O‘zbekistonlik iqtidorli yoshlar va mutaxassislar uchun Germaniyada maxsus yozgi o‘quv kurslarini tashkil etish rejalashtirilmoqda. Bu masala Germaniyaning Frayburg shahrida o‘tkazilgan xalqaro uchrashuvda muhokama qilindi.

O‘zbekistonning Frankfurt-Mayn shahridagi Bosh konsulxonasi diplomatlari, Shveytsariyaning Swiss Cham Asia tashkiloti hamda Singularity Academy instituti rahbariyati o‘rtasida bo‘lib o‘tgan muloqotda ta’lim, ilm-fan va sarmoya sohalaridagi hamkorlik istiqbollari ko‘rib chiqildi.

Uchrashuvda o‘zbekistonlik iqtidorli yoshlar va mutaxassislar uchun Germaniyada yoz mavsumida maxsus o‘quv kurslarini tashkil etish, ularning xalqaro tajriba va bilimlarini oshirish imkoniyatlarini yaratish masalalari muhokama qilindi.

Shuningdek, tomonlar “O‘rta koridor” transport yo‘lagini ilmiy jihatdan o‘rganish, O‘zbekistonga sarmoya jalb qilish, sog‘liqni saqlash va “yashil” energetika sohalarida qo‘shma loyihalarni amalga oshirish yuzasidan fikr almashdi.

Muzokaralar yakunida erishilgan kelishuvlarni amaliyotga tatbiq etish bo‘yicha aniq mexanizmlarni ishlab chiqish va hamkorlikni davom ettirishga kelishib olindi.

Source link

Navoiy shahridagi ko‘p qavatli turar joy binosida sodir bo‘lgan yong‘in oqibatida sakkizta xonadon zararlandi. Favqulodda vaziyatlar xizmati yong‘inni bir soatdan ortiq vaqt ichida bartaraf etdi.

Foto: Favqulodda vaziyatlar vazirligi

Favqulodda vaziyatlar vazirligi ma’lumotiga ko‘ra, 2 iyun kuni soat 04:19 da Navoiy shahrining Kimyogar mahallasida joylashgan ko‘p qavatli uyning tom qismi yonayotgani haqida xabar kelib tushgan.

Hodisa joyiga yettita yong‘in-qutqaruv bo‘linmasi va ikkita avtonarvon jalb qilinib, qutqaruvchilar soat 04:23 da yetib borgan. Yong‘in soat 04:35 da qurshab olingan va soat 05:35 da to‘liq o‘chirilgan.

Dastlabki ma’lumotlarga ko‘ra, to‘qqiz qavatli uyning to‘qqizinchi qavatida joylashgan sakkizta xonadonning tom qismi, shiftlari va ichki hududi jami 300 kvadrat metr maydonda yongan.

Yong‘in oqibatida jabrlanganlar haqida ma’lumot kelib tushmagan. Ayni paytda yong‘inning kelib chiqish sabablari va yetkazilgan moddiy zarar miqdori aniqlanmoqda.

Source link

Xabaringiz bor, ayni kunlarda Qoraqalpog‘istonning Bo‘zatov tumani butun mamlakatning eng iqtidorli yoshlari jam bo‘lgan, musiqa va san’at nafasi bilan yashayotgan qaynoq maskanga aylandi. Bu yil 370 ming yosh ichidan saralanib, finalga yetib kelgan 165 nafar eng sara iste’dod umumiy mukofot jamg‘armasi 2,5 milliard so‘m bo‘lgan «Yoshlar ovozi» tanlovida bellashmoqda.

Kechagina festivalning ilk bosqichida 40 nafarga yaqin yosh baxshilarning jonli ijrosi, do‘mbira chertib aytgan qo‘shiqlari davrani qizdirgan bo‘lsa, bugun Bo‘zatov osmoni butunlay o‘zgacha — nafis va mahobatli opera navolari bilan to‘ldi.

Sahnani opera yo‘nalishi bo‘yicha uchta yosh toifasida (10-15, 16-22, 23-30 yoshlar) bellashayotgan 40 dan ziyod iqtidorli o‘g‘il-qizlar egalladi. Mazkur yo‘nalishda g‘oliblik uchun kurashayotgan operachilar ham festivalning umumiy mukofot jamg‘armasidan munosib rag‘batlantirilishi san’at yo‘lidagi intilishlariga juda katta moddiy va ma’naviy dastakdir.

Keyingi paytlarda ushbu murakkab san’at turiga yoshlarning intilishi va mehri nechog‘lik kuchayganini ularning ijrosida, nigohlaridagi shijoatda yaqqol sezish mumkin. Bugungi dasturdan milliy musiqa an’analari va dramatik vokal ijroni o‘zida mujassam etgan o‘zbek opera san’atining durdonalari o‘rin oldi. Sahnada «Dilorom», «Gulsara», «Maysaraning ishi», «Zaynab va Omon» kabi klassik asarlardan ariyalar kuylandi.

Shuningdek, yosh ijrochilar jahon opera klassikasining eng murakkab namunalarini ham yuksak mahorat bilan ijro etdilar. Jumladan: J. Verdin, J. Puchchin, J. Bize kabi opera kompozitorlarinmng asarlaridan yangragan lirik va dramatik ariyalar Bo‘zatov kengliklarida aks-sado berdi.

