Guruh bosqichidagi uchta o‘yinda ham bittadan gol urgan va pley-offda Niderlandiya darvozasiga hal qiluvchi zarbani aniq yo‘llagan Ismoil Saybari turnir qahramonlaridan biriga aylandi. Endi u yangi mavsumni «Bavariya»da boshlaydi. Holbuki u 2 yoshgacha yura olmagan va shundan keyin ham maxsus bandajlar orqali harakatlangan, shifokorlar u yaxshi yurib keta olmasligi mumkinligini taxmin qilishgandi.

Bugun tunda nimchorak final doirasidagi ilk o‘yinda turnir mezbonlaridan biri Kanada himoyachilari turnir kashfiyotlaridan birini to‘xtatishi talab etiladi. U Ispaniyada tug‘ilgan, futbolchilik faoliyatini Belgiyada boshlagan, keyin esa Niderlandiya chempionatiga o‘tib, so‘nggi ikki mavsumda PSV safida porlagan, endi esa jahon chempionatida raqib himoyachilarining dahshatli tushiga aylanmoqda. Ismoil Saybari – Marokash milliy jamoasining yangi yulduzi. U yangi mavsumda gollarini Myunxenning «Bavariya» klubida ura boshlaydi.

Nemislar klubi uning transferini jahon chempionatidan oldinroq hal qilib qo‘ygandi. Agar klub otni vaqtida qamchilamaganida qimmatroq to‘lashiga (hozirda PSV bilan 55 mln yevroga kelishilgan) to‘g‘ri kelgan bo‘lardi. 

Murabbiy topilmasi

Marokashlik forvard guruh bosqichida uchta gol urdi. Braziliya, Shotlandiya va Haitiga bittadan. Uning gollaridan har birini – mini-shedevr deyish mumkin.

Braziliya bilan o‘yinda Saybari yakkama-yakka vaziyatga chiqib bordi va to‘pni Alison ustidan oshirib tashladi. Shotlandiya bilan o‘yinda – ofsayd chizig‘ida harakat qilgan holda ideal tarzda ochilib, jarima maydoniga kirishda to‘pni qabul qilib oldi va kuchli zarbasi bilan olis to‘qqizlikni aniq nishonga oldi. Ikki holatda ham Saybariga Braim Dias assistentlik qildi. Ispaniyada tug‘ilgan bu futbolchilar bir-birini juda yaxshi tushunishadi (tom ma’noda ham, futbol tili ma’nosida ham) his qilishadi. Marokash uchun kutilmaganda murakkab kechgan Haitiga qarshi o‘yinda (4:2) esa Ismoil birinchi bo‘limga qo‘shib berilgan daqiqalarda Ashrafa Hakimining qanotdan oshirgan pasini qabul qildi va to‘pni yerlatib burchakka yo‘lladi, bu holatda raqib darvozaboni joyidan qimirlashga ham ulgurmadi.

Pley-offning ilk o‘yinida ham u muntazam ravishda Niderlandiya himoyachilarini tahlika ostida ushlab turdi, uning van Hekke bilan dueli bu turnirdagi eng qizg‘in qarama-qarshiliklardan biriga aylandi (to‘qnashuvlardan birida futbolchining qoshi ham yorildi), yakunda esa penaltilar seriyasida aynan Saybari so‘nggi zarbani aniq yo‘llab, jamoasini keyingi bosqichga olib chiqdi.

Holbuki ushbu 25 yoshli futbolchi faoliyatini markaziy hujumchi sifatida boshlamagan va yaqingacha hujumkor yarimhimoyachi yoki chap qanot vingeri ampluasida o‘ynagan. Faqat shu yil bahorida Marokash bosh murabbiyi etib tayinlangan Muhammad Vahbiy Ismoilni u hali hech qachon o‘ynamagan pozitsiyaga joylashtirdi.

Bu qaror jamoaning yangilangan dinamik o‘yin uslubiga Afrika kubogida asosiy hujumchi bo‘lgan va asosan bosh bilan gol urishga ixtisoslashgan Yusuf An-Nosiriydan ko‘ra jismoniy kuch va tezlikni o‘zida mujassamlashtirgan Saybarining xususiyatlari ko‘proq mos kelishi bilan izohlanadi. Ismoil – butunlay boshqa plandagi, ko‘p funksiyali universal futbolchidir. U maydon bo‘ylab a’lo darajada harakatlanadi, uzoq masofadan aniq va kuchli zarba bera oladi, driblingi ham yomon emas va gol sezish qobiliyatiga ega. Mohiyatan, hozirgi sxemada Saybari hujum nayzasining uchi emas, balki «aldamchi to‘qqizlik» hisoblanadi.

Saybari 2026 yil yanvarida Afrika kubogi finalida Senegalga qarshi o‘yinda

Foto: Youssef Loulidi/AP Photo/TASS

Shon-shuhrat tomon og‘ir yo‘l

Braimdan farqli o‘laroq, Saybari – ispan futboli mahsuloti emas. Kataloniyada muhojirlar oilasida tug‘ilgan bo‘lsa-da, u 6 yoshligida oilasi bilan Belgiyaga ko‘chib o‘tadi va u yerda bir necha klublar, jumladan, «Anderleht» klubi akademiyasida tarbiyalanadi. Lekin aynan shu klub akademiyasida uni chetlatishadi va bu yosh futbolchini futbol va mashg‘ulotlarni o‘zgartirishga undaydi. Saybari kasbiga jiddiy qaraydi, ammo bir muammodan hech qutula olmaydi. Bir safar jamoa yig‘ilishiga navbatdagi marta kechikkanidan keyin PSV bosh murabbiyi Peter Bosning sabr kosasi to‘ladi va u futbolchini mehmonxonada qoldirib, Chempionlar ligasida «Arsenal»ga qarshi kechadigan o‘yin qaydnomasidan chiqarib tashlaydi.

