«Arsenal» yirik g‘alaba bilan birinchi o‘ringa qaytdi, «Chelsi» so‘nggi daqiqalarda g‘alabani qo‘ldan chiqardi, «Real» bir kishi kam bo‘lib o‘ynab, g‘alaba qozondi, «Yuventus» va «Inter» o‘yinida 7 ta gol urildi. Shanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.

Angliya: «Arsenal»ga yangilar g‘alaba keltirdi

«Arsenal» – «Nottinghem Forest» 3:0

Gollar: Subimendi (32, 79), Yokeresh, (46)

«Arsenal»: Rayya, Moskera, Gabriel Magalyayns, Kalafiori (Lyuis-Skelli, 68), Timber, Subimendi, Merino, Edegor (Nvaneri, 18), Eze (Trossar, 79), Madueke (Martinelli, 78), Yokeresh (Rays, 68)

«Nottinghem Forest»: Sels, Murilo (Savona, 37), Milenkovich, Moratu, Uilyams, Sangare (Yyeyts, 73), Anderson, Gibbs-Uayt (Makeyti, 73), Hadson-Odoi (Kalimuendo, 60), Ndoy, Vud (Bakva, 60)

Ogohlantirishlar: Kalafiori, 61 – Uilyams, 78

Angelos Postekogluning «Nottinghem» bosh murabbiyi sifatidagi ilk o‘yini «Arsenal» maydonidagi yirik mag‘lubiyat bilan yakunlandi, «kanonirlar» birinchi golni o‘z an’anasiga ko‘ra standart vaziyatdan kiritdi. To‘p jarima maydoni ichidan qaytib chiqqanida Subimendi hujumni ikkinchi tempda davom ettirib, to‘pni to‘xtatmasdan darvoza to‘riga yo‘naltirdi. Londonliklar safida bu vaqtgacha jamoa sardori Edegor jarohat olib maydondan chiqqandi.

Ikkinchi bo‘limda ham jamoaning yozda xarid qilgan yangi futbolchilari asosiy ishni bajarishdi. Eze Kalafiorining ancha orqadan uzatgan uzatmasidan keyin chap qanotda oldinga yurdi va jarima maydonida ochilgan Yokereshni golli pas bilan ta’minladi. Subimendi esa Trossarning uzatmasidan keyin bosh bilan darvozani ishg‘ol etib, dublni rasmiylashtirdi. «O‘rmonchilar»da o‘yinga qaytish uchun birgina vaziyat bo‘lgandi, ammo hisob 2:0 holatida Rayya Vudning zarbasidan keyin to‘pni barmoqlari uchida yuqoriga yo‘naltirishga ulgurdi. «Arsenal»da esa hisobni yanada yiriklashtirish uchun ham imkoniyatlar bo‘ldi, Yokereshning yaqin masofadan yo‘llagan zarbasi ustundan qaytdi. Yakunda «Arsenal» darvozasi daxlsizligini saqlab qoldi va «Nottinghem»ga qarshi o‘yinlardagi statistikasini yaxshiladi, ushbu jamoalarning so‘nggi yetti o‘zaro o‘yinida jami 22-2 hisobi qayd etilgan. Bu g‘alabadan keyin londonliklar hozircha 9 ochko bilan turnir jadvalida birinchi o‘ringa chiqdi.

«Nyukasl Yunayted» – «Vulverhempton» 1:0

Gol: Voltemade (29)

«Nyukasl Yunayted»: Poup, Sher, Bern, Livramento, Trippiyer, Tonali, Joelinton (Uillok, 65), Gimarayns, Barns (Elanga, 80), Myorfi (Botman, 90+5), Voltemade (Osula, 65)

«Vulverhempton»: Jonston, Agbadu, T. Gomesh, Moskera (Munetsi, 66), Andre (Bellegard, 66), Gomes, Kreychi, Bueno, R. Gomesh (Chachua, 77), Xvan Xi Chxan (Lopes, 77), Arokodare (Arias, 66)

