Sport
«Real»da yirik g‘alaba, Italiya derbisida hakamlik mojarosi. Kun o‘yinlari
«Real»da Mbappe yo‘qligida gollarni Vinisius urmoqda, «Siti» va «Liverpul» Angliya kubogida yurishini davom ettirdi, Italiyada turning markaziy uchrashuvida «Yuventus» hakamning bahsli qarori tufayli ozchilik bo‘lib qoldi, «Inter» esa so‘nggi daqiqada g‘alaba golini urdi. Shanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: Husanov va jamoasi keyingi bosqichda
«Manchester Siti» – «Solford Siti»
Gollar: Dorrington, 6 – avtogol (1:0). Geyi, 81 (2:0)
«Manchester Siti»: Trafford, Stouns (Geyi, 65), Husanov, Ayt Nuri (O`Rayli, 64), Alleyn (Makaydu, 22), Gonsales (Rodri, 75), Reynders, Lyuis, Sherki, Foden (Semenyo, 65), Marmush
«Manchester Siti» hozircha Angliya Kubogida tejamkor o‘yin bilan ham g‘alabalarga erishmoqda: jamoaga asosan quyi ligalar vakillari raqib bo‘lmoqda va o‘yinlar «Etihad»da kechmoqda. Ammo o‘tgan bosqichda «shaharliklar» «Ekseter» darvozasiga istagancha gol urgan bo‘lishsa (10:1), to‘rtinchi divizion vakili bo‘lgan «Solford» munosib qarshilik ko‘rsatdi. Holbuki tezkor avtogoldan keyin ushbu raqib sochilib ketishi kutilgandi. Bu o‘yinda dastlab himoyada Husanovga Alleyn sherik sifatida tushgandi, ammo himoya chizig‘idagi muammolar tufayli yanvarda «Uotford»dan qaytarib olgan 20 yoshli ushbu futbolchi bo‘lim o‘rtalarida jarohat tufayli almashtirildi. Himoyadagi muammolarni yopish uchun qishda olib kelingan futbolchilardan yana biri Geyi esa ikkinchi bo‘limda zaxiradan maydonga tushib, klub safidagi ilk golini urdi.
«Aston Villa» – «Nyukasl Yunayted» 1:3
Gollar: Abraham, 14 (1:0). Tonali, 63 (1:1). Tonali, 76 (1:2). Voltemade, 88 (1:3)
«Aston Villa»: Bizot, Lindelyof, Pau Torres, Din, Bogard, Duglas Luis (Sancho, 78), Onana, Barkli (Buendiya, 65), Beyli (Martines, 45+4), Rodjyers (Matsen, 77), Abraham (Uotkins, 65)
«Nyukasl Yunayted»: Ramsdeyl, Tshau, Bern, Holl, Trippiyer (A. Myorfi, 90), Tonali, Remsi (Uillok, 80), Osula (Gordon, 63), Barns, J. Myorfi (Elanga, 63), Voltemade
Ogohlantirishlar: Duglas Luis, 4. Din, 42 – Tshau, 25. Barns, 52. Remsi, 55
Chetlatish: Bizot, 45
Angliya kubogi 1/16 final bosqichidagi markaziy bahs esa Bruno Gimaraeshsiz o‘tdi. «Nyukasl» sardori ikki oydan ko‘proq vaqtga safdan chiqishi klubiga ham, Braziliya terma jamoasiga ham jiddiy zarba bo‘ldi. Ammo Karlo Anchelottida «Aston Villa»ga qaytgan Duglas Luiz varianti ham bo‘ladi. Ushbu futbolchi «Yuventus»da ham, «Nottinghem»da ham oldingi darajasiga qayta olmadi. Lekin u Birminghemda o‘zini yana uydagidek his qilishi mumkin, jamoa yarimhimoya chizig‘idagi muammolar esa unga asosiy tarkibga yo‘l ochadi.
Aynan Duglas Turkiyadan APLga qaytgan Abrahamning hisobni ochuvchi goliga assistentlik qildi. U o‘zini jarima zarbasini kuch bilan ijro etmoqchidek tutdi, amalda esa kutilmaganda to‘pni parashyut uslubida jonli devor ustidan oshirib tashladi va himoyachilar ortiga ochilgan hujumchi darvozani ishg‘ol etdi.
Ammo birinchi bo‘lim oxirida mezbonlar qo‘pol xatoga yo‘l qo‘yishdi va raqibning xavfli qarshi hujumini o‘tkazib yubordi. Darvozabon Bizot raqibni qarshi olish uchun oldinga chiqib keldi, ammo u Myorfini to‘xtatishda fol ishlatdi va qizil kartochka olib, maydonni tark etdi. Unai Emeri bu vaziyatda asosiy aybdor bo‘lgan Beylini maydondan olib, darvozaga Emiliano Martinesni tushirdi.
