Sport
«Real» ochko yo‘qotdi, «Barsa» yaqinlashib oldi. Kun o‘yinlari
«Liverpul» «Siti»ga yirik hisobda yutqazib, amalda chempionlik poygasidan chiqdi. APLda kurash asosan «Arsenal» va «Siti» o‘rtasida kechadigan bo‘ldi. Yakshanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Angliya: «Siti» «Liverpul»ni yakson qildi
«Manchester Siti» – «Liverpul» 3:0
Gollar: Holand, 29 (1:0). Gonsales, 45 (2:0). Doku, 63 (3:0)
Aniq ijro etilmagan penalti: Holand, 13’
«Manchester Siti»: Donnarumma, Ruben Diash, Gvardiol, O`Rayli, Mateus Nunes, Gonsales, Foden, Bernardu Silva, Doku (Marmush, 74), Sherki (Savio, 53), Holand
«Liverpul»: Mamardashvili, van Deyk, Konate, Roberson (Kerkez, 56), Bredli (Gomes, 83), Makallister (Jons, 74), Gravenberh, Soboslai, Virs (Kiyeza, 83), Saloh, Ekitike (Gakpo, 56)
Ogohlantirishlar: Gonsales, 27. Bernardu Silva, 41 – Makallister, 36. Bredli, 52. Jons, 89. Soboslai, 90
«Siti» va «Liverpul» – so‘nggi o‘n yillikda APLning yangi klassikasiga aylangan. So‘nggi sakkiz mavsumdagi chempionlik titullari faqat shu ikki jamoa o‘rtasida taqsimlangan. Lekin bu mavsumda ular bir-birini emas, «Arsenal»ni quvmoqda. Shanba oqshomida londonliklar durang o‘ynab qo‘ygani «Etihad»dagi uchrashuvga qiziqishni yanada oshirdi.
«Liverpul» hafta o‘rtasida «Real»ga qarshi o‘ynagan va nomdor raqibga hech qanday imkon qoldirmagan tarkibni tushirdi. «Siti»da esa Chempionlar ligasidagi boshlang‘ich tarkib bilan solishtirganda uchta o‘zgarish bo‘ldi – Stounz, Savio hamda Reynders o‘rnini Diash, Silva va Sherki egalladi.
«Siti» o‘yinni mezbonlarga xos tarzda boshladi. Oldingi chiziqda odatdagi kabi Holand faollik ko‘rsatdi, Doku, Silva, Foden va Sherki esa unga vaziyatlar yaratib berishga harakat qilishdi. Shunday vaziyatlardan birini Doku yuzaga keltirdi, u himoyachilar xatosidan foydalanib, jarima maydoniga kirib bordi va penalti ishladi. Kavana videotakrordan keyin 11 metrlik nuqtani ko‘rsatdi, ammo bu qaror bahsli edi. Bu vaziyatda belgiyalik vinger darvozabonga urilib yiqilganidan keyin ham to‘p mezbonlarda qoldi, hakam o‘yinni davom ettirishga qo‘yib berdi, Bernarduning ketma-ket zarbalari himoyachilar to‘sig‘idan o‘tmadi. Shundan keyin esa VAR xonasidagilar Kavanani monitor qarshisiga chaqirishdi va penalti belgilandi.
Nuqtaga yaqinlashgan Holand esa 11 metrdan zarba berishda adashdi. Lekin u keyinroq nisbatan murakkab vaziyatdan gol urdi. Ikkala holatda ham barcha savollarni Konatega qaratish mumkin. Birinchi holatda folni rasman darvozabon Mamardashvili ishlatgandi, ammo undan oldin aynan Konate to‘pni raqibga berib qo‘ygandi. Ikkinchi holatda esa fransiyalik himoyachi havoda to‘p uchun kurashni Holandga boy berdi.
Bo‘limning qolgan qismida yana bir bahsli epizod kuzatildi. «Liverpul» burchak zarbasi ijro etdi, van Deyk bosh bilan darvozani ishg‘ol etdi. Ammo hakamlar bu golni bekor qilishdi. Bunga ofsayd holatida turgan Endryu Roberson to‘p yo‘lida turgani sabab qilib ko‘rsatildi, u to‘pga teginmadi, ammo Donnarummaga xalaqit bergan deb topildi.
Holbuki himoyachi bu vaqtda to‘p yo‘lidan qochishga uringandi, shu bilan birga, darvozabonning yo‘lini to‘smagandi.
Ko‘p o‘tmay «Liverpul» ikkinchi golni o‘tkazib yubordi. Tayanch yarimhimoyachisi Niko Gonsales Rodri uslubida gol urib, hisobni mustahkamladi. Shundan keyin mezbonlar hisobga qarab o‘ynashi mumkin edi.
Ikkinchi bo‘limni «Liverpul» keskin harakatlar bilan boshladi. Qaysidir daqiqalarda mezbonlarni jarima maydoniga qamab ham qo‘ydi, Holand ham himoyada ishlashiga to‘g‘ri keldi, ammo gol urilmadi. Shu kuni o‘yinning eng yaxshi futbolchisi bo‘lgan Doku esa qarshi hujumda uchinchi golni urib, o‘yinga amalda nuqta qo‘ydi. Uni shu kuni ikki kishi bo‘lib ham to‘xtata olishmadi, u 11 marta duelda ustun keldi, yetti marta raqiblarni aldab o‘tdi, uch marta yaqqol vaziyat yaratib berdi va uch marta darvoza sohasiga to‘g‘ri borgan zarba yo‘lladi, bu zarbalardan biri golga aylandi. Bu gol urilgan vaziyatda ham Konate raqibni yopa olmadi.
