Prezident Shavkat Mirziyoyev raisligida 2026-yil 13-mart kuni aholi murojaatlari bilan ishlash tizimini takomillashtirish, Xalq qabulxonalari faoliyatini yangi bosqichga olib chiqish va jamoatchilik fikrini chuqur tahlil qilish masalalari yuzasidan videoselektor yig‘ilishi bo‘lib o‘tgan edi.

Ushbu yig‘ilishda berilgan topshiriqlar ijrosini ta’minlash doirasida O‘zbekiston Respublikasi Prezidenti huzuridagi Davlat siyosati va boshqaruvi akademiyasida ichki ishlar organlari xodimlari uchun maxsus o‘quv kurslari boshlandi.

Uch kunlik mashg‘ulot ichki ishlar organlari xodimlarining aholi bilan samarali muloqot qilish, fuqarolar murojaatlarini tizimli va manzilli hal etish, shuningdek, ularning kasbiy kompetensiyalari hamda psixologik tayyorgarligini oshirishga qaratilgan muhim tashabbus sifatida yo‘lga qo‘yildi.

Kurs dasturiga ko‘ra, tinglovchilar aholi muammolarini chuqur tahlil qilish, ularga manzilli yechim topish, fuqarolar bilan muloqotda zamonaviy yondashuvlarni qo‘llash bo‘yicha nazariy bilimini mustahkamlab, amaliy ko‘nikmani rivojlantiradi.

Shu bilan birga, mashg‘ulotlar jarayonida davlat xizmatchilari odob-axloqi, xizmat intizomi, aholi bilan ishlashning ilg‘or usullariga alohida e’tibor qaratilmoqda.

Mazkur o‘quv-trening mashg‘ulotlari davomida xalqaro tajribalarga asoslangan hamda milliy uyg‘unlikdagi maxsus o‘quv dasturi ishlab chiqildi, – dedi akademiya prorektori Nosirjon Asqarov. – Asosiy maqsad – korrupsiyaga toqatsiz hamda fuqarolarning dardini tinglay oladigan, murojaatlarni yangi tartibda hal qiladigan, har bir masalani bevosita o‘ziga daxldor, ya’ni shaxsiy bir murojaat sifatida qabul qiladigan xodimlarni tayyorlashga qaratilgan. 

Shuningdek, o‘quv dasturi doirasida tergov va surishtiruv jarayonlarida qonuniylikni ta’minlash, huquqbuzarlikning oldini olish mexanizmlari, korrupsiyaga qarshi kurashishning zamonaviy yondashuvlari kabi dolzarb mavzular qamrab olinadi.

Bu ishtirokchilarning nafaqat kasbiy, balki ma’naviy-ma’rifiy salohiyatini ham yuksaltirishga xizmat qilishi bilan ahamiyatlidir.

Ma’lum qilinganidek, videoselektor yig‘ilishida Prezident Virtual va Xalq qabulxonalariga ichki ishlar organlari faoliyatiga oid murojaatlar haligacha ko‘plab tushayotgani, ayrim hollarda xodimlar muomalasi va xizmat faoliyati yuzasidan salbiy fikrlar bildirilayotgani tanqidiy muhokama qilingan edi.

O‘quv kursi mashg‘ulotlariga Prezident Administratsiyasi, Oliy Majlis Senati, Oliy sud, Bosh prokuratura, Ichki ishlar vazirligi, Korrupsiyaga qarshi kurashish agentligi, Advokatlar palatasi, Respublika Ma’naviyat va ma’rifat markazi vakillari, shuningdek, malakali professor-o‘qituvchilar, olimlar va ekspertlar jalb etilgan.

Ishtirokchilarning bilim va ko‘nikmalari dastlab kirish testlari orqali baholanib, natijalarga ko‘ra guruhlarga ajratildi hamda har bir tinglovchi bilan individual yondashuv asosida ish olib borilyapti.

Amaliy mashg‘ulotlarda real keyslar, simulyasion vaziyatlar orqali qaror qabul qilish, stressga chidamlilik, xizmat samaradorligini oshirish kabi muhim ko‘nikmalar shakllantiriladi.

Source link

Andijon viloyati hokimi o‘rinbosari Isomiddin Ismanov qo‘lga olingan tezkor tadbir videosi e’lon qilindi. Hokim o‘rinbosari pulni sanab olgach, “bu qarz deyiladi. Shunaqa narsasi bor. Bilasiz-a?” degan.

