Iqtisodiyot
O‘zbekistonda sun’iy intellekt statistika to‘plash uchun odamlarga telefon qiladi
Janubiy Koreya hukumati O‘zbekiston statistika tizimini rivojlantirish uchun 3,8 mln dollar grant ajratdi. Statistika qo‘mitasining Kun.uz’ga ma’lum qilishicha, bu pullar hisobidan CATI tizimi joriy qilinadi. Hozirgi tanlanma kuzatuvlarda xodimlar joyiga chiqib, odamlar bilan intervyu o‘tkazayotgan bo‘lsa, CATI orqali kompyuter avtomatik ravishda aholi vakillaridan telefonda intervyu oladi.
O‘zbekiston Milliy statistika qo‘mitasi va Koreya Respublikasining Statistics Korea idorasi 2025-2028 yillarga mo‘ljallangan “Statistika salohiyatini oshirish” loyihasi doirasida hamkorlik boshladi.
Koreya hukumatining rivojlanishga rasmiy yordam dasturi (ODA) doirasida 3,8 million AQSh dollari miqdoridagi grant asosida moliyalashtiriladigan ushbu loyiha O‘zbekistonda statistika tizimini modernizatsiya qilish, raqamli texnologiyalar va xalqaro tajribalarni joriy etishga qaratilgan.
Qo‘mita matbuot kotibi Usmon Abdurasulov grant mablag‘lari nimaga ishlatilishi haqida Kun.uz’ga ma’lumot berdi.
“Janubiy Koreya tomonidan O‘zbekiston Statistika agentligiga ajratiladigan 3,8 mln dollarlik grant qaytarilmaydigan mablag‘ hisoblanadi. Bu O‘zbekisotn va Janubiy Koreya o‘rtasida imzolangan hamkorlik kelishuvi doirasida amalga oshirilyapti. Grant mabag‘lari asosiy 4 yo‘nalishga sarflanadi. Birinchisi – kadrlar malakasini oshirish. Bunda xorijiy ekspertlarni jalb qilgan holda xodimlar malakasi oshiriladi. Bundan tashqari, bizning xodimlarimiz Koreyaga borib, malaka oshirish maqsadida o‘quv seminarlariga qatnashishi mumkin. Keyingi yo‘nalishda statistik tadqiqotlar institutida kompyuter va audio qurilmalar bilan jihozlangan zamonaviy o‘quv xonalari tashkil etiladi.
Uchinchi yo‘nalish – CATI tizimini joriy etish. Bu orqali telefon yordamida intervyu o‘tkazish tizimi joriy etiladi. Ushbu tanlanma kuzatuvlarni tezkor, aniq amalga oshirish imkonini beradi. Bizda hozir kuzatuv jarayonlarida intervyular olish uchun joyiga chiqiladi, yoki boshqa tanlanma kuzatuvlar obektga chiqib o‘tkaziladi. Sun’iy intellektga asoslangan CATI tizimi orqali odamlarga avtomatik telefon qilib, savollarga javob olinadi. Bu statistik kuzatuvlar uchun vaqt va mablag‘ni tejaydi.
To‘rtinchisi – ma’lumotlar integratsiyasi. Statistik ma’lumotlarni beradigan davlat organlari, masalan bojxona, soliq organlaridan ma’lumotlar shakllanadi. Ma’muriy ma’lumotlar bazalarini boshqarish tizimi yaratilib, davlat organlari o‘rtasida ma’lumotlar integratsiyasi ta’minlanadi va statistik tahlillar avtomatlashtirilgan, ishonchli platformalarda amalga oshiriladi”, – dedi Usmon Abdurasulov.
Koreya statistikasini rivojlantirish instituti loyiha menejeri Kim Kvangsupning so‘zlariga ko‘ra, Koreya tomoni O‘zbekiston barqaror rivojlanish maqsadlariga erishishida ushbu loyiha orqali o‘z hissasini qo‘shmoqchi.
Iqtisodiyot
Saida Mirziyoyeva Gonkongning Henderson Land Group xoldingi boshqaruvi raisi bilan uchrashdi
Prezident Administratsiyasi rahbari Saida Mirziyoyeva XXRning Gonkong maxsus ma’muriy hududidagi eng yirik xoldinglardan biri — Henderson Land Group boshqaruvi raisi Piter Li bilan uchrashuv o‘tkazdi.
Tomonlar qayta tiklanuvchi energetika, Yangi Toshkent infratuzilmasini rivojlantirish va ta’lim sohalaridagi istiqbolli qo‘shma loyihalarni muhokama qildi.
