Sport
«PSJ» «Real»ga ham hech qanday imkon qoldirmadi va 4 ta javobsiz gol urdi
Teng kurash o‘rniga muxlislar madridliklar jamoasining kamsitilishiga guvoh bo‘lishdi. Dembele amalda «Oltin to‘p» masalasini hal qildi.
O‘yin taqdiri birinchi bo‘lim yarmidayoq hal bo‘ldi
JCh. Yarimfinal.
«PSJ» – «Real Madrid» (4:0)
Gollar: Ruis (6, 24), Dembele (9), Ramush (87).
«PSJ»: Donnarumma, Mendesh (Kan In, 79), Beraldo, Markinos, Hakimi, Ruis (Emeri, 66), Vitiniya, Nevesh, Xvicha (Barkoli, 59), Dembele (Ramush, 59), Due (Meyulyu, 66).
«Real Madrid»: Kurtua, Fran Garsiya, Ryudiger, Asensio (Militao, 64), Valverde, Bellinghem (Modrich, 64), Chuameni, Guler (Vaskes, 83), Gonsalo Garsiya (Karvaxal, 71), Mbappe, Vinisius (Dias, 65).
Ogohlantirishlar: Chuameni (28), Nevesh (45+2), Karvaxal (73).
Klublar o‘rtasidagi jahon chempionatining «PSJ» va «Real» o‘rtasidagi yarimfinal o‘yini katta afishaga qaramay, intriga yo‘qligi bilan muxlislarning hafsalasini pir qildi. Chempionlar ligasining amaldagi g‘olibi top darajadagi navbatdagi raqibni yo‘ldan oldi. Endi 13 iyul kungi finalda Luisa Enrike shogirdlari «Chelsi» bilan bosh sovrin uchun kurash olib boradi.
Shu kuni «Real»da yangi bosh murabbiy davrida ilk bor Mbappe – Vinisius Juniordan iborat hujum juftligi harakat qildi. Fransiyalik forvard sobiq jamoasiga qarshi o‘yin oldidan kasallikdan tuzalib qaytdi. Habi Alonso «PSJ»ga qarshi o‘yinda Kilianni zaxirada qoldira olmasdi, shu bilan birga, turnir kashfiyoti Gonsalo Torresga ham boshlang‘ich tarkibdan o‘rin topib berdi. «Real» mudofaasida esa, aksincha, yo‘qotishlar bor edi. Chorakfinal o‘yinida Hausen diskvalifikatsiyaga uchragandi, yetmaganiga erkin agent bo‘lganiga qaramay, aynan shu turnirda o‘ynatish uchun pul to‘lab olib kelingan Trent jarohat oldi.
O‘yin boshlanganida, «Real» 4-4-2 sxemasi bilan yarimhimoyada «romb» hosil qildi. Gonsalo Torres Mbappe va Vinisius ortida joylashdi. Ammo himoyalanishda fransuz va brazil hujumchilari ham orqaroqqa tushishdi. Habi Alonso maydon markazini nazorat qilishni, bu yerda «PSJ» futbolchilari to‘pni erkin olib yurishiga yo‘l qo‘ymaslikni istagandi. Ammo markaziy himoyachilarning individual xatolari tufayli «qaymoqranglilar» ustozining rejalari buzilib ketdi. To‘qqizinchi daqiqaga keliboq ikki gol o‘tkazib yuborilganida raqibga kurash taklif etish qiyin bo‘ladi.
Shu bilan birga, «PSJ» hisobni ochishidan oldin ham deyarli 100 foizlik imkoniyatga ega bo‘lgan, madridliklarni Kurtua qutqarib qolgandi. Golli hujum ham chiziqlar orasidan o‘tkazilgan pas bilan boshlandi, «Real» tig‘iz himoyalanayotganiga qaramay, bu pas o‘tishiga yo‘l qo‘yildi. Keyin esa turnirning eng omadsiz futbolchisi nomiga da’vogar bo‘lgan Asensio qo‘pol xatoga yo‘l qo‘ydi. Guruh bosqichida «Al-Hilol» bilan o‘yinda penaltiga sababchi bo‘lgan, keyin esa «Pachuka» bilan o‘yinning 7-daqiqasidayoq qizil kartochka olib, jamoadoshlarini qiyin ahvolga solib qo‘ygan, faqat tarkibdagi muammolar tufayli maydonga tushgan himoyachi to‘pni uzoqlashtirish o‘rniga texnik xatoga yo‘l qo‘ydi va Dembelening pressingi qurboni bo‘ldi. Kurtua raqib hujumchisini yiqitishga majbur bo‘ldi, agar to‘p Ruisga borib tushib, u darvozani ishg‘ol etmaganida baribir penalti qo‘yilgan bo‘lardi.
Keyin esa umuman kutilmaganda tajribali Ryudiger ham golga olib kelgan xatoga yo‘l qo‘ydi. Germaniyalik himoyachi ham Kurtuaga pas berish o‘rniga to‘pni Dembelega sovg‘a qildi, hujumchi darvozabon bilan yakkama-yakka vaziyatga chiqib ketdi. Usmonning o‘zi ikki bor o‘z bosimi bilan «Real» markaziy himoyachilarini xato qilishga majburladi. Bunday vaziyatda gol urish – Dembele uchun oddiy texnik harakat. U zarba berishda aynan texnikasini ishga solib, yerlatib olis burchakni aniq nishonga oldi va mavsumdagi 35-golini nishonladi.