Davlat xavfsizlik xizmati Andijon viloyati hokimi o‘rinbosari Isomiddin Ismanov qo‘lga olingan tezkor tadbir tasvirlarini e’lon qildi.

Ma’lum bo‘lishicha, Isomiddin Ismanov 50 ming dollarni o‘z yashash xonadonida sanab olgan. U pulni olgach, “bu qarz deb atalishini” bildirgan.

Ular o‘rtasidagi suhbat shunday bo‘lgan:

Tadbirkor: “50 ming o‘tdi-a, aka?”

Hokim o‘rinbosari: “Bu qarz deyiladi, bilasiz-a? Shunaqa narsasi bor”.

Tadbirkor: “Men sizga berdim, aka”.

Hokim o‘rinbosari: “Yo‘q, shunaqa deyiladi”.

Tadbirkor: “Hujjatini “chotki” qilib, mening nomimga chiqartirib bersangiz bo‘ldi”.

Isomiddin Ismanov Bobur shaharchasi hududida davlat zaxirasida bo‘lgan 20 sotix yerni hujjatlashtirib olib berish evaziga 50 ming dollar talab qilgan. U 4 aprel kuni pulni o‘z uyida olayotganida DXX tomonidan o‘tkazilgan tezkor tadbirda qo‘lga olingandi.

Hokim o‘rinbosariga nisbatan Jinoyat kodeksining 25,168-moddasi 4-qismi «a» bandi va 28,211-moddasi 3-qismi «a» bandi bilan jinoyat ishi qo‘zg‘atilgan. U protsessual tartibda ushlangan.

 

Source link

Yo‘l-patrul xizmati xodimi Cobalt mashinasida yo‘lning qarama-qarshi yo‘nalishiga chiqib ketib, Gentra bilan to‘qnashgandi. Oqibatda Gentra haydovchisi halok bo‘lgan.

Toshkent viloyatining Chinoz tumanida YTH sodir qilgan yo‘l-patrul xizmati xodimi ozodlikdan mahrum qilindi. Kun.uz sud hujjatlari bilan tanishdi.

Tongdagi avariya

Sud hukmiga ko‘ra, YTH 2025 yil 12 avust kuni tongda sodir bo‘lgan. Toshkent shahrida yashovchi Fayzulla Ubaydullayev o‘sha kuni turmush o‘rtog‘i va 3 nafar farzandi bilan sayohat qilish uchun Gentra mashinasida Samarqand shahriga yo‘l olgandi.

Chinoz tumani Madaniyat mahallasiga yetganda Gentra’ga yo‘lning qarama-qarshi tomonidan uchib chiqqan Cobalt mashinasi kelib uriladi. 

Ushbu mashina rulida Toshkent shahar YHXB inspektori Davron Yo‘ldoshev bo‘lgan. U mashinani yuqori tezlikda boshqarib, rul boshqaruvini yo‘qotgan hamda yo‘lning qarama-qarshi tomoniga o‘tib ketgandi.

YTH oqibatida Gentra haydovchisi Fayzulla Ubaydullayev Yangiyo‘l shahar tibbiyot birlashmasiga olib boriladi, ammo u jonlantirish bo‘limida vafot etadi. Shuningdek, YTHda marhumning ikki qizi va turmush o‘rtog‘i ham tan jarohati olgan.

“Nomer”ni yechib harakatlangan”

Marhumning yaqinlariga ko‘ra, Davron Yo‘ldoshev Cobalt’ni davlat raqam belgisini yechib olgan holda katta tezlikda boshqargan. U o‘z yo‘nalishidagi mashinani noto‘g‘ri quvib o‘tishi oqibatida boshqaruvni yo‘qotib, qarama-qarshi yo‘nalishga chiqib ketgan.

“Davron Yo‘ldoshev YTHdan so‘ng 10-15 daqiqada yetib kelgan davlat raqami yechib olingan Damas mashinasiga o‘tirib, yordam ko‘rsatmasdan voqea joyidan qochib ketgan. O‘zi YPX xodimi bo‘la turib, bir vaqtning o‘zida shuncha qoidabuzarlik sodir qilishi mumkinmi?”, degandi marhumning ukasi Kun.uz jurnalisti bilan suhbatda. 

“Ertalabki yo‘riqnomaga shoshayotgandim”

35 yoshli Davron Yo‘ldoshev suddagi ko‘rsatmasida aybiga iqror bo‘lib, o‘sha kuni ertalabki yo‘riqnomaga yetib borish uchun shoshganini aytgan.