Ikkinchi bo‘lim davomida bir kishi ko‘p bo‘lib harakatlangan Eddi Hau shogirdlari o‘yinni 180 darajaga o‘zgartirishdi. Barchasini mehmonlar raqib jarima maydoni atrofida to‘pni olib qo‘ygan epizodlar hal qildi. Gimaraesh yo‘qligida sardorlik bog‘ichini o‘ziniki qilgan Tonali uzoq masofadan zarba berish mahoratini namoyish etdi. Birinchi holatda rikoshet ham qo‘l kelgan bo‘lsa, ikkinchi holatda italiyalik yarimhimoyachi pastki burchakni aniq nishonga oldi. Keyin esa Voltemade ham 20 dekabrdan buyon ilk golini urdi va raqibni uzil-kesil taslim qildi.
«Liverpul» – «Brayton» 3:0
Gollar: Jons, 42 (1:0). Soboslai, 56 (2:0). Saloh, 68 – penalti (3:0)
«Liverpul»: Alisson, van Deyk, Konate, Kerkez, Soboslai, Makallister, Jons (Remzi, 89), Virs (Jo Gomes, 71), Kiyeza (Ekitike, 77), Saloh (Ngumoha, 77), Gakpo (Nioni, 89)
«Brayton»: Stil, Dank, van Hekke (Boskali, 72), Ferdi Kadio‘g‘li, Veltman, Baleba (Ryutter, 62), Hinshelvud (Viffer, 81), Gross, Hauell (Minte, 62), D. Gomes (Mitoma, 62), Kostulas
Ogohlantirishlar: Dank, 15. D. Gomes, 33. Baleba, 41. van Hekke, 67
«Liverpul» «Brayton»ga qarshi qiyin kechgan o‘yinning birinchi bo‘limi oxirida Jonsning goli evaziga o‘z maqsadiga erishdi. Keyin esa Alisson o‘z seyvi bilan jamoasining minimal ustunligini saqlab qoldi. Ikkinchi bo‘limda Saloh katta sahnaga chiqdi: u avvaliga Soboslaini golli uzatma bilan ta’minladi, keyin esa penaltini aniq ijro etib, hisobni yirik ko‘rinishga keltirdi. Arne Slot shogirdlari 1/8 finalga yo‘l oldi.
Ispaniya: «Santyago Bernabeu»dagi konsert
«Real» – «Real Sosiyedad» 4:1
Gollar: Garsiya, 5 (1:0). Oyyarsabal, 21 – penalti (1:1). Vinisius Junior, 25 – penalti (2:1). Valverde, 31 (3:1). Vinisius Junior, 48 – penalti (4:1)
«Real»: Kurtua, Ryudiger (Karvahal, 60), Hausen, Karreras, Aleksandr-Arnold (Alaba, 60), Tshuameni (Sestero, 79), Arda Guler, Kamavinga (Sebalyos, 73), Valverde (B. Dias, 73), Vinisius Junior, Garsiya
«Real Sosiyedad»: Remiro, Subeldiya, Xon Martin, Ayyen Munyos, Aramburu, Gorrotchategi, Errera (Turrentes, 60), Uesli (Gonsalu Gedesh, 46), Marin (D. Dias, 73), Soler, Oyyarsabal (Oskarsson, 60)
Ogohlantirishlar: Hausen, 20 – Turrentes, 90
Aleksander-Arnold nihoyat «Real» boshlang‘ich tarkibiga qaytdi va unga Gonsalo Garsiyaga golli uzatma berish uchun besh daqiqa kifoya qildi. Yosh forvard qanotdan ko‘ra markaziy hujumchi pozitsiyasida samaraliroq ekanini namoyish etdi va bir teginishda hisobni ochdi. Arbeloa shu kuni YeChL o‘yini oldidan Mbappega dam bergandi va yosh hujumchi bunday imkoniyatdan foydalanmoqda. U Kilian tushmagan yoki zaxiradan chiqqan o‘yinlarda 10 gol urishga ulgurdi.
Birinchi bo‘lim o‘rtalarida Hausenning jarima maydoni ichkarisidagi folidan keyin belgilangan penaltini Oyyarsabal aniq ijro etib, hisobni tikladi. Ammo mezbonlar tezda hisobdagi ustunlikni tikladi. Vinisius Junior fint ishlatib, Aramburuni o‘ziga fol ishlatishga majbur qildi va 11 metrlik jarima zarbasini o‘zi aniq ijro etdi. Shu kuni markaziy himoyaga qaytgan Valverde ham raqib jarima maydoni atrofida qanchalik xavfli ekanini ko‘rsatib qo‘ydi – Karrerasdan uzatma qabul qilib olgach, navbatdagi chiroyli golini urdi.
