Joriy yilning 15 iyul kunidan «Tashabbusli budjet» jarayonining 2026 yilgi ikkinchi mavsumi boshlanadi. Fuqarolar o‘z hududidagi muammolarni hal etishga qaratilgan loyihalarini 3 avgustga qadar taqdim etishi mumkin.

2026 yilgi ikkinchi mavsum «Tashabbusli budjet» loyihasi joriy etilganidan buyon o‘tkazilayotgan o‘n birinchi mavsum hisoblanadi.

Tasdiqlangan jadvalga ko‘ra, 15 iyuldan 3 avgustgacha loyihalar qabul qilinadi. Shundan so‘ng 4–18 avgust kunlari loyihalar saralab olinadi.

19–21 avgust kunlari tashabbuslarni targ‘ib qilish bosqichi o‘tkaziladi. 22–31 avgust kunlari esa aholi loyihalar uchun ovoz beradi.

An’anaviy ovoz berish yakunlariga ko‘ra g‘olib deb topilgan loyihalar 1 sentabr — O‘zbekiston Mustaqilligining 35 yilligi munosabati bilan e’lon qilinadi. Shuningdek, 1–10 sentabr kunlari qo‘shimcha g‘oliblarni aniqlash bosqichi ham o‘tkaziladi.

Mas’ullar fuqarolarni jarayonda faol ishtirok etishga, mahallasi va yashash hududini yanada obod qilishga qaratilgan tashabbuslar bilan qatnashishga chaqirmoqda.

Source link

Xitoyning Xebey provinsiyasida ko‘krak bezi saratoni tashxisi qo‘yilgan O‘zbekiston fuqarosiga diplomatik vakolatxona tomonidan konsullik va gumanitar yordam ko‘rsatildi. Davolanish xarajatlarini kamaytirishga ko‘maklashildi, shuningdek, yetti yildan buyon ko‘rishmagan ona va qizning uchrashuvi tashkil etildi.

«Dunyo» axborot agentligi ma’lum qilishicha, Xitoy fuqarosi bilan turmush qurgan hamyurtimiz T.M. ayni paytda Xebey provinsiyasida yashab, ikki nafar farzandni tarbiyalab kelmoqda. Unda ko‘krak bezi saratoni aniqlangani munosabati bilan O‘zbekiston diplomatlari uning holatini alohida nazoratga olgan.

Diplomatik vakolatxona xodimlari bemor davolanayotgan tibbiyot muassasasi bilan muzokaralar o‘tkazib, muhim tibbiy muolajalar narxini kamaytirishga erishdi. Ma’lum qilinishicha, fuqaroga 16 bosqichdan iborat kimyoterapiya kursi tayinlangan.

Shuningdek, vaziyatning humanitar jihatiga ham e’tibor qaratildi. Qayd etilishicha, vatandosh qariyb yetti yil davomida Andijon shahrida yashovchi onasi bilan uchrasha olmagan. Diplomatik missiya ko‘magida aviachipta xarid qilinib, onasining Toshkent–Pekin–Toshkent yo‘nalishi bo‘yicha safari tashkil etildi. Shu tariqa uzoq kutilgan oilaviy uchrashuv ta’minlandi.

Diplomatik vakolatxona xodimlari fuqaroning yashash va davolanish joyiga tashrif buyurib, uning ahvolidan xabar oldi hamda ma’naviy qo‘llab-quvvatladi.

Bundan tashqari, Xebey provinsiyasida Xitoy fuqarolariga turmushga chiqqan 20 nafarga yaqin o‘zbekistonlik ayol ishtirokida uchrashuv o‘tkazildi. Tadbirda ularga O‘zbekistonda amalga oshirilayotgan islohotlar, xotin-qizlarni qo‘llab-quvvatlashga qaratilgan davlat siyosati va konsullik xizmatlari haqida ma’lumot berildi.

