Sport
«Siti»ga avtobus yordam bermadi, «Barsa» «Real»ni quvmoqda. Kun o‘yinlari
Husanov yana tanaffusda almashtirildi, Shomurodov yana gol urdi, «Barselona»da shedevr. Yakshanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: Gvardioladan avtobus
«Arsenal» – «Manchester Siti» 1:1
Gollar: Holand, 9 (0:1). Martinelli, 90+3 (1:1)
«Arsenal»: Rayya, Saliba, Gabriel Magalyayns, Kalafiori, Timber (Martinelli, 80), Subimendi (Moskera, 90+8), Rays, Merino (Eze, 46), Trossar (Nvaneri, 84), Madueke (Saka, 46), Yokeresh
«Manchester Siti»: Donnarumma, Ruben Diash, Gvardiol, O`Rayli (Stouns, 87), Husanov (Mateus Nunes, 46), Rodri, Reynders, Foden (Ake, 68), Doku (Savio, 87), Bernardu Silva, Holand (Gonsales, 76)
Ogohlantirishlar: Timber, 46 – Bernardu Silva, 36. Donnarumma, 77
«Siti» turning markaziy uchrashuviga maksimal darajada kutilgan tarkib bilan tushdi. Gvardiola 2021 yildan buyon ilk bor qatorasiga uch o‘yinda bir xil tarkibni tushirdi. O‘zbekistonlik himoyachi himoyaning o‘ng qanotidagi o‘rnini mustahkam egallagani ma’lum bo‘ldi. «Arsenal»da esa bu mavsumda ilk bor Trossar ilk daqiqalardan o‘ynadi, Arteta bir necha kun olin Chempionlar ligasida «Atletik» bilan o‘yinda 1+1 ko‘rsatkich qayd etgan futbolchisiga ishonch bildirdi.
O‘yinning ilk daqiqalaridan «Arsenal» katta kuch bilan oldinga tashlanib, raqib jarima maydonini qamalga oldi, eng oldingi chiziqdayoq pressing uyushtirdi, mehmonlar esa qarshi hujumlarga tayandi. «Siti» 9-daqiqadayoq ilk vaziyatidan foydalandi. Londonliklar himoyachilari hujumda yurganida to‘p yo‘qotildi va Reynders to‘pni raqib jarima maydoni yaqinigacha olib borib, o‘ng qanotdan ochilgan Holandni to‘p bilan ta’minladi. Norvegiyalik hujumchi yakkama-yakka vaziyatdan unumli foydalandi.
Shundan keyin mehmonlar to‘pni butunlay raqibga topshirishdi. Bo‘lim o‘rtalariga borib «shaharliklar»ning to‘pga egalik qilish ko‘rsatkichi 17 foizgacha tushib ketgandi. Bu vaqtda Foden beshinchi himoyachiga aylandi. O‘yinda qo‘polliklar tufayli tez-tez pauza yuzaga kela boshladi. Husanov, Reynders, Gabriel, Trossar va Bernardu follardan aziyat chekishdi. Bo‘lim oxirida oldinroq sariq kartochka olib bo‘lgan Bernardu gazonda yotgan Trossarni to‘p bilan urdi, biroq hakam uni ayadi va maydondan chetlatmadi.
«Arsenal»ning birinchi bo‘limdagi to‘pga egalik qilishi chinakamiga xavfli vaziyatlarni yuzaga keltirmadi. Raqib darvozasi sohasiga to‘g‘ri borgan yagona zarba Maduekening zarbasi bo‘ldi, ammo bu vaziyatda Donnarumma yaqin burchakka kelgan to‘pni to‘sishga ulgurdi.
Tanaffusda uchta almashtirish bo‘ldi. «Arsenal» Madueke va Merino o‘rniga Saka va Ezeni maydonga tashladi va bu londonliklar hujumini kuchaytirmay qolmadi. Gvardiola esa birinchi bo‘limda Husanovni maydondan oldi. O‘zbekistonlik himoyachi yakkakurashlarda yaxshi harakat qildi, o‘z qanotida Trossarga imkon bermadi, ammo to‘p bilan harakatlanishda yaxshi taassurot qoldira olmadi — to‘pni uzoqlashtirishga urinib ko‘p yo‘qotishga yo‘l qo‘ydi, vaziyatlardan birida esa to‘pni darvozabonga qaytarishga urinib, uni raqibga sovg‘a qilishiga bir baxya qoldi. Aftidan, «Arsenal» Husanovni pressingning asosiy nishoni sifatida tanlagandi: aynan uni noqulay holatga tushiruvchi paslar berib, keyin bosim uyushtirildi.
