Sport
Tramp NBA finalida hushtakbozlikka uchradi
Tramp Amerikaning NBA finaliga tashrif buyurgan ilk prezidentiga aylandi. Bu unchalik to‘g‘ri qaror bo‘lib chiqmadi: avvaliga muxlislar unga hushtakbozlik qilishdi, keyin esa u uxlab qoldi. Qolaversa, uning sevimli jamoasi yutqazib qo‘ydi.
Mark Schiefelbein / AP / Scanpix / LETA
AQSh prezidenti Donald Trampga 8 iyun kuni «Nyu-York Niks» va «San-Antonio Spers» basketbol jamoalari o‘rtasida Nyu Yorkdagi «Medison-skver-garden» stadionida o‘tkazilgan Milliy basketbol uyushmasi (NBA) finalida hushtakbozlik qilindi.
Tramp AQSh tarixida bunday finalga tashrif buyurgan ilk prezident bo‘ldi. U o‘yinni «Niks» jamoasi xo‘jayini Jyeyms Dolanning lojasida o‘z nabirasi Kay va shaxsiy maslahatchisi Boris Epshteyn bilan birga kuzatdi. Tramp – «Nyu York Niks»ning eski muxlislaridan hisoblanadi, u 1990-yillardan buyon ushbu jamoa o‘yinlarini kuzatib keladi.
Trampning tashrifi tufayli stadionda xavfsizlik choralari kuchaytirildi, Nyu York hukumati esa stadion atrofidagi ko‘chada katta ekranlarda o‘yinni namoyish etishni bekor qildi.
O‘yin boshlanishi arafasida milliy madhiya ijro etilayotganida prezidentga hushtakbozlik qilindi. Prezident arenadagi ekranda bir necha soniyaga ko‘rinish berganida muxlislar hushtakbozlik qilishdi – bu vaqtda Tramp tabassum qilib, harbiy salom yo‘llayotgandi. Kameralar «Niks» sportchilariga qaratilganidan keyingina hushtaklar o‘rnini olqishlar egalladi.
Trampning o‘zi bunday qabulga xotirjam munosabatda bo‘ldi. «O‘ylaymanki, bu asosan olqishlar edi», – dedi u o‘yindan so‘ng jurnalistlarga.
O‘yin vaqtida Tramp uxlab ham qoldi.
Tramp va NBA o‘rtasidagi munosabatlar avvaldan yaxshi emas. Milliy basketbol uyushmasi ko‘p yillardan buyon Amerikadagi to‘rtta professional sport ligalari orasida nisbatan «liberal» hisoblanadi, uning ko‘plab sportchilari esa Trampga qarshi chiqishlar qilishadi.
Liganing asosiy yulduzlari – Kevin Dyurant, Stiven Karri, Lebron Jyeyms kabilar prezidentni birinchi prezidentlik muddati davrida ham ko‘p marta tanqid qilishgan. 2017 yilda esa Tramp sportchilarning o‘zi haqidagi keskin fikrlari tufayli NBA chempioni bo‘lgan «Golden Steyt Uorriors» a’zolari uchun Oq uydagi an’anaviy qabulni bekor qilgandi.
Tramp tashrif buyurgan o‘yin to‘rt g‘alabagacha o‘ynaladigan finallar seriyasidagi uchinchi o‘yin bo‘ldi. Bu bahsda «San-Antonio» 115:111 hisobida g‘alaba qozondi. Hozircha «Nyu-York» seriyada hisobda oldinda bormoqda – 2:1. Keyingi bahs 11 iyunga o‘tar kechasi Nyu Yorkda bo‘lib o‘tadi.
Bu safargi final – 1999 yilgi hal qiluvchi seriyaning takrori bo‘lmoqda. O‘shanda ham finalda ushbu jamoalar to‘qnashgan va unda «San-Antonio» 4:1 hisobida g‘alaba qozongandi. O‘tgan vaqt mobaynida «Spers» yana to‘rt marta NBA chempioni bo‘ldi (oxirgi marta – 2014 yilda), «Niks» esa biror marta finallar seriyasiga chiqa olmagan. Ushbu jamoaning oxirgi chempionligi 1973 yilga to‘g‘ri keladi.
Bugun Toshkent vokzalida O‘zbekiston parashaxmat terma jamoasi a’zolari tantanali kutib olindi. Samarqand shahrida bo‘lib o‘tgan 3-Parashaxmat olimpiadasida yurtimiz sharafini munosib himoya qilgan sportchilarni keng jamoatchilik, yoshlar va ommaviy axborot vositalari vakillari qarshiladi.
Musobaqada jami 41 ta jamoa ishtirok etdi. O‘zbekiston parashaxmat terma jamoasi 11 ochko jamg‘arib, o‘z tarixida ilk bor shohsupaning uchinchi pog‘onasidan joy oldi.
Hal qiluvchi 7-turda sportchilarimiz Isroil terma jamoasiga qarshi bahs olib bordi. Muhim uchrashuv 2,5:1,5 hisobida O‘zbekiston foydasiga yakunlandi. Ana shu g‘alaba terma jamoamizga bronza medalini qo‘lga kiritish imkonini berdi.
