Sport
Sun’iy intellektdan umuman foydalanmaydigan Messi qanday qilib ChatGPT yuziga aylandi?
Texnologiya olami va futbol dunyosining eng yirik vakillari kutilmagan tarzda birlashdi. Eng yirik sun’iy intellekt laboratoriyasi — OpenAI kompaniyasi sayyoramizning eng mashhur futbolchisi, Jahon chempioni Lionel Messi bilan rasmiy global hamkorlik boshlanganini e’lon qildi. Ushbu kampaniya OAV tomonidan sun’iy intellekt tarixidagi ilk global futbol mavsumining boshlanishi sifatida baholanmoqda.
Hamkorlik doirasida taqdim etilgan ilk eksklyuziv videorolikda Messi ChatGPT Images (DALL-E 3) imkoniyatlaridan foydalanib, o‘zining suratini yangicha ko‘rinishda tasavvur qiladi. U chat-botga o‘z sochlarini Argentina bayrog‘i ranglariga (oq va havo rang) bo‘yash, ammo bunda tabiiylikni saqlab qolish haqida buyruq (prompt) beradi. Tayyor bo‘lgan suratni esa Argentina terma jamoasi a’zolari bor umumiy chatga yuboradi.
OpenAI marketologlari ushbu kampaniyani shunchaki reklama emas, balki muxlislar uchun interaktiv vositaga aylantirishdi. Futbol yulduzi tomonidan ishlatilgan aniq matnli buyruq ChatGPT tizimiga tayyor andoza (preset style) sifatida joylandi.
Endilikda butun dunyodagi millionlab muxlislar o‘z suratlarini yuklab, Messining ushbu promptidan foydalangan holda sochlarini o‘z vatanlari yoki sevimli jamoalari bayrog‘i ranglariga bo‘yashlari mumkin. Ijtimoiy tarmoqlarda ushbu trend #MessiMode heshtegi ostida ommalashmoqda.
Lionel Messining rasmiy bayonotidan:
“Menga har bir davlatda odamlar futbolni qanday turlicha his qilishi va undan zavqlanishini kuzatish doimo yoqqan. Men o‘z muxlisligimni yangicha usulda ifodalash uchun ChatGPTga murojaat qildim va albatta, birinchi navbatda Argentina ranglarini tanladim. O‘ylaymanki, bu mavsumda ko‘plab muxlislar sun’iy intellekt yordamida o‘yinlarni kuzatish, maydondagi holatlarni yaxshiroq tushunish va o‘z jamoalarini qo‘llab-quvvatlashning yangi yo‘llarini kashf etadilar”.
G‘arb moliyaviy va marketing nashrlarining tahlillariga ko‘ra, OpenAI ushbu qadam orqali ChatGPTni shunchaki matnli yordamchi emas, balki jonli sport tadbirlarining ajralmas qismiga aylantirishni maqsad qilgan.
Statistikaga ko‘ra, so‘nggi bir haftaning o‘zida foydalanuvchilar tomonidan ChatGPTga futbol va turnirlarga oid 17 milliondan ortiq so‘rovlar yuborilgan. Muxlislar SI yordamida nafaqat suratlar yaratishmoqda, balki terma jamoalar tarkibi, o‘yinlar tahlili, prognozlar va uchrashuvlar jadvali haqida ma’lumot olishmoqda. Instagramda 500 milliondan ortiq kuzatuvchiga ega bo‘lgan Messi esa ushbu ommaviy talabni OpenAI foydasiga kapitallashtiruvchi asosiy global qiyofaga aylandi.
Shunisi qiziqki, joriy yilning yanvar oyida bergan intervyularidan birida Messi kundalik hayotda sun’iy intellekt yoki ChatGPTdan umuman foydalanmasligini, oilada faqat rafiqasi Antonela ushbu texnologiyalarga qiziqishini tan olgan edi. Ammo oradan bir necha oy o‘tib, aynan u OpenAI tarixidagi eng yirik ambassadorga aylandi.