Birinchi bo‘limda bo‘lgani kabi, mezbonlar darhol «Siti»ni jarima maydoniga qamashga kirishdi. Gvardiola futbolchilari to‘pni shunchaki tepib yuborib, uzoqlashtirish bilan mashg‘ul bo‘lishdi.
68-daqiqadayoq «Siti» uch markaziy himoyachilik sxemaga o‘tdi — hujumdagi Foden o‘rniga himoyachi Ake tushirildi. Ko‘p o‘tmay Holand ham maydondan olindi va uning o‘rnini tayanch yarimhimoyachisi Gonsales egalladi. Bir necha daqiqa o‘tib Donnarumma to‘pni o‘yinga kiritishda navbatdagi marta vaqt cho‘zgani uchun sariq kartochka oldi. Sakani har safar bir vaqtning o‘zida «Siti»ning uch futbolchisi qarshi oldi — mehmonlar jarima maydoni shu qadar tig‘iz yopilgandi.
Gvardiola o‘z prinsiplariga ters borib, g‘alabali hisobni saqlashga urindi, ammo bu ish bermadi.
Barchasi 90+2-daqiqada o‘zgarib ketdi, bu vaqtga kelib «Arsenal» kutilmaganda raqib jarima maydoni atrofida bosim uyushtirishdan voz kechgandi. Mehmonlar yengil tin olishdi va ikkinchi bo‘limda ilk bor pozitsion hujum boshlashdi — ko‘p o‘tmay mezbonlar to‘pni egallab oldi va Eze maydonning ikkinchi qismida turib, to‘pni himoyachilar ortiga tashlab berdi, Martinelli tezlik olib, raqib jarima maydoni yaqiniga yetib bordi va to‘pni bir teginishda ancha oldinga chiqib ketgan Donnarummaning ustidan oshirib tashladi. Bu «Arsenal»ga «Siti»ga qarshi mag‘lubiyatsiz seriyasini 6 o‘yinga yetkazish imkonini berdi. Endi «kanonirlar» to‘plangan ochkolar soni (10) bo‘yicha ikkinchi o‘rinni «Tottenhem» va «Bornmut» bilan bo‘lishib turibdi, faqat to‘plar nisbati evaziga yuqorida joylashgan. Tur yakunlariga ko‘ra «Liverpul» eng yaqin ta’qibchisidan besh ochkoga oldinda bormoqda. «Siti» esa besh turda 7 ochko bilan turnir jadvali o‘rtalarida qolmoqda.
Ispaniya: «Atletiko»da yomon start davom etmoqda
«Malyorka» – «Atletiko» 1:1
Gollar: Gallaher, 79 (0:1). Murichi, 85 (1:1)
Aniq ijro etilmagan penalti: Alvares, 14’
«Malyorka»: Roman, Kumbulla (Pablo Torre, 36), Raylo, Valent, Moxika, Morey (Prats, 82), Morlanes (Virxili, 82), Koshta (Sanches, 67), Darder, Murichi, Asano (Domenek, 68)
«Atletiko»: Oblak, Langle, Le Norman, Gansko, Lorente, Koke, Barrios (Gallaher, 68), Gonsales (Rudjyeri, 75), Simeone (Molina, 63), Alvares (Grizmann, 63), Raspadori (Serlot, 63)
Chetlatish: Serlot, 73
«Atletiko» yana bir bor qoqildi. «Enfild»dagi dramadan keyin (Diyego Simeone shogirdlari YeChL 1-turida ikki to‘p farqini yo‘qqa chiqargan, ammo arbitr tomonidan qo‘shib berilgan daqiqalarda gol o‘tkazib yuborgandi) madridliklar la liganing beshinchi turida uchinchi durangni qayd etishdi, jamoa mavsum boshidan buyon faqat bir o‘yinda g‘alaba qozongan. Bu safar ham natija alamli bo‘ldi. Birinchi bo‘limda Xulian Alvares penaltidan foydalana olmagandi, ikkinchi bo‘limda esa maydon markazida raqibning oyog‘iga butsasining ostki qismi bilan zarba bergan Syorlot jamoasini qiyin ahvolda qoldirib ketdi.