Ikkinchi bo‘lim boshida Vinisius yana bir bor Aramburu bilan dueldan keyin penalti ishladi va yana bir bor penaltini namunali tarzda ijro etdi. Shundan keyin o‘yin quruq rasmiyatchilikka aylandi, Arbeloa Alaba, Sebalyos, Sestero, Dias va Karvahalga o‘yin amaliyoti taqdim etdi.
Qolgan daqiqalarda mehmonlarning bir goli ofsayd tufayli inobatga olinmadi, keyin esa Vinisius Gulerning uzatmasidan keyin bosh bilan darvozani ishg‘ol etdi, bu safar ham ofsayd holati xalaqit berdi va o‘yinda hisob o‘zgarmay qoldi.
«Qirollik klubi» hozircha yana birinchi o‘ringa chiqib oldi, «Barselona» esa dushanba kuni «Jirona»ga qarshi kechadigan o‘yinda birinchi o‘rinni qaytarib olishga harakat qiladi.
Italiya: Milandagi o‘yinda hissiyotlar jo‘sh urdi
«Inter» – «Yuventus» 3:2
Gollar: Kambyazo 17 avtogol, Espozito 76, Zelinski 90 – Kambyazo 26, Lokatelli 83.
«Inter»: Zommer, Bissek, Akanji, Bastoni (Karlos Augusto, 46), Luis Enrike (Luis Enrike, 66), Barella (Chalxono‘g‘li, 54), Zelinski, Suchich (Diuf, 66), Dimarko, Tyuram (Bonni, 86), Martines.
«Yuventus» Di Gregorio, Kalulu, Bremer, Kelli, Kambyazo (Openda, 78), Lokatelli, Miretti (Kopmeyners, 61), Konseysau (Holm, 46), Makkenni, Yildiz (Boga, 75), David (Kabal, 61).
Ogohlantirishlar: Bastoni 9, Barella 53, Chalxono‘g‘li – Kalulu 32.
Chetlatish: Kalulu 42.
Italiyada turning markaziy uchrashuvida «Inter» so‘nggi daqiqalarda «Yuventus»ni taslim etdi. Ammo o‘yin bosh hakami Federiko La Penning xatosi tufayli bu o‘yin mojaro bilan yodda qoladigan bo‘ldi.
Birinchi bo‘limda 1:1 hisobi qayd etildi. Ikki gol ham «Yuve» qanot himoyachisi Andrea Kambiyazo nomiga yozildi. 17-daqiqada u raqiblarga yordam berib yuborgandi: Lautaro Martinesning zarbasidan keyin to‘p uning oyog‘iga tegdi va undan darvoza to‘riga borib tushdi. Rikoshet Mikele Di Gregorioni ilojsiz holatda qoldirdi.
26-daqiqada Kambiyazo o‘z aybini yuvdi. Ueston Makkenni to‘pni jarima maydoniga yetkazdi, Jonatan Devid zarba berolmadi, ammo Kambiyazo olis ustun yaqinida to‘pga yetib bordi va muvozanatni tikladi – 1:1. Bu «Yuventus» va «Inter»ning A Seriyadagi uchrashuvlarida bir futbolchi ham avtogol, ham gol urishi bilan bog‘liq ilk holatga aylandi.
Jamoalar tengma-teng o‘yin ko‘rsatayotgandi, ammo 42-daqiqada «Inter» bir kishi ko‘p bo‘lib qoldi. Hakam Piyer Kaluluga ikkinchi sariq kartochkani ko‘rsatdi.
Bu vaziyatda Fabio Mirettining noaniq pasidan keyin Kalulu to‘pni ilib ketgan Alessandro Bastoniga qo‘lini bilinar-bilinmas tekkizdi, shu bilan birga, uning oyog‘iga tegmadi.
«Inter» himoyachisi esa aktyorlik mahoratini ishga solib, gazonga yiqildi, bosh hakam Federiko La Penna Kaluluga ikkinchi sariq kartochkani ko‘rsatdi.
Bastoni chetlatishni arbitrning ko‘z o‘ngida nishonladi.
U bu holatda katta tavakkalchilikka qo‘l urgandi: unda allaqachon sariq kartochka bor edi, hakam uning yiqilishini simulyatsiya deb topganida, Kaluluni emas, uni maydondan chetlatgan bo‘lardi. Ammo qoidaga ko‘ra, VAR ikkinchi sariq kartochkaga aralasha olmaydi va hakamning dastlabki qarori o‘zgarmadi. Kristian Kivu esa Bastonini tanaffusda zaxiraga oldi.