Umuman olganda, «Liverpul» ikkinchi bo‘limda yomon ko‘rinmadi va vaziyatlarga ega bo‘ldi (Saloh yakkama-yakka vaziyatdan foydalana olmadi va to‘rt marta ofsaydga tushib qoldi), ikkinchi bo‘limda zaxiradan tushgan Gakpo ham o‘yinga faol qo‘shildi va xavfli zarbalar yo‘lladi, ammo uch gol farqini yo‘qqa chiqarish amalda imkonsiz edi. Gvardiola bu mavsumda o‘z an’analaridan voz kechgan holda to‘pni raqibga topshirib, hisobga qarab o‘ynashni odat qilmoqda va bu qaror yana o‘zini oqladi. Yakunda «Siti» ishonchli g‘alabani saqlab qoldi va «Arsenal» bilan oradagi farqni to‘rt ochkogacha qisqartirdi. Arne Slot jamoasi esa bu mag‘lubiyatdan keyin chempionlik poygasiga qo‘shilishi amalda imkonsiz ishga aylandi – APLda mavsum boshidan buyon 11 o‘yindan 5 tasida yutqazgan mersisaydliklar turnir jadvalining 8-o‘rnida va peshqadamdan 8 ochkoga ortda qolmoqda.
«Aston Villa» – «Bornmut» 4:0
Gollar: Buendiya, 28 (1:0). Onana, 40 (2:0). Barkli, 77 (3:0). Malen, 82 (4:0)
Aniq ijro etilmagan penalti: Semenyo, 67’
«Aston Villa»: Martines, Konsa, Pau Torres, Din, Kesh, Onana (Barkli, 71), Kamara (Bogard, 81), Rodjyers (Gessan, 86), Buendiya (Tilemans, 71), Makginn (Sancho, 71), Uotkins (Malen, 81)
«Bornmut»: Petrovich, Senesi, Milosavlevich, Tryuffer (Kristi, 63), Smit (Ximenes, 10, Kuk, 46), Skott (Adli, 63), Adams, Klyuyvert (Krupi, 63), Taverne, Semenyo, Evanilson (Bruks, 77)
Ogohlantirishlar: Rodjyers, 13. Kamara, 23 – Ximenes, 27. Tryuffer, 38
APLda yakshanba kuni barchaning e’tibori «Manchester Siti» va «Liverpul» to‘qnashuviga qaratilgani tayin, ammo shu kuni tur doirasida yana bir keskin qarama-qarshilik bo‘lib o‘tdi. Mavsum startidagi muvaffaqiyatsizliklardan keyin o‘ziga kelib olgan «Aston Villa» o‘z maydonida bu mavsumni ko‘tarinki kayfiyatda boshlagan «Bornmut»ni qabul qildi. Ammo Iraola shogirdlari «Villa Park»da kutilgan qarshilikni ko‘rsata olmadi va hisob birinchi bo‘limning o‘zida yirik ko‘rinish olishi mumkin edi. Mezbonlarning ketma-ket hujumlarida faqat Buendiya va Onana bittadan gol urishdi mehmonlarda o‘yinga qaytish uchun imkoniyat saqlanib qoldi.
Ikkinchi bo‘limda qaytish amalga oshirilishi mumkin edi, ammo Emiliano Martines «Bornmut» to‘purari Semenyoning 11 metrdan bergan zarbasini bartaraf etdi va jamoadoshlarini yanada ruhlantirib yubordi. Barkli darvozaga orqa qilib turgan holda bosh bilan uchinchi golni urdi, o‘yin oxirida Malen Tilemansning uzoq masofadan yo‘llagan zarbasiga tovoni bilan teginish orqali darvozabonni dog‘da qoldirdi. Unai Emeri shogirdlari endi ochkolari sonini 18 taga yetkazib, oltinchi o‘ringa chiqib oldi, shu bilan birga, to‘rtinchi o‘rindagi «Sanderlend»ni bir, uchinchi o‘rindagi «Chelsi»ni ikki ochkolik farq bilan ta’qib etmoqda. Qatorasiga ikkinchi o‘yinda yutqazgan «Bornmut»da ham shuncha ochko bor, ammo qo‘shimcha ko‘rsatkichlar tufayli jamoa to‘qqizinchi o‘rinda joylashgan.
Ispaniya: «Barselona» «Real»ga yetib olmoqda
«Rayo Valekano» – «Real» 0:0
«Rayo Valekano»: Batalya, Lejyen, Mendi, Chavarriya, Ratsyu, Palazon (Valentin, 71), Lopes (Xerard Gumbau, 83), De Frutos (Fran Peres, 71), Siss, Alvaro Garsiya (Alemao, 83), P. Dias (Espino, 27)
«Real»: Kurtua, Raul Asensio, Hausen (Eder Militau, 46), Karreras, Valverde (Aleksandr-Arnold, 83), Kamavinga (Rodrigu, 79), Arda Guler, Bellinghem, Vinisius Junior, B. Dias (Sebalyos, 71), Mbappe
Ogohlantirishlar: Ratsyu, 15. Alvaro Garsiya, 33. De Frutos, 45 – Hausen, 36. B. Dias, 44
«Real» bu mavsumda hali durang o‘ynamagandi, ammo yakshanba kuni «Rayo Valekano» maydonida golsiz durangga imzo chekdi. Bir qarashda bu anomaliya bo‘lib ko‘rinadi. Mbappe o‘yinning birinchi bo‘limida biror marta zarba bermadi, bunaqasi joriy mavsum boshidan buyon 17 o‘yinda kuzatilmagandi. Ammo «asalarilar» so‘nggi vaqtlarda «Qirollik klubi» uchun eng noqulay raqiblardan biriga aylanib qolgan, ushbu jamoani o‘z uyida qatorasiga to‘rtinchi o‘yinda yutqazmadi (+1=3). Bundan tashqari, ular joriy mavsumda o‘z uyida «Real»ga ham, «Barselona»ga ham yutqazmagan yagona jamoadir. O‘tgan mavsumda bu ishni faqat «Osasuna» hamda «Betis» uddalagandi.
