2026 yilning dastlabki uch oyida O‘zbekistonda tug‘ilgan chaqaloqlar orasida o‘g‘il bolalar soni qizlarga nisbatan ko‘proq bo‘ldi. Milliy statistika qo‘mitasi ma’lumotlariga ko‘ra, mazkur davrda mamlakat bo‘yicha 191 mingdan ortiq tirik tug‘ilish holati qayd etilgan.

Statistikaga ko‘ra, yanvar–mart oylarida jami 191 086 ta tirik tug‘ilish ro‘yxatga olingan. Shundan 98,5 ming nafari yoki 51,5 foizi o‘g‘il bolalar, 92,6 ming nafari yoki 48,5 foizi esa qiz bolalar hissasiga to‘g‘ri kelgan.

Hududlar kesimida tahlil qilinganda, qishloq joylarda tug‘ilish ko‘rsatkichi yuqori bo‘lgan. Xususan, qishloqlarda 97,4 mingta chaqaloq tug‘ilgan bo‘lsa, shahar joylarda bu ko‘rsatkich 93,7 mingtani tashkil etgan.

Mazkur davrda har ming aholiga nisbatan tug‘ilish koeffitsiyenti 20,2 promille bo‘lgani qayd etildi.

Source link

Qoraqalpog‘istonning Taxiatosh tumanida fuqaroni “O‘zbektelekom” aksiyadorlik kompaniyasiga ishga joylashtirib qo‘yishni va’da qilgan shaxs tezkor tadbir davomida qo‘lga olindi. U ishga kiritish uchun 20 million so‘m talab qilgan.

Foto: Telegram / Department_uz

Bosh prokuratura huzuridagi Departamentning Taxiatosh tumani bo‘limi hamda boshqa huquqni muhofaza qiluvchi organlar xodimlari hamkorligida o‘tkazilgan tadbirda muqaddam sudlangan N.S. ismli fuqaro ushlangan.

Tergov ma’lumotlariga ko‘ra, u fuqaro X.R.ni go‘yoki yuqori lavozimda ishlovchi tanishlari orqali “O‘zbektelekom” AKga ishga kiritib qo‘yishini aytgan. Shu maqsadda kelishilgan 20 million so‘mning 15 million so‘mini olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddalari (pora berish) bilan jinoyat ishi qo‘zg‘atilib, tergov harakatlari olib borilmoqda.

Source link

Farzandlarini aylantirib kelish maqsadida ko‘chaga chiqqan er-xotin san’at saroyi yoki savdo majmuasiga borish masalasida tortishib qolgan. Oradan 2 kun o‘tib janjal yana davom etgan: ayol eriga nisbatan oilaviy zo‘ravonlik qilib, qo‘li bilan urgan holda unga tan jarohati yetkazgan. Sud ayolni jinoiy jazoga tortdi.

Sun’iy intellekt yaratgan surat

Farg‘ona shahrida erini urgan ayol jinoiy jazoga tortildi. Kun.uz sud hujjatlari bilan tanishdi.

Sud hukmiga ko‘ra, 1999 yilda tug‘ilgan M.A. 2026 yil 20 fevral kuni turmush o‘rtog‘i M.S. bilan oilaviy kelishmovchilik sabab o‘zaro janjallashgan. Ayol janjal paytida erini qo‘li bilan urib, qasddan tan jarohati yetkazgan hamda unga nisbatan oilaviy zo‘ravonlik qilgan.

Ayol sudda aybiga iqrorlik bildirgan. U ko‘rsatmasida o‘zaro janjal paytida o‘zini himoya qilmoqchi bo‘lib, erini turtib yuborganini aytgan.

“2026 yil 18 fevral kuni farzandlarimizni aylantirib kelish uchun ko‘chaga chiqdik. Men san’at saroyiga, turmush o‘rtog‘im savdo majmuasiga borishni aytdi. Jahlim chiqib, u bilan janjallashib ketdim. U esa uyga kirib ketdi. Qo‘rqib, otamning uyiga ketib yubordim”, degan ayol.

Oradan 2 kun o‘tib M.A. turmush o‘rtog‘ining uyiga qaytgan hamda er-xotin o‘rtasida yana janjal chiqqan.

“Meni urmoqchi bo‘lganida o‘zimni himoya qilish maqsadida qo‘lim bilan turtib yubordim. Hozirda harakatlarim noqonuniy ekanini tushunib yetdim”, degan M.A.

Jabrlanuvchi erkak esa ayolini kechirmasligini aytib, suddan unga nisbatan qonuniy chora ko‘rishni so‘ragan.

JIB Farg‘ona shahar sudi hukmi bilan M.A. Jinoyat kodeksining 126-1-moddasi (oilaviy zo‘ravonlik) 2-qismida nazarda tutilgan jinoyatni sodir etganlikda aybli deb topilgan. Unga BHMning 20 baravari (8 mln 240 ming so‘m) miqdorida jarima jazosi tayinlangan.