Ushbu voqea futbolchi uchun saboq edi va shundan keyin Bos Saybarini faqat maqtaydi. Shu bilan birga, Ismoil o‘ta odamshinavanda ekani va mashg‘ulotlardan keyin dam olish o‘rniga do‘stlarini ko‘rishga yoki ularga yordam berishga borishni kanda qilmasligini qistirib o‘tadi. O‘z navbatida, tungi klublar va ziyofatlar – uning joyi emas. Saybari bu darajaga katta qiyinchiliklar bilan yetib kelgani uchun hozirgi holatini qadrlaydi. U faqat 2 yoshida yura boshlagan va unga maxsus bandajlar taqib qo‘yishgan, chunki oyoq kaftlari ichkariga qattiq buralgan edi. Shifokorlar hatto u kelgusida normal yura olmasligi mumkinligini taxmin qilishgandi. 14 yoshida esa – organizmning o‘ziga xosligi tufayli – ortiqcha vazn muammosi paydo bo‘ladi va aynan shu tufayli unga «Anderleht»da javob berib yuborishadi.

Ammo u barchasini yengib o‘tdi, nom qozondi va maqsadiga erishdi. Ismoil uch mamlakat pasportiga ega, shu tufayli u Belgiya milliy jamoasida ham o‘ynashi mumkin edi. O‘z vaqtida Roberto Martines futbolchini mamlakat bosh jamoasiga taklif qilgandi, ammo u bu taklifdan hayratdaligini yashirmaydi, ammo allaqachon o‘z tarixiy vatani – Marokash foydasiga tanlov qilib bo‘lganini aytadi.

«Milliy jamoani tanlaganingizda, bu yurakdan chiqishi kerak. Bu qayerda ko‘proq imkoniyatingiz bo‘lishi haqidagi strategik qaror bo‘lmasligi kerak», – deydi bu haqda Saybari.

Ikkinchi Runi 

Martines bilan o‘sha muloqot 2022 yilda bo‘lib o‘tgan, bir yildan keyin Saybari «Atlas sherlari» bilan U23 toifasida Afrika kubogida g‘olib chiqqan. Jamoa o‘shanda Parij olimpiadasiga yo‘llanma oladi va yakunda olimpiada bronza medallarini qo‘lga kiritadi, ammo Ismoilning kolleksiyasida bu bronza yo‘q, chunki o‘shanda PSV uni asrash uchun turnirga jo‘natmagandi.

Foto: Getty Images

Va bu qaror yakunda o‘zini oqladi va keyingi mavsum Ismoilning faoliyatida ko‘tarilish pallasiga aylandi. 2024/2025 yillar mavsumini u ajoyib o‘tkazdi va Erediviziyada 29 o‘yinda gol+pas tizimida 11+11 ko‘rsatkichini qayd etdi. U Niderlandiya chempionatining o‘tgan mavsumida natijasini yanada yaxshiladi: 27 o‘yinda gol+pas bo‘yicha 15+8 ko‘rsatkichini qayd etib, PSV qatorasiga uchinchi bor chempionlikni qo‘lga kiritishida katta hissa qo‘shdi va turnirning eng yaxshi futbolchisi deb topildi.

Ismoilning o‘zi izohlashicha, sermahsulligiga psixologiyadagi o‘zgarish ta’sir ko‘rsatgan: «Ilgari men xato zarba bermasligim kerakligi haqida o‘ylardim, endi esa men gol uraman, deyman!»

Saybari Chempionlar ligasida ham o‘zini ko‘rsatdi: u «Liverpul», «Yuventus», «Napoli» va bo‘lajak jamoasi «Bavariya» kabi jamoalar darvozasini ishg‘ol etgan.

«Chempionat» kolumnisti Dmitriy Bajanov uni ingliz futboli afsonasi Ueyn Runiga qiyoslaydi:

Saybari ajoyib zarba kuchi bilan ajralib turadi. Uning ajoyib zarbasi bor va u istalgan paytda bu kuchni ishlatishga tayyor. Shu ma’noda, Ismoilning o‘yin uslubi «Manchester Yunayted»ning dastlabki mavsumlaridagi – hali 8-raqam ostida o‘ynagan paytlaridagi Ueyn Runini eslatadi. Bu futboldagi o‘ziga xos testosteron edi: Runi hujumda istalgan pozitsiyada turib, darvozaga shunday zarba bera olardiki, darvozabonning g‘amgin qiyofada to‘pni to‘rdan olib chiqishdan boshqa iloji qolmasdi.

Yillar o‘tib Ueyn ancha mulohazali va universal futbolchiga aylandi, ko‘proq pleymeyker, ba’zan esa hatto rejist rolini o‘ynashga o‘tdi. Vaqt o‘tishi bilan Saybarida ham shunga o‘xshash o‘zgarish yuz berishi mumkin. Ammo hozircha Ismoil darvozabonni har qanday pozitsiyadan va har qanday masofadan dog‘da qoldirish qobiliyati bilan aynan yosh Runini eslatadi. Ular tana tuzilishi jihatidan har xil (Runi pastroq va to‘laroq, Saybari baland bo‘yli va salobatli), ammo mohiyatan o‘xshash.