Tarmoq kuzatuvchilarining fikricha, ushbu kampaniya muxlislarni faqat tomoshabin bo‘lishdan to‘xtatib, ularni kontent yaratuvchisi sifatida futbol ekotizimiga jalb qilishda yangi davrni boshlab beradi.
Xalqaro shaxmat federatsiyasi (FIDE) Prezident kengashi rossiyalik shaxmatchilarni Butunjahon shaxmat Olimpiadasida ishtirok etishiga ruxsat bermadi. Bu haqda Rossiya shaxmat federatsiyasi ijrochi direktori Aleksandr Tkachyov TASS agentligiga ma’lum qildi.
«Jahon shaxmat Olimpiadasida terma jamoalarimiz qatnashmaydi. Kengash ushbu qarorni FIDE prezidenti vazifasini bajaruvchi janob Vishvanatan Anandning tashabbusi bilan qabul qildi», — dedi Tkachyov.
Butunjahon shaxmat Olimpiadasi 16–27 sentyabr kunlari Samarqand shahrida bo‘lib o‘tadi.
2025 yilning dekabrida Xalqaro shaxmat federatsiyasi Bosh assambleyasi rossiyalik sportchilarga nisbatan cheklovlarni to‘liq va qisman bekor qilish uchun ovoz bergan edi. Rossiyalik shaxmatchilarning qaytishiga 61 delegat ovoz bergan, 51 delegat qarshi chiqqan.
Biroq 2026 yil yanvarda Buyuk Britaniya, Germaniya, Norvegiya, Estoniya va Ukraina shaxmat federatsiyalari FIDEning rossiyalik shaxmatchilarga nisbatan sanksiyalarni to‘liq bekor qilish haqidagi qaroriga e’tiroz bildirish niyatida ekani xabar qilindi. Shundan so‘ng, 2026 yil iyun oyida sanksiyalar qayta joriy etildi.
Avvalroq mazkur Olimpiadani Magnus Karlsen va yana bir qator shaxmat yulduzlari ham o‘tkazib yuborishi ma’lum bo‘lgandi.
Krishtianu Ronaldu joriy mavsum nihoyasida professional futboldagi faoliyatiga yakun yasashi mumkin. Bu haqda u Vogue jurnaliga intervyusida ma’lum qildi.
«Ehtimol, bu futboldagi so‘nggi yilim bo‘lishi mumkin, o‘zimdan ulkan meros qoldirishni istayman», — dedi Ronaldu.
Besh karra «Oltin to‘p» egasi ta’kidlashicha, bo‘sh vaqtini hordiq va sayohatlarga ajratmoqchi.
Krishtianu Ronaldu professional futbolga kirib kelganiga 25 yil bo‘ldi. Birinchi katta o‘yinini 2002-yil 14-avgustda Lissabonning «Sporting» klubi safida Milanning «Inter»iga qarshi o‘tkazgan.
Londonning «Arsenal» klubi o‘z tarixida 18-marta Angliya superkubogini qo‘lga kiritdi. Jamoa Kardiffda «Manchester Siti»ni 3:0 hisobida mag‘lub etdi.
O‘yinning 23-soniyasida Rikkardo Kalafiori hisobni ochdi. One Football nashrining ma’lumotlariga ko‘ra, bu 1968 yildan beri superkubok o‘yinining birinchi daqiqasida urilgan birinchi va kubok tarixidagi eng tezkor gol bo‘ldi.
London jamoasi safida yana Kay Xaverts (28) va Martin Edegor (48) gol urishdi.
O‘tgan mavsumda «Arsenal» Premer ligada g‘olib bo‘lgan bo‘lsa, manchesterliklar Angliya kubogini qo‘lga kiritdi.
«Shaharliklar» safida Abduqodir Husanov to‘liq harakat qildi.
Portugaliyalik hujumchi Krishtianu Ronaldu otasi vafot etgan argentinalik futbolchi Lionel Messini qo‘llab-quvvatladi. U Messining Instagram sahifasidagi posti ostida izoh qoldirdi.