«Real» haftani yomon o‘tkazdi. Madridliklar avvaliga YeChLda «Liverpul»ga yutqazgandi (0:1), endi Ispaniya chempionatida ochko yo‘qotdi, natijada «Barselona»ni o‘ziga yaqinlashtirib oldi.
«Selta» – «Barselona» 2:4
Gollar: Levandovski, 10 – penalti (0:1). Karreyra, 11 (1:1). Levandovski, 37 (1:2). Iglesias, 43 (2:2). Yamal, 45+4 (2:3). Levandovski, 74 (2:4)
«Selta»: Radu, Starfelt, Alonso, Fernandes (Roman, 78), Moriba, Sotelo (El-Abdellaui, 78), Karreyra, Mingesa (Rodriges, 46), Duran, Xutgla (Saragosa, 58), Iglesias (Aspas, 70)
«Barselona»: Shchensni, Arauxo, Kubarsi, Balde (Kristensen, 86), Garsiya, Olmo (Martin, 86), Fermin Lopes, de Yong, Reshford (Torres, 88), Yamal (Bernal, 90+7), Levandovski
Ogohlantirishlar: Roman, 90 – Kubarsi, 42. de Yong, 79. Reshford, 87. Levandovski, 89
Chetlatish: de Yong, 90 (ikkinchi sariq)
Biroz keyin bo‘lib o‘tgan Vigodagi o‘yin esa gollarga boy bo‘ldi. «Barselona» hafta o‘rtasida YeChL doirasida «Bryugge»ga qarshi kechgan o‘yinda uchta gol o‘tkazib yuborgandi (3:3), bu safar ham himoya chizig‘i pand berdi. Shu bilan birga, bu o‘yin arafasida kataloniyaliklar hujum chizig‘i yanada kuchaygan, jarohatidan tuzalib qaytgan Levandovski startdan o‘rin olgandi. Ushbu polshalik o‘yin startidayoq penaltidan hisobni ochdi, ammo bir daqiqa o‘tib mezbonlar hisobni tenglashtirdi – odatdagidek, mehmonlar ofsayd qopqoni qo‘yishga urinib, yana jazolandi – Balde ofsayd hosil qilishda xato qildi. Bo‘lim oxirida Levandovski Reshfordning uzatmasi bilan dublni rasmiylashtirdi, ammo bir necha daqiqa o‘tib kataloniyaliklar himoya chizig‘i yuqori joylashgani yana gol o‘tkazilishiga sabab bo‘ldi – bu safar de Yong orqaroqda qolib ketgandi. Bo‘limga qo‘shib berilgan daqiqalarda esa Yamal yaqin burchakni aniq nishonga olib, «Barsa»ni tanaffusga g‘olib holda olib chiqdi.
Ikkinchi bo‘limda Hansi Flik jamoasi boshqa gol o‘tkazmadi. Lekin statistika «Barsa» uchun yoqimli ko‘rinishda emas, jamoa qatoasiga o‘ninchi o‘yindirki, darvozasini daxlsiz saqlay olmayapti, bu oraliqda 18 gol o‘tkazib yuborilgan. Bu 2013 yil martidan buyon eng yomon seriya (13 o‘yin, 21 gol). O‘yindagi yana bir minus – Frenki de Yong maydondan chetlatilishi bo‘ldi, u o‘yin oxirida ikkinchi sariq kartochkani oldi. Ungacha esa Levandovski het-trik qayd etgan va g‘olib masalasini hal qilib bo‘lgandi. Bu g‘alaba evaziga «Barsa» turnir jadvalida «Real» bilan oradagi farqni uch ochkoga qisqartirib oldi.
Italiya: peshqadam uch bor o‘zgardi
«Bolonya» – «Napoli» 2:0
Gollar: Dallinga, 50 (1:0). Lukumi, 66 (2:0)
«Bolonya»: Skorupski (Pessina, 8), Heggem, Lukumi, Miranda, Holm, Pobega (Kazale, 81), Fergyuson, Odgor (Bernardeski, 61), Rou (Kambyagi, 46), Orsolini (Moro, 81), Dallinga
«Napoli»: Milinkovich-Savich, Buondjorno (Juan Jyezus, 77), Rraxmani, Guterres (Olivera, 77), Di Lorenso, Lobotka, Maktominay (Lukka, 82), Zambo Angissa, Elmas (Neres, 68), Politano (Lang, 68), Hoylund
Ogohlantirishlar: Orsolini, 74 – Hoylund, 63. Lang, 71. Neres, 76
Shanba kuni «Milan» «Parma» bilan o‘yinda g‘alabani qo‘ldan chiqargach (2:2), «Napoli» birinchi o‘rinni o‘zida saqlab qolgandi. Ammo Bolonyadagi mag‘lubiyatdan keyin amaldagi chempionlar peshqadamlikni boy berishdi va rossonerilar onlay rejimda to‘plar nisbati evaziga birinchi o‘ringa chiqib olishdi. Antonio Konte jamoasi ikkinchi bo‘lim boshida Dallingdan gol o‘tkazib yubordi, ko‘p o‘tmay Holmning o‘ng qanotdan uzatmasini himoyachi Lukumi golga aylantirdi va amalda o‘yin taqdirini hal qildi. «Bolonya» bu g‘alaba evaziga «Yuventus»ni quvib o‘tib, beshinchi o‘ringa ko‘tarildi. Ushbu jamoa g‘alaba uchun uch ochko berish boshlangan davrda hali biror marta 11 turda 21 ochko to‘plamagandi.
