
Elchining tarixiy xotiralari chop etildi
-
Jamiyat4 days agoJomboyda mast haydovchi YTH sodir etdi
-
Dunyodan5 days ago
Yevropa Ittifoqi Rossiyaga qarshi sanksiyalarning 20-raundini maʼqulladi (batafsil maʼlumot)
-
Iqtisodiyot5 days agoBiznes-ombudsman Toshkentning dizayn-kodi masalasida e’tiroz bildirdi
-
Dunyodan4 days ago
Livan-Isroil o’t ochishni to’xtatish muddati uch haftaga uzaytirildi
-
Dunyodan4 days ago
AQSh Eronga qarshi urush uchun har soniyada 11,5 ming dollar sarflamoqda
-
Sport5 days agoSuperliga. «Paxtakor» va «Neftchi» ta’qibchilardan ilgariladi
-
Dunyodan3 days agoPrezident Tramp delegatsiya parvozini bekor qildi
-
Jamiyat5 days agoToshkentda elektr korxonasi muhandislari 8 ming dollar bilan ushlandi