«Bu qiyin damlarda siz va yaqinlaringizni mahkam quchgan holda chuqur hamdardlik bildiraman, Leo. Bardoshli bo‘ling», deb yozgan Ronaldu.
Avval Messi «Inter Mayami»dagi o‘yinchilik faoliyatini to‘xtatgani e’lon qilingan edi. U oilasi va do‘stlarini qo‘llab-quvvatlash uchun Argentinada qoldi.
Xorxe Messi 8-avgust kuni 68 yoshida vafot etdi. U uzoq davom etgan og‘ir kasallikdan so‘ng olamdan o‘tdi. Ko‘p yillar davomida argentinalik futbolchining otasi o‘z o‘g‘lining faoliyatida muhim o‘rin tutardi.
Amazon asoschisi Jeff Bezos professional sportga sarmoya kiritish niyatida. The Guardian nashrining xabar berishicha, tadbirkor boshqa investorlar bilan birgalikda Angliyaning «Liverpul» futbol klubining kamida 30 foiz ulushini sotib olishni ko‘rib chiqmoqda. Kelishuv 1,35 milliard funt sterling yoki taxminan 1,8 milliard dollarga teng bo‘lishi mumkin.
«Liverpul» taxminan 6 milliard dollarga baholanadi va dunyodagi eng taniqli sport brendlaridan biri bo‘lib qolmoqda. Bezosning qiziqishi kengroq tendensiyaga mos keladi: badavlat amerikalik investorlar Angliya futbol klublarida faol ravishda ulushlarni sotib olmoqdalar. Amerikalik aksiyadorlar allaqachon «Chelsi», «Kristal Pelas», «Everton» va «Bornmut» kabi 20 ta Premer-liga jamoalaridan 13 tasiga egalik qilishadi.
Agar kelishuv amalga oshsa, Bezos ingliz futboliga faol ravishda sarmoya kiriyotgan amerikalik milliarderlar safiga qo‘shiladi.
Investorlar uchun ingliz futbolining jozibadorligi qisman sportning Qo‘shma Shtatlarda tobora ommalashib borayotgani bilan bog‘liq. Shu bilan birga, yetakchi Amerika sport franshizalari ko‘pincha yangi investorlar uchun juda qimmat yoki cheklangan, ingliz klubidagi ulush esa global auditoriyaga va eng tijorat jihatidan jozibador sport bozorlaridan biriga kirish imkonini beradi.
Oziq-ovqat ishlab chiqarishda qaysi hududlar yetakchi?
Prezident ishtirokida umumiy qiymati 50 trln so‘mlik loyihalar ishga tushirildi
«Milliy manfaatlarni himoya qilish dunyodan yopilish degani emas» — Sherzod Asadov
-
Siyosat4 days ago
Илҳом Алиев Тошкентда тантанали кутиб олинди
-
Siyosat4 days ago
To‘qayev prezidentlikka qayta nomzod qo‘yishi haqidagi savolga javob berdi
-
Siyosat3 days ago
Ўзбекистон ва Озарбайжон раҳбарлари Бухоронинг машҳур обидаларини зиёрат қилдилар (фото)
-
Iqtisodiyot5 days ago
O‘zbekistonda kiyim ishlab chiqarish bo‘yicha qaysi hududlar yetakchi?
-
Siyosat4 days ago
O‘zbekiston va Ozarbayjon o‘rtasida Abadiy do‘stlik shartnomasi imzolandi
-
Siyosat4 days ago
Shavkat Mirziyoyev «Haydar Aliyev» ordeni bilan taqdirlandi
-
Siyosat2 days ago
«Milliy manfaatlarni himoya qilish dunyodan yopilish degani emas» — Sherzod Asadov
-
Siyosat3 days ago
Shavkat Mirziyoyev AQSh kongressmenlari delegatsiyasini qabul qildi