Diplomatlar xorijdagi O‘zbekiston fuqarolarining huquq va manfaatlarini himoya qilish, xotin-qizlarni manzilli qo‘llab-quvvatlash hamda ularning ijtimoiy moslashuviga ko‘maklashish doimiy e’tiborda ekanini ta’kidladi.

Source link

O‘zbekistonda 2026–2030 yillarda cho‘llanishga qarshi kurashish ishlarini yangi bosqichga olib chiqish doirasida 1,27 million gektar maydonda o‘rmon barpo etish va qayta tiklash rejalashtirilmoqda. Bu haqda prezident Shavkat Mirziyoyevga taqdim etilgan takliflar muhokamasida ma’lum qilindi.

Foto: Prezident matbuot xizmati

Taqdimotda iqlim o‘zgarishi, suv tanqisligi, yerlarning degradatsiyasi va cho‘llanish O‘zbekiston hamda butun Markaziy Osiyo uchun dolzarb ekologik muammolardan biri ekani ta’kidlandi. Mamlakat hududining qariyb 80 foizi cho‘l va yarim cho‘llardan iborat bo‘lib, ayniqsa Qoraqalpog‘iston, Buxoro, Navoiy, Xorazm, shuningdek, Qashqadaryo, Surxondaryo va Jizzax viloyatining ayrim hududlarida bu jarayon kuchayib bormoqda.

2026–2030 yillarga mo‘ljallangan rejaga ko‘ra, 1,27 million gektarda yangi o‘rmonlar barpo etish va mavjud o‘rmonzorlarni qayta tiklash, shuningdek, cho‘l, tog‘ va tog‘oldi hududlarida 16 ming gektar himoya o‘rmonzorlari yaratish ko‘zda tutilgan. Bundan tashqari, Surxondaryo viloyatida 10 ming gektar yashil qoplama barpo etish, Sirdaryo viloyati chegara hududlarida 84 kilometrlik «yashil devor» tashkil qilish hamda degradatsiyaga uchragan yerlarda zamonaviy agrotexnologiyalarni joriy etish taklif etildi.

Prezident cho‘l hududlarini faqat ekologik muammo sifatida emas, balki yangi iqtisodiy imkoniyatlar manbai sifatida ko‘rish zarurligini ta’kidladi. Shu maqsadda «cho‘l iqtisodiyoti»ni rivojlantirish, galofit o‘simliklar yetishtirish, cho‘l o‘simliklari urug‘chiligi va ko‘chatchiligini yo‘lga qo‘yish, yaylovlar mahsuldorligini oshirish, chorvachilik, ekologik turizm va ilmiy tadqiqotlarni kengaytirish bo‘yicha tashabbuslar ilgari surildi.

Shuningdek, Qoraqalpog‘istonda cho‘l o‘simliklari ko‘chatxonalarini tashkil etish, Orol dengizining qurigan tubida ilmiy ekspeditsiyalar o‘tkazish, qurg‘oqchilikka chidamli o‘simliklar va urug‘lar bo‘yicha mintaqaviy bank yaratish hamda xalqaro moliya institutlari va xususiy investitsiyalarni jalb qilish masalalari ham muhokama qilindi.

Davlat rahbari taqdim etilgan takliflarni ma’qullab, cho‘llanishga qarshi kurashish, yer va suv resurslaridan samarali foydalanish hamda ekologik barqarorlikni ta’minlash yuzasidan mutasaddilarga tegishli topshiriqlar berdi.

Source link

O‘zbekistonda bozorlar va savdo komplekslari faoliyatini raqamlashtirish doirasida avtotransportlarni vaqtincha saqlash joylari uchun to‘lovlarni yagona QR-kod orqali amalga oshirish imkoniyati yaratiladi. Shuningdek, E-bozor yagona raqamli platformasi bosqichma-bosqich ishga tushiriladi.