Shunga qaramay, mehmonlar bir kishi kam bo‘lib o‘ynab ham hisobni ochishgandi, Liorente boshlagan hujumda darvozabondan qaytgan to‘pni Gallaher darvoza to‘riga yo‘lladi. Ammo o‘yin yakuniga besh daqiqa qolganida «ikkinchi qavat qiroli» Muriki «Malyorka»ni mag‘lubiyatdan qutqaruvchi golini urdi. Besh turdan keyin 5 ochko — «Atletiko»ning 2009 yildan buyon eng yomon starti, o‘shanda qizil-oqlar besh turda atigi 3 ochko to‘plagandi.
«Barselona» – «Xetafe» 3:0
Gollar: Torres, 15 (1:0). Torres, 34 (2:0). Olmo, 62 (3:0)
«Barselona»: X. Garsiya, Kristensen, E. Garsiya, X. Martin (Arauxo, 83), Kunde, de Yong (Fermin Lopes, 60), Olmo, Pedri (Bardji, 76), Torres (Kasado, 60), Rafinya (Reshford, 46), Levandovski
«Xetafe»: Soriya, Dakonam (Mancha, 46), Abkar, Duarte, Riko, Kiko Femeniya, Milya, Arambarri (da Kosta, 70), M. Martin (Munos, 46), Mayoral (Kamara, 46), Liso (Sankris, 80)
Ogohlantirishlar: Rafinya, 32. Kristensen, 54 – M. Martin, 3. Liso, 42. Dakonam, 44. Abkar, 58
«Barselona» Yoxan Kroyf nomidagi, atigi olti ming muxlis kira oladigan mittigina stadionida yana bir bor shou uyushtirdi. Flik bu safar mashg‘ulotlarga kechikkan Reshfordni zaxirada qoldirdi, u ishonch bildirgan Ferran Torres esa ishonchni oqladi. E’tiborli tomoni, kataloniyaliklarning so‘nggi besh o‘yinida turli besh futbolchi ikkitadan gol urmoqda. Bungacha Fermin Lopes, Rafinya, Levandovski va Reshford navbatma-navbat dublni rasmiylashtirgandi. Ferran esa boshlang‘ich tarkibga qaytgan Dani Olmoning Gutini eslatib, tovon bilan ortga bergan dohiyona pasidan hisobni ochdi, keyin esa Rafinyaning uzatmasini qulay pozitsiyada turib darvoza to‘riga yo‘lladi.
Ikkinchi bo‘limda esa Olmo sermahsullikni davom ettirayotgan Reshfordning pasidan keyin yakuniy hisobni o‘rnatdi. Bu hujumda ko‘p narsani ancha ichkaridan ingliz hujumchisini oldinga boshlagan Kasadoning uzatmasi hal qildi. Hansi Flik jamoasi Yamalsiz ham o‘z darajasini saqlab qolmoqda va «Real» bilan poygani davom ettirmoqda. Qayd etish kerakki, germaniyalik mutaxassis qo‘lida Ferranning foydali ish koeffitsiyenti keskin ko‘tarilib ketdi, hujumchi hozirgi murabbiylar shtabi boshchiligidagi 51 o‘yinda 23 gol urgan. Holbuki u Xavi davrida 113 o‘yinda bundan ikki barobar kam gol urgandi.