Ushbu natija nafaqat parashaxmatchilarimiz, balki butun o‘zbek sporti uchun muhim tarixiy voqea bo‘ldi. Sportchilarimizning matonati, irodasi va musobaqa davomidagi qat’iyati munosib e’tirofga sazovor.
Toshkent vokzalidagi tantanali kutib olish marosimida ham sportchilarga bildirilgan samimiy ehtirom va qo‘llab-quvvatlov ularning ushbu g‘alabasi yurtimizda katta ahamiyat kasb etayotganini yana bir bor namoyon etdi.
O‘zbekiston parashaxmat terma jamoasini tarixiy bronza medali bilan tabriklaymiz! Sportchilarimizga kelgusi musobaqalarda ham yangi zafarlar tilaymiz.
Xalqaro boks federatsiyasi (IBF) barcha vazn toifalari uchun sportchilarning reytingini yangiladi.
Unga ko‘ra, superog‘ir vazn toifasida Bahodir Jalolov 6 dan 4-o‘ringa ko‘tarildi.
Jalolov so‘nggi jangini 2026-yil 9-may kuni Agron Smakichiga qarshi o‘tkazib, texnik nokaut hisobiga g‘alaba qozongan va rekordini 17–0 (15 tasi nokaut)ga yetkazgandi.
Hozirda IBF kamari Filip Xrgovichda, reytingni esa Frank Sanches boshqarmoqda, keyingi o‘rinlarda: Entoni Joshua (3) va Jalolov (4-o‘rin).
Taniqli insayder Den Rafael tarqatgan xabarga ko‘ra, Jalolov navbatdagi jangini Daniel Dyubua — Fabio Uordli 2 jang kechasi doirasida Londonda mahalliy bokschi Solomon Dakres (10-1, 3 nokaut)ga qarshi o‘tkazadi. Jalolov (Top Rank) va Dakres (Queensberry) promouterlari kelishuvga erishgan deyiladi xabarda.
Superog‘ir vazn toifasidagi bokschilar reytingi (IBF, top-10):
1. Frank Sanches (Kuba)
2. O‘rin bo‘sh
3. Entoni Joshua (Buyuk Britaniya)
4. Bahodir Jalolov (O‘zbekiston)
5. Tayson Fyuri (Buyuk Britaniya)
6. Deontey Uaylder (SShA)
7. Mozes Itauma (Buyuk Britaniya)
8. Richard Riakpore (Buyuk Britaniya)
9. Kichik Richard Torres (AQSh)
10. Jastis Hani (Avstraliya).
«Paxtakor», «Neftchi» va «Nasaf» klublari 2026/2027-yilgi mavsumda Osiyo klublar musobaqalarida yurtimiz sharafini himoya qilmoqda. «Paxtakor» va «Neftchi» OFK Chempionlar ligasi Elit (Elite) turnirida, «Nasaf» OFK Chempionlar ligasi 2 musobaqasida ishtirok etmoqda.
Jamoalarga turnirdagi ishtiroki, har bir g‘alabasi hamda keyingi bosqichlarga yo‘l olgani uchun OFK tomonidan yirik miqdorda mukofot pullari ajratiladi.
«Paxtakor» va «Neftchi» nufuzli Elit turnirning asosiy (liga) bosqichida qatnashgani uchun kafolatlangan 800 ming AQSh dollaridan qo‘lga kiritadi. Bundan tashqari, ushbu musobaqada jamoalar har bir g‘alaba uchun qo‘shimcha 100 ming dollar bonus ishlab olishlari mumkin. Klublarning umumiy daromadi ular qayd etadigan natijalar va g‘alabalar soniga qarab oshib boradi.
Musobaqaning pley-off bosqichida ham mukofot pullari sezilarli darajada yuqori. OFK Chempionlar ligasi Elit turnirida 1/8 finalga yo‘l olgan klubga 200 ming dollar, chorak final ishtirokchisiga 400 ming dollar, yarim finalga chiqqan jamoaga esa 600 ming dollar mukofot puli taqdim etiladi.
Musobaqa g‘olibi — turnir chempioni 10 million dollarlik bosh sovrinni qo‘lga kiritadi. Finalda mag‘lub bo‘lgan jamoaga 4 million dollar mukofot puli to‘lanadi. Bir so‘z bilan aytganda, «Paxtakor» va «Neftchi» musobaqada qancha uzoqqa borsa, shuncha ko‘p daromad oladi — bu mablag‘ bir necha million dollarga yetishi mumkin.
«Nasaf» OFK Chempionlar ligasi 2 turnirini guruh bosqichidan boshlaydi. Ushbu bosqichda qatnashgani uchun qarshiliklarga kafolatlangan 300 ming dollar mukofot puli ajratiladi. Bundan tashqari, guruhdagi har bir g‘alaba uchun 50 ming dollardan qo‘shimcha bonus to‘lanishi ko‘zda tutilgan.
