Namangan viloyatida o‘tkazilgan tezkor tadbirda qalbaki pul sotuvchilari ushlandi.

Yangiqo‘rg‘on va To‘raqo‘rg‘on tumanlarida yashovchi uch fuqaro 100 ming qalbaki AQSh dollarini (100 dollarlik kupyuralarda) haqiqiy 40 ming AQSh dollariga sotishni rejalashtirgan bo‘lgan.

Ular soxta 80 ming AQSh dollarini haqiqiy 40 ming AQSh dollariga sotgan vaqtlarida ashyoviy dalillar bilan qo‘lga olindi. Tezkor tadbir DXX Toshkent va Namangan viloyatlari bo‘yicha boshqarmalari hamda IJQD xodimlari hamkorligida o‘tkazilgan.

Xorijda tayyorlangan soxta valyutalar aylanma yo‘llar orqali olib kelingan. Holat yuzasidan qonunbuzarlarga nisbatan jinoyat ishi qo‘zg‘atilib, tergov harakatlari olib borilmoqda, deyiladi xabarda.

Source link

2026 yil 1 aprel holatiga ko‘ra, O‘zbekistonda jismoniy shaxslar nomida ro‘yxatdan o‘tgan avtotransport vositalari soni 4,9 milliondan oshdi. Bir yil davomida aholiga tegishli avtomobillar parki 344,6 mingtaga ko‘paygan.

Milliy statistika qo‘mitasi ma’lumotlariga ko‘ra, hozirda mamlakatda jismoniy shaxslarga tegishli 4 million 903,1 mingta avtotransport vositasi ro‘yxatga olingan.

Avtotransport vositalarining asosiy qismini yengil avtomobillar tashkil etadi. Ularning soni 4 million 552,3 ming donani tashkil qilib, umumiy avtoparkning 92,8 foiziga teng bo‘lgan.

Shuningdek, aholi tasarrufida 330,3 mingta yuk avtomobili, 7,5 mingta mikroavtobus, 7,2 mingta maxsus transport vositasi va 5,8 mingta avtobus mavjud.

Statistika ma’lumotlariga ko‘ra, 2025 yilning mos davriga nisbatan aholiga tegishli avtotransport vositalari soni 344,6 mingtaga oshgan. Bu esa mamlakatda avtomobillarga bo‘lgan talab yuqoriligicha qolayotganini ko‘rsatadi.

Mutaxassislar fikricha, avtotransport vositalari sonining o‘sishi aholi mobilligi oshishi bilan birga shaharlarda transport oqimini tartibga solish va yo‘l infratuzilmasini rivojlantirishga bo‘lgan ehtiyojni ham kuchaytirmoqda.

Source link

O‘zbekiston va Germaniya mehnat migratsiyasi hamda kasbiy ta’lim sohasidagi hamkorlikni kengaytirish maqsadida ikki yirik qo‘shma loyihani ishga tushirdi. Yangi dasturlar o‘zbekistonliklarga Germaniyada ishlash va xalqaro tan olingan til sertifikatlarini olish imkoniyatlarini kengaytiradi.

Loyihalarga Toshkent shahridagi «Ko‘ksaroy» qarorgohida O‘zbekiston prezidenti Shavkat Mirziyoyev va Germaniya Federativ Respublikasi prezidenti Frank-Valter Shtaynmayyer ishtirokida start berildi.

Ushbu tashabbuslardan biri Germaniyaning yirik transport kompaniyasi Deutsche Bahn bilan hamkorlikda amalga oshiriladi. Loyiha doirasida Germaniya temiryo‘l sohasi uchun 500 nafar mutaxassis maqsadli tayyorlanadi. Ta’limni muvaffaqiyatli yakunlagan ishtirokchilar Germaniyada yuqori maoshli ish o‘rinlariga joylashish imkoniyatiga ega bo‘ladi.

Ikkinchi loyiha esa O‘zbekistonda TELC xalqaro imtihon markazlari tarmog‘ini tashkil etishni nazarda tutadi. Bu orqali fuqarolar Goethe sertifikatlari bilan bir qatorda TELC xalqaro til sertifikatlarini ham mamlakat hududida olish imkoniyatiga ega bo‘ladi.