Italiya: Pellegrinining g‘olibona qaytishi
«Latsio» – «Roma»
Gol: Lo. Pellegrini, 38 (0:1)
«Latsio»: Provedel, Romanioli, Xila, Nunu Tavaresh (Lu. Pellegrini, 46), Marushich, Rovella (Kataldi, 46), Dele-Bashiru (Belayan, 14), Genduzi, Dzakkani, Pedro (Noslin, 79), Dia (Kastelyanos, 62)
«Roma»: Svilar, Manchini, N`Dika, Zeki Chelik, Kristante (Tsimikas, 81), Kone, Anxelinio (Al-Aynaviy, 81), Rench, Soule (Baldansi, 73), Lo. Pellegrini (Pizilli, 73), Fergyuson (Dovbik, 66)
Ogohlantirishlar: Xila, 88 – N`Dika, 83
Chetlatish: Belayan, 86
Yakshanba kungi o‘yinlarni ochib bergan Rim derbisi Jan Pero Gasperinining topqirlik qobiliyatini yana bir bor namoyish etdi. Jamoa sardori Lorenso Pellegrini may oyi boshidan buyon jarohat tufayli o‘ynamayotgandi. Uning tarkibga qaytishining o‘zi «Roma» muxlislarini xursand qilgandi, birinchi bo‘lim oxirlarida u Soulening uzatmasini golga aylantirganida esa jamoadoshlari uni gol bilan qizg‘in tabriklashdi, uning o‘zi ham ko‘z yoshlarini tiya olmadi.
Lorenso — «Roma»ning ramzi. U jamoaning qatorasiga 11 mavsumdirki gol urayotgan yagona futbolchisi, «Latsio» esa — uning sevimli raqibi, u derbilarda to‘rt bor darvozani ishg‘ol etgan. Ikkinchi bo‘lim boshida Dia yakkama-yakka vaziyatdan foydalana olmadi va «burgutlar»da boshqa golli vaziyat bo‘lmadi. Gasperini birinchi urinishda oldingi hamkasblari 2016 yildan buyon uddalay olmayotgan ishni uddaladi. Aniqrog‘i — safar derbisida g‘alaba qozonib, «Roma»ning ushbu raqib ustidan g‘alabalari sonini 70 taga yetkazdi. Rimliklar uning boshqaruvida 4 turdan 3 tasida bir xilda – 1:0 hisobida g‘alaba qozondi, «Torino»dan uchralgan mag‘lubiyatli o‘yinda ham bitta gol urilgan – 0:1.
«Inter» – «Sassuolo» 2:1
Gollar: Dimarko, 14 (1:0). Karlos Augustu, 81 (2:0). Cheddira, 84 (2:1)
«Inter»: X. Martines, Acherbi, Karlos Augustu, Akanji, Suchich, Xakan Chalxanoglu (Frattezi, 65), Barella, Dimarko, Dyumfris (Luis Enrike, 65), Tyuram (L. Martines, 64), Espozito (Bonni, 77)
«Sassuolo»: Murich, Idzes, Muxaremovich, Doyg, Kulibali (Piyerini, 90+2), Matich, Kone (Fadera, 68), Vranks (Volpato, 69), Lorente (Torstvedt, 68), Berardi, Pinamonti (Cheddira, 78)
Ogohlantirishlar: Hoqon Chalxono‘g‘li, 31. Dimarko, 58 – Muxaremovich, 90
«Inter» asta-sekinlik bilan vaziyatni o‘nglamoqda va YeChLda «Ayaks» ustidan qozonilgan g‘alaba ortidan A seriyada yana uch ochko oldi. O‘yindagi natijani ikki lateral ta’minladi, ulardan biri (Karlos Augusto) shu kuni markaziy himoya uchligida harakat qildi. Ammo pozitsiya o‘zgarishi braziliyalik futbolchiga hujumlarga qo‘shilishga to‘sqinlik qilmadi va u neradzurrilar ustunligini oshirganidan ancha oldinroq ham gol urishi mumkin edi. O‘yinda hisobni Dimarko ochdi, bunda Suchichning ham xizmati katta bo‘ldi. Xorvatiyalik yarimhimoyachi o‘zi zarba berishi mumkin bo‘lgan vaziyatda to‘pni qanotdan jarima maydoniga kirib kelgan sherigiga tashlab berdi va u ideal pozitsiyadan aniq zarba yo‘lladi. Shu kuni Kristian Kivu
«Inter»ning yoshlar jamoasidan o‘ziga tanish bo‘lgan Pio Espozitoni ham boshlang‘ich tarkibda tashlagandi va bu yosh hujumchi qaychi uslubidagi zarbasi bilan oqshomni bezashi mumkin edi, ammo darvozabonning aql bovar qilmas reaksiyasi «Sassuolo»ni navbatdagi goldan qutqarib qoldi.