«Roma» – «Udineze» 2:0
Gollar: Pellegrini, 42 – penalti (1:0). Zeki Chelik, 61 (2:0)
«Roma»: Svilar, N`Dika, Ermoso, Manchini, Kristante, Kone, Uesli Vinisius (Tsiolkovski, 90), Zeki Chelik (Gilardi, 90), Pellegrini (Al-Aynaviy, 74), Soule (Al-Sha’roviy, 74), Dovbik (Baldansi, 42)
«Udineze»: Okoyye, Kabasele (Palma, 53), Sole, Bertola, Chelstrem (Petrovski, 72), Atta, Ekkelenkamp, Kamara (Zemura, 82), Dzanoli, Dzanolo (Bayo, 82), Buksa (Devis, 72)
Ogohlantirishlar: Kristante, 28. Pellegrini, 45 – Chelstrem, 62
Ko‘p o‘tmay «Roma» o‘z o‘yinida g‘alaba qozondi va «Milan»ni quvib o‘tib, birinchi o‘ringa ko‘tarildi. Jamoa o‘z tarixida oltinchi bor 11 turdan keyin 24 ochko to‘pladi. Oldingi holatlarning barchasida «bo‘rilar» yakunda kuchli uchlikda qolishgan, bu safar esa Jan Piyero Gasperini jamoa bilan skudettoni maqsavd qilmoqda. Bu mavsumda asosan minimal hisobda g‘alaba qozonib kelayotgan rimliklar «Udineze» bilan o‘yinda an’anani buzishdi va ikki gol farqi bilan g‘alaba qozonishdi.
«Inter» – «Latsio» 2:0
Gollar: Martines, 3 (1:0). Bonni, 62 (2:0)
«Inter»: Zommer, Acherbi, Bastoni, Akanji, Suchich (Karlos Augustu, 56), Hoqon Chalxono‘g‘li (Frattezi, 81), Barella, Dimarko, Dyumfris (Zelinski, 56), Martines (Tyuram, 71), Bonni (Espozito, 81)
«Latsio»: Provedel, Romanioli (Provstgor, 75), Xila, Marushich, Latssari (Pellegrini, 68), Kataldi (Vesino, 65), Bashich, Genduzi, Dzakkani, Isaksen (Pedro, 65), Dia (Noslin, 65)
Ogohlantirishlar: Akanji, 33. Suchich, 37. Dyumfris, 52 – Dzakkani, 72
Kun oxirida esa «Roma» ham peshqadamlikni boy berdi, endi xalqaro tanaffus yakunigacha «Inter» birinchi o‘rinda qoladi. Neradzurrilar «Roma»ni qo‘shimcha ko‘rsatkichlar hisobiga quvib o‘tdi. Faqat YeChLda gol urayotgan Lautaro Martines esa ichki chempionatda uch o‘yinlik quruq seriyasini yakunlab, tezkor gol bilan hisobni ochdi. Ikkinchi bo‘lim boshida esa Dimarko yosh hujumchi Bonnini ideal uzatma bilan ta’minladi va hisobdagi farq oshirildi.
O‘zbekiston milliy terma jamoasi 22-martdan Toshkentda o‘quv-mashg‘ulot yig‘inlarini boshlaydi.
Fabio Kannavaro FIFA Series uchun jalb etilgan futbolchilar ro‘yxatini e’lon qildi.
Kengaytirilgan ro‘yxatdan o‘rin olgan futbolchilarimiz — Jaloliddin Masharipov, Husniddin Aliqulov, Abbosbek Fayzullayev, Dilshod Komilov, Ibrohimhalil Yo‘ldoshev, Abdulla Abdullayev, Alibek Davronov va Husayn Norchayev jarohati tufayli yig‘inni o‘tkazib yuborishi ma’lum bo‘ldi.
Eslatib o‘tamiz, milliy jamoa FIFA Series doirasida 27 mart kuni Gabon, 30 mart kuni esa Venesuyealaga qarshi maydonga tushadi. O‘yinlar «Bunyodkor» stadionida soat 19:00 da start oladi.
Sport
FIFA Nigeriya e’tirozini rad etdi – Kongo DR O‘zbekiston bilan bir guruhdan joy olish uchun kurashadi
Afrika futbolida katta mojaro: JCh-2026 yo‘llanmalaridan biri uchun kurash maydondan tashqarida kechmoqda. FIFA Nigeriyaning Kongo Demokratik Respublikasi milliy jamoasi tarkibidagi ehtimoliy qoidabuzarliklar bo‘yicha shikoyatini rad qildi. Endi nigeriyaliklar xalqaro Sport arbitraj sudida (CAS) «adolat izlashga» urinib ko‘radi. Holat O‘zbekiston milliy jamoasining JCh-2026 guruh bosqichidagi ehtimoliy raqibini o‘zgartirishi mumkin.
FIFA tartib-intizom qo‘mitasi Nigeriya futbol federatsiyasining Kongo Demokratik Respublikasi milliy jamoasi ustidan bergan shikoyatini rad qildi. Bu haqda ESPN Nigeriya futbol federatsiyasiga (NFF) tayanib xabar berdi. NFF zudlik bilan apellyatsiya jarayonini boshlaganini ma’lum qildi.