Sun’iy intellekt yaratgan surat

Hukumatning «Bozorlar va savdo komplekslarida raqamlashtirish ishlarini samarali tashkil etish hamda maishiy korrupsiyaning oldini olishga doir chora-tadbirlar to‘g‘risida»gi qaroriga muvofiq, 2026 yil 1 oktyabrga qadar E-bozor yagona raqamli bozor platformasi sinov tariqasida, 2027 yil 1 martga qadar esa to‘liq joriy etiladi.

Platforma orqali bozorlar va savdo komplekslarining pasporti, manzili, bo‘sh savdo shoxobchalari hamda savdo o‘rinlari haqidagi ma’lumotlar ochiq e’lon qilib boriladi. Shuningdek, fuqarolar bozorlar faoliyatiga oid ma’lumotlar bilan tanishish, bozor ma’muriyatiga elektron murojaat yuborish va unga javob olish imkoniyatiga ega bo‘ladi.

E-bozor platformasi «Soliq» axborot tizimlari kompleksi tarkibida ishlaydi. Har bir bozor va savdo kompleksiga soliq organlari xodimlari biriktirilib, ularning faoliyati samaradorligi kunlik tahlil qilib boriladi.

Qarorga ko‘ra, bozorlar hududida va ularga tutash avtotransportlarni vaqtincha saqlash joylarida to‘lovlar yagona QR-kod orqali qabul qilinadi.

Bundan tashqari, 2026 yil 1 avgustdan boshlab transport vositalarini jarima maydonchasidan chiqarishga ruxsatnoma faqat ma’muriy ishni ko‘rib chiquvchi organ va ijro organi tomonidan «Jarima maydonchasi» axborot tizimi orqali QR-kod bilan tasdiqlangan elektron shaklda rasmiylashtiriladi.

Source link

Muntazam ravishda kofe iste’mol qilish sirroz, jigar saratoni va jigar bilan bog‘liq o‘lim xavfini kamaytirishi mumkin. Bu o‘z tadqiqot natijalarini Clinical Gastroenterology and Hepatology (CGH) jurnalida nashr etgan olimlar tomonidan chiqarilgan xulosadir.

Tadqiqotchilar Buyuk Britaniya Biobank loyihasining o‘rtacha 13 yil davomida kuzatilgan 354 957 ishtirokchisining ma’lumotlarini tahlil qilishdi. Kofe ichmaydiganlarga nisbatan, kuniga besh yoki undan ko‘p stakan ichganlarda sirroz xavfi 32 foizga, jigar saratoni xavfi 47 foizga va jigar kasalligidan o‘lim xavfi 42 foizga pastroq edi. Ijobiy bog‘liqlik kuniga atigi bir-ikki stakan bilan kuzatildi va uch-to‘rt stakan bilan aniq ko‘rindi.

Bundan tashqari, MRT tekshiruvlari kofe ichuvchilarda jigarda yog‘, yallig‘lanish, fibroz va temir to‘planishi kamroq ekanligini ko‘rsatdi. Qon tahlillari shuningdek, sog‘lom jigar faoliyati bilan bog‘liq oqsillarning yuqori darajasini va yallig‘lanish va to‘qima chandiqlarida ishtirok etadigan oqsillarning past darajasini aniqladi.

Bu topilmalar birinchi marta kofening himoya ta’sirining mumkin bo‘lgan biologik mexanizmlarini tushuntirishga yordam beradi.

Mualliflar ushbu tadqiqot sabab-oqibat bog‘liqligini isbotlamasligini va hamma jigarini himoya qilish uchun kofe ichishni boshlashi kerak degani emasligini ta’kidlaydilar. Ularning ta’kidlashicha, kofe ushbu xususiyatini asosiy profilaktika choralari – vaznni saqlash, spirtli ichimliklar iste’molini cheklash, jismoniy faol bo‘lish va qon shakarini, qon bosimini va xolesterinni nazorat qilish bilan to‘ldirishi mumkin, ammo ularning o‘rnini bosa olmaydi.

Source link