Samarqand viloyatining Pastdarg‘om tumanidagi «Kichik Nayman» mahalla fuqarolar yig‘inida istiqomat qiluvchi bir guruh aholi nomidan «Xabar.uz» tahririyatiga murojaat kelib tushdi.

Unda jiddiy ijtimoiy muammolar, xususan, aholining kundalik turmush tarziga bevosita daxldor bo‘lgan suyultirilgan gaz ta’minotidagi uzilishlar bugungi kunda odamlarni og‘ir ahvolga solib qo‘ygani tilga olingan.

Murojaatda ta’kidlanishicha, mahalla aholisiga har 45 kunda yetkazib berilishi lozim bo‘lgan suyultirilgan gaz balonlari 106 kun deganda, ya’ni 3 oydan ziyod vaqt o‘tib yetib kelgan. Tartib bo‘yicha gaz balonlari o‘z vaqtida to‘ldirilmagani sababli, xonadonlardagi ikkita balon ham butunlay bo‘shab qolgan. Biroq «Pastdarg‘omtumangaz» xodimlari kelgan vaqtda aholining faqatgina bittadan gaz balonini almashtirib bergan, xolos. Navbatdagi ta’minot yana 100 kundan keyin kelishi inobatga olinsa, bitta gaz baloni xonadon ehtiyojlariga mutlaqo yetmasligi tayin.

Bunday uzoq muddatli uzilishlar, ayniqsa, ijtimoiy himoyaga muhtoj qatlam, yolg‘iz keksalar, nogironligi bo‘lgan shaxslar va yosh bolali oilalar uchun haqiqiy sinovga aylanmoqda. Tabiiy gaz yo‘qligi sababli, aholi qish mavsumi uchun g‘amlab qo‘ygan o‘tinlarini yoz kunlaridayoq o‘choqqa yoqishga majbur bo‘lyapti. Keksalarga issiq choy, yosh chaqaloqlarga kuniga bir necha bor sutli bo‘tqa (kasha) tayyorlash kerak bo‘lgan oilalar ayni damda juda qiynalmoqda, deyiladi.

Bundan tashqari, iste’molchilar «Pastdarg‘omtumangaz» xodimlarining xatti-harakatlaridan ham norozi bo‘lishmoqda. Ma’lum qilinishicha, xodimlar bir dona suyultirilgan gaz baloni uchun belgilangan 40 ming so‘m o‘rniga aholidan noqonuniy ravishda 45 ming so‘mdan pul yig‘ib olishmoqda. Kamiga, tarqatilayotgan gaz balonlarining aksariyati eski va me’yoridan kam to‘ldirilgan bo‘lib, ularni tortib ko‘rish uchun maxsus yuk mashinalarida bo‘lishi shart bo‘lgan o‘lchov tarozilari umuman ishlamaydi.

Eslatib o‘tamiz, xuddi shu mahalla aholisi 2026-yilning 18-fevralida ham gaz balonlari o‘z vaqtida yetkazilmayotganidan norozi bo‘lib tahririyatimizga murojaat yo‘llagandi. Qishdan chiqdik, bahor o‘tdi, yoz boshlanib ketdi — muammo o‘sha-o‘sha.

Aholining jiddiy e’tirozi va haqli noroziligiga sabab bo‘layotgan ushbu og‘ir vaziyat yuzasidan mutasaddi tashkilotlardan, xususan, viloyat va tuman gaz ta’minoti korxonalari hamda nazorat organlaridan tezkor amaliy choralar va rasmiy izoh kutib qolamiz.

Source link

Mamlakatimizda turizmni yangi bosqichga olib chiqishda mavjud muammolarni o‘rganish, sohaga yangi xalqaro tajribalarni joriy etish yuzasidan Turizm qo‘mitasi raisi A.Aqqulov rahbarligida sohada faoliyat ko‘rsatuvchi tadbirkorlik subyektlari ishtirokida navbatdagi ochiq muloqot tashkil etildi.

Uchrashuvda mamlakatimizdan xorijga sayohatga chiquvchi fuqarolarimiz hamda ichki turizm yo‘nalishida sayohat qilayotgan mahalliy sayyohlarning xavfsizligini ta’minlashda sug‘urta tizimining o‘rni, bu boradagi mavjud mexanizmlar samaradorligi va ularni yanada takomillashtirish masalalari atroflicha muhokama qilindi.

Tadbirda sug‘urta kompaniyalari, turoperatorlar, turagentliklar hamda O‘zbekiston Respublikasi Istiqbolli loyihalar milliy agentligi vakillari ishtirok etib, sayyohlarga taqdim etilayotgan sug‘urta xizmatlari, turistik paketlar tarkibidagi himoya mexanizmlari hamda xalqaro amaliyotda qo‘llanilayotgan ilg‘or yondashuvlar haqida fikr almashdilar.

Shuningdek, ishtirokchilar tomonidan turistlarning huquq va manfaatlarini himoya qilish, baxtsiz hodisalar, tibbiy holatlar yoki sayohat davomida yuzaga kelishi mumkin bo‘lgan boshqa kutilmagan vaziyatlarda sug‘urta xizmatlaridan foydalanish jarayonlarini soddalashtirish bo‘yicha takliflar bildirildi.