Ogohlantirishlar: Gimarayns, 88 – Kreychi, 7. Andre, 31. Munetsi, 67. Gomes, 68

«Nyukasl»ning o‘tgan mavsumdagi asosiy to‘purari Aleksandr Isak yozgi transferlar vaqtida «Liverpul» safiga o‘tish uchun isyon ko‘tarib, o‘yinlarda qatnashmaganida jamoa uchta o‘yindan ikkitasida gol urolmadi. Ammo «qarg‘alar» qochqin shved o‘rniga yangi hujumchi topishdi va u bilan yangi hayot boshlandi. «Shtutgart»dan katta pulga olib kelingan yosh hujumchi Nik Voltemade esa ilk o‘yinidayoq g‘alaba golini urdi. Germaniya milliy jamoasi forvardi shu o‘yinda yakkakurashlarda eng ko‘p ustun kelgan (8) futbolchiga aylandi. Bundan tashqari, Voltemade — APLdagi debyutida gol urgan uchinchi nemis futbolchisi bo‘ldi (Yurgen Klinsmann va Gundo‘g‘andan keyin). Shu bilan birga, Eddi Hau shogirdlariga bu turda ancha oson raqib duch kelgandi – «Vulverhempton» 127 yillik tarixida ilk bor mavsumni qatorasiga to‘rt mag‘lubiyat bilan boshladi.

«Vest Hem» – «Tottenhem Hotspur» 0:3

Gollar: Sarr (47), Bergvall (57), van de Ven (64)

«Vest Hem»: Hermansen, Kilman, Mavropanos, Diuf, Uoker-Piters, Uord-Prouz (Irving, 90+2), Souchek, Lukas Paketa (Uilson, 68), Sammervill (Luis Gilerme, 62), Fernandesh (Magassa, 61), Bouen

«Tottenhem Hotspur»: Vikario, Romero, van de Ven (Danso, 80), Spens (Udodji, 71), Porro, Palinya, Sarr, Bergvall (Jonson, 80), Simons (Risharlison, 71), Quddus, Tel (Odober, 79)

Ogohlantirish: Spens, 52

Chetlatish: Souchek, 54

O‘tgan turda mavsumda ilk bor ochko yo‘qotgan «Tottenhem» «Vest Hem»ga hech qanday imkoniyat qoldirmadi. Ko‘p yillik murabbiy Devid Moyyesga javob berilib, Hulen Lopetegi qo‘liga o‘tganidan keyin inqiroz ko‘chasiga kirib qolgan «bolg‘achilar» Grem Potter boshqaruvida ham o‘ziga kela olmayapti. Dastlabki ikki turda debyutant «Sanderlend» (0:3) va «Chelsi»ga (1:5) yirik hisoblarda yutqazgan jamoa xalqaro o‘yinlar uchun tanaffus boshlanishi arafasida «Nottinghem»ni mag‘lub etib, muxlislarida umid uyg‘otgandi. Ammo «shporlar»ga qarshi o‘yin ham yirik hisobdagi mag‘lubiyat bilan yakunlandi. Mezbonlar birinchi bo‘limda darvozasi daxlsizligini saqlab qolgandi, ammo ikkinchi bo‘lim boshida mehmonlarning yangi futbolchisi Simons burchakdan uzatgan to‘pni Sarr darvoza to‘riga yo‘lladi, 54-daqiqada Souchek maydondan chetlatilgach esa o‘yin taqdiri amalda hal bo‘ldi. Bergval avvaliga o‘z nomini tabloga yozdirib qo‘ydi, keyin esa van de Venning goliga hammualliflik qildi.

«Brentford» – «Chelsi» 2:2

Gollar: Shade (35), Fabiu Karvalio (90+3) – Palmer (61), Kaysedo (85).

«Brentford»: Kelleher, van der Berg, Pinnok (Hiki, 83), Kollinz, Lyuis-Potter (Fabiu Karvalio, 90), Kayode (Ayyer, 83), Henderson, Yarmolyuk, Yyensen (Uattara, 73), Shade, Tiago (Henri, 72)

«Chelsi»: Sanches, Adarabioyo, Chaloba, Hato (Kukurelya, 46), Fofana (Jyeyms, 46), Fernandes, Kaysedo, Buonanotte (Jorj, 46), Gittens (Palmer, 56), Pedru Netu, Joao Pedro (Garnacho, 79)