Ikkinchi bo‘limda «Inter» son jihatdan ustunlikdan foydalanib, tashabbusni to‘liq o‘z qo‘liga oldi va Franchesko Espozitoning golidan keyin hisobda oldinga chiqib oldi. «Yuve» esa vaqti-vaqti bilan qarshi hujumlar uyushtirdi va hisobni tenglashtirishga erishdi. 83-daqiqada Manuel Lokatelli Makkenning uzatmasidan keyin jarima maydoniga kirib borib, olis burchakni aniq nishonga oldi – 2:2!
Lekin bu hali hammasi emasdi. 90-daqiqada «Inter» baribir o‘z maqsadiga erishdi: Petr Zelinski raqib jarima maydoni yaqinida to‘pni qabul qilib oldi va chap oyog‘ida qaytarib bo‘lmas zarba yo‘lladi – 3:2!
O‘yindan keyin tribunalar ostidagi tunnelga kirishda turinliklar ustozi Luchano Spalletti, uning murabbiylar shtabidagi Jorjo Kiyellini hamda «Yuventus»ning boshqa vakillari hakamni o‘rab olishdi.
Bu g‘alabadan keyin «Inter» turnir jadvalida oldinga chiqib ketdi: endi ikkinchi o‘rindagi «Milan» bilan oradagi farq 8 ochkoni tashkil etmoqda (Allegri jamoasi bu tur o‘yinini endi o‘tkazadi). «Yuve» esa hozircha kuchli to‘rtlikda qoldi, ammo bu turda «Roma» «Napoli» bilan durang o‘ynasa ham, bu o‘rinni tortib oladi.
«Inter» va «Yuve»ni navbatda Chempionlar ligasida o‘tish o‘yinlari kutmoqda (mos ravishda «Budyo-Glimt» va «Galatasaroy»ga qarshi).
«Inter» ikki mavsumdan so‘ng, yangi bosh murabbiy Kristian Kivu qo‘l ostida chempionlik unvonini qaytarib oldi.
«Inter» A Seriyaning 35-turida «Parma»ni 2:0 hisobida mag‘lub etib, muddatidan oldin Italiya chempioni bo‘ldi.
Bu g‘alabadan so‘ng, bosh murabbiy Kristian Kivu shogirdlari musobaqa yakuniga 3 tur qolganida 82 ochko to‘pladi, eng yaqin ta’qibchi «Napoli» hisobida 70 ochko bor.
Shu tariqa, «Inter» ikki mavsumdan so‘ng chempionlik unvonini qaytarib oldi. Milanliklar oxirgi marta 2023/24-yilgi mavsumda g‘olib bo‘lgan edi.
2025 yil iyun oyida «Inter» bosh murabbiyi bo‘lgan ruminiyalik mutaxassis Kristian Kivu murabbiylik faoliyatidagi ilk sovrinini qo‘lga kiritdi. U Joze Mourinodan keyin (2008/09 va 2009/10-yilgi mavsumlar) A Seriyada g‘alaba qozongan birinchi xorijlik murabbiy bo‘ldi. O‘sha yillarda Kivuning o‘zi portugaliyalik murabbiy qo‘l ostida «Inter» himoyasida o‘ynagan. Shundan beri Italiya chempionatida faqat italiyalik murabbiylar g‘alaba qozongan edi: Massimiliano Allegri, Antonio Konte, Mauritsio Sarri, Stefano Pioli, Luchano Spalletti va Simone Inzagi.
Italiyada skudettolar soni bo‘yicha «Inter» ikkinchi o‘rinda turadi: 21 ta unvon. Rekordchi — «Yuventus» (36 ta sovrin). «Milan»da — 19 ta unvon.
Kivu jamoasida mavsumni oltin dubl bilan yakunlash uchun ajoyib imkoniyat bor. 13 may kuni «neradzurri» Italiya kubogi finalida «Latsio» bilan o‘ynaydi.
Angliya chempionatining 35-turi uchrashuvi oldidan stadionda bo‘lgan Fergyuson o‘zini yomon his qilganidan so‘ng shifoxonaga olib ketilgan. Xabar qilinishicha, gap ehtiyot chorasi haqida bormoqda.
«Manchester Yunayted»ning sobiq murabbiyi ser Aleks Fergyuson jamoaning «Liverpul»ga qarshi bahsi oldidan o‘zini yomon his qildi va shifoxonaga olib ketildi, deb xabar berdi Daily Mail.
Nashr xabariga ko‘ra, 84 yoshli Fergyuson o‘yin boshlanishidan bir soat oldin shifoxonaga yotqizilgan. Unga ehtiyot chorasi sifatida tibbiy kuzatuv tayinlangan. Fergyusonga tez vaqt ichida uyiga javob berilishi kutilmoqda.
Aleks Fergyuson — «Manchester Yunayted» tarixidagi eng sovrindor murabbiy hisoblanadi. U klubni 1986 yildan 2013 yilgacha boshqargan. «Manchester Yunayted» Fergyuson boshqaruvida 13 marta Angliya chempioni bo‘lgan. Shotlandiyalik murabbiy klubdagi 26 yillik faoliyati davomida jami 38ta sovrinni qo‘lga kiritgan.