Turkiya: Shomurodovda barqarorlik
«Boshoqshehir» — «Alanyaspor» 1:1
Gollar: Shomurodov (29) — Ogundu (52).
«Boshoqshehir» — Muhammad, Ebosele (Bulut, 61), Ba, Opoku, Operi, Berat (Kalujinski, 85), Yusuf (Turuch, 74), Kemen (Harit, 62), Krespo, Brnich (Fayzullayev, 62), Shomurodov.
«Alanyaspor» — Tashkiran, Viana, Lima, Aliti, Keskin (Haderjonay, 65), Makuta (Janviye, 81), Maestro, Ruan (O‘zdemir, 73), Kayya, Haji (Muniye, 65), Ogunda (Meshak, 81).
Ogohlantirishlar: Berat (32), Opoku (42), Ebosele (45+2), Haji (65), Aliti (84).
Turkiya chempionati 6-turida «Boshoqshehir» o‘z maydonida «Alanyaspor»ni qabul qildi. Mezbonlar safida O‘zbekiston milliy jamoasi hujumchisi Eldor Shomurodov asosiy tarkibda tushib, 29-daqiqada hisobni ochdi. Uning ikkinchi bo‘limdagi yana bir goli esa ofsayd holati tufayli inobatga olinmadi. O‘zbekistonlik hujumchi so‘nggi uch o‘yinni golli harakatsiz tark etmayapti — 2 gol va 1 golli pas. Yakunda istanbulliklar g‘alabani ushlab qola olishmadi va navbatdagi marta ochko yo‘qotdi — 5 o‘yinda 1 g‘alaba, 3 durang va 1 mag‘lubiyat. Jamoaning yana bir o‘zbekistonlik futbolchisi, yarimhimoyachi Abbos Fayzullayev 62-daqiqada o‘yinga qo‘shildi. Endilikda zaxirasida bir o‘yini bor Nuri Shahin jamoasi 6 ochko bilan turnir jadvalining 10-o‘rnida qolmoqda.
Yil boshida «Bunyodkor», «Nasaf», «Buxoro» va boshqa bir qancha klublar davlat kompaniyalari homiyligidan ajralgan edi. Endi Superliga klublari markazlashgan tarzda moliyalashtirilishi mumkin.
2026 yilgi futbol mavsumidan boshlab, Superliga klublari markazlashtirilgan tarzda moliyalashtirilishi mumkin. Bu haqda Kun.uz manbasi ma’lumot berdi.
O‘zbekiston futbol assotsiatsiyasi (O‘FA), Milliy olimpiya qo‘mitasi (MOQ) va Sport vazirligi tomonidan professional futbol klublarining moliyalashtirilishini takomillashtirish borasida loyiha ishlab chiqilgan bo‘lib, unga ko‘ra 2026 yilda Superliga klublariga davlat tomonidan bir xil – 35 milliard so‘mdan yillik smetasi tasdiqlanishi belgilangan. Shuningdek, xususiy kompaniya va homiylarga professional futbol klublariga homiylik qilish bo‘yicha imtiyoz berilishi kutilmoqda. Hozircha ushbu tizim mexanizmi va qarorning qachon qabul qilinishi noma’lum.
Avvalroq, bir qator yirik davlat kompaniyalari futbol klublarini moliyalashtirishni to‘xtatgan edi. Masalan, «O‘zbekneftgaz» davlat kompaniyasi yil boshida «Bunyodkor», «Nasaf» va «Buxoro» klublariga homiylik qilishdan voz kechdi. Shuningdek, bir qator boshqa klublar ham davlat kompaniyalari homiyligidan ajraldi. Oqibatda, «Bunyodkor», «Dinamo» va «Surxon» kabi klublarda moliyaviy muammolar kuzatilayotgani haqida xabarlar tarqaldi.