“O‘sha kuni soat 5:20 larda Cobalt mashinamda mahallamdan chiqib, M-39 yo‘lida harakatlana boshladim. Boshqaruvni yo‘qotib, mashina rulini to‘g‘irlamoqchi bo‘ldim. Ammo hushimni yo‘qotdim. O‘zimga kelganimda Toshkent shahrida shifoxonada ekanimni bildim. Meni shifoxonaga notanish kishilar olib borishgan.

Yo‘l harakati qoidalariga amal qilmagan holda harakatlanganimni tan olaman. Bu qilmishimdan pushaymonman”, – degan u.  

Shuningdek, sudlanuvchi yetkazilgan moddiy va ma’naviy zararni qoplash uchun 15 500 dollar to‘lab berganini ma’lum qilgan.

Davron Yo‘ldoshev o‘sha kuni uyidan chiqqanida mashinasining davlat raqam belgisi joyida turganini, YTH bo‘lganda davlat raqam belgisi bo‘lgan-bo‘lmaganini eslolmasligini bildirgan.

Jazo

JIB Chinoz tuman sudining 2025 yil 23 dekabrdagi hukmi bilan Davron Yo‘ldoshev Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismida nazarda tutilgan jinoyatni sodir qilishda aybli deb topilgan. Unga 3 yil transport vositalarini boshqarish huquqidan mahrum qilgan holda 7 yil muddatga ozodlikdan mahrum qilish jazosi tayinlangan. Jazoni manzil-koloniyasida o‘tash belgilangan.

Marhumning qonuniy vakili sud hukmidan norozi bo‘lib, apellyatsiya shikoyati kiritgan. Shikoyatda sudlanuvchi xavf ostida qoldirish hamda hokimiyat yoki mansab vakolati doirasidan chetga chiqish jinoyatlarini ham sodir qilganini inobatga olib, unga og‘irroq jazo tayinlash so‘ralgan.

Toshkent viloyati sudi jinoyat ishlari bo‘yicha sudlov hay’ati apellyatsiya instansiyasining 2026 yil 10 martdagi ajrimi bilan dastlabki sud hukmi o‘zgarishsiz qoldirilgan.

Avvalroq Xorazmda mast holda mashina boshqarib, odam urib yuborgan va hodisa joyidan ketib qolgan IIB xodimi 3 yil 1 oy muddatga ozodlikdan mahrum qilingandi.

Source link

Toshkentda yurak nuqsoni sabab operatsiya qilingan 8 oylik go‘dak vafot etdi. Ona shifokorlar harakatlarini shubha ostiga olib, xayriyadan tushgan pullar faqat bitta dorixonaga borib tushayotganini aytmoqda. Uning gaplarini boshqa ota-onalar ham tasdiqlagan. Shifokor bolaning o‘limiga og‘ir yondosh kasalliklar sabab bo‘lganini ma’lum qildi.

Jizzax viloyatida yashovchi 8 oylik Muhammadaziz Qo‘chqorov tug‘ma yurak nuqsoni bilan Toshkent davlat tibbiyot universiteti bolalar ko‘p tarmoqli klinikasi (xalq tilida SAMPI) kardioxirurgiya bo‘limida operatsiya qilingan. Jarrohlik amaliyoti muvaffaqiyatli o‘tgani aytilgan, lekin oradan uch kun o‘tib bolaning ahvoli og‘irlashib, vafot etgan.

“Dorixonaga pul to‘lab, dorisiz ketasiz”

Yagona Qo‘chqorova, Muhammadazizning onasi:

— 26 fevral kuni ertalab shifokorlar kelishdi. Bola shishib ketgan, oyoqchalarigacha, hammayog‘i shishgan, siymay chiqdi desam, bitta ukol qilamiz deb ukol qilishdi. Shundan keyin 2-3 mahal siydi. Bolani badanlari boshqacha bo‘lib o‘zgardi, ko‘karishlar bo‘ldi. Faqat shu ukollarni qildi, keyin olib kirib ketib komaga solib apparatga qo‘yishgan. Shu bilan turmadi bolam…

19 yoshli o‘g‘lim kirganida shifokor: “Bolani kasalxonadan tirik, og‘ir ahvolda olib chiqib ketyapmiz. Uyga yetib borguncha o‘lib qolsa, shifokorlarga da’voyimiz yo‘q” degan tilxat yozdirib olib, keyin bolaning o‘ligini bergan. Ertasiga ukasi ko‘milgandan keyin nega unday yozib berganini so‘rasam: “Ukangni bermaymiz, morgga topshirib yuboramiz” deyishgani uchun yozganini aytyapti. Lekin u nima tilxat ekaniga o‘g‘limning aqliyam yetmagan.