Murabbiylikdan ketganidan so‘ng Fergyuson «Manchester Yunayted» elchisi va klub direktorlar kengashi a’zosi sifatida faoliyat yuritdi. 2024 yil oktyabrda klubning yangi egasi Jim Retkliff va INEOS kompaniyasi unga elchilik faoliyati uchun yiliga 2,16 mln funt sterlingga teng maosh to‘lashni to‘xtatdi.
«Arsenal» turnir jadvalida «Siti» bilan oradagi farqni 6 ochkoga yetkazdi, Ispaniyada esa bugun «Real» Kataloniyaning «Espanyol» jamoasiga qarshi o‘yinda ochko yo‘qotadigan bo‘lsa, bu turda navbatdagi g‘alabaga erishgan «Barselona» muddatidan oldin chempionlikni nishonlashi mumkin.
Angliya: Tiago Holand bilan poygalashmoqda
«Brentford» – «Vest Hem» 3:0
Gollar: Mavropanos, 15 – avtogol (1:0). Tiago, 54 – penalti (2:0). Damsgor, 82 (3:0)
«Brentford»: Kelleher, van der Berg, Kollinz, Lyuis-Potter (Hiki, 90+1), Kayode, Yyensen, Yarmolyuk, Damsgor (Dasilva, 90+1), Shade (Ayyer, 80), Uattara (Furo, 90), Tiago
«Vest Hem»: Hermansen, Disasi, Mavropanos, Diuf (Traore, 74), Uoker-Piters (Van-Bissaka, 65), Fernandesh, Souchek, Sammervill (Skarlz, 88), Bouen (Magassa, 88), Pablo, Kastelyanos (Uilson, 65)
Ogohlantirishlar: Kayode, 73 – Kastelyanos, 59. Sammervill, 62. Skarlz, 90
Bu mavsumda APLda qolish uchun kurash chempionlik tituli uchun kurashdagi kabi qizg‘in kechmayapti. «Vulverhempton» va «Byornli» chempionshipga tushib ketishi allaqachon aniq bo‘lgan, mavsumning uchinchi omadsiz jamoasi esa katta ehtimol bilan «Vest Hem» klubi bo‘ladi. Shanba kuni ushbu jamoa «Brentford» maydonida ilojsiz ahvolda qoldi va hozirda 18-o‘rinda turgan «Tottenhem»da turnir jadvalining quyi qismini tark etish uchun yaxshi imkoniyat hosil bo‘ldi. «Bolg‘achilar» darvozasiga uchta javobsiz gol urgan «asalarilar» yevrokuboklar yo‘llanmasi uchun kurash olib bormoqda, jamoa to‘purari Igor Tiago mavsumdagi sakkizinchi penaltini aniq ijro etib, to‘purarlar poygasida Holandni quyishda ta’qib etmoqda. Hozircha bu poygada norvegiyalik hujumchi ikkita gol oldinda (24:22), ammo braziliyalik hujumchi hozir pik formasida – u gollarining yarmini 2026 yilda urgan va bu borada hech bir hujumchi unga teng kelolmaydi.
«Arsenal» – «Fulhem» 3:0
Gollar: Yokeresh, 9 (1:0). Saka, 40 (2:0). Yokeresh, 45+4 (3:0)
«Arsenal»: Rayya, Saliba, Gabriel Magalyayns, Kalafiori, Uayt (Moskera, 83), Rays (Subimendi, 64), Lyuis-Skelli, Eze (Douman, 78), Trossar, Saka (Madueke, 46), Yokeresh (Gabriel Jyezus, 64)
«Fulhem»: Leno, Bassi, Andersen, Robinson, Kastan, Rid (Kerni, 63), Lukich, Smit-Rou (Kusi-Asare, 78), Chukvueze (King, 64), Uilson (Bobb, 64), Ximenes (Rodrigu Munis, 73)
Ogohlantirish: Lukich, 23
Chempionlik poygasida qatnashayotgan «Arsenal» esa bu oqshom raqibni yirik hisobda mag‘lub etish uchun maydonga tushgandi va buni birinchi bo‘limdayoq uddaladi. Arteta shu kuni boshlang‘ich tarkibdagi tanlovlari bilan ko‘pchilikni ajablantirdi. Birinchidan, so‘nggi vaqtlarda muntazam ravishda ilk daqiqalardan o‘ynab kelgan Inkapiye zaxirada qoldirildi va uning o‘rnini hujumkorligi bilan farq qiladigan Kalafiori egalladi. Ikkinchidan, bu mavsumda top-5 ligalarda eng ko‘p o‘ynagan yarimhimoyachi bo‘lib turgan Martin Subimendiga dam berildi. Uchinchidan, uning o‘rniga tayanch yarimhimoyasiga Rays o‘tkazildi, Deklanning o‘rniga esa chap qanot himoyachisi Lyuis-Skelli tushirildi. Shu bilan birga, hujumning o‘ng qanotida ancha vaqtdan buyon jarohatini davolagan Saka paydo bo‘ldi. Aynan Saka va Skellining harakatlari o‘yin taqdirini hal qildi. Bukayo o‘z qanotida istagan ishini qildi va uning uzatmasidan keyin Yokeresh tezkor gol bilan hisobni ochdi.