«Bavariya»dagi istiqbol

O‘tgan mavsum davomida PSV bosh murabbiyi Peter Bosdan Saybarining kelajagi haqida so‘rashganida, u o‘z shogirdi jismoniy jihatdan APL darajasiga yetilgani va unda Angliyada bu borada hech qanday muammo tug‘ilmasligini aytgandi. Lekin futbolchi hozircha Germaniya chempionatiga, «Bavariya» safiga o‘tdi, nemislar klubi uni hozirgi bozor o‘lchovlarida ancha kamtarona bo‘lgan 55 million yevroga transfer qildi va u bilan 2031 yilga qadar amal qiladigan shartnoma tuzdi.

Erediviziyada porlagan hujumkor futbolchilarning barchasi ham kuchliroq ligalarda o‘sha darajani saqlab qola olmagan. Shu jihatdan, Saybarining «Bavariya»da qanday o‘ynab ketishini kuzatish qiziq. Bir tomondan, u tinimsiz gol uradigan hujumkor va liga gegemoni bo‘lgan jamoa safida o‘ynaydi. O‘tgan mavsumda Vensan Kompani boshqaruvidagi «Bavariya» futbolchilari Bundesliganing 34 turida naq 122 gol urishgan. Bu esa mutlaq rekord hisoblanadi. XXI asrda top-5 ligalardagi biror jamoa milliy chempionatda bu qadar ko‘p gol urmagan.

Bunday jamoada o‘ynaganda, yetarlicha gol urish kafolatlangan bo‘ladi. Boshqa tomondan, «Bavariya» hujum chizig‘ida kuchli raqobat mavjud. Markaziy hujumda Harri Keyn o‘rnini hech kimga bermaydi. Qanotlardagi Luis Dias va Maykl Olise ham. Olise atrofida Madridga ketishi mumkinligi haqida turlicha mish-mishlar yuribdi. Ammo «Bavariya» fransuz futbolchisi bilan xayrlashmoqchi emas. 

Shunday ekan, Saybari uchun faqat hujumchi ortidagi pozitsiya qolmoqda. Katta ehtimol bilan, unda asosiy tarkibga kirish uchun aynan shu pozitsiyada imkon bo‘ladi. Bu pozitsiya bo‘yicha raqobatchi Jamol Musiala oxirgi vaqtlarda ko‘p jarohat olmoqda, u oldingi formasiga qayta olmayapti va jahon chempionatida ham o‘zini ko‘rsata olmadi.

Serj Gnabri ham bor, ammo unda ham so‘nggi mavsumlarda jarohatlar ko‘payib ketdi. Shuningdek, o‘tgan mavsumda klubning 18 yoshli tarbiyalanuvchisi Lennart Karl porlagandi. Ammo u qanchalik barqaror o‘ynashi hozircha aniq emas. Qolaversa, Karl nafaqat hujumchi ortida, balki o‘ng qanotda ham o‘ynay oladi. Nazariy jihatdan, Saybari va Karl bir vaqtda maydonda bo‘lishi mumkin.

«Bavariya» rahbariyati xarajatlarga jiddiy qaraydi. 55 mln yevro – baribir jiddiy mablag‘. Myunxenliklar Saybari uchun shuncha pul sarfladimi, demak undan qanday foydalanishni bilishadi. Marokashlikdagi universalizm murabbiy uchun ham qo‘l keladi. U «o‘nlik» sifatida tushishi ham, qanotlarda harakat qilishi ham mumkin. O‘rni kelganda Keynning ham o‘rnini egallay oladi.

U qayerda o‘ynashini muxlislar keyingi mavsumda ko‘rishadi. Hozircha esa Ismoil jahon chempionatida hal qiluvchi o‘yin ostonasida. Uning o‘zi uchun ham hozir birinchi galdagi maqsad – Marokash bilan turnir mezbonlari Kanadani mag‘lub etib, pley-offdagi yurishini davom ettirish hisoblanadi.

Source link

Nimchorak final juftliklari ma’lum.

Jahon chempionatida 1/16 final bosqichi yakunlandi. Bosqichning oxirgi kunida Argentina Kabo-Verdeni qiyinchilik bilan mag‘lub etdi (3:2), Kolumbiya Gana masalasini hal qildi (1:0), Misr Avstraliyani penaltilar seriyasida mag‘lubiyatga uchratdi (1:1, pen. — 4:2).

Kabo-Verde jahon chempionlarini qiynadi

Argentina – Kabo-Verde 2:1

Gollar: Messi, 29 (1:0). D. Duarte, 59 (1:1). L. Martines, 92 (2:1). Lopesh Kabral, 103 (2:2). Diney Borjyes, 111 – avtogol (3:2)

Argentina: E. Martines, L. Martines, Romero, Medina (Talyafiko, 85), Molina (Montiel, 104), Makallister, Fernandes, Almada (Alvares, 63), de Paul (Paredes, 84), Messi, L. Martines (Gonsales, 63)

Kabo-Verde: Vozinya, Diney Borjyes, Lopesh, Lopesh Kabral, Moreyra, Lenini (Ya. Semedu, 100), D. Duarte (Benshimol, 100), L. Duarte (Monteyru, 67), Kabral (Varela, 80), Mendesh da Grasa (V. Semedu, 80), Da Koshta (Livramento, 67)

Ogohlantirishlar: Montiel, 115 – Lenini, 68

Argentina jahon chempionati g‘olibligi uchun asosiy da’vogarlardan biri. Qatardagi turnir chempionlari guruh bosqichida yorqin hujumkor o‘yin ko‘rsatdi, jamoa yetakchisi Lionel Messi hamon yuqori sport formasida ekanini namoyish etib, uchta o‘yinda oltita gol urdi. Jamoa pley-offda uzoqqa borishiga deyarli hech kimda shubha yo‘q edi. Ammo 1/16 finaldayoq janubiy amerikaliklar katta qiyinchilikka uchradi.