«Mamlakatimiz investitsiyalar uchun ochiq va biz Gonkongning yetakchi biznes doiralari bilan hamkorlikdan manfaatdormiz. Sheriklikdagi tashabbuslarni, jumladan, yangi tashkil etilayotgan Toshkent xalqaro moliya markazi orqali ham qo‘llab-quvvatlashga tayyormiz», — deb yozdi Saida Mirziyoyeva.
Administratsiya rahbari O‘zbekiston va Gonkong o‘rtasida uzoq muddatli iqtisodiy hamkorlikni rivojlantirish uchun katta imkoniyatlar borligiga ishonch bildirdi.
Markaziy bank 2026-yil 9-oktyabrdan valyutalarning yangi kursini belgiladi.
AQSh dollari 37,38 so‘mga oshib, 11 846,57 so‘m etib belgilandi.
Yevro kursi 34,69 so‘mga oshdi va 13 240,91 so‘m bo‘ldi. Funt-sterling 15 631,55 so‘mni tashkil qildi (29,25).
Rossiya rubli 138,95 so‘m etib belgilandi (+0,8).
Markaziy bank 2026-yil 6-oktyabrdan valyutalarning yangi kursini belgiladi.
AQSh dollari 5,5 so‘mga oshib, 11 778,45 so‘m etib belgilandi.
Yevro kursi 25,62 so‘mga tushdi va 13 198,93 so‘m bo‘ldi. Funt-sterling 15 580,53 so‘mni tashkil qildi (+31,99).
Rossiya rubli 138,35 so‘m etib belgilandi (-2,79).
Milliy statistika qo‘mitasi ma’lumotlariga ko‘ra, 2026-yil yanvar–iyul oylarida O‘zbekistonga 46 davlatdan qariyb 28,5 ming tonna shokolad mahsulotlari olib kirilgan.
Import qilingan mahsulotlarning umumiy qiymati 123,7 mln AQSh dollarini tashkil etgan. Bu o‘tgan yilning mos davriga nisbatan 1,6 ming tonnaga yoki 6 foizga ko‘p.
Import hajmi bo‘yicha Rossiya keskin ustunlik qilgan. Yilning dastlabki yetti oyida Rossiyadan O‘zbekistonga 19,5 ming tonna shokolad mahsulotlari yetkazib berilgan.
Rossiyadan kelgan shokolad mahsulotlari umumiy importning qariyb 70 foizini tashkil etgan. Keyingi o‘rinda Ukraina bo‘lib, undan 2,2 ming tonna mahsulot import qilingan.
Qozog‘istondan 914 tonna, Belarusdan 805,2 tonna shokolad mahsulotlari olib kirilgan. Litvadan import 746,2 tonnani tashkil etgan.
Turkmaniston 715,2 tonna, Turkiya esa 569,5 tonna ko‘rsatkich bilan keyingi o‘rinlarda qayd etilgan. Qolgan davlatlar hisobiga 3 ming tonna mahsulot to‘g‘ri kelgan.
Prezident Shavkat Mirziyoyev raisligida Andijon viloyatini ijtimoiy-iqtisodiy rivojlantirish, tadbirkorlikni qo‘llab-quvvatlash va aholi daromadlarini oshirish masalalari bo‘yicha yig‘ilish o‘tkazilmoqda.
Joriy yilning birinchi yarmida viloyat iqtisodiyoti 8,8 foiz, sanoat 9,2 foiz, xizmatlar 16,1 foiz, investitsiyalar 8,9 foizga o‘sgani qayd etildi.
– Bizga o‘sishdagi raqamlar emas, balki har bir ko‘rsatkich har bir oilaning kundalik hayotiga qanday o‘zgarish olib kirgani muhim,– dedi davlatimiz rahbari.
Andijonda yer va tabiiy boyliklar cheklangan bo‘lsa-da, harakatchan aholi, kuchli tadbirkorlik ruhi, ko‘p sonli yoshlar, sanoat maktabi va katta bozor kabi imkoniyatlar borligi ta’kidlandi.
So‘nggi o‘n yilda viloyatga respublika budjetidan 20 trillion so‘m, banklar tomonidan tadbirkorlik uchun 90 trillion so‘m yo‘naltirildi. Birgina joriy yilda aholi farovonligini oshirishga 6 trillion so‘m ajratildi.
Hokimlarga berilgan vakolatlar va yaratilgan moliyaviy imkoniyatlar shunga munosib natijaga aylanishi zarurligi ko‘rsatib o‘tildi.