Ogohlantirishlar: Tiago, 8. Yarmolyuk, 64. Pinnok, 82 – Hato, 30. Jorj, 90

Tig‘iz taqvim tufayli rotatsiyaga qo‘l urgan «Chelsi»da (Palmer, Kukurelya, Jyeyms, Estevao kabi asosiy tarkib futbolchilari zaxirada qoldirilgandi) birinchi bo‘limda jiddiy muammolar kuzatildi. Shade avvaliga birinchi imkoniyatdan foydalana olmagandi, lekin ushbu hujumchi Hendersonning maydonning ikkinchi qismidan uzatgan pasiga yetib bordi va jarima maydoniga kirmasdan zarba yo‘lladi, to‘p himoyachiga tegib yo‘nalishini o‘zgartirishi Sanchesni ilojsiz ahvolda qoldirdi. Ikkinchi bo‘limda esa jarohatdan tuzalib qaytgan Palmerning tushishi o‘yinni o‘zgartirdi, u jarima maydoni markazidan aniq zarbasi bilan hisobni tenglashtirdi. Keyin Koulda gol urish uchun yana bir imkoniyat paydo bo‘ldi, ammo «Brentford» darvozaboni Kelleher burchakka borayotgan to‘pga ulgurib, jamoasini qutqardi. 85-daqiqada esa ushbu darvozabon Kaysedoning jarima maydoni tashqarisidan yo‘llagan kuchli zarbasiga chora topa olmadi va mehmonlar buni g‘alaba golini urgandek nishonlashdi. Ammo «asalarilar» mag‘lubiyatga ko‘nmadi, o‘yinga qo‘shib berilgan daqiqalarda Shade autdan to‘pni jarima maydoni ichiga yetkazib berishi Fabiu Karvalio bo‘sh darvozani ishg‘ol etishi bilan yakunlandi. Portugaliyalik ushbu futbolchi jamoasining «sahrli tayoqchasi»ga aylanib bormoqda — u APLda ushbu jamoa safidagi to‘rt golini ham 89-daqiqdaan keyin urgan. «Chelsi» esa turnir jadvalida birinchi o‘ringa ko‘tarilish imkoniyatidan foydalana olmadi –Mareska shogirdlari ikki g‘alaba va ikki durang bilan 8 ochko jamg‘arib, beshinchi o‘rinda bormoqda.

Ispaniya: Madrid klublarida qiyin g‘alabalar

«Real Sosiyedad» – «Real» 1:2

Gollar: Oyyarsabal (56, pen) Mbappe (12), Arda Guler (44)

«Real Sosiyedad»: Remiro, Subeldiya, Chaleta-Tsar, Gomes, Elustondo (Aramburu, 57), Gorrotchategi (Karrikaburu, 78), Goti (Soler, 57), Barrenechea, Marin (Kubo, 66), Oyyarsabal, Gonsalu Gedesh (Zaxaryan, 66)

«Real»: Kurtua, Eder Militau, Hausen, Karreras, Karvahal (Aleksandr-Arnold, 82), Tshuameni, Sebalyos (Raul Asensio, 68), Arda Guler (Alaba, 88), Vinisius Junior (Garsiya, 68), Dias (Valverde, 46), Mbappe

Ogohlantirishlar: Subeldiya, 6. Barrenechea, 45 – Mbappe, 62

Chetlatish: Hausen, 32

«Real» 32-daqiqadayoq bir kishi kam bo‘lib qoldi, ammo yakunda g‘alabaga erishdi. Arbitr Hausenni Oyyarsabalga nisbatan «so‘nggi umid foli» uchun maydondan chetlatdi va bu epizod o‘yindan keyin ham muhokama qilinmoqda. Habi Alonso referining argumentlari unga ishonchli ko‘rinmaganini aytdi. Shu bilan birga, Hausen zarur bo‘lmagan holatda fol ishlatganini tan oldi, shuningdek, o‘n kishi bo‘lib qolgach, jamoa yanada jipslashganini qayd etdi.