Holbuki Argentina ilk daqiqalardan tashabbusni qo‘lga olgan va kuling brekdan keyin hisobni ochgandi. Bu safar ham Messi aniq harakat qildi: u Lisandro Martinesning uzatmasiga ochilib, jarima maydonida to‘pni bir harakat bilan o‘ziga bo‘ysundirdi va ikkinchi teginishda to‘pni yaqin burchakka joylashtirdi. Bu ushbu hujumchining jahon chempionatlaridagi 20-goliga aylandi.

Shundan keyin «Albiseleste» hisobni yirik ko‘rinishga keltirishiga tayyorlana boshladi. Ammo Kabo-Verde kurash taklif qildi. 59-daqiqadagi hujumni Deroya Duarte gol bilan yakunladi – 1:1.

Argentinaliklar bosimni oshirishdi va ketma-ket xavfli vaziyatlar yaratishdi, ammo Vozinyani dog‘da qoldira olishmadi. Turnirda muxlislarning sevimli futbolchisiga aylangan ushbu darvozabon sakkiz bor seyv ijro etdi, jumladan, Messining yakkama-yakka vaziyatda bergan zarbasini, shuningdek, ikki bor ayyorona tarzda yo‘llangan jarima zarbalarini ham qaytardi.

«Akulalar» o‘yinni overtaymlarga olib o‘tishdi va qo‘shimcha bo‘limlarda muxlislar haqiqiy trillerga guvoh bo‘lishdi – yana uchta gol urildi. Kabo-Verde birinchi qo‘shimcha bo‘lim startidayoq Martinesdan gol o‘tkazib yuborishdi, ammo 103-daqiqada javob qaytara olishdi: Sidni Lopesh Kabral chap qanotdan jarima maydoniga yaqinlashib, aylanma zarba berdi va olis to‘qqizlikni aniq nishonga oldi.

Shundan keyin Messi yana tashabbusni o‘z qo‘liga olishiga to‘g‘ri keldi. Dastlab uning jarima maydoni markazidan yo‘llagan zarbasini yana Vozinya qaytarib qoldi. Ikkinchi overtaym boshlanganida esa u burchak zarbasidan to‘pni Kristian Romeroning boshiga aniq yetkazib berdi, uning zarbasidan keyin to‘p himoyachiga tekkan holda darvoza to‘riga borib tushdi – 3:2. O‘yinning oxirgi qismini kaboverdiliklar to‘liq hujumda o‘tkazishdi va ikkita qulay imkoniyatga ega bo‘lishdi, ammo Emiliano Martines o‘zini ko‘rsatdi. Argentina qiyinchilik bilan bo‘lsa-da, yurishini davom ettiradigan bo‘ldi va 1/8 finalda Misr bilan o‘ynaydigan bo‘ldi. Turnir davomida o‘yinning asosiy vaqtida biror marta yutqazmagan Kabo-Verde futbolchilari esa boshini tik ko‘targan holda turnirni tark etdi.

Kolumbiya Gana to‘sig‘idan o‘tdi

Kolumbiya – Gana 1:0

Gol: Arias, 14 (1:0)

Kolumbiya: Vargas, Lukumi, Sanches, Moxika, Munos, Lerma, Arias (Kintero, 73), Puerta, Dias (Kampas, 90), Xames Rodriges (Rios, 46), Kordoba (Suares, 8)

Gana: Ati-Ziji, Opoku, Lyukkassen, Mensa, Senayya (Seydu, 13), Parti, Yirenkiy (Nuama, 79), Sibo (Ovusu, 62), Semenyo, Inyaki Uilyams (Fatavu, 62), Ayyu (Adu, 79)

Ogohlantirishlar: Arias, 12. Rios, 78 – Yirenkiy, 49. Fatavu, 66. Seydu, 76

Kolumbiyaliklar bu o‘yinga yaqqol favorit sifatida yetib kelgandi. Va ilk daqiqalardanoq bu chempionatda yana bir sensatsiya ishtirokchisi bo‘lmoqchi emasligini ko‘rsatishga kirishdi.

Janubiy amerikaliklar darhol to‘pga egalik qilishdi va raqibga amalda hech qanday imkon qoldirishmadi. Lekin o‘yin startidayoq jamoa uchun yoqimsiz holat ro‘y berdi. «Krasnodar» futbolchisi Jon Kordoba 7-daqiqadayoq jiddiy jarohat olib, maydonni tark etdi. Kolumbiyaliklar ustozi Nestor Lorenso kutilmaganda asosiy forvardni o‘zgartirishga majbur bo‘ldi va Luis Haviyer Suaresni jangga tashladi.

Kutilmagan o‘zgarish o‘yin tempiga ta’sir ko‘rsatmadi va tezkor gol o‘zini ko‘p kuttirmadi. 14-daqiqada aynan Suares raqib qo‘ygan «avtobus»ni yorib o‘tdi – uning uzatmasidan keyin to‘p olis ustun oldida bo‘sh turgan Jon Ariasga yetib bordi. Ushbu vinger bir teginishda to‘pni narigi burchak tomon yo‘llab, darvozabonni dog‘da qoldirdi.