Mening bolam qaytib kelmaydi, lekin boshqa onalar menga o‘xshab kuymasin. U yerda o‘sha haftaning o‘zida 12-11 nafar bola o‘lib chiqib ketyapti. Kasalxonada ro‘za oyida xayriya pullari kelganida kasal bolalarni olib chiqib videoga oldirib, televideniyelarga yoki hokimiyatlarga ko‘rsatib, ertasiga xayriyadan olgan pullarini olib qo‘yishyapti. +5 degan aptekasi bor ekan o‘zlarining, bemorning yaqinlarini o‘sha yerga jo‘natyapti. U yerda pulni to‘laysiz, “ketavering, o‘zimiz olib borib beramiz” deydi. Qo‘lingizga dori-darmon ham, hech narsa bermaydi.

Balki hamma operatsiyalar davlat tomonidan qilinayotgandir, lekin hamma yonidan ham xarajat qilyapti. Mening o‘g‘limning operatsiyasi uchun fonddan 24 mln pul o‘tkazildi. O‘zim qilgan xarajatlarim – 4,5–5 millionga dori-darmonlar olib keldim. Lekin 2000 dollarlab sanab bergan onalar bor u yerda. Hamma o‘sha aptekaga pulini sanab berib, dorisiz ketyapti.

“Ota-onalar hech narsa deyisholmaydi – bolasi ularning qo‘lida”

Kun.uz ixtiyorida boshqa ota-onalarning ham shunday mazmundagi iddaolari bor. Ular ham ehson pullarini bitta dorixonaga topshirishgani haqida ma’lum qilishgan.

Zamira, Sirdaryo viloyati:

— 6 yoshli qizim SAMPIda yurak operatsiyasidan keyin vafot etdi. Operatsiyamiz Muhammadaziz bilan oldinma-keyin bo‘lgandi. Boshqa joyda operatsiya xarajatlarini surishtirsak, 30 mln ketadi deyishgandi. Lekin bu yerda 55 mln xarajat ketadi deb yozib berishdi. Operatsiya pulini “Mehrli qo‘llar” fondi to‘lab berdi.

Ramazon oyi bo‘lgani uchun ehson qilib berilgan pullarni qo‘limizga tutqazib, keyin konvertni ochtirmasdan yig‘ib olishdi: “dorilar uchun kerak bo‘ladi” deb. Dorilar faqat bitta aptekadan olinarkan, pulni o‘sha yerga tashlab kelasiz, kerakli dorilarni yuboramiz deyishadi. Lekin qanaqa dori, narxi qancha, u dori boshqa aptekada qanchaga sotilyapti – hech narsa bilmaysiz.

Ma’mur, Toshkent viloyati:

— 3 yil farzand kutib topgan o‘g‘limizda yurak nuqsoni aniqlangan edi. Bir nechta shifoxonalarda tekshirtirdik. Doktor Ibragimov tezroq operatsiya qildirmasak bo‘lmasligini aytdi. Chaqaloqlarniyam operatsiya qilishayotgani, natija yaxshiligini gapirdi. Biz ham ishonib, tezda operatsiyaga tayyorlandik. Afsuski, operatsiyadan keyin farzandimdan ayrilib qoldik. Bolamizga berilgan umr shunchadir balki deb, o‘zimga taskin beryapman, lekin bu yerdagi g‘alati ishlarni tushunmadim.

Ehson qiluvchilar kelib, muhtoj oilalarga ataganlarini berib ketishadi. Syomka qilinadi, keyin “hammasiga bolaga kerakli dorilar olib kelinadi” deb, +5 aptekasiga yuborishadi. U yerda shunchaki pulni berasiz va bolangizga nima olib kelishlarini bilmaysiz. Qizig‘i, nega aynan bu apteka, bu qanaqa dori, hech kim bilmaydi.

Bolam bilan bitta palatada yotgan jizzaxlik bolaning onasi shu pulni eriga berib yuborgan ekan, shifokorning qattiq jahli chiqib ketdi. Qaytarib olib kelib aptekaga topshirishdi. Apteka kimga tegishli bilmayman, lekin bu ishniyam to‘g‘ri deb bo‘lmaydi. Bu yerdagi ota-onalar hech narsa deyisholmaydi, chunki bolasi shu shifokorlarning qo‘lida.