Madridliklar o‘n kishi holatida ham hisobdagi ustunligini mustahkamlay oldi, tarkiblar teng holatida hisobni ochgan Mbappe esa o‘z nomiga golli uzatma ham yozib qo‘ydi. U raqib jarima maydoni ichida fantastik harakatlari bilan bir necha himoyachini ortda qoldirib, Arda Gulerning g‘alaba golini urishida asosiy ishni bajardi. Ikkinchi bo‘limda esa «Real» asosan himoyalandi, mezbonlarning bosimi esa Karvahal jarima maydoni ichida to‘pni qo‘li bilan o‘ynashi va Kurtua qo‘riqlagan darvozaga penalti belgilanishiga olib keldi. Oyarsabal 56-daqiqada 11 metrlik jarima zarbasini aniq ijro etdi. «Sosedad» shturm uyushtirishda davom etdi, Oyarsabal dublga yaqin keldi, ammo uning yaqin masofadan yo‘llagan zarbasini Kurtua qaytarib qoldi. Ikki holatda darvoza ustunlari mehmonlarlar joniga ora kirdi. Yakunda madridliklar g‘alabali hisobni saqlab qoldi va 12 ochko bilan turnir jadvalida yakkapeshqadamga aylandi, raqobatchilardan biri «Atletik» bu turda o‘z uyida «Alaves»ga sensatsion tarzda yutqazdi (0:1). Yana bir raqobatchi «Barselona» esa tur o‘yinini bugun «Valensiya»ga qarshi o‘tkazadi, ammo bu o‘yinda kataloniyaliklarga Lamin Yamal yordam bera olmaydi, u jarohat tufayli bir necha hafta o‘ynay olmasligi mumkin.

«Atletiko» – «Vilyarreal» 2:0

Gollar: Barrios (9), Gonsales (52)

«Atletiko»: Oblak, Langle, Le Norman (Pubil, 77), Rudjyeri (Gansko, 76, Galan, 83), Liorente, Koke, Barrios, Gonsales (Gallaher, 76), Simeone, Grizmann, Alvares (Serlot, 46)

«Vilyarreal»: Luis Junior, Foyt, Veyga, Kardona (Pedrasa, 79), Mourinio, Parexo, Partey (Komesanya, 64), Moleyro (Geyye, 64), Byukenen, Mikautadze (Oluvaseyi, 79), Pepe (Peres, 64)

Ogohlantirishlar: Alvares, 32. Rudjyeri, 73 – Parexo, 24. Veyga, 65. Mourinio, 84. Pedrasa, 90

Diyego Simeone jamoasi uzoq kutilgan g‘alabaga erishdi va bu g‘alaba noqulay raqibga qarshi o‘yinda ro‘y berdi. «Vilyarreal» «Atletiko»ga qarshi so‘nggi 11 safar o‘yinidan sakkiztasidan ochko olib qaytgandi. Ammo bu safar «sariq submarinalar» madridliklar pressingiga dosh bera olishmadi, Hulian Alvares esa tovondagi uzatmasi bilan Barriosni bo‘sh darvoza qarshisiga chiqardi, keyin esa «matraschilar» safida argentinaliklar koloniyasini to‘ldirgan Niko Gonsales ikkinchi bo‘lni urdi. Shu yozda «Yuventus»dan transfer qilingan futbolchi o‘ziga xos bo‘lmagan tarzda Liorentening uzatmasini bosh bilan darvozaga yo‘lladi.

Italiya: Kontening yangi rekordi

«Yuventus» – «Inter» 4:3

Gollar: Kelli (14), Kenan Yildiz (38), K. Tyuram (82), Adjich (90+1) – Hoqon Chalxono‘g‘li (30, 65), M. Tyuram (76)

«Yuventus»: Di Gregorio, Bremer, Kelli, Gatti (Joao Mariu, 79), Lokatelli (Kabal, 74), K. Tyuram, Makkenni (David, 79), Kalyulyu, Kopmeyners (Adjich, 73), Kenan Yildiz, Vlahovich (Openda, 73)

«Inter»: Zommer, Acherbi, Bastoni, Akanji, Hoqon Chalxono‘g‘li (Suchich, 81), Mxitaryan, Barella (Dimarko, 64), Karlos Augustu (Zelinski, 64), Dyumfris (Darmian, 77), M. Tyuram, Martines (Bonni, 64)

Ogohlantirishlar: Kopmeyners, 33. Lokatelli, 70 – Mxitaryan, 86

Shanba kungi «Italiya derbisi» shiddatli va qiziqarli o‘tishini oldindan taxmin qilish mumkin edi, chunki 1974 yildan buyon ilk bor «Yuventus» va «Inter»ni katenachchoga sodiq mahalliy mutaxassislar emas, xorijlik murabbiylar boshqarmoqda — xorvatiyalik Igor Tyudor va ruminiyalik Kristian Kivu. Shu bilan birga, ularning ikkisi ham Italiyaga begona emas. Futbolchi sifatida ular hozirda o‘z boshqaruvidagi jamoalarda to‘p surishgan va murabbiylik karerasini ham Apennin yarimorollarida qurishgan. Tyudor o‘z vaqtida «Yuve»da Andrea Pirloga assistentlik qilgan, Kivu esa «Inter»ning to‘rt yosh toifasidagi o‘smirlar jamoalarini boshqargan.