Turizm qo‘mitasi raisi A.Aqqulov o‘z so‘zida mamlakatimizda xavfsiz va barqaror turistik muhitni shakllantirish davlat siyosatining muhim yo‘nalishlaridan biri ekanini ta’kidlab, bu borada davlat idoralari, xususiy sektor va sug‘urta tashkilotlari o‘rtasidagi hamkorlikni yanada kuchaytirish zarurligini qayd etdi.

Uchrashuv yakunlariga ko‘ra, turistik sug‘urta xizmatlarini raqamlashtirish, onlayn sug‘urta polislarini rasmiylashtirish imkoniyatlarini kengaytirish, turistlarga axborot berish tizimini takomillashtirish hamda sohadagi normativ-huquqiy bazani xalqaro standartlar asosida takomillashtirish bo‘yicha takliflarni umumlashtirishga kelishib olindi.

Source link

Bugun O‘zbekiston Respublikasi Bosh prokurori o‘rinbosari Jamshid Xatamov, Iqtisodiyot va moliya vaziri o‘rinbosari Akmal Haydarov hamda Prezident Administratsiyasi sho‘’ba boshlig‘i Aziz To‘ychiyev rahbarligida yashirin iqtisodiyotni qisqartirish masalalariga bag‘ishlangan yig‘ilish o‘tkazildi.

Tadbirda ushbu yo‘nalish uchun mas’ul vazirlik va idoralar, mahalliy hokimliklar, huquqni muhofaza qiluvchi organlar hamda iqtisodiy sohadagi tashkilotlar rahbarlari ishtirok etdi.

Yig‘ilishda joriy yilning dastlabki besh oyi davomida yashirin iqtisodiyotni qisqartirish bo‘yicha amalga oshirilgan ishlar tahlil qilinib, erishilgan natijalar, mavjud muammo va kamchiliklar muhokama qilindi.

Shuningdek, kelgusida mazkur yo‘nalishda ishlarni samarali tashkil etish, nazorat mexanizmlarini takomillashtirish, amalga oshirilayotgan chora-tadbirlar natijadorligi ustidan doimiy monitoring o‘rnatish maqsadida «kundalik so‘rov» tizimini joriy etish masalalari ko‘rib chiqildi.

Yig‘ilishda yashirin iqtisodiyotni qisqartirishga mas’ul tashkilotlar faoliyatini KPI tizimi asosida baholab borish, sohadagi mas’ul rahbarlarning shaxsiy javobgarligini kuchaytirish hamda belgilangan vazifalar ijrosini ta’minlash yuzasidan tegishli topshiriqlar berildi.

Source link

Barcha hududlardan 7-14 yoshli jami 1 295 nafar yetim va ota-ona qaramog‘idan mahrum bo‘lgan bola kasaba uyushmalari tizimidagi oromgohlarda 12 kun davomida dam oladi. Yo‘llanmalar va dam olish bilan bog‘liq barcha xarajatlar Ijtimoiy himoya davlat jamg‘armasi mablag‘lari hisobidan to‘liq qoplab beriladi.

Yetim va ota-ona qaramog‘idan mahrum bo‘lgan bolalarning yozgi ta’til davrini mazmunli tashkil etish, ularning sog‘ligini mustahkamlash hamda ijtimoiylashuvini qo‘llab-quvvatlash maqsadida yangi ijtimoiy loyiha yo‘lga qo‘yildi.

Ijtimoiy himoya milliy agentligi va O‘zbekiston kasaba uyushmalari Federatsiyasi hamkorligida yo‘lga qo‘yilgan loyiha doirasida barcha hududlardan 7-14 yoshli jami 1 295 nafar yetim va ota-ona qaramog‘idan mahrum bo‘lgan bola kasaba uyushmalari tizimidagi oromgohlarda 12 kun davomida dam oladi.

Loyiha ishtirokchilari uchun yo‘llanmalar va dam olish bilan bog‘liq barcha xarajatlar Ijtimoiy himoya davlat jamg‘armasi mablag‘lari hisobidan to‘liq qoplab berilmoqda.

Loyihaning birinchi bosqichi doirasida 1062 nafar bola oromgohlarga yuborilib, sog‘lomlashtirish tadbirlari boshlandi.

Source link

O‘zgidromet ma’lumotlariga ko‘ra, bugun kunduzi yog‘ingarchilik kutilmaydi. Shamol 7-12 m/s tezlikda esadi, baʼzi joylarda 13-18 m/s gacha kuchayishi, shimolida 20-22 m/s gacha kuchayishi, ayrim joylarda chang-to‘zonlar bilan kuzatilishi mumkin.  Harorat 32-37° bo‘ladi.
 
Toshkentda yog‘ingarchilik kutilmaydi. Shamol 3-8 m/s tezlikda esadi. Harorat 34-36° bo‘ladi.
 
Tog‘ oldi va tog‘li hududlarda ayrim joylarda qisqa muddatli yomg‘ir yog‘ishi, momaqaldiroq bo‘lishi mumkin. Sel-suv toshqin hodisalari yuzaga kelishi mumkin. Shamol 7-12 m/s tezlikda esadi. Harorat 23-28° bo‘ladi.

Source link