“Ularni tilxat yozishga hech kim majbur qilmadi”

Kun.uz muxbiri Toshkent davlat tibbiyot universiteti bolalar ko‘p tarmoqli klinikasida bo‘lib, kardioxirurgiya bo‘limi rahbari Nodir Ibragimov bilan suhbatlashdi. U Muhammadazizning o‘limiga yondosh kasalliklar sabab bo‘lganini aytdi.

“Bizga olib kelishganida bu bolamizda Daun sindromi bo‘lgan. Bu sindromda o‘zi og‘ir nuqsonlar bilan tug‘iladi 80 foizi. Bu bolada ikkita yurak qorinchalari o‘rtasida teshik bo‘lgan. Yurakning ikkita klapani bitta bo‘lib ketgan. Bunda yurak bitta kamerali bo‘lib qoladi. Bu bitta og‘ir nuqson, undan tashqari bolada yana qo‘shimcha nuqson – aorta bilan o‘pka qon tomiri yurakning o‘ng tomonidan chiqqan. Ota-onasi genetik tekshirtirishmagan bolani. Bizda ham genetik tekshiruvga sharoit yo‘q, lekin genetik tekshiruvdan keyin bu tashxis tasdiqlanadi.

Bolaning davleniyasi juda past, yurak urishi ham juda past holatda bo‘lgan. Bunaqa holatdan keyin biz morgga berish kerakligini aytamiz. Bola o‘lsa morgga beriladi. Bular «yo‘q, morgga bermaymiz» deyishdi. Bizda hali biologik o‘lim qayd qilinmagan, faqat klinik o‘lim qayd qilingandi. Bular hammasi minutma-minut bolaning kartasida yoziladi. Yurak to‘xtagan va yurgizib yuborganmiz, lekin yurak urishi juda past bo‘lgan. O‘sha holatda olib chiqib ketamiz deyishdi va tilxat yozib ketishdi. Ularni hech kim majbur qilmadi tilxat yozishga.

Bizda operatsiya tekin, yotish tekin. Lekin operatsiyaga ketadigan narsalarimiz ko‘p. «Mehrli qo‘llar» fondi va Ijtimoiy himoya agentligi yordamida yiliga 300 dan ortiq bolalarni operatsiya qilamiz. Bolani yotqizamiz, sharoiti og‘ir bo‘lsa operatsiyaga yetishmagan narsalarni yozib beramiz olib kelishlari uchun. Rasman bosh vrach, apteka boshlig‘i va men imzo chekaman. Fond va agentlik agar imkoni bo‘lsa olib berishadi, ular olib bermaydigan holatlarda ehson qilish istagida bo‘lgan odamlar bilan uchrashtiramiz. Biz qo‘limizga pul ushlamaymiz. Apteka hisoblab bergan dorilarni olib kelib berishadi».

Shifokordan bu vaziyatda ota-ona, dorixona, kasalxona o‘rtasida shaffoflikni ta’minlash mexanizmi haqida so‘raganimizda, bunday tizim yo‘qligini tan oldi. Bu holat tibbiy xizmat sifati, bemor huquqlari va shaffoflik masalalarini yana bir bor kun tartibiga chiqaradi.

Vaziyat chuqur tekshiruv va tahlillarni talab qiladi. Jizzaxlik ona buning uchun farzandining qabrini ochishlariga ham rozi.

Source link

O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev 6-aprel kuni mamlakatimiz mudofaa qobiliyatini mustahkamlash va harbiy xizmatchilarni qo‘llab-quvvatlash masalalari yuzasidan yig‘ilish o‘tkazdi.

Bugungi kunda mamlakatimizda yoshlar masalasi davlat siyosatining eng muhim yo‘nalishlaridan biri bo‘lib, ularning zamonaviy bilim va kasb-hunar egallashini hamda bandligini har tomonlama qo‘llab-quvvatlash bo‘yicha izchil islohotlar olib borilmoqda.

Xususan, joriy yil 13-yanvar kuni o‘tkazilgan Xavfsizlik kengashining kengaytirilgan yig‘ilishida harbiy xizmat nufuzini yanada oshirish hamda yoshlarni jamiyatda munosib o‘rin topishiga ko‘maklashish bo‘yicha aniq vazifalar belgilab berilgan edi.