Bu odamlarga byankonerilar va neradzurrilar to‘qnashuvi naqadar prinsipialligini tushuntirishga ortiqcha hojat yo‘q va shanba kuni ularning shogirdlari ajoyib dramatik bahs namoyish etib berishdi va o‘tgan yilgi 4:4 hisobini barchaning yodiga solib qo‘yishdi. Muxlislar bu safar bitta kamroq gol ko‘rishdi, ammo shusiz ham o‘yin dam olish kunlarining eng yorqin o‘yini bo‘ldi. Dastlab mezbonlar himoyachisi Kelli jarima maydoni markazida turib quyi burchakka aniq zarba yo‘lladi. U «Italiya derbisi»da gol urgan ikkinchi ingliz futbolchisiga aylandi. Oxirgi marta bunaqasi 1961/62 yillar mavsumida kuzatilgandi. Keyin esa turklar katta sahnaga chiqishdi. Hoqon Chalxono‘g‘li ikki bor o‘z uslubida zarba yo‘llab, darvoza to‘rini ishg‘ol etdi. Kenan Yildiz ham uzoq masofadan zarba yo‘llab javob qaytardi, shuningdek 82-daqiqasida akasining goliga javob qaytarib, hisobni tenglashtirgan Kefren Tyuramga assistentlik qildi.

Bu goldan keyin Turindagi stadion tablosida 3:3 raqamlari porlay boshladi, translatsiya rejissyori esa o‘yinni mamnun kuzatayotgan Lilian Tyuramni ko‘rsatdi. Ikki o‘g‘li ham derbida gol urishdi — ularning taniqli otasiga yana nima kerak? Ammo barchasi qo‘shimcha daqiqalarda o‘zgarib ketdi, shu kuni zaxiradan tushib, A seriyada debyut qilgan chernogoriyalik Adjich olis masofadan aql bovar qilmas zarba yo‘lladi va to‘p Zommerning qo‘llari orasidan o‘tib, yuqori burchakka uchib bordi. «Yuve» startdagi uch turda uch g‘alabaga erishdi, «Inter» esa atigi uch ochko bilan kifoyalanishga majbur, oqshomning kutilmagan qahramoni esa byankonerilar tarixida milanliklar darvozasiga gol urgan eng yosh futbolchiga aylandi (19 yoshu 124 kun).

«Fiorentina» – «Napoli» 1:3

Gollar: Raniyeri (79) – De Bryuyne (6, pen), Hoylund (14), Bekema (51)

«Fiorentina»: de Xea, Pongrachich (Viti, 90+3), Raniyeri, Komutsso (Lempti, 87), Zom (Nikolussi Kavilya, 65), Mandragora, Fadjoli (Fatssini, 65), Gozens, Dodo, Djyeko (Pikkoli, 46), Kin

«Napoli»: Milinkovich-Savich, Buondjorno, Bekema, Spinatssola (Olivera, 69), Di Lorenso, Lobotka (Gilmor, 90+4), De Bryuyne (Neres, 69), Zambo Angissa, Maktominay, Politano (Elmas, 69), Hoylund (Lukka, 73)

APLda ishlari yurishmagan Hoylund o‘zi uchun qadrdon bo‘lgan Italiya chempionatiga qaytdi va «Napoli» safidagi ilk o‘yinidayoq gol urdi. «MYu»da ko‘plab vaziyatlardan foydalana olmasdan, murabbiylar ishonchidan chiqib qolgan daniyalik forvard Spinatssolaning pasidan keyin himoyachilardan osonlik bilan qochib ketib, to‘pni burchakka aniq yo‘lladi. 14-daqiqadagi bu gol amaldagi chempionlar uchun ikkinchisi edi, bundan oldinroq APLdan kelgan boshqa bir futbolchi De Bryuyne penaltini aniq ijro etib, hisobni ochgandi. Stefano Pioli bosh murabbiylikka qaytganidan keyin A seriyaning yangi mavsumini muvaffaqiyatsiz boshlagan va birorta g‘alabaga erisha olmagan «Fiorentina» faqat o‘yin oxirlariga kelib yagona javob golini urdi. «Napoli» xuddi «Yuventus» kabi yo‘qotishsiz ketmoqda, Antonio Konte esa Italiya chempionatida rekord o‘rnatdi. U 244 o‘yin o‘tkazib, barchadan tezroq 550 ochko jamg‘argan mutaxassisga aylandi.

