Sport
«Chelsi»da yangi yulduz porlamoqda. Joau Pedru sobiq jamoasini ayamadi va londonliklarni finalga olib chiqdi
KJCh. Yarimfinal
8 iyul. Ist-Ruterford. «Metlayf Stedium»
«Fluminense» — «Chelsi» 0:2
Gollar: Joao Pedro (18, 56).
«Fluminense» — Fabio, Ignasio, Silva, Santos (Keno, 54), Guga, Bernal (Lima, 70), Herkules (Kanobbio, 70), Rene, Nonato (Soteldo, 66), Arias, Kano (Everaldo, 54).
«Chelsi» — Sanches, Gyusto (Jyeyms, 68), Adarabioyo, Chaloba, Kukurelya, Kaysedo, Fernandes (Santos, 86), Palmer, Nkunku (Dyuzberi-Holl, 86), Netu (Madueke, 68), Pedro (Jyekson, 60).
Ogohlantirishlar: Nonato (59), Soteldo (72), Sanches (73).
Ikki qariya va muammolar
«Chelsi» klublar o‘rtasidagi jahon chempionatida xuddi Braziliya bo‘ylab turne uyushtirayotgandek bo‘lmoqda. Ko‘klar guruh bosqichida dominant futbol namoyish eta oladigan «Flamengo»ga yutqazib qo‘ygandi (1:3), chorakfinalda xuddi shu kabi kuchli «Palmeyras» to‘sig‘idan o‘tdi (2:1). To‘liq komplekt uchun faqat «Botafogo»ga qarshi o‘yin yetishmadi, turnirda maksimal darajada yopiq futbol namoyish etgan jamoa nimchorakfinalda «Palmeyras»ga yutqazib (0:1), turnirni tark etgandi. «Fluminense» esa Braziliyaning eng uzoqqa yetib borgan jamoasi bo‘ldi. Bu ko‘p jihatdan jamoa bosh murabbiyi Renatu Gaushning xizmatidir.
Braziliya chempionatida oltinchi o‘rinda borayotgan ushbu jamoa tarkibi mamlakatning klublar o‘rtasidagi mundialga kelgan boshqa vakillariga qaraganda kamtarroq. 44 yoshli darvozabon Fabio va 40 yoshli Tiagu Silva kabi tajribali yulduzlar bor. Kolumbiyalik Arias va 37 yoshli argentinalik hujumchi Kano qiyofasidagi qit’a darajasidagi yulduzlar ham. Shu bilan birga, «Flu» diskvalifikatsiya tufayli ikki muhim futbolchisining o‘rnini bosa oladigan futbolchi topolmadi. Albatta, Erkules turnir davomida ikkita muhim gol urdi, ammo uning darajasi Martinelliniki bilan tenglasholmaydi, AQShda faqat 18 daqiqa o‘ynagan faxriy futbolchi Tiagu esa Freytes kabi harakatlanolmasdi. Bundan tashqari, Samuel Shaver jarohat olgani tufayli markaziy himoyachi Gugani o‘ng qanotda o‘ynatishga to‘g‘ri keldi.
O‘zingdan chiqqan balo
Enso Mareska bunday fonda o‘z jamoasining qiyinchiliklaridan nolishi adolatdan bo‘lmasdi. Chorakfinalda tayanch zonasini qaytadan tashkil etishiga to‘g‘ri kelgan «Chelsi»da bu o‘yin arafasida muammolar yo‘q edi ham. Endi tarkibga Kaysedo qaytgan, Koluill va Delapning yo‘qligini bilintirmaslik keng tarkibga ega londonliklar uchun qiyin emasdi. Jamoa hujum chizig‘i uchun bir hafta oldin Joau Pedruni xarid qilgan va uni pley-off o‘yinlari uchun zayavka qilgandi.
