Sport
«Real»da yangi yulduz porlashda davom etmoqda
Klublar mundialida chorakfinalning barcha juftliklari ma’lum.
Foto: Gettyimages/Kevin C. Cox
KJCh. 1/8 final
«Real» — «Yuventus» 1:0
1 iyul. Mayami. «Hard Rok»
Gol: Gonsalo Garsiya (54).
«Real» — Kurtua, Trent, Ryudiger, Hausen, Fran Garsiya, Chuameni, Valverde (Seballos, 90), Guler (Modrich, 77), Bellinghem, Vinisius, Gonsalo Garsiya (Mbappe, 68).
«Yuventus» — Di Gregorio, Kalulu, Rugani (Gatti, 86), Kelli (Gonsales, 59), Koshta, Lokatelli (Makkenni, 86), Tyuram, Kambiyazo, Konseysau (Kostich, 59), Yildiz (Kopmeyners, 71), Kolo-Muani.
Ogohlantirish: Bellinghem (86).
«Real»ning «Yuventus» bilan o‘yini — 1/8 finalning so‘nggi kunidagi desertdek bo‘ldi. Oshqozonidagi og‘riq tufayli guruh bosqichini o‘tkazib yuborgan Mbappe bu safar o‘yin qaydnomasiga kiritildi va zaxira o‘rindig‘idan joy oldi. Boshlang‘ich tarkibda esa yana klublar o‘rtasidagi jahon chempionatining kashfiyotlaridan biri – Gonsalo Garsiya tushdi. «Qaymoqranglilar»ning 21 yoshli tarbiyalanuvchisi 5-3-2 (yoki 3-5-2) taktik sxemasida Vinisius Junior bilan hujum juftligini hosil qildi. «Yuventus» esa 5-4-1 sxemasidan foydalandi, bunda hujum uchida Kolo Muani harakat qildi.
«Real» birinchi bo‘limda to‘pga ko‘proq vaqt davomida egalik qildi (43 ga qarshi 57), ammo ancha vaqtgacha xavfli vaziyatlar yarata olmadi. Xabi Alonso shogirdlariga hujumlarni rivojlantirishda jamoaviy tezlik yetishmadi. Bu kamchilikni Vinisius Junior individual harakatlari bilan to‘ldirishga harakat qildi, ammo uning qanotdan qochib ketishga urinishlari muvaffaqiyatsiz chiqdi.
«Yuventus» esa «Real»dan cho‘chimadi va o‘yindagi ilk zarba muallifi Kenan Yildiz bo‘ldi. Yettinchi daqiqada turinliklar ilk golli vaziyatni ham yaratishdi. Trent to‘p yo‘qotishidan keyin Kolo Muani Yildizga tovonida pas berib, o‘zi oldinga tashlandi va jarima maydoniga kirib borib, Kurtua bilan yakkama-yakka vaziyatda zarba yo‘lladi, ammo to‘p darvozabonning ham, darvoza to‘sinining ham ustidan o‘tib ketdi.
«Real»ning bu o‘yindagi asosiy quroli uzoq masofadan berilgan zarbalar bo‘ldi. Faqat o‘yinning yarim soati o‘tgandagina Alonso jamoasi «Yuventus» mudofaasini yorib o‘tib, ilk golli vaziyatini yaratdi. Bellinghem yaqin masofadan zarba yo‘lladi, ammo darvozabon Di Gregorio «keksa siniora»ni qutqarib qoldi.
Bo‘limning oxirgi qismini «Real» futbolchilari kuchli o‘tkazishdi. O‘ng qanotda Trent Guler bilan o‘rin almashib o‘ynab, bosim uyushtirishdi. Valverde jarima maydoni tashqarisidan xavfli zarba yo‘lladi – turinliklar darvozaboni yana bir bor o‘zini ko‘rsatdi. «Yuventus»ning charchagan futbolchilari bu vaqtda qarshi hujumga o‘tishni bas qilishgandi.
Ikkinchi bo‘limga «Real» yanada katta ishtiyoq bilan tushib kelishdi. Madridliklar hujumidagi keskinlik darajasi geometrik progressiya bo‘yicha o‘sa boshladi. Shu kuni o‘nta seyv ijro etgan Di Gregorio o‘z darvozasidan to‘p olib chiqishi vaqt masalasi ekani ko‘rinib turardi.
«Real» futbolchilari bir necha bor «Yuventus»ning burchak zarbalaridan keyin xavfli qarshi hujumlarga chiqib ketishdi. Ammo golni o‘zining standart vaziyatidan urishdi. Trent hujumni ikkinchi tempda davom ettirib, o‘z qanotidan jarima maydoniga uzatma berdi va Gonsalo Garsiya bosh bilan gol urishiga hech kim xalaqit bermadi. Yaqingacha ikkinchi jamoa safida o‘ynagan va Mbappe yo‘qligi tufayli asosiy jamoaga jalb etilgan yosh futbolchi klublar mundialidagi uchinchi golini nishonladi.
O‘tkazib yuborilgan goldan keyin «Yuventus» futbolchilarining kayfiyati tushib ketdi, «Real» esa raqibni uzil-kesil taslim etish uchun bosim qilishda davom etdi. Lekin bu ro‘y bermadi. Ikkinchi bo‘lim o‘rtalarida Alonso Gonsalo o‘rniga Mbappeni tushirishi ham yordam bermadi. Kilian o‘yinga yaxshi qo‘shildi, bir necha bor oldinga tashlandi, bunday vaziyatlardan biri Di Gregorioning navbatdagi seyvi bilan yakunlandi. Keyin esa «Real» ustozi o‘yin tempini tushirishga va shunchaki hisobga qarab o‘ynashga ishora berdi, Mbappe esa maydonda ko‘rinmay qoldi.
Xabi Alonsoning rejasi ish berdi va «Yuventus» yakuniy shturm uyushtirishga ham hafsala qila olmadi. Taqqoslash uchun – xG bo‘yicha statistika. Turinliklar tanaffusga qadar bu ko‘rsatkich bo‘yicha «Real»dan ustunroq edi (0,66 ga qarshi 0,73), ikkinchi bo‘limda esa yaqqol ortda qoldi (0,91 ga qarshi 0,04). Zarbalar soni bo‘yicha farq ham yaqqol – madridliklar foydasiga 21:6, darvoza sohasiga to‘g‘ri borgan zarbalar bo‘yicha – 11:2. Tudor jamoasining so‘nggi umidi qo‘shimcha daqiqalarda Kolo Muani «Real» jarima maydonida yiqilishi bo‘ldi, ammo bosh hakam Marsinyak penalti yo‘qligini ma’lum qildi.
«Real» klublar mundialidagi oltinchi chempionlik uchun yurishini davom ettiradi, bu yo‘lda navbatdagi raqib Dortmundning «Borussiya» klubi bo‘ladi.
Klublar o‘rtasidagi jahon chempionatida sakkkiz jamoa qoldi:
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
