Yangihayot tumani FVB kichik inspektori mahalliy MChJ rahbaridan 1,5 ming dollar olganda ushlandi. U ushbu pulni yong‘in xavfsizligi jihozlarini qabul qilish bo‘yicha bayonnoma rasmiylashtirib berish evaziga talab qilgan.

Toshkentda FVB xodimi qamoqqa olindi. Bu haqda Davlat xavfsizlik xizmati xabar berdi.

Ma’lum qilinishicha, DXXning Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda korrupsiyaga qarshi kurashish yo‘nalishida tezkor tadbir o‘tkazilgan. Unda Yangihayot tumani Favqulodda vaziyatlar bo‘limi kichik inspektori MChJ rahbaridan 1,5 ming dollar olganda ushlangan.

FVB xodimi ushbu pulni hamkasblari orqali tumanda faoliyat yurituvchi korxona hududiga o‘rnatilgan yong‘in xavfsizligi jihozlarini qabul qilish bo‘yicha bayonnoma rasmiylashtirib berish evaziga talab qilgan.

Holat yuzasidan Jinoyat kodeksining 168-moddasi (firibgarlik) 3-qismi “v” bandi va 28,211-moddasi (pora berish) 1-qismi bilan jinoyat ishi qo‘zg‘atilgan. Gumonlanuvchiga nisbatan qamoqqa olish tarzidagi ehtiyot chorasi qo‘llangan. Hozirda tergov harakatlari olib borilmoqda.

Avvalroq Toshkent shahrida FVV xodimiga 30 ming dollar pora taklif qilgan tadbirkor qo‘lga olingandi.

Source link

Prezidentning joriy yil 6-martdagi «Xalqaro shartnomani tasdiqlash to‘g‘risida»gi PQ-84-son qarori bilan O‘zbekiston Respublikasi Hukumati va Afg‘oniston o‘rtasida imtiyozli savdo to‘g‘risidagi bitim tasdiqlandi.

Investitsiyalar, sanoat va savdo vazirligi va Iqtisodiyot va moliya Vazirligi huzuridagi Bojxona qo‘mitasi ushbu xalqaro shartnomani amalga oshirish uchun mas’ul bo‘lgan vakolatli organlar etib belgilandi.

Tashqi ishlar vazirligi mazkur xalqaro shartnomaning kuchga kirishi uchun O‘zbekiston Respublikasi tomonidan zarur bo‘lgan davlat ichki tartib-taomillari bajarilganligi to‘g‘risida afg‘on tomoniga tegishli bildirishnoma yuboradi. 

Source link

Navoiy shahridagi 11-maktabning 9-sinf o‘quvchisi Firdavsbek O‘ktamov oliygohga kirishdagi maksimal ballni to‘plab, muddatidan oldin talaba bo‘ldi. U bu natijani 4 ta fandan milliy sertifikatni qo‘lga kiritish orqali uddalagan. Belgilangan tartib bo‘yicha u maktabni to‘liq o‘qishi kerak bo‘ladi.

Navoiy shahridagi 11-ayrim fanlar chuqur o‘rganiladigan ixtisoslashtirilgan maktabning 9-sinf o‘quvchisi muddatidan oldin talablikni naqd qildi. Bu haqda Kun.uz manbasi xabar berdi.

Ma’lum bo‘lishicha, maktabning 9-sinf o‘quvchisi Firdavsbek O‘ktamov 4 ta fandan milliy sertifikatni qo‘lga kiritgan.

Jumladan, u chet tili bo‘yicha B2, o‘zbek tili va adabiyoti fanidan A, matematika fanidan S hamda tarix fanidan A+ darajali milliy sertifikatlarni olishni uddalagan.

Bu tanlagan yo‘nalishi bo‘yicha Firdavsbek O‘ktamovga oliygohga kirish imtihonlarida to‘plash mumkin bo‘lgan maksimal ballni taqdim etadi. U 11-sinfni tugatgan paytda qo‘lga kiritgan milliy sertifikatlarining 3 tasi o‘z kuchida bo‘ladi. Chunki chet tilidan tashqari 3 ta fan bo‘yicha olingan sertifikatlarning amal qilish muddati 3 yil.

Kun.uz’ning aniqlashicha, Firdavsbek O‘ktamov pedagoglar oilasida ulg‘aygan. Uning otasi Jo‘rabek To‘rayev hamda onasi Aziza Fayziyeva oliy toifali ingliz tili fani o‘qituvchilari hisoblanib, har ikkisi Firdavsbek ta’lim olayotgan maktabda faoliyat yuritadi.

9-sinfda talabalikni naqd qilgani Firdavsbek O‘ktamovga 10- va 11-sinfni o‘qimasdan, birdan oliygohda o‘qish imkonini bermaydi. Chunki belgilangan tartib bo‘yicha o‘quvchi maktabni to‘liq o‘qishi kerak bo‘ladi.

Avvalroq ayni shu maktabning 23 o‘quvchisi muddatidan oldin talaba bo‘lgani xabar qilingandi. Maktab ma’muriyatining Kun.uz’ga bildirishicha, hozirda bunday o‘quvchilar soni 26 nafarga yetgan. 