O‘zbekiston xalq artisti, hakamlar hay’ati a’zosi Normo‘min Sultonov yosh ijrochilarga o‘z tavsiyalarini bildirib o‘tdi: «Repertuar tanlashda adashmaslik juda muhim. Yosh xususiyatlariga va ovoz imkoniyatlariga mos, birmuncha qulay asarlar tanlansa, ijro yanada tabiiy chiqadi va, albatta, baholar ham yuqori bo‘ladi».

Bu yilgi festival tom ma’noda shunchaki oddiy tanlov emas, balki haqiqiy tajriba va do‘stlik maydoniga aylandi. Ishtirokchilar baxshichilik yoki opera yo‘nalishida chiqish qilishidan qat’i nazar, ularning ovozi nafaqat hakamlar hay’ati, san’at ixlosmandlari va jurnalistlarni, balki shu yerda mehnat qilayotgan oddiy ishchi-xodimlarni, mezbonlarni ham birdek sehrlab qo‘ymoqda.

«Yoshlar ovozi» san’atga oshufta qalblarni yanada birlashtirishga, yurtimizda yangidan-yangi iste’dodlar zanjirini yaratishga xizmat qilmoqda. Festival 5-iyunga qadar davom etadi.

Source link

Raqobat qo‘mitasi tomonidan tadbirkorlik sub’yektlarida tekshiruvlarni yanada shaffof va manzilli tashkil etish maqsadida «xavfni tahlil etish» elektron tizimini joriy etish taklif qilinmoqda. Yangi tartibga ko‘ra, tadbirkorlar huquqbuzarlik sodir etish ehtimoliga qarab xavf darajalari bo‘yicha tasniflanadi.

Nizom loyihasiga muvofiq, elektron tizim raqobat, iste’molchilar huquqlarini himoya qilish, reklama, davlat xaridlari hamda tovar-xomashyo birjalari faoliyati sohalarida qonunchilik buzilishi xavfini baholash uchun xizmat qiladi.

Hujjatda qayd etilishicha, xavf tahlili natijalari tadbirkorga nisbatan avtomatik tarzda ta’sir choralarini qo‘llash uchun asos bo‘lmaydi. Shuningdek, baholash jarayonida tadbirkorlik sub’yektlaridan qo‘shimcha hujjat va ma’lumotlar talab qilinishiga yo‘l qo‘yilmaydi.

Tizim doirasida tadbirkorlar yuqori, o‘rta va past xavf toifalariga ajratiladi. Yuqori va o‘rta xavf guruhiga kiruvchi sub’yektlarga nisbatan avvalo profilaktika tadbirlari o‘tkaziladi, shundan keyingina zarurat bo‘lsa tekshiruv tashabbus qilinishi mumkin. Past xavf toifasidagi tadbirkorlik sub’yektlarida esa tekshiruvlar o‘tkazilmaydi.

Loyihada tekshiruvlarning qonuniyligi va shaffofligini ta’minlash maqsadida ularni «Yagona davlat nazorati» axborot tizimida ro‘yxatdan o‘tkazish hamda Biznes-ombudsmanni xabardor qilish tartibi ham nazarda tutilgan.

Source link

Muzqaymoqning foydalari uning kalsiy va oson hazm bo‘ladigan oqsil manbai ekani, shuningdek stressni kamaytirishga yordam beraadigan xususiyatidan kelib chiqadi.

Rossiyalik diyetolog, tibbiyot fanlari doktori Olga Yamilova bu haqda RIA Novosti muxbirlariga bergan intervyusida gapirib o‘tdi. 

Uning so‘zlariga ko‘ra, bu klassik lazzat tarkibida kalsiy va oson hazm bo‘ladigan oqsilning ajoyib manbalari bo‘lgan sut va qaymoq mavjud. «Muzqaymoqning shubhasiz foydasi — bu uning zavq bag‘ishlashi, bu stressni kamaytiradi va oziq-ovqat bilan sog‘lom munosabatlarning bir qismidir», deb ta’kidladi mutaxassis. 

Biroq, Yamilova sevimli sovuq desertning salbiy tomonlarini ham tilga oldi. Shakar yuqori energiya qiymati tufayli «bo‘sh» kaloriyalarni o‘z ichiga oladi va vitaminlar, minerallar va tolaga ega emas. Bu omillar ortiqcha vazn ortishiga va boshqa kasalliklarga olib keladi. 

Muzqaymoq hayvon yog‘lariga juda boy, bu oshqozon osti bezi va jigarga ortiqcha yuk tushiradi, bu esa ateroskleroz xavfini oshiradi, deb qo‘shimcha qildi ovqatlanish bo‘yicha mutaxassis. Uning so‘zlariga ko‘ra, do‘kondan sotib olingan ko‘pgina mahsulotlar, sanab o‘tilgan ingrediyentlardan tashqari, sut yog‘i o‘rnini bosuvchi moddalarni o‘z ichiga oladi. Qayta ishlangan o‘simlik moylari (palma, soya, raps va boshqalar), stabilizatorlar va xushbo‘ylashtiruvchilar aralashmalari muzqaymoqning foydasini kamaytiradi, deydi diyetolog.

Source link