Futbol klublarini markazlashgan tarzda moliyalashtirish mexanizmi dunyo futbolida bor gap. Masalan, Saudiya Arabistoni professional ligasida futbol klublarini boshqarish va moliyalashtirish qisman markazlashgan tarzda amalga oshiriladi. 2023 yilda sport islohotlari doirasida Davlat investitsiya jamg‘armasi (PIF) to‘rtta yetakchi klub – «Al-Nasr», «Al-Hilol», «Al-Ahliy» va «Al-Ittihod» nazorat ulushlarini (taxminan 75%) qo‘lga kiritdi. Parallel ravishda, liganing boshqa jamoalari yirik davlat va yarim davlat kompaniyalariga (masalan, neft-gaz, transport va sanoat) biriktirildi, bu esa ko‘pchilik klublar davlat bilan bog‘liq tuzilmalardan mablag‘ oladigan tizimni shakllantirdi.
Misrlik tirik afsona uchun klubdagi to‘qqiz mavsumi so‘nggisi bo‘lib qoladi.
Muhammad Saloh va «Liverpul» baribir ajraladi. 33 yoshli misrlik hujumchi 24 mart kuni kechqurun ijtimoiy tarmoqlardagi sahifalarida e’lon qilgan videosida 2025/26 yillar mavsumi yakunida klubni tark etishini e’lon qildi. Biroz o‘tib mersisaydliklar klubi matbuot xizmati ham bu ma’lumotni tasdiqladi.
«Bu ehtiros, tarix va ruhdir»
Misrlik futbolchi muxlislarga ta’sirli murojaat yo‘lladi.
«Afsuski, bu kun yetib keldi. Men mavsum yakunida «Liverpul»ni tark etaman. Men shundan boshlamoqchimanki, bu jamoa, shahar va odamlar hayotimning shunday qismiga aylanishini hech qachon tasavvur qilmagan edim. «Liverpul» – shunchaki futbol klubi emas. Bu kimgadir tushuntirib bo‘lmaydigan ehtiros, tarix va ruhdir», – degan Saloh xayrlashuv nutqi avvalida.
U jamoadoshlari va klub xodimlari to‘g‘risida ham gapirgan.
«Barchaga, ayniqsa, jamoadoshlarimga – sobiq va hozirgilarga, muxlislarga rahmat. Menga ko‘rsatgan yordamingiz uchun minnatdorchilik bildirishga so‘z yetmaydi. Faoliyatimning eng yaxshi davrida yonimda bo‘ldingiz va har doim men bilan yelkama-yelka turdingiz», – deya qo‘shimcha qilgan Saloh.
Ko‘p o‘tmay «Liverpul» ham bu borada rasmiy bayonot berdi: qizillar klubi matbuot xizmati forvard o‘z qarori haqida imkon qadar ertaroq e’lon qilishni xohlagani aytilgan relizni e’lon qildi.
Shu bilan birga, yaqin vaqtlar ichida futbolchi bilan xayrlashuv uchrashuvi o‘tkazilishi kutilmayapti.
«Bizni hali oldinda ko‘p o‘yinlar kutmoqda va Saloh bor e’tiborini «Liverpul» mavsumni maksimal natija bilan yakunlashiga qaratgan. Shuning uchun uning merosi va yutuqlarini to‘liq nishonlash vaqti keyinroq keladi», – deya qayd etiladi klub saytida.
Faoliyatini qayerda davom ettiradi?
Muhammad Saloh mersisaydliklar klubi bilan shartnomasini 2025 yil aprelida ikki yilga uzaytirgandi. Ammo misrlik futbolchi bu muddat oxirigacha klubda qolmasligi mavsum o‘rtasidayoq ma’lum bo‘lib ulgurgandi.
Dekabr oyi boshida hujumchi asosiy tarkibdagi o‘rnini boy berib qo‘ydi va ayrim o‘yinlarda zaxiradan ham maydonga tushirilmadi. APLning 15- turida «Lids»ga qarshi kechgan uchrashuvda (3:3) ham zaxira o‘rindig‘ida qolib ketganidan keyin u jurnalistlar qarshisiga chiqdi va o‘z holati haqida shov-shuvli bayonot berdi. Xususan, jamoa bosh murabbiyi Arne Slot bilan orasi buzilganini aytdi.