Bu boradagi islohotlarning mantiqiy davomi sifatida bugun muddatli harbiy xizmatga chaqirilgan yoshlarni kasbga o‘rgatish va sifatli ta’lim olishlari uchun sharoit yaratish hamda armiyada kitobxonlikni ommalashtirish yuzasidan ishlab chiqilgan takliflar ko‘rib chiqildi.

Jumladan, 2026-2027 o‘quv yilidan boshlab muddatli harbiy xizmatga chaqirilgan yoshlarga bir qator imtiyoz hamda kafolatlar berilishi nazarda tutilmoqda.

Endilikda muddatli harbiy xizmatchilar uchun harbiy xizmat davrida oliygohlarga o‘qishga kirib, masofaviy ta’lim olish imkoniyati yaratilmoqda. Bu jarayonda askarlar uchun ta’lim tashkilotlari bilan hamkorlikda harbiy qismlarda abituriyentlarni tayyorlash kurslari tashkil etilib, oliygohlarning kirish imtihonlariga tayyorlash tizimi yo‘lga qo‘yiladi.

Shartnoma asosida o‘qishga qabul qilingan askarlarga esa foizsiz imtiyozli kreditlar ajratiladi. Eng muhimi, oliy ta’lim muassasalariga qabul qilingan askarlar harbiy fakultetlar talabalariga tenglashtirilib, o‘qishni tamomlagandan so‘ng ularga zaxiradagi leytenant harbiy unvoni beriladi.

Shu bilan birga, namunali xizmat o‘tagan, respublika va xalqaro sport musobaqalari hamda fan olimpiadalarida birinchi o‘rinni egallagan askarlarni test sinovlarisiz o‘qishga qabul qilish tartibi belgilanmoqda.

Joriy etilayotgan imtiyozlardan yana biri – askarlar uchun harbiy xizmat davomida “Bitta askar – bitta kasb” tamoyili asosida 3-6 oylik o‘quv kurslari tashkil etilib, ularga davlat namunasidagi maxsus sertifikat beriladi.

Muddatli harbiy xizmatdan qaytib, xususiy sektorda faoliyat yuritmoqchi bo‘lgan yoshlarning kasb-hunarga o‘qish xarajatlari vaucher asosida Bandlikka ko‘maklashish davlat jamg‘armasi tomonidan qoplab beriladi.

Davlat tashkilotlariga ishga kirish istagini bildirgan yoshlarga esa Boshqaruv samaradorligi agentligi tomonidan o‘tkaziladigan test sinovlarida 10 foizlik imtiyoz ballari qo‘shib beriladi.

Yig‘ilishda harbiy xizmatchilarni kitobxonlikka qiziqishini yanada oshirish, bu borada ularni qo‘llab-quvvatlash hamda rag‘batlantirish bo‘yicha chora-tadbirlar ham ko‘rib chiqildi.

Xususan, joriy yildan boshlab, har yili Qurolli Kuchlarning barcha toifadagi harbiy xizmatchilari o‘rtasida to‘rt bosqichli “Ma’naviyat qalqoni” respublika kitobxonlik tanlovi o‘tkaziladi.

Tanlovning birinchi bosqichi harbiy qism va harbiy ta’lim muassasalarida, ikkinchi bosqichi harbiy okrug, birlashma va qo‘shilmalarda, uchinchi bosqichi Qurolli Kuchlar tarkibidagi vazirlik va idoralarda o‘tkaziladi. Yakuniy respublika bosqichida saralash bosqichlarining g‘olibi bo‘lgan harbiy xizmatchilar o‘zaro bellashadi. Yakuniy bosqichning 4 nafar g‘olibi Qurolli Kuchlar Oliy Bosh Qo‘mondonining bosh sovrini – zamonaviy elektromobil hamda diplom bilan taqdirlanadi. Sovrinli o‘rinlarni egallagan harbiy xizmatchilar pul mukofotlari va diplomlar bilan rag‘batlantiriladi.

Davlatimiz rahbari takliflarni ma’qullab, tegishli qarorlarni imzoladi. Yangi chora-tadbirlar yurtimiz taraqqiyoti uchun yuqori bilim, malaka va intellektual salohiyatli hamda vatanparvar kadrlar zaxirasini shakllantirishga xizmat qilishi lozimligini ta’kidladi.

Yig‘ilishda, shuningdek, mudofaa vaziri mamlakatimiz harbiy xavfsizligini kuchaytirish, qo‘shinlarning jangovar shayligini oshirish yuzasidan belgilangan vazifalar ijrosining borishi to‘g‘risida axborot berdi.

Source link