Aynan ushbu futbolchi 18-daqiqada hisobni ochdi. «Chelsi»ning sobiq futbolchisi Silva to‘pni jarima maydonidan uzoqlashtirishda muvaffaqiyatsiz harakat qildi va hujumchi o‘ng oyog‘ida aylanma zarba yo‘lladi va o‘yin oldidan va’da qilganidek yangi jamoasi safidagi ilk golini nishonlamadi. Oy boshida «Brayton»dan 60 mln funtga sotib olingan futbolchi tribunalarni to‘ldirib o‘tirgan «Fluminense» muxlislaridan uzr ham so‘radi, u 10 yoshida ushbu klub akademiyasiga qabul qilingan va bir yil asosiy jamoada o‘ynab, 18 yoshida Yevropaga yo‘l olgandi.
«Chelsi» hujumkor o‘ynashda davom etdi, faqat brazillar — bu turnirda bir necha bor kuzatilganidek — zarbalarga dosh bera olishi hamda kuchli pressing ostida ham o‘z vaziyatlarini topa olishini namoyish etishdi. Dastlab 26-daqiqada bunday vaziyat Erkulesda yuzaga keldi. U to‘pni darvozabonning yonidan o‘tkazdi, ammo zarba kuchli emasdi va Kukurelya to‘pni chiziq ustida qaytarib qolishga ulgurdi.
Yana o‘n daqiqa o‘tib ijro etilgan standart vaziyatdan keyin to‘p Chalobaning qo‘liga tegdi, bosh hakam Fransua Letekse 11 metrlik nuqtani ko‘rsatdi, ammo videohakamlar uni monitor qarshisiga chaqirishdi. Videotakrorni ko‘rganidan keyin esa hakam qarorini o‘zgartirdi, u bu holatda himoyachining qo‘li tabiiy holatda bo‘lgan deb topdi.
Bo‘limning so‘nggi daqiqasida esa raqib jarima maydoni markazida bo‘sh qoldirilgan Erkules Guganing ajoyib uzatmasidan keyin to‘pni darvozaga to‘g‘rilab yubora olmadi.
Gaushning tavakkalchiligi
Tanaffusda «Chelsi» shtabi kerakli xulosalar chiqardi va kerakli o‘zgartirishlarni amalga oshirdi. Ikkinchi bo‘limda ko‘klar jamoasi to‘pni o‘z nazoratiga olib, brazillarni pozitsion hujumlar bilan holdan toydira boshladi. Londonliklar qisqa paslar bilan vaqtni o‘ldirishdi va kutilmaganda hujumga o‘tib raqibni dog‘da qoldirishga harakat qilishdi. Shunday hujumlardan birida Kukurelyaning zarbasidan keyin to‘p ustun yonginasidan o‘tib ketdi.
Gaush esa bunday o‘yin bilan natijaga erishib bo‘lmasligini bilib, tavakkalchilikka qo‘l urdi va pley-offda ilk bor uch markaziy himoyachiga asoslangan sxemasidan voz kechdi. Zaxiradan o‘yinga qo‘shilgan Everaldo yaqin burchakka zarba berib, Sanchesni qahramonlik ko‘rsatishga majbur qildi, boshqa bir joker — Keno esa yana bir istiqbolli hujum uyushtirdi, bu vaziyatlar londonliklar shtabi uchun o‘yin o‘zgara boshlagani haqidagi ogohlik qo‘ng‘irog‘i edi. Ammo bu holat uzoq davom etmadi — «Chelsi» raqib himoyasida bo‘shliqlarga ega bo‘ldi. Raqib futbolchilari qo‘pol o‘ynasa ham.
Bu Palmerni to‘xtata olmadi. Koul raqibning ikki futbolchisi tashlanishidan keyin oyoqda turdi va himoyadan chiqishda to‘pni o‘zida saqlab qoldi, Enso Fernandes esa Joau Pedruni oldinga tashladi, u himoyachi Ignasioni osonlik bilan aldab o‘tib, yana bir chiroyli zarba bilan o‘yin taqdirini amalda hal qildi va yana bir bor «Flu» muxlislaridan uzr so‘radi.