«Ko‘p marta aytganman: murabbiy bilan munosabatlarim juda yaxshi edi, ammo birdaniga o‘rtamizda hech narsa qolmadi. Aftidan, kimdir meni bu yerda ko‘rishni istamayapti. Yana bir bor aytaman: o‘rtamizda hech qanday munosabat yo‘q… U nimalarni his qilayotganimni biladi. Bu haqda biladi», – deya norozilik bildirgandi futbolchi.
Shundan keyin u Misr milliy jamoasi safida Afrika millatlar kubogiga jo‘nab ketdi, turnirdan qaytganidan keyin esa ko‘proq maydonga tusha boshladi: 2026 yilda u faqat bir marta 60 daqiqadan kamroq o‘ynadi – bu 15 mart kuni «Tottenhem»ga qarshi o‘yinda (1:1) ro‘y berdi.
Shunga qaramay, Saloh baribir klubini o‘zgartirishga qaror qilgan. Jurnalist Pol Joys qayd etishicha, tomonlar o‘zaro rozilik asosida shartnomani bekor qilishga kelishishgan. Bu orqali «Liverpul» unga tovon puli to‘lashdan qutuladi, forvard esa keyingi faoliyati uchun klubni mustaqil tanlash imkoniga ega bo‘ladi.
Futbolchining agenti Rami Abbosga ko‘ra, u hamon kelgusida qayerda o‘ynashini aniqlab olmagan. Afrikalik yulduzli futbolchiga muqaddam Saudiya Arabistonidan katta takliflar bo‘lgan, ammo endi Yaqin Sharqdagi voqealar tufayli bunday transfer amalga oshishi dargumon.
Barcha sovrinlarni qo‘lga kiritgan
Saloh «Liverpul»ga 2017 yil iyunida «Roma»dan kelib qo‘shilgandi. To‘qqiz yil mobaynida misrlik hujumchi Angliyadagi barcha sovrinlarni qo‘lga kiritdi: ikki bor Angliya chempioni bo‘ldi, mamlakat Kubogi va Superkubogini, shuningdek, Angliya ligasi kubogini qo‘lga kiritdi.
Xalqaro arenada Muhammad o‘ziga xos het-trikka erishdi: Chempionlar ligasida, UYeFA Superkubogida va klublar o‘rtasidagi jahon chempionatida g‘olib bo‘ldi.
Uning shaxsiy statistikasi ham ajoyib: Muhammad 435 o‘yinda 255 gol urgan va 122 assist amalga oshirgan, to‘rt bor APLning eng yaxshi to‘purari sifatida «Oltin butsa»ga ega chiqqan hamda liga tarixidagi eng yaxshi legioner to‘purarga aylangan. U yozgacha kolleksiyasini yana to‘ldirishi mumkin – jamoa YeChL va Angliya kubogidagi ishtirokini davom ettirmoqda.
Jismoniy tarbiya va sport sohasidagi munosabatlarni tartibga solishni nazarda tutuvchi «Jismoniy tarbiya va sport to‘g‘risida»gi O‘RQ–1123-sonli qonun qabul qilindi.
Qonunda sport vazirligi jismoniy tarbiya va sport sohasidagi vakolatli davlat organi etib belgilab qo‘yildi.
Qonunga ko‘ra, fuqarolar havaskorlik sporti, shuningdek professional sport bilan sportchi, trener, sport hakami sifatida shug‘ullanish huquqiga ega.
Sport klubi sport faoliyati bilan shug‘ullanish, sport turlarini rivojlantirish va ommalashtirish, shuningdek sportchilarni musobaqalarga tayyorlash maqsadida tashkil etiladi.
Sportchi pasporti yagona namunadagi hujjat bo‘lib, sportchining jismoniy tarbiya va sport tashkilotiga mansubligini hamda sport malakasini tasdiqlaydi.
Sport turi qoidalariga va sport musobaqasi to‘g‘risidagi nizomga (reglamentga) rioya etilishini ta’minlash uchun vakolat berilgan jismoniy shaxs sport hakamidir.
Davlat tomonidan sportchi hamda trenerlarga bir martalik va oylik to‘lov (stipendiya, nafaqa va boshqalar) shaklidagi qo‘llab-quvvatlash choralari taqdim etilishi mumkin.