Avvalroq, NFF kongoliklar tarkibidagi bir necha futbolchi fuqarolik haqidagi FIFA talablarini buzgani bo‘yicha e’tiroz bildirib, ushbu milliy jamoaga texnik mag‘lubiyat yozgan holda JCh-2026 saralash o‘yinlaridan chetlatishni talab qilgan edi.
«Biz FIFA Tartib-intizom qo‘mitasining arizamiz bo‘yicha qarorini oldik, biroq arizamiz rad etilgan qaror bizni qoniqtirmaydi», dedi NFF bosh kotibi Muhammad Sanusi. «Nigeriyaliklarni ishontirib aytamanki, NFF zudlik bilan qaror ustidan shikoyat qilish jarayonini boshladi».
Endi shikoyat Sport arbitraj sudiga (CAS) yuborilishi kutilmoqda, ammo apellyatsiya jarayoni 26 mart kuni – qit’alararo pley-off boshlangunga qadar yakunlanishi dargumon.
Kongo DR futbol federatsiyasi bu xabarga munosabat bildirmadi.
Mojaro mazmuni
2025 yil noyabr oyida Kongo DR milliy jamoasi Afrika pley-offida Nigeriyani mag‘lub etdi (asosiy vaqtda 1:1 va penaltilar seriyasida 4:3). Bu kongoliklarga JCh-2026 yo‘llanmasi uchun qit’alararo pley-off o‘yinlariga yo‘llanmani taqdim etdi. Nigeriya esa JCh-2026 yo‘llanmasidan mahrum bo‘ldi.
Dekabrda AQSh poytaxti Vashingtonda JCh-2026 guruh bosqichiga qur’a tashlandi. O‘zbekiston milliy jamoasi K guruhida Portugaliya, Kolumbiya va saralashdan o‘tadigan yana bir jamoaga (Kongo DR/Yamayka/Yangi Kaledoniya) qarshi o‘ynashi ma’lum bo‘ldi.
Nigeriya futbol federatsiyasi (NFF) Kongo DR fuqarolik va milliy mansublikni o‘zgartirish talablariga javob bermaydigan o‘yinchilardan foydalangani haqida FIFAga rasmiy shikoyat bilan chiqdi.
Shikoyat nimaga asoslangan
Nigeriya futbol federatsiyasi (NFF) Kongo DR tarkibidagi 9 nafargacha futbolchi fuqarolikni o‘zgartirish tartibini buzgan deb hisoblamoqda – ularda Yevropa pasporti bor, ammo Kongo DR qonunlariga ko‘ra ikki fuqarolikka ruxsat berilmaydi.
Nigeriyaliklarning ta’kidlashicha, bu futbolchilar Yevropa pasportidan voz kechmagan va Kongo DR futbol federatsiyasi FIFAni milliy fuqarolik hujjatlari bilan «chalg‘itgan».
FIFA futbol qoidalariga ko‘ra, futbolchidan faqat mamlakatning amaldagi pasporti talab qilinadi. Ammo Kongo DR fuqarolik qonunchiligi bo‘yicha ikki fuqarolik taqiqlangan. Ushbu holat shikoyatga sabab bo‘lgan.
Kongo DR futbol federatsiyasi barcha o‘yinchilar FIFA tomonidan ma’qullanganini va maydonga tushish huquqiga ega ekanini ta’kidlamoqda va Nigeriyani maydondagi mag‘lubiyatdan so‘ng «orqa eshikdan bostirib kirishga» urinishda ayblamoqda.
Dastlab FIFA 2025 yil dekabr oyida futbol qoidalari uchun futbolchi vakil bo‘lgan mamlakatning amaldagi pasporti bo‘lishi yetarli ekanini aytib, shikoyatni rad qilgan edi. Ammo fevral oyi o‘rtalarida bir qator ommaviy axborot vositalarida (jumladan, The African Mirror va Eye Witness News) FIFA Tartib-intizom qo‘mitasi o‘yin paytida futbol fuqaroligini o‘zgartirish jarayoni tugallanmagan «X futbolchi» uchun ishni qayta ko‘rib chiqayotgani haqida xabarlar paydo bo‘ldi.
FIFA qaroridan keyin, endi NFF xalqaro Sport arbitraj sudida (CAS) «adolat izlashga» urinib ko‘radi.
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlarini bekor qildi. Musobaqalar FIFA talabiga ko‘ra juft yillarga ko‘chirildi. Endi mezbon tanlash jarayoni qaytadan boshlanadi. Avvalroq, 2031 yilgi turnir mezbonligiga O‘zbekiston, Tojikiston va Qirg‘iziston qo‘shma ariza topshirgan edi.
Foto: REUTERS/Ibraheem Al Omari
Osiyo futbol konfederatsiyasi (OFK) 2031 va 2035 yilgi Osiyo Kubogi mezbonlarini tanlash jarayonlari bekor qilingani haqida milliy federatsiyalarni rasman xabardor etdi, deb yozdi Reuters.
Turnir mezbonligiga O‘zbekiston, Tojikiston va Qirg‘izistonning qo‘shma arizasi ham da’vogarlik qilayotgan edi.
Bekor qilinishiga sabab FIFA tashabbusi bo‘lib, u qit’a turnirlari jadvalini o‘zgartirish va ularni juft yillarga ko‘chirishni taklif qilgan. Muhokamalardan so‘ng OFK bu taklifga rozi bo‘ldi.
Nima o‘zgaradi?
Asosiy oqibat – turnirlarning to‘liq ko‘chirilishi: Osiyo kubogi-2031 endi 2032 yilga rejalashtirilgan, Osiyo kubogi-2035 esa 2036 yilga ko‘chirilgan. Shunday qilib, turnirni o‘tkazishning an’anaviy tizimi buziladi va musobaqalar boshqa vaqt oralig‘ida o‘tkaziladi. Shu bilan birga, Osiyo Kubogi-2027 reja bo‘yicha o‘z muddatida bo‘lib o‘tadi.