Ganaliklar faqat bo‘lim oxirlariga kelib o‘yinni jarima maydoni atrofidan uzoqlashtirishga muvaffaq bo‘ldi, ammo chinakamiga xavfli vaziyatlar yarata olishmadi – afrikaliklar butun o‘yin davomida biror marta raqib darvozasi sohasiga to‘g‘ri borgan zarba yo‘llashmadi.

Tanaffusdan keyin kolumbiyaliklar ustunlik qilishda davom etishdi va bir necha bor ikkinchi golga yaqin kelishdi. Disa darvozani ishg‘ol etdi ham, ammo hakam ofsayd holati tufayli golni inobatga olmadi. Yakunda – minimal, ammo ishonchli g‘alaba saqlab qolindi. Pley-offning keyingi bosqichida janubiy amerikaliklarni Shveytsariyaga qarshi o‘yin kutmoqda.

Misrning tarixiy natijasi

Avstraliya – Misr 1:1 (penaltilar seriyasida 2:4)

Gollar: Ashur, 13 (0:1). Hani, 55 – avtogol (1:1)

Penaltilar seriyasi: Suttar – (0:0)(xato). Sobir – (0:1). Irvayn – (1:1). Robiya – (1:2). Mabil – (2:2). Saloh – (2:3). Herrington – (2:3)(ustun). Abdulmajid – (2:4)

Avstraliya: Bich (Rayan, 119), Suttar, Herrington, Chirkati, O`Nill (Okon-Engstler, 91), Irvayn, Behich, Bos (Truin, 46), Metkalf (Mabil, 91), Volpato (Xrustich, 74), Irankunda (Ture, 74)

Misr: Shubayr, Yosir Ibrohim, Robiya, Hofiz (Trezege, 80), Hani, Fati (Abdulmajid, 67), Ateya (Sobir, 120+1), Marmush (Abdulkarim, 106), Ashur, Saloh, Ziko (Hasan, 67)

Ogohlantirishlar: Hasan, 104. Yosir Ibrohim, 120

Avstraliya va Misr juftligi 1/16 final bosqichidagi eng «zerikarli» juftliklardan biri sifatida ko‘rilayotgandi. Sababi oddiy – ikki jamoa ham guruh bosqichida yorqin o‘yinlar ko‘rsata olmagan va faqat nisbatan kuchsiz guruhlarda ishtirok etishgani uchun pley-offga chiqishgandi. Shu bilan birga, «sokkeruz» mustahkam himoyaga egaligini namoyish etib, guruh bosqichida ikki o‘yinda darvozasi daxlsizligini saqlab qolgandi.

Lekin «firavnlar»ga qarshi o‘yinda avstraliyaliklar himoyasi uzoq dosh bera olmadi – 13-daqiqadayoq Imom Ashur Karim Hofizning uzatmasini golga aylantirdi. Shundan keyin o‘yin kutilgan ssenariy bo‘yicha kechdi va misrliklar hisobga qarab o‘ynashdi. Ammo ikkinchi bo‘lim boshida avstraliyaliklar hisobni tenglashtirishdi. Misrliklar himoyachisi Muhammad Hani avtogol muallifiga aylandi. Ushbu himoyachi shu turnirning o‘zida ikkinchi bor o‘z jamoasi darvozasini ishg‘ol etib qo‘ydi va JCh tarixida bunday natija qayd etgan ikkinchi futbolchiga aylandi – birinchisi 1966 yilda bolgariyalik Ivan Vutsov bo‘lgandi.

Hisob tenglashganidan keyin o‘yin yana sokinlashdi. Jamoalar vaqti-vaqti bilan oldinga o‘tishdi, ammo yaqqol vaziyatlar yuzaga kelmadi – qo‘shimcha bo‘limlar ham shu ruhda o‘tdi va o‘yin taqdiri penaltilar seriyasida hal etiladigan bo‘ldi. Futbol lotereyasida esa misrliklarga omad kulib boqdi – jamoa asosiy yulduzi Muhammad Saloh esa «panenka» zarbasi ijro etdi. «Firavnlar» tarixiy natijaga erishdi – jamoa o‘z tarixida ilk bor jahon chempionati 1/8 finalida o‘ynaydi.

Nimchorak final juftliklari

Navbatdagi o‘yinlar

Oldinda muxlislarni 1/8 final bosqichi kutmoqda — 4 iyul kuni kechqurun va 5 iyulga o‘tar kechasi quyidagi uchrashuvlar bo‘lib o‘tadi:

22.00. Kanada — Marokash

02.00. Paragvay — Fransiya

Source link

Germaniya milliy terma jamoasining sobiq bosh murabbiyi Yulian Nagelsman iste’foga chiqqanidan so‘ng, taniqli mutaxassis Yurgen Klopp mamlakat terma jamoasini boshqarish imkoniyatini ko‘rib chiqishga tayyor ekanini ma’lum qildi. Uning ta’kidlashicha, Germaniya futboli tub o‘zgarishlar arafasida turibdi va yig‘ilib qolgan muammolarni hal etish uchun jiddiy islohotlar zarur.

Yurgen Klopp bu haqda 3 iyul kuni MagentaTV telekanali efirida so‘zlagan.

Bungacha Germaniya terma jamoasi 2026 yilgi jahon chempionatida 1/16 final bosqichida musobaqani tark etganidan keyin bosh murabbiy Yulian Nagelsman lavozimidan ketgan edi. Shundan so‘ng Germaniya futbol ittifoqi (DFB) Klopp bilan muzokaralar o‘tkazish niyatida ekanini ma’lum qildi.