«Yangi O‘zbekiston olimpiya cho‘qqilari» hamda «Prezident Olimpiadasi» musobaqalarining 2026 yilgi mavsumi rasman boshlandi. Toshkentdagi «Olimpiya va Paralimpiya shon-shuhrati muzeyi»da tashkil etilgan tadbirda mavsumga ramziy start berildi.
Ushbu musobaqalar yosh avlod o‘rtasida sog‘lom turmush tarzini targ‘ib qilish va Olimpiya zaxiralarini tayyorlash tizimini yanada takomillashtirishga xizmat qiladi. Mavsum doirasida respublikamizning barcha hududlarida minglab yosh sportchilar turli sport turlari bo‘yicha o‘z mahoratlarini namoyish etishlari kutilmoqda.
2026 yilgi mavsum yanada takomillashtirilgan uch bosqichli tizimda o‘tkaziladi: tuman va shahar hokimi Olimpiadasi, hududiy bosqich hamda «Prezident Olimpiadasi». Bugundan boshlab birinchi bosqich — tuman va shahar hokimi Olimpiadasi doirasida respublikamizning barcha hududlarida bellashuvlar boshlandi. Unda sport maktablari, umumta’lim muassasalari, xususiy sport klublari va murabbiylar tarbiyalagan yoshlar faol ishtirok etmoqda.
Londondagi «Uembli» stadionida Angliya Liga Kubogining final uchrashuvi bo‘lib o‘tdi. Bosh sovrin uchun bahsda «Manchester Siti» va «Arsenal» jamoalari o‘zaro to‘qnash kelishdi.
Uchrashuv «Manchester Siti» ning 2:0 hisobidagi g‘alabasi bilan yakunlandi. O‘yin taqdirini ikkinchi bo‘limda Niko O‘Rayli tomonidan kiritilgan ikkita gol (60 va 64-daqiqalar) hal qildi. Ushbu muvaffaqiyat evaziga «Manchester Siti» o‘z tarixida 9-marta Angliya Liga Kubogi sohibiga aylandi. Endilikda ular mazkur turnirda eng ko‘p zafar quchgan «Liverpul» (10 ta sovrin) rekordiga yaqinlashib oldi — ular orasidagi farq atigi bitta kubokni tashkil etmoqda.
O‘zbekiston milliy terma jamoasi himoyachisi Abduqodir Husanov «Manchester Siti» tarkibida maydonga tushib, to‘liq 90 daqiqa harakat qildi. U uchrashuvning 32-daqiqasida Viktor Dyokereshga ishlatilgan qo‘pollik uchun sariq kartochka oldi.
Ushbu g‘alaba orqali Husanov Angliya Liga Kubogini qo‘lga kiritgan ilk o‘zbekistonlik futbolchi sifatida tarixga kirdi. Bu sovrin himoyachi uchun Angliyadagi birinchi oltin medal hisoblanadi.
Iltimos, 1 aprelga e’tibor bering! Yaqin Sharqda keskinlik kuchaymoqda (video)
Prezident neft va gaz qazib chiqarish bo‘yicha rejalarni qattiq nazoratga olishni topshirdi
500 dollargacha naqd valutani bankka pasport taqdim etmasdan olishga ruxsat berilishi mumkin
-
Siyosat2 days agoIslom bank ishi anʼanaviy foizlarga asoslangan modellardan nimasi bilan farq qiladi?
-
Siyosat5 days ago
O‘zbekiston va Turkmaniston yetakchilari bir-birlarini tabrikladilar
-
Jamiyat4 days agoImom Buxoriy masjid-majmuasida ilk hayit namozi o‘qildi (foto)
-
Jamiyat2 days agoO‘zbekistonda taksichilarni aldashning yangi firibgarlik usuli fosh etildi
-
Sport4 days ago
Masharipov va Fayzullayev jarohat sabab xalqaro turnirda qatnashmaydi
-
Jamiyat4 days ago
Shavkat Mirziyoyev O‘zbekiston xalqini hayit bilan tabrikladi
-
Iqtisodiyot4 days agoEron urush va iqtisodiy inqiroz fonida rekord qiymatdagi banknotni muomalaga chiqardi
-
Dunyodan5 days ago
2026 yilgi Oskar sovrindorlari e’lon qilindi