Kutilishicha, har yili 30 mingdan ortiq o‘zbekistonlik TELC imtihonlarini O‘zbekistonning o‘zida topshirishi mumkin bo‘ladi. Bu esa xorijda ta’lim olish va mehnat faoliyatini boshlash uchun til bilimini tasdiqlash jarayonini ancha yengillashtiradi.

Har ikki loyihaning qiymati 1 million AQSh dollarini tashkil etadi. Mutasaddilarning ta’kidlashicha, mazkur tashabbuslar malakali kadrlar tayyorlash, mehnat mobilligini oshirish va yoshlar uchun xalqaro mehnat bozorida yangi imkoniyatlar yaratishga xizmat qiladi.

Source link

Toshkent shahrida yozgi mavsumda yo‘lovchilarga qulay va sifatli xizmat ko‘rsatish maqsadida jamoat transportida nazorat tadbirlari kuchaytirildi. Xususan, avtobus va elektrobuslarda konditsionerlardan to‘g‘ri foydalanilishi hamda salonlarda belgilangan harorat rejimiga rioya etilishi tekshirilmoqda.

Ma’lum qilinishicha, bugungi kunda poytaxtdagi 169 ta avtobus yo‘nalishi aholiga xizmat ko‘rsatmoqda. Yo‘lovchilar uchun xavfsiz, qulay va sifatli tashuv xizmatlarini ta’minlash transport sohasi oldidagi ustuvor vazifalardan biri hisoblanadi.

Shu munosabat bilan Toshkent shahri avtobus yo‘nalishlarida brutto-shartnoma talablariga muvofiq sifat mezonlarining tashuvchilar tomonidan bajarilishi ustidan nazorat kuchaytirildi.

Belgilangan talablarga ko‘ra, tashqi havo harorati +28 darajadan yuqori bo‘lgan hollarda avtobus va elektrobuslardagi konditsionerlar ishlatilishi, salon ichidagi harorat esa +26 darajada saqlanishi lozim.

Transport vazirining tegishli ko‘rsatmasi asosida Toshkent shahar transport va yo‘l-transport infratuzilmasini rivojlantirish bosh boshqarmasi hamda «Toshshahartransxizmat» AJ mas’ullari ishtirokidagi ishchi guruh avtobus yo‘nalishlarida monitoring olib bormoqda.

Mutasaddilarning ta’kidlashicha, bunday nazorat tadbirlari jamoat transportida xizmat sifati va yo‘lovchilar uchun qulaylik darajasini oshirishga xizmat qiladi.

Source link

Andijon viloyatining Andijon tumanida joylashgan yog‘och omborida yong‘in chiqdi. Hodisa oqibatida omborning bir qismi va unda saqlangan yog‘och materiallari yongan, jabrlanganlar yo‘q.

Favqulodda vaziyatlar vazirligi ma’lumotiga ko‘ra, 21 iyun kuni soat 20:10 da «112» tizimi orqali Andijon viloyati FVBga Andijon tumanidagi «Mart» mahalla fuqarolar yig‘ini, Obod yo‘li ko‘chasida joylashgan yog‘och omborida yong‘in sodir bo‘lgani haqida xabar kelib tushgan.

Shundan so‘ng hodisa joyiga 6 ta yong‘in-qutqaruv ekipaji jalb etilgan. Qutqaruvchilar soat 20:18 da voqea joyiga yetib borgan. Yong‘in soat 20:55 da qurshab olinib, soat 21:55 da to‘liq bartaraf etilgan.

Dastlabki ma’lumotlarga ko‘ra, yong‘in natijasida omborning taxminan 250 kvadrat metr maydondagi tom qismi, shift konstruksiyalari, ichki hududi hamda yog‘och mahsulotlari yonib zararlangan.

FVV ma’lum qilishicha, hodisa oqibatida tan jarohati olganlar qayd etilmagan.

Ayni paytda yong‘inning kelib chiqish sabablari va yetkazilgan moddiy zarar miqdori aniqlanmoqda. Voqea joyida viloyat FVB rahbariyati, soha xodimlari hamda tegishli hamkor tashkilotlar vakillari ishtirok etgan.

Source link