Bu vaziyatda «Real» uchun eng qo‘rqinchlisi «PSJ» ikki to‘p farqi bilan hisobda oldinda borsa ham to‘pga egalik qilishda davom etdi va uni topshirish haqida o‘ylamadi. Madridliklar ilojsiz holatda qolishdi. Masalan, Fran Garsiya ilk pasini (!) o‘yinning yarim soati ortda qolayotganida berishga erishdi. Alonso shogirdlari o‘yinni mudofaadan qura olishmadi, shu tufayli parijliklar markaz yoki qanotlardagi bo‘sh futbolchilarni osonlik bilan yopa olishdi. «PSJ» uchinchi golni ham «Real»ni pressing qilib urdi. Raqib mudofaasi mashg‘ulotlardagi kabi osonlik bilan yorib o‘shtildi, Hakimi devor uslubida o‘ynab, raqib jarima maydoniga yetib bordi va markazda ochilgan Ruisni to‘p bilan ta’minladi, ispaniyalik yarimhimoyachi dublni nishonlab, amalda o‘yin taqdirini hal qildi.
Bu hujumda parijlik futbolchilar o‘z joylashuvini tezlik bilan sinxron o‘zgartirish va to‘pni ham shunday tezlikda harakatlantirish bo‘yicha mahorat darsini o‘tib berishdi. Enrike shogirdlari birinchi bo‘limda zarbalar soni bo‘yicha ham to‘liq ustunlikka erishdi – 12:4 (darvoza sohasiga to‘g‘ri borgan zarbalar bo‘yicha – 7:1). Hisob yanada yiriklashib ketishi ham mumkin edi, ammo Kvaratsxeliya va boshqalar «Madrid»ni kechirishdi.
Qanchalik ajablanarli bo‘lmasin, Habi Alonso tanaffusda hech qanday almashtirish qilmadi. Buni mag‘lubiyatni tan olish bilan izohlash ham mumkin. Masalan, shu kuni umuman raqib jarima maydonida ko‘rinmagan Torresni maydondan olish mumkin edi, ammo «Real» murabbiyi uni shunchaki o‘ngroqqa surish bilan kifoyalandi. Ikkinchi bo‘lim boshi ham madridliklarga hech qanday yaxshilik va’da qilmayotgandi. «PSJ» Donnarumma boshlab bergan hujumda yana tezkor gol urdi. «Real» futbolchilari yana hech narsaga ulgurishmadi – «qaymoqranglilar» Due Dembelening uzatmasidan keyin darvozani ishg‘ol etishiga shunchaki tomoshabin bo‘lib turishdi. Faqat bu hujumda Usmon biroz «o‘yindan tashqari» holatda qolib ketgandi va shu tufayli gol bekor qilindi.
Keyin o‘yin ochila boshladi. Ikki darvoza tomon ham ketma-ket hujumlar uyushtirildi. Ikki jamoa uchun ham maydon markazi umuman kerakmasdek edi. Shunga qaramay, «Real» chinakamiga golli vaziyatlar yarata olmadi. Alonso o‘zining ilk o‘zgartirishini qilishidan oldin Luis Enrike hujumdagi asosiy yetakchilari Kvaratsxeliya va Dembeleni zaxiraga oldi. «Real» safida shu kuni Modrich va Vaskes oxirgi o‘yinlarida maydonga tushishdi. Bundan tashqari, Militao noyabrdan, Karvahal – oktyabrdan buyon ilk bor o‘ynashdi.
O‘yinning ikkinchi bo‘limida 87-daqiqaga kelib darvoza tomon to‘g‘ri borgan zarbalar statistikasi – 0:0. Militao ilk zarbani yo‘llashi bilan darhol «PSJ» javob golini urib ketdi. Barkolya raqib jarima maydoni ichida masxaromuz fint ishlatdi va keyin Ramushga assist berdi. Portugaliyalik hujumchi epizodni to‘pga uchinchi teginishida hal qildi va golini Jotaga bag‘ishladi.
Parijliklar mavsum boshidan buyon urilgan gollar sonini 168 taga yetkazdi — bu ularning yetti yil oldingi ko‘rsatkichidan uchtaga kam. Fransuzlar klubi istasa, yirikroq hisobda g‘alaba qozonishi ham mumkin edi.
«Real» esa ayni vaqtda «PSJ» bilan raqobatlasha olmaydi. Vaqt o‘tib — tarkib ideal bo‘lgan holatda buning imkoni bo‘lishi mumkin, lekin hozir emas. Hozircha Enrike jamoasiga qarshi turish retsepti hech bir jamoada yo‘q. Albatta, yakshanba kungi finalda Enso Mareska nimadir o‘ylab topishga harakat qilishi mumkin, ammo hozirda ko‘pchilik «Chelsi»ga faqat achinib qaramoqda. Londonliklar uddalab bo‘lmas ishni uddalashi talab etiladi.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