Keyin esa Sakaning o‘zi shvetsiyalik hujumchining uzatmasini golga aylantirdi. Arteta uni seshanba oqshomida YeChL yarimfinalida «Atletiko»ga qarshi kechadigan javob o‘yini uchun asrashga qaror qilib, tanaffusda zaxiraga oldi. Ammo u unga 45 daqiqa ham uchta yubiley natijaga erishish uchun yetarli bo‘ldi – 80 gol, 70 assist va 150 ball. Uning maydonga tushishi Yokereshning ham o‘yinini ochib yubordi, u bo‘lim oxirlarida Trossarning uzatmasi orqali dubl qayd etdi. Bu uning uchun «Arsenal» safida ilk bor bir o‘yinda 2+1 ko‘rsatkich qayd etishi bo‘ldi. Shuningdek, Viktor Aleksis Sanches davridan buyon «Arsenal»dagi ilk mavsumida yigirmadan ortiq gol urgan (21) ilk futbolchiga aylandi.
Bu o‘yin mezbonlarning to‘liq ustunligida o‘tgani quyidagi suratda yaqqol aks etgan: «Arsenal» himoya chizig‘i shu qadar yuqori joylashganki, darvozabon David Rayya maydonning ikkinchi qismiga kelib podkat amalga oshirmoqda.
Bu o‘yindagi yirik hisobdagi g‘alaba chempionlik poygasida qo‘l kelishi mumkin, agar mavsum yakunida «Arsenal» va «Manchester Siti»ning ochkolari teng kelib qolsa, birinchi navbatda to‘plar nisbatiga qaraladi. Hozirda «kanonirlar» +4 ko‘rsatkichiga ega va keyingi raqiblar ham nisbatan osonroq: «Vest Hem» (18-o‘rin), «Byornli» (19-o‘rin) va «Kristal Pelas» (14-o‘rin). «Siti»ning qolgan 5 raqibidan 3 tasi yevrokuboklar uchun kurashmoqda: «Everton» (11-o‘rin), «Brentford» (6-o‘rin), «Bornmut» (8-o‘rin), «Kristal Pelas» (14-o‘rin) va «Aston Villa» (5-o‘rin).
Ispaniya: Simeonening 1000-o‘yini va YeChLga chiqqan «Vilyarreal»
«Vilyarreal» – «Levante» 2:1
Gol: Mikautadze, 38 (1:0). Espi, 51 (1:1). Moleyro, 62 (2:1). Mikautadze, 68 (3:1). Byukenen, 87 (4:1). Pepe, 90 (5:1)
«Vilyarreal»: Tenas, Veyga, Navarro (Kambvala, 81), Pedrasa (Kardona, 74), Frimen, Parexo (Parti, 74), Komesanya, Moleyro, Pepe, J. Moreno (Byukenen, 84), Mikautadze, Peres
«Levante»: Rayan, M. Moreno, Matturro, Pampin, Tolyan, Arriaga (Ragube, 68), Olasagasti, Pablo Martines (Bruge, 77), Romero (Tunde, 46, Etta Eyong, 68), Alvares (Losada, 30), Espi
Ogohlantirishlar: Parexo, 45. Veyga, 55 – Arriaga, 45
Mavsumning katta qismida uchinchi o‘rinni o‘zida saqlab turgan «Vilyarreal» bu turda «Levante»ni yirik hisobda tor-mor etib, valensiyaliklarning ligada qolish imkoniyatlarini amalda nolga tenglashtirdi. O‘z navbatida, «submarinalar» bu g‘alaba orqali qatorasiga ikkinchi mavsumda Chempionlar ligasi umumiy guruh bosqichida ishtirok etishini kafolatladi. Marselino shogirdlarida yevrokubokning bu mavsumidagi muvaffaqiyatsizlikni to‘g‘rilash imkoni bo‘ladi. Shanba oqshomidagi o‘yinni Mikautadzening dubli hal qildi, u avvaliga raqib himoyasidagi qo‘pol xatodan foydalandi, keyin esa Pepening qanotdan uzatmasini darvoza to‘riga to‘g‘rilab yubordi. O‘tgan yozda «Lion»dan Ispaniyaga ko‘chib o‘tgan ushbu gurjistonlik hujumchi ilk mavsumida barcha turnirlar doirasida 13 gol urishga erishdi.