Osiyo Kubogining juft yillarga ko‘chirilishi yana bir muammoni keltirib chiqarmoqda – boshqa konfederatsiyalarning eng yirik turnirlari bilan bir vaqtga to‘g‘ri kelmoqda. Endi bir yil davomida quyidagi musobaqalar o‘tkazilishi mumkin: Yevropa chempionati (UYeFA Yevro), Amerika Kubogi (Copa America), Osiyo Kubogi.
FIFA nega tizimni o‘zgartirmoqda?
O‘zgarishlar xalqaro taqvimni markazlashgan holda boshqarish bilan bog‘liq. FIFA allaqachon 2030 yilgacha bo‘lgan global musobaqalar rejasini tasdiqlagan bo‘lib, unda milliy jamoalar o‘yinlari uchun oynalar, saralash turnirlari, final bosqichlari va o‘rtoqlik o‘yinlari aniq ko‘rsatilgan. Ushbu tizimda har bir konfederatsiya umumiy jadvalga moslashishi kerak. Osiyo Kubogi qarori – mana shu katta islohotning bir qismi.
Mezbonlikka nomzodlar bilan vaziyat qanday?
Turnirlar sanasining o‘zgarishi mezbonlikka da’vogarlarning barcha arizalarini avtomatik ravishda bekor qiladi. Bu shuni anglatadiki, mezbonlarni tanlash jarayoni qaytadan boshlanadi, hamma yangi tartibni kutishiga to‘g‘ri keladi. OFK amalda ikki turnirga tayyorgarlik siklini qaytadan boshlaydi.
2031 yilgi Osiyo Kubogi mezbonligiga Avstraliya, Hindiston, Indoneziya, Kuvayt, Janubiy Koreya, shuningdek, O‘zbekiston, Qirg‘iziston va Tojikiston qo‘shma ariza topshirgan edi. Endi O‘zbekistonning yangi turnirlar mezbonligi uchun ariza topshirishi masalasi noma’lum. Hozircha, O‘zbekiston futbol assotsiatsiyasi (O‘FA) vaziyatga munosabat bildirmadi.
Fudbol bo‘yicha O‘zbekiston milliy jamoasi Toshkentda bo‘lib o‘tadigan FIFA Series xalqaro o‘rtoqlik turnirida qatnashadi. Musobaqa 27–30 mart kunlari tashkil etiladi va unda Gabon, Trinidad va Tobago hamda Venesuela jamoalari ishtirok etadi.
Mart oyining oxirida Toshkent shahri FIFA Series xalqaro o‘rtoqlik turniriga mezbonlik qiladi. Milliy terma jamoa bosh murabbiyi Fabio Kannavaro maskur yig‘in uchun jalb etilgan futbolchilar ro‘yxatini e’lon qildi.
Darvozabonlar: O‘tkir Yusupov («Navbahor»), Abduvohid Ne’matov («Nasaf»), Botirali Ergashev («Neftchi»).
Himoyachilar: Rustamjon Ashurmatov («Istiqlol», Eron), Umarbek Eshmurodov («Nasaf»), Abduqodir Husanov («Manchester Siti», Angliya), Muhammadrasul Abdumajidov, Hojiakbar Alijonov, Sherzod Nasrullayev, Muhammadqodir Hamraliyev («Paxtakor»), Behruz Karimov («Surxon»), Jahongir O‘rozov («Dinamo»), Farruh Sayfiyev («Neftchi»).
Yarim himoyachilar: Umarali Rahmonaliyev («Sabah», Ozarbayjon), Ibrohim Ibragimov, Dostonbek Hamdamov, Akmal Mozgovoy («Paxtakor»), Alisher Odilov, Jamshid Iskanderov («Neftchi»), Otabek Shukurov («Baniyas», BAA), Azizjon G‘aniyev («Al Bataeh», BAA), Oston O‘runov («Persepolis», Eron).
Hujumchilar: Eldor Shomurodov («Istanbul Bashakshehir»), Igor Sergeyev («Persepolis», Eron), Sherzod Temirov («Erbil», Iroq).
Musobaqa 27-30 mart kunlari o‘tkaziladi.
27 mart
15:00 Venesuela – Trinidad va Tobago («Paxtakor» stadioni);
19:00 O‘zbekiston – Gabon («Bunyodkor» stadioni).
30 mart
15:00 Gabon – Trinidad va Tobago («Paxtakor» stadioni);
19:00 O‘zbekiston – Venesuela («Bunyodkor» stadioni).
Ma’lumot uchun, FIFA Series 2026 turnirlari o‘rtoqlik o‘yinlari o‘rnini bosishi nazarda tutilgan va butun dunyo bo‘ylab o‘tkaziladi. Erkaklar o‘rtasidagi bahslarga Avstraliya, Ozarboyjon, Indoneziya, Qozog‘iston, Yangi Zelandiya, Puerto-Riko, Ruanda va O‘zbekiston mezbonlik qiladi. Ayollar o‘rtasidagi musobaqalar Braziliya, Kot-d’Ivuar va Tailandda bo‘lib o‘tadi.
Turnirda ishtirok etayotgan beshta erkaklar milliy jamoasi – Avstraliya, Kabo-Verde, Kyurasao, Yangi Zelandiya va O‘zbekiston 2026 yilgi jahon chempionati ishtirokchisi sanaladi.