Germaniya: to‘purarlarga atalgan tur

«Haydenhaym» «Borussiya» – D 0:2

Gollar: Girassi (33), Bayyer (45+6)

«Haydenhaym»: Ramay, Gimber (Bush, 46), Maynka, Pakyarada (Ferenbah, 7), Traore, Sheppner, Kerber, Bek (Konte, 46), Honzak (Kaufmann, 70), Ibrahimovich (Zirsleben, 81), Zivzivadze

«Borussiya» D: Kobel, Anton, Bensebaini, Ryuerson (O‘zjan, 74), Nmecha (Mane, 90+4), Gros (Chukvuemeka, 65), Svensson, Koutu, Bayyer (Kempbell, 74), Adeyyemi (Bellinghem, 66), Girassi

Ogohlantirishlar: Gimber, 39. Sheppner, 47 – Adeyyemi, 27. Ryuerson, 45. Girassi, 85

Chetlatish: Zivzivadze, 21

Birinchi bo‘limning birinchi yarmidayoq maydondan chetlatilgan Zivzivadze «Borussiya»ning ishini yengillashtirib ketdi, u markaziy zona atrofida ehtiyotsizlik bilan podkat qildi va «Haydenhaym» 22-daqiqadayoq ozchilik bo‘lib qoldi. «Asalarilar» esa bo‘limning qolgan vaqtida ikki bor mezbonlar darvozasini ishg‘ol etishdi. Girassi Ryuersonning uzatmasidan keyin bosh bilan aniq zarba yo‘llab, bundesligada qatorasiga sakkizinchi o‘yinda gol urib, seriyani davom ettirdi. Turnir tarixida legioner futbolchilar orasida bundan muvaffaqiyatli seriya faqat Levandovski (15 gol) va Obameyang (10) maqtana olishi mumkin. Bo‘limga qo‘shib berilgan daqiqalarda esa Adeyyemining uzatmasidan keyin himoyachilardan qochib ketgan Bayyer bo‘sh darvozani ishg‘ol etdi va o‘yin taqdirini amalda hal qildi.

«Bavariya» – «Hamburg» 5:0

Gollar: Gnabri (3), Pavlovich (9), Keyn (26 pen, 62), Dias (29)

«Bavariya»: Noyyer, Upamekano (Rafael Gerreyru, 46, Bishof, 63), Ta, Stanishich, Laymer, Kimmih, Pavlovich, Gnabri (Jyekson, 46), Dias (Boe, 76), Olise, Keyn (Karl, 64)

«Hamburg»: Oyyer Fernandesh, Vushkovich, Sumaoro (Elfadli, 46), Omari, Remberg, Kapaldo (Meffert, 46), Muhaym, Mikelbrensis, Ressing-Lelesiit (Filipp, 46), Viyeyra (Glatsel, 76), Kenigsderffer (Balde, 76)

Ogohlantirishlar: Upamekano, 27. Pavlovich, 90 – Sumaoro, 1. Muhaym, 86

«Bavariya»ning navbatdagi qurboni bu yil bundesligaga qaytgan «Hamburg» bo‘ldi, o‘yinning yarim soati o‘tmasdan mezbonlar to‘rtinchi golni urishdi. Stadionga yig‘ilgan muxlislar 3-daqiqadayoq Gnabrining o‘tkir burchakdan turib to‘sin ostiga yo‘llagan zarbasidan bahramand bo‘lishgandi. Bir necha daqiqa o‘tib myunxenliklar raqib himoyachilarini yosh bolalar holiga solishdi va bu hujumni Pavlovich yakunlab berdi. Shundan keyin o‘yindagi intriga mezbonlar yana qancha gol urishida qolgandi. Keyn bu safar dublni nishonladi, Dias esa rikoshet yordamida navbatdagi golini urib, klub rekordini takrorladi. Germaniya chempionatida «Bavariya» safida ungacha faqat Rudjyero Ritssitelli (1996 yil), Luka Toni (2007) va Mario Mandjukich (2012) dastlabki uch o‘yinda gol urishgan.