«Valensiya» – Atletiko» 0:2
Gollar: Luke, 74 (0:1). Kubo, 82 (0:2)
«Valensiya»: Dimitriyevski, Tarrega, Pepelu, Xose Gayya (Vaskes, 73), Saraviya (Raba, 82), Rodriges, Gerra, Ugrinich (Duro, 59), Rioxa (Diyego Lopes, 59), Sodiq, Ramazani (Gruneveld, 73)
«Atletiko»: Musso, Langle, Le Norman, Dias, Bonyar (Purich, 90+7), Mendosa (Koke, 73), Vargas, Morsilio (Luke, 63), Almada (Grizmann, 73), Molina, Belaid (Kubo, 63)
Ogohlantirishlar: Tarrega, 67 – Almada, 29. Mendosa, 52. Vargas, 61
«Atletiko» «Valensiya» uchun noqulay raqib sifatidagi maqomini mustahkamlab, qatorasiga beshinchi o‘zaro o‘yinda g‘alaba qozondi. Qolaversa, «matraschilar» o‘yinning birinchi bo‘limida mezbonlarga darvoza sohasi tomon birorta zarba berishga imkon qoldirmadi, ikkinchi bo‘lim oxirida esa shu kuni la ligada debyut qilgan ikki yosh futbolchi «ko‘rshapalaklar» jamoasini nokautga uchratdi. Diyego Simeone YeChL yarimfinali doirasida Londonga safar oldidan asosiy tarkib futbolchilariga dam bergandi va yosh futbolchilar taqdim etilgan imkoniyatdan foydalanishdi.
Avvaliga 20 yoshli forvard Luke o‘z debyutini gol bilan nishonladi, keyin esa 18 yoshli Migel Kubo bu darajadagi ilk o‘yinini madridliklar afsonasi Grizmanning uzatmasi orqali urgan goli bilan eslab qoladigan bo‘ldi. Fransuz hujumchi klublar darajasidagi 800-o‘yinida navbatdagi golli harakatini amalga oshirdi. Bu o‘yin Simeone uchun ham yubiley edi, argentinalik mutaxassis shu kuni murabbiylik faoliyatidagi 1000-o‘yinini o‘tkazdi. Shunday o‘yinda jamoa tarixida 1984 yildan buyon kuzatilmagan holat qayd etildi: 42 yildan buyon «Atletiko» ikki debyutantning ikki goli bilan g‘alaba qozonmagandi.
«Osasuna» – «Barselona» 1:2
Gollar: Levandovski, 81 (0:1). Torres, 86 (0:2). Raul Garsiya, 88 (1:2)
«Osasuna»: Errera, Boyomo, Katena, Galan, Roze, Torro (Osambela, 85), Monkayola (Barxa, 85), Moyses Gomes (Oros, 70), Moro, R. Garsiya (Bretones, 86), Budimir (Raul Garsiya, 70)
«Barselona»: X. Garsiya, Kubarsi, Martin, Joau Kanselu, E. Garsiya (Arauxo, 82), Gavi (de Yong, 62), Pedri (Bernal, 88), Olmo (Torres, 62), Fermin Lopes, Barji (Reshford, 62), Levandovski
Ogohlantirishlar: Monkayola, 74. Krus, 90 – Gavi, 24. E. Garsiya, 60
«Barselona»ning vaziyati juda oddiy – kataloniyaliklar shu turdayoq maydondan tashqarida turib chempion bo‘lishi mumkin. Buning uchun «Real» yakshanba kuni «Espanyol»ga qarshi o‘yinda ochko yo‘qotishi talab etiladi.
Ammo jamoa birinchi navbatda shanba kuni Pamplonada kechadigan o‘yinda g‘alaba qozonishi talab etilardi va bu har qanday raqib uchun oson ish emas. O‘yinning birinchi bo‘limi «Osasuna» nafaqat peshqadamning hujumlarini qaytarib turdi, balki o‘zi ham xavfli qarshi hujumlar uyushtirdi.
O‘yin kartinasi ikkinchi bo‘limda o‘zgara boshladi va Rafinya va Yamal kabi yetakchilar yo‘q sharoitda Reshford ko‘p ishni o‘z gardaniga oldi. Zaxiradan o‘yinga qo‘shilgan ingliz hujumchisi avvaliga o‘zi xavfli zarba berdi, keyinroq qanotdan Levandovskining boshiga ajoyib uzatma berdi. O‘tkazib yuborilgan goldan keyin mezbonlar to‘liq kuch bilan oldinga o‘tib ketishdi va ikkinchi golni o‘tkazib yuborishdi – Fermin Lopes chiziqlar orasidan o‘tkazilgan pas bilan Ferran Torresning goliga assistentlik qildi.