O‘zbekiston Superligasida 4-tur o‘yinlari o‘tkazildi. «Neftchi» mavsumda birinchi marta gol o‘tkazdi, ammo g‘alabali qadamini davom ettirdi. «Navbahor» va «Nasaf» so‘nggi daqiqalarda gol o‘tkazib, mag‘lubiyatga uchradi. Jizzaxda 6 ta gol urilgan o‘yinda «Paxtakor» uch ochkoni qo‘lga kiritdi. OKMK birinchi marta g‘alaba qozondi, bosh murabbiy Mirjalol Qosimov mobil o‘yinlar tufayli futbolchilarda ishtiyoq pasayib ketganini aytdi.
18-20 mart kunlari futbol bo‘yicha O‘zbekiston Superligasida 4-tur o‘yinlari o‘tkazildi.
QIZILQUM 0:1 OKMK
Gol: Abror Karimov, 34 (0:1)
OKMK mavsumdagi birinchi g‘alabasini Navoiyda qo‘lga kiritdi. Yagona gol «Qizilqum»ni mag‘lub etish uchun yetarli bo‘ldi. Olmaliqliklar ushbu g‘alabadan keyin musobaqa jadvalida 10-o‘ringa ko‘tarilib oldi.
«Qizilqum» bosh murabbiyi Akmal Rustamov jamoa yagona xato tufayli yutqazganini aytdi. OKMK ustozi Mirjalol Qosimov futbolchilarning ishtiyoqini telefondagi o‘yinlar olib qo‘yayotganidan shikoyat qildi. «Hozir telefon chiqib ko‘plarning xayolini olyapti, telefondagi o‘yinlar maydondagi futboldan ko‘proq azart beryapti. Qaniydi maydonda ham shunday kurash kechsa. Telefondagi o‘yinlar yoshlarning miyasini buzyapti», dedi u.
QO‘QON-1912 2:1 NAVBAHOR
Gollar: Anri Chichinadze, 14 (0:1), Javohir Husanov, pen 28 (1:1), Muhammadanas Hasanov, 90+4 (2:1)
Qo‘qonda kutilmagan natija qayd etildi. G‘alaba nimaligini bilmay kelayotgan mezbonlar «Navbahor»ni irodali tarzda mag‘lub etishga erishdi. G‘alaba keltiruvchi gol so‘nggi daqiqalarda urildi.
«Qo‘qon-1912» ustozi Andrey Shipilov bugun omad kulib boqqanini tan oldi. «Navbahor» bosh murabbiyi Temur Kapadze mag‘lubiyatni boshqa narsalar qatori maydon holati bilan ham bog‘ladi. «Maydon ham og‘ir, o‘t baland ekan, bu esa raqibga qo‘l keldi. Maydonda to‘p sekin yurdi, bizga og‘irlik qildi, maydon holati bilan kurash olib bordik», dedi u.
XORAZM 1:2 BUNYoDKOR
Gollar: Nosirjon Abdusalomov, 16 (0:1), Matiya Krivokapich, 43 pen (0:2), Temur Ismailov, 54 (1:2)
Chetlatish: Sardor Rahmonov, 62 (Bunyodkor)
«Bunyodkor» Urganchdagi qiyin o‘yinda 3 ochkoni qo‘lga kiritdi. Toshkentliklar so‘nggi yarim soatni raqibga nisbatan kamchilikda o‘tkazdi, ammo g‘alabani ushlab qolishga erishdi.
«Xorazm» bosh murabbiyi Sergey Tokov ikkita gol o‘tkazib yuborilgan birinchi bo‘lim haqida «uyalishimiz kerak» dedi. «Bunyodkor» ustozi Ilyos Zeytullayev g‘alabadan xursandligini yashirmadi va o‘zini «o‘zbek Spalettisi» deb atalishiga xotirjam munosabatda ekanini ta’kidladi. «Men o‘zimni o‘zbek spagettisi deyman (kulib). Menga Spaletti murabbiy sifatida yoqadi, lekin men angrenlikman», dedi u.
BUXORO 3:1 DINAMO
Gollar: Ravshan Xayrullayev, 45, avtogol (0:1), Temur Mamasidiqov, 48 (1:1), Shahzodbek Ubaydullayev, 54 (2:1), Ravshan Xayrullayev, 63 (3:1)
Yana bir kutilmagan natija Buxoroda qayd etildi. Aleksandr Xomyakov qo‘l ostidagi «Buxoro» Samarqandning «Dinamo» klubini irodali tarzda mag‘lub etdi. Bu natijadan so‘ng, buxoroliklar musobaqa jadvalida ikkinchi o‘ringa ko‘tarilib oldi va chempionat startidagi asosiy kashfiyot bo‘lib turibdi.
«Buxoro» bosh murabbiyi o‘yindan keyin «dastlab uyatli gol o‘tkazdik va tezkor gol urdik. Ikkinchi golda omadimiz keldi, uchinchi golimiz esa o‘yinga yakun yasab berdi», dedi. «Dinamo» ustozi Vadim Abramov maydon sifatiga e’tiroz bildirdi. «O‘ylashimcha, bu maydonda futbol o‘ynashga boshqa ruxsat berishmasa kerak», dedi u.
ANDIJON 2:0 MASh’AL
Gollar: Martin Boake, 18 (1:0), Doniyor Abdumannopov, 76 (2:0)
Chetlatish: Ibrohim G‘anixonov, 12 (Mash’al)
«Andijon» autsayder ustidan ishonchli tarzda g‘alaba qozondi. «Mash’al» o‘yin boshidayoq bir futbolchi kam bo‘lib qoldi. Ibrohim G‘anixonov «Andijon» himoyachisi Igor Golbanga tirsagi bilan zarba bergan deb topildi va maydondan chetlatildi. Vaziyat ijtimoiy tarmoqlarda faol muhokama qilindi, qoidabuzarlik yaqqol emasdek ko‘rindi. O‘yindan keyin Futbol hakamlari markazi Igor Golbanning yorilgan qoshi fotosuratini e’lon qildi. Mezbonlar tarkibdagi ustunlikni g‘alabaga aylantira oldi. «Mash’al» hali birorta gol urmadi va jadval tubiga «o‘rnashib» qoldi.