Yurgen Klopp 2024 yil o‘rtasida o‘z xohishiga ko‘ra Angliyaning «Liverpul» klubini tark etganidan beri murabbiylik faoliyati bilan shug‘ullanmagan. 2025 yil yanvaridan buyon u Red Bull kompaniyasining global futbol yo‘nalishi rahbari sifatida ishlab kelmoqda.

«Mening Red Bull bilan amaldagi shartnomam bor va men har doim shartnoma bo‘yicha zimmamdagi majburiyatlarga amal qilishga odatlanganman. Biroq muzokaralar o‘tkazishga qiziqishim bor», — dedi Klopp.

Uning fikricha, Germaniya futboli hozir hal qiluvchi bosqichga kirgan va mavjud muammolar Yulian Nagelsman shaxsi bilan bog‘liq emas. Kloppning ta’kidlashicha, vaziyatni yaxshilash uchun futbol tizimida ko‘plab asosiy o‘zgarishlarni amalga oshirish lozim.

59 yoshli murabbiy faoliyati davomida Germaniyaning «Borussiya Dortmund» hamda Angliyaning «Liverpul» klublari bilan mamlakat chempionligi va boshqa milliy sovrinlarni qo‘lga kiritgan. Shuningdek, u «Liverpul» bilan UEFA Chempionlar ligasi hamda FIFA klublar o‘rtasidagi jahon chempionati g‘olibi bo‘lgan.

Yulian Nagelsman Germaniya terma jamoasini 2023 yildan boshqarib kelgan. Uning rahbarligida jamoa Yevro-2024 musobaqasida chorak finalgacha yetib borgan va keyinchalik chempion bo‘lgan Ispaniyaga mag‘lub bo‘lgan edi.

Biroq 2026 yilgi jahon chempionati Germaniya uchun omadsiz kechdi. Terma jamoa 29 iyun kuni Paragvayga qarshi 1/16 final uchrashuvida asosiy va qo‘shimcha vaqtda 1:1 hisobini qayd etgach, penaltilar seriyasida 3:4 hisobida mag‘lub bo‘lib, musobaqa bilan xayrlashdi.

Source link

O‘zbekiston milliy jamoasi ilk mundialdagi ishtirokini yakunlab qaytdi.

3 ta mag‘lubiyat va 11 ta o‘tkazib yuborilgan golga qaramay ishtirokimizni ijobiiy deyish mumkinmi?

Tarkibida Ronaldo bor Portugaliyaga qarshi o‘yindan jamoa qanday xulosa chiqardi?

Ilk jahon chempionatidagi “natija” uchun asosiy sababchi kim(lar)?

Kun.uz’ning sport jurnalisti Yaxyoxo‘ja Ulug‘xo‘jayev jamoa yetakchilaridan biri Rustam Ashurmatovdan mundial haqidagi eng ko‘p berilayotgan savollarga javob oldi.

PS: Tez orada suhbatning to‘liq matni saytga joylashtiriladi.

Source link

Bu rekord 60 yildan ortiq vaqtdan buyon saqlanib turibdi. Jyust Fonten 1958 yilgi mundialda 13 ta gol urgandi. Va buni boshqaning butsalarida amalga oshirgan.

Lionel Messi bu safargi jahon chempionatini shunday boshladiki, barcha uning yoshini unutib yubordi. Uchta o‘yinda olti gol – salmoqli ko‘rsatkich. Parallel ravishda Messi jahon chempionatlarida urgan jami gollari soni bo‘yicha Miroslav Klozeni ortda qoldirdi. Leoning gollari soni 19 taga yetdi, germaniyalik futbolchida 16 ta gol bor edi. Boshqa tomondan, bu turnirda Messiga Kilian Mbappe ham yaqinlashib oldi (18). Ammo abadiydek ko‘rinadigan yana bir rekord bor. U olis 1958 yildan buyon saqlanib turibdi. O‘shanda fransuzlar jamoasi hujumchisi Jyust Fonten bitta jahon chempionatida 13 ta gol urgandi. «Chempionat» o‘z materialida ushbu rekord tarixini esga oldi va Messining bu rekordni yangilash imkoniyatlarini baholadi.

Fonten rekordni begona butsalarda urgan. 1958 yilgi turnirdan oldin u Fransiya termasining asosiy futbolchisi emasdi

1958 yilgi jahon chempionati to‘rt yil oldingi turnir kabi gollarga boy kechmagandi. Shveytsariyadagi mundialni esa jamoalar o‘ta sermahsul o‘tkazishgandi – bir o‘yinda o‘rtacha 5,38 tadan gol urilgan. Shvetsiyadagi jahon chempionatida esa bu ko‘rsatkich ancha pastroq bo‘ladi – bir o‘yinga o‘rtacha 3,6 tadan gol to‘g‘ri keladi. Ammo aynan shu turnirda qariyb 70 yil mobaynida saqlanib qolayotgan rekord o‘rnatilgandi.

Fonten 1958 yilgi jahon chempionatigacha Fransiya milliy jamoasining asosiy futbolchisi hisoblanmasdi. Jyust faqat Rene Bliyarning jarohati tufayli boshlang‘ich tarkibda o‘ynash imkoniyatini qo‘lga kiritadi. «1957 yil dekabrida tizzam operatsiya qilingandi. 1958 yil 15 fevralida esa men maydonda edim. Iyun oyiga yaxshi formada yetib borish uchun qo‘limdan kelganini qildim. Isodek suv ustida yurdim desam ham bo‘ladi», – degandi keyinroq Fonten.