Raqib futbolchilari esa uni baribir kechirishmadi, ikkinchi goldan bir necha daqiqa o‘tib Nonato uning oyog‘iga zarba berdi. O‘yin qahramoni jarohatdan qutulib qoldi, ammo Mareska uni asrashga qaror qildi va zaxiraga oldi. Uning o‘rniga tushgan Nikolas Jyekson esa nega zaxira futbolchisiga aylanib qolganini namoyish etdi. U markazda, bo‘sh darvoza qarshisida turgan Palmerga pas berish o‘rniga to‘pni darvozaning tashqi tomoniga tepdi.
Qolgan daqiqalarda Silva Kristofer Nkunkuning zarbasidan keyin darvozabondan o‘tib, darvozaga kirib ketayotgan to‘pni to‘xtatib, «Fluminense»ni yirik mag‘lubiyatdan qutqarib qoldi.
Brazillar turnirni boshni baland ko‘targan holda tark etishi mumkin. «Chelsi» esa kutilmaganda finalga yetib keldi va o‘zining ikkinchi qat’alararo titulini qo‘lga kiritishga harakat qiladi. 2012 yilgi birinchi urinishda jamoa «Korintians»ga yutqazgandi, to‘qqiz yil o‘tib esa «Palmeyras» mag‘lub etilgandi. Endi final Yevropa vakiliga («PSJ» va «Real» juftligi g‘olibi) qarshi kechadi.
Shavkat Mirziyoyev shaxmatchilar bilan uchrashuvda Javohir Sindorov, Muhiddin Madaminov va Shamsiddin Vohidovning Olimpiadadagi o‘yinlarini alohida e’tirof etdi.
Prezident Javohir Sindorovga murojaat qilib, bir necha oy avval uning Nomzodlar turniridagi tarixiy g‘alabasi nishonlanganini esladi. Olimpiadada ham Javohir Sindorov sovuqqonlik va barqarorlik ko‘rsatib, kuchli raqiblar oldida ortga chekinmagani ta’kidlandi.
«Endi oldingda yana bir ulkan marra — jahon toji uchun bellashuv turibdi. Bugun ortingda nafaqat jamoadoshlaring va ustozlaring, balki qirq millionga yaqin O‘zbekiston xalqi turibdi. Biz senga ishonamiz!» — dedi davlat rahbari.
Yirik musobaqada ilk bor ishtirok etgan Muhiddin Madaminov hal qiluvchi kunda ukrainalik Roman Dextyarovni qora donalarda mag‘lub etdi.
Uning g‘alabasi jamoaga oltin medal uchun zarur ochkoni olib keldi. Prezident uning g‘ayrati va g‘alabalari muxlislar ko‘nglidan joy olganini ta’kidladi.
Shamsiddin Vohidov ham umumiy natijaga munosib hissa qo‘shdi. U amaldagi jahon chempioni Gukeshga qarshi qora donalarda tengma-teng kurashib, o‘z salohiyatini namoyon etdi.
Prezident oltin medal jamoaning har bir a’zosi mehnati va hissasi natijasi ekanini ta’kidladi.
«Bu oltin medalda jamoaning har bir a’zosining mashaqqatli mehnati va ulkan hissasi bor», — dedi Prezident.
Davlat rahbari shaxmatchilar haqida hali kitoblar yozilishi, filmlar yaratilishi va ularning o‘yin uslubi darsliklarga kirishiga ishonch bildirdi.
Yosh shaxmatchilarni tayyorlash imkoniyatlarini kengaytirish uchun Toshkent xalqaro shaxmat akademiyasining Samarqand, Xorazm va Farg‘onada uchta mintaqaviy filiali tashkil etiladi. Akademiyada oliy toifali murabbiylarni tayyorlash ham yo‘lga qo‘yiladi.
FIDE reytingida 1 ming 500 dan yuqori ball to‘plagan shaxmatchilarning xususiy klublarda o‘qish xarajatlarining yarmi davlat tomonidan qoplanadi. Bu yosh iste’dodlarning tayyorgarligini davom ettirishiga qo‘shimcha imkoniyat yaratadi.
Mamlakatimizda “O‘zbekiston Grand Chess” milliy brendi ostida xalqaro turnirlar muntazam o‘tkazib boriladi. Bu shaxmatchilarimizga kuchli raqiblar bilan o‘z yurtimizda bellashish imkonini beradi.
Prezidentimiz Yangi Toshkentda 500 kishilik o‘yin zali, yotoqxona va sport maydonchalariga ega zamonaviy shaxmat saroyini barpo etishni taklif qildi.
O‘zbekiston delegatsiyasi Yaponiyadagi Osiyo o‘yinlarining bugungi kunini oltin va kumush medallarni qo‘lga kiritish bilan boshladi.
Shahriyor Mahkamov baydarkachilar o‘rtasida 500 metr masofaga kechgan yakkalik poygalarida marrani birinchi bo‘lib zabt etib, Osiyo o‘yinlari chempioniga aylandi.
Terma jamoamizning yana bir a’zosi Arina Tanatmisheva esa kumush medalni qo‘lga kiritdi. U 500 metr masofaga kechgan yakkalik dasturida marraga ikkinchi bo‘lib yetib keldi.
Shuningdek, kanoeda eshkak eshish bo‘yicha O‘zbekiston jamoasi a’zolari Vladlen Denisov hamda Nilufar Zokirova juftligi kumush medalni qo‘lga kiritdi.
Hozirgacha o‘tkazilgan musobaqalardan so‘ng, O‘zbekiston delegatsiyasi turnir jadvalida 4-o‘ringa ko‘tarilib oldi. Jami 34 ta medal qo‘lga kiritildi: 8 ta — oltin, 17 ta — kumush, 9 ta — bronza.
Aichi-Nagoya-2026 musobaqalarida medallar jamg‘arish bo‘yicha Xitoy peshqadamlik qilmoqda, Yaponiya — ikkinchi, Janubiy Koreya — uchinchi o‘rinda.
O‘zbekiston U-23 terma jamoasining Osiyo o‘yinlari yarim finalidagi raqibi ma’lum bo‘ldi.
Chorak finalda Yaponiya terma jamoasi KXDRni 1:0 hisobida mag‘lub etib, yarim finalga yo‘l oldi.
Shu tariqa, O‘zbekiston U-23 terma jamoasi final yo‘llanmasi uchun musobaqa mezboni Yaponiyaga qarshi maydonga tushadi.
Uchrashuv 30-sentyabr kuni Toshkent vaqti bilan soat 15:30 da “Nagai” stadionida boshlanadi.
Samarqandda o‘tayotgan 46-Butunjahon shaxmat olimpiadasining 10-turi O‘zbekistonning birinchi jamoasi uchun muvaffaqiyatli yakunlandi.
Nodirbek Abdusattorov, Javohir Sindarov, Nodirbek Yoqubboyev va Muhiddin Madaminov ishtirok etgan O‘zbekiston-1 jamoasi Armanistonni mag‘lub etdi.
Abdusattorov, Sindarov va Madaminov o‘z raqiblaridan ustun keldi. Shu tariqa, O‘zbekiston-1 jamoasi 18 ochko bilan musobaqada yetakchilikni saqlab qoldi.
O‘zbekiston-2 jamoasi Hindistonga imkoniyatni boy berdi. O‘zbekiston-3 esa Isroilga qarshi keskin bahsda kichik hisobda mag‘lub bo‘ldi.
Xotin-qizlar o‘rtasidagi 10-turda O‘zbekiston-1 jamoasi Peru vakillarini yirik hisobda mag‘lub etdi.
27-sentyabr kuni Olimpiadaning so‘nggi — 11-tur bahslari o‘tkaziladi. Uning yakunlariga ko‘ra, g‘olib va sovrindor jamoalar aniqlanadi.
