Avtomobil haydovchisi boshqaruvni yo‘qotib, yo‘l chetidagi temir to‘siqqa urilgan. To‘qnashuv oqibatida avtomobilning elektr tizimida qisqa tutashuv yuzaga kelib, yong‘in sodir bo‘lgan.

Bugun, 11 iyul kuni soat 17:50 da «Qamchiq» maxsus qutqaruv boshqarmasiga dovondan o‘tgan A-373 avtomobil yo‘lining «Toshkent–Vodiy» yo‘nalishida harakatlangan «Lasetti» rusumli yengil avtomobilda yong‘in bo‘layotganligi to‘g‘risida xabar kelib tushgan.

Dastlabki ma’lumotlarga ko‘ra, avtomobil haydovchisi boshqaruvni yo‘qotib, yo‘l chetidagi temir to‘siqqa urilgan. To‘qnashuv oqibatida avtomobilning elektr tizimida qisqa tutashuv yuzaga kelib, yong‘in sodir bo‘lgan. Avtomobilda yolg‘iz bo‘lgan haydovchi darhol transport vositasidan tushib, xavfsiz joyga chiqqan.

Xabarga asosan «Qamchiq» maxsus qutqaruv boshqarmasining qutqaruv ekipajlari tezkorlik bilan yetib borib, yong‘inni to‘liq bartaraf etishgan.

Hozirda yong‘in sababi va moddiy zarar miqdori aniqlanmoqda.

Hodisa oqibatida tan jarohati olganlar yo‘q.

Source link

Raqobat qo‘mitasi 2026 yilning ikkinchi choragida dori vositalariga belgilangan cheklangan savdo ustamalarini oshirib qo‘llagan yuzlab dorixonalarni aniqladi. Tekshiruvlar natijasida 237 ta dorixona 1,9 milliard so‘m miqdorida asossiz daromad olgani ma’lum bo‘ldi.

Raqobat qo‘mitasi ma’lum qilishicha, dori vositalariga belgilangan cheklangan savdo ustamalarini buzish holatlari Soliq organlari tomonidan aniqlanib, ular haqidagi ma’lumotlar qo‘mitaning Fair Tech yagona axborot tizimiga yuborilmoqda.

2026 yilning ikkinchi choragi davomida mazkur tizim orqali kelib tushgan xabarlar asosida o‘tkazilgan o‘rganishlar natijasida 237 ta dorixonada, jumladan 33 ta ulgurji va 204 ta chakana dorixonada, jami 148 810 ta holatda qonunbuzarlik aniqlangan.

Tekshiruvlar davomida ushbu dorixonalar tomonidan 1,9 milliard so‘m miqdorida asossiz daromad olingani belgilangan.

Qo‘mita ma’lumotiga ko‘ra, qonunbuzarliklar bo‘yicha iste’molchilar foydasiga qayta hisob-kitoblar amalga oshirilib, ularning buzilgan huquqlarini tiklash choralari ko‘rilgan.

Shuningdek, Raqobat qo‘mitasi dori vositalari narxlariga oid qonunchilik talablarini buzgan dorixonalarga nisbatan choralar ko‘rish davom ettirilishini, ularning ro‘yxati esa ochiq tarzda e’lon qilib borilishini ma’lum qildi.

Source link

Qashqadaryo viloyatida ichimlik suvidan noqonuniy foydalanish bilan bog‘liq hujjatlarni sudga yubormaslikni va’da qilib, evaziga 1,2 million so‘m olgan mutaxassis tezkor tadbirda qo‘lga olindi. Holat yuzasidan jinoyat ishi qo‘zg‘atilib, tergov olib borilmoqda.

Foto: Prokuratura departamenti

Bosh prokuratura huzuridagi departamentning Qashqadaryo viloyati boshqarmasi tomonidan o‘tkazilgan tezkor tadbirda «Qashqadaryo suv ta’minoti» AJning ichimlik suvi tizimi nazorat bo‘limi mutaxassisi S.M. firibgarlikda gumonlanib ushlandi.

Tergovga qadar tekshiruv materiallariga ko‘ra, u xizmat mavqeidan foydalanib, fuqaro X.B.dan uning o‘g‘li N.B.ga nisbatan ichimlik suvidan noqonuniy foydalanganlik bo‘yicha rasmiylashtirilgan dalolatnomani sudga yubormaslik, shuningdek, qayta hisob-kitob qilib zararni bekor qilishni va’da qilgan.

Buning evaziga mutaxassis 1,2 million so‘mni o‘zining bank plastik kartasiga o‘tkazib olgan vaqtda ashyoviy dalillar bilan ushlangan.

Tezkor tadbir davomida mazkur mablag‘ protsessual tartibda qaytarilib, tegishli hujjatlar rasmiylashtirilgan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Ayni paytda tergov harakatlari davom etmoqda.

Source link

Farg‘ona viloyatining Bag‘dod tumanida ko‘mir ombori menejeri qariyb 1,7 milliard so‘mlik ko‘mirni o‘zlashtirganlikda gumonlanmoqda. Holat yuzasidan jinoyat ishi qo‘zg‘atilib, tergov harakatlari olib borilmoqda.

Bosh prokuratura huzuridagi departamentning Bag‘dod tumani bo‘limi tomonidan tadbirkorlik sub’yektlari huquqlarini himoya qilish yuzasidan o‘tkazilgan tergovga qadar tekshiruvda yirik miqdordagi talon-torojlik holati aniqlandi.

Ma’lum qilinishicha, J.K. MChJga qarashli ko‘mir ombori menejeri X.M. o‘ziga ishonib topshirilgan hamda moddiy javobgarligida bo‘lgan xorijda ishlab chiqarilgan 1 658,53 tonna ko‘mirni o‘zlashtirish yo‘li bilan talon-toroj qilgan.

Dastlabki hisob-kitoblarga ko‘ra, mazkur harakatlar oqibatida korxonaga 1,7 milliard so‘m miqdorida moddiy zarar yetkazilgan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan.

Hozirda ushbu ish bo‘yicha tergov harakatlari davom etmoqda.

Source link

O‘zbekistonda bug‘doydan bo‘shagan yer maydonlarini noqonuniy yoqish holatlari endi aerokosmik kuzatuvlar orqali aniqlanmoqda. Ekologiya va iqlim o‘zgarishi milliy qo‘mitasi ma’lum qilishicha, joriy yil boshidan buyon 172 nafar huquqbuzarga 212,5 million so‘m ma’muriy jarima qo‘llangan.

Foto: Ekologiya va iqlim o‘zgarishi milliy qo‘mitasi

Ekologiya va iqlim o‘zgarishi milliy qo‘mitasi hamda uning hududiy boshqarmalari Kosmik tadqiqotlar va texnologiyalar agentligi bilan hamkorlikda bug‘doydan bo‘shagan yerlarni yoqish bilan bog‘liq huquqbuzarliklarga qarshi kuchaytirilgan nazorat olib bormoqda.

Ma’lum qilinishicha, huquqbuzarliklar aerokosmik ma’lumotlar asosida aniqlanib, ular yuzasidan tezkor choralar ko‘rilmoqda.

Bug‘doy o‘rib olingan dalalarda yong‘inlarning oldini olish maqsadida hududiy boshqarmalar tomonidan 7 760 ta fermer xo‘jaligiga ogohlantirish xatlari tarqatilgan.

Nazorat tadbirlari davomida «O‘zbekkosmos» agentligi tomonidan kosmik suratlarni tahlil qilish orqali bug‘doydan bo‘shagan 744 ta yer maydonida yong‘in holati qayd etilgan. Har bir holat davlat ekologik inspektorlari tomonidan joyiga chiqqan holda o‘rganilgan.

Natijada 172 nafar huquqbuzarga nisbatan jami 212,5 million so‘m ma’muriy jarima qo‘llangan. Shuningdek, atrof-muhitga yetkazilgan zarar 652,3 million so‘m miqdorida baholangan.

Bundan tashqari, ang‘iz, xazon, shox-shabba va boshqa o‘simlik qoldiqlari hamda qurilish chiqindilarini yoqish bilan bog‘liq holatlar yuzasidan o‘tkazilgan nazoratlar davomida joriy yil boshidan buyon 9 821 ta huquqbuzarlik aniqlanib, tegishli tartibda ma’muriy bayonnomalar rasmiylashtirilgan.

Ekologiya va iqlim o‘zgarishi milliy qo‘mitasi fermer xo‘jaliklari va aholidan bug‘doydan bo‘shagan yer maydonlarida somonpoyalarni yoqmaslik, atrof-muhitga zarar yetkazuvchi bunday holatlarga yo‘l qo‘ymaslikni so‘radi.

Qo‘mita har qanday ekologik huquqbuzarlik uchun qonunchilikda belgilangan javobgarlik choralari qo‘llanishini eslatdi.

Source link