«Andijon» bosh murabbiyi Samvel Babayan o‘yindan keyin tanqidiy fikr bildirdi: «Jamoam o‘yinidan to‘liq qoniqmadim. Qoniqdim degan murabbiy faoliyatini tugatib qo‘yavergani yaxshi deb o‘ylayman», dedi. «Mash’al» ustozi Igor Surov «agar bir kishi kam bo‘lib qolmaganimizda, umuman boshqacha futbol namoyish etgan bo‘lardik», dedi.
SO‘G‘DIYoNA 2:4 PAXTAKOR
Gollar: Filip Ivanovich, 2 (1:0), Flamarion, 36 (1:1), Rustam Turdimurodov, 50 (1:2), Rustam Turdimurodov, 57 pen (1:3), Hojimat Erkinov, 74 pen (1:4), Feysal Mulich, 90+5 pen (2:4)
Turning eng «quvnoq» o‘yini Jizzaxda o‘tkazildi. 6 ta gol urilgan bahsda «Paxtakor» ishonchli g‘alabani qo‘lga kiritdi va uchinchi o‘ringa ko‘tarilib oldi. Mehmonlar tarkibida Rustam Turdimurodov ikkita gol urdi. «So‘g‘diyona» uchun mavsum starti muvaffaqiyatsiz kechdi – jamoa 1 ochko bilan so‘nggi o‘rinlardan birini egallab turibdi.
«So‘g‘diyona» bosh murabbiyi Ivan Boshkovich dastlabki to‘rtta o‘yinda atigi bir ochko to‘plangani haqida gapirar ekan, buni inqiroz ekanini qisman tan oldi, lekin jamoa yanada yaxshiroq harakat qilishiga ishontirdi. Moliyaviy muammolar haqidagi savolni esa javobsiz qoldirdi.
NASAF 0:1 SURXON
Gol: Tornike Dzebniauri, 90+2 (0:1)
Yana bir kutilmagan natija Samarqandda qayd etildi. «Nasaf» so‘nggi daqiqalarda gol o‘tkazib, «Surxon»ga yutqazdi. Termizliklar bundan oldin bosh murabbiy Stanislav Kudryashov bilan xayrlashib, o‘rniga Anvar G‘ofurovni tayinlagan edi. Uning debyuti muvaffaqiyatli chiqdi. «Nasaf» bosh murabbiyi Ro‘ziqul Berdiyev mag‘lubiyatni «hujumlarda yetarlicha faol bo‘lmagani» bilan izohladi. Anvar G‘ofurov g‘alabani omad bilan izohladi.
NeFTChI 3:1 LOKOMOTIV
Gollar: Ibrohimhalil Yo‘ldoshev, 11 (1:0), Temurxo‘ja Abduxoliqov, 36 pen (1:1), Stipe Peritsa, 65 (2:1), Alisher Odilov, 89 (3:1)
«Neftchi» navbatdagi g‘alabani qo‘lga kiritdi. Farg‘onaliklar 15 yilda ilk marotaba «Lokomotiv»ni o‘z maydonida yengishga muvaffaq bo‘ldi va chempionatda yo‘qotishsiz bormoqda. Bu o‘yinda ular mavsumdagi ilk golini o‘tkazdi (penaltidan), ammo yana uchta gol urishga muvaffaq bo‘ldi. «Neftchi» bosh murabbiyi Islombek Ismoilov dastlabki o‘tkazib yuborilgan goldan ranjiganini tan oldi: «gol o‘tkazmaslik seriyasini uzoq davom ettirishni maqsad qilgandik», dedi. «Lokomotiv» ustozi Mirko Yyelichich: «Hozircha darajamiz «Neftchi» bilan bir xil emas va buni to‘g‘ri tushunish kerak», dedi.
4-tur o‘yinlaridan keyin Superliga jadvali
Superliga to‘purarlari
Ko‘rgazmabozlik soyasidagi bayram yoxud sahnadan haydalgan bolalar
Turkmanistonda talabalarga suratlarini ijtimoiy tarmoqlarga joylashtirish taqiqlandi
Eron 10 million riyollik banknotni muomilaga chiqardi
-
Dunyodan4 days ago
Eron Hormuz boʻgʻozi orqali cheklangan oʻtishga ruxsat beradi
-
Jamiyat3 days ago
Tadbirkor boshpanasiz bo‘lgan 5 ta oilani uy-joy bilan ta’minladi
-
Iqtisodiyot5 days ago“Markaziy Osiyo umumiy investitsiya makonini yaratishi zarur” – Alisher Umirdinov
-
Siyosat3 days agoSoʻnggi savdo maʼlumotlariga koʻra, Oʻzbekiston temir yoʻllari importi eksportdan 2,5 barobar koʻp
-
Iqtisodiyot4 days agopayme Tez QR orqali to‘lovni 3% keshbek bilan ishga tushirmoqda
-
Dunyodan4 days ago
Xakerlar Isroil va Rizo Pahlaviyning maxfiy hujjatlarini qo’lga kiritadilar
-
Iqtisodiyot5 days agoMetandan go‘shtgacha. Narxi keskin oshgan mahsulot va xizmatlar
-
Dunyodan3 days ago
Isroil mintaqaviy tuzilmani qayta tiklamoqchi