Jabrlanuvchi erkakka davolanishi uchun ketgan moddiy va ma’naviy zararni undirish masalasida fuqarolik sudiga murojaat qilish huquqi tushuntirilgan. 

Source link

Kun.uz «Bunyodkor» stadioni ishchilariga o‘tgan yilning dekabr oyidan beri pul berilmayotgani haqida surishtiruv e’lon qilgan edi. Davlat mehnat inspeksiyasi stadion xodimlariga shu paytgacha to‘lanmagan oyliklari to‘liq undirib berilgani haqida xabar berdi. Xususan, direksiyaning 49 nafar ishchisiga jami 867 mln so‘mlik ish haqi to‘lab berilgan.

«Bunyodkor» stadioni direksiyasining bir guruh xodimlari oyliklari 2025 yilning dekabr oyidan buyon kechikayotgani sababli og‘ir iqtisodiy ahvolda qolganidan shikoyat qilib, Kun.uz’ga murojaat qilgandi. Davlat mehnat inspeksiyasi stadion ishchilariga shu paytgacha to‘lanmagan oyliklari to‘liq undirib berilgani haqida xabar berdi.

Ta’kidlanishicha, «Bunyodkor» stadioni binolari va inshootlaridan foydalanish direksiyasi» korxonasining 49 nafar xodimiga jami 867 mln so‘mlik ish haqi undirib berilgan.

Hozirda xodimlar oldida ish haqi bo‘yicha qarzdorlik mavjud emasligi qayd etilgan. O‘z navbatida xodimlarga qaysi manbadan maoshlar to‘lab berilgani ochiqlanmagan.

 Oyliklar kechikishiga nima sabab bo‘lgandi?

Shu paytgacha «Bunyodkor» direksiyasi xodimlarini moliyalashtirish 2018 yildagi prezident qarori asosida «O‘zbekneftgaz» tomonidan amalga oshirilgan. Ammo joriy yildan boshlab vaziyat birdan o‘zgardi. Gaz qazib olish ko‘rsatkichlarining muttasil kamayib borayotgani va qator tizimli muammolar fonida «O‘zbekneftgaz» 2026 yil 1 yanvardan «Nasaf», «Buxoro» va «Bunyodkor» klublariga pul ajratishni to‘xtatdi. Kompaniya sohaga oid bo‘lmagan aktivlarni tasarrufdan chiqarish, homiylik to‘lovlari hamda xarajatlarni maqbullashtirishini e’lon qildi. O‘z navbatida Superliga klublarining har biriga davlat budjetidan 2026 yilda 35 mlrd so‘mdan, 2027 yilda 30 mlrd so‘mdan, 2028 yilda esa 25 mlrd so‘mdan mablag‘ ajratiladigan bo‘ldi. Ya’ni shu paytgacha «O‘zbekneftgaz» qaramog‘ida bo‘lgan «Nasaf», «Buxoro» va «Bunyodkor» klublariga muqobil manbalardan pul berilyapti, ammo «Bunyodkor» direksiyasini moliyalashtirish haligacha noaniq bo‘lib qolyapti. Bu esa yuzlab ishchilarning oyliksiz qolib ketishiga sabab bo‘ldi.

Source link

Toshkent viloyatining Parkent tumanida davlat zaxirasidagi yer maydonini noqonuniy tarzda sotishga uringan shaxslar tezkor tadbir davomida ushlandi. Ular yer hujjatlarini rasmiylashtirish uchun mansabdor shaxsga pora berishni rejalashtirgani aniqlangan.

Ma’lum bo‘lishicha, mahalla fuqarolar yig‘ini raisi va 1970 yilda tug‘ilgan fuqaro davlat zaxirasidagi 10 sotix yer maydonini xaridorga 20 ming AQSh dollariga sotishga kelishgan. Shuningdek, ular Davlat kadastrlari palatasining tuman filiali muhandisi orqali 2-3 ming dollar evaziga yer hujjatlarini rasmiylashtirib berishni maqsad qilgan.

Davlat xavfsizlik xizmati xodimlari tomonidan Iqtisodiy jinoyatlarga qarshi kurashish departamenti hamda ichki ishlar organlari bilan hamkorlikda o‘tkazilgan tezkor tadbirda mahalla raisi, kadastr muhandisi va mazkur fuqaro 17 ming AQSh dollari hamda 37 million so‘m olgan vaqtida qo‘lga olingan.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.

Mutasaddilar fuqarolarni shu kabi qonunbuzilish holatlari haqida DXXning 1520 qisqa raqami orqali xabar berishga chaqirdi. Shaxs sir saqlanishi kafolatlanishi ta’kidlandi.

Source link