Jamoadoshlari Jyustni olqishlashmoqda

Foto: Keystone-France/Getty Images

Fonten Skandinaviyaga faqat bir juft butsa olib keladi. U shunchaki maydonga tushishiga to‘g‘ri kelishini o‘ylamagandi. Fransiya milliy jamoasi murabbiylar shtabi jarohatlar tufayli uni tarkibga qo‘shgandi. Ammo Fontenning xursandchiligi o‘rnini tezda xafagarchilik egallaydi – o‘yindan oldingi oxirgi mashg‘ulot chog‘ida uning butsasi yirtilib ketadi.

«Men tamom bo‘ldim. Imkoniyatni qo‘ldan boy berdim, deb o‘ylardim», – deya xotirlaydi Jyust. Uning baxtiga Fransiya milliy jamoasi safida oyoq o‘lchami unikiga to‘g‘ri keladigan bir futbolchi topiladi. Stefan Bryui boshlang‘ich tarkib uchun raqobatchisi bo‘lganiga qaramay, butsalarini Jyustga berib turadi. Oyoq kiyimini almashtirish esa Fontenning o‘yinini ochib yuboradi.

Fransuz futbolchisi dastlab Paragvay darvozasiga het-trik qayd etadi, Yugoslaviya darvozabonini ikki bor ranjitadi hamda Shotlandiya darvozasini ham bir bor ishg‘ol etadi. Guruh bosqichining uchta o‘yinida – 6 gol. Chorakfinalda Jyust dubl rasmiylashtiradi, yarimfinalda bitta gol bilan cheklanadi, bronza uchun kechgan bahsda esa raqib darvozasini naq 4 bor ishg‘ol etadi. Turnir davomida fransuzlarning barcha raqiblari undan gol o‘tkazishgandi.

Fontenning 13 golidan birortasi penaltidan urilmagandi.
Fransuz bitta gol uchun o‘rtacha 42 daqiqa sarflaydi.
1958 yilda FIFA hali JCh yakunlari bo‘yicha «Oltin butsa» topshirishni yo‘lga qo‘ymagandi. Ammo Shvetsiyadagi gazetalardan biri Fontenni turnirning eng yaxshi to‘purari bo‘lgani munosabati uchun noyob ov quroli bilan taqdirlagandi.
1958 yilgi jahon chempionati – Jyustning karerasidagi yagona mundial bo‘lib qoladi. U jarohatlar tufayli 28 yoshdayoq futbolchilik faoliyatini yakunlashga majbur bo‘lgan.

1950-yillarda nega buncha ko‘p gol urishgan?

E’tiborga olish kerakki, 1958 yilda futbol hozirgidan mutlaqo boshqacha edi. O‘shanda ko‘p jamoalar bugungi kun uchun tasavvur ham qilib bo‘lmaydigan 3-2-2-3 taktik sxemasidan foydalangan. Bu o‘sha davr uchun inqilobiy sxema edi, ammo bunday sxemada himoya va yarimhimoya chizig‘i o‘rtasida katta bo‘shliq qoldirilgan. Bunday sxemada raqib hujumlarini birinchi bo‘lib qarshi olishi kerak bo‘lgan yaqqol tayanch yarimhimoyachisi bo‘lmagan. O‘shanda «oltilik» tushunchasi mavjud emasdi.

O‘yinlar nisbatan ochiq va xaotik kechar, ikki tomon ham muntazam ravishda hujum uyushtirardi. Shu tufayli Fonten oldingi chiziqda bugungi kundagi hujumchilar faqat orzu qilishi mumkin bo‘lgan erkinlikka ega edi. Qoidaga ko‘ra, 1958 yilda himoyachilar personal harakatlanishgan. Yaxshi hujumchi maydon bo‘ylab aqlli harakatlanish orqali ta’qibchisini osonlik bilan ortda qoldirishi mumkin edi.

Jyust Fonten 1958 yilgi turnirdagi o‘yinlardan birida

Foto: DB/Getty Images

Boshqa tomondan, 1958 yildagi sharoitlar yuqori darajadagi jismoniy tayyorgarlikni talab etardi. Fonten uch haftada beshta o‘yin o‘tkazadi, holbuki o‘sha vaqtlarda almashtirish qilishga ruxsat berilmagandi. Agar o‘yinni boshlang‘ich tarkibda boshlagan bo‘lsang, hakamning so‘nggi hushtagi chalinguniga qadar o‘ynash kerak bo‘lardi. Albatta, agar oyoqda turib bera olsang. Jyustning eng kuchli o‘yini Fransiya uchun so‘nggi o‘yinda bo‘ladi. Bu o‘yin uning organizmi uchun jiddiy sinov bo‘lishi kerak edi. Ammo jismoniy tayyorgarlik borasida unda hammasi joyida ekani ma’lum bo‘ladi.

Fontenning rekordini o‘sha davrning statistik yodgorligi deb ham atashadi. Ko‘pchilik bu rekordni hech qachon yangilab bo‘lmaydi, deb hisoblaydi. Chunki zamonaviy futbol butunlay o‘zgarib ketgan. Ayrim jamoalar raqib hujumchilariga harakatlanish uchun hududlar qoldirmasdan, chuqur himoyalanishadi. Qolaversa, besh nafargacha futbolchi almashtirish mumkin bo‘lgan zamonda qaysidir hujumkor futbolchi turnirni xuddi Fonten kabi boshdan oxirigacha to‘liq maydonda o‘tkazishini tasavvur qilib bo‘lmaydi.

Fonten o‘z rekordi haqida nimalar degan?