Fransiya: «Monako»da g‘alaba

«Oser» – «Monako» 1:2

Gollar: Salisu (73 avtogol) – Minamino (45+2), Ilenixenya (89)

«Oser»: De Persen, Sive, Mensa, Senayya, Oppegor, Kazimir, Danois (Osman, 90+1), Ovusu, Namaso, Sinayoko (Matondo, 77), Mara (L. Kulibali, 65)

«Monako»: Ken, Kerer, Salisu, Uttara (Kayyu Enrike, 63), Vanderson, Zakariyo, Bamba (Kamara, 78), Akliush, Minamino (M. Kulibali, 90+2), Balogun (Brunner, 63), Biret (Ilenixenya, 78)

Ogohlantirishlar: Kazimir, 55. Ovusu, 64 – Zakariyo, 38. Uttara, 42. Minamino, 55. Bamba, 72. Brunner, 75. Kayyu Enrike, 90

Chetlatish: Kazimir, 68 (ikkinchi sariq)

«Monako» bosh murabbiyi Adi Hyutter FIFA kunlaridan keyingi o‘yin uchun jiddiy rotatsiya amalga oshirdi va o‘yinni Kayya Enrike, Dayyer, Golovin va Lamin Kamar kabi bir qator yetakchilarsiz boshladi. Yaponiyalik Minaminoda esa terma jamoalar o‘yinlaridan keyin tiklanish uchun noyob qobiliyat borligi aniq. Bir safar u terma jamoa ixtiyoridan qaytganining ikkinchi kunida maydonga tushgandi, bu safar u Yaponiya bilan AQShga safar qilganiga qaramay (AQSh va Meksikaga qarshi o‘yinlar uchun), tetik holatda edi. Birinchi bo‘limga qo‘shib berilgan daqiqalarda aynan u hisobni ochdi, ammo bu oson g‘alabani kafolatlamadi. Qolaversa, Kazimirning ikkinchi sariq kartochkasi tufayli kamchilik bo‘lib qolgan bo‘lsa-da «Oser» hisobni qisqartirdi. Salisuning avtogoli ortidan yana bir bor omad monegaskliklardan yuz o‘girdi va Kerer qulay vaziyatdan yo‘llagan zarbasi to‘singa bordi. Biroq yakunda qizil-oqlar safida zaxiradan tushgan Ilenixenya g‘alaba golini urib ketdi.

Turkiya: Shomurodovning goli yordam bermadi

«Beshiktosh» – «Istanbul Boshoqshehir» 2:1

Gollar: Bilol Ture 74, Under 90+1 – Shomurodov 71.

Chetlatishlar: Orkun 90+10 – Ba, 89.

Turkiya Superligasi 5-turi doirasida «Istanbul Boshoqshehir» «Beshiktosh» maydoniga safar qildi. Mehmonlar safida o‘zbekistonlik hujumchi Eldor Shomurodov o‘yinni boshlang‘ich tarkibda boshladi, O‘zbekiston milliy jamoasining yana bir a’zosi Abbosbek Fayzullayev esa zaxirada qoldi. O‘yinning 71-daqiqasida Eldor burchak zarbasidan keyin hisobni ochgandi, ammo 3 daqiqa o‘tib Bilol Ture hisobni tenglashtirdi – 1:1. 85-daqiqada Shomurodov zaxiraga olinib, uning o‘rniga Nunu da Koshta maydonga tushdi. 89-daqiqada esa Usseynu Baning chetlatilishi mehmonlarga qimmatga tushdi, bir kishi ko‘p bo‘lib o‘ynagan mezbonlar Underning 90+1-daqiqadagi goli evaziga kambek amalga oshirdi – 2:1. 90+3-daqiqada Abbosbek Fayzullayev zaxiradan maydonga tushirildi, ammo o‘yin natijasi o‘zgarmay qoldi. Endilikda «Boshoqshehir» uch o‘yinda 2 ochko (yevrokuboklar saralashidagi ishtirok tufayli ikkita o‘yini qoldirilgan) bilan 18 jamoa orasida 14-o‘rinda joylashgan.

Source link