Ikki gol ustunligidan keyin «Barsa» futbolchilari biroz bo‘shashdi va 88-daqiqada jarima maydonida yolg‘iz qoldirilgan Raul Garsiya mezbonlarning hisobni qisqartiruvchi golini urdi.
Shunga qaramay, «Barselona» la ligada qatorasiga 10-g‘alabasini nishonladi va endi bugun «Real» va «Osasuna» o‘yini qanday natijada yakunlanishini kutmoqda. Madridliklar bugun safardan g‘alaba bilan qaytadigan bo‘lsa, «Barselona» keyingi haftada bo‘lib o‘tadigan klasikoda chempionlikni rasmiylashtirishi mumkin.
U ko‘p yillar Farg‘onaning «Neftchi» klubi safida to‘p surgan, O‘zbekiston milliy jamoasi bilan 1994 yilgi Osiyo o‘yinlarida chempion bo‘lgandi.
O‘zbekiston milliy jamoasi sobiq futbolchisi, O‘zbekistonda xizmat ko‘rsatgan sportchi va murabbiy, futbol faxriysi Abdusamad Do‘rmonov 60 yoshda vafot etdi.
Abdusamad Do‘rmonov 1965 yil Termiz shahrida tug‘ilgan. Futbolchilik faoliyati davomida «Paxtakor» (1987-1989), «Surxon» (1990-1991) va «Neftchi» (1992-2002) kabi klublarda to‘p surgan, Farg‘ona klubi jamoasi bilan besh marta O‘zbekiston chempioni bo‘lgan.
Shuningdek, 1992-1994 yillarda O‘zbekiston milliy jamoasiga chaqirilgan, 1994 yil Yaponiyada o‘tkazilgan Osiyo o‘yinlarida g‘olib bo‘lgan.
U futbolchilar oilasi vakili bo‘lib, ukasi Rustam Do‘rmonov ham u bilan birga «Neftchi» klubi sharafini himoya qilgan, yana bir ukasi Ravshan Do‘rmonov esa Termizning «Surxon» klubida o‘ynagan.
Abdusamad Do‘rmonov 2002 yilda futbolchilik faoliyatini yakunlagach, «Neftchi», «Yozyovon lochinlari» va «Istiqlol» kabi klublarda murabbiy sifatida ishlagan, hozirga qadar «Neftchi» klubi murabbiylar shtabida ishlayotgandi.
«Barselona» hujumchisi Robert Levandovski faoliyatini «Yuventus»da davom ettirishi mumkin deb xabar berdi Tuttosport.
Turinliklar va polshalik forvardning agenti muzokara o‘tkazgan.
Xabarga ko‘ra, «Yuventus» kelasi mavsum uchun YChL yo‘llanmasini qo‘lga kiritsa, 37 yoshli futbolchi klubga o‘tish taklifini ko‘rib chiqishga tayyor.
Levandovskining «Barselona» bilan amaldagi shartnomasi 2026-yil yozigacha mo‘ljallangan. Kataloniyaliklar futbolchiga yangi shartnoma taklif qilgan, ammo unda maosh keskin kamaytirilishi ko‘zda tutilgan va bu hujumchiga ma’qul kelmagan.
Amirliklar neft eksport qiluvchi arab davlatlari tashkilotini tark etadi
Dam olish kunlari beqaror ob-havo kutiladi
Endi chet el valyutasida obligatsiyalar chiqarish mumkin bo‘ladi
-
Siyosat4 days agoPrezident Mirziyoyev energiya tejash vositasi sifatida kommunal xizmatlarni oʻchirishni taqiqlovchi farmonni imzoladi
-
Siyosat4 days agoOʻzbekistonda yil oxiriga qadar 13 ta GES qurish rejalashtirilmoqda, tarmoqni kengaytirish koʻzda tutilmoqda
-
Turk dunyosi5 days agoKurd jangari rasmiysining aytishicha, Turkiya islohotlarning yoʻqligi tufayli tinchlik muzokaralarini toʻxtatib qoʻymoqda
-
Jamiyat4 days ago
Sud jarayonlarini OAVda yoritishni takomillashtirish bo‘yicha dastur boshlandi
-
Jamiyat5 days ago
May oyida qanday ob-havo kutiladi? «O‘zgidromet» izoh berdi
-
Jamiyat5 days agoBuxoro va Surxondaryoda Afg‘onistondan kontrabanda qilingan opiyning katta partiyasi aniqlandi
-
Iqtisodiyot5 days ago
O‘zbekistonda kafe va restoranlar daromadi keskin oshdi
-
Jamiyat3 days agoJinoiy guruh yetakchisidan 2,7 ming dollar olgan profilaktika inspektori ushlandi