OFK Chempionlar ligasi 2 turnirining pley-off bosqichida sovrinlar quyidagicha taqsimlanadi: 1/8 finalga chiqqan klub 80 ming dollar, chorak finalga yo‘l olgan jamoa 160 ming dollar, yarim final ishtirokchisi esa 240 ming dollar mukofot oladi.
Turnir g‘olibiga 2,5 million dollar, finalchiga 1 million dollar mukofot puli beriladi. Shunday qilib, «Nasaf» ham musobaqadagi muvaffaqiyatli natijalari evaziga boshlang‘ich 300 ming dollarni (bir necha) million dollargacha ko‘paytirish imkoniyatiga ega.
«Paxtakor» klubi Elit Osiyo chempionlar ligasi asosiy bosqichini durang bilan boshladi.
Jiddada turnirning amaldagi g‘olibi «Al-Ahli» klubiga qarshi o‘ynagan paxtakorchilar 86-daqiqada hisobni ochishdi. Ammo asosiy vaqtga qo‘shib berilgan daqiqalarda javob goli o‘tkazib yuborildi.
«Paxtakor» keyingi o‘yinni 12-oktyabrda Toshkentda Saudiya Arabistonining «Al-Qodisiya» klubiga qarshi o‘tkazadi.
Elit OChL. G‘arb mintaqasi. 1-tur
14-sentyabr, Jidda, «King Abdullah Sports City» stadioni
Al-Ahli – Paxtakor 1:1
Gollar: Firas al-Buraykan (90+3) — Flamarion (86)
Bosh hakam: Abdulla Jamaliy (Kuvayt)
Al-Ahli: Eduard Mendi, Ibrahima Diabi (Valentin Atangana 62), Galeno (Meshal Al-Mutayriy 53), Said Baattia, Ivan Toni (Firas Al-Buraykan 68), Mateus Martins, Merix Demiral (Muhammad Sulaymon 68), Saad Balobaid, Rayan Hamid, Solih Abu Alshamat, Naif Masud (Eduard Spersyan 46)
Paxtakor: Vladimir Nazarov, Zaid Tahsin (Murtazo Puraliganji 46), Dilshod Saitov, Ibrohim Ibragimov, Akmal Mozgovoy (Muhammadali Dilshodbekov 88), Dostonbek Hamdamov (Flamarion 68), Bashar Resan, Abdurauf Bo‘riyev, Ayman Husayn (Stiven Chinedu 69), Sherzod Nasrullayev (Hojiakbar Alijonov 78), Muhammadrasul Abdumajidov
Ogohlantirishlar: Ibrohim Ibragimov (63), Solih Abu Alshamat (64)
Eslatib o‘tamiz, kecha Elit Osiyo chempionlar ligasi 1-turida Farg‘onaning «Neftchi» klubi o‘z maydonida «Eyr Fors» ustidan 1:0 hisobida ustun kelgandi.
Hindistonda 46-Butunjahon shaxmat olimpiadasi oldidan an’anaviy Mash’ala estafetasi marosimi bo‘lib o‘tdi.
Marosimda FIDE prezidenti vazifasini bajaruvchi Vishvanatan Anand va Hindiston shaxmat federatsiyasi prezidenti Nitin Narang olimpiada mash’alasini o‘zbekistonlik grossmeyster Javohir Sindarovga tantanali ravishda topshirdi.
Endilikda ramziy olov Samarqandda bo‘lib o‘tadigan 46-Butunjahon shaxmat olimpiadasiga yetkaziladi.
Eslatib o‘tamiz, 46-Butunjahon shaxmat olimpiadasining boshlanishiga 2 kun qoldi.
Bir necha kun davomida ko‘tarilgan dollar yana pasaydi
O‘zbekistonliklar ijtimoiy tarmoqlarda kuniga qancha vaqt o‘tkazyapti?
«Pul tugab qoladi, dunyo xavfli…» yoxud ziqnalikni bartaraf etuvchi 11 qoida
-
Mahalliy3 days ago
Nima uchun eski buyumlardan voz kechish qiyin?
-
Jamiyat4 days ago
Samarqand Markaziy Osiyo fuqarolik jamiyati institutlarini birlashtirgan muloqot maydoniga aylandi
-
Iqtisodiyot5 days ago
Ekspertlarning 51 foizi inflyasiya 2027–2028-yillarda 5 foizga tushishini prognoz qilmoqda
-
Siyosat4 days ago
Shavkat Mirziyoyev Kallibek Kamalovning xonadoniga tashrif buyurdi
-
Siyosat4 days ago
Shavkat Mirziyoyev bugun Qoraqalpog‘istonga boradi
-
Siyosat3 days ago
O‘zLiDeP tashabbusi bilan eng chekka mahallalardan yangi tadbirkorlar kashf etilmoqda
-
Jamiyat4 days ago
Favqulodda vaziyatlar bo‘limi boshlig‘i o‘rinbosari ushlandi
-
Sport3 days ago
Parashaxmatchilarimiz tarixiy natija bilan Toshkentda tantanali kutib olindi