Source link

Istanbuldagi o‘rmon hududidan o‘zbekistonlik ayol jasadi topildi va O‘zbekistonga qaytarildi. 

Joriy yilning 6-mart kuni Turkiya hududida o‘ldirilgan va ma’lum vaqt davomida qidiruvda bo‘lgan, asli samarqandlik 46 yoshli Dilafro‘z Cho‘lliyevaning jasadi O‘zbekistonning Istanbul shahridagi Bosh konsulxonasi hamda Vazirlar Mahkamasi huzuridagi Mehnat migratsiyasi agentligi ko‘magida O‘zbekistonga qaytarildi. 

Ma’lum qilinishicha, Dilafro‘z Cho‘lliyeva 2026-yil 25-yanvar kuni Turkiyaning Balikesir hududidagi ish joyidan noma’lum tomonga chiqib ketgan va bedarak yo‘qolgan. Shu munosabat bilan uning o‘g‘li Tashqi ishlar vazirligining Konsullik-huquqiy departamenti orqali murojaat yo‘llagan. 

Mazkur murojaatdan so‘ng, O‘zbekistonning Turkiyadagi diplomatik vakolatxonalari tomonidan Turkiya Tashqi ishlar vazirligiga tegishli nota yuborildi hamda Turkiya Ichki ishlar vazirligi Xavfsizlik bosh boshqarmasi bilan hamkorlikda qidiruv ishlari yo‘lga qo‘yildi. 

Anqaradagi Elchixona va Istanbuldagi Bosh konsulxona, diaspora tashkilotlari, advokatlar hamda ijtimoiy tarmoq faollari tomonidan qidiruv ishlari olib borildi. 

2026-yil 28-fevral kuni Balikesir tumanidagi o‘rmon hududidan shaxsi noma’lum jasad topildi. 

Jasad uzoq vaqt davomida qolib ketganligi sababli tashqi ko‘rinishidan aniqlash imkoni bo‘lmagan. Shu bois topilgan jasad va marhumaning o‘g‘lidan qon namunalarini olish orqali tibbiy solishtiruv (DNA) tekshiruvlari o‘tkazildi va jasad Dilafro‘z Cho‘lliyevaga tegishli ekani tasdiqlandi. 

Mazkur jinoyatni sodir etishda gumonlanib 4 nafar shaxs qo‘lga olingan bo‘lib, hozirgi vaqtda tergov harakatlari davom etmoqda.

Eslatib o‘tamiz, avval Istanbulda Sayyora Ergashaliyeva va Durdona Hakimovaning jasadi topilgandi.

Source link

Og‘ir kasallik tufayli hayot-mamot yoqasiga kelib qolgan turmush o‘rtog‘ini saqlab qolish uchun ayol jigarining bir qismini berishga qaror qildi. Navoiy viloyatida ilk bor o‘tkazilgan bu murakkab operatsiyagacha oila yillar davomida dard, xavotir va umid bilan yashadi. Oilasi uchun ayol nimalar qila olishi mumkinligi haqidagi hayotiy hikoya.

Nargiza Ro‘ziyevaning aytishicha, 2022 yilda turmush o‘rtog‘iga jigar sirrozi tashxisi qo‘yilgan. Unda gepatit asoratlari kuzatilgan. Avvaliga oila bu xabardan dovdirab qolmadi, kasallikka qarshi kurashishga harakat qildi. Davolanishlar olib borildi, tekshiruvlar o‘tkazildi.

Biroq vaqt o‘tgani sari kasallik asoratlari kuchayib bordi. Bu holat ba’zan Sherzod Jo‘rayevni tushkunlikka ham tushirib qo‘ygan.

“Bu sinov, hali hammasi o‘tib ketadi. Biz bu kasallikni yengamiz. Hayotga qarang, odamlarga qarang, yaqinlaringiz, farzandlaringiz bor. Kurashish uchun juda ko‘p sabablar bor, deb turmush o‘rtog‘imga tasalli berib turardim”, – deydi Nargiza Ro‘ziyeva.

Oila bir necha marta Navoiy va Toshkentda tekshiruvlardan o‘tdi. Shifokorlar jigar transplantatsiyasi, ya’ni jigar ko‘chirib o‘tkazish amaliyoti zarurligini bildirdi. Buning uchun esa donor kerak edi.

“Birinchi bo‘lib o‘zim jigarimni beraman dedim. Singillari ham donor bo‘lishga tayyorligini aytdi. Bir nechta tekshiruvlardan keyin mening natijalarim mos keldi. Turmush o‘rtog‘imga jigarimni berishim mumkin ekan. Buni eshitganimda juda xursand bo‘ldim.

Allohga shukur qilaman. Bu bergan ne’matlari oldida kichik bir sinov. Nasib qilsa, ikkimiz ham bu sinovdan o‘tamiz”, – degan u operatsiyaga kirishdan oldin.

Operatsiya Navoiy viloyati ko‘p tarmoqli tibbiyot markazida – viloyatda birinchi marta o‘tkazildi.

Navoiy viloyati sog‘liqni saqlash boshqarmasi bosh jarrohi, tibbiyot fanlari nomzodi O‘tkir Xushvaqtovning aytishicha, operatsiya Milliy tibbiyot markazi mutaxassislari bilan hamkorlikda amalga oshirilgan.

Uning ta’kidlashicha, bunday amaliyotlarning hududlarda yo‘lga qo‘yilishi yuqori texnologiyali tibbiy xizmatlarni aholiga yaqinlashtirish imkonini beradi. Shuningdek, mahalliy mutaxassislar ham bunday murakkab operatsiyalarni bajarish bo‘yicha tajriba orttiradi.

Jigar transplantatsiyasi juda murakkab jarrohlik amaliyoti hisoblanadi. Operatsiya vaqtida bir vaqtning o‘zida ham donor, ham bemor operatsiya qilinadi. Bu esa shifokorlar jamoasidan katta mas’uliyat va ko‘plab mutaxassislarning hamkorligini talab qiladi.

Ma’lum bo‘lishicha, ushbu operatsiyaga uch oy davomida tayyorgarlik ko‘rilgan. Sherzod Jo‘rayevga turmush o‘rtog‘ining jigarini ko‘chirib o‘tkazish amaliyoti qariyb 12 soat davom etgan va muvaffaqiyatli yakunlangan.

Ma’lumotlarga ko‘ra, 2025 yilning o‘zida Milliy tibbiyot markazida 150 ta jigar transplantatsiyasi amalga oshirilgan. Navoiy viloyati esa bunday murakkab operatsiya o‘tkazilgan oltinchi hududga aylandi.

Shifokorlar jamoasi qariyb yarim kun davomida operatsiya xonasida ishlashdi.

Operatsiyadan keyin Sherzod Jo‘rayev uchun eng katta yengillik – gapira olish imkoni bo‘ldi.

“Ayolim donorlik qilaman degan paytda avvalo o‘zim qarshilik qilganman. Bolalarimizni o‘yladim. Agar ikkimiz ham operatsiyadan sog‘lom chiqmasak, ularning taqdiri nima bo‘ladi, deb xavotirlandim.

Ammo ayolim qaroridan qaytmadi. Kasallikka qarshi birga kurashamiz, deb yonimda turdi.

Narkozdan chiqqanimdan keyin birinchi izlaganim u bo‘ldi. Uni ko‘rdim, yonimdagi krovatda yotar ekan. Ikkimiz ham operatsiyadan yaxshi chiqdik. Shunday ayolni bergani uchun shukur qilaman”, – deydi u.

Operatsiyadan keyin Nargiza Ro‘ziyeva o‘zini yaxshi his qilayotganini aytdi. Uning so‘zlariga ko‘ra, bu qarorni qabul qilish oson bo‘lmagan, ammo u turmush o‘rtog‘ini yolg‘iz qoldirishni tasavvur ham qila olmagan.

“Avvalo Allohga shukur qilaman. Keyin yaqinlarimiz, farzandlarimiz va duo qilib turgan odamlarning qo‘llab-quvvatlashi bizga kuch berdi. Albatta, qo‘rquv bo‘ldi, yig‘lagan paytlarim ham bo‘ldi. Lekin baribir qalbimda ishonch bor edi – biz bu sinovdan o‘tamiz deb ishonardim.

Turmush o‘rtog‘im avval donorlikka qarshi bo‘ldi. Bolalarimiz haqida o‘yladi, mening sog‘lig‘imdan xavotir oldi. Qat’iy turdim, agar shu holatga men tushganimda siz ham o‘zingizni ayamagan bo‘lardingiz. Chunki oilada bir-birini asrash – eng katta burch, dedim.

Operatsiyadan keyin ko‘zimni ochganimda birinchi so‘raganim turmush o‘rtog‘im bo‘ldi. Uning tirikligi, sog‘lomligi men uchun hammasidan muhim edi.

Men bu ishni qahramonlik deb hisoblamayman. Bu – oila uchun qilingan oddiy burch. Agar oilada muhabbat va ishonch bo‘lsa, inson har qanday sinovdan o‘ta oladi. Ayniqsa, oilani saqlab qolish uchun ayol kishi sinovlarga bardosh berishi, qiyinchiliklarga tayyor turishi lozim.

Biz go‘yo hayotga qaytadan kelgandek bo‘ldik. Endi yanada kuchliroq yashaymiz, farzandlarimiz bilan baxtli hayot kechirishni istaymiz”, – deydi Nargiza Ro‘ziyeva.

Bu voqea inson qalbidagi muhabbat va sadoqat ba’zan tibbiyotning eng murakkab amaliyotlariga ham kuch bag‘ishlashini yana bir bor ko‘rsatdi. Navoiydagi bu operatsiya nafaqat bir oilaning hayotini saqlab qoldi, balki hududlarda ham yuqori texnologiyali tibbiy amaliyotlarni amalga oshirish mumkinligini ko‘rsatdi.

Source link