Jyust 2023 yilda olamdan o‘tgandi. Albatta, undan bir necha bor kimdir uning natijasini ortda qoldira oladimi, deb so‘rashgan. FIFA rasmiy saytiga bergan intervyusida Fonten bunga o‘ziga xos yumor bilan javob qaytargan:

«Kunlarning birida misrshunoslar zarar yetmagan mumiyoga duch kelishadi. Ular bog‘lamlar ostida qandaydir harakatni ko‘rishadi. Uni yechishadi va u so‘raydi: «Kechirasiz, bitta jahon chempionatida gol urish bo‘yicha rekord hali ham Jyust Fontenga tegishlimi?» Kimdir rekordni yangilaydimi, yo‘qmi, bilmayman. Men bashoratchi emasman. Lekin rekord saqlanib qolsa, yomon bo‘lmasdi».

2014 yilda Jyust Fontenga FIFA kongressi oldidan maxsus «Platina butsa» topshirilgandi

Foto: Alexandre Schneider/Getty Images

Shu bilan birga, u boshqa bir intervyusida aniq qilib gapirgan: u kimdir bu natijani yaxshilay olishiga ishonmasligini aytgan. Qolaversa, Fonten 1958 yilda ham gol urish oson bo‘lmaganini qayd etgan. «Jahon chempionatida gol urish oson emasdi. To‘pning holati, uzoq safarlar, murabbiylar shtabi professional emasligi barchasini bugungidan ko‘ra qiyinroq qilgan. Yetmaganiga men begona butsalarda o‘ynaganman. Va eng asosiysi: mening davrim bilan solishtirganda, hozir hakamlar hujumchilarni ko‘proq himoya qiladi. 13 gol – ulkan natija. Kimdir mening rekordimni yo‘qqa chiqara oladi, deb o‘ylamayman».

Jyustning rekordini yangilashga kimlar yaqin kelgandi?

Fontenga qadar bir jahon chempionatida ko‘p gol urish bo‘yicha eng yaxshi natija vengriyalik Shandor Kochish tomonidan o‘rnatilgandi. U 1954 yilgi turnirda 11 ta gol urgan. Jyustdan keyin hech kim bitta jahon chempionatida 10 tadan ortiq gol urmaydi.

1966 yilda portugaliyalik Eysebio 9 gol, 1970 yilda germaniyalik Gerd Myuller 10 ta gol urgan holda unga eng yaqin kelgandi. 1978 yildan 1998 yilgacha bo‘lgan davrda jahon chempionatlarida eng yaxshi to‘purarlar oltitadan ortiq gol urishmagan. 2002 yilda braziliyalik Ronaldo nafaqat g‘alati soch turmagi bilan, balki sakkizta gol urishi bilan ham yodda qolgandi. 2022 yilda fransiyalik Kilian Mbappe finaldagi het-trigi evaziga uning natijasini takrorlaydi.

Kilian Mbappe 2022 yilgi finalda Argentina darvozasiga urgan golini nishonlamoqda

Foto: Dmitriy Golubovich, «Chempionat»

Shunday bo‘lib chiqmoqdaki, Fontenning natijasiga eng yaqin kelgan futbolchi Myuller bo‘lgandi. Ushbu germaniyalik hujumchi 1970 yilgi turnirning guruh bosqichida juda kuchli o‘yin ko‘rsatib, uchta o‘yinda yetti gol urishga erishadi. Chorakfinalda o‘z hisobiga bitta, yarimfinalda ikkita gol qo‘shib qo‘yadi. Gerd faqat bronza uchun kechgan bahsda raqib darvozasini ishg‘ol eta olmagan. Bitta jahon chempionatida 10 gol urish – ajoyib ko‘rsatkich. Ammo ushbu buyuk to‘purar ham Fontenga yeta olmagan.

Messi «abadiy» rekordni buza oladimi?

Fonten 1958 yilgi jahon chempionatida jami 6 o‘yinda maydonga tushgan. Hozirgi format esa bir jamoa uchun sakkiz o‘yin o‘tkazish imkoniyatini taqdim etadi. Agar Messi bir o‘yinda o‘rtacha ikki gol urish tempini davom ettiradigan bo‘lsa, u yarimfinaldayoq Fontenni quvib o‘tishi mumkin. Albatta, buning uchun amaldagi chempionlar o‘sha bosqichgacha yetib borishi talab etiladi. Ammo Argentina yana beshta o‘yin o‘tkazsa va Leo har bir o‘yinda o‘rtacha bittadan gol ursa, bu rekordni yangilash uchun yetarli bo‘lmaydi.

Uanalyse tahliliy platformasi Messining Fontenning natijasini yangilash imkoniyatini baholagan. Lekin bu ancha kamtarona baho bo‘lgan. Modellashtirish natijalariga ko‘ra, Leoda bitta jahon chempionatida 13+ gol urish ehtimoli 4,4 foizni tashkil etadi. Kilian Mbappening pley-offdan oldingi imkoniyati esa (fransuz hujumchisi guruh bosqichida to‘rt gol urgandi, pley-offda Shvetsiyaga qarshi o‘yinda gollari sonini Messiniki bilan tenglashtirib oldi) yanada pastroq – 0,8 foiz edi. Shu tariqa, Fontenning rekordi 2026 yilgi jahon chempionatidan keyin ham saqlanib qolishi ehtimoli yuqori. Lekin bu oqshom Messi Kabo-Verdega qarshi o‘yinda (o‘yin Toshkent vaqti bilan 4 iyulga o‘tar kechasi, soat 3.30 da boshlanadi) imkoniyatini yaxshilab